Служба преподобных отцев Печерских Марка и Феофила, в Ближних пещерах почивающих
ВЕ́ЧЕР
Блаже́н муж: 1-й антифо́н. На Го́споди, воззва́х:стихи́ры, глас 5.
Подо́бен: Ра́дуйся:
Дом доброде́телей хотя́ созда́ти,/ терпе́ния основа́ние положи́л еси́, преблаже́нне о́тче Ма́рко,/ бу́рное же страсте́й мо́ре/ ти́хими смире́ния ве́тры укроти́л еси́/ и врага́, ю́ностными по́хотьми и сластьми́ паля́щаго,/ в бе́здне поще́ний потопи́л,/ поспе́шеством же Бо́жия благода́ти/ безмяте́жно пучи́ну жи́зни сея́ проше́д,/ жела́емаго кра́я дости́гл еси́,/ иде́же ны́не Христу́ предстоя́,/ моли́ дарова́ти душа́м на́шим ве́лию ми́лость.
Мно́гим, на пути́ жития́ заблужда́ющим/ и жестосе́рдием зва́ния Небе́снаго отрица́ющимся,/ глас Госпо́день, призыва́ющ на ве́черю Небе́сную, преподо́бне, я́ко услы́шал еси́,/ молвы́ ве́ка сего́ оста́вил еси́/ и, спе́шно поте́к, име́я свети́льник, любо́вию предукра́шен,/ вшел еси́ в Черто́г Небе́сный,/ в о́ньже вни́ти и мы да сподо́бимся, мо́лим тя,/ моли́ся приле́жно Влады́це/ и испроси́ душа́м на́шим мно́жество щедро́т и ве́лию ми́лость.
Ве́ка сего́ любо́вь преходя́щую/ и плоть, сластьми́ ласкосе́рдствующую, преблаже́нне о́тче, презре́в,/ любо́вию приснопребыва́ющею ум свой в Бо́га впери́л еси́,/ Его́же ра́ди, крест свой взе́мши,/ вся у́ды распя́л еси́/ и, ми́роде́ржца умертви́в, был еси́ по́стником сия́ние, преподо́бным украше́ние./ С ни́миже предстоя́ Влады́це,/ не закосни́ Того́ моли́ти,/ дарова́ти душа́м на́шим мир и ве́лию ми́лость.
И́ны стихи́ры, глас 1.
Подо́бен: Прехва́льнии му́ченицы:
Ма́рко преблаже́нне,/ ты, любве́ ра́ди Христо́вы простра́нное житие́ оста́вив,/ в те́сную пеще́ру всели́лся еси́,/ в не́йже да вы́ну па́мять и час сме́ртный пред очесы́ име́еши,/ гро́бы свои́ми рука́ми бра́тии уме́ршей угото́вал/ и свое́ к Бо́гу отше́ствие прови́дел еси́./ Ему́же ны́не предстоя́,/ моли́ дарова́ти душа́м на́шим мир и ве́лию ми́лость.
О́тче преподо́бне,/ твоего́ гла́са ме́ртвии услы́шавше,/ веле́нию твоему́ повину́шася/ и, прие́мше дыха́ние па́ки, ожида́ху,/ до́ндеже им повели́ши к жела́емому отыти́ Влады́це,/ Ему́же и ты по кончи́не свое́й предстоя́,/ приле́жно моли́ся/ дарова́ти душа́м на́шим безконе́чную жи́знь и ве́лию ми́лость.
О́тче досточу́дне,/ ты, мно́гими труды́ себе́ обложи́в,/ свире́пеющаго дома́шняго врага́ своего́ смири́л еси́/ и, вери́гами того́ связа́в,/ покори́л еси́ ду́ху,/ те́мже был еси́ и́ночествующим похвала́,/ с ни́миже моли́ся/ дарова́ти душа́м на́шим мир и ве́лию ми́лость.
Сла́ва, глас 2:
Кто испове́сть по достоя́нию труды́ и по́двиги твоя́,/ преподо́бне о́тче?/ Отне́ле бо прия́л еси́ а́нгельский на ся о́браз,/ не дал еси́ те́лу своему́ упокое́ния,/ но о́чи возводи́л ко Го́споду,/ устне́ же устро́евал еси́ вы́ну на моли́тву,/ слух твой простира́л еси́ к слы́шанию сло́ва Бо́жия,/ ру́це утвержда́л еси́ на копа́ние гробо́в./ Блаже́н еси́, все́ми у́ды Христу́ рабо́тав,/ Ему́же ны́не предстоя́,/ моли́ умири́ти мир и спасти́ ду́ши на́ша.
