Служба преподобномученика Галактиона, Вологодскаго чудотворца, иже на реце Содиме, преименованной же Золотухе

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Ра́дуйся, богоизбра́нный чи́стый сосу́де,/ Свята́го Ду́ха изря́дное пребыва́ние,/ преподо́бне о́тче Галактио́не,/ ты бо измла́да Христа́ возлюби́л еси́,/ и душеспаси́тельному пути́ рачи́тель был еси́,/ и Ева́нгелию Христо́ву после́довал еси́,/ и ны́не мо́лим тя:/ моли́ся Го́сподеви, спасти́ся душа́м на́шим.

Жела́нием серде́чным а́нгельскаго о́браза дости́гл еси́/ и ко Всеси́льному Бо́гу/ труды́ твоя́ и ве́лию ве́ру прине́сл еси́,/ те́мже, о́тче преподо́бне Галактио́не,/ проти́ву богоподви́жных трудо́в твои́х/ благода́ть от Бо́га восприя́л еси́.

Богоблаже́нне о́тче Галактио́не,/ по успе́нии твое́м свята́я душа́ твоя́/ ко Престо́лу Влады́чню возлете́, я́ко мо́лния,/ и ны́не со Ангелы лику́еши./ Те́мже моли́ о нас Пресвяту́ю Тро́ицу,/ изба́витися от бед и скорбе́й и спасти́ся душа́м на́шим.

Сла́ва, глас 8:

Преподо́бне о́тче наш Галактио́не,/ вои́стину сподо́бился еси́ боже́ственныя жи́зни,/ посто́м бо и бде́нием изнури́л еси́ те́ло твое́/ и богому́дрым твои́м житие́м о́браз был еси́ благоче́стия./ А́ще бо и теле́сный язы́к умолча́,/ но чудеса́ свиде́тельствуют,/ и́бо лучи́ чуде́с испуща́еши,/ исто́чник исцеле́ний оби́льно источа́еши./ Те́мже и мы, де́ти твоя́ духо́вная, пропове́дующе, вельми́ хва́лимся:/ име́ем себе́, глаго́люще, прекра́сное селе́ние/ и неотъе́млемо сокро́вище,/ зря́ще честны́й о́браз твой и чудеса́ быва́емая,/ я́же прославля́ют просла́вльшаго тя Го́спода,/ Ему́же моли́ся дарова́ти правосла́вным христиа́ном/ на сопроти́вныя побе́ду и одоле́ние,/ и ми́ру всему́ смире́ние,/ и душа́м спасе́ние и ве́лию ми́лость.

И ны́не, Богоро́дичен, глас то́йже:

Ра́дуйся, сокро́вище Боже́ственное Еди́наго от Тро́ицы;/ ра́дуйся, пречи́стый хра́ме Пречи́стаго Сло́ва;/ ра́дуйся, Небесе́ и земли́ неумолка́емое славосло́вие;/ ра́дуйся, све́те су́щих во тьме;/ ра́дуйся, щедро́т пучи́но, Влады́чице;/ ра́дуйся, еди́но христиа́н упова́ние;/ ра́дуйся, Защи́тнице жи́зни на́шея;/ ра́дуйся, держа́вная Покрови́тельнице и Помо́щнице;/ ра́дуйся, Препросла́вленная;/ ра́дуйся, Ма́ти Бо́жия Присноде́во;/ ра́дуйся, Благоутро́бная и Всеми́лостивая Госпоже́;/ ра́дуйся, святы́х Пресвята́я Богоро́дице Цари́це;/ ра́дуйся, воскресе́ние и спасе́ние душ на́ших.

На стихо́вне стихи́ры, глас 2.

Подо́бен: До́ме Евфра́фов:

Дом Ду́ха Пресвята́го/ был еси́, о́тче,/ и нас моли́твами твои́ми/ селе́ние покажи́ Святы́я Тро́ицы,/ Галактио́не преподо́бне.

Стих: Честна́ пред Го́сподем/ смерть преподо́бных Его́.

От ю́ности Бо́га/ возлюби́л еси́/ и Тому́ приле́жно/ рабо́тал еси́,/ о́тче преподо́бне Галактио́не.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Благоуха́ет о́браз твой бога́тно/ и да́рует всем незави́стно/ исцеле́ние боля́щим,/ Галактио́не преблаже́нне,/ твои́ми моли́твами.

Сла́ва, глас 8:

Ви́дети жела́я сла́ву Вседержи́теля,/ Тому́ все́ю душе́ю угоди́в, преподо́бне,/ в жи́зни вре́менней вся пренебре́гл еси́,/ те́мже на Небесе́х восприя́л еси́ неизрече́нное воздая́ние,/ богоблаже́нне о́тче Галактио́не,/ иде́же ны́не со А́нгелы водворя́яся,/ помяни́ и нас, любо́вию тя восхваля́ющих,/ и Христо́ви со дерзнове́нием приле́жно моли́ся/ о душа́х на́ших.

И ны́не, Богоро́дичен, глас то́йже:

Ми́ра всего́ Цари́це,/ роди́вшая Царя́ всех, Христа́ Бо́га,/ Еди́наго Милосе́рдаго,/ мо́лишися непреста́нно, от грехо́в и напа́стей изба́витися/ сла́вящим вели́чия Твоя́ и пою́щим Тебе́:/ ра́дуйся, Ма́ти Бо́жия Пречи́стая,/ челове́ков спасе́ние и воскресе́ние/ и тве́рдое огражде́ние.

