Служба преподобных отцев Вассиана и Ионы, Пертоминских чудотворцев

На Го́споди, воззва́х: стихи́ры на 8, глас 8:

Преподо́бнии отцы́ Богому́дрии,/ слепы́м дае́те свет,/ боля́щим исцеле́ние и хромы́м здра́вие,/ ми́лостивно преклоня́ющеся к приходя́щим ве́рою к моще́м ва́шим/ и прося́щим по́мощи ва́шея,/ засту́пники бо и предста́тели ве́рнии вси обрето́хом,/ восхваля́юще вас.

Преподо́бнии отцы́ всечестни́и,/ доброде́тельми возше́дше на колесни́цу,/ к Бо́гу востеко́сте,/ побе́дныя по́чести прие́млюще,/ и я́ко ми́лоть нам телеса́ ва́ша,/ положе́на во гробе́х, оста́вили есте́,/ источа́ти исцеле́ния и прогоня́ти ду́хи лука́выя,/ те́мже блажи́м вас, прехва́льнии.

Лико́м по́стническим сочта́стеся,/ и укра́сшеся, блаже́ннии, по́стническим житие́м,/ и ны́не в Небе́сных оби́телех лику́юще со А́нгелы,/ помина́йте любо́вию блажа́щих вас на земли́/ и свято́е ва́ше творя́щих пра́зднество.

Сла́ва, глас то́йже:

Преподо́бнии отцы́,/ ми́ра красоты́ и пи́щи вре́менныя отню́д возненави́девше,/ и́ноческое житие́ па́че возлюби́вше,/ и А́нгелом собесе́дницы бы́сте,/ и свети́льницы многосве́тлии,/ вселе́нней чудеса́ми сия́юще,/ но о всех нас помина́йте,/ соверша́ющих святу́ю па́мять ва́шу:/ мы бо чада ва́ша и о́вцы слове́сных ва́ших уче́ний,/ и вас на по́мощь призыва́ем,/ прося́ще вами прия́ти мир и ве́лию ми́лость.

И ны́не, Богоро́дичен: Царь Небе́сный:

Вход. Проки́мен дне, и чте́ния три преподо́бническая.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовали бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 5:

И́же на земли́ А́нгели/ и на Небесе́х челове́цы Бо́жии,/ ми́ра благо́е украше́ние,/ и́ноков и преподо́бных похвалу́,/ вели́ких отце́в почти́м вы, Ио́но и Вассиа́не,/ насажде́ни бо в дому́ Госпо́дни,/ процвели́ есте́ пра́вдою/ и, я́ко ке́дри в пусты́ни,/ умно́жили есте́ ста́до Христо́во слове́сных ове́ц/ в преподо́бии и пра́вде.

Я́коже А́нгели земни́и, пожи́ли есте́,/ воздержа́нием те́ло свое́ удручи́вше, всесла́внии,/ бде́нием и па́мятью сме́ртною,/ и вели́кими восхожде́нии/ вои́стинну прибли́жилися есте́/ к Самому́ Ка́меню, Христу́, краеуго́льному.

Глас 4: Жития́, до́лу влеку́щая,/ и пи́щи наслажде́ния,/ и цвету́щую сла́ву, прехва́льнии, оста́вльше, я́ко вре́менну,/ Христо́ви прилепи́стеся,/ Того́ добро́тою кра́сною распала́еми,/ и венце́м нетле́ннаго Ца́рствия благоле́пно венча́стеся.

Сла́ва, глас 5:

Возсия́ днесь пресве́тлая и всепра́зднственная ва́ша па́мять,/ преподо́бнии отцы́ Вассиа́не и Ио́но,/ созыва́ющи многочи́сленное по́стников сосло́вие/ и преподо́бных ликостоя́ния,/ А́нгелы же с челове́ки,/ к похвале́нию И́же в Тро́ице покланя́ема Бо́га на́шего,/ те́мже, притека́юще к моще́м ва́шим/ исцеле́ния да́ры оби́льно прие́млем/ и вас венча́вшего Христа́ прославля́ем,/ Спа́са душ на́ших.