И ны́не, пра́здника, глас 1:
Сла́ва в Вы́шних Бо́гу,/ в Вифлее́ме слы́шу от Безпло́тных днесь,/ на земли́ мир Благоволи́вшему бы́ти./ Ны́не Де́ва Небе́с ши́рши,/ возсия́ бо свет омраче́нным/ и смире́нныя возвы́си, а́нгельски пою́щия:/ сла́ва в Вы́шних Бо́гу.
Вход. Проки́мен дне и чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие – сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (главы́ 5, 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́, конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры пра́здника, глас 6 (зри день сей выше).
Сла́ва, преподо́бному, глас 8:
Прииди́те, лю́дие, днесь,/ в ле́тнюю па́мять Богоно́снаго отца́ соше́дшеся,/ ви́дите, ка́ко в ме́ртвенном сем те́ле сый,/ сме́ртию облада́ше,/ сло́вом воззва́в ме́ртвыя,/ и послу́шаху гла́са его́:/ ов еле́й возлия́ сам на ся,/ ов же повеле́нием ме́сто свое́ уступа́ше ино́му,/ ин же по кончи́не, па́ки ожи́в, пребы́сть,/ до́ндеже угото́вася ме́сто ему́./ Сего́ у́бо, я́ко толи́ку благода́ть от Бо́га прие́мша,/ похва́льными пе́сньми ублажа́юще, мо́лим:/ да мо́лится о нас Христу́,/ е́же воздви́гнути нас от прегреше́ний на́ших/ и изба́вити от бед ду́ши на́ша.
И ны́не, пра́здника, глас то́йже:
Го́споди, в Вифлее́м прише́д,/ в верте́п всели́лся еси́,/ Не́бо престо́л име́я,/ в я́слех восклони́лся еси́,/ Его́же во́инства окружа́ют А́нгел,/ к па́стырем снизше́л еси́,/ да спасе́ши, я́ко Благоутро́бен, род наш,/ сла́ва Тебе́.
Тропа́рь, глас 1:
Умертви́в плотски́я по́хоти мно́гим воздержа́нием/ и копа́нием гробо́в святы́м,/ при́сно, а́ки мертв, в пеще́ре живя́,/ ме́ртвыя повеле́нием свои́м воздвиза́л еси́,/ Ма́рко прехва́льне,/ мертви́ и на́ша мудрова́ния плотска́я/ и наста́ви нас на тече́ние доброде́телей,/ моля́ о нас Еди́наго Человеколю́бца.
Сла́ва, и ны́не, пра́здника.
НА У́ТРЕНИ
По 1-м стихосло́вии седа́лен, глас 1.
Подо́бен: Лик а́нгельский:
Глас Боже́ственный в се́рдце свое́м приемь,/ мир оста́вил и зва́нию Го́спода своего́ после́довал еси́./ Тем крест, а́ки жезл, в ру́це свои́ вземь,/ ти́хо о нем жития́ сего́ мо́ре преше́л еси́,/ мы́сленнаго же фарао́на в бе́здне трудо́в свои́х потопи́л еси́/ и был еси́ преподо́бным украше́ние, Ма́рко досточу́дне.
Сла́ва, и ны́не, пра́здника. Или́ сей Богоро́дичен:
Глас Гаврии́лов прино́сим Ти, Чи́стая Де́во:/ ра́дуйся, заче́ншая Творца́ всех, Бо́га,/ и обно́вльшая обетша́вшее челове́ческое естество́;/ ра́дуйся, я́ко была́ еси́ в рождестве́ Де́ва/ и по рождестве́ па́ки Де́ва пребыва́еши.
По 2-м стихосло́вии седа́лен, глас 5.
Подо́бен: Собезнача́льное Сло́во:
Кто по достоя́нию испове́сть человеколю́бие Твое́ к земны́м, Влады́ко,/ я́ко крест Твой дал еси́ им в по́мощь,/ его́же и уго́дник Твой, в ру́це прие́мь, победи́ вся де́монския полки́:/ сей бо бысть ему́ броня́ и шлем спасе́ния,/ сей бысть пи́ща и питие́ сла́дкое,/ сей бысть ему́ сла́ва и пред преподо́бными украше́ние.
