Служба Пресвятей Богородице, иконы ради Ея Елецкия, яже во Харькове граде

На Го́споди, воззва́х: стихи́ры пра́здника 3, и Богоро́дицы на 5, глас 2:

Дре́вле Моисе́ю в купине́ несгара́емей/ та́инство Присноде́вы явле́нное/ и сего́ па́стыря избра́нным лю́дем гла́сом Бо́жиим наре́кшее,/ днесь в Росси́йстей стране́ мона́хов нача́льнику/ па́ки в подо́бии явля́ется:/ той бо зрит Ма́терь Бо́жию,/ во огни́ на дре́ве возсе́дшую/ и Предве́чнаго Младе́нца на руку́ держа́щую,/ и подаю́щую ми́рови мир/ и душа́м на́шим ве́лию ми́лость.

Вои́стину блаже́ни суть изгна́ннии пра́вды ра́ди:/ та́ко бо Моисе́й уго́ден Бо́гу в земли́ изгна́ния своего́ явися,/ ему́ же быв подража́тель Анто́ний преподо́бный,/ от князя непра́ведно гони́мый,/ и́же, к преде́лом Черни́говским прише́д,/ виде́ния Богоро́дицы в о́гненней купине́ сподо́бися,/ и сие́ на дщи́це написа́ти повеле́в,/ на́ше упова́ние на Ма́терь Бо́жию умножа́ет/ и науча́ет от Тоя́ проси́ти ми́рови ми́ра/ и душа́м на́шим ве́лия ми́лости.

Ве́мы, о Влады́чице Преблага́я,/ я́ко рабо́м Бо́жиим Помо́щница неуста́нная явля́ешися/ и тем ре́вность их о Бозе укрепля́еши,/ оба́че и нас, таковы́я ре́вности не иму́щих,/ и то́чию греха́ми богате́ющих,/ не отри́ни от Твоего́ заступле́ния,/ но покая́ние на́ше приими́/ и, сие́ к Престо́лу Сы́на Твоего́ возне́сши,/ сердца́ на́ша утеше́ния испо́лни,/ и ниспосли́ душа́м на́шим мир и ве́лию ми́лость.

Прииди́те, христоимени́тии лю́дие,/ чудотво́рному о́бразу Бо́жия Ма́тери поклони́мся/ и виде́нием Ея́ умили́мся,/ ка́ко, во огни́ неврежде́нно пребыва́ющи,/ Огнь Божества́ на руку́ Свое́ю но́сит./ Блаже́ни о́чи, ви́девшия сие́ чу́до,/ блаже́ни есмы́ и мы, о сем преда́ние ве́рное прии́мше./ О Влады́чице, не оста́ви род наш/ и Твое́ предста́тельство всегда́ явля́й нам,/ подаю́щи душа́м на́шим мир и ве́лию ми́лость.

Сла́ва, глас 8:

Огнь купины́ Моисе́овы неизсуши́вый,/ ниже́ о́троки в пещи́ Вавило́нстей опали́вый,/ а́ще и преди́вное яви́ся чу́до,/ но па́че сего́ Огнь Божества́, в Тя всели́выйся/ и утро́бы Твоея́ не опали́вый,/ ужа́сное открыва́ет лю́дем та́инство./ О, ка́ко невмести́маго Небесы́ понесла́ еси́,/ ка́ко на руку́ Того́ прия́ла еси́,/ на Него́же Херуви́мы взира́ти не сме́ют?/ Мы же, со стра́хом на Твой взира́юще о́браз,/ упова́нием на милосе́рдие Твое́ ду́ши своя́ ободря́ем/ и Арха́нгельский глас с любо́вию Тебе́ возно́сим:/ ра́дуйся, Благода́тная, Госпо́дь с Тобо́ю.

И ны́не, пра́здника.

Вход и чте́ния три.

Бытия чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо, за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и нисхожда́ху по ней,/ Госпо́дь же утвержда́шеся на ней, и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна́ своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но до́м Бо́жий,/ и сия́ врата́ Небе́сная.