И ны́не, Богоро́дичен:

Храм и дверь еси́, пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце сый Пра́вды,/ просвети́ти хотя́, я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко ма́терне дерзнове́ние к Нему́ стяжа́вшая,/ непреста́нно моли́, спасти́ся душа́м на́шим.

На стихо́вне стихи́ры, глас 4.

Подо́бен: Я́ко до́бля:

Во Христа́ обо́лкшеся,/ тле́емаго челове́ка богому́дренно совле́кшеся/ и духо́вною благода́тию при́сно просвеща́еми,/ я́ко зве́зды све́тлыя, ми́рови просия́ли есте́,/ моля́щеся от тли и бед изба́витися/ и́же ве́рою соверша́ющим при́сно честну́ю па́мять ва́шу.

Стих: Честна́ пред Го́сподем/ смерть преподо́бных Его́.

Ны́не пи́щу ра́йску восприе́млюще,/ и све́том огражда́еми,/ и жизнь ве́чную насле́дствующе,/ к вам прибега́ющия от бед изба́вите,/ и искуше́ний разли́чных, и вся́каго озлобле́ния,/ к Бо́гу дерзнове́ние стяжа́вше/ и любо́вь показу́юще к нам вои́стинну христоподо́бную.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богоно́сцы вседи́внии,/ Тро́ицы побо́рницы,/ к боре́нию проти́ву миродержи́теля тьмы му́жескою му́дростию ополчи́вшеся,/ и, того́ низложи́вше,/ побе́дными увязо́стеся венцы́,/ сего́ ра́ди Боже́ственную и светоно́сную соверша́ем ва́шу па́мять,/ освяща́еми благода́тию.

Слава, глас 6:

Преподо́бнии отцы́,/ дале́че изы́де веща́ние исправле́ний ва́ших,/ тем на Небесе́х обрето́сте мзду трудо́в свои́х,/ и́миже бесо́вския разруши́ли есте́ полки́/ и А́нгельския дости́гли есте́ чи́ны,/ и́хже житию́ непоро́чно поревнова́сте;/ дерзнове́ние у́бо иму́ще ко Го́споду,/ мир испроси́те душа́м на́шим.

И ны́не, Богоро́дичен: Творе́ц и Изба́витель:

Тропа́рь, глас 8:

Пре́жде отверже́нием ми́ра,/ я́ко морска́го треволне́ния, избего́сте, отцы́ преподо́бнии,/ по́слежде же, изволе́нием Бо́жиим,/ в вода́х морски́х кончи́ну блаже́нную прия́сте/ и к неболе́зненному поко́ю преста́вистеся от земли́, ра́дующеся./ Тем и по кончи́не от Христа́ Бо́га просла́вистеся чудесы́ оби́льно,/ те́плии в беда́х ве́рным помо́щницы показа́стеся,/ и ны́не на Небесе́х предстоя́ще Престо́лу Христо́ву,/ Вассиа́не преблаже́нне и Ио́но пресла́вне,/ моли́теся при́сно о душа́х на́ших.

НА У́ТРЕНИ

На Бог Госпо́дь: тропа́рь преподо́бным, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Подо́бен: Вознесы́йся:

Землены́х и тле́ющих наслажде́ния небрегли́ есте́,/ и мона́шеское житие́ возлюби́ли есте́,/ ми́ра красоты́ и пи́щи вре́менныя возненави́девше,/ и отсю́ду сподо́бистеся по́стническому сочта́стися ли́ку,/ с ни́ми же моли́те спасти́ ча́да своя́.

Сла́ва, и ны́не, Богоро́дичен:

И́же на Престо́ле Херуви́мсте седя́й и в не́дрех О́тчих пребыва́яй,/ я́ко на Престо́ле седи́т святе́м Свое́м, Влады́чице,/ на ло́не Твое́м Плотоно́сец:/ Бог у́бо вои́стинну воцари́ся над язы́ки,/ и разу́мно ны́не пое́м Ему́,/ Его́же моли́ спасти́ся рабо́м Твои́м.