Сла́ва, и ны́не, пра́здника. Или́ сей Богоро́дичен:
Кто досто́йно восхва́лит Рождество́ Твое́, Пречи́стая,/ безсе́менно бо зачала́ еси́ от Ду́ха Свята́го/ и пре́жде век от Отца́ рожде́нное Сло́во в ле́то родила́ еси́./ Тем Тя, я́ко и́стиннаго Бо́га на́шего Ма́терь,/ в пе́снех, чту́ще, пое́м и велича́ем.
По полиеле́и седа́лен, глас 8.
Подо́бен: Прему́дрости:
Труды́ и по́двиги твоя́ кто испове́сть, преблаже́нне,/ ве́рен бо раб Го́споду своему́ быв/ и ве́рне Тому́ служа́, вве́ренный тебе́ тала́нт умно́жил еси́/ и с благи́ми де́латели дина́рий жи́зни ве́чныя прия́л еси́./ Те́мже, я́ко име́я дерзнове́ние,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
В ле́ности проводя́ живота́ моего́ вре́мя,/ погуби́х тала́нт, вве́ренный ми от Го́спода моего́,/ и, ны́не лише́н Бо́жия благода́ти, к Тебе́ зову́, Чи́стая:/ ма́терними Твои́ми моли́твами бу́ди мне Хода́таица бла́га к Человеколю́бцу Бо́гу,/ помяни́ сро́дное Свое́ промышле́ние о рабе́х Твои́х/ и испроси́ согреше́ний проще́ние/ любо́вию чту́щему и благоче́стно покланя́ющемуся всесвято́му Рождеству́ Твоему́.
Степе́нна, 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 44.
По 50-м псалме́ стихи́ра, глас 2:
Кто испове́сть по достоя́нию труды́ и по́двиги твоя́: (зри на вече́рни сла́вник).
Кано́н пра́здника на 6 (зри день 25-й) и преподо́бных на 6, глас 1.
Песнь 1
Ирмо́с: Пои́м, вси лю́дие,/ от го́рькия рабо́ты фарао́ни Изра́иля Изме́ншему/ и во глубине́ морсте́й нога́ми не мо́крыми Наста́вльшему/ песнь побе́дную,/ я́ко просла́вися.
Пои́м вси, соше́дшеся в пречестны́й храм сей восхвали́ти Бо́жия уго́дника па́мять,/ я́ко сла́вно о И́мени Христа́ Го́спода своего́ просла́вися.
А́нгельский о́браз на ся прие́мь,/ а́нгельски в пеще́ре пожи́л еси́, свя́те,/ копа́я же свои́ма рука́ма места́ мно́га бра́тии усо́пшей,/ преше́л еси́ от сих в места́ кро́ва ди́вна пе́ти Го́сподеви:/ сла́вно просла́вися.
Смерть да име́еши пред очи́ма свои́ма, о́тче,/ гро́бы копа́л еси́ бра́тиям, ко Христу́ отше́дшим, на плеща́х персть износя́,/ те́мже по кончи́не честна́ пред Го́сподем смерть твоя́ бысть, блаже́нне,/ и со А́нгелы прославля́ющемуся в святы́х Свои́х Бо́гу пое́ши:/ я́ко просла́вися.
Любве́ ра́ди ко всем тружда́яся,/ ту́не устроя́л еси́ гро́бы, ничесо́же ни от кого прие́мля,/ ча́я то́кмо воздая́ния от Бо́га,/ темже ны́не мзда твоя́ мно́га на Небеси́, преподо́бне, иде́же пое́ши Бо́гу:/ я́ко просла́вися.
Богоро́дичен: Пресла́вную Тя Ма́терь Бо́жию во всех ро́дех кто досто́йно восхвали́ти мо́жет?/ Те́мже ни аз вы́ше ума́ дерза́ю,/ то́кмо а́нгельское приношу́ целование: ра́дуйся.
Песнь 3
Ирмо́с: Утверди́ мене́, Христе́, на недви́жимом ка́мени за́поведей Твои́х/ и просвети́ мя све́том лица́ Твоего́:/ несть бо свят, па́че Тебе́, Человеколю́бче.
Утвержде́н на ка́мени за́поведей Госпо́дних,/ дом Ду́ха Свята́го хотя́ бы́ти,/ окова́л еси́ чре́сла твоя́ желе́зы, блаже́нне,/ е́же на всяк день, проходя́щи ду́шу твою́, разжже́ тя пе́ти:/ несть свят, па́че Тебе́, Го́споди.
