Служба преподобныя матере нашей Евфросинии Александрийския

ВЕЧЕР

На Го́споди, воззва́х: стихи́ры окто́иха, 3.

И святы́я, 3. Глас 5.

Подо́бен: Преподо́бне о́тче:

Ма́ти преподо́бная,/ Евфроси́ние досточу́дная,/ су́що весе́лия возжеле́вши,/ того́ хода́тайствующую ше́ствовала еси́ стезю́:/ бога́тство бо измени́ла еси́ нището́ю мно́гою,/ плотска́го обру́чника Живу́щим во ве́ки,/ пи́щу тле́ющую воздержа́нием,/ поко́й боле́зньми, су́щими в страда́льчестве,/ су́щую в ми́ре преми́рною жи́знию,/ ю́же и получи́ла еси́ с му́дрыми де́вами,/ соблю́дши свещу́ твою́ неуга́сну/ и черто́гу сподо́бившися, я́ко де́ва,/ я́ко неве́ста Христо́ва всехва́льная.

Стру́ями слез напои́вши твой ра́зум,/ угобзи́ла еси́ поще́нием доброде́тельныя плоды́/ и, лоза́ я́коже красне́йшая,/ произнесла́ еси́ гро́зды кра́сныя, честна́я,/ и́хже боже́ственнаго мста22 я́ве насы́щше чу́вства душе́вная,/ наслажда́емся и́стинно твои́м подо́бием/ и весели́мся боже́ственным весе́лием,/ пия́нство отрева́юще, е́же от греха́,/ вопию́ще ти, всечестна́я:/ Христа́ моли́ всегда́/ дарова́ти вселе́нней единомы́слие,/ мир и ве́лию ми́лость.

Виде́ние стра́нное/ и естеству́ неудобоприя́тное,/ ка́ко утаи́лася еси́/ Е́вина ста́раго запина́теля лю́таго кова́рства,/ среди́ муже́й все́льшися соверше́нным ра́зумом?/ Ка́ко посреде́ огня́ прошла́ еси́, не опа́льшися?/ Ка́ко сокры́ла еси́ же́нскую не́мощь,/ укрепля́ема Боже́ственною си́лою/ на́шу не́мощь Прии́мшаго/ и Возсия́вшаго от Отрокови́цы Неискусобра́чныя?/ Его́же моли́, со А́нгелы лику́ющи,/ дарова́ти вселе́нней единомы́слие,/ мир и ве́лию ми́лость.

Сла́ва, глас 2. Студи́тово:

Чи́стое чистоты́ твоея́ сокро́вище/ без поро́ка от муже́й сохрани́ла еси́,/ неве́ста Христо́ва бы́вши, Евфроси́ние всеблаже́нная;/ теле́сную бо добро́ту по́стническими труды́ увяди́вши,/ ду́шу же украси́вши доброзра́чием благода́ти,/ в му́жестве бо же́нство я́ве укры́вши,/ утаи́лася еси́ велиа́ровых ловле́ний,/ а́нгельски пожи́вши,/ но проси́ ми́ра любо́вию благохва́лящим тя,/ я́ко весе́лия тезоимени́тая, богоблаже́нная.

И ны́не: Богоро́дичен или́ Крестобогоро́дичен.

Подо́бен: Егда́ от Дре́ва:

Грозд всезре́лый, Чи́стая,/ Его́же невозде́ланно во утро́бе младоноси́ла еси́,/ на Дре́ве я́ко узре́ла еси́ Сего́ ви́сяща,/ рыда́ющи, восклица́ла еси́, взыва́ющи:/ Ча́до, сла́дость иска́пай,/ е́юже пия́нство вся́кое страсте́й отъе́млется, Благоде́телю,/ Мене́ ра́ди, Тебе́ ро́ждшия,/ боже́ственными утеше́ньми,/ я́ко Благоутро́бен.

На стихо́вне Окто́иха.

Сла́ва, глас 6:

Прииди́те, любоде́вственнии вси/ и чистоты́ рачи́телие,/ прииди́те, мона́шеская чета́ и преподо́бных жен лик,/ вси согла́сно ве́рою воспои́м/ Евфроси́нию преблаже́нную:/ ра́дуйся, я́же в же́нстем те́ле му́жески до́блествовавши,/ ра́дуйся, целому́дрием врага́ посрами́вши/ и Христа́ возлюби́вши,/ ра́дуйся, ка́меню честны́й, весе́лия тезоимени́тая./ Но, о ма́ти преподо́бная,/ моля́щи не преста́й о чту́щих па́мять твою́.

И ны́не, Богоро́дичен или́ Крестобогоро́дичен.