По 2-м стихосло́вии седа́лен, глас 8:

Отреко́стеся пло́ти Христа́ ра́ди/ и духо́внии яви́стеся лю́дем води́телие:/ услы́шали есте́ словеса́ та́йных уче́ний,/ и́ноком же яви́стеся пра́вило пра́вости,/ и стра́сти вся кре́постию попра́ли есте́,/ и кова́рства бесо́м до конца́ попали́ли есте́,/ те́мже Христу́ изря́дно всегда́, Богоно́снии отцы́, моли́теся/ грехо́в оставле́ние пода́ти чту́щим святу́ю па́мять ва́шу.

Сла́ва, и ны́не, Богоро́дичен:

Се Тебе́ ро́ди родо́в сла́вят, я́коже прорекла́ еси́, Отрокови́це,/ Созда́теля бо всех была́ еси́ пала́та и Боже́ственный храм,/ в не́мже всели́ся Вы́шний и пло́тию обложи́ся, да спасе́т нас.

По полиеле́и седа́лен, глас 8.

Подо́бен: Прему́дрости:

Егда́, блаже́ннии, к Боже́ственному жела́нию ум свой впери́ли есте́,/ тогда́ оста́висте вся до́лу влеку́щая мудрова́ния/ и, в пусты́ню все́льшеся, я́ко крин, процвели́ есте́ добродете́льми, прекра́снии,/ страсте́й искорени́вше те́рние/ и в ней насади́вше плоды́ трудо́в свои́х,/ те́мже и пожа́вше рукоя́ти бога́тство неотъе́млемое на Небесе́х,/ отцы́ преподо́бнии Вассиа́не и Ио́но,/ моли́те Христа́ Бо́га согреше́ний оставле́ние дарова́ти/ чту́щим ве́рою святу́ю па́мять ва́шу.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся и Младе́нец бысть,/ пре́жде век Сый Бог наш:/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бнии отцы́,/ в да́льняя изы́де веща́ние исправле́ний ва́ших,/ те́мже на Небесе́х обрето́сте мзду трудо́в ва́ших,/ и́миже бесо́вския разруши́ли есте́ полки́/ и А́нгельския дости́гли есте́ чи́ны,/ и́хже житию́ непоро́чно поревнова́сте,/ дерзнове́ние у́бо иму́ще ко Го́споду,/ мир испроси́те душа́м на́шим.

Кано́н Пресвяте́й Богоро́дице со ирмосо́м на 6 и преподо́бным на 8, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Просвеще́нием Трисо́лнечнаго Божества́ озари́вшеся, прему́дрии,/ свети́ла яви́лися есте́/ и просвеща́ете ве́рно светоно́сную ва́шу па́мять чту́щих.

Вы во всем Творцу́ возложи́вше себе́/ и вседухо́вное жела́ние излия́вше к Нему́,/ духо́вную благода́ть восприя́ли есте́.

Све́том благода́ти озаря́еми, преподо́бнии,/ ве́рою па́мять ва́шу торжеству́ющих просвети́те/ и от тьмы грехо́вныя моли́твами свои́ми изба́вите.

Богоро́дичен: Пло́тию Безпло́тнаго поро́ждши, Богороди́тельнице Пречи́стая,/ теле́сных нас и душе́вных скверн омы́й/ окропле́нием Боже́ственныя Твоея́ моли́твы.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Напои́вше ду́ши сле́зными пото́ки,/ соде́ясте их, преподо́бнии, плодоно́сны/ и доброде́тели вся́кия износя́щи, пресла́внии.

Исцеле́ние содева́ют Боже́ственною благода́тию мо́щи ва́ша/ и отгоня́ют боле́зни челове́ческия,/ и укрепля́ют мудрова́ния их восхвали́ти труды́ ва́ша, всечестни́и.

Со враго́м дре́вле бо́ршеся воздержа́нием/ и ны́не кре́постию поста́вивше на него́ побе́ду, преподо́бнии,/ венцы́ сла́вы прия́ли есте́ от Го́спода.

Богоро́дичен: Из ложе́сн Твои́х, Де́во,/ вели́кое Со́лнце возсия́ пресла́вно, просвети́в земна́я,/ Его́же осия́ния преподо́бных лик прия́л есть.

Седа́лен, глас 4

Подо́бен: Яви́лся еси́:

Жите́йское мо́ре воздержа́нием без труда́ преплы́вше,/ ко приста́нищу мы́сленному безстра́стия приста́ли есте́,/ преподо́бнии отцы́ и Богому́дрии.

