Служба преподобнаго Трифона, Печенгскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Блаже́нне Три́фоне,/ уго́дниче Христа́ Бо́га на́шего,/ смире́нныя на́ша ду́ши ко Го́споду любо́вию возвраща́й всегда́,/ преподо́бническими твои́ми моли́твами/ сласте́й на́ших огнь угаси́,/ приводя́ нас ко исполне́нию Боже́ственных повеле́ний,/ сердца́ на́ша очища́й и́стинным покая́нием,/ я́ко бо отца́, в по́мощь призыва́ем тя.

Преподо́бне Три́фоне Богому́дре,/ чи́стая твоя́ душа́, Богопросвеще́нным смы́слом сия́ющи,/ облиста́ющи доброде́телей светлостьми́,/ озаря́ет ве́рных исполне́ние,/ бесо́вскую тьму отгоня́ющи,/ того́ ра́ди ублажа́ем тя.

Име́я ду́шу ми́лостивну,/ и чист по́мысл, и се́рдце бо́дро,/ ве́ру небла́зненну/ и любо́вь, вои́стинну нелицеме́рну,/ от земли́ преста́вился еси́ к Небе́сным,/ преподо́бне о́тче наш Три́фоне,/ и с ли́ки пропове́дников и пустынножи́телей водворя́ешися;/ те́мже тя почита́ем свяще́нными пе́сньми/ и благоче́стно сла́вим.

Сла́ва, глас 1:

Преподо́бне о́тче наш Три́фоне,/ удивля́емся житию́ твоему́ непоро́чному/ и хва́лим тя, равноа́нгельне,/ почита́ем по́мысла твоего́ целому́дрие,/ воспева́ем кре́пости твоея́ смире́нное и молчали́вое,/ блажи́м тя, в ми́лости неоску́днаго/ и все́ми доброде́тельми чу́днаго./ Сих бо ра́ди свяще́нных по́двигов твои́х/ наслажда́ешися у Христа́ Бо́га/ неизрече́нныя Его́ ра́дости в Небе́снем Ца́рствии.

И ны́не, Богоро́дичен:

Гре́шных моли́твы прие́млющи/ и скорбя́щих воздыха́ния не презира́ющи,/ Ма́ти Милосе́рдая,/ и́же из Тебе́ ро́ждшагося Сы́на, Христа́ Бо́га на́шего,/ моли́ спасти́ся душа́м на́шим.

Проки́мен дне.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще Ду́ху Свято́му,/ прему́дре о́тче наш Три́фоне, был еси́,/ те́мже вопие́м:/ Ца́рствию Бо́жию рабы́ твоя́ прича́стники сотвори́,/ святу́ю твою́ па́мять любо́вию почита́ющия.

Стих: Честна́ пред Го́сподем/ сме́рть преподо́бных Его́.

Житие́ твое́, преподо́бне,/ я́ко со́лнце, во страна́х се́верных возсия́,/ чудеса́ испуща́я;/ те́мже и нас све́том невече́рним озари́,/ па́мять твою́ воспева́ющих при́сно.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Преподо́бне о́тче,/ не преста́й моля́ся о оби́тели твое́й/ и о при́сных твои́х рабе́х,/ и́хже духо́вным благове́стием твои́м породи́л еси́,/ да вси честно́е твое́ пра́зднество, веселя́щеся, почита́ем.

Сла́ва, глас 4:

Земна́го А́нгела/ и Небе́снаго челове́ка,/ преподо́бнаго отца́ на́шего Три́фона,/ бра́тие, вси почти́м,/ исто́чника умиле́ния, ми́лости тече́ние,/ струю́ исцеле́ний, ма́слину Бо́жию, в пусты́ни плодови́ту,/ и припаде́м ему́, глаго́люще:/ преподо́бне о́тче,/ еле́ем пусты́нных твои́х трудо́в просвеща́й нас,/ ве́рно хва́лящих и любо́вию чту́щих святу́ю па́мять твою́.

И ны́не, Богоро́дичен:

Изба́ви нас от бед,/ Богоро́дице Де́во, Ма́ти Христа́ Бо́га,/ да вси вопие́м Ти:/ ра́дуйся, Еди́на Вино́вная спасе́нию душ на́ших.

Тропа́рь пи́сан на вели́цей вече́рни.

НА ВЕЛИЦЕЙ ВЕЧЕРНИ

Стихи́ры, глас 6:

Виде́ний и дея́ний Богомы́слием возве́дся,/ Богоподража́телен показа́лся еси́, преподо́бне Три́фоне,/ посреде́ непрохо́дных пусты́нь процветы́й, я́ко фи́никс,/ оби́тель Всесвяты́я Тро́ицы и ины́я хра́мы возгради́л еси́,/ и́нок мно́жество собра́в;/ сего́ ра́ди, ве́рная ча́да твоя́,/ любе́зно почита́ем па́мять твою́.

