Служба преподобных отцев наших Антония и Феодосия Печерских

ВЕ́ЧЕР

На Го́споди, воззва́х: стихи́ры, глас 2.

Подо́бен: Егда́ от Дре́ва:

Егда́ духо́вная благода́ть озари́ ва́ша сердца́,/ приснопа́мятнии и богому́дрии отцы́,/ тогда́ отмла́да Бо́га вожделе́сте,/ и, Того́ Еди́наго от всея́ души́ и́щуще,/ ми́ра тле́нных нивочто́же вмени́сте,/ и, на нетле́нная взира́юще,/ мно́гия труды́ и по́двиги подъя́сте,/ и ны́не, на ло́жах пра́ведных упокоя́ющеся,/ помяни́те па́мять ва́шу почита́ющих.

Егда́ духо́вный пла́мень распали́ ваш ум,/ преподо́бнии отцы́,/ тогда́, мокро́ту душетле́нных страсте́й по́стническими труды́ изсуши́вше,/ виде́нием и дея́нием горе́ вознесо́стеся,/ и, Христу́ Еди́ному совоку́пльшеся,/ те́сный путь небла́зненно преидо́сте,/ и вра́жия ополче́ния / до конца́ разруши́сте,/ и ны́не, в Небе́снем оти́шии водворя́ющеся,/ помина́йте ста́до ва́ше,/ е́же собра́сте му́дрым окормле́нием.

Егда́ духо́вный свет от е́же свы́ше/ осия́ тя, преподо́бне о́тче Анто́ние,/ тогда́, мглы страсте́й избе́г,/ от глубо́каго смире́ния в те́мную пеще́ру все́ли́вся,/ ни све́та чу́вственнаго себе́ зре́ти досто́йна осуди́в,/ Небе́сный свет узре́ти жела́я,/ его́же и не лиши́ся по кончи́не блаже́нней,/ но несре́дственне предстоя́й Святе́й Тро́ице/ с Феодо́сием богому́дрым,/ с ни́мже помяни́ рабо́в свои́х,/ любо́вию па́мять ва́шу почита́ющих.

Сла́ва, глас 4:

Я́ко Христо́вых де́лателей/ и Небе́снаго Сио́на гра́жданов,/ и́нокующих украше́ние/ и по́стников у́мное сия́ние,/ преблаже́нных оте́ц Анто́ния и Феодо́сия,/ прииди́те, лю́дие, пе́сньми па́мять почти́м,/ я́ко хода́таев спасе́ния на́шего.

И ны́не, Богоро́дичен.

На стихо́вне стихи́ры, глас 4.

Подо́бен: Я́ко до́бля:

Я́ко сво́йственно и изря́дно/ во пра́зднественный день па́мяти ва́шея,/ преподо́бнии отцы́,/ дароноси́ти вам пе́сненныя похвалы́,/ но бре́нных уста́ по достоя́нию не возмо́гут веща́ти,/ тем, я́ко Трисия́тельному Престо́лу предстоя́ще,/ моли́те и нам пода́ти свы́ше си́лу/ воспе́ти сла́ву Христа́ Бо́га,/ ди́вно прославля́ющагося во святы́х Свои́х.

Стих: Честна́ пред Го́сподем/ смерть преподо́бных Его́.

Я́ко крыла́тии и небоше́ственнии орлы́,/ от восто́ка и юга взе́мшеся,/ златы́ми доброде́тельми оперна́тевше/ и Небе́сным жела́нием води́ми,/ притеко́сте ко святе́й горе́ Пече́рстей,/ отоню́дуже по кончи́не/ на Небесныя пресели́стеся го́ры/ и предстои́те Христу́ Бо́гу,/ спаса́ющему ду́ши на́ша.

Стих: Восхва́лятся преподо́бнии во сла́ве/ и возра́дуются на ло́жах свои́х.

А́нгельский собо́р/ и челове́ческий род/ духо́вне торжеству́ют благонарочи́тый день/ богоно́сных оте́ц,/ Анто́ния ди́внаго и Феодо́сия всехва́льнаго,/ я́ко по́стников верхо́вных,/ и́хже призыва́юще, мо́лимся:/ спаси́, Христе Бо́же, лю́ди Своя/ и даждь си́лу нам на супоста́ты.

Сла́ва, глас 8:

Кто по достоя́нию восхва́лит/ ва́ша труды́ и по́двиги, богоно́снии отцы́?/ Вы бо, поста́вльше ум влады́ку,/ на стра́сти па́губныя посто́м вооружи́стеся,/ му́жески естество́ лу́чшему покори́сте,/ плоть порабо́тивше душе́вному ра́зуму,/ те́мже Росси́йским и́ноком яви́стеся нача́льницы/ и пеще́рам жи́телие изве́стнейшии,/ душе́вным неду́гом исцели́телие,/ но, я́ко вра́чеве безме́зднии,/ и на́ша боле́зни исцелите/ и моли́теся спасти́ся нам.

Тропа́рь, глас 4:

Зве́зды мы́сленныя,/ просия́вшия на тве́рди Церко́вней,/ и́ноков Росси́йских основа́ние/ пе́сньми, лю́дие, почти́м,/ ра́достныя похвалы́: сим воздаю́ще:/ ра́дуйтеся, преблаже́ннии отцы́, Анто́ние со Феодо́сием богому́дрым,/ при́сно моля́щиися о возсле́дствующих и чту́щих па́мять ва́шу.

Ин тропа́рь, глас 3:

Дво́ицу нача́льных росси́йских свети́л почти́м,/ Анто́ния, Бо́гом по́сланного, и Феодо́сия, Бо́гом дарова́нного:/ тии́ бо пе́рвии, равноа́нгельным в Росси́и житие́м просия́вшие от гор Ки́евских,/ освети́ша оте́чествия на́шего вся концы́,/ и путь к Небеси́ пра́вый мно́гим показа́ша,/ и, первоотцы́ и́ноком бы́вше,/ ли́ки спаса́емых Бо́гови приведо́ша,/ и ны́не, предстоя́ще в вы́шних немерца́емому Божества́ Све́ту,/ мо́лятся о душа́х на́ших.