Проро́чества Иезекии́лева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего, и прииму́ вы,– глаго́лет Адонаи́ Госпо́дь./ И обрати́ мя на путь врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ра хра́ма или́ пра́здника Сре́тения и сия́, глас 3:

Днесь во хра́ме Влады́чицы, ве́рнии, соше́дшеся/ и ду́ши своя́ па́мятию чуде́с Ея́ умиля́юще,/ ревни́тели до́брым де́лом бы́ти потщи́мся./ Весть бо Пречи́стая таковы́м утеше́ние подава́ти/ и пострада́вшия пра́вды ра́ди заступа́ти,/ сего́ бо ра́ди преподо́бному Анто́нию на дре́ве яви́ся,/ егда́ во изгна́нии сый моли́тву возноша́ше./ С ним же и мы Влады́чице возопии́м:/ да бу́дет ми́лость Твоя́ с на́ми,/ о Де́во Пренепоро́чная.

На стихо́вне стихи́ры, глас 2.

Подо́бен: До́ме Евфра́фов:

Ужасе́ся преподо́бный Анто́ний,/ во изгна́нии пребыва́я,/ егда́ на ело́вом дре́ве/ узре́ Ма́терь Бо́жию,/ Младе́нца Предве́чнаго на руку́ нося́щую.

Стих: Помяну́ и́мя Твое́/ во вся́ком ро́де и ро́де.

Разуме́в Богома́тере виде́ние/ Христо́в изгна́нник преподо́бный Анто́ний Пече́рский,/ а́бие ко иконопи́сцу поспеша́ет/ и виде́ния бы́вшаго ему́ подо́бие/ написа́ти тому́ повелева́ет.

Стих: Слы́ши, Дщи, и виждь,/ и приклони́ у́хо Твое́.

Ра́дуйтеся, лю́дие, и весели́теся,/ о́браз сего́ виде́ния днесь зря́ще,/ не оскуде́ бо и поны́не,/ и николи́же оскуде́ти мо́жет/ Пресвяты́я Богоро́дицы заступле́ние.

Сла́ва, глас 6:

Я́коже преподо́бному Анто́нию/ печа́ли разреше́ние обетова́ла еси́ Твои́м виде́нием, Пречи́стая,/ и любо́вь держа́вствующаго к тому́ па́ки обрати́ла еси́,/ та́ко и нам благода́тный мир от Сы́на Твоего́ низпосли́/ и всякия раздо́ры от ста́да Твоего́ отжени́,/ любо́вь же Христо́ву среди́ нас Твое́ю моли́твою утверди́/ и да́руй нам пре́жде конца́ покая́ние.

И ны́не, пра́здника.

Тропа́рь, глас 6:

Твоего́ милосе́рдия дарова́ния воспомина́юще, Влады́чице,/ и Твой чудотво́рный о́браз благогове́йно лобыза́юще,/ упова́нием же Твоея́ по́мощи сердца́ на́ша веселя́ще,/ а́ки среди́ нас пребыва́ющую Тя помышля́ем/ и ве́рою Тебе́ вопие́м:/ Твоего́ моли́ Сы́на и Го́спода,/ да научи́т нас за́поведи Его́ всегда́ твори́ти/ и злыя искуше́ния побежда́ти,/ и Тебе́, Предста́тельницу на́шу,/ досто́йно пе́ти и сла́вити во ве́ки. (Два́жды)

И пра́здника: Ра́дуйся, Благода́тная Богоро́дице Де́во:

НА У́ТРЕНИ

На Бог Госпо́дь: тропа́рь пра́здника два́жды.

Сла́ва, и ны́не, Богоро́дицы.

По 1-й кафи́зме седа́лен, глас 7:

Се и́мамы, бра́тие, сокро́вище ве́лие,/ чудотво́рный Пречи́стыя лик,/ повеле́нием преподо́бнаго Анто́ния напи́санный,/ и та́ко прича́стницы виде́ния уго́дника я́вльшеся,/ того́ ве́ре и терпе́нию научи́мся/ и Ма́терь Бо́жию досто́йно почита́ти потщи́мся.

Сла́ва, и ны́не, пра́здника.

По 2-й кафи́зме седа́лен, глас 6:

Не уныва́йте у́бо, о бра́тие,/ а́ще пра́вды ра́ди гоне́ние претерпи́те,/ таковы́х бо утеша́ет Де́ва Чи́стая,/ я́ко Сама́ со Христо́м от И́рода в изгна́нии пребы́вшая./ Сего́ ра́ди и мы вся́кую скорбь ра́достно претерпи́м/ и то́чию терпе́ния дар непреста́нно проси́ти потщи́мся.