Тропа́рь зри на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, по́стнических вои́стину по́двигов/ благово́нный сосу́де,/ крест бо на ра́мо взем,/ Влады́це Христу́ себе́, преблаже́нне, возложи́в,/ пло́ти попра́л еси́ до́лу влеку́щее мудрова́ние,/ доброде́тельми же ду́шу твою́ просвети́л еси́/ и к боже́ственному впери́лся еси́ жела́нию./ Те́мже святе́й ико́не твое́й предстоя́ще,/ прехва́льне Галактио́не,/ Боже́ственнаго человеколю́бия/ про́сим получи́ти твои́ми моли́твами/ и ми́ру дарова́ти ве́лию ми́лость.

Ле́ствица небоме́рная я́ве/ житие́ твое́ бысть, богому́дре,/ е́юже на высоту́ возвы́сился еси́/ и Влады́це Христу́ бесе́довати, блаже́нне, сподо́бился еси́,/ ум просвети́в та́мо су́щими осия́нии,/ луча́ми же Того́ просвеща́емь,/ равноа́нгельну прия́л еси́ све́тлость./ Ему́же и ны́не предстоя́, моли́ся, преподо́бне,/ соверша́ющия честну́ю твою́ па́мять с тобо́ю предста́вити/ и ми́ру дарова́ти ве́лию ми́лость.

После́довав стопа́м Влады́ки Христа́,/ пресе́льник оте́чества твоего́ был еси́,/ тве́рдостию бо ра́зума, богоно́се, укрепля́емь,/ разли́чная кова́рства вра́жия и кова́рственная наше́дших шата́ния,/ терпе́нием твои́м одоле́в, низложи́л еси́./ Тем и страна́ волого́дских струй иорда́нски ликовству́ет,/ напая́ема твои́ми слеза́ми,/ ю́же по́стничестии собо́ри ны́не населя́ют,/ житию́ твоему́ после́дующе,/ о ни́хже не преста́й моля́, преподо́бне Галактио́не,/ дарова́тися ей ве́лией ми́лости.

Твои́м равноа́нгельным житие́м, преподо́бне, и смире́нием/ ве́чных благ насле́дник яви́лся еси́/ и чудесы́ твои́ми Во́логду град и окре́стныя ве́си просвеща́еши,/ и́миже весь наро́д страны́ сея́ удиви́л еси́,/ и́же о́браз твой честны́й, прише́д, лобыза́ют, глаго́люще:/ о пречу́дне о́тче наш Галактио́не,/ моли́ Христа́ Бо́га/ дарова́ти душа́м на́шим мир и ве́лию ми́лость.

Сла́ва, глас 4:

Ра́дуйся, всеблаже́нная главо́,/ и́же от млады́х ногте́й кре́постию ума́/ Бо́гом Вседержи́телем утвержда́емь,/ духо́вную пи́щу, Христа́, па́че всех возлюби́л еси́,/ земны́я красоты́ и пи́щи и поко́й отню́д возненави́дел еси́,/ отве́рг по́стланная и возгла́вия,/ почива́ти на тве́рдых железокова́нных у́жех изво́лил еси́./ Того́ ра́ди Небе́сным Си́лам собесе́дник яви́лся еси́, преподо́бне,/ с ни́миже Христа́ Бо́га моли́ непреста́нно/ о всех ве́рно чту́щих па́мять твою́.

И ны́не, Богоро́дичен, глас то́йже: И́же Тебе́ ра́ди:

Та́же вход. Проки́мен дне.

И чте́ния три преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ры хра́ма.

Та́же преподо́бнаго, глас 8:

Тро́ицы Святы́я изря́дный уго́дниче,/ богоно́се о́тче наш, пречу́дне Галактио́не,/ засту́пниче наш те́плый,/ моли́ся при́сно Влады́це Христу́/ и Всепречи́стей Его́ Богома́тери/ поми́ловати нас в День Су́дный.

Сла́ва, глас то́йже:

Безпло́тных невеще́ственных чино́в подража́телю,/ богому́дрый о́тче преподо́бне,/ ты, по честно́м твое́м преставле́нии,/ я́ко со́лнце, чудесы́ сия́еши,/ слепы́я просвеща́еши, боля́щия исцеля́еши,/ избавля́еши вся́ческих бед и напа́стей/ к твоему́ покро́ву прибега́ющая./ Тем волого́дский наро́д тща́тельно твоего́ хра́ма достига́ет,/ и честно́му твоему́ о́бразу вожделе́нно покланя́ются,/ отню́дуже и почерпа́ют Боже́ственную Ду́ха благода́ть, осеня́ющую тя,/ прославля́юще просла́вльшаго тя Христа́ Бо́га./ Его́же моли́, богоно́се Галактио́не,/ да спасе́т ду́ши всех притека́ющих к тебе́/ и святу́ю па́мять твою́ почита́ющих.