НА У́ТРЕНИ

По 1-м стихосло́вии седа́лен, гла́с 5.

Подо́бен: Крест Госпо́день:

Крест Госпо́день на ра́мо взе́мше и Тому́ Еди́ному любо́вию привяза́вшеся,/ те́сным путе́м стопа́м Влады́чним после́довасте/ и сим отверзо́сте себе́ ра́йския две́ри,/ тех внутрь ны́не су́ще, дре́ва живо́тнаго наслажда́етеся,/ я́ко до́брии раби́ Влады́ки Го́спода.

Сла́ва, и ны́не, Богоро́дичен:

Собезнача́льный Сын, Отцу́ и Ду́ху Сопресто́льный,/ от чре́ва Твоего́, Чи́стая Ма́ти Де́во,/ челове́ческое естество́ за ми́ра любо́вь восприя́т,/ быв Челове́к, да челове́ческое обветша́вшее обнови́т естество́,/ сего́ ра́ди, я́ко вино́вну обновле́нию на́шему,/ пе́сньми чту́ще, достодо́лжно велича́ем.

По 2-м стихосло́вии седа́лен, глас 1.

Подо́бен: Лик а́нгельский:

И́же на хвалу́ днесь богоно́сных оте́ц собра́вшиися лю́дие,/ прииди́те, у́зрим росси́йских и́ноков изря́дное украше́ние,/ сия́ бо суть мы́сленная очеса́, ви́дящая Свет непристу́пный,/ сия́ бо суть две ма́слины, услажда́ющия по́стническия ли́ки,/ сия́ бо суть два све́щника,/ просвеща́ющии ду́ши ра́достно па́мять их почита́ющих.

Сла́ва, и ны́не, Богоро́дичен:

Украси́ся Де́ва де́вственными добро́тами,/ ряснозлаты́х вели́чий высото́ю преиспещре́на,/ над Серафи́мы ста, я́ко Цари́ца, одесну́ю Престо́ла на высо́ких./ Не забу́ди лю́ди Твоя́ и до́му селе́ния Твоего́,/ но одея́ние безсме́ртия да́руй Тебе́ любо́вию восхваля́ющим.

По полиеле́и седа́лен, глас 8.

Подо́бен: Повеле́нное та́йно:

Дво́ицу преблаже́нных оте́ц, прииди́те, днесь восхва́лим,/ Анто́ния, росси́йских и́ноков верхо́внаго,/ и Феодо́сия, во труде́х и по́двизех сему́ равнаго,/ сия́ бо суть две скрижа́ли, мы́сленне зако́н по́стнический прописа́вшии/ и показа́вшии путь сонасле́дником небла́зненный вои́стину,/ ов богови́дения предтеки́й све́том,/ се́й же дея́нием восхожде́ние положи́ ко ра́йскому селе́нию,/ иде́же ны́не водворя́ющеся, помяни́те пе́сньми па́мять ва́шу велича́ющих.

Сла́ва, и ны́не, Богоро́дичен.

Небе́сная пою́т Тя, Обра́дованная,/ и земна́я сла́вят непостижи́мое Рождество́ Твое́, Де́во Чи́стая,/ Бог бо от Твои́х крове́й облече́ся в на́ше существо́,/ и мир от ле́сти свободи́, и научи́ воспева́ти Ма́терь Тя присносу́щнаго Све́та.

Канон святы́х, глас 4.

Песнь 1

Ирмо́с: Отве́рзу уста́:

Я́ко грубосло́вен и косноязы́чен,/ недоуме́я вам, преподо́бнии отцы́, хвале́ние принести́, молю́ся:/ да́рствуйте моли́тву о мне,/ е́же да́тися отсвы́ше да́ру воспе́ти па́мять ва́шу,/ сла́вна бо есть ми́ру и сла́вно просла́вися.

От млады́х ногте́й в дар принесо́сте себе́ Бо́гови,/ о преблаже́ннии отцы́,/ те́мже, прие́м ва́ше благо́е предприя́тие,/ благода́тию Ду́ха наста́вил вы есть на путь пра́вый.

За́поведей спасе́нных послу́шавше,/ жизнь вре́менную преоби́десте/ и, Крест Госпо́день на ра́мо взе́мше, мра́чный мир непреткнове́нно преидо́сте,/ Небе́сным жела́нием води́ми.

Оте́чество, роди́тели, дру́ги и бога́тство, а́ки пре́лесть, отве́ргше,/ го́рний Иерусали́м Бо́га же Отца́,/ не стыдя́щагося вас бра́тию нарица́ти, Христа́,/ еди́н би́сер взыска́ти те́сным путе́м изво́листе,/ Анто́ние свободоимени́те и Феодо́сия богодарова́нне.

Я́ко пустыннолю́бныя го́рлицы, гор Пече́рских дости́гше, богоно́снии отцы́,/ во подзе́мная места́ всели́стеся/ и, на тве́рдом духо́внаго жела́ния основа́нии гнездо́ свое́ поло́жше,/ богопе́снивыя породи́сте птенцы́, и́ночествующих ли́ки.

Тро́ичен: Сла́ва Ти, сла́ва, Тро́ице Пресвята́я,/ тихообра́зно подаю́щая благода́ть в сердца́ ве́рных,/ да сконча́ем хвале́ния святы́х де́ло и возвесели́мся зело́,/ честни́и дру́зи Твои́, Го́споди.

Богоро́дичен: Упра́ви ум мой, Пречи́стая, во хвале́нии преподо́бных Твои́х,/ да не укло́нься в неподо́бная, плени́тся в рабо́ту лука́вства,/ и бу́ду ра́дование чужде́му.