Сла́ва, и ны́не, пра́здника.

По полиеле́и седа́лен, глас 3:

Богоро́дице, изгна́нных Уте́шительнице,/ наги́х и си́рых Засту́пнице,/ боля́щих исцеле́ние и немощны́х покро́ве,/ на́шего не посрами́ упова́ния,/ но прося́щих Твоея́ по́мощи пред чудотво́рным о́бразом укрепи́/ и земну́ю жизнь на́шу умири́,/ па́че же Небе́снаго Ца́рствия предста́тельством Твои́м рабы́ Твоя́ сподо́би.

Проки́мен и Ева́нгелие Богоро́дичны.

По 50-м псалме́ стихи́ра, глас 2:

Днесь чудеса́ от Еле́цкия ико́ны Влады́чицы воспомина́ются,/ днесь от Тоя́ исцеле́ннии благодаре́ние прино́сят,/ днесь во храм Ея́ благове́рнии лю́дие стека́ются,/ си́лы Небе́сныя о заступле́нии Пречи́стыя ра́дуются,/ и преподо́бный Анто́ний с ни́ми на Небеси́ ликовству́ет,/ мы же непреста́нно вопие́м:/ ра́дуйся, Предста́тельнице на́ша,/ и на́ших скверн не возгнуша́вшися,/ моли́твою Твое́ю ду́ши на́ша просвети́/ и ра́дости благода́тныя испо́лни.

Кано́н пра́здника со ирмосо́м на 6. Кано́н Богоро́дице, глас 2, егоже краегране́сие: Ра́дуйся, Благода́тная, Госпо́дь с Тобо́ю. Ами́нь.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Ра́дуйся, Богоро́дице Всепе́тая! восклица́ем ве́рнии,/ на чудотво́рную Твою́ ико́ну взира́юще,/ я́же ра́дость пе́рвее преподо́бному Анто́нию Пече́рскому виде́нием Твои́м дарова́ла еси́,/ и поны́не подо́бием виде́ния того́, на дщи́це напи́санном,/ всем моля́щимся ра́дость подае́ши,/ моле́ния их бла́гостно прие́млющи.

Анто́ний преподо́бный во изгна́нии непра́веднем томя́ся,/ виде́нием же Богоро́дицы соверше́нное прие́мый утеше́ние,/ сие́ на дщи́це написа́ти повелева́ет и, во святу́ю ла́вру возвраща́яся, ико́ну Ея́ оби́тели Черни́говской вруча́ет,/ я́же и до днесь во гра́де Ха́рькове от всех со благогове́нием зри́тся/ и чудеса́ исцеле́ний источа́ет.

Дре́вле злым тата́ром, на град Черни́гов наше́дшим,/ ико́на Ма́тери Бо́жия чуде́сне в стене́ сокрыва́ется/ и, мно́гим ле́том проше́дшим,/ па́ки христиа́ном на поклоне́ние открыва́ется./ Зри́те у́бо, о лю́дие, Богома́тере вели́кую си́лу,/ Ей же не возмо́гут неве́рнии противоста́ти.

Уго́дника Твоего́, Влады́чице, виде́нием уте́шила еси́,/ нас же, гре́шных, не лиши́ Твоего́ заступле́ния,/ а́ще и недосто́йни сего́ явля́емся:/ покая́ние бо те́плое пред святы́нею Твое́ю вознося́ще, а́ки жена́ ханане́йская,/ неотсту́пно Твоея́ про́сим по́мощи.

Катава́сия: Су́шу глубороди́тельную, зе́млю:

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Ини́и, Правосла́вныя ве́ры врази́/ на преде́лы Черни́говския чрез мно́го лет наше́дше,/ подвиго́ша воево́ду гра́да того́ ико́ну Еле́цкую с собо́ю во ца́рствующий град поя́ти,/ пре́дану бы́вшу Черни́говскому преде́лу язы́ку чужде́му.

Сия́ беды́, о Влады́чице, род наш изба́ви,/ да святы́ня Твоя́ во гра́де Ха́рькове утверди́вшися,/ в том непоколе́блена пребу́дет во ве́ки/ и сердца́ на́ша умиле́нием исполня́ти не преста́нет.

