Служба преподобных отец Печерских и всех святых, в Малой России просиявших

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

По́стницы Богому́дрии!/ вас не потаи́ла есть земля́, но Бог изъяви́,/ во всех конце́х вселе́нныя чудеса́ излива́ющих/ и ми́ро исцеле́ний источа́ющих,/ Тому́ помоли́теся/ дарова́ти душа́м на́шим мир и ве́лию ми́лость.

Ра́дуйся, ту́чнейшая Бо́жия горо́ Пече́рская,/ усыре́нная Ду́хом,/ ра́дуйся, раю́ насажде́ний безсме́ртных:/ в тебе́ бо благоволи́ водворя́тися всегда́ Бог наш,/ обогаща́ющий тя чуде́с излия́нии,/ я́же источа́еши преподо́бными Его́.

Христолюби́вый гра́де Ки́еве,/ в Бо́зе лику́й, веселя́ся,/ содержа́щ, я́ко многоце́нное сокро́вище,/ гра́жданы твоя́ в не́дрех свои́х,/ святы́я по́стники же и му́ченики,/ с ни́ми же сочиня́ется и Варва́ра присносла́вная,/ ея́же мо́щи добро́ту тебе́ прилага́ют.

Ра́дуйтеся, преподо́бных по́стников честна́я пребыва́ния,/ Ду́ха Боже́ственнаго испо́лненная,/ облагоуха́ющая на́ша чу́вствия душ же и теле́с,/ и́миже на не́бо восхо́дим и земны́я прогоня́ем сла́сти,/ Христа́ ви́дяще, святы́м венцы́ подава́юща.

Сла́ва:

Прииди́те, восхва́лим, ве́рнии,/ святы́х тве́рдая исправле́ния,/ и́миже до́бре Творцу́ благоугоди́ша до́блии,/ и с Дави́дом Бо́гу воспои́м:/ нам же зело́ че́стни бы́ша дру́зи твои́, Го́споди,/ зело́ утверди́шася нача́льства их в Тебе́, Христе́/ и Спаси́телю душ на́ших.

И ны́не:

Тя, честне́йшую Царе́ву пала́ту, молю́, Многопета́я:/ ум мой очи́сти, оскверне́нный вся́кими грехи́,/ и пребыва́ние кра́сное пребоже́ственныя Тро́ицы сотвори́,/ я́ко да держа́ву Твою́ и безме́рную ми́лость велича́ю, спаса́емь,/ непотре́бный раб Твой.

На стихо́вне стихи́ры, глас 2.

Подо́бен: До́ме Евфра́фов:

Пеще́ру разбо́йников святи́лище сотвори́ Изра́иль;/ по́стницы же разбо́йников обита́ния/ хра́мы Бо́жия соде́лаша.

Стих: Восхва́лятся преподо́бнии во сла́ве/ и возра́дуются на ло́жах свои́х.

Илию́ и Моисе́я подража́юще и́стинно,/ в гора́х и ка́менех/ Бо́жияго наслажда́етеся явле́ния, сла́внии.

Стих: Блаже́ни вси, боя́щиися Го́спода,/ хо́дящии в путе́х Его́.

Криле́ голуби́не от Бо́га прие́мше,/ возлете́сте весьма́ в Бо́жия упокое́ния,/ преподо́бнии, ду́хом.

Сла́ва, глас то́йже:

Преподо́бнии отцы́, ми́ра красоты́ и пи́щу вре́менную возненави́девшии/ и и́ноческое житие́ возлю́бльшии,/ а́нгелом собесе́дницы яви́стеся/ и свети́льницы многосве́тлии вселе́нныя,/ чудесы́ свои́ми, я́коже второ́е со́лнце, сия́юще,/ о всех нас моли́теся ко Го́споду,/ соверша́ющих свяще́нную па́мять ва́шу,/ мы бо ча́да ва́ша и о́вцы слове́сныя уче́ний ва́ших/ и вас на по́мощь призыва́ем,/ прося́ще ва́ми прия́ти мир и ве́лию ми́лость.