Ин кано́н, творе́ние свята́го Дими́трия, митрополи́та Росто́вскаго. Глас 8.

Песнь 1

Ирмо́с: Воду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Во́ды мирска́го мяте́жа, а́ки Моисе́й с Ааро́ном Чермно́е мо́ре,/ преподо́бный Анто́ний с Феодо́сием блаже́нным немо́кренно преидо́ста/ и, без вре́да приста́нища Небе́снаго дости́гше, ра́достно возгласи́ста:/ Изба́вителю и Бо́гу на́шему пои́м.

Волна́ми жите́йскими вла́яйся аз, окая́нный,/ и, да не погря́зну фараони́тски в глубине́ зол,/ боя́ся, к вам вопию́: о отцы́ преподо́бнии,/ Изба́вителю и Бо́гу на́шему о мне помоли́теся.

Вода́ми слез твои́х фарао́на мы́сленнаго потопи́л еси́, Анто́ние,/ во умерщвле́нном же телесы́, а́ки в тимпа́не, побе́дная воспе́л еси́, Феодо́сие,/ о́ба же о ны моле́ние Изба́вителю и Бо́гу на́шему принеси́те.

Богоро́дичен: Во́ды страсте́й моих изсуши́, ро́ждшая Незаходи́мое Со́лнце, Христа́,/ и на сух путь безстра́стия наста́ви мя,/ до́брая Путеводи́тельнице,/ да благода́рственная Изба́вителю Бо́гу на́шему/ и Тебе́ воспою́ во ве́ки.

Катава́сия: Крест начерта́в:

Песнь 3

Ирмо́с: Твоя́ песносло́вцы:

Я́ко еле́нь, возжа́ждав духо́внаго пития́, о́тче Анто́ние,/ от Пече́рския горы́ на Афо́нскую го́ру, скача́, прише́д,/ обре́те струи́ ангелови́дных оте́ц жития́,/ и сим поревнова́в, от пото́ка уче́ния их испи́в, и утверди́ся.

Втора́го тя Моисе́я, Анто́ние, скрижа́ли доброде́телей на Пече́рскую го́ру прине́сшаго,/ слы́шав, Феодо́сий, прите́к, глаго́ля:/ вчини́ мя в сих любо́вь, утверди́ мя в них, а́ки в ми́рех,/ уя́звен бо есмь любо́вию сопосле́довати христоподража́нному житию́ твоему́.

Любо́вию и жела́нием ко Бо́гу/ единоу́мне сопря́гшеся, отцы́ преподо́бнии,/ на колесни́цу смире́ния, нищеты́, терпе́ния и чистоты́ вседо́сте/ и превысо́ких достига́ете святы́х селе́ний.

Кто не удивится ва́шему житию́, о преблаже́ннии отцы́?/ Кто не почуди́тся ре́вности по Бо́зе?/ Я́ко во пло́ти су́ще, Ангелом весьма́ уподо́бистеся,/ и́хже и сожи́телие су́ще ны́не, не забу́дите и нас,/ пе́сньми вас ублажа́ющих.

Тро́ичен: Непостижи́мая бла́гость и де́йство Твое́, во Тро́ице Еди́ный Бо́же:/ я́ко бре́нных воскриля́еши горе́/ и от миродержа́вныя но́щи вы́спре ко све́ту возвыша́еши, приводи́ши и устроя́еши,/ Бог бо еси́ и твори́ши, ели́ка хо́щеши.

Богоро́дичен: По вели́чию Твоему́, Пречи́стая, блажа́т Тя вси ро́ди,/ и мы с ни́ми блажи́м пе́сньми, чту́ще Тя раболе́пным поклоне́нием, и велича́ем.

Ин

Ирмо́с: Небе́снаго кру́га/ Верхотво́рче, Го́споди,/ и Це́ркве Зи́ждителю,/ Ты мене́ утверди́ в любви́ Твое́й,/ жела́ний Кра́ю, ве́рных Утвержде́ние,// Еди́не Человеколю́бче.

Небе́сное житие́ в пеще́рах земны́х показа́сте,/ отцы́ преподо́бнии,/ утвержда́ющеся же в любви́ Бо́жией,/ жела́емаго го́рняго кра́я достиго́сте/ и зре́ти сподо́бистеся Еди́наго Человеколю́бца.

На Небе́сный круг восте́кл еси́, свя́те Анто́ние,/ к Небе́сным оби́телем преста́вился еси́, преподо́бне Феодо́сие:/ та́мо о́ба мольбу́ о нас, гре́шных, принеси́те к Еди́ному Человеколю́бцу.

Небе́сных благ лиши́вся аз, окая́нный,/ к вам притека́ю, о Небе́снии гра́ждане:/ да не в коне́ц отчужде́н бу́ду ча́сти спаса́емых,/ умоли́те о мне Еди́наго Человеколю́бца.

Богоро́дичен: Небе́с простра́ннейшая Богороди́тельнице,/ Невмести́маго вмести́вшая в пречи́стых ложесна́х Твои́х,/ сподо́би мя, гре́шнаго, получи́ти ме́сто в селе́ниих пра́ведных/ и с те́ми наслажда́тися лицезре́ния Еди́наго рожде́ннаго от Тебе́ Человеколю́бца.

Ин конда́к, глас 2:

Тве́рдыя столпы́ благоче́стия,/ недви́жимая и́ноческих законоположе́ний основа́ния/ и необори́мыя сте́ны Российския восхва́лим:/ Анто́ния, возлю́бльшаго Бо́га,/ и Феодо́сия, возлю́бленнаго Бо́гом:/ труды́ бо о́нех и по́стническия по́двиги прия́т па́че вся́каго всепло́дия// Еди́н во святы́х прославля́емый.