Прему́дре Три́фоне,/ проразуме́в мимотеку́щих пре́лесть,/ ученико́м твои́м, я́ко злогуби́тельна го́рькаго мо́ря,/ бе́гати ми́ра повеле́л еси́/ и ны́не, к Вы́шним оби́телем преста́влься,/ не преста́й уча́ нас и моли́ся о душа́х на́ших.

В настоя́щем ве́це жи́зни сея́/ ничто́же сла́дко и красно́ проразсуди́вый,/ о́тче наш Три́фоне,/ в пусты́нях, в гора́х и в де́брех безмо́лвно стра́нствуя,/ ко еди́ному Бо́гу при́сно взира́л еси́,/ се́рдце твое́ Святе́й Тро́ице дом чист соблюды́й,/ ду́шу же твою́ вся́кия стра́сти свобо́дну соде́лал еси́./ Святу́ю Тро́ицу моли́ о душа́х на́ших.

И́ны стихи́ры, глас 8:

Преподо́бне о́тче Три́фоне,/ у́ды твоя́ рабы́ пра́вды сотвори́л еси́/ и во обы́чаи твое́м восприя́л еси́ сла́дце,/ е́же о скоротеку́щих не смуща́тися, ниже́ боле́зновати мы́слию,/ ду́шу же твою́, сле́зными моли́твами цвету́щу, всегда́ име́л еси́,/ того́ ра́ди разу́мное в Бо́зе гряду́щее блаже́нство получи́л еси́./ Моли́ся Го́сподеви о душа́х на́ших.

Преподо́бне о́тче наш, испове́дниче Христо́в Три́фоне,/ ты просвети́л еси́ язы́ческий наро́д благове́стием,/ и, во оби́тели Святы́я Тро́ицы ча́да твоя́ возрасти́в,/ изоби́льно сло́вом Бо́жиим па́че ме́да напита́л еси́,/ и пре́жде всех Ца́рствия Бо́жия и пра́вды его́ иска́ти повеле́л еси́./ Того́ ра́ди ве́лий дар целе́ния от Бо́га восприя́вый,/ моли́ся о душа́х на́ших.

Преподо́бне о́тче Три́фоне,/ ты, в пусты́ни на диа́вола хра́бро во́инствовав,/ в зна́мение побе́ды ку́щу свою́,/ я́ко на Небеси́, в непрохо́дных водрузи́л еси́,/ сего́ ра́ди Христа́ Бо́га до́брый во́ин был еси́/ и ны́не, со А́нгелы водворя́яся во све́те непристу́пнем,/ моли́ся о душа́х на́ших.

Сла́ва, глас 8:

Мона́хов мно́жество,/ равноапо́стольне и пусты́нный жи́телю Три́фоне,/ наста́вника тя почита́ем:/ ты апо́стольское сло́во показа́л еси́,/ дела́ Христа́ Бо́га неве́дущему язы́ку пропове́дал еси́,/ и, духо́вным мече́м себе́ закла́в,/ ве́лиим смиренному́дрием высо́к показа́лся еси́,/ и всем служи́тель и послу́шник был еси́./ Сего́ ра́ди Иису́с, Свет Ти́хий,/ вознесе́ тя и воспросла́ви, обогати́в чудесы́./ Его́же моли́ о душа́х на́ших.

И ны́не, Богоро́дичен: Царь Небе́сный:

Проки́мен дне. И чте́ния преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие – сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́, конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 5:

Преподо́бне о́тче наш Три́фоне,/ почита́ем в убо́жестве бога́тство твое́/ и в преселе́нии одержа́ние,/ в безче́стии сла́ву, в не́мощи си́лу,/ в безбра́чии по Бо́зе рожде́нное доброча́дство./ Тем, я́ко люби́мый, Святе́й Тро́ице пря́мо прибли́жился еси́,/ моли́ о душа́х на́ших.

Преподо́бне о́тче, испове́дниче Христо́в Три́фоне,/ тя всего́ себе́ по вся́кому совокупле́нию устро́ивый в Ду́се:/ за ра́дость плач, за весе́лие вре́тище,/ за пра́зднство осе́льских ка́меней ноше́ние соизво́лив,/ и па́че зла́та и ка́мений многоце́нных оте́чество Го́рнее возлюби́л еси́./ Моли́ о душа́х на́ших.

Преподо́бне о́тче,/ ты в пусты́ни де́тельныя прему́дрости от Вы́шняго ча́ши поче́рпл еси́,/ жи́знь кра́ткую отри́нул еси́:/ наставля́й нас, я́ко и́скренних чад твои́х,/ единоу́мием пра́выя ве́ры в до́брое твое́ о́тческое насле́дие/ и моли́ Святу́ю Тро́ицу спасти́ся душа́м на́шим.