И ны́не, Богоро́дичен:

Бо́га, из Тебе́ воплоти́вшагося, разуме́хом,/ Богоро́дице Де́во,/ Того́ моли́ о спасе́нии душ на́ших.

Тропа́рь, глас 2:

Егда́ снидо́сте во гро́бы/ и саме́х себе́ заключи́сте,/ тогда́, стра́сти умертви́вше плотски́я,/ спогребо́стеся Христу́, Богоно́снии,/ и диа́вольския в подзе́мных разруши́сте огра́ды,/ сего́ ра́ди Ангели венцы́ с Небе́с вам подаю́т.

Сла́ва и ны́не:

Вся па́че смы́сла,/ вся пресла́вная Твоя́, Богоро́дице, та́инства,/ чистоте́ запеча́танной и де́вству храни́му,/ Ма́ти позна́лася еси́ нело́жна,/ Бо́га ро́ждши и́стинаго,/ Того́ моли́ спасти́ся душа́м на́шим.

НА У́ТРЕНИ

Кано́н преподо́бным отце́м Пече́рским. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Припе́в: Преподо́бнии отцы́ Пече́рстии, моли́те Бо́га о нас.

Мно́гими окруже́нный опечале́ньми,/ от грехо́в мои́х напа́дающими мне неща́дно,/ к вам притека́ю, о Богоно́снии!/ дви́жа ва́ша моли́твы в по́мощь.

Анто́ние Богоно́се и Феодо́сие Богому́дре,/ в Росси́и и́ноком первонача́льницы и наста́вницы,/ пе́рвую мя погу́бльша ума́ добро́ту/ ва́шими к Бо́гу хода́тайствы па́ки удо́брите,/ наставля́юще мя ко покая́нию.

Стефа́не всехва́льне и Ни́коне всече́стне,/ Христо́ва ста́да бы́вшии предводи́теле/ и о́ное упа́сшии Богоуго́дно в неусы́пных стра́жах нощны́х,/ Бо́га мне ва́шими благоприя́тными моли́твами уми́лостивите.

Сла́ву ми́ра сего́ и вся кра́сная нивочто́же вмени́вый, всеизря́дне Варлаа́ме,/ сла́вы небе́сныя прича́стника покажи́ мя/ твои́ми моли́твами.

Боже́ственне Влади́мире царю́,/ Рома́не же с Дави́дом, му́чеников красота́, ча́да су́ще о́наго,/ со Еле́ною, ва́шею пра́бабою,/ Бо́гу мя предста́вите.

Богоро́дичен: Твои́ми моли́твами к Своему́ Сы́ну, Богоро́дице,/ ско́ро спаси́ мя от лю́тых:/ Тебе́ бо помо́щницу су́щии в беда́х вси стяжа́хом всегда́.

А́ще пое́ши моле́бен:

Катава́сия: Моли́те Бо́га о нас,/ преподо́бнии отцы́ на́ши Анто́ние и Феодо́сие и вси преподо́бнии Пече́рстии,/ я́ко мы усе́рдно к вам прибега́ем,/ ско́рым помо́щником и моли́твенником о душа́х на́ших.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Безме́зднии вра́чеве яви́стеся,/ исцеле́ния пресла́вно соверша́ющии, Дамиа́не и Ага́пите блаже́ннии,/ темже и аз к вам прихожду́, о святи́и:/ исцели́те ми я́звы душе́вныя и теле́сныя, не́мощну су́щу.

Ониси́форе блаже́нне,/ предви́девый вся и предвеща́я я́сне,/ со Иереми́ем же Матфе́е,/ я́ко проро́цы, предви́дяще,/ беды́, належа́щия ско́ро, мя изба́вите моли́твами ва́шими.