Ин и́кос:

Ко́е похвале́ние принесе́м дво́ице вели́ких уго́дников Бо́жиих:/ Анто́нию, обре́тшему благода́ть пред Го́сподем, Феодо́сию, сподо́бльшемуся благода́ти от Го́спода,/ обе́ма же послужи́вшима Богоблагода́тней Пречи́стей Де́ве?/ Я́коже бо дре́вле два Херуви́ма сла́вы бя́ху стоя́ще у киво́та заве́та,/ си́це киво́ту одушевле́нному, Бо́жией Ма́тери,/ си́и два отцы́ преподо́бнии предстоя́ста вы́ну,/ хва́ляще вопло́щшагося от Нея́ Бо́га,/ и ны́не предстоя́т с Херуви́мы Престо́лу непристу́пныя сла́вы,/ а́може предста́ Цари́ца одесну́ю,/ крила́ми же непреста́нных свои́х моле́ний осеня́ют Росси́ю,/ и умилостивля́емый и́ми быва́ет с Богоро́дицею Христо́с Бог,/ Еди́н во святы́х прославля́емый.

Седа́лен, глас 4:

Небе́сное бога́тство и присносу́щную сла́ву тща́щеся восприя́ти,/ нищету́ и смире́ние смири́вшагося Влады́ки восприя́сте/ и ми́ру себе́ распя́сте со похотьми́ и страстьми́,/ тем, блажа́ще па́мять ва́шу, преподо́бнии отцы́ на́ши Анто́ние и Феодо́сие, мо́лим:/ моли́те Христа́ Бо́га дарова́ти нам ве́лию ми́лость.

И́н седа́лен, глас 2:

Моле́ние твое́ те́плое, Анто́ние преблаже́нне,/ огнь с небесе́ сведе́ на ме́сто, иде́же ны́не основа́ся Богоро́дична це́рковь,/ твоя́ же приле́жная мольба́, богоно́се Феодо́сие,/ на то же ме́сто благода́ть Бо́жию о́бразом дуги́ от ве́тхия це́ркве преведе́:/ о́ба бы́сте чудотво́рцы, о́ба те́плии к Бо́гу моле́бницы, о́ба вели́цыи Того́ уго́дницы;/ и ны́не моли́твами ва́шими попали́те хвра́стие грехо́в на́ших,/ и благода́ти Бо́жией приобщи́те ны,/ и от бед избавля́йте нас, вско́ре предста́тельствующе.

Сла́ва, и ны́не, Богоро́дичен:

Небе́сных и земны́х Цари́ца су́щи,/ не забу́ди ни́щих нас рабо́в Твои́х,/ но, я́ко всемогу́щая, от Свои́х сокро́вищ пода́ждь ми́лостию проще́ние грехо́м на́шим,/ я́ко человеколюби́вая Человеколю́бца Ма́ти.

И́н Богоро́дичен:

Моле́ние те́плое и стена́ необори́мая,/ ми́лости исто́чниче, ми́рови прибе́жище, приле́жно вопие́м Ти:/ Богоро́дице Влады́чице, предвари́ и от бед изба́ви нас,/ еди́на вско́ре предста́тельствующая.

Песнь 4

Ирмо́с: Седя́й в сла́ве:

Самовла́стная ума́, о́тче Анто́ние, оста́вль,/ под и́го Влады́чне преклони́лся еси́, ему́же и до́блественный Феодо́сий припря́гся:/ плени́стеся в послуша́ние Христо́во и бы́сте до́брии де́лателие,/ единонра́вны се́рдцем и ду́хом.

Не устраши́ша вас в те́мных пеще́рах де́монская страхова́ния,/ доблему́дреннии во́ини, преподо́бнии отцы́,/ но паде́ся ра́туяй вас под нога́ми ва́шими,/ низве́ржен ору́жием: те́плыя ко Бо́гу молитвы.

Тве́рдое ва́ше и жесто́кое житие́ ви́дев, Всеблаги́й Бог/ от те́мных мест просвети́ вас дарова́нием чуде́с/ и сла́вны сотвори́ ми́ру, и́хже недосто́ин бе мир,/ в гора́х и верте́пах кры́ющихся толи́ких свети́л.

Я́ко пресве́тлая свети́ла/ поста́ви вас Бог, преподо́бнии отцы́, на све́щницы с под спу́да,/ и просвети́сте жития́ доброде́тельми и́ночествующих ли́ки,/ и́же, со́брани, до́бре пожи́ша ва́шим наставле́нием.

Тро́ичен: Царю́ царе́м, Всемогу́щая Тро́ице,/ бре́ния не́мощию обложе́нным нам, рабо́м Твои́м, даждь благода́ть/ я́сно пе́ти па́мять преподо́бных Твои́х,/ в ни́хже удиви́л еси́ вся хоте́ния Своя́, Бо́же.

Богоро́дичен: Всеси́льная Влады́чице, нас, немощны́х,/ препоя́ши си́лою на сопроти́вных,/ подаю́щи не́мощней пло́ти кре́пость:/ о Тебе́ бо и немощни́и кре́пкия враги́ побежда́ют/ и победи́тельная в пе́снех дароно́сят.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Услы́шав глас Госпо́день в Афо́не к игу́мену, глаго́лющ:/ посли́ Ми Анто́ния в Россию, я́ко та́мо его́ тре́бую,/ и прии́де Анто́ний в новопросвеще́нную страну́ повеле́нием Го́спода своего́,/ и просла́ви Того́ Божество́.

Услы́шав Феодо́сий глас Христа́, во Ева́нгелии глаго́люща:/ грядите по Мне и возьми́те и́го Мое́ на себе́,/ а́бие, вся я́ко уме́ты вмени́в, во след Его́ пойде́/ и просла́ви Того́ Божество́.

Услы́шавше равноа́нгельное двою́ тою́ отцу́ в пеще́рах пребыва́ние,/ мно́зи стеко́шася к ни́ма подража́ти по́стнических по́двигов/ и, о́бразом доброде́тельнаго ею́ жития́ наста́вльшеся угожда́ти Бо́гу,/ просла́виша Того́ Божество́.