Сла́ва, глас 6:

Преподо́бне о́тче Три́фоне,/ ты, узре́в Бо́жий жре́бий/ ра́ди их безбо́жнаго и те́мнаго неве́дения,/ в гора́х и в де́брех диа́вольскою ле́стию растерза́нный,/ ничто́же себе́ того́ печа́льнее и плаче́внее суди́л еси́/ и, ко еди́ному Бо́гу в моли́твах во́пльствовав,/ приле́жно прося́ от обдержа́щих их зол реше́ния,/ не дал еси́ сна очеса́м,/ ниже́ дрема́ния ве́ждома твои́ма,/ до́ндеже ди́виим поврежде́нных ко све́ту Богоразу́мия обрати́л еси́./ Моли́ Святу́ю Тро́ицу за вся лю́ди,/ поми́ловатися душа́м на́шим.

И ны́не, Богоро́дичен.

На стихо́вне стихи́ры, глас 8:

Ра́дуйся, преподо́бне о́тче наш Три́фоне,/ всесла́дкими уче́ний твои́х вода́ми напои́вый страну́ се́верную,/ сего́ ра́ди Госпо́дь Бог/ воздарова́ тя венце́м Небе́сным.

Стих: Честна́ пред Го́сподем/ смерть преподо́бных Его́.

Ра́дуйся, равноапо́стольне Три́фоне,/ я́ко пре́лесть бесо́вскую соверше́нною не́навистию возненави́дев,/ в пусты́ни протяже́нныя се́ти зло́бы до конца́ истреби́л еси́,/ того́ ра́ди и Христо́с Бог пома́за тя прича́стием Небе́сныя Своея́ ра́дости./ Моли́ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, Три́фоне преподо́бне,/ испове́дниче ве́ры,/ просвети́вый страну́ коне́чную/ и пусты́ню непрохо́дную,/ безмо́лвием и в моли́твах сле́зыми пото́ки Бо́гови угоди́вый./ Моли́ за нас Святу́ю Тро́ицу,/ любоче́стно па́мять твою́ пра́зднующих.

Сла́ва, глас 2:

Преподо́бне о́тче Три́фоне,/ па́мять твоего́ успе́ния днесь возсия́, я́ко со́лнце,/ и, я́ко ми́ро, излия́ся в сердца́х на́ших,/ благоуха́я обоня́нием ду́ши на́ша./ Ты бо по успе́нии твое́м чудесы́ твои́ми царя́ и лю́ди удиви́л еси́./ Святу́ю Тро́ицу моли́ спасти́ся душа́м на́шим.

И ны́не, Богоро́дичен.

Тропа́рь, глас 8:

Пути́, вводя́щаго в жи́знь, наста́вник и учи́тель был еси́:/ пе́рвее бо, преподо́бне о́тче наш Три́фоне,/ прише́л еси́ в часть Норве́гския земли́/ и в после́дних конце́х севе́рныя страны́ язы́ки просвети́л еси́,/ породи́в водо́ю и Ду́хом Святы́м,/ и свяще́нная твоя́ ча́да в безпло́дней пусты́ни,/ я́ко дре́ва ма́сличная, насади́л еси́,/ ве́лию оби́тель Святы́я и Живонача́льныя, Единосу́щныя и Неразде́льныя Тро́ицы созда́л еси́/ и мона́хов мно́жество собра́в./ Тем, я́ко апо́столом и пустынножи́телем равноче́стна чту́ще тя,/ приле́жно припа́дающе, вопие́м:/ моли́ всех Бо́га за Ру́сскую зе́млю, за область твою́ и за вся лю́ди,/ почита́ющия па́мять твою́.

НА У́ТРЕНИ

По 1-м стихосло́вии седа́лен, глас 5.

Подо́бен: Собезнача́льное Сло́во:

Тве́рдаго адама́нта и столпа́, непоколеби́ма вра́жиими прило́ги,/ преподо́бнаго и Богоно́снаго отца́ на́шего Три́фона пе́сньми почти́м:/ терпе́нием бо свои́м в непроходи́мых пусты́нях порази́л есть сопроти́внаго врага́, и безве́стна того́ сотвори́,/ и ны́не у Престо́ла Бо́жия мо́лится о душа́х на́ших.

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз рождества́ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл,/ сла́ва бо Твоя́, Богоро́дице, всем простре́ся во спасе́ние душ на́ших.