И ны́не, Богоро́дичен, глас то́йже: Безневе́стная Де́во:

На стихо́вне стихи́ры самогла́сны, глас 2:

Светови́ден, Пресве́тлому Све́ту ты, бесе́дуя, яви́лся еси́,/ преблаже́нне Галактио́не,/ и́же едине́нием лу́чшим я́ко па́че естества́ обожа́емь,/ боже́ственнаго жела́ния дости́гл еси́ кончи́ну,/ е́же поще́нием издале́ча зрел еси́ со мно́гим умиле́нием./ Тем предстоя́ ра́достно Христу́ Бо́гу на́шему,/ приле́жно моли́ся обрести́ нам ми́лость в День Су́дный.

Стих: Честна́ пред Го́сподем/ смерть преподо́бных Его́.

Се живы́й исто́чник,/ се река́ спасе́ния/ богоно́снаго отца́ благода́ть показа́ся./ Те́мже усе́рдно вси прииди́те,/ поче́рпем, неду́гующии, исцеле́ние,/ и ра́дость, су́щии в печа́лех,/ и вси боле́знующии душе́вными страстьми́, незави́стно исцеле́ние/ моли́твами уго́дника Христо́ва, блаже́ннаго Галактио́на.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Всехва́льне о́тче наш Галактио́не,/ источа́еши исцеле́ния приходя́щим с ве́рою,/ и дух твой, блаже́нне, со безпло́тными ликовству́я,/ о Бо́зе весели́тся,/ и, к Нему́ дерзнове́нне со преподо́бными предстоя́,/ в вы́шних моли́ спасти́ся всем/ почита́ющим твое́, преподо́бне Галактио́не, успе́ние.

Сла́ва, глас 5:

Востру́бим духо́вными пе́сньми во псалме́х и пе́ниих,/ стеце́мся в це́рковь Бо́жию/ и услы́шим засту́пника гра́ду на́шему,/ его́же моли́твами свои́ми соблюда́ет всегда́ от наше́ствия пога́ных./ Те́мже ему́ вси та́ко рцем:/ о́тче Галактио́не приснопа́мятне,/ предвари́ и изба́ви нас от искуше́ний вся́ческих,/ любо́вию моля́щих тя,/ я́ко те́пла предста́теля ко Спа́су всех Христу́ Бо́гу за лю́ди твоя́,/ да спасе́т ду́ши на́ша.

И ны́не, Богоро́дичен, глас то́йже: Храм и дверь еси́:

Тропа́рь, глас 5:

Днесь град Во́логда тобо́ю всеми́рне хва́лится,/ возсия́л бо еси́ пресве́тло, я́ко со́лнце,/ и чудесы́ твои́ми град и ве́си, преподо́бне Галактио́не, озари́л еси́./ И ны́не моли́ся Го́сподеви/ изба́витися душа́м на́шим от пре́лести вра́жия/ и спасти́ся гра́ду на́шему от пога́нскаго и всех проти́вных наи́тия,/ и испроси́ у Христа́ Бо́га любо́вию чту́щим тя/ прегреше́ний проще́ния/ и прося́щим твоея́ по́мощи от вся́кия ско́рби избавле́ния/ и вопию́щим к тебе́:/ Бог наш с на́ми, просла́вивый уго́дника Своего́, я́коже благоволи́.

Ин тропа́рь, глас 4:

Днесь град Во́логда тобо́ю хва́лится, преподо́бне,/ возсия́л бо еси́ пресве́тло, я́ко со́лнце,/ гра́ды и ве́си чудесы́ твои́ми озаря́я./ И ны́не, преподобному́чениче Галактио́не, Го́сподеви моли́ся/ стране́ на́шей от нахожде́ния сопроти́вных изба́витися,/ и у Христа́ Бо́га прегреше́ний на́ших оставле́ние испроси́,/ и от вся́кия ско́рби избавле́ние пода́ждь/ любо́вию чту́щим тя и вопию́щим ве́рно:/ Бог наш с на́ми, просла́вивый уго́дника Своего́, я́коже благоволи́.

НА У́ТРЕНИ

На Бог Госпо́дь: тропа́рь свята́го. Сла́ва, и ны́не: Богоро́дичен.

По 1-м стихосло́вии седа́лен, глас 8.

Подо́бен: Прему́дрости:

Стремле́ния плотска́я умертви́в мно́гими по́двиги, преподо́бне,/ прия́телище был еси́ Боже́ственных восхожде́ний,/ отню́дуже и чуде́с благода́ть от Бо́га прия́л еси́,/ и в пусты́ни исто́чник водны́й соде́лал еси́,/ и мно́гими твои́ми чудесы́ мир удиви́л еси́, приснопа́мятне о́тче,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко пресве́тлую спаси́тельнаго нас ра́ди Сло́ва строе́ния дверь, ше́дшую в мир,/ Блаже́ннаго Божества́ у́мную лучу́/ и я́ко новоцве́тный и боже́ственный рай Вседержи́теля Бо́га Отца́,/ прекра́сный черто́г Царя́ Христа́ и пречу́дную пала́ту Ду́ха Свята́го,/ Тя, Пренепоро́чная Богома́ти, Присноде́во Мари́е, мо́лим, раби́ Твои́,/ и, пречи́стому о́бразу Твоему́ припа́дающе, со умиле́нием вопие́м Ти:/ Преми́лостивая, моли́ся, Цари́це и Богоро́дице, Сы́ну Твоему́ и Бо́гу,/ прегреше́ний оставле́ние дарова́ти/ благоче́стно покланя́ющимся боже́ственней ико́не Твое́й.