Подо́бен: Все отло́жше:

А́гнца Своего́ А́гница нескве́рная дре́вле/ и непоро́чная Влады́чица/ на Крест воздвиза́ема я́ко ви́де,/ Ма́терски восклица́ше/ и, удивля́ющися, вопия́ше:/ что виде́ние сие́, Ча́до сла́дкое,/ но́вое и пресла́вное?/ Ка́ко лю́дие неблагода́тнии/ суди́щу Пила́тову предаю́т Тя/ и осужда́ют сме́ртию Живота́ всех?/ Но пою́ Твое́ неизрече́нное, Сло́ве, схожде́ние.

Тропа́рь, глас 8:

В тебе́, ма́ти, изве́стно спасе́ся, е́же по о́бразу:/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со Ангелы сра́дуется, преподо́бная Евфроси́ние, дух твой.

НА У́ТРЕНИ

О́ба кано́на Окто́иха.

И святыя на 4, его́же краегране́сие: Пе́сньми тя пою́, подо́бную весе́лия. Ио́сиф. Глас 5.

Песнь 1

Ирмо́с: Коня́ и вса́дника в мо́ре Чермно́е/ сокруша́яй бра́ни мы́шцею высо́кою/ Христо́с истрясе́,/ Изра́иля же спасе́,/ побе́дную песнь пою́ща.

Пе́сньми богокра́сными пою́щаго днесь/ святу́ю твою́ па́мять и и́стинно достохва́льную,/ све́том мя озари́ моли́тв твои́х, всечестна́я,/ весе́лия боже́ственнаго тезоимени́тая.

Еди́ну Боже́ственную добро́ту Христо́ву возлюби́вши/ и Того́ распа́льшися невеще́ственными красота́ми,/ добро́тою теле́сною возгнуша́лася еси́, сла́вная,/ виде́нии боже́ственными упражня́ющися.

Неве́ста, укра́шенная доброде́телей красота́ми,/ обручи́лася еси́ и́стинно кра́сному добро́тою Христу́,/ оста́вивши привре́меннаго, Евфроси́ние, обру́чника и жития́ всю красоту́.

Богоро́дичен: Все Пожела́ние, и Сла́дость, и Жизнь/ из Тебе́ Возсия́вый премно́жеством бла́гости,/ Де́ва Всенепоро́чная,/ Его́же моли́ спасти́ непреста́нно Тя блажа́щия.

Песнь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую,/ на недви́жимем, Христе́, ка́мени за́поведей Твои́х,/ Це́рковь Твою́ утверди́,/ Еди́не Бла́же и Человеколю́бче.

Вели́кия претерпе́вши по́двиги, вра́жия низложи́ла еси́ ухищре́ния,/ победи́ла еси́ де́монския прило́ги,/ А́нгелом уподо́билася еси́, безсме́ртию поучи́вшися, ма́ти,/ в ме́ртвеннем твое́м телеси́.

Весели́т мона́шествующих сердца́ житие́ твое́,/ утвержде́ние су́ще и наказа́ние ко спаси́тельным за́поведем и к стезя́м нетле́ния,/ к любве́ кра́йнейшему преде́лу, Евфроси́ние, Созда́вшаго.

Просвеща́ет ве́рных боже́ственная собра́ния/ све́тлая твоя́ па́мять и достосла́вная, услажда́ет преподо́бных ли́ки,/ А́нгелы весели́т,/ с ни́миже водворя́ешися,/ я́ко равноа́нгельному житию́, Евфроси́ние, ревнова́вши.

Богоро́дичен: Страсте́й мя лю́тое обурева́ет волне́ние,/ лука́вых духо́в глубина́ одержи́т мя,/ грехо́вный ви́хорь коле́блет мое́ се́рдце:/ Богороди́тельнице, Ты мя утверди́, чи́сте Тя восхваля́юща.

Седа́лен, глас 5.

Подо́бен: Собезнача́льное Сло́во:

Же́нскую сла́бость укрепи́вши Небе́сными наде́ждами,/ посреде́ всели́лася еси́, несомне́нною мы́слию, муже́й, богодохнове́нная,/ Е́вина льсти́теля покори́вши твои́м гове́нием, о Евфроси́ние,/ во бде́ниих и поуче́ниих;/ тем ве́рою тя блажи́м.

Сла́ва, и ны́не, Богоро́дичен:

Тя приста́нище, и сте́ну, и прибе́жище, и наде́жду, и покро́в,/ и Предста́тельницу те́плу обре́тше, ве́рнии, к Тебе́ прибега́ем/ и вопие́м приле́жно, и взыва́ем ве́рно:/ поми́луй, Богоро́дице, на Тя упова́ющия/ и от прегреше́ний изба́ви.