По 2-м стихосло́вии седа́лен, глас 4:

По пусты́ни стра́нным тече́нием, и посто́м, и воздержа́нием,/ и на о́стром ка́мении лега́нием увяди́л еси́ плоть свою́,/ ду́ши же мно́гих во Христа́ ве́рою обогати́в и тем Бо́гу угоди́в,/ от Него́ мног дар исцеле́ний прия́л еси́, преподо́бне Три́фоне./ Того́ моли́ о чту́щих любо́вию святу́ю и досточу́дную па́мять твою́.

Сла́ва, и ны́не, Богоро́дичен:

Обнови́ла еси́, Пречи́стая, Боже́ственным Рождество́м Твои́м/ истле́вшее страстьми́ земноро́дных ме́ртвенное существо́/ и возста́вила еси́ вся от сме́рти к жи́зни нетле́нней,/ те́мже Тя по до́лгу велича́ем вси, Де́во Препросла́вленная,/ я́коже прорекла́ еси́.

По полиеле́и седа́лен, глас 4.

Подо́бен: Ско́ро предвари́:

Яви́лся еси́ чу́ден в терпе́нии твое́м, преподо́бне Три́фоне,/ про́поведию, и́ночеством и все́ми благи́ми ви́ды Христо́ви угоди́вый./ Избра́в бо до́брая, е́же Бо́га ра́ди в пусты́нех скита́тися/ и лю́ди на спасе́нныя стези́ наставля́ти,/ му́жески разсужда́я, глаго́лал еси́:/ а́ще и яр неве́рный язы́к, но про́поведи ра́ди сла́док рай;/ боле́зненно по пусты́нем скита́ние и стра́нство,/ но блаже́нно безсме́ртное восприя́тие./ Те́мже, о́тче наш, мо́лим тя:/ Христу́ моли́ся за всех нас, да сподо́бимся Небе́снаго Ца́рствия.

Сла́ва, и ны́не, Богоро́дичен:

Тебе́ велича́ем, Богоро́дице, вопи́юще:/ Ты еди́на Благослове́нная,/ из Тебе́ бо неизрече́нно роди́ся Христо́с Бог наш./ Ра́дуйся, Живота́ на́шего Ма́ти Препросла́вленная.

Степе́нна, 1-й антифо́н, 4-го гла́са. Проки́мен: Честна́ пред Го́сподем смерть преподо́бных Его́. Стих: Что возда́м Го́сподеви о всех: Вся́кое дыха́ние: Ева́нгелие от Матфе́я, зача́ло 10.

По 50-м псалме́ стихи́ра, глас 6:

Боже́ственным Ду́хом свы́ше, обле́кся,/ со дерзнове́нием пропове́дал еси́ И́мя Христа́ Бо́га на́шего беззако́нным,/ преподо́бне о́тче Три́фоне,/ бесо́вския ссекл еси́ полки́/ и а́нгельския дости́гл еси́ чи́ны,/ того́ ра́ди в Небе́сных селе́ниих обре́л еси́ мзду́ трудо́в твои́х./ И ны́не, име́я дерзнове́ние ко Святе́й Тро́ице,/ мир испроси́ душа́м на́шим.

Кано́н преподо́бному, глас 1.

Песнь 1

Ирмо́с: Пои́м, вси лю́дие,/ от го́рькия рабо́ты фарао́ни Изра́иля Изме́ншему/ и во глубине́ морсте́й нога́ми немо́крыми Наста́вльшему/ песнь побе́дную,/ я́ко просла́вися.

Пои́м, вси лю́дие, вели́каго в чудесе́х преподо́бнаго отца́ на́шего Три́фона,/ от го́рькия диа́вольския рабо́ты лю́ди изба́вльшаго/ и во свято́е Креще́ние приве́дшаго,/ и воздади́м сла́ву Христу́ Бо́гу:/ сла́вно бо просла́вися.

Пои́м, вси лю́дие, я́ко втора́го Па́вла, вели́каго отца́ на́шего Три́фона,/ зва́нию Го́спода своего́ после́довавша,/ Его́же, я́ко драго́е сокро́вище, обре́те на селе́ пусты́ннем и тем обогати́ свое́ се́рдце./ Сего́ ра́ди, преподо́бне, мо́лим тя:/ моли́ Святу́ю Тро́ицу, да пода́ст нам мир и бога́тую ми́лость.

Пои́м, вси бра́тие, равноа́нгельнаго Три́фона,/ огне́м Боже́ственныя любве́ распали́вшагося,/ любо́вь роди́телей свои́х и дом оста́вльшаго./ Сего́ ра́ди име́яй дерзнове́ние ко Го́споду/ мо́лится о душа́х на́ших.

Богоро́дичен: Пои́м, вси лю́дие, Спа́са Ро́ждшую и Бо́га,/ Я́же, мно́гое на́ше уны́ние и печа́ль отгоня́ющи, душа́м на́шим подае́т ве́лию ми́лость./ Сего́ ра́ди возопии́м к Ней:/ Богоро́дице, Пречи́стая Де́во,/ моли́твою к Сы́ну Твоему́ и Бо́гу на́шему от тя́жких и лю́тых нас спаси́.