Поста́вив враты́ моли́тву чи́сту и сте́ну тве́рду поще́ние зе́льно,/ от креста́ бо ме́дяна то́кмо пия́л еси́ во́ду,/ храм непристу́пен и стра́шен враго́м показа́лся еси́, о́тче,/ и́хже до конца́ победи́в, с весе́лием воспева́л еси́:/ несть свят, па́че Тебе́, Го́споди.
Бде́ние, пост и препоя́сание чресл желе́зы, а́ки ору́жие, на ся прие́м,/ к боре́нию борю́щия тя плотски́ми страстьми́ сме́рти изше́л еси́,/ те́мже даде́ тебе́ Госпо́дь облада́ти е́ю, я́ко взыва́л еси́:/ несть свят, па́че Тебе́, Го́споди.
А́ки пле́нник, смерть бя́ше тебе́, свя́те,/ нево́лею бо повину́ющися, возвраща́ше ме́ртвыя, и пребыва́ху жи́ви,/ до́ндеже повеле́л еси́ усну́ти па́ки/ и до о́бщаго Воскресе́ния во гробе́х пребыва́ти.
Богоро́дичен: Плене́нна мя су́ща неви́димыми враги́,/ свободи́, Влады́чице, ско́рым предста́нием Твои́м и си́лою,/ а́ки огне́м, о́ныя прогоня́ющею,/ я́ко да спасе́н быв Тобо́ю, вы́ну воспою́ Ти:/ несть ины́я Предста́тельницы,/ ра́зве Тебе́, Пречи́стая Влады́чице ми́ру.
Седа́лен, глас 8:
Воздержа́нием живы́й, есте́ственныя стра́сти ду́ху покори́л еси́,/ быв А́нгел во пло́ти и в зако́не повеле́нная де́лом соверши́в,/ те́мже прия́л еси́ чудотворе́ния дар от Бо́га: ме́ртвыя сло́вом на живо́т воздвиза́ти./ Преста́вився же сам к животу́ ве́чному,/ моли́ о нас, свя́те,/ изба́витися от ве́чныя сме́рти/ чту́щим любо́вию святу́ю па́мять твою́, Ма́рко досточу́дне.
Сла́ва, и ны́не, Богоро́дичен:
Па́че естества́ заче́ншая/ и па́че естества́ ро́ждшая Зижди́теля Твоего́ и Бо́га,/ моли́ о нас, при́сно согреша́ющих,/ да, свобожде́нни су́ще, любо́вию воспое́м Тя, Чи́стая Де́во Мари́е.
Песнь 4
Ирмо́с: Ве́лия та́йна/ Твоего́, Христе́, смотре́ния:/ сию́ бо свы́ше прови́дя богозри́тельно, Авваку́м/ изше́л еси́, вопия́ше Тебе́,/ во спасе́ние люде́й Твои́х, Человеколю́бче.
Ве́лия та́йна словесе́ Твоего́, Христе́, рекл бо еси́:/ ве́руяй в Мя, дела́, я́же Аз творю́, и той сотвори́т./ Я́коже Сам воздви́гл еси́ уме́ршаго Лазаря́ сло́вом,/ та́ко и уго́днику Твоему́ дал еси́ си́лу воздви́гнути уме́ршаго глаго́лом/ и возлия́ти еле́й на ся/ во удивле́ние всем предстоя́щим, Человеколю́бче.
Бог наш мир есть, и средосте́ние вражды́ разруша́яй,/ да не бу́дет на раба́ Его́ вражда неугото́ванного ра́ди уме́ршему гро́ба,/ чудотворе́нием отъя́т зло́бу сию́, подви́гну бо дух уго́дника Своего́ рещи́ уме́ршему:/ бра́тие, те́сно есть ме́сто, сам подви́гнися и возли́й еле́й на ся./ И су́щу сло́ву де́лом, вси взыва́ху:/ сла́ва Ти, Человеколю́бче.
В простоте́ се́рдца и в смире́нии глубо́це воззва́ преподо́бный,/ и Госпо́дь услы́ша и́,/ повеле́ дух свой ме́ртвому прия́ти и поведе́нное сотвори́ти,/ возлия́ бо елей на ся и, отда́в сосу́д, па́ки у́спе,/ е́же вси, со стра́хом и у́жасом ви́дяще, возопи́ша:/ сла́ва смотре́нию Твоему́, Человеколю́бче.
Смире́ннаго Твоего́ пеще́рника, Го́споди, моли́тва прохожда́ше о́блаки,/ его́же и мы во умилостивле́ние Тебе́ приво́дим и про́сим:/ ми́лостив нам бу́ди, рабо́м Твои́м,/ отыми́ вражду́ люде́й Твои́х,/ даждь мир Твой во спасе́ние на́ше, Человеколю́бче.
