Служба преподобнаго Тихона, Калужскаго чудотворца
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 6.
Подо́бен: Все отло́жше:
Вся земна́я оста́вил еси́,/ к Небе́сным возложи́в ум твой,/ Христу́ Еди́ному в след ходи́ти восхоте́л еси́,/ преподо́бне о́тче наш Ти́хоне;/ сего́ ра́ди безмо́лвно жи́ти взыска́л еси́,/ в пусты́ню уклони́выйся,/ в не́йже подвиза́вся,/ житие́ а́нгельское притяжа́л еси́./ Того́ ра́ди благода́ть прие́м от Бо́га/ исцеля́ти неду́ги разли́чныя,/ Тому́ моли́ся, преподо́бне,/ поми́ловатися душа́м на́шим.
Вся оста́вил еси́/ жите́йския молвы́ ми́ра сего́, преподо́бне,/ посто́м и моли́твами вооружи́в себе́,/ искуше́ния мно́га претерпе́л еси́,/ положи́в основа́ние доброде́телей,/ к высоте́ безстра́стия дости́гл еси́,/ ума́ высо́кое смире́нием возве́л еси́ Бо́гу,/ от Него́же прие́м благода́ть/ исцеля́ти неду́ги разли́чныя,/ преподо́бне о́тче наш Ти́хоне,/ Ему́, блаже́нне, моли́ся о душа́х на́ших.
Вся оста́вил еси́,/ и оте́чество твое́,/ и, коне́чнаго ра́ди смире́ния твоего́/ восприи́м и́ноческий о́браз,/ всели́лся еси́ в пусты́ни,/ в не́йже устро́ив храм боголе́пнаго Преображе́ния/ и собра́в учени́к мно́жество,/ в посте́ и воздержа́нии богоуго́дно подвиза́лся еси́./ Сего́ ра́ди дарова́ тебе́ Бог/ исцеля́ти неду́ги разли́чныя./ Ему́же моли́ся, преподо́бне о́тче наш Ти́хоне,/ спасти́ся душа́м на́шим.
Боже́ственныя ра́дости/ и весе́лия духо́внаго/ богоспаса́емый град Калу́га испо́лнися/ в светоно́сней па́мяти твое́й, о́тче Ти́хоне;/ мы же, духо́вная твоя́ ча́да,/ ра́достне соше́дшеся, све́тло пра́зднуем,/ боголе́пную сла́ву возсыла́юще прославля́ющему тя Бо́гу./ Ему́же, преподо́бне о́тче наш, моли́ся/ за творя́щих па́мять твою́,/ спасти́ ду́ши на́ша.
Свети́ло вели́кое/ яви́лся еси́ нам,/ преподо́бне о́тче наш Ти́хоне,/ просвеща́я страну́ сию́/ заря́ми изря́дных чуде́с твои́х:/ се бо любо́вию пра́зднующим/ и с ве́рою приходя́щим/ к твоему́ цельбоно́сному гро́бу/ исцеле́ния неоску́дно подае́ши./ Христа́ Бо́га моли́/ согреше́ний оставле́ние дарова́ти душа́м на́шим/ и ве́лию ми́лость.
Преподо́бне о́тче Богоблаже́нне Ти́хоне,/ жесто́ким твои́м житие́м,/ во мзду трудо́в твои́х,/ сподо́бился еси́ обрести́/ богода́нен дар благода́тных исцеле́ний:/ се бо с ве́рою приходя́щии/ к цельбоно́сному твоему́ гро́бу/ исцеле́ние прие́млют./ Те́мже, я́ко име́я дерзнове́ние ко Го́споду,/ моли́ся Це́рквам единомы́слие испроси́ти/ и душа́м на́шим ве́лию ми́лость.
Сла́ва, глас 6:
Прииди́те дне́сь, правосла́внии Росси́йстии лю́дие,/ свята́го отца́ на́шего Ти́хона благоче́стне восхва́лим,/ и, ра́достно пою́ще, псало́мская пе́ния любо́вию принесе́м ему́,/ и, све́тло всепра́зднственная воспева́юще, си́це рцем:/ ра́дуйся, свети́льниче многосве́тлый мона́шескаго собра́ния;/ ра́дуйся, боля́щих цели́телю./ Ра́дуйся, те́плый засту́пниче;/ ра́дуйся, утвержде́ние и си́ла ве́рою тя чту́щих./ Ра́дуйся, похвало́ гра́ду на́шему Калу́ге и защище́ние./ Мы же, тебе́ моля́щеся, глаго́лем:/ о́тче наш Ти́хоне,/ моли́ся об оте́честве на́шем,/ прося́ ему́ ми́ра,/ и нас, си́рых, не забу́ди,/ но пребыва́й с на́ми, ча́ды твои́ми,/ и моли́ся за ны ко Го́споду,/ да спасе́т ду́ши на́ша.