Песнь 3

Ирмо́с: Утверди́ мене́, Христе́, на недви́жимом ка́мени за́поведей Твои́х/ и просвети́ мя све́том лица́ Твоего́:/ несть бо свят, па́че Тебе́, Человеколю́бче.

Утверди́вся ве́рою во Святу́ю Тро́ицу,/ я́ко щито́м кре́пким, преподо́бне, вся ми́ра сего́ бога́тая и кра́сная презре́л еси́,/ с Па́влом суди́вый ничто́же и́но, то́кмо Христа́ Иису́са ве́дети и Того́ ра́спята,/ Его́же моли́, да изба́вит нас от вся́ких лю́тых.

Утверди́в Христа́ Бо́га зва́нием мысль твою́,/ от страны́ твоея́, я́ко пра́ведный Авраа́м, избе́гл еси́./ Сего́ ра́ди зове́м ти:/ ра́дуйся, пра́отцем единонра́вный о́тче наш.

Утверди́вый Госпо́дь Бог наш, Иису́с Христо́с,/ пе́рвых Свои́х ученико́в на ка́мени Своего́ повеле́ния,/ Той же Всемогу́щий утверди́ тя в после́днем ве́це, во страну́ конце́в посла́в,/ да та́мо лю́ди све́том ве́ры просвети́ши./ Моли́ за всех, почита́ющих па́мять твою́.

Богоро́дичен: Утвержде́ние на́ше в бу́ри/ и благоути́шное приста́нище во свире́пом волне́нии,/ Тя, Пресвяту́ю Де́ву, еди́наго от Тро́ицы, Христа́, ро́ждшую,/ мо́лим, я́ко благолюби́ву, помощи́ нам/ и изба́вити нас от язы́ка льсти́ва.

Седа́лен, глас 8:

Тро́ицы рачи́теля, вели́каго отца́ Три́фона,/ науча́юща се́верныя страны́ я́сно ве́ре Боже́ственней/ и оби́тель во сла́ву Святы́я Тро́ицы созда́вшаго,/ в пе́снех досто́йно, ве́рнии, почти́м, взыва́юще:/ ра́дуйся, пропове́дниче ве́ры.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы еди́наго родила́ еси́, Богоро́дице,/ и но́сиши на блаже́нную руку́ Пребога́тое Сло́во, непреме́нно и неизме́нно.

Песнь 4

Ирмо́с: Ве́лия та́йна/ Твоего́, Христе́, смотре́ния:/ сию́ бо свы́ше прови́дя богозри́тельно, Авваку́м,/ изше́л еси́, вопия́ше Тебе́,/ во спасе́ние люде́й Твои́х, Человеколю́бче.

Ве́лию та́йну Твоего́, Христе́, явле́ния/ преподо́бный оте́ц наш Три́фон близ до́му своего́ в пусты́ни ви́дев,/ потече́ в да́льныя страны́ и та́мо наро́ды спасе́ною стезе́ю введе́ в Небе́сное Ца́рствие./ Мо́лим Тя, Бо́же наш,/ упра́ви и нас браздо́ю покая́ния во о́ное блаже́нное гражда́нство.

Ве́лию та́йну Бо́жия повеле́ния, преподо́бне Три́фоне, показа́вый де́лом,/ во И́мя Святы́я и Живонача́льныя Тро́ицы храм созда́в,/ оби́тель возгради́в и мно́жество учени́к собра́в,/ моли́ Святу́ю Тро́ицу поми́ловатися душа́м на́шим.

Ве́лию та́йну, преподо́бне о́тче, твои́х пусты́нных трудо́в,/ алка́ние, жа́жду, во благове́стии от язы́ческаго наро́да бие́ние,/ о зе́млю ударе́ние и разли́чных муче́ний преще́ние кто испове́сть?/ То́кмо еди́ному ве́дущу Бо́гу./ Сего́ ра́ди вопие́м ти:/ ра́дуйся, Христа́ ра́ди Бо́га на́шего многострада́льный о́тче наш Три́фоне.

Богоро́дичен: Вели́кими и многоразли́чными та́йнами, Богоро́дице Де́во, рождество́ Твое́ дре́вле прообразова́ся,/ мы же, сбытие́ зря́ще, я́ко к Ма́тери Бо́жией притека́ем и сле́зно мо́лим:/ скрый нас в та́йне кро́ва Твоего́.

Песнь 5

Ирмо́с: Озари́ наш ум, Бо́же,/ све́том за́поведей Твои́х/ и све́тлостию благода́ти Твоея́,/ да́руя нам, Бла́же, Твоя́ ми́лости,/ зане́ свет и мир повеле́ния Твоя́.