Богоро́дичен: Я́же Живо́т ве́чный Ро́ждшая/ и рождество́м Твои́м всех оживотвори́вшая,/ нас, грехо́вным я́дом умерщвле́нных, оживи́/ и еле́ем ми́лости Твоея́ уще́дри, да вопие́м Ти, Влады́чице:/ Ты еси́ вина́ и избавле́ние жи́зни на́шея.
Песнь 5
Ирмо́с: От но́щи у́тренююще, пое́м Тя, Христе́,/ Отцу́ Собезнача́льна и Спа́са душ на́ших,/ мир ми́рови пода́ждь, Человеколю́бче.
От но́щи у́тренюя в моли́тве к Бо́гу, блаже́нне,/ претружде́н, не угото́вал еси́ уме́ршему гро́ба,/ сего́ ра́ди рекл еси́:/ иди́, рцы уме́ршему, да пожде́т до у́тра, до́ндеже ископа́ю место,/ и погребе́м и́, прославля́юще Человеколю́бца.
По словеси́ твоему́, преподо́бне, по́сланный егда́ рече́:/ бра́те, глаго́лет ти Ма́рко:/ еще́ да поживе́ши ма́ло./ А́бие отве́рзе о́чи уме́рый всем зря́щим и пребы́сть до у́тра./ О́ле чудесе́!/ я́коже Ты Сам, Бо́же, облада́еши живото́м и сме́ртию,/ си́це и рабо́м Свои́м подае́ши облада́ти, Человеколю́бче.
В нощи́ и во дни тружда́яся,/ угото́вал еси́ погребе́нию ме́сто и рекл еси́, свя́те:/ глаго́лите уме́ршему: отда́ждь дух твой Бо́гу./ Он же, послу́шав тя, смежи́в очеса́, преста́вися,/ и вси, уди́вльшеся сло́ва твоего́ си́ле, просла́виша Бо́га Человеколю́бца.
Стра́нно чу́до:/ ме́ртвым воздвиза́ти уме́ршия;/ но лю́бящему Бо́га вся поспе́шествуют во благо́е./ Я́же вся к созида́нию на́шему быва́ют,/ да тепле́йшею любо́вию притеце́м ко Влады́це и со преподо́бными просла́вим Его́,/ я́ко благоутро́бнаго Человеколю́бца.
Богоро́дичен: Стра́нно чу́до:/ ка́ко во чре́ве пло́тстем Огнь Боже́ственный прия́ла еси́, Де́во,/ и пребыла́ неопали́ма, я́коже иногда́ купина́ несгара́ема,/ е́же все бысть, да на Тебе́, Чи́стая, сбу́дется смотре́ния Бо́жия та́инство.
Песнь 6
Ирмо́с: Проро́ка спасл еси́ от ки́та, Человеколю́бче,/ и мене́ из глубины́ прегреше́ний/ возведи́, молю́ся.
Славолю́бия оскверне́ние очища́я,/ повеле́л еси́, блаже́нне, уме́ршему Иоа́нну, да вы́шшее Фео́филу пода́ст ме́сто./ О, чудесе́!/ послу́шав, ме́ртвый пре́йде на ни́жнее ме́сто,/ и вси испо́лнишася стра́ха,/ ты же, свя́те, со смире́нием поклони́лся еси́, глаго́ля:/ от истле́ния вражды́ возведи́ мя, Бо́же, молю́тися.
Припа́дающу к нога́м твои́м Фео́филу и прося́щу оставле́ния рекл еси́, преподо́бне:/ Госпо́дь, Сам отъе́мляй вражду́, повеле́ уме́ршему за любо́вь пода́ти тебе́ старе́йшинство,/ ты же да изведе́шися от мы́сленнаго ки́та, славолю́бием тя пояда́ющаго,/ Человеколю́бцу моли́ся.
Бысть, а́ки гром, сло́во твое́, о́тче,/ его́же страха убоя́ся Фео́фил, мнев, я́ко ту пад, у́мрет,/ но, ма́ло прише́д в себе́ и вшед в ке́ллию,/ пребы́сть про́чая ле́та пла́чася, глаго́ля:/ от истле́ния мя, Бо́же, возведи́.