Богоро́дичен: Услы́ши, Влады́чице, стена́ние и мольбы́ христоимени́тых люде́й,/ при́зри на озлобле́ние и го́ресть утесня́емых отвсю́ду,/ виждь сле́зы и рыда́ния су́щих в беда́х и ско́рбех и умилосе́рдися на рабы́ Твоя́,/ да Тя, Богоро́дицу, прославля́ем.

Песнь 5

Ирмос: Ужасо́шася вся́ческая:

Уче́нием и творе́нием бы́сте о́браз и́ночествующим,/ отцы́ треблаже́ннии,/ и ва́шим наставле́нием мно́зи успе́ша в за́поведи Госпо́дни/ и сих исполне́нием ко го́рнему ше́ствию благи́й путь улучи́ша.

Проро́ческим сподо́бльшеся да́ром, достохва́льнии отцы́,/ ов бо огнь указа́тельный на ме́сто с небеси́ упа́сти сотвори́,/ ов же ску́дную жи́тницу моли́твою муки́ испо́лни,/ от тех даро́в крупи́цами насы́тити ду́ши на́ша мо́лимся.

Я́ко законода́вцы, по́стническим лико́м предтеко́сте:/ ты, о́тче Анто́ние, скрижа́ли дея́ния и виде́ния предлага́я,/ богода́нный же Феодо́сий жезло́м правле́ния мо́ре страсте́й пресе́к,/ предхожде́ние тем показу́я во обетова́нную зе́млю.

Упова́нием бу́дущих благ себе́ вооружи́вше/ и Креста́ меч в рука́х иму́ще,/ победи́сте мысленнаго Амали́ка,/ и на́ша враги́ пособи́те победи́ти,/ я́ко предводи́телей на́ших, мо́лим вы, отцы́ преподо́бнии.

Тро́ичен: Мирода́тельная Тро́ице, Единоче́стный Бо́же,/ мир огради́, правосла́вный лю́ди, предстоя́щий в честне́м хра́ме преподо́бных Твои́х,/ храм Себе́ сотворя́я сердца́ принося́щих Ти песнь хвале́ния.

Богоро́дичен: Мирополо́жнице и ски́ние Пресвята́я Бо́га Сло́ва,/ нам сло́во даждь и мысль упра́ви,/ во е́же пе́ти Тя, я́ко Благу́ю Благо́му Роди́тельницу.

Ин

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир подаждь нам,// Человеколю́бче.

Просвети́шася, я́ко небеса́ двема́ свети́лами,/ го́ры Ки́евския двема́ нача́льнейшими отцы́ преподо́бными,/ Анто́нием, а́ки со́лнцем, Феодо́сием, а́ки луно́ю,/ и свет святы́ни их во тьме пеще́рной светя́ше, и тьма не объя́т их:/ лю́дие же, на свет до́брых дел ею́ взира́юще,/ прославля́ху Отца́ Небеснаго.

Просвети́ся вся Росси́я луча́ми чуде́с ва́ю,/ сы́нове немерца́ющаго Све́та, отцы́ преподо́бнии,/ а́ще и под спу́дом пеще́рным скры́стеся:/ твори́мая бо ва́ми богоугожде́ния вта́йне/ показа́ Бог я́ве и просла́ви прославля́ющих Его́.

Просвеща́етеся ны́не, а́ки со́лнце, во Ца́рствии Небе́снем, о богоблаже́ннии:/ просвети́те помраче́нную мою́ душу/ и на све́тлую за́поведей Бо́жиих стезю́ наста́вите мя.

Богоро́дичен: Просвети́ лице́ Твое́ на рабы́ Твоя́, Христе́, Све́те и́стинный,/ и, отгна́в тьму прегреше́ний на́ших, све́та присносу́щнаго о́бщники сотвори́ ны,/ ра́ди Ро́ждшия Тя и преподо́бных Твои́х, Человеколю́бче.

Песнь 6

Ирмо́с: Боже́ственное сие́ и всечестно́е:

Вы́шше естества́ челове́ческаго подви́гшеся, преподо́бнии,/ уподо́бистеся безпло́тных чино́м,/ те́мже и по́честь сих улучи́сте;/ сея́ богодарова́нныя вам благода́ти и нас, ча́да ва́ша, не лиши́те/ хода́тайством свои́м ко Бо́гу, мо́лимся.

Вам, а́ки неусы́пным стра́жем,/ Де́ва и Богома́ти вве́ри дом Свой, его́же пасо́сте,/ от волко́в мы́сленных стрегу́ще в нем собра́нное ва́ми ста́до, о преблаже́ннии.

Всегда́шним я́же к Бо́гу ума́ воскри́лием/ и воздея́нием рук, преподо́бнии отцы́, ста́вше,/ Ду́ху Пресвято́му селе́ние себе́ сотвори́сте,/ те́мже вас, а́ки дом Бо́жий преукра́шен, хвала́ми украша́ем.

Сия́ еста́ преудобренная отца́, а́ки Херуви́ми, осеня́ющии дом Богома́тере,/ и а́ки прему́дрии вожди́ и́ноческому ли́ку,/ и́хже не удали́теся заступа́ти во вся́ких ну́ждах и ско́рбех.

Тро́ичен: Тро́ице Пресвята́я,/ жела́тельное достоя́ние да́вшая во ски́ниях святы́х богоно́сным первонача́льником на́шим,/ сих ра́ди и нас того́ сподо́би,/ в жи́зни сей сохраня́ющей от язы́ческих нахожде́ний.

Богоро́дичен: Тя, Засту́пницу ми́ра и Богома́терь, всего́ живота́ моего́ спасе́ние предлага́ю,/ Ты бо, Бо́га ро́ждши, спасти́ мо́жеши пою́щия Тя/ и в заступле́ние кро́ва Твоего́ прибега́ющия.