И ны́не, Богоро́дичен: Кто Тебе́ не ублажи́т:
Вход. Проки́мен дне и чте́ния 3 преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очеса́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ Ибо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (главы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ра хра́ма и свята́го, глас 2:
Прииди́те, боголюбе́зное ста́до,/ мона́шеское собра́ние,/ с любопра́зднственными чи́нми христиа́нскаго мно́жества,/ боголюби́ваго гра́да Калу́ги лю́дие,/ дне́сь восхва́лим Христо́ва рачи́теля,/ жи́теля пусты́ннаго,/ мона́хов прему́драго наста́вника,/ по́стников похвалу́,/ похва́льныя пе́сни принесе́м ему́, глаго́люще:/ ра́дуйся, ре́вности Боже́ственныя испо́лненный;/ ра́дуйся, я́ко страну́ оте́чества своего́ оста́вль,/ всели́лся еси́ в преде́лех гра́да Калу́ги./ Ра́дуйся, я́ко труды́ по́стническими та́мо подвиза́яся,/ проти́внаго му́жески победи́л еси́;/ ра́дуйся, я́ко того́ ра́ди дарова́ тебе́ Бог благода́ть исцеле́ний,/ Его́же моли́, преподо́бне о́тче наш Ти́хоне,/ спасти́ ду́ши на́ша.
В ти́хое и небу́рное приста́нище безмо́лвия,/ в ненаселе́нную пре́жде пусты́ню вшел еси́,/ иде́же с Бо́гом еди́н безмо́лвствовал еси́,/ та́же житие́ А́нгельское проходи́л еси́,/ благоукраша́я себе́ труды́ по́стническими,/ и́миже узре́л еси́ Присносу́щнаго Све́та – Христа́ Бо́га на́шего,/ преподо́бне о́тче наш Ти́хоне./ Его́же непреста́нно моли́/ от вся́ких зол нас изба́вити,/ всечестно́е твое́ успе́ние пра́зднующих,/ и спасти́ ду́ши на́ша.
Вся оста́вив земна́я,/ к Небе́сным ум твой впери́л еси́,/ в слеза́х и воздыха́ниих живя́ вся дни своя́,/ зре́ти жела́л еси́ мы́сленную добро́ту;/ сего́ ра́ди всяк вид доброде́телей проходи́л еси́/ и дости́гл еси́ Небе́сных селе́ний,/ иде́же Свет невече́рний Христа́ Бо́га на́шего./ Ему́же непреста́нно моли́ся,/ преподо́бне о́тче наш Ти́хоне,/ спасти́ся душа́м на́шим.
Сла́ва, глас 5:
Ра́дуйтеся и весели́теся о Го́споде,/ благочести́вое собра́ние христоимени́таго наро́да гра́да Калу́ги,/ такова́го свети́льника – преподо́бнаго отца́ Ти́хона иму́ще,/ пресве́тлым житие́м свои́м всю страну́ сию́ озари́вшаго,/ его́же просла́ви Бог чудесы́:/ се бо оби́льна исцеле́ния да́рует всем,/ приходя́щим к нему́ с ве́рою./ Те́мже, мо́лимся ему́, глаго́люще:/ о всеблаже́нне о́тче наш Ти́хоне,/ непреста́нно моли́ся Христу́ Бо́гу,/ здра́вие нам пода́ти/ и душа́м на́шим мир и ве́лию ми́лость.
И ны́не, Богоро́дичен, глас то́йже:
Храм и Две́рь еси́,/ Пала́та и Престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме́ спя́щим яви́ся,/ Со́лнце сый Пра́вды, просвети́ти хотя́,/ я́же созда́ по о́бразу Своему́ руко́ю Свое́ю./ Те́мже, Всепе́тая, я́ко Ма́тернее дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.
На стихо́вне стихи́ры, глас 8:
Преподо́бне о́тче наш Ти́хоне,/ ты от ю́ности Христу́ после́довал еси́,/ страну́ оте́чества твоего́ оста́вль,/ в пусты́ню всели́лся еси́,/ иде́же, вся земна́я мудрова́ния отри́нув,/ по́стническими труды́ Бо́гу угоди́л еси́,/ пло́ть твою́ ду́ху покори́вый,/ того́ ра́ди сподо́бился еси́ предстоя́ти Престо́лу Влады́чню на Небесе́х. Его́же моли́, блаже́нне,/ о и́же ве́рою пречестну́ю твою́ па́мять почита́ющих.
Стих: Честна́ пред Го́сподем/ сме́рть преподо́бных Его́.
Преподо́бне о́тче Ти́хоне,/ ты от да́льныя страны́ в пусты́ню сию́ дости́гл еси́/ и струя́ми слез твои́х напои́л еси́ ю,/ в не́йже плоды́ пра́вды возрасти́л еси́:/ собра́в учени́к мно́жество/ и богоуго́дно с ни́ми подвиза́вся,/ Святы́м Ду́хом просвети́лся еси́,/ прие́мь от Бо́га благода́ть исцеле́ний,/ Его́же моли́ спасти́ и просвети́ти ду́ши на́ша.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Преподо́бне о́тче, блаже́нне Ти́хоне,/ ты, и́го Христо́во на ра́мо твое́ усе́рдно взем,/ коне́чнаго ра́ди твоего́ смире́ния/ высоты́ доброде́телей дости́гл еси́./ Предуве́дев же твое́ к Бо́гу отше́ствие/ и поучи́в о по́льзе душе́вней собра́нныя тобо́ю ученики́,/ пресели́лся еси́ к ве́