Сла́ва, и ны́не, Богоро́дичен:

Де́вство и рождество́ вы́ше естества́ и сло́ва в Тебе́, Богоро́дице, стеко́стася,/ я́ко Бо́га вопло́щшася породила́ еси́,/ Спа́са душ на́ших.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.

Я́ко Христо́во смире́ние возлюби́вше,/ вознесо́стеся безстра́стием/ и смири́ли есте́ вся бесо́вския горды́ни.

Возсия́вше, я́ко со́лнце,/ чуде́с луча́ми просвеща́ете, преподо́бнии, всю подсо́лнечную.

Кади́ло благоуха́ния Всеви́дцу, преподо́бнии,/ своя́ моли́твы принесо́сте, я́ко овня́ духо́вно.

Богоро́дичен: Блажи́т Тя, Пречи́стая,/ преподо́бных лик и вся́ка душа́ ве́рных:/ Бо́жие бо Сло́во па́че ума́ и сло́ва родила́ еси́.

Песнь 5

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Еди́ной любви́ Христо́вой вы прило́жшеся душа́ми/ и потща́вшеся исполни́тели бы́ти Бо́жиим за́поведем,/ мно́гих чуде́с прия́сте благода́ть, пресла́внии.

Незло́биви и кро́тцы, вся зло́бы вра́жия погуби́сте,/ ми́лостиви до конца́ я́вльшеся:/ от Еди́наго же Ми́лостиваго прия́сте благода́ть и́стинную и спаси́тельную.

Зако́ном, и моли́твою, и посто́м всегда́ претерпева́сте,/ в безстра́стие оде́ястеся,/ плотски́й ра́зум смири́вше кре́постию Свята́го Ду́ха.

Богоро́дичен: Воспо́йте Го́сподеви песнь но́ву,/ возсия́вшему боголе́пно из чре́ва Неискусобра́чныя/ и Сию́ ве́рным показа́вшу тве́рдую наде́жду и похвалу́.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Кропле́нием вели́ких по́двиг ва́ших, отцы́,/ победи́ли есте́ бесо́в ли́ца,/ распе́ншемуся нас ра́ди Го́споду угожда́юще, преподо́бнии.

Благи́я нра́вы, отцы́, стяжа́ли есте́/ и от Благода́теля Бо́га дар прия́сте бога́тно,/ и сего́ подае́те тре́бующим, преподо́бнии.

Дарова́ний напо́лнистеся духо́вных, отцы́,/ и неприя́зненныя ду́хи повину́ли есте́,/ Вассиа́не и Ио́но Богому́дрии.

Богоро́дичен: Душе́вныя моя́ стра́сти исцели́,/ Я́же безстра́стия бы́вши исто́чник,/ просвети́вшая ли́ки преподо́бных оте́ц рождество́м Твои́м.

Конда́к, глас 2.

Подо́бен: Вы́шних ища́:

Я́ко сокро́вище бога́тно,/ ве́рным Боже́ственная благода́ть/ из морски́х недр издаде́ мо́щи ва́ша, отцы́ преблаже́ннии,/ и в ме́сте пу́сте це́лы и невреди́мы обрето́шася пресла́вно,/ и та́ко вас ра́ди ны́не сла́вится Бог,/ Ему́же со дерзнове́нием предстоя́ще ны́не на Небесе́х,/ Вассиа́не и Ио́но досточу́днии,/ моли́теся непреста́нно о всех нас.

И́кос:

Премно́жеством доброде́телей ва́ших, преподо́бнии,/ я́ко сад кра́сный, испо́лнь су́ще/ и, я́ко от рая́, процве́тше поще́нием и моли́твами,/ всех благоуха́ете от вони́ мно́гих ва́ших трудо́в, и по́двигов, и по́тов преподо́бнических,/ в ни́хже проидо́сте благоиску́сно к безско́рбному животу́/ и венце́м побе́дным увязо́стеся от руки́ Венцеда́теля, всех Бо́га,/ Его́же моли́те непреста́нно о всех нас.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Ору́жием ва́ших моли́тв, преподо́бнии, победи́вше бе́сы лука́выя,/ с Небесе́ благода́ть прия́ли есте́ исцеля́ти неду́ги/ и прогоня́ти ду́хи лука́выя от взыва́ющих:/ благослове́н Бог оте́ц на́ших.