Наказа́ние твое́, о́тче блаже́ннейший, в толи́кое приведе́ смире́ние Фео́фила,/ я́ко никто́же можа́ше его́ от пла́ча востягну́ти,/ но бы́ша ему́ сле́зы бра́шно и питие́, день бо и нощь взыва́ше:/ от грехопаде́ния мя, Бо́же, возведи́, молю́тися.
Богоро́дичен: В тле́ние славолю́бия ми попо́лзшуся и умиле́ния не иму́щу,/ пода́ждь, Влады́чице, слез то́ки,/ да, омы́в оскверне́ние души́, чист явлю́ся лицу́ Бо́жию,/ внегда́ яви́тимися сла́ве Его́.
Конда́к, глас 8:
Врача́ изря́дна и чудотво́рца любо́вию, ве́рнии, ублажи́м, прося́ще его́:/ да моли́твами свои́ми уврачу́ет на́ша стра́сти, душе́вныя и теле́сныя,/ и́мать бо на сие́ благода́ть от Бо́га,/ и прого́нит ду́хи лука́выя от всех, ве́рно ко гро́бу его́ притека́ющих и зову́щих:/ ра́дуйся, Ма́рко, цели́телю не́мощей на́ших.
И́кос:
А́нгелов и всея́ тва́ри Творца́ воспе́вша/ и ангелови́дным житие́м Тому́ на земли́ всегда́ послужи́вша,/ со А́нгелы же ны́не трисвяту́ю песнь непреста́нно пою́ща, восхваля́ем тя, всеблаже́нне, си́це:/ ра́дуйся, отве́ргшийся всех земны́х веще́й;/ ра́дуйся, ум свой весь горе́ впери́вый./ Ра́дуйся, я́ко мертв, жив погребы́йся в пеще́ре;/ ра́дуйся, я́ко в той мно́ги труды́ и по́ты излия́вый./ Ра́дуйся, мно́гим святы́м в ней гро́бы ископа́вый;/ ра́дуйся, ме́ртвыя повеле́нием свои́м воздви́гнувый./ Ра́дуйся, Иоа́нна ме́ртваго подви́гнутися от ме́ста сотвори́вый;/ ра́дуйся, Фео́фила ко спасе́нию наста́вивый./ Ра́дуйся, крест ве́лий и по́яс желе́зен нетя́жестне на себе́ носи́вый;/ ра́дуйся, смире́нное те́ло свое́ просфоро́ю еди́ною и водо́ю уме́ренною с креста́ дово́льствовавый./ Ра́дуйся, кресто́м свои́м мно́ги стра́сти врачу́яй;/ ра́дуйся, ко гро́бу твоему́ притека́ющим всем по́мощь в ну́ждах подава́яй./ Ра́дуйся, Ма́рко, цели́телю не́мощей на́ших.
Песнь 7
Ирмо́с: О́бразу служи́ти,/ мусики́йскому согла́сию созыва́ющу лю́ди,/ от пе́сней Сио́нских пою́ще оте́чески, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ песнь воспева́юще:/ превозноси́мый отце́в и наш Бо́же, благослове́н еси́.
Лицу́ Бо́жию яви́тися егда́ прихожда́ше ти вре́мя,/ призва́л еси́, о́тче, блаже́ннаго Фео́фила, рек:/ прости́ ми, я́ко оскорби́х тя,/ се бо отхожду́ уже́, ты же моли́ за мя,/ да сподо́бимся оба со святы́ми пе́ти:/ Бо́же, благослове́н еси́.
Словеса́ твоя́, свя́те, пла́чущему рыда́ния приложи́ша,/ и́бо не терпя́ себе́ оста́вленна от Тебе́ бы́ти, глаго́лаше:/ вем, я́ко услы́шит тя Госпо́дь, а́ще восхо́щеши поя́ти мя с собо́ю пе́ти:/ Бо́же, благослове́н еси́.
Пла́чущагося утеша́я, рекл еси́, преподо́бне,/ да не скорби́т, ни да и́щет ви́дети чу́вственнаго све́та,/ зане́ мы́сленными очи́ма, о гресе́х рыда́я, свет разу́мный уви́дит/ и сподо́бится блаже́нства пла́чущих,/ пла́чущим бо уте́шатся, пою́ще:/ Бо́же, благослове́н еси́.
Во утеше́ние скорбя́щему извести́л еси́, о́тче, зна́мение отше́ствия его́ к Бо́гу сие́:/ я́ко пре́жде трех дней кончи́ны свое́й прозре́ти има́ть,/ и та́ко пре́йдет к неплаче́вным место́м в непристу́пном све́те со святы́ми пе́ти:/ Бо́же, благослове́н еси́.