По 2-м стихосло́вии седа́лен, глас 8:

Я́ко Авраа́м дре́вле пра́ведный, оста́вль оте́чество свое́,/ и во и́ну страну́ удали́л еси́ себе́, преподо́бне,/ и близ боголюбе́знаго гра́да Во́логды всели́лся еси́,/ иде́же во́ду сла́дку от земны́х недр изве́л еси́,/ и пию́щим ю о цельба́х преподава́тися у Христа́ Бо́га испра́шиваеши./ Сего́ ра́ди вопие́м ти, богоно́се Галактио́не:/ спаси́ моли́твами твои́ми от вся́кия тесноты́/ чту́щих любо́вию, досточу́дне, торжество́ твое́.

Сла́ва, и ны́не, Богоро́дичен:

Ра́дуйся, престо́ле огнезра́чный Бо́жий;/ ра́дуйся, Отрокови́це, седа́лище Ца́рское и о́дре, упещре́нно по́стланный,/ златопорфи́рный черто́же,/ молниено́сная колесни́це, свети́льниче пресве́тлый;/ ра́дуйся, Богоро́дице, дванадесятосте́нный гра́де, дверь златови́дная,/ светлопозлаще́нная трапе́зо, благоукра́шенная ски́ния;/ ра́дуйся, Неве́сто, сла́вою солнцека́плющая;/ ра́дуйся, еди́но душа́м христиа́нским благоле́пие.

По полиеле́и седа́лен, глас 8:

Святы́х после́дуя житию́, богому́дре,/ погре́бл еси́ страсте́й воста́ние умерщвле́нием пло́ти/ и освяти́лся еси́ весь, боголюбе́зный, дея́нии, о́тче Галактио́не,/ жизнь безконе́чную по сме́рти прия́л еси́./ Те́мже днесь Христо́ва Це́рковь пра́зднует твою́ па́мять,/ и мы тя просла́вим, вопию́ще:/ не преста́й моля́ Христа́ Бо́га о почита́ющих честно́е твое́ успе́ние.

Сла́ва, и ны́не: О Тебе́ ра́дуется: (зри день 25).

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 8:

Преподобне, всеблаже́нне о́тче наш Галактио́не,/ мни́хом похвало́ и по́стников красото́,/ волого́дстей стране́ хвале́ние и сла́во,/ просвети́вый, я́ко звезда́, селе́ние пусты́нное,/ уми́льно мо́лим тя, духо́вная ча́да твоя́:/ Христа́ Бо́га моли́ о спасе́нии душ на́ших.

Кано́н преподо́бнаго, его́же краегране́сие: Но́вая но́вому гимно́дия изря́дна преподо́бному Галактио́ну. Глас 8.

Песнь 1

Ирмо́с: Во́ду проше́д:

Несозда́ннаго Триипоста́снаго Божества́ А́нгеле,/ Невече́рняго Све́та сы́не и челове́че вои́стину Бо́жий,/ песнь тебе́ плету́щу предста́ни о мне, преподо́бный,/ да сконча́в ю, возблагоду́шествую,/ поя́ побе́дную песнь Го́споду, я́ко просла́вися.

Отце́м похвало́, священноду́шне, ра́дуйся, сосу́де Бо́жий вои́стину,/ ра́дуйся, све́тлый по́стнических доброде́телей би́сере,/ с Небе́сными умы́ при́сно предстоя́ Христу́/ и поя́ побе́дную песнь, я́ко просла́вися.

Вседержи́тель Госпо́дь Сил, Ему́же после́довал еси́ непоро́чным житие́м твои́м,/ во освяще́ние тебе́ бысть, чу́дне Галактио́не,/ Его́же любо́вь угаси́ в тебе́ любо́вь оте́чества твоего́,/ жела́тельно бо оста́вил е, поя́ Христу́, я́ко просла́вися.

Богоро́дичен: Язы́к кий возмо́жет боже́ственныя Твоея́ хвалы́ по досто́инству вели́чие воспе́ти, Богороди́тельнице,/ Тебе́ бо ра́ди челове́ческое естество́, страстьми́ погружа́емое, вообрази́ся./ Те́мже, Тобо́ю спасе́ннии, песнь Тебе́ пое́м, Влады́чице, я́ко просла́вися.

Песнь 3

Ирмо́с: Небе́снаго кру́га:

Незави́стно всем дае́ши исцеле́ние и благоуха́еши бога́тно,/ ду́ши же от бесо́вских наве́тов избавля́еши/ моли́твами твои́ми, преподо́бне.

Отроча́ еще́ сый, ве́тхаго извле́клся еси́ челове́ка и красо́т мирски́х,/ впери́лся еси́ в ве́чную жизнь,/ победи́в трича́стное души́ соверше́нным, досточу́дне, безстра́стием,/ в не́мже утверди́ся дух твой.

Во́лю творя́ Бо́жию, Того́ Отца́ себе́ име́л еси́, Галактио́не преподо́бне,/ ма́терь же умиле́ние, па́мять исхо́да я́ко сожи́тельницу,/ тем и пусты́ню дости́гл еси́, щито́м смире́ния отвраща́я ми́ра сла́ву,/ Христу́ подража́я, в Не́мже утверди́ся дух твой.