Крестобогоро́дичен:

На Кресте́ Тя зря́щи, Хри́сте, Ма́ти Твоя́,/ во́льно среди́ разбо́йников пове́шена,/ терза́ющи Ма́терски утро́бу, глаго́лаше:/ безгре́шне Сы́не,/ ка́ко непра́ведно, я́ко злоде́й, на Кресте́ пове́сился еси́,/ род челове́чь оживи́ти хотя́, я́ко Преблаги́й?

Песнь 4

Ирмо́с: Боже́ственное Твое́ разуме́в истоща́ние/ прозорли́во, Авваку́м, Христе́,/ со тре́петом вопия́ше Тебе́:/ во спасе́ние люде́й Твои́х,/ спасти́ пома́занныя Твоя́ прише́л еси́.

Отцу́ тя Небе́сному вне́млющую, душ Невестово́дцу,/ о́тча любо́вь не возбрани́, ниже́ привре́меннаго жениха́,/ ше́ствовати путь спаси́тельный.

Я́ко фи́никс, богому́дренно процвела́ еси́ пра́вды сла́дость/ и, я́ко кедр, при вода́х воздержа́ния, богому́драя,/ плоды́ доброде́тельныя умно́жила еси́.

Огне́м воздержа́ния испепели́ла еси́ хвра́стныя сла́сти/ и, разгоре́вшися у́глем Госпо́дни любве́,/ чуде́с лучи́ возсия́ла еси́.

Растерза́н ви́дится и лежа́щ пред кра́сными твои́ми нога́ми/ пре́жде Е́вин ра́тник,/ из Де́вы Ро́ждшагося си́лою, Евфроси́ние, и благода́тию.

Богоро́дичен: Уще́дри, Ще́драя су́щи, преокая́нную мою́ ду́шу,/ Богороди́тельнице Всенепоро́чная,/ от страсте́й греха́ лю́те омрачи́вшуюся и стеню́щу.

Песнь 5

Ирмо́с: Одея́йся Све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен.

Заре́ю боже́ственных дея́ний, я́ко ка́мень смара́гд, чи́стая,/ ви́дена была́ еси́ посреде́ муже́й,/ му́жеская боре́ния показу́ющи и веселя́щи Го́спода.

Точа́щи сле́зы, я́ко арома́ты, облагово́нилася еси́,/ возвели́чилася еси́, я́ко ми́ро многоце́нное,/ и Бо́гу принесла́ся еси́ де́ва нерастле́нна.

Все твое́ жела́ние Бо́гу принесла́ еси́,/ Того́ жела́ющи, Того́ и́щущи,/ Того́ после́дствующи законоположе́нию, де́во, спаса́тельному.

Богоро́дичен: Мла́да родила́ еси́, я́ко Младе́нца, Чи́стая,/ пре́жде век из Отца́ Безнача́льна безле́тно Возсия́вшаго,/ Его́же о ми́ре моли́, Богоневе́сто.

Песнь 6

Ирмо́с: Неи́стовствующееся бу́рею душетле́нною,/ Влады́ко Христе́,/ страсте́й мо́ре укроти́/ и от тли возведи́ мя,/ я́ко Благоутро́бен.

Я́ко чиста́ и непоро́чна, я́ко красна́, я́ко предобра́,/ Жениху́ Сло́ву ты уневе́стилася еси́,/ во ве́ки соблюда́ющему тя нетле́нну.

Стена́ньми и слеза́ми взыску́ющи Соде́теля,/ О́наго виде́ния сподо́билася еси́,/ яко избра́нная со избра́нными, досточу́дная.

Воздержа́ния о́браз,/ целому́дрия одушевле́нное подо́бие ве́рным яви́лася еси́,/ благохва́лящим твою́ свяще́нную, о Евфроси́ние, па́мять.

Богоро́дичен: Па́че ума́, Безле́тнаго,/ па́че сло́ва, Созда́теля, Всечи́стая, родила́ еси́,/ избавля́ющаго вся́кия тли Богоро́дицу пою́щия Тя.

Конда́к, глас 2.

Подо́бен: Вы́шних ища́:

Вы́шнюю жизнь возжеле́вши получи́ти,/ до́льнюю сла́дость тща́тельно оста́вила еси́/ и саму́ю себе́ смеси́ла еси́ посреде́ муже́й, красне́йшая,/ Христа́ бо ра́ди, Жениха́ твоего́,/ о обру́чнице привре́менном небрегла́ еси́.

И́кос:

В весе́лии и ра́дости ду́ши возвесели́вше,/ воста́нем тща́тельно услы́шати сло́во пресла́вное:/ прехо́дит бо ум всяк пове́дание сие́ и удивля́ет,/ я́ко жена́, посреде́ муже́й пребыва́ющи,/ победи́ велиа́ра, и огнь попра́ сласте́й, и не опали́ся отню́д:/ Христа́ бо вожделе́вши, нескве́рная,/ обру́чника привре́меннаго небрегла́ есть.