Богоро́дичен: В ско́рби отча́яния моего́ су́щи, утеше́ния не и́мам,/ тем к Тебе́, Влады́чице ми́ра, прибега́ю, глаго́ля:/ Ра́досте моя́, изба́ви мя от обыше́дших мя,/ обыдо́ша бо мя пси мно́зи и несть могу́щаго изъ́яти мя,/ ра́зве Тебе́, Благослове́нная Де́во.
Песнь 8
Ирмо́с: В пла́мени о́гненне горя́щия пе́щи/ сохра́ншаго де́ти/ и во зра́це А́нгела снизше́дшаго к ним,/ по́йте Го́спода/ и превозноси́те Его́ во веки.
Святы́й Дух, проро́чествия дар подава́яй,/ приведе́ в сбы́тие словеса́ твоя́, преподо́бне, по кончи́не твоей,/ дух свой преда́л еси́ в ру́це Бо́гу,/ Ему́же ны́не предстоя́, пое́ши с проро́ки:/ Го́спода по́йте и превозноси́те Его́ во веки.
Словеса́ твоя́ бы́ша, преподо́бне, блаже́нному Фео́филу па́че сребра́ разжже́на,/ я́же помина́я, а́ще и сугу́бо рыда́ше,/ но не возмо́же угаси́ти, я́ко распаля́хуся в се́рдце,/ и́бо по вся дни ожида́ше кончи́ны своея́,/ хотя́й оты́ти ко Го́споду, хвала́ми превозноси́ти Его́ во веки.
Ве́лий умиле́ния дар и неоскудева́емый исто́чник/ словесы́ твои́ми, блаже́нне, ископа́л еси́ в се́рдце Фео́фила:/ ели́ко бо в сосу́д излива́ше, толи́ко мно́жахуся сле́зныя струи́,/ и́миже погаси́ стра́стный пла́мень, возбраня́ющий пе́ти Го́спода во ве́ки.
Трисия́тельный Све́те, Тро́ице Свята́я,/ обеща́ние исполня́я уго́дника Твоего́ Ма́рка,/ просвети́л еси́ зе́ницы пла́чущаго, и пра́во узре́ свет чу́вственными очи́ма,/ мы́сленными же отше́ствие свое к Тебе́, Бо́гу своему́,/ Ему́же всем се́рдцем жела́ше пе́ти со святы́ми во ве́ки.
Богоро́дичен: Свет и́стинный ро́ждшая, Пречи́стая,/ во тьме мя грехолю́бия заблужда́юща/ и ви́дения покая́ния не иму́ща, освети́ благода́тию Твое́ю:/ свеща́ бо еси́, явля́ющая ско́ро су́щим во тьме свет, Богоро́дице Де́во.
Песнь 9
Ирмо́с: Тебе́, све́тлую свещу́ и Ма́терь Бо́жию,/ пречу́дную сла́ву и вы́шшую всех тва́рей,/ пе́сньми велича́ем.
По словеси́ твоему́, свя́те, пре́жде трех дней/ уве́дав отше́ствие свое́, Фео́фил покая́ния словеса́ изрече́,/ а́бие же во утоле́ние рыда́ния того́, предста́в, А́нгел/ показа́ сосу́д, напо́лнен слеза́ми,/ прия́тно Бо́гу покая́ние его́ ублажа́я.
Твои́м наказа́нием, о́тче, Фео́фил Богому́дрый в жи́зни свое́й се́я слеза́ми,/ преста́вився же к оби́телем Небе́сным,/ ра́достный пожина́ет кла́сы/ и трудо́в свои́х ны́не прие́млет возме́здие,/ от всех во ве́ки ублажа́ем.
В юдо́ле плаче́вне изво́листе, отцы́ достоблаже́ннии,/ вся ле́та живота́ своего́ слеза́ми ку́плю де́яти,/ да взы́щете многоце́ннаго би́сера, Иису́са,/ И́мже от ве́чныя сме́рти искупи́вшеся,/ ны́не на ме́сте све́тле ра́дуетеся, ублажа́еми.
Дво́ицу оте́ц, Ма́рка и Фео́фила, приво́дим Тебе́ в моли́тву,/ в двои́х хоте́ниих и де́йствиих Су́щему, Христе́ Бо́же,/ и́хже моле́ние прие́м и от вра́жия нас кова́рства сохраня́я, Ду́хом Твои́м Святы́м наста́ви нас во ве́ки Тя велича́ти.