Богоро́дичен: Мари́е, Благослове́нная Де́во, Всепречи́стая Ма́ти Бо́жия,/ Препросла́вленная Влады́чице А́нгелов и челове́ков преблаго́е прибе́жище,/ простри́ держа́вную Твою́ десни́цу, и преподо́бнаго Галактио́на моли́твами благослови́ ны,/ и сохрани́ покланя́ющияся Тебе́, да утверди́тся дух наш.

Седа́лен, глас 3:

Уедине́нно ме́сто обре́т, водворе́ние име́л еси́, преподо́бне о́тче,/ безмо́лвием Бо́гу бесе́дуя и вся́кая сво́йства отсека́я, я́ко прему́дрый,/ ве́лие умиле́ние пусты́ннаго пребыва́ния стяжа́л еси́ и в напа́стех непрекло́нен был еси́./ Те́мже и гра́ду на́шему Во́логде, грех ра́ди на́ших озло́бленну наше́ствием бы́вшу,/ попече́нием спомоществова́л еси́/ и открове́нное тебе́ Бо́гом прави́телю волого́дскому безкры́тно яви́ти попе́клся еси́,/ он же, вознесе́н буего́рдаго своего́ се́рдца надме́нием,/ небре́жен бысть словесе́м твоего́ проро́чества,/ за е́же воздаде́ ему́ Госпо́дь и су́щим с ним, плени́вшим его́./ Христа́ моли́, Галактио́не досточу́дне, о почита́ющих любо́вию честно́е успе́ние твое́.

Сла́ва, и ны́не, Богоро́дичен:

Устраши́ся вся́кое земноро́дных слы́шание:/ от недр Оте́ческих во утро́бу всели́ся Деви́чу,/ Его́же у́бо проро́цы провозвести́ша из Тебе́ воплоще́ннаго бы́ти Сы́на Бо́жия,/ Ма́ти Де́во Всепе́тая, Его́же моли́ спасти́ ста́до Твое́, Богоро́дице.

Песнь 4

Ирмо́с: Услы́шах, Го́споди:

Ум влады́ку на стра́сти плотски́я, богоно́се Галактио́не, поста́вль/ и нескве́рно е́же по о́бразу соблю́д,/ изря́дно на е́же по подо́бию восте́кл еси́,/ отню́дуже, я́ко Ада́м пре́жде преступле́ния, неви́нностию сия́я,/ зовы́й Вседержи́телю:/ сла́ва си́ле Твое́й, Го́споди.

Моисе́йски кро́тостию блиста́я, пречу́дне,/ и, я́коже еле́нь, жела́нием е́же ко Христу́ обдержи́мь, безстра́стия дости́гл еси́,/ о гра́де на́шем благопопече́ния исполня́яся,/ зову́щи Да́телю благи́х:/ сла́ва си́ле Твое́й, Го́споди.

А́нгельское житие́ препровожда́я неле́ностно,/ в бы́вшей гра́ду Во́логде напа́сти беспоко́йно ходи́в, пропове́дуя,/ те́мже поко́й духо́вный при реце́ Со́диме обре́л еси́, блаже́нне,/ моли́твою, посто́м и смире́нием от Све́та просвеща́емь,/ ра́достно Бо́гу взыва́я:/ сла́ва си́ле Твое́й, Го́споди.

Богоро́дичен: Ада́мово, Де́во Пречи́стая, обожи́ся смеше́ние,/ Собезнача́льное бо Отцу́ Сло́во сый и Ду́ху от Тебе́, Всенепоро́чная, роди́тися благоволи́./ Те́мже к Тебе́ прибега́ем, не отста́ви ми́лость Твою́ от нас, ве́рно вопию́щих:/ сла́ва си́ле Твое́й, Го́споди.

Песнь 5

Ирмо́с: Просвети́ нас:

Ре́чная устремле́ния чуде́с твои́х, о́тче преподо́бне,/ весе́лия исполня́ют град Во́логду и окре́стная его́,/ и вси спеша́т, е́же о Го́споде, к твоему́ хвале́нию.

Волого́дския и Со́дима быстрины́ о тебе́ веселя́тся,/ зане́ держа́вный град Москва́ просла́ви тя, све́тла свети́льника,/ те́мже и град Во́логда, игра́я, торжеству́ет о твое́м хвале́нии.

Волого́дскую страну́ при́сно чудесы́ обогаща́еши, богоно́се Галактио́не,/ е́йже по Бо́жией, да́нной тебе́, благода́ти ми́лостивый предста́тель явля́ешися,/ веселя́щейся о твое́м хвале́нии.

Богоро́дичен: Ма́ти Бо́жия, пречи́стая колесни́це Све́та Присносу́щнаго,/ Галактио́новым предста́тельством спаси́ ны, рабы́ Твоя́,/ у́тренюющия к Твоему́, Влады́чице, хвале́нию.

Песнь 6

Ирмо́с: Моли́тву пролию́:

Таи́нника и учи́теля Присносу́щное Сло́во и просвеще́ние, прехва́льне о́тче Галактио́не, име́в,/ от младе́нчества и до кончи́ны сосу́д чи́стый святы́ни быв,/ немо́лчно взыва́л еси́:/ Го́споди, спаси́ мя.