Озари́в ум твой, преподо́бне о́тче Три́фоне, Бо́жиим зако́ном,/ измла́да моли́твами сле́зными Святу́ю Тро́ицу уми́лостивил еси́,/ сего́ ра́ди, просия́в вели́кими чудесы́, моли́ о душа́х на́ших.

Озари́л еси́ све́том Ева́нгельския про́поведи лю́ди ослепле́нныя,/ и мы, раби́ твои́, ве́дяще тобо́ю пропове́даннаго Сы́на Бо́жия, Све́та Невече́рняго,/ Ему́же ны́не предстои́ши, мо́лимся:/ моли́ спасти́ся душа́м на́шим.

Озари́ нас, о́тче Три́фоне, послуша́нием за́поведей Бо́жиих,/ и наста́ви на стезю́ покая́ния,/ и сподо́би нас, гре́шных, по исхо́де душ получи́ти страну́ десну́ю,/ почита́ющих святу́ю па́мять твою́.

Богоро́дичен: Озаре́ние на́ше, Свята́я Де́во Ма́ти, Ты денни́ца у́тренняя,/ Вели́кое Со́лнце, Христа́ Бо́га на́шего, к нам вводя́щая,/ Его́же моли́ спасти́ся душа́м на́шим.

Песнь 6

Ирмо́с: Проро́ка спасл еси́ от ки́та, Человеколю́бче,/ и мене́ из глубины́ прегреше́ний/ возведи́, молю́ся.

Проро́ческое прозре́ние, преподо́бне о́тче наш Три́фоне, са́мою и́стиною изобрази́в,/ а́лчущих хле́бом живо́тным сла́дце насы́тив,/ и о нас блага́го Бо́га моли́,/ да сподо́бит предража́йшия Свое́я Трапе́зы причасти́тися невозбра́нно.

Проро́ку Ио́не, преподо́бне о́тче, подража́л еси́:/ он бо вели́кий град Ниневи́ю покая́нием от я́звы па́губныя спасе́,/ ты же, расточе́нных во единомы́слие собра́вый,/ во Святу́ю Тро́ицу ве́ровати научи́л еси́./ В моли́твах твои́х не забыва́й нас, чад твои́х.

Проро́ческое Писа́ние о вопло́щении Сы́на Бо́жия я́сно неве́дущему язы́ку показа́л еси́/ и, я́ко драги́м сокро́вищем, о́ный обогати́в,/ Святе́й Тро́ице моли́ся о душа́х на́ших.

Богоро́дичен: Проро́цы святи́и издале́ча прореко́ша, Ма́ти Свята́я, Твое́ рождество́:/ еди́наго бо от Тро́ицы, Сы́на Бо́жия, безму́жно родила́ еси́/ и по рождестве́ Де́ва пребыла́ еси́./ Моли́ Его́ поми́ловати ду́ши на́ша.

Конда́к, глас 8.

Подо́бен: Взбра́нной Воево́де:

Все твое́ у́мное жела́ние к Бо́гу впери́в,/ Того́ зва́нию невозвра́тно от души́ после́довал еси́,/ в пусты́ню коне́чную всели́вся,/ и, та́мо а́нгельски и равноапо́стольне пожи́в,/ мно́гим путь был еси́ ко спасе́нию./ Сего́ ра́ди и Христо́с тя просла́ви и да́ром чуде́с обогати́./ Те́мже вси вопие́м ти:/ ра́дуйся, испове́дниче Христа́ Бо́га на́шего;/ ра́дуйся, гра́ду твоему́ неколеби́мое утвержде́ние, Три́фоне, о́тче наш.

И́кос:

Лоза́ преподо́бства и стебль первонача́льства,/ цвет пусты́нный и плод Богода́нный, при́сно цвету́щий,/ новопросвеще́нней стране́ дарова́лся еси́./ Сего́ ра́ди, почита́ющим па́мять твою́, вопие́м ти:/ ра́дуйся, преподо́бне, от ю́ности бла́гости научи́выйся;/ ра́дуйся, тре́звый во всех благо́ю со́вестию./ Ра́дуйся, Христо́ва розга́, всехва́льне;/ ра́дуйся, за́поведем Бо́жиим послу́шник до́брый./ Ра́дуйся, от за́пада в се́вер, я́ко со́лнце, возсия́л еси́;/ ра́дуйся, ви́девый наро́д Лопа́рский19 во идолобе́сии,/ о обраще́нии их пред Бо́гом в моли́твах го́рько рыда́л еси́./ Ра́дуйся, приснопа́мятный чудотво́рче Три́фоне, о́тче наш.