Пло́ти ва́ша повину́ли есте́, отцы́ му́дрии, ду́хови/ и воздержа́нием вся́цем пожи́сте в добродея́нии, прехва́льнии,/ иму́ще чи́сту со́весть и житие́ Небе́сное, воспева́юще:/ благослове́н Бог оте́ц на́ших.

Путе́м и́стинным входя́ще в Боже́ственное поко́ище,/ уклони́стеся напа́стей бесо́вских, блаже́ннии,/ Боже́ственною покрыва́еми благода́тию, и вопию́ще:/ благослове́н Бог оте́ц на́ших.

Богоро́дичен: Ору́жие, Чи́стая Деви́це, храня́щее пре́жде врата́ Еде́мская,/ плещи́ всем дае́т, низложи́вшим по́стнически бори́теля врага́ и при́сно взыва́ющим:/ благослове́н Бог оте́ц на́ших.

Песнь 8

Ирмо́с: В купине́ Моисе́ю Де́вы чу́до/ на Сина́йстей горе́ Прообрази́вшаго иногда́/ по́йте, благослови́те/ и превозноси́те во вся ве́ки.

Слез ва́ших ка́пли угаси́ша огнь грехо́вный,/ ре́ку же чуде́с показа́ша всем нам,/ вся́кия стра́сти потопля́ющу притека́ющих к вам, пресла́внии отцы́.

Ве́ру и наде́жду неразори́му,/ и любо́вь и́стинну име́ли есте́, отцы́, и ми́лостивное прилежа́ние,/ терпе́ние бла́го и поуче́ние слове́с духо́вных,/ смиренному́дрство и соверше́нное беззло́бие.

Подвиза́стеся до́бре, и, победи́вше вся вра́жия де́йства,/ венча́стеся, му́дрии, и ко всем преподо́бным причто́стеся,/ с ни́ми же вас чтим и превозно́сим Христа́ во ве́ки.

Богоро́дичен: Спаси́ мя, Ма́ти Бо́жия, спасе́нию нача́ло ми́рови я́вльшися,/ избавля́ющи мя молвы́ нечи́стых страсте́й и вся́кия проти́вныя ско́рби,/ да Тя сла́влю во вся ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Се отве́рзеся вам, Богоно́снии отцы́, Ца́рство Небе́сное,/ сконча́вшим до́брое тече́ние,/ ви́дите бо, я́же ви́дят А́нгели, и воздая́ние трудо́в подае́т вам по́чести Бог,/ те́мже ублажа́ем вас.

Сокруше́нным се́рдцем Бо́гу угоди́вше и сокруши́вше бесо́в ко́зни,/ сокруше́нныя от них испра́висте, Богоно́сцы,/ те́мже ублажа́ем вас ве́рно, кла́няющеся моще́м ва́шим, Богоблаже́ннии.

Выспрь к Бо́гу име́сте мысль, Богоно́снии отцы́ преподо́бнии,/ и земна́я оста́вили есте́, и Небе́сная восприя́сте/ трудо́в ра́ди ва́ших и воздержа́ния неосла́бнаго,/ сего́ ра́ди почита́ем вас.

Богоро́дичен: Пощади́ мя, Го́споди, пощади́, егда́ хо́щеши суди́ти ми,/ и не осуди́ мене́ во огнь, ни я́ростию Твое́ю обличи́ мя,–/ мо́лит Тя, Христе́, ро́ждшая Тя Де́ва, и А́нгельстии собо́ри, и преподо́бных соста́вы.

Свети́лен.

Подо́бен: Посети́л еси́:

Процвели́ есте́, я́ко фи́никс дави́дски, отцы́,/ оби́тели яви́стеся Ду́ху Пресвято́му,/ и сла́вни вселе́нней показа́стеся,/ о нас непреста́нно моли́те,/ почита́ющих ве́рою пречестну́ю па́мять ва́шу, преподо́бнии.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богороди́це,/ и но́сиши на Боже́ственную руку́ Пребога́тое Сло́во,/ непреме́нно и неизме́нно.