Облече́н быв во Христа́, целому́дрия и безстра́стия Да́теля и Помо́щника,/ зе́льнаго по́стничества и трудо́в не измени́л еси́/ и, на го́ру доброде́телей возше́д, в неизрече́нный светозаре́ния свет прише́л еси́,/ его́же ра́ди взыва́л еси́:/ Го́споди, спаси́ мя.

Доброде́телей мно́жеством украси́вся,/ на ня́же, я́ко на колесни́цу, неле́ностныма нога́ма возше́д, о́тче сла́вне,/ возлете́л еси́ на Не́бо, ме́ртвенное прикрове́ние, я́ко сапо́г, разре́ш и Бо́гу предста́в,/ Ему́же воспе́л еси́:/ Го́споди, спаси́ мя.

Богоро́дичен: А́нгел быв, преподо́бне, Всепречи́стыя Вседержи́теля Роди́тельницы,/ Многоми́лостивыя христиа́н Предста́тельницы,/ возвести́л еси́ гряду́щий гнев гра́ду Во́логде, со умиле́нием взыва́я:/ Влады́чице, спаси́ ны.

Конда́к, глас 4:

Благоче́стно на земли́ пожи́в,/ муче́ния вене́ц прия́л еси́, прече́стне,/ дре́вом во главу́ от наше́дших градоразори́телей убие́н,/ я́ко до́брый учени́к Спа́са Христа́,/ оста́вивый оте́чественный свой град и дру́ги/ и стра́нствовати любве́ ра́ди Христо́вы ева́нгельски изво́ливый./ Сего́ ра́ди тя почита́ем, пе́сньми вопию́ще:/ от бед изба́ви нас при́сно моли́твами твои́ми,/ уго́дниче Бо́жий Галактио́не, о́тче наш.

И́кос:

Я́ко светоза́рная луча́, вселе́нней свет возвеща́я, всему́дре о́тче Галактио́не,/ озари́л еси́ Волого́дскую страну́ чудесы́ твои́ми, и́миже тя Христо́с обогати́./ Тем вопие́м ти: ра́дуйся, о́тче наш предо́брый;/ ра́дуйся, по́стничествующих сосло́вие; ра́дуйся, ли́ку святы́х сочета́ние;/ ра́дуйся, преподо́бных удобре́ние, отце́м похвале́ние;/ ра́дуйся, крестоно́сное по гла́су Го́спода твоего́ после́дование;/ ра́дуйся, я́ко и́скренне ве́рующим на сопроти́вныя побе́ды у Христа́ испроша́еши;/ ра́дуйся, я́ко град наш невреди́м от наи́тия сохраня́еши;/ ра́дуйся, я́ко у Престо́ла Вседержи́теля Бо́га со А́нгелы лику́еши;/ ра́дуйся, я́ко усе́рдно Того́ за ны умоля́еши./ Мы же тя почита́ем, вопию́ще:/ от бед изба́ви нас моли́твами твои́ми,/ уго́дниче Бо́жий Галактио́не, о́тче наш.

Песнь 7

Ирмо́с: От Иуде́и доше́дше:

Истка́нную от Вы́шняго благода́ти, совлече́нием вне́шняго челове́ка, во оде́жду обле́клся еси́, богоно́се Галактио́не,/ и, я́ко красе́н грозд мы́сленнаго виногра́да,/ вино́ нам безчи́сленных чуде́с излива́еши, Просла́вившему тя пою́щим:/ благослове́н еси́, Бо́же оте́ц на́ших.

На земли́ сый, Христо́во был еси́ благоуха́ние,/ тем по отше́ствии твое́м Небе́сная благоуха́ния подае́ши,/ и чуде́с твои́х пресла́вных град и ве́си, целе́бныя сла́дости тре́бующии, испо́лнишася,/ Го́сподеви зову́ще:/ благослове́н еси́, Бо́же оте́ц на́ших.

Ра́достно честно́е твое́ пра́зднество днесь и пресла́вную твою́, всеблаже́нне, па́мять торжеству́юще,/ позна́хом тя моли́твенника и врача́ предо́браго и защи́тителя тве́рдаго мни́хом,/ и Го́сподеви пое́м:/ благослове́н еси́, Бо́же оте́ц на́ших.

Богоро́дичен: Достодо́лжно днесь и при́сно еди́ну святы́х Пречестну́ю Богоблагода́тную Присноде́ву,/ сподо́бльшуся за превосходя́щую свя́тость роди́ти Еди́наго от Тро́ицы и безсме́ртну бы́вшу,/ возне́сшуюся превы́ше Небе́с и покланя́емую от всех святы́х А́нгел,/ я́ко Цари́цу всея́ тва́ри, ве́рнии, вопию́ще, мо́лим,/ да сподо́бит ны ми́лости Ро́ждшагося из Нея́ Бо́га оте́ц на́ших.

Песнь 8

Ирмо́с: Се́дмери́цею пещь:

Волого́дская страна́ днесь па́мять твою́ пра́зднуют,/ сла́вы твоея́ наслажда́ющеся, преподо́бне,/ сограждани́на тя себе́ су́ща мо́лят приле́жно,/ да не отсту́пиши, сохраня́я твое́ достоя́ние,/ моля́ о них, творе́нии Го́спода.