Ин

Ирмос: Моли́тву пролию́ ко Го́споду/ и Тому возвещу́ печа́ли моя́,/ яко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Моли́тву излия́л еси́ ко Господу, преподо́бне Анто́ние:/ да бу́дет по всей земли́ роса́, на ме́сте же име́вшия бы́ти це́ркве су́ша;/ и па́ки: по всей земли́ су́ша, на ме́сте же святе́м роса́,/ и услы́шан был еси́ вско́ре,/ Молю́, и о мне помоли́ся, да вла́ги моя́ изсуши́т стра́стныя,/ изсо́хшее же се́рдце мое́ росо́ю благода́ти да ороси́т/ и от тли да возведе́т мя Бог мой.

Моли́твами твои́ми, преподо́бне Феодо́сие,/ оби́тель твоя́ во оскуде́ниих наполня́шеся земны́х благ;/ душе́ мое́й ску́дной, не иму́щей до́брых дел,/ исхода́тайствуй спаси́тельная блага́я, и от тли да возведе́т мя Бог мой.

Моли́твами преподо́бных Твои́х уго́дников, Анто́ния и Феодо́сия Пече́рских,/ излия́вших пред Тобо́ю сердца́ своя́/ и моля́щихся к Тебе́ о всем ми́ре вы́ну,/ от тли, Бо́же мой, возведи́ мя.

Богоро́дичен: Моли́тву мою́ по Го́споде Бо́зе к Тебе́, Госпоже́ Богоро́дице, пролива́ю/ и возвеща́ю моя́ душе́вныя печа́ли:/ я́ко злы́ми мои́ми де́лы в поги́бель влеко́мь есмь/ и не исправля́юся,/ грехо́вным ору́жием уязвля́емь есмь и не чу́вствую,/ кит преиспо́дняго а́да пожре́ти мя хо́щет, и не бежу́ от него́;/ оба́че к Твоему́ милосе́рдию вопию́:/ от тли, Влады́чице моя́, возведи́ мя.

Конда́к, глас 8:

Дво́ицу вели́ких оте́ц и пра́вило и́ноков све́тлое,/ умныя зари́, онебе́сившия Росси́йскую Це́рковь,/ кто по достоя́нию хвала́ми воспое́т?/ Ти́и бо Престо́лу Бо́жию предстоя́т./ Но, я́ко иму́щии дерзнове́ние ко Святе́й Тро́ице,/ Анто́ние преблаже́нне и Феодо́сие приснопа́мятне,/ моли́теся о моле́бная вам принося́щих// и любо́вию пе́сньми вас ублажа́ющих.

И́кос:

В присносу́щнем Пресвяты́я Тро́ицы Боже́ственнем све́те/ да восприи́мете селе́ние, преподо́бнии отцы́,/ вся ле́та жи́зни сея́ в те́сной пеще́ре пожи́вшии;/ те́мже и, преста́вльшеся от вре́менных, вели́ким чуде́с дарова́нием от Го́спода сподо́бистеся:/ боле́зни исцеля́ти, бе́сы от челове́к прогоня́ти/ и без вре́да оби́тель свою́ сохраня́ти, заступа́юще в ско́рбех;/ моли́теся о моле́бная к вам принося́щих/ и пе́сньми любо́вию вас ублажа́ющих.

Песнь 7

Ирмо́с: Не послужи́ша тва́ри:

Благу́ю жизнь зде пожи́вше, блаже́нныя кончи́ны сподо́бистеся, отцы́ святи́и,/ преста́висте бо ся от вре́менных к ве́чным честно́ю сме́ртию,/ я́же быва́ет честна́ преподо́бных Твои́х,/ Го́споди Бо́же оте́ц на́ших.

Ра́вными труды́ ни́ву душ ва́ших возде́лавше, преподо́бнии,/ ра́вная семена́ доброде́телей посе́ясте/ и по кончи́не ра́вных воздая́ний пожина́ете радостотво́рныя рукоя́ти, пою́ще:/ Го́споди Бо́же оте́ц на́ших.

На воде́ поко́йне при исто́чнице вод пресла́дких,/ на ло́жах преподо́бных упокоя́ющеся, преблаже́ннии отцы́,/ от пото́ка сла́достнаго поне́ ка́плею ва́шея благода́ти/ ча́да ва́ша обда́рствите, пою́щия в день па́мяти ва́шея:/ Бо́же оте́ц на́ших.

Тро́ичен: Тро́ическое неразде́льне, разде́льне же Ли́цы, оба́че Еди́но чтем Божество́,/ Безнача́льна Отца́, Собезнача́льна Сы́на и Преблагослове́ннаго, от Отца́ исходящаго Ду́ха.

Богоро́дичен: По Боже́ственному существу́ Отцу́ Своему́ Единосу́щественный Бог Сло́во/ от Де́вы единоесте́ствен челове́ком яви́ся,/ плоть прие́м из пречестны́х крове́й/ и благослове́нную наре́к Свою́ Ма́терь.

Ин

И́рмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Боже, благослове́н еси́.

От горы́ Афо́нския блаже́нный Анто́ний в Росси́ю прише́д/ и, да бу́дет на ме́сте сем Святы́я Горы́ благослове́ние,/ рек, пою́ще:/ Оте́ц на́ших Бо́же, благослове́н еси́.

От до́му роди́тельню преподо́бный Феодо́сий к Иерусали́му тещи́ жела́я,/ на го́ры Ки́евския прии́де и сотвори́ я свое́ю святы́нею, я́ко Сио́на;/ труды́ же свои́ми распространи́в оби́тель, я́ко Иерусали́ма, поя́ше:/ оте́ц на́ших Боже, благослове́н еси́.

От мирски́х любосла́стных страсте́й,/ а́ки от вавило́нскаго пла́мене, неопа́льни соблю́дшеся, отцы́ святи́и/ ны́не в Це́ркви торжеству́ющих с ра́достию вопию́т:/ Еди́ный в Тро́ице Бо́же оте́ц на́ших, благослове́н еси́.