Исаа́кий, премно́гими страда́нии низложи́вый диа́вольскую пре́лесть,/ Тя, Христе́, мо́лит:/ изба́ви нас от того́ искуше́ний и спаси́, Многоми́лостиве.

Лавре́нтие, затвори́вый себе Го́сподеви и дерзнове́ние мно́гое стяжа́вый отту́ду к Нему́,/ не преста́й моля́ся всегда́,/ е́же изъя́тися нам от разли́чных страсте́й.

Предвари́те, раби́ Бо́жии,/ пре́жде да́же не поглоти́т мя до конца́ всегуби́тель,/ изба́вите вско́ре ду́шу мою от лю́тых и мир вожделе́нный да́руйте.

Богоро́дичен: Зол мно́жество смуща́ет мя отвсю́ду,/ и беззако́ний пото́цы обурева́ют мя,/ потщи́ся, предвари́ и настоя́щия ну́жды изми́ мя, Влады́чице,/ хода́тайством Твои́м.

Седа́лен, глас 8.

Подо́бен: Повеле́нное та́йно:

Пове́ленная от Бо́га те́пле исполня́юще/ и сове́том Того́ пра́во ше́ствующии,/ в пусты́нях, и гора́х, и разсе́линах земны́х обита́ша великоду́шнии по́стницы,/ вся́каго лише́ни челове́ческаго утеше́ния,/ те́мже труды́ плодо́в свои́х пожина́юще, ны́не с Го́сподем ра́дуются.

Сла́ва, и ны́не:

Безпло́тных Твои́х, Христе́, и Предте́чи Твоего́,/ и учени́к, проро́к и му́ченик, преподо́бных и всех святы́х/ и Богоро́дицы Неискусому́жныя и благи́я Ма́тере Твоея́ моли́твами/ умоле́н быв, даждь нам во све́те Твое́м ходи́ти/ и сподо́би нас улучи́ти Ца́рствие Твое за милосе́рдие ми́лости Твоея́.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Али́пие, до́бре соблюды́й о́браз Бо́жий в души́ твоей/ и зра́ки изобразу́я святы́х,/ немощны́я исцели́вый тро́стию свое́ю,/ изобрази́ и во мне доброде́тельныя ви́ды, всесла́вне.

Григо́рие всеблаже́нне, чуде́с благода́ть от Бо́га прие́мый/ и тезоиме́ние от дел подо́бных ны́не предвари́в,/ удиви́ и на нас твои́ми моли́твами Его благода́ть.

Моисе́я, чистоты́ храни́теля кре́пкаго,/ яко о́наго прекра́снаго Ио́сифа,/ дви́жем, Христе́, к Тебе́ в моли́тву: поми́луй нас.

Иоа́нне многострада́льне,/ и́же смире́нное те́ло свое́ стесне́нии неосла́бными порабоще́й и жи́во погребы́йся,/ жела́я разреши́тися и со Христо́м соедини́тися, от тли мя изба́ви.

Про́хоре всеблаже́нне,/ хле́бы су́щими от бы́лий и со́лию от пе́пела/ гла́дом та́ющия препита́вый,/ умоли́ Христа́ препита́ти и нас,/ душе́вным гла́дом исчеза́ющих.

Богоро́дичен: Не оста́ви ме́не, к Тебе́ прибега́ющая в ра́дование бесо́м бы́ти, Влады́чице,/ но необори́мая Твоя моли́тва да низложи́т сих сове́тования.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Ма́рко, его́же повеле́ния ме́ртвии послу́шаху,/ умерщвле́на мя паде́нии возста́вив,/ моли́твами твои́ми спаси́.

Фео́филе треблаже́нне,/ сле́з ра́ди очи́стивый славолю́бия оскверне́ние,/ и мне моли́ дарова́тися избавле́нию.

Всеблаже́нне Иоа́нне,/ иже бра́та твоего́ по преставле́нии подвиже́нием те́ла твоего́ поче́т,/ и спасл еси того,/ Творца́ нам ми́лостива сотвори́.