Песнь 7

Ирмо́с: О́бразу служи́ти,/ мусики́йскому согла́сию созыва́ющу лю́ди,/ от пе́сней сио́нских пою́ще оте́чески, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ песнь воспева́юще:/ превозноси́мый отце́в и наш Бо́же, благослове́н еси́.

О́бразу Святы́я Тро́ицы покланя́тися неве́жды научи́л еси́/ и куми́рницы бесо́вския опрове́ргл еси́, преподо́бне о́тче наш Три́фоне./ Тобо́ю и мы, гре́шнии, наста́вльшеся, Святу́ю Тро́ицу хва́ляще, воспева́ем:/ отце́в и наш Бо́же, благослове́н еси́.

О́бразу смире́ния, и молча́ния, и послуша́ния ученико́в твои́х научи́вый/ и, я́ко зерца́лом, собо́ю вся́каго изря́днаго ви́да о́браз показа́вый,/ помина́й нас, хва́лящих и пою́щих в Тро́ице еди́наго Бо́га,/ благослове́ннаго во ве́ки.

О́бразу Христо́ву и Его́ Богома́тере/ и всех святы́х покланя́тися наказа́л еси́ ученико́в твои́х тве́рдо,/ и лю́торскаго и кальви́нскаго нече́стия повеле́л еси́ бе́гати и гнуша́тися;/ моли́твами же твои́ми ученицы́ твои́ и до ны́не те́ми ересьми́ гнуша́ются,/ хва́ляще и пою́ще благослове́ннаго Бо́га во ве́ки.

Богоро́дичен: О́бразу Твое́му, Пресвята́я Де́во Влады́чице, припа́дающе, мо́лимся:/ сохрани́, Ма́ти, ро́ждшая Бо́га, всех нас от наве́та вра́жия/ и от оклевета́ния язы́ка о́стра, вопию́щих к Сы́ну Твое́му:/ отце́в и наш Бо́же, благослове́н еси́.

Песнь 8

Ирмо́с: В пла́мени о́гненне горя́щия пе́щи/ сохра́ньшаго де́ти/ и во зра́це А́нгела снизше́дшаго к ним,/ по́йте Го́спода/ и превозноси́те Его́ во ве́ки.

В пла́мени о́гненне Сын, Сло́во Бо́жие, спасе́ о́троки,/ и тебе́, преподо́бне, Той же всемо́щный соблюде́,/ егда́ был еси́ посреде́ идолопокло́нных я́рости, я́ко посреде́ пе́щи,/ и, не обину́яся, взыва́л еси́:/ позна́йте, благослови́те, по́йте Бо́га препе́таго/ и превозноси́те Его́ во ве́ки.

Пла́менем пе́щным, я́коже дре́вле халде́и, опаля́хуся,/ та́ко из твои́х уст, я́ко све́тлость огня́, про́поведь исходя́щая/ де́моны прогоня́ше, лю́ди же просвеща́ше./ Сего́ ра́ди ученицы́ твои́, тобо́ю воздвиза́еми, навыко́ша пе́ти:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Во пла́мени злоче́стия неве́дением Бо́га мно́зи сгара́ху;/ ты же, преподо́бне о́тче наш,/ водо́ю слез твои́х и струя́ми благоче́стнаго уче́ния идолобе́сия огнь погаси́л еси́/ и, сгара́ющия ду́ши прохлади́в, пе́ти научи́л еси́:/ отце́в и наш Бо́же, препе́тый и превозноси́мый во ве́ки.

Богоро́дичен: Во пла́мени о́гненне, Богома́ти Свята́я,/ егда́ ви́де Тя вели́кий Моисе́й в купине́, прописа́ нетле́нное рождество́ Твое́./ Де́ва Пречи́стая, изба́ви от зол нас, почита́ющих Тя,/ моля́щих и хва́лящих Сы́на Твоего́ и Бо́га на́шего,/ препе́таго и превозноси́маго во вся ве́ки.

Песнь 9

Ирмо́с: Тебе́, све́тлую свещу́ и Ма́терь Бо́жию,/ пречу́дную сла́ву и вы́шшую всех тва́рей,/ пе́сньми велича́ем.

Све́тлую свещу́ почита́ем тя, преподо́бне о́тче Три́фоне,/ на высоте́ све́том про́поведи и мно́гими чудесы́ светя́щую./ Сего́ ра́ди зове́м ти:/ моли́ Святу́ю Тро́ицу за о́бласть твою́ и за вся лю́ди, поми́ловатися душа́м на́шим.

Я́ко све́тлую свещу́, вели́кий царь Иоа́нн в ца́рствующем гра́де узре́в тя,/ удиви́ся твоему́ честно́му зра́ку и возлюби́ тя зело́./ Мы же, раби́ твои́, ве́рою и любо́вию мо́лимтися, цели́телю душ и теле́с на́ших:/ моли́ ми́лостиваго Бо́га, да пода́ст нам грехо́в оставле́ние и ве́лию ми́лость.