На хвали́тех стихи́ры, глас 4.

Подо́бен: Дал еси́ зна́мение:

Светле́йше просия́ше, я́коже со́лнце, преподо́бнии,/ всепра́зднственная па́мять ва́ша,/ луча́ми облиста́ющи/ ва́ших доброде́тельных дея́ний, блаже́ннии,/ и озаря́ющи ве́рных чу́вства све́том чуде́с ва́ших,/ сию́ у́бо пра́зднующе, ра́достно вас восхваля́ем/ и ве́рно ублажа́ем.

Я́коже А́нгели земни́и, пожи́ли есте́,/ воздержа́нием те́ло свое́ удручи́вше, всесла́внии,/ бде́нием, и па́мятию сме́ртною,/ и вели́кими восхожде́нии/ прибли́жилися есте́ к Самому́ Ка́меню, Христу́, краеуго́льному.

Стра́сти теле́сныя воздержа́нием утоми́ли есте́/ и, приле́жным моле́нием/ зми́я льсти́ваго сле́зными пото́ки от себе́ отгна́вше,/ отцы́ преподо́бнии,/ угоди́ли есте́ Бо́гу па́че ине́х, досточу́днии,/ те́мже вас укра́си Небе́сными дарова́нии/ Иису́с Человеколю́бец и Спас душ на́ших.

Сла́ва, глас 8:

Преподо́бнии отцы́,/ поуча́вшеся день и нощь в зако́не Госпо́дни,/ досто́йны бы́ли есте́ дре́ва живо́тнаго са́дове бы́ти,/ и плод ваш страда́ньми и венцы́ процвете́,/ дерзнове́ние у́бо иму́ще к Подвигополо́жнику Христу́ Бо́гу,/ проси́те нам очище́ние и ве́лию ми́лость.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое. Тропа́рь и отпу́ст.

НА ЛИТУРГИ́И

Блаже́нны от кано́на преподо́бных, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О преподо́бнии и всечестни́и отцы́ Вассиа́не и Ио́но, уго́дницы Христо́вы блаже́ннии и чудотво́рцы пресла́внии! По́стничеством Бо́гу пе́рвее угоди́вше и де́лы благоче́стно на земли́ подвиза́вшеся, я́ко свети́ла све́тлая, по сме́рти в ми́ре возсия́вше, просвеща́юще ве́рных чуде́с све́тлостию, вы засту́пницы те́плии показа́стеся. Мно́гих, в ско́рбех и беда́х стра́ждущих и поги́бнути иму́щих, здра́вы сохрани́сте, непослу́шавших же завеща́ния ва́шего и малове́рующих отмсти́тельне наказа́сте, и пре́жде заблу́ждшей жене́ путевожди́ бы́сте, и осле́пшему па́ки прозре́ние дарова́сте. Де́рзостне же косну́вшагося целе́бных моще́й ва́ших напра́сно отри́нусте и, разслабле́нием наказа́вше, поми́ловасте. К сим же и ина́я пресла́вная соде́ласте, и бы́вшее оскуде́ние во оби́тели ва́шей сугу́бо испо́лнисте, соблюда́юще ю. Мо́лимся у́бо ны́не вам, о преблаже́ннии отцы́, услы́шите моле́ние на́ше, не пре́зрите нас в бе́дах и ско́рбех, призыва́ющих вас ве́рою, бу́дите помо́щницы нам ско́рии и покрови́тели, сохрани́те же во благоде́нствии, ми́ре и тишине́ оте́чество на́ше. К сим же и духо́внаго о вас собра́ния не оста́вите до конца́, посеща́юще я всегда́, о преподо́бнии, изоби́лованием вся́цем, и́ моли́теся при́сно о нас ко Го́споду, да моли́твами ва́шими грехо́в проще́ние полу́чим, и Ца́рствия Небе́снаго сподо́бимся благода́тию Его́, я́ко Тому́ подоба́ет вся́кая сла́ва, честь и поклоне́ние, ны́не, и при́сно, и во ве́ки веко́в. Ами́нь.