Богоро́дичен: Ка́ко Тя ублажи́м, Чи́стая Де́во,/ Ю́же Небе́сныя си́лы по достоя́нию блажи́ти не мо́гут?/ Ка́ко просла́вим сла́вимую от всех родо́в/ и Благослове́нную христиа́н всех Ма́терь?
Свети́лен:
Бы́ша сле́зы твоя́, а́ки благово́нное ми́ро,/ и́миже славолю́бия оскверне́ние очи́стил еси́,/ и ны́не в Вы́шних оби́телех, я́ко звезда́ пресве́тлая, сия́я,/ озари́ нас, во тьме грехолю́бия живу́щих,/ и моли́, Фео́филе, о́тче наш, с Ма́рком блаже́нным Человеколю́бца Христа́,/ да, во све́те повеле́ний Его́ зде ходя́ще,/ сподо́бимся зре́ти Свет Небе́сныя сла́вы.
Сла́ва, и ны́не, пра́здника:
Посети́л ны есть свы́ше Спас наш, Восто́к восто́ков,/ и су́щии во тьме и се́ни обрето́хом и́стину,/ и́бо от Де́вы роди́ся Госпо́дь.
На хвали́тех стихи́ры на 6. Пра́здника на 3 и преподо́бных 3, глас 8. Самогла́сны:
Вся́кую сла́дость жития́ сего́/ Вы́шния ра́ди сла́дости оплева́л еси́,/ жесто́кому пути́ достоблаже́нных оте́ц поревнова́в,/ и страсте́й пещь мно́гими твои́ми труды́ угаси́ти потща́лся еси́,/ быв мона́шествующих честно́е украше́ние,/ те́мже со А́нгелы ны́не в Вы́шних ра́дуяся,/ моли́ся о нас, Ма́рко преподо́бне.
У́зким и те́сным путе́м от земли́ в сла́ву Небе́сную ше́ствовал еси́,/ мно́гим по́двигом и ско́рбем любве́ ра́ди Бо́жия предава́лся еси́,/ тем ны́не Влады́чню Престо́лу предстоя́,/ наслажда́ешися Того́ све́тлостей,/ и нам, у́бо све́тло твою́ па́мять чту́щим,/ моли́твами твои́ми пода́ждь Боже́ственных прича́стие/ и ве́чныя ра́дости прия́тие, Ма́рко преподо́бне.
Возше́дши мы́сленно к Све́ту Незаходи́мому, сла́вне,/ и тьмы жития́ изба́вльшися,/ Вседержи́телю, Трисо́лнечному Све́ту, с Вы́шними чи́нми предста́л еси́,/ отню́дуже низпуща́емыя све́тлости луче́ю озари́тися/ и нам, ра́це моще́й твои́х кла́няющимся/ и честно́е успе́ние твое́ сла́вящим,/ испроси́ моли́твами твои́ми, Ма́рко преподо́бне.
Сла́ва, глас 1:
До́брыя ло́зы виногра́да Христо́ва,/ поле́зная нам израсти́вшия гро́зды,/ от ни́хже истека́ет вино́ благово́нное,/ веселя́щее притека́ющих сердца́,/ восхвали́ти любо́вию потщи́мся:/ о́ваго у́бо ви́дяще крест и вери́ги желе́зныя,/ лобыза́ем мо́щи, та поне́сшия,/ и прие́млем страсте́й исцеле́ние;/ о́ваго же окружа́юще, помина́ем сле́зы его́/ и прие́млем умиле́ние./ О до́брое сосло́вие достоблаже́нных оте́ц!/ Те́мже мо́лим вы, Ма́рко Богоно́се с Фео́филом,/ я́ко предстоя́ще Христу́ Бо́гу,/ испроси́те рабо́м ва́шим прия́ти грехо́в оставле́ние и ве́лию ми́лость.
И ны́не, пра́здника, глас то́йже:
Не́бо и земля́ днесь совокупи́шася ро́ждшуся Христу́,/ днесь Бог на зе́млю прии́де,/ и челове́к на Небеса́ взы́де,/ днесь ви́дим есть пло́тию, естество́м неви́димый, челове́ка ра́ди./ Сего́ ра́ди и мы, славосло́вяще, возопие́м Ему́:/ сла́ва в Вы́шних Бо́гу,/ и на земли́ мир,/ дарова́ бо прише́ствие Твое́, Спа́се наш, сла́ва Тебе́.
Славосло́вие вели́кое и отпу́ст.
На Литурги́и слу́жба о́бща преподо́бным.