Одушевле́нная бы́вше сокро́вища,/ от сребролюби́ваго мучи́теля, тле́нна сокро́вища у вас истязу́ющаго,/ пострада́вшии непови́нне,/ Небе́сных сокро́вищ прича́стника мя покажи́те,/ Васи́лие и Фео́доре всеблаже́ннии.

И́овлю терпе́нию подо́бяся,/ многовре́менную боле́знь претерпе́л еси́ усе́рдно/ и, ны́не в неболе́зненном сый поко́и,/ боле́зней мя вся́ких изба́ви, равноа́нгельне Пи́мене.

Богоро́дичен: Виждь наша нало́ги, Многоми́лостиве,/ и сия́ яко Бог обле́гчи,/ прие́мь о нас моля́щуюся Ма́терь Твою,/ Юже Ти во умилостивле́ние приво́дим.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, яко Ио́на:/ от тли, Бо́же, возведи́ мя.

Спиридо́не незло́биве,/ и́же о́гненную пещь ма́нтиею свое́ю угаси́л еси,/ яко огнь, любовь вжег в се́рдце твое́м, о́тче, ко Го́споду,/ я́же на ны Велиа́рова угаси́ стреля́ния, молю́ тя.

Никоди́ме, по́стников сия́ние,/ и́же никогда́же устне́ возбрани́л еси воспева́ти во псалме́х Влады́ку,/ не преста́й моля́ся Ему приле́жно/ изба́вити вся от тли, и бед, и скорбе́й, преподо́бне.

Распны́йся умерщвле́нием пло́ти пе́рвее,/ от иуде́й же распны́йся второ́е, кре́пкий Евстра́тие,/ и мно́гое дерзнове́ние у Христа́ обре́т,/ от бе́д изба́ви мя.

Изба́ви мя твои́ми моли́твами, Ни́коне сла́вне,/ и́же мы́шцею Христо́вою высо́кою от плене́ния изба́влен,/ спасл еси своего́ мучи́теля.

Безсме́ртие обре́т о Христе́, Безсме́ртнем Царе́ и Бо́зе, Афана́сие блаже́нне,/ по сконча́нии свое́м пожи́л еси во мно́гих ле́тех, пла́ча всегда́,/ те́мже ныне оживи́ мя.

Богоро́дичен: Пречи́стая, Очище́ние ро́ждши, Отцу́ Примири́вшаго мир,/ вем, Чи́стая, яко раздражи́х Его безме́рными мои́ми согреше́нии,/ но молю́: уми́лостиви ми Того́ паки/ Ма́терними Твои́ми мольба́ми.

Конда́к, глас 8.

Подо́бен: Взбра́нной:

Отцы́ всечестни́и, ли́че Богокра́сный,/ чуде́с мно́гих исто́чницы, ми́ро источа́ющии,/ сокро́вища краснобога́тная Госпо́дня, в земли́ сокрове́нная/ не преста́йте, мо́лим вы, о нас моли́тися ко Го́споду, да зове́м вам:/ ра́дуйтеся, всему́ ми́ру свети́льницы.

И́кос:

А́нгельски пожи́вшия земли́/ и А́нгелом равностоя́тели я́вльшияся на Небеси́,/ с те́мижде и неизрече́нныя о́ныя наслажда́ющияся добро́ты,/ достоблаже́нныя отцы́ на́ши, помо́щники и засту́пники те́плыя,/ прииди́те, ве́рнии, восхва́лим, к ним вопию́ще:/ ра́дуйся, Анто́ние, со́лнцу подо́бный свети́льниче;/ ра́дуйся, зерца́ло и о́бразе всем преподо́бным Росси́йским;/ ра́дуйся, вторы́й Моисе́е, мы́сленныя скрижа́ли, доброде́тели твоя́ нам от горы́ святы́я принесы́й./ Ра́дуйся, Феодо́сие, ангелови́дный челове́че;/ ра́дуйся, звездо́ у́тренняя, тьму неве́дения прогоня́ющая;/ ра́дуйся, забра́ло необори́мое от враг ви́димых и неви́димых./ Ра́дуйтеся, вси преподо́бнии отцы́ на́ши Пече́рстии;/ ра́дуйтеся, земни́и а́нгели и Небе́снии челове́цы;/ ра́дуйтеся, благоуха́ннии цве́ти ра́йстии;/ ра́дуйтеся, пребога́тая сокро́вища сокрове́нная в земли;/ ра́дуйтеся, би́серие многоце́ннии, от пеще́ры, а́ки от мо́ря, просия́вшии;/ ра́дуйтеся, на́ша похвало́ и всем прибега́ющим к вам изба́вители от бед;/ ра́дуйтеся, всему ми́ру свети́льницы.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще;/ отце́в Бо́же, благослове́н еси́.

Нико́лае чу́дне, помо́щниче в ско́рбех,/ иже о саме́м еди́нем сло́ве исцеля́еши стра́сти немощны́х,/ изъяви́ся ско́ро, и от обдержа́щих мя скорбе́й изба́ви,/ и боле́зни се́рдца моего́ облегчи́.

Ера́зме мудре, иже бога́тство свое истощи́л еси во благоле́пие хра́ма Бо́жия,/ твои́ми моли́твами храм мя покажи́ духо́вный.

Сребролю́бия потопи́вый зми́я слез ту́чами, Аре́фо сла́вне,/ я́ко име́я дерзнове́ние, моли́ся о нас ко Го́споду.

Ти́те блаже́нне, гне́внаго бе́са смире́нием попра́вый,/ и Пи́мене, по́стником единоревни́телю,/ изба́вите мя от искуше́ний бесо́вских ва́шими моли́твами.

Анто́ние муче́ниче и тве́рдый Евста́фие, вку́пе со Иоа́нном/ горды́ню Олге́рдову до земли́ низложи́вшии,/ умерщвля́ющия мя стра́сти успи́те.

Богоро́дичен: На моле́ние мое ныне умилосе́рдися и ра́дость в печа́ли ме́сто да́руй ми,/ да пою́ Тя, Влады́чице, и вопию́ Сы́ну Твоему́:/ благослове́н Бог оте́ц на́ших.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

О Ку́кше му́чениче,/ свяще́нником пра́вило, по́стником и преподо́бным украше́ние,/ иже в про́поведи Ева́нгелия/ со ученико́м твои́м честны́м коне́ц прие́м, я́ко апо́стол,/ моли́твами твои́ми и мене́ на путь спасе́ния наста́ви.

Не́сторе Богому́дре,/ жити́й святы́х спаса́телю перве́йший и ревни́телю о́нем до́брый,/ сла́вы о́нех моли́твами твои́ми яви́ мя о́бщника.

Полика́рпе сла́вне,/ те́хже жития́ святы́х коне́чнее исписа́вый и во еди́но собра́вый,/ в кни́зе живо́тней твои́ми моли́твами и мне написа́тися сподо́би.

Я́ко жи́ви су́ще, Богоно́снии, и по сме́рти/ блаже́нному Диони́сию от среды́ гробо́в отвеща́сте:/ вои́стину воскре́се Госпо́дь!/ умерщвле́нна мя страстьми́ оживи́те.

Евфроси́нию, ра́дование По́лотское и де́вам сия́ние,/ Христе́ мой, Тебе́ привожду́ моли́твенницу,/ ея́же ра́ди спаси́ мя.

Богоро́дичен: Царя́ Небе́снаго ро́ждшая,/ дерзнове́ние Ма́тернее я́ко иму́щи к Нему́, Де́во,/ изба́ви нас от бед.