Богоро́дичен: От Христа́ Бо́га посыла́хуся на про́поведь два два,/ а́може Сам идти́ хотя́ше;/ Пречи́стая же Де́ва Богоро́дица, хотя́щи Сама́ новопросвеще́нныя лю́ди росси́йския посети́ти/ и сотвори́ти Себе́ посреди́ их селе́ние,/ посла́ в Росси́ю, а́ки апо́стольскую дво́ицу,/ сия́ два избра́нныя рабы́ Своя́, Анто́ния и Феодо́сия, пою́щия:/ воплоще́нный от Де́вы Христе́ Бо́же,/ со Отце́м и Ду́хом благослове́н еси́.

Песнь 8

Ирмо́с: О́троки благочести́выя:

Гра́ды и оте́чества своя́, я́коже Авраа́м, оста́висте,/ вы́шняго гра́да со Авраа́мом жи́телие ны́не, богоно́снии отцы́, су́ще,/ отту́ду посети́те нас в день па́мяти ва́шея/ и умоли́те Христа́ с ва́ми нам пе́ти во ве́ки.

И́же ва́ше торжество́ пра́зднующим днесь, о святи́и уго́дницы,/ моли́теся изба́витися вся́каго вра́жия наве́та, от ва́рварских нахожде́ний,/ на сопроти́вных возвыша́юще рог христиа́н правосла́вных,/ пою́щих Го́спода во ве́ки.

Ми́лостивно о нас простира́йте ру́це свои́ ко Влады́це, святи́и первонача́льницы на́ши,/ и неотлу́чно назира́йте ста́до ва́ше, я́коже обеща́стеся,/ сохраня́юще то от волко́в мы́сленных,/ сподо́бите же с ва́ма пе́ти Го́спода во ве́ки.

Сла́вити ва́шу па́мять кто не восхо́щет,/ той да не улучи́т ве́чныя сла́вы,/ нам же, сла́вящим, умоли́те Го́спода, иде́же ли́цы святы́х, иде́же собо́р преподо́бных со А́нгелы,/ пе́сньми превозноси́ти Го́спода во ве́ки.

Тро́ичен: Я́ко на превознесе́нную возше́дше го́ру, прииди́те, лю́дие,/ ста́нем во хра́ме преподо́бных первонача́льников Пече́рских и просла́вим Тро́ицу Пресвяту́ю,/ я́же нас собра́ во дне́шний день просла́вити па́мять святы́х Свои́х.

Богоро́дичен: Святу́ю го́ру Бо́жию и селе́ние Вьшняго му́дрствующе Тя, Де́во Чи́стая, зове́м:/ сла́ва Ти, ма́терем и де́вам сла́во и похвало́ челове́ческаго ро́да.

Ин

Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Царя́ Небе́снаго в а́нгельском чину́ просла́вити хотя́,/ пеще́ру житие́м твои́м равноа́нгельным соде́лал еси́ а́ки Не́бо, Анто́ние свя́те,/ и, земны́х А́нгелов лик собра́в, глаго́лал еси́ к ним:/ Его́же пою́т на Небеси́ во́и а́нгельстии,/ Того́ мы на земли́ хва́лим и превозносим вы́ну.

Царю́ Небе́сному вво́инитися хотя́,/ желе́зом прикова́лся еси́, а́ки во́инским по́ясом препоясу́яся, Феоде́сие терпеливоду́шне,/ и подвиза́лся еси́, я́ко добр во́ин Иису́с Христо́в,/ до́ндеже, мир и плоть одоле́в, врага́ диа́вола победи́л еси́,/ торже́ственно хваля́ и превознося́ укрепля́вшаго тя Го́спода.

Царю́ Небе́сному с во́и а́нгельскими ны́не на Небеси́ предстоя́ще,/ не забу́дите нас, притека́ющих к вам, о отцы́ преблаже́ннии,/ да и мы сподо́бимся с ва́ми в бу́дущей жи́зни хвали́ти и превозноси́ти Христа́ во ве́ки.

Богородичен: Царя́ Небе́снаго ро́ждшая, Богоневе́сто Влады́чице,/ сподо́би ны ча́сти пра́ведных,/ да с ни́ми ку́пно восхва́лим ро́ждшагося от Тебе́ Влады́ку/ и просла́вим во ве́ки.

Песнь 9

Ирмо́с: Всяк земноро́дный:

И́же ве́рою приходя́щим ко хра́му ва́шему, святи́и отцы́,/ утеше́ние подава́йте в ско́рбех,/ сохраня́юще сих разли́чных озлобле́ний,/ я́ко да вас, засту́пников на́ших, при́сно велича́ем.

А́ки десятистру́нная гусль и велегла́сная труба́,/ Пече́рская ва́ми согражде́нная Ла́вра пропове́дует ва́шу па́мять,/ Анто́ние богому́дре и Феодо́сие достохва́льне,/ созыва́ющи лю́ди на хвалу́ и по́честь,/ и́хже и мы велича́ем.

Принесе́нное в дар благода́рственное на́ше пе́ние на́зрите, преподо́бнии отцы́,/ и тихосмотри́тельным о́ком и́же грубогранесло́вное испра́вите,/ прие́млюще не я́ко в дар, но я́ко во серде́ц на́ших к вам раче́ние,/ и́мже вас днесь велича́ем.

Влады́чней подо́бящеся бла́гости,/ а́ки две ле́пте, пе́ние и де́лание сие́ от нас прие́мше, треблаже́ннии отцы,/ испроси́те грехо́м оставле́ние,/ в час же коне́чный предста́ните нам, обнаде́ждующе упова́нием доити́,/ иде́же святи́и Христа́ Царя́ велича́ют.