Я́же в ро́де воево́ды того́ я́ко сто лет ико́на Влады́чицы пребы́вши,/ завеща́нием вну́ка его́ в собо́рную це́рковь гра́да Ха́рькова поставля́ется/ и отто́ле моли́твы люде́й Божиих/ сию́, а́ки крыла́ Херуви́мов, при́сно окружа́ют.

Богоро́дице Пречи́стая,/ а́ще и многогре́шни суть лю́дие,/ в Твой святый храм притека́ющии,/ но я́коже Сын Твой спасе́ния ра́ди гре́шник от Небе́с к нам прише́л есть,/ та́ко и Ты от Небе́сных круго́в на моле́ния на́ша при́зри/ и проше́ний люде́й Твои́х не пре́зри, Всепетая.

Конда́к пра́здника, глас 1: Утро́бу Деви́чу: и и́кос (зри сего месяца 2 день).

Таже седа́лен, глас 8:

Вои́стину близ есть Госпо́дь сокруше́нным се́рдцем,/ вои́стину смире́нныя ду́хом Всеблаги́й Твой, о Влады́чице, Сын спаса́ет,/ поне́же а́ще и еди́ному Анто́нию уго́днику виде́ние Твое́ яви́ти сподо́би,/ но того́ подо́бием и до днесь раби́ Твои́ упова́ния на Бо́га исполня́ются,/ и утвержде́ние в Правосла́вной ве́ре обрета́ют,/ и о пра́вде ре́вностию озаря́ются.

Сла́ва, и ны́не, пра́здника.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя челове́ка./ Тем зову́ Ти: сла́ва си́ле Твое́й, Го́споди.

Лю́дие Бо́жии, ми́лости от Ма́тере Госпо́дней прие́млющии,/ ду́ши своя́ похвала́ми Пречи́стей насыща́ют,/ но насы́тити не могу́ще, ра́дуйся, Благода́тная, па́ки к Ней взыва́ют/ и, та́ко творя́ще, искуше́ния грехо́вная от себе́ отгоня́ют.

А́ще и премно́го укрепи́ся на христиа́ны диа́вол,/ овогда́ у́бо враги́ на ня посыла́яй,/ овогда́ же обы́чаи растле́нныя посреде́ нас разсеева́яй,/ но мы на Твое́ заступле́ние, Влады́чице, упова́юще,/ сего́ де́рзости противля́тися не преста́нем.

Го́ре вам, злочести́вии,/ от почита́ния Ма́тере Бо́жия и от Це́ркве Христо́вой отпа́дшии ерети́цы,/ себе́ бо саме́х сия́ ра́дости лиши́ли есте́,/ е́же Пречи́стую Богома́терь прославля́ти/ и тем сердца́ своя́ умиле́нием исполня́ти./ Пока́йтеся у́бо и к на́шему ли́ку сопричти́теся.

О́ле еретико́в безу́мия,/ от свята́го Ева́нгелия научи́тися не хотя́щих,/ ка́ко Христо́с пе́рвое чу́до милосе́рдия Своего́/ предста́тельством Матере Своея́ яви́,/ ве́рныя же научи́,/ да моле́ния своя́ к Ней несомне́нною ве́рою возно́сят.

Песнь 5

Ирмо́с: Угль Иса́ии проявлейся,/ Со́лнце из де́вственныя утро́бы возсия́ во тьме заблу́ждшим,/ Богоразу́мия просвеще́ние да́руя.

Да утвержда́ется Правосла́вная ве́ра/ умноже́нием исцеле́ний от Твоея́ чудотво́рныя ико́ны, о Влады́чице, быва́емых,/ да прославля́ется в лю́дех Твое́ предста́тельство,/ па́че же над страстьми́ побе́дою увенча́й/ на́ша зде возноси́мыя Тебе́ моли́твы.

А́ще и не вско́ре услы́шана бу́дет моли́тва ва́ша, бра́тие,/ я́коже Па́вла об отступле́нии сатанина́ а́нгела моли́вшагося,/ но сию́ долготерпели́вно повторя́юще, си́це восклица́йте:/ О Влады́чице,/ гре́шнаго раба́ Твоего́ не возгнуша́йся,/ но отпуще́ние грехо́в мне у Сы́на Твоего́ испроси́.

Твое́й чудотво́рней ико́не, Пречи́стая, покланя́яся,/ и сию́ благогове́йно лобыза́я,/ о свои́х же грехопаде́ниих ужаса́яся, си́це реку́:/ а́ще подоба́ет мне их ра́ди ско́рби приима́ти,/ не́гли терпе́ния дар моли́твою Твое́ю мне ниспосли́.