Тебе́, све́тлую свещу́, Иису́с, пропове́дуемый тобо́ю, Боже́ственным Свои́м манове́нием/ по успе́нии твое́м от конце́в земны́х взя/ и, я́ко свети́льник, поста́ви пред царе́м;/ ты же, преподо́бне о́тче наш, явле́нием твои́м вели́каго царя́ Фео́дора спасл еси́./ Сего́ ра́ди вопие́м ти:/ ра́дуйся, помо́щниче ско́рый, Три́фоне, о́тче наш.

Богоро́дичен: Тебе́, све́тлую свещу́ и Ма́терь Бо́жию,/ Честне́йшую Херуви́м и Сла́внейшую без сравне́ния Серафи́м, мо́лим:/ всех нас, благосе́рдая́ Ма́ти, спаса́й при́сно.

Свети́лен, глас 8.

Подо́бен: Прему́дрости наста́вниче:

Наслади́вся, Богому́дре, воздержа́ния и жела́ния пло́ти обузда́в,/ я́ко многосве́тлая звезда́, заря́ми чуде́с твои́х Лопа́рский язы́к просвети́л еси́,/ и ны́не мо́лимся ти: сохрани́ рабы́ своя́ от наве́та льсти́ва.

Сла́ва, и ны́не, Богоро́дичен:

По Бо́зе на Тя, Пречи́стая, упова́ние возлага́ем,/ И́же из Тебе́ проше́дшему сраспина́еми Христу́:/ Твои́ми же к Нему́ мольба́ми под кро́вом Твои́м невре́дны да́же до конца́ сохрани́.

На хвали́тех стихи́ры, глас 4:

Бога́тство души́ твоея́, преподо́бне о́тче,/ ви́дев, многоко́зненный/ окра́сти подуща́ше свои́х служи́телей,/ я́ко и бия́ху тя за сло́во и́стины,/ но не возмо́же наве́тник духо́внаго твоего́ сокро́вища окра́сти,/ обре́те бо вооруже́нну непоро́чную твою́ ду́шу./ Те́мже мо́лимтися:/ и нас иски́й поглоти́ти да не, обнажи́в, плени́т,/ предвари́, преподо́бне,/ и изба́ви льсти́ваго наве́та.

Вели́ким Анто́нием хва́лится Еги́пет,/ свяще́ннаго Са́вву почита́ет Палести́на,/ первонача́льника оби́телей Росси́йских му́драго Анто́ния пое́т вели́кий град Ки́ев,/ многото́чнаго чудесы́ преподо́бного Се́ргия вели́кая Росси́я че́стно прославля́ет;/ святы́я же оби́тели твоея́ мона́си/ и о́бласти твоея́ вси лю́дие, о́тче Три́фоне,/ в про́поведи боле́зни и пусты́нныя труды́ твоя́/ любе́зно ублажа́ем и мо́лимтися:/ Христа́ Бо́га на́шего моли́/ о спасе́нии душ на́ших.

Преподо́бне о́тче наш Три́фоне,/ ты се́верную страну́ и град твой моли́твами твои́ми утверди́л еси́/ и Тро́ическим испове́данием многобо́жия лесть разруши́л еси́,/ сего́ ра́ди прия́л Боже́ственную благода́ть/ вся ве́рных стра́сти очища́ти./ Еди́наго в Тро́ице Бо́га, свя́те Три́фоне,/ моли́ о душа́х на́ших.

Преподо́бне о́тче наш,/ ты, очи́стив ум твой безстра́стием,/ к жела́нному и кра́йнему́ Богомы́слию дости́гл еси́,/ и Бог тя просла́ви:/ я́коже бо иногда́ преподо́бнаго Гера́сима при Иорда́не,/ зве́ри тя послу́шаху/ и в запове́данных тобо́ю пусты́нях не дерза́ху де́яти па́костей./ И ны́не мо́лим тя:/ изба́ви нас от ловле́ния душепа́губнаго зве́ря/ и моли́ Святу́ю Тро́ицу о спасе́нии душ на́ших.

Сла́ва, глас 3:

Ко Святе́й Тро́ице ве́рное и и́скреннее упова́ние име́л еси́,/ ду́ху благоповинове́ния всех умудря́л еси́,/ смиренному́дрия предводи́тель я́влься и́стинный,/ и, я́ко Ио́сиф Еги́пту,/ оби́тели твое́й загладне́вшим прему́дрый промы́сленник показа́лся еси́,/ Три́фоне о́тче наш./ Христа́ Бо́га моли́ о душа́х на́ших.

И ны́не, Богоро́дичен.

На Литурги́и: Слу́жба вся преподо́бническая.