Оби́тели го́рних дости́г,/ прибли́житися многочестне́йшему и высоча́йшему Све́ту и ра́зума просвеще́нию сподо́блься, преподо́бне,/ не забу́ди поклоня́ющихся твое́й све́тлой па́мяти/ и убо́гое ста́до ми́лостивно посеща́й,/ благословя́щее творе́ние Го́спода.

Тро́ичен: Ликостоя́ния а́нгельская Тя, Тро́ице равносла́вимая, О́тче и Сы́не и Ду́ше,/ Безнача́льная, Несозда́нная, Нача́льственная и Ца́рственная, Пресоверше́нная, Единосу́щная,/ при́сно сла́вят немо́лчными усты́,/ с ни́миже и мы, бре́ннии, со стра́хом Тя, Трисо́лнечнаго Све́та,/ благослови́м, творе́ние Го́спода.

Богоро́дичен: А́нгела неми́лостива ча́ю по моему́ зло́бному житию́ приити́,/ не ущедря́юща, ниже́ щадя́ща мя в стра́шный час сме́ртный,/ тогда́ к кому́, скве́рный аз, прибе́гну, то́кмо к Тебе́, Цари́це Богоро́дице,/ гре́шных покро́ву и упова́нию и ско́рому ско́рбных утеше́нию,/ Тебе́ бо ни еди́но же невозмо́жно, то́кмо е́же хоте́ти,/ я́ко Ма́тери Го́спода.

Песнь 9

Ирмо́с: Ужасе́ся о сем:

Све́тлый му́дрости духо́вный до́ме, пусты́нная красото́ молча́ния,/ селе́ние ве́дения, бу́дущих сказа́телю,/ о́тче преподо́бне Галактио́не,/ не преста́й моли́твами твои́ми сохраня́ти тя велича́ющия.

Вели́ку к тебе́, преподо́бне, Волого́дская страна́ иму́щи ве́ру,/ крила́та тя воздухохо́дна помо́щника весть,/ цельбоно́сную твою́ па́мять почита́ющи и припа́дающи, про́сит:/ не преста́й моли́твами твои́ми сохраня́ти тя велича́ющия.

Очи мои́ просвети́, блаже́нне и всече́стне о́тче,/ да свет покая́ния до́бре созерца́ю/ и обря́щу ми́лость Стра́шнаго Судии́ в гро́зный час суда́,/ ты бо еси́ слепы́х просвети́тель, немы́х ясноре́чие, и вся́ких неду́гов врач, и прибе́жище скорбя́щих,/ тем тя, Христо́ва уго́дника, велича́ем.

Богоро́дичен: Умиле́ния струи́ пода́ждь ми, Де́во Пречи́стая, еди́на Богоблагода́тная Влады́чице,/ да отмы́ю вся се́рдца моего́ скве́рны,/ Ты бо еси́ па́дающих исправле́ние и безнаде́жных наде́ждо,/ вино́вная ве́чныя ра́дости и и́стиннаго весе́лия,/ впа́дша мя в про́пасть греха́ воскреси́, я́ко Ма́ти сладча́йшаго Воскресе́ния/ и Спасе́ния Тя при́сно велича́ющих.

Свети́лен:

Возсия́л еси́ всему́ ми́ру сия́тельными чудесы́ твои́ми, Галактио́не светоно́сче,/ звезде́ Це́ркве присносия́ющая, обурева́емых ти́хое приста́нище, исцеле́ний сокро́вище,/ те́мже тя град Во́логда неусы́пна име́ет храни́теля.

Сла́ва, и ны́не, Богоро́дичен:

От нерукотворе́нных пеле́н Небе́сных о́блак в смире́нныя пелены́ тле́нныя/ О́тчее Сло́во неизрече́нно из Де́вы без се́мене роди́ся,/ Ю́же, Чи́стую Ма́терь, Пресла́вную Богоро́дицу,/ непреста́нно пое́м и славосло́вим во ве́ки веко́в. Ами́нь.

На хвали́тех стихи́ры, глас 8:

О́тче богому́дре Галактио́не,/ в ме́ру похвалы́ преподо́бных дости́гл еси́ смиренному́дрия ра́ди,/ бесо́в сокруши́л еси́ сле́зными то́ки/ и по́стническими во око́вах труды́./ Христу́ приле́жно моли́ся, преподо́бне,/ испроси́ правосла́вным христиа́ном/ на сопроти́вных побе́ды.

О́тче преподо́бне Галактио́не,/ единоревни́телю мни́хом,/ бы́вшу у́бо гне́ву Бо́жию на лю́ди,/ тогда́ град плени́ша/ и ча́да твоя́, я́ко кла́сы, мечи́ пожа́ша,/ моли́твами же твои́ми/ к Невече́рнему Све́ту тех посла́л еси́,/ Христа́ Бо́га приле́жно моли́/ и ны́не изба́витися нам от наше́ствия/ и дарова́тися ве́лией ми́лости.