На сие́ у́бо, о бра́тие, скорбя́ми испыту́ются ду́ши на́ша,/ да не горды́не жите́йстей, ни жестосе́рдию поработи́мся,/ но да смиреному́дрию преподо́бнаго Анто́ния подража́юще,/ утеше́ния от Ма́тере Бо́жия,/ я́ко ра́дости всех скорбя́щих да испо́лнимся.

Песнь 6

Ирмо́с: Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь/ но я́коже Ио́ну от зве́ря,/ и мене́ от страсте́й возведи́ и спаси́ мя.

Аз недосто́йный ни благи́м де́лом,/ ниже́ терпе́нию навыко́х, окая́нный,/ увы́ мне и моли́тва моя́ не испра́вися по достоя́нию пред Тобо́ю,/ но, Влады́чице,/ Твоея́ ми́лости бе́здна мое́ да покры́ет неможе́ние/ и благода́тнаго покая́ния дар да ниспосле́т ми.

Язы́ки а́нгельскими и челове́ческими аще бы возмо́г аз глаго́лати,/ но и тогда́ Твои́х щедро́т мно́жества,/ пра́ведным и гре́шным челове́ком даро́ваннаго, воспе́ти несть возмо́жно:/ душа́м бо и телесе́м здра́вие подае́ши, Блага́я,/ и ка́ющияся ми́луеши те́пле.

Го́споди, Го́споди,/ се милосе́рдия Твою́ бе́здну в том позна́хом,/ я́ко не то́чию род челове́ческий от кля́твы зако́нныя искупи́л еси́,/ но и Предста́тельницу те́плую тому́ дарова́л еси́,/ Твою́ Пречи́стую Ма́терь,/ Ей же днесь благода́рное прино́сим поклоне́ние.

О́ному поклоне́нию да приобща́тся язы́цы,/ Твоего́ Сы́на до днесь не уве́девшии,/ или́ от моли́твы, я́же к Тебе́, отпа́дшии,/ да всем челове́ком уве́ровавшим Твоя́ ниспосыла́ется благода́тная по́мощь.

Конда́к, глас 5:

На неувяда́емом дре́ве уго́днику яви́вшися,/ Твое́ же предста́тельство всем моля́щимся при́сно явля́ющи, Влады́чице,/ и на́шего не отврати́ смире́ннаго моле́ния,/ но прегреше́ний на́ших проще́ния испроси́/ и, ско́рби душ на́ших отъе́мши,/ благода́рственное на́ше приими́ поклоне́ние,/ да любо́вию Тя во ве́ки сла́вим, Всепе́тая.

И́кос:

Я́коже дре́вле виде́нием Пресвяты́я Богоро́дицы прия́т утеше́ние преподо́бный Анто́ний/ и от го́рькаго изгна́ния па́ки во святу́ю ла́вру свою́ ра́достно всели́ся,/ та́ко и о́браз Влады́чицы, сего́ виде́ния па́мять являяй,/ от тата́рскаго плене́ния во́лею Ея́ спасе́н бысть./ Днесь же в вели́ком гра́де Ха́рькове посреде́ собо́рныя це́ркве водруже́нный,/ си́лу моли́тв Бо́жия Ма́тере исцеле́ньми мно́гими свиде́тельствует,/ к Ней же возопии́м:/ О Всеблага́я,/ изгна́нных и скорбя́щих Засту́пнице,/ проше́ния на́ша во благи́х испо́лни,/ да любо́вию Тя во ве́ки сла́вим, Всепе́тая.

Песнь 7

Ирмо́с: Да пресла́вное рождество́ Твое́, Христе́, е́же от Де́вы/ прообрази́ши я́ве, неопали́мы в пещи́ о́троки сохрани́л еси́,/ пе́сньми пою́щия Тебе́:/ отце́в Бо́же, благослове́н еси́.

Се, прии́де, Влады́чице, вре́мя Твоего́ о ве́рных заступле́ния,/ зане́ отвсю́ду от враго́в благоче́стия тесни́ми быва́ют,/ та́же и от де́монских искуше́ний зле обурева́ются,/ уго́дника же Твоего́ Анто́ния кре́пости не иму́ще,/ озаре́ний свы́ше недосто́йни явля́ются./ И́миже у́бо ве́си судьба́ми,/ по́мощь Бо́жию нам испроси́ти потщи́ся.