Песнь 7

Ирмо́с: Превозноси́мый отце́в Господь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́.

Свет тебе́ возсия́, Того́ сопру́зе, Евфроси́ние сла́вная,/ пра́вый бо име́ла еси́ ра́зум, песнопою́щи:/ Бо́же, благослове́н еси́.

Жезл, укрепля́ющ тя, Крест иму́щи,/ де́монская зия́ния прешла́ еси́ невре́дна, преподо́бная, песнопою́щи:/ Бо́же, благослове́н еси́.

Дом се́рдце твое́ Свята́го Ду́ха,/ преподо́бная, соверши́ла еси́,/ тя укре́пльшаго и показа́вшаго духо́в лука́вых си́льнейшу.

Богоро́дичен: Те́лом обложе́ннаго Бо́га Безтеле́снаго, Всенепоро́чная, родила́ еси́,/ нас избавля́ющаго, стра́хом песнопою́щия:/ Бо́же, благослове́н еси́.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.

Ти́ну страсте́й оттрясла́ еси́, отрокови́це,/ А́нгелов невеще́ственному житию́ поревнова́вши,/ с ни́миже и воспева́еши:/ Го́спода по́йте и превозноси́те во вся ве́ки.

Дае́т тебе́ жизнь жи́зни Храни́тель,/ Того́ бо стопа́м после́довала еси́,/ Того́ добро́ты вожделе́вши Боже́ственныя,/ с Ни́мже и весели́шися во вся ве́ки.

Вознесла́ся еси́ ко оби́телем присножи́тельным и́стинно,/ жела́ние получи́вши, его́же возлюби́ла еси́, де́во,/ Дре́ва жи́зни наслажда́ющися/ и превознося́щи Христа́ во ве́ки.

Богоро́дичен: Вся избра́нна, укра́шена вся,/ Бог Ю́же возлюби́, Ю́же избра́,/ яви́лася еси́, Де́во Препросла́вленная, при́сно:/ тем Тя пое́м всегда́, я́ко Богоро́дицу.

Песнь 9

Ирмо́с: Иса́ие, лику́й, Де́ва име́ во чре́ве/ и роди́ Сы́на Емману́ила,/ Бо́га же и Челове́ка,/ Восто́к и́мя Ему́,/ Его́же велича́юще, Де́ву ублажа́ем.

Свяще́нное торжество́ мона́шествующих собо́р хва́лит,/ па́мять твою́ соверша́я богосве́тлую, лик ра́дуется мона́хинь,/ яви́ся бо чи́стая всех све́тлость, Евфроси́ние досточу́дная.

Я́ко че́стно возложе́ние Небе́снаго была́ еси́ хра́ма,/ я́ко крин, во дво́рех процвела́ еси́ Бо́жиих,/ я́ко ши́пок сладково́нный, принесла́ся еси́ Всецарю́,/ я́ко честно́е ми́ро, Евфроси́ние всеблаже́нная.

Тебе́ саму́ю просвети́ла еси́ доброде́телей твои́х украше́нием све́тлым,/ и привела́ся еси́ к мы́сленному черто́гу, чи́стая,/ и ны́не недомы́сленную смотря́еши добро́ту Христо́ву,/ и обоже́ние прие́млеши соверше́ннейшее.

Свята́я твоя́ па́мять освяща́ет днесь ве́рныя,/ точа́щи просвеще́ние и святы́ню,/ в не́йже тя мо́лим, я́ко избра́нную неве́сту Христо́ву:/ спаси́ моли́твами твои́ми, Евфроси́ние, нас всегда́.

Богоро́дичен: Све́том лица́ Твоего́ во тьме лежа́щаго страсте́й озари́,/ Све́та две́ре мы́сленная,/ да не нощь пости́гнет мя сме́ртная, Влады́чице Чи́стая,/ спасе́ния моего́ неча́яние отсека́ющи.

Свети́лен.

Подо́бен: Ду́хом во святи́лищи:

Кня́зя утаи́вшися студа́, и сего́ в любому́дром о́бразе показа́ла еси́ безу́мна,/ де́ва су́щи душе́ю и те́лом, была́ еси́ муж ра́зумом и ве́рою,/ Евфроси́ние преподо́бная,/ де́вственников добро́та и мона́хинь красота́.

Богоро́дичен:

День мне возсия́й у́мнаго весе́лия,/ Ты бо еси́, Чи́стая, свет и жизнь су́щим во тьме:/ хоте́нию бо мощна́ еси́ и е́же твори́ти и́маши,/ я́ко су́щи всех Влады́чица,/ изба́ви вся от бед, и скорбе́й, и собла́зн чужда́го.