Служба преподобномученика Кукши, ученика его Никона и преподобнаго Пимена Постника, Печерских, в Ближних пещерах почивающих
НА ВЕЧЕ́РНИ
На Го́споди, воззва́х: стихи́ры, глас 2.
Подо́бен: Егда́ от Дре́ва:
Благо́е еди́ногла́сие созыва́ет ве́рных собо́ры/ благочестному́дренне восхвали́ти па́мять богоно́сных оте́ц,/ Ку́кши свяще́ннаго и Пи́мена, по́стником ревни́теля,/ я́ко те́плыя засту́пники с ве́рою к ним притека́ющим,/ предста́тельствуют бо вско́ре, при́сно моля́щеся,/ о любо́вию пою́щих святу́ю па́мять их.
Глас ра́дования и торжество́,/ прииди́те ны́не, празднолю́бнии лю́дие,/ соста́вим, сладкопе́сненными добро́тами восклица́юще,/ ди́вным отце́м вели́чествие принесе́м,/ ле́тния похвалы́ воздаю́ще/ и почита́юще день отше́ствия их к Бо́гу,/ Ему́же с весе́лием ны́не предстоя́т/ и мо́лятся о душа́х на́ших.
Же́ртвы честны́я пе́рвее принося́ Бо́гови,/ Ку́кше, всеблаже́ннейший о́тче,/ последи́ же́ртву одушевле́нну и себе́ прине́сл еси́,/ я́ко непоро́чное а́гня,/ со ученико́м ти честны́м Ни́коном,/ в пропове́ди Ева́нгельскаго уче́ния мече́м посека́емь,/ о не́мже пострада́л еси́, ра́дуяся,/ и предстои́ши Христу́,/ всегда́ моля́ся о душа́х на́ших.
Сла́ва, глас 8:
Единоу́мным жела́нием к Бо́гу возве́дшеся,/ кора́бль души́ ва́шея доброде́тельми устро́ивше, отцы́ преподо́бнии,/ ле́гце ми́ра волну́ющееся мо́ре преидо́сте/ и о посо́бии Ду́ха Свята́го ти́хаго приста́нища достиго́сте,/ на не́мже су́ще, стра́сти плотски́я ду́ху покори́сте/ и Христо́ви присоедини́стеся,/ Ему́же ны́не на Небеси́ предстоя́ще,/ приле́жно моли́теся о душа́х на́ших.
И ны́не, Богоро́дичен или́ Крестобогоро́дичен.
На стихо́вне в Окто́ихе.
Сла́ва, преподо́бным, глас 6:
Та́ин Боже́ственныя ве́ры/ неве́рныя вя́тския лю́ди44 уча́ще,/ Ку́кше преблаже́нне со ученико́м твои́м Ни́коном,/ пре́лесть злове́рия обличи́ли есте́,/ и уче́нием ва́шим повину́вшиися/ Креще́ние свято́е восприя́ша;/ и́нии же, идолобе́сия тьмо́ю ослепле́ннии,/ чу́вственный свет вам отъя́ти покуси́шася,/ мече́м главы́ ва́ша отсе́кше,/ но, отцы́ свяще́ннейшии,/ ны́не и непристу́пному све́ту предстоя́ще,/ непреста́нно моли́теся спасти́ся душа́м на́шим.
И ны́не, Богоро́дичен или́ Крестобогоро́дичен.
Тропа́рь, глас 3:
Му́ченическою кро́вию, свяще́нне Ку́кше,/ в про́поведи Ева́нгелия со ученико́м ти, бла́женным Ни́коном, че́стне украси́выйся,/ и Пи́мене, в по́стничестве светоза́рне просия́вый,/ в еди́н день и час внидо́сте в свет незаходи́мый,/ иде́же моли́теся Го́сподеви,/ да пода́ст нам ве́лию ми́лость.
НА У́ТРЕНИ
Кано́н преподо́бным, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Восхвали́ти па́мять святы́х равноче́стно кто возмо́жет,/ честна́ бо сме́рть их пред Тобо́ю, я́ко друго́в Твои́х, Бо́же;/ оба́че аз, ели́ко прия́х, хвалу́ им приношу́ и молю́ся Ти, Влады́ко,/ препя́тия от мене́ отдали́в, си́лою Твое́ю укрепи́.
Ку́кше свяще́нне со ученико́м Ни́коном, сосу́ди свяще́ннии су́ще,/ пронесо́сте И́мя Христо́во пред неве́рными,/ и́хже, зна́мении и чудесы́ уди́вльше, к богоразу́мию приведо́сте./ Да бу́ду и аз сосу́д в честь Влады́це моему́,/ моли́твами ва́шими мене́, отцы́, воспомози́те.
Вас трие́х, Ку́кше со ученико́м Ни́коном и Пи́мене прозорли́ве,/ дерза́я днесь хвала́ми почита́ти, молю́:/ предста́ните Тро́ице Святе́й, о мне моля́щеся,/ я́ко да трие́х враго́в, ми́ра, пло́ти и диа́вола, изба́влься,/ явлю́ся добр во́ин, сих победи́в.
Богоро́дичен: Изба́вльшая челове́ки от наси́лия вра́жия пречи́стым рождество́м Твои́м,/ от нечи́стых помышлени́й изба́ви мя, молю́ся,/ и спаси́, я́ко Человеколюби́ваго Бо́га Ма́ти.
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Весели́тся Вели́кая Пече́рская Ла́вра,/ воспита́вшая вас в не́дрех свои́х, преподо́бнии отцы́, и любо́вию зове́т:/ Ку́кши и Пи́мена ра́ди, Христе́ мой,/ бу́ди ми в печа́ли прибе́жище и утвержде́ние.
Мно́гим твои́м, о́тче, доброде́телем/ мно́зии свы́ше да́ры после́доваху:/ что бо бо́лее, я́ко неве́рнаго в ве́ру обрати́ти?/ Вы́шше вои́стинну есть, не́жели воскреси́ти уме́ршаго.
Я́ко Апо́стол, прише́д в неве́рныя лю́ди,/ зна́мении и чудесы́ удиви́л еси́ их/ и, сим мно́гия обрати́в к Бо́гу, приве́л еси́, Ку́кше, от тьмы ко све́ту./ Непостоя́нна мя су́ща, преподо́бне, моли́твами твои́ми утверди́.
Богоро́дичен: Апо́столом сла́во и му́чеником добро́то,/ сла́вы Небе́сныя ча́сти не лиши́ мя и сподо́би добро́ты тоя́,/ хода́тайством Пи́мена и Ку́кши, Де́во Ма́ти Отрокови́це.
Седа́лен, глас 2:
Да́ры любве́ святи́и Твои́ прие́мше,/ в же́ртву благово́нну Тебе́, Христе́, принесо́ша:/ Пи́мен чистоту́ и воздержа́ние, а́ки благоприя́тну ма́слину,/ Ку́кша же кровь, излия́нную Ева́нгелия ра́ди, а́ки грозд ло́зный;/ те́мже досто́йно че́сти Небе́сныя сподо́бишася, я́ко до́брии подви́жницы.
Сла́ва, и ны́не, Богоро́дичен:
Еле́я любве́ Тебе́ не принесо́х, Бо́же мой,/ те́мже ни сам ча́ю обрести́ от Тебе́ ми́лость,/ но бла́гости ра́ди Твоея́, Христе́ мой,/ и хода́тайством Пречи́стыя Твоея́ Ма́тере поми́луй и спаси́ мя.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Воздви́гшеся бра́нию на мироде́ржца,/ ополчи́стеся, отцы́ всеблаже́ннии, и прогна́сте враги́ дале́че от челове́к,/ чудоде́йствием же ва́шим мно́гия приведо́сте ко Христу́, Ему́же пое́м:/ сла́ва си́ле Твое́й, Го́споди.
Ка́плями благода́ти Бо́жия свы́ше ороше́н сый, священному́чениче Ку́кше,/ о́блаки дождено́сныя своди́л еси́,/ и пролива́ху многоту́чныя на земли́ ка́пли;/ ка́плями моли́тв твои́х ороси́ и нас, пою́щих:/ сла́ва си́ле Твое́й, Го́споди.
Пи́мене, дея́ний челове́ческих, издале́че быва́емых, Ду́хом Бо́жиим прови́дче,/ та́йная дела́ серде́ц на́ших, в забве́нии оста́вльшаяся, на па́мять нам приведи́./ А́ще бо и дале́че ны́не еси́,/ но мо́жеши благода́тною Бо́жиею предста́тельствовати тя на по́мощь призыва́ющим и пою́щим:/ сла́ва си́ле Твое́й, Го́споди.
Богоро́дичен: Бу́ди ми в печа́ли ско́рое посеще́ние, Пречи́стая Де́во,/ Ты бо ра́дость па́че естества́ родила́ еси́,/ посети́вшу нас Восто́ку свы́ше,/ И́мже просве́щшеся: ра́дуйся,– Тебе́ прино́сим.
Песнь 5
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Ты, преподо́бне Ку́кше, е́зеро злове́рия изсуши́л еси́/ и изсхо́ша му́тныя во́ды, Со́лнцу благове́рия в вя́тчанех возсия́вшу./ Уста́ви зло́бныя пото́ки моли́твами твои́ми и нам,/ ве́рою воспева́ющим тя.
Я́коже неду́жныя сло́вом твои́м исцели́л еси́,/ си́це и нас тое́южде благода́тию, от Бо́га ти да́нною, посети́/ и посо́бствуй в неду́зех душе́вных,/ любо́вию па́мять твою́, Пи́мене, воспева́ющих.
Сла́ву воздади́м, лю́дие, в Вы́шних су́щему Бо́гу,/ просла́вльшему святы́х Свои́х, и мо́лим,/ да моли́твами их сла́вы Небе́сныя и мы не лиши́мся,/ ра́достно па́мять их воспева́юще.
Богоро́дичен: Сла́ву Твою́ кто испове́сть, Чи́стая Де́во?/ Тя бо сла́вят Небе́сныя си́лы,/ и мы, припа́дающе, земни́и, сла́вим Тя и велича́ем, пою́ще:/ ра́дуйся, сла́во правосла́вных, Чи́стая.
Песнь 6
Ирмо́с: Пожру́ Ти со гласом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Пожре́ти хотя́щия мы́сленному ки́ту неве́рныя лю́ди/ изъя́л еси́, о́тче, святы́м Креще́нием/ и, Це́рковь от них устро́ив,/ очи́стил еси́ ту от ребр Спа́совых ми́лостивно исте́кшею Кро́вию.
На неду́жныя ру́ки возложа́т, я́коже рече́ Писа́ние, и здра́ви бу́дут./ Си́це по вла́сти, от Христа́ тебе́ да́нней,/ сло́вом свои́м боля́щую бра́тию исцели́л еси́,/ и́же, отхожда́ху, сла́вяще Да́вшаго тебе́ власть сицеву́ю./ Те́мже и нас, неду́гующих душе́ю, посети́/ и сло́вом твои́м исцели́, Пи́мене блаже́ннейший.
Досто́йно восхвали́ти вас, преблаже́ннии отцы́,/ я́ко мно́го потруди́стеся зде, кто возмо́жет?/ Хвали́ми же есте́ во сла́ве Небе́сней и ра́дуетеся на ло́жах ва́ших во све́те присносу́щнем./ Моли́теся, да и мы с ва́ми бу́дем,/ очи́стившеся от пречи́стых ребр Спа́совых исте́кшею Кро́вию.
Богоро́дичен: Хва́лим Тя, блажа́ще, христиа́нстии ро́ди, и любо́вию зове́м:/ Влады́чице, предста́ни погруже́нным в ти́не скве́рных дел,/ а́ще бо и окаля́хом ду́ши на́ша,/ но Ты мо́жеши омы́ти нас,/ иску́пленных Сы́на Твоего́ честно́ю Кро́вию.
Конда́к, глас 4:
Свети́ла разу́мная, соше́дшеся, хвала́ми воспое́м, лю́дие,/ просия́ли бо суть в ми́ре сем:/ Пи́мен мно́гими по́двиги,/ Ку́кша же со ученико́м Ни́коном про́поведию Сло́ва,/ и си́и трие́, единоу́мно предстоя́ще Святе́й Тро́ице,/ я́ко со́лнце сия́ют и просвеща́ют/ любо́вию па́мять их восхваля́ющих.
Песнь 7
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Я́ко единоу́мное сосло́вие, отцы́ святи́и,/ а́ще и дале́че отстоя́ще те́лом,/ но ду́хом совоку́плени, ко Го́споду востеко́сте вку́пе воспе́ти:/ благослове́н еси́ в хра́ме сла́вы Твоея́, Го́споди.
Твое́, блаже́нне Ку́кше, со ученико́м Ни́коном от неве́рных вя́тчан усече́ние/ Пи́мен, дале́че отстоя́, прозре́ и велегла́сно посреде́ це́ркве Пече́рския воззва́:/ брат наш Ку́кша в сей день убие́н есть, в час приноси́мыя же́ртвы,/ сла́ва си́ле Твое́й, Го́споди.
Ду́хом Святы́м проре́к Ку́кши и ученика́ его́ Ни́кона от неве́рных убие́ние,/ и сам дух свой преда́л есть в ру́це Бо́гу./ Трие́х сих преподо́бных ра́ди/ и на́ша ду́хи приими́ в сла́ву Твою́, Го́споди.
Богоро́дичен: Ду́ха Свята́го на́шествием Прие́мшая во чре́ве,/ в час, егда́ и́мамы преда́ти ду́хи на́ша Го́споду и предста́ти суди́щу Его́,/ хода́тайством Твои́м предста́ни и умоли́ о нас бла́гость Его́,/ ничто́же бо невозмо́жно хода́тайству Твоему́.
Песнь 8
Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Ру́це распросте́рше к Бо́гу,/ о нас, пою́щих па́мять ва́шу, моли́теся приле́жно, отцы́ Богоно́снии,/ я́ко да ва́шим хода́тайством во све́те присносу́щнем обря́щемся зре́ти Го́спода.
Ты, священному́чениче Ку́кше, со ученико́м ти честны́м Ни́коном,/ я́ко вино́ растворе́нно прине́с кровь свою́,/ моли́ся, да изба́вимся на́шествия враго́в, и́щущих на́шея кро́ве,/ и в ми́ре про́чее благослови́м Го́спода.
Пи́мене Богому́дре, прови́дяй дале́че и гряду́щая провозвеща́яй, я́ко проро́к Бо́жий,/ от гряду́щих на ны за прегреше́ния зол изми́ ско́рым твои́м моле́нием ко Влады́це/ и сподо́би в Небе́сных селе́ниих благослови́ти Го́спода во веки.
Богоро́дичен: И́стинно прови́де Тя преподо́бный Бо́жий,/ я́ко в ми́ре живу́щим помога́еши лю́дем вы́ну;/ мо́лим Тя, Влады́чице: помози́ и нам, немощны́м,/ да, си́лою о Тебе́ препоя́санни, возмо́жем благослови́ти Го́спода во ве́ки.
Песнь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Пропове́дуемый тобо́ю, свяще́нне Ку́кше, Христо́с/ неве́рующим бысть ка́мень претыка́ния,/ обличе́ние бо твое́ о злове́рии их в собла́зн и доса́ду вмени́ша;/ сего́ ра́ди бу́ии, несмы́сленно на тя со ученико́м твои́м Ни́коном напа́дше,/ мече́м главы́ ва́ша отсеко́ша./ Тем вас, я́ко за Христа́ кровь свою́ пролия́вших, ку́пно велича́ем.
Ты, преблаже́нне Пи́мене, терпе́нием на Христе́ – Ка́мени себе́ утверди́в,/ непреткнове́нно проше́л еси́ претыка́ющаго врага́ собла́зненныя се́ти,/ па́че же ты́я, а́ки паучи́ну, расто́ргл еси́/ и, к Вы́шним преше́д, наслажда́ешися ве́чныя сла́вы,/ тем тя велича́ем.
Ду́хом совоку́плени в Вы́шних селе́ниих живу́ще,/ на нас, ни́жних, призри́те, отцы́ преподо́бнии,/ зане́ вси от лю́таго борца́ в беда́х есмы́,/ от него́же моли́теся изба́витися нам,/ я́ко па́мять ва́шу пе́сньми велича́ем.
Богоро́дичен: От ве́ка несве́домую та́йну прие́мшая/ и воплоще́нием Сло́ва Бо́жия откры́вшая ми́ру,/ молю́тися, Мари́е Богоневе́сто:/ от та́йных мои́х очи́сти мя,/ да не откры́ются пред А́нгелы и челове́ки в день о́ный,/ егда́ прии́дет Сын Твой суди́ти ми́ру.
Свети́лен:
Днесь благонаро́читое нам показа́ся вре́мя,/ в не́же пеще́ра свята́я пое́т богоно́сных,/ в не́йже и мы, совоку́пльшеся, Ку́кшу со ученико́м Ни́коном сла́вим,/ Пи́мена пое́м и Бо́га Еди́наго в Тро́ице, покланя́ющеся, восхваля́ем.
Сла́ва, и ны́не, Богоро́дичен:
Времена́ и ле́та во Свое́й вла́сти Положи́вшаго в ле́то ро́ждши, безму́жная Де́во,/ ле́та на́ша плету́щаяся, а́ки паучи́на, моли́твами преподо́бных до́бре устро́й,/ да Ро́ждшагося из Тебе́ сла́вим и Тя любе́зно велича́ем.
На стихо́вне стихи́ры во Окто́ихе и преподо́бным, глас 4:
Стих: Мно́ги ско́рби пра́ведным/ и от всех их изба́вит я́ Госпо́дь.
По́двигом до́брым, Пи́мене сла́вне,/ и му́ченическою кро́вию, Ку́кше преблаже́нне/ с после́дующим ти ученико́м Ни́коном,/ написа́стеся в во́инство Царя́ Небе́снаго/ и бы́сте кре́пцыи ору́жницы на враги́ мы́сленныя,/ тве́рдым бо ополче́нием низложи́сте тех до конца́/ и, я́ко победи́телие, венцы́ прие́мше,/ ра́дуетеся в Небе́сных селе́ниих,/ отню́дуже призри́те на ны,/ чту́щия святу́ю па́мять ва́шу.
Сла́ва, глас 5:
Прему́драго Учи́теля, Христа́ Бо́га на́шего,/ му́дрии ученицы́ яви́стеся,/ сло́во бо де́лом испо́лнисте,/ в ми́ре сем ду́ши своя́ презре́сте,/ о телеси́ не ради́сте,/ вся́кое пристра́стие су́етное отверго́сте,/ на мироде́ржца ополчи́стеся,/ ду́хом води́ми, плотски́я стра́сти победи́сте,/ Ку́кше со ученико́м Ни́коном, мече́м усека́еми,/ Пи́мене, по́стническими труды́ вра́жию си́лу низложи́вый./ Но, отцы́ всеблаже́ннии,/ ра́тующаго нас вы́ну супоста́та низложи́ти/ моли́твами ва́шими пособи́те/ и испроси́те душа́м на́шим ве́лию ми́лость.
И ны́не, Богоро́дичен или́ Крестобогоро́дичен.