По́мощи Богоро́дицы Пречи́стыя, о бра́тие, мно́зи свиде́телие зде обрета́ются,/ на́шему же нераде́нию обличи́телие,/ тем же чудотво́рней ико́не Влады́чицы предстоя́ще,/ к покая́нию те́плому устреми́м душ на́ших ше́ствие.

Огнь Небе́снаго све́та объе́млет Тя, Богоро́дице,/ в виде́нии Анто́нию Пече́рскому я́вльшуюся,/ аз же себе́ огню́ гее́нскому грехми́ свои́ми предугото́вах,/ но в ско́рби души́ моея́ вопию́ Ти:/ поми́луй мя, Пречи́стая,/ и покая́нию те́плому научи́ мя, о мне милосе́рдовавши.

Де́лом благи́м ревни́теля покажи́ мя, Пречи́стая,/ гнев на стра́сти грехо́вныя вложи́вши в мою́ ду́шу,/ да ты́я возненави́дев, бли́жния же своя́ возлюби́в,/ стезя́м Госпо́дним после́дую неукло́нно.

Святосла́в, Черни́гова князь,/ на ме́сте явле́ния Влады́чицы це́рковь благоле́пную созда́ти потща́ся/ и ико́ну Пречи́стыя, от преподо́бнаго Анто́ния устро́енную, та́мо поста́ви,/ ей же во град Ха́рьков днесь пренесе́нней, предстоя́ще мо́лимся,/ да и нас хра́мы Сы́на Своего́ быти устро́ит.

Песнь 8

Ирмо́с: В купине́ Моисе́ю Де́вы чу́до,/ на Сина́йстей горе́, прообрази́вшаго иногда́,/ по́йте, благослови́те/ и превозноси́те во вся ве́ки.

Трие́ о́троцы, во огни́ неопа́льны пребыва́юще,/ Богоро́дицы прообрази́ша та́инство,/ я́ко Огнь Божества́ во чре́ве поне́сшей,/ ны́не же Сама́ во огни́ на зелене́ющем дре́ве свято́му я́вльшися,/ в долготерпе́нии того́ и тем нас утвержда́ет.

Оте́чество на́ше, Влады́чице,/ па́че всех стран земли́ чудотво́рными ико́нами Твои́ми просвети́ла еси́,/ я́же, а́ки зве́зды небе́сныя, нощь земна́го жития́ на́шего освеща́ют/ и по пути́ пра́вому ходи́ти нас науча́ют.

Блаже́ни есмы́ вои́стину Предста́тельницу Тя, Влады́чице, иму́ще,/ но вя́щшему осужде́нию пови́нни бу́дем,/ а́ще, о толи́цем спасе́нии Бо́жием небре́гше,/ жития́ на́шего испра́вити не потщи́мся.

О́наго на́шея о святы́не сей ра́дости вино́вника,/ кня́зя Дании́ла Баряти́нскаго,/ дре́влему же Святосла́ву пра́внука,/ и́же ико́ну Влады́чицы от де́да прие́м,/ сию́ пред кончи́ною свое́ю зде хра́му с моли́твою вдаде́,/ Го́споди, ду́шу упоко́й,/ нам же пребыва́ние святы́ни сия́ сотвори́ на по́льзу.

Ю́ноши в Вавилонстей пещи́ спасы́й, Го́споди,/ А́нгелом во огнь соше́дшим,/ нас моли́твами Ма́тере Твоея́ от огня́ страсте́й свободи́, пою́щих:/ благослове́н еси́ в хра́ме сла́вы Твоея, Го́споди.

Песнь 9

Ирмо́с: От земноро́дных кто слы́ша таково́е/ или́ кто ви́де когда́,/ я́ко Де́ва обре́теся во чре́ве иму́щая/ и безболе́зненно Младе́нца поро́ждшая;/ таково́е Твое́ чу́до и Тя, Чи́стая Богоро́дице, велича́ем.

А́нгели Твоему́, Богоро́дице, заступле́нию о нас ра́дуются,/ бе́си же Твои́ми моли́твами дале́че от нас отгоня́ются,/ аз же еда́ глух се́рдцем пребу́ду, Твое́й покланя́яйся святы́не;/ сего́ да не бу́дет,/ но умиле́нием душа́ моя́ да раствори́тся.

Мно́жеству люде́й, се́мо притека́ющему,/ мно́гия дарова́ния от чудотво́рныя ико́ны Бо́жия Матере подаю́тся,/ от них же лу́чшее есть, е́же в чу́вство покая́ния себе́ привести́/ и на дея́ния блага́я устреми́тися./ В сем у́бо по́мощь Твою́ яви́ мне, Пречи́стая.

Искупи́л ны есть Госпо́дь наш, Твой же, Богоро́дице, Сын от вла́сти диа́вола,/ Твоя́ же моли́тва нападе́ния сего́ врага́ на́шего отго́нит,/ у́бо и ны́не о душа́х на́ших предста́тельствуй,/ да приближе́ния святы́ни Твоея́ досто́йны яви́мся.

Никто́же возмо́жет досто́йно Ма́терь Го́спода на́шего просла́вити,/ но мы слеза́ми те́плыми ску́дость слове́с на́ших воспо́лним,/ красоте́ доброде́телей Влады́чицы на́шея дивя́щеся,/ и та́ко Сию́ досто́йно возвели́чим.

Свети́лен.

Подо́бен: Ду́хом во святи́лищи:

Дре́вле Моисе́ю на горе́ Хори́встей,/ по́слежде на Бо́лдинских гора́х Присноде́вы та́инство пра́ведным яви́ся/ и о сем па́мять ико́ною Благода́тной лю́дем дарова́ся,/ Ей же покланя́ющеся, ве́рою чу́до воспева́ем.

Сла́ва, и ны́не, пра́здника.

На хвали́тех стихи́ры пра́здника 3 и настоя́щия 3, глас 6.

Подо́бен: Все отло́жше:

Сокро́вище неоцени́мое,/ Влады́чицы чудотво́рный о́браз,/ два́жды от челове́к надо́лзе сокры́т,/ в на́шем гра́де посреде́ це́ркве от лет мно́гих возсия́,/ темже подно́жию сего́ покланя́ющеся, си́це рцем:/ О Влады́чице,/ при́сно да храни́тся зде сия́ святы́ня/ и в ду́шах на́ших ре́вностию о спасе́нии да отпечатлева́ется,/ во е́же благода́рне воспева́ти Твоя́ благодея́ния.

Егда́ Боже́ственнаго Младе́нца Твоего́ на руку́ Свое́ю носи́ла еси́, Влады́чице,/ тогда́ волхво́в покланя́ющихся словеса́/ и па́стырей испове́дание в се́рдцы Твое́м слага́ла еси́,/ мы же Твои́х чуде́с и виде́ний па́мять/ в сердца́х свои́х непрестанно носи́ти бу́дем,/ Твоему́ же Сы́ну, моля́щеся, глаго́лати:/ о Влады́ко, Твоея́ Ма́тере о нас моли́тву приими́,/ и дар благода́ти Твоея́ ниспосли́ нам,/ да и мы Тебе́ при́снии яви́мся покая́нием,/ я́коже благоразу́мный разбо́йник, возопи́вый:/ помяни́ мя, Го́споди, во Ца́рствии Твое́м.

Зако́ны естества́ побежде́ни бы́ша,/ егда́ Непоро́чная Де́ва во чре́ве зача́т,/ но о сем чудеса́ в житии́ Тоя́ не сконча́шася,/ зане́ и с пло́тию на Не́бо, по кончи́не жи́зни Своея́, принесе́ся/ и па́ки с Небе́с моля́щимся чуде́сную посыла́ет по́мощь,/ па́че же и Сама́ пра́ведным в виде́ниях явля́ется,/ мы же, от обою́ свиде́тельство/ в святе́й ико́не сей зря́ще, ра́дуемся/ и пред не́ю благода́рныя сле́зы пролива́ем.

Сла́ва, глас 2:

Днесь на Небеси́ предстои́т Пречи́стая Де́ва,/ и непрестаю́щее моле́ние о лю́дех возно́сит,/ днесь Тоя́ виде́ние, пра́веднику бы́вшее, воспомина́ется,/ и милосе́рдие Ея́ прославля́ется,/ си́лы Небе́сныя ра́дуются,/ мы же пред Тоя́ ико́ною умиле́нныя возно́сим моли́твы, глаголюще:/ огнь Твоея́ святы́ни да освети́т ду́ши на́ша/ и путь к Небе́сному Ца́рствию певце́м Твои́м да пока́жет, Пречи́стая.

И ны́не, пра́здника.

Славосло́вие вели́кое.

По трисвятом тропа́рь Богоро́дице.

Сла́ва, и ны́не, пра́здника, таже ектении́ и отпу́ст.

НА ЛИТУРГИ́И:

Слу́жба пра́здника и Богоро́дицы.

* * *

А́ще случи́тся пра́зднование Бо́жией Ма́тери ико́ны ра́ди Ея Еле́цкия вне попра́зднства Сре́тения Госпо́дня, то ста́вим на Го́споди, воззва́х: стихи́р 8, повторя́юще я. Сла́ва, и ны́не, Огнь купины́: та́кожде и яже в стихо́вных и в хвали́тных стихи́ра на славу зде писа́ся, поется тогда на Слава, и ныне: седальны же поются единожды, Сла́ва, и ны́не: вторицею, тропарь же на вечерни трижды. На утрени по Бог Господь: дважды, Слава, и ны́не, третицею. Канон же поем на 8, ирмо́с втораго гласа дважды, катавасия: Отве́рзу уста́ моя́: По великом славословии тропарь Богородице единожды. Аще ли случится сей праздник в неделю мытареву или́ ину́ю, аще ли в субботу мясопу́стную, или́ сыропу́стную, или́ во дни седмицы сы́рныя, или́ первыя седми́цы святыя Четыредесятницы, то зри устав о храмех от главы 25-я до главы 32-я.

Моли́тва

Премилосе́рдая на́ша Засту́пнице, и душ на́ших блага́я Храни́тельнице, и теле́с на́ших милосе́рдая Цели́тельнице, Богоро́дице Де́во! Ве́мы, я́ко недосто́йни есмы́, не то́чию Твои́х дарова́ний прича́стницы бы́ти, но и оче́й свои́х на чудотво́рный Твой о́браз возвести́, зане́ ду́ши на́ша грехо́в испо́лнены суть и о́чи зави́стными и блу́дными воззре́ньми оскверне́ни суть. Оба́че Твое́ сострада́ние челове́ком, в ну́ждах и ско́рбех пребыва́ющим, воспомина́юще, им же Твоего́ Боже́ственнаго Сы́на на пе́рвое чу́до в Ка́не Галиле́йстей преклони́ла еси́, и да́же до днесь Того́ пра́ведный гнев от гре́шников отвраща́еши, па́ки и па́ки на мольбу́ Тебе́, пред чудотво́рным Твои́м о́бразом, подвиза́емся и со смире́нным упова́нием Тебе́ про́сим: испроси́ грехо́м на́шим проще́ние, от па́губных страсте́й исцеле́ние, от нечу́вствия и от сна духо́внаго пробужде́ние и о доброде́телех христиа́нских ре́вность. Си́ми у́бо дарова́ньми ду́ши на́ша украси́вши, изба́ви нас от го́рестей, в уны́ние некре́пкая сердца́ на́ша поверга́ющих, исцели́ боле́зни моля́щихся и о ни́хже моли́тву ти́и прино́сят, от напра́сныя сме́рти жизнь на́шу сохрани́ и сию́ христиа́нскою кончи́ною во вре́мя подо́бно увенча́ти сподо́би. Но и земно́е на́ше пребыва́ние от взаи́мныя зло́бы и за́висти огради́, и в любви́ Христо́вой сие́ препровожда́ти нам помози́. Це́рковь Сы́на Твоего́ во всей вселе́нней умно́жи и утверди́, еретико́м обраще́ние ко и́стине испроси́, язы́ком же неве́рным ве́ры и́стинное позна́ние. Та́кожде и одоле́ние на враги́ и супоста́ты да́руй, и всех нас научи́, я́коже во дни весе́лия, та́ко и во дни печа́ли Тебе́ прославля́ти и о всех Сы́на Твоего́ благодари́ти, житие́ свое́ в Его́ святу́ю во́лю вруча́ти со упова́нием ве́чнаго спасе́ния ожида́ти, да и тамо просла́вим Его́ пресвято́е И́мя и Твое́ милосе́рдое предста́тельство во ве́ки веко́в. Ами́нь.