Песнь 9

Ирмо́с: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Михаи́ле, Иларио́не, Пе́тре, Алекси́е,/ Ио́но, Фо́тие и Киприа́не, Боже́ственнии иера́рси,/ Ефре́ме, Нико́лае, Ники́то, Иса́ие,/ Ми́но же, Луко́ и Феокти́сте,/ Бо́га нам уми́лостивите.

Лео́нтие, Стефа́не и Ге́рмане, Ни́фонте,/ Мари́не, Евфи́мие, Лавре́нтие же, Диони́сие и Си́моне,/ я́ко прие́мшии власть от Бо́га,/ проси́те и мне оставле́ние.

Си́моне иера́рше, и́же А́гнца Бо́жия пе́рвее принося́й в же́ртву Вседержи́телю,/ последи́ же и себе́ сама́го, я́ко а́гня, приведы́й в же́ртву,/ спаси́ мя твои́ми моли́твами.

Священному́чеников украше́ние, Мака́рие блаже́нне,/ и́же пре́жде да́же прия́ти престо́л земли́ чу́вственный,/ на престо́лы мы́сленныя препосла́лся еси́,/ Бо́гу мя примири́.

Привожду́ Ти, о Всеще́дре, Иулиани́ю,/ присносветя́щую свещу́, еле́ем благода́ти обдержи́мую,/ ея́же моли́твами от вся́каго зла соблюди́ мя.

Богоро́дичен: Со святы́ми А́нгелы, с Боже́ственными Апо́столы,/ со сла́вными му́ченики и все́ми преподо́бными/ Твоего́ моли́ Сы́на и Бо́га, Богороди́тельнице Пречи́стая,/ от бед изба́вити ду́ши на́ша.

На хвали́тех стихи́ры, глас 1.

Подо́бен: Прехва́льнии му́ченицы:

Не терпя́ бе́сом принести́ же́ртву,/ тебе́ сама́го заколе́ние Бо́гу вся́ческих прине́слся еси́,/ в же́ртву непоро́чную и пресоверше́нную, Иоа́нне славне,/ с тобо́ю же и оте́ц спожре́ся./ Оба, сла́вяще Христа́ ва́шими удесы́,/ непреста́нно Того́ о нас моли́те.

Му́чениче всехва́льне Христо́в Михаи́ле,/ мудрова́ние я́коже царь неужа́сное име́я,/ не стерпе́л еси тва́ри послужи́ти, па́че Сотво́ршаго,/ Его́же ра́ди вся́кия ра́ны претерпе́л еси и люту́ю смерть:/ сего́ ра́ди тя Христо́с Госпо́дь/ в Го́рняя преста́вил есть Ца́рствия.

Ви́дя царя́ Михаи́ла, страда́льче Фео́доре,/ за владе́ющаго все́ми Бо́га/ умре́ти изво́лившаго па́че, не́жели ца́рствовати,/ сла́ву оста́вил еси́ и вся́кую сла́дость увяда́емую,/ и после́довал еси́ ему́ со вся́ким до́блеством,/ сего́ ра́ди со Христо́м спрославля́етеся.

Сла́ва, глас 8:

Преподо́бнии отцы́, поучи́вшеся день и нощь в зако́не Госпо́дни,/ досто́йни бы́сте древеса́ живо́тнаго са́да бы́ти,/ и плод ваш страда́ньми и венцы́ процвете́;/ дерзнове́ние у́бо иму́ще ко подвигополо́жнику Христу́ Бо́гу,/ и нам испроси́те очище́ние и ве́лию ми́лость.

И ны́не, Богоро́дичен:

Богоро́дице, му́чеником украше́ние, по́стником сия́ние,/ иера́рхом наслажде́ние, царе́м благоле́пие,/ проро́ком сла́во, пропове́дником заложе́ние и всем святы́м похвало́,/ Христа́ моли́ с ними о рабе́х Твои́х/ изба́витися вся́каго озлобле́ния.