Ели́ко духо́вную благода́ть Пресвята́го Ду́ха во гру́бый ра́зум,/ толи́ко воспе́ти дерзну́х па́мять ва́шу, Анто́ние свя́те и Феодо́сие блаже́нне, сим наверша́я:/ даю́щему моли́тву моля́щемуся и пе́ние хотя́щему/ Бо́гу Еди́ному сла́ва бу́ди, бу́ди.

Богоро́дичен: Хоте́нием смотре́ния Своего́ вся сотвори́вый, Пречи́стая,/ из Тебе́ воплоти́выйся Бог И́стинный и Челове́к Соверше́нный.

Ин

Ирмо́с: Вои́стину Богоро́дицу/ Тя испове́дуем,/ спасе́нии Тобо́ю Де́во Чи́стая,// с безпло́тными ли́ки Тя велича́юще.

Вои́стину ме́ртвы показа́стеся ми́рови,/ пре́жде погребе́ния в пеще́ры, не́дра земна́я, а́ки во гроб, все́льшеся,/ но Бо́гови жи́вы бе́сте, богомы́сленными ва́шими умы́ к Небеси́ паря́ще/ и со безпло́тными ли́ки Того́ и ку́пно Ро́ждшую Его́ велича́юще.

Вои́стину житие́ ва́ше а́нгельско бысть:/ во пло́ти бо су́ще, неради́сте о пло́ти,/ но, а́ки пле́нника, ту, умерщвле́ньми смири́вше, покори́сте ду́хови и безпло́тных подража́сте,/ неусы́пно Го́спода и Госпожу́ Богоро́дицу велича́юще.

Вои́стину насле́дницы Ца́рствия Небе́снаго сотвори́стеся,/ земна́я насле́дия презре́вше и отчужди́вшеся су́етнаго ми́ра,/ присво́истеся Бо́гови и, разре́шшеся сою́зов пло́ти, со Христо́м ны́не жи́тельствуете,/ со безпло́тными ли́ки Тому́ и Пренепоро́чней Того́ Ма́тери предстоя́ще и о нас моля́щеся.

Богоро́дичен: Вои́стину Тобо́ю челове́ческий род получи́ спасе́ние, о Пренепоро́чная Де́во Мари́е!/ Ты бо соедини́ла еси́ с челове́ком Бо́га,/ в пречи́стей Твое́й утро́бе воплоти́вши неизрече́нное о́тчее Сло́во,/ Ты и нас, гре́шных, удали́вшихся от Го́спода,/ па́ки к Го́споду прибли́жи, и примири́, и присоедини́ Ему́,/ да со безпло́тными ли́ки, ку́пно и с теми, и́же во пло́ти а́нгельски пожи́ша,/ и Тебе́, и ро́ждшагося от Тебе́ Христа́ Влады́ку велича́ем во ве́ки.

Свети́лен:

Све́та су́ще вы́шняго ближа́йшии гра́ждане/ и прекраснаго Иерусали́ма насе́льницы святи́и,/ ни́жних, вы́ну ра́туемых, посети́те и подава́йте по́мощь/ ва́шу честну́ю па́мять ны́не восхваля́ющим.

Богоро́дичен:

Све́та Тричи́сленнаго Де́ва су́щи и Ма́ти,/ во све́те вчини́ жи́ти вы́шнем/ пою́щих нетле́нное Рождество́ Твое́, Обра́дованная.

На хвали́тех стихи́ры, глас 2.

Подо́бен: Егда́ от Дре́ва:

Отве́ргше пристра́стия соу́з и крест свой на ра́мо взе́мше,/ в тесноте́ и ско́рбех, преподо́бнии отцы́, в жи́зни сей ходи́сте/ и, ве́тхаго челове́ка совле́кшеся,/ призва́ни есте́ ко простра́нному святы́х селе́нию,/ иде́же ны́не ра́дующеся,/ помяни́те и́же любо́вию// благоче́стно па́мять ва́шу почита́ющих.

Ре́ки присноживы́я воды́ посреде́ гор Пече́рских, преподо́бнии,/ а́нгельскаго жития́ проидо́сте/ и напая́ете мно́гих чуде́с тече́ньми/ и́же с ве́рою и любо́вию к вам прибега́ющих,/ прохлажда́юще тех, в зно́й су́щих,/ сего́ ра́ди велича́ем,// ва́шу благосли́чне па́мять почита́юще.

Умертви́вше телеса́ своя́, отцы́ богоблаже́ннии,/ воздержа́нием кре́пким и острото́ю доброде́телей,/ ме́ртвы ми́рови вмени́стеся,/ но бы́сте жи́вы Бо́гови,/ Его́же окормле́нием сме́рти ве́чныя избего́сте/ и, на приста́нищи вы́шнем ны́не почива́юще,/ помяни́те бе́дствующих в мо́ри страсте́й,/ я́ко да безбе́дно житие́ пре́йдем и обря́щемся с ва́ми,// ва́шу па́мять вси при́сно соверша́юще.

Сла́ва, глас 2:

Мы́сли очи́стивше и ум,/ со А́нгелы и мы торжеству́ем/ в благонарочи́тый день преподо́бных оте́ц,/ Анто́ния и Феодо́сия,/ псало́мски тем припева́юще:/ пра́ведник доброде́тельми, я́ко фини́кс, процвете́ уче́ньми,/ и, я́ко кедр, и́же в Лива́не, умно́жися,/ вы бо, богоблаже́ннии,/ учение творе́ньми прорасти́сте/ и ученики́ своя́ си́ми украси́сте,/ и́хже, а́ки цве́ты, Христу́ принесо́сте,/ и с ни́ми моли́теся о душа́х на́ших.

И ны́не, Богоро́дичен:

Спаси́ от бед рабы́ Твоя́, Богоро́дице,/ я́ко вси по Бо́зе/ к Тебе́ прибега́ем,// я́ко к неруши́мей стене́ и предста́тельству.

На Литурги́и слу́жба вся преподо́бническая.