Вы́шних ве́чная взыска́л еси́,/ до́льняя же я́ко мимоше́дшая вмени́л еси́/ и та́ко изя́щен моли́твенник показа́лся еси́,/ егда́ у́бо гра́ду на́шему бысть наше́ствие иноплеме́нников,/ тогда́ прорече́нием твои́м/ мно́гим по́льзу сотвори́л еси́,/ и ны́не нам па́че от Христа́ Бо́га/ ми́лость испроси́, о́тче преподо́бне,/ я́ко да любо́вию, в па́мять твою́ соше́дшеся,/ тя почита́ем.

Сла́ва, глас 6:

Псало́мски пе́сньми днесь почти́м преподо́бнаго/ с весе́лием о Го́споде и па́ки рцем:/ ра́дуйся, о́тче наш преподо́бне Галактио́не,/ ра́йскаго ра́дования напо́лнивыйся,/ от Христа́ Бо́га нетле́нен вене́ц прия́л еси́/ и, я́ко пресве́тлый свети́льник,/ ду́шу твою́ просвети́л еси́./ И ны́не та́ко пе́сньми вси возопие́м:/ ра́дуйся, преподо́бне о́тче наш.

И ны́не, Богоро́дичен, глас то́йже.

Славосло́вие вели́кое. И отпу́ст.

НА ЛИТУРГИ́И

Блаже́нны, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Га́ла́том, зача́ло 213. Аллилу́ия, глас 6: Блаже́н муж, боя́йся Го́спода: Ева́нгелие от Луки́, зача́ло 24. Прича́стен: В па́мять ве́чную:

А́ще настоя́тель благоволи́т, по ве́ре и проше́нию кого́, моле́бен соверша́ти Пречи́стей Богома́тери и уго́днику Бо́жию с освяще́нием воды́, твори́м моле́бен и освяще́ние воды́ по обы́чаю.

Егда́ же пева́ема стихи́ра, глас 4: Исто́чник исцеле́ний: таже: Сла́ва, глас то́йже:

Све́тлую твою́ содева́ет блаже́нную па́мять Влады́ка Христо́с,/ исполня́я твоя́, я́же к Нему́, моле́ния,/ богоно́се Галактио́не,/ се бо вода́, ю́же труды́ твои́ми/ от земны́х недр произве́л еси́,/ всем явля́ется жи́ва и ска́чущая,/ и сла́дость ди́вну, и исцеле́ние неду́гов,/ и дар освяще́ния, и благослове́ние Иорда́ново нося́ща,/ разли́чным ско́рбем измене́ние, и душа́м очище́ние,/ и бесо́вским ко́знем разруше́ние содева́ет Боже́ственным манове́нием./ Но, о преподо́бне о́тче,/ не преста́й и ны́не назира́ти ю/ и с высоты́ благослове́ние Святы́я Тро́ицы/ и благода́ть Пречи́стыя Присноде́вы Богоро́дицы/ на ню низпосыла́ти моли́твами твои́ми/ ко спасе́нию душ на́ших.

И ны́не: При́зри на моле́ние:

И Влады́чице, приими́ моли́твы: Та́же кропле́ние и ектения́ и моли́тва: Влады́ко Многоми́лостиве:

Моли́тва

Преподо́бне о́тче наш Галактио́не, свети́льниче стране́ на́шей, подвигополо́жников удобре́ние, Во́логды гра́да засту́пниче те́плый и неусы́пный, за ны, гре́шныя, ко Всеми́лостивому Бо́гу на́шему, Иису́су Христу́, и ко Святе́й Пречи́стей Ма́тери Его́, Влады́чице на́шей Богоро́дице, Присноде́ве Мари́и, моли́твенниче! Мо́лим твою́ честну́ю святы́ню мы, недосто́йнии раби́ твои́, зря́ще на святочудотво́рный о́браз твой, духо́вными взо́ры стоя́ще во огра́де селе́ния твоего́, не забу́ди нас, си́рых, но, я́ко оте́ц чадолюби́вый, посети́ ду́хом душ на́ших не́мощь и испроси́ моли́твами твои́ми у Христа́ Бо́га на́шего, да освяти́т ду́ши на́ша, и ум наш просвети́т, и вразуми́т, и со́вести на́ша от вся́кия скве́рны очи́стит, и от нечи́стых помышле́ний, и вре́дных разуме́ний, и губи́тельнаго уны́ния, и изба́вит нас от бесо́вских наве́тов и дневны́х и нощны́х озлобле́ний, и да́рует нам и́скреннее покая́ние, се́рдцу сокруше́ние, сле́зы и умиле́ние, воздержа́ние и тре́звость, смиренному́дрие и кро́тость, чистоту́ душе́вную и теле́сную, нищелю́бие же и страннолю́бие, и друг ко дру́гу нелицеме́рную любо́вь, и милосе́рдие, и вся́кое благоволе́ние. О всеблаже́нне о́тче наш Галактио́не, сподо́би ны после́довати по си́ле пути́ спасе́ния, я́ко да твои́ми моли́твами Преблаги́й Христо́с, Бог наш, пока́жет нам, гре́шным, благода́ть и ми́лость Свою́, и вся́ких зол и бу́дущаго муче́ния нас свободи́т, и сподо́бит насле́дником бы́ти Ца́рствия Своего́ Небе́снаго, сла́вящих Его́ и велича́ющих ку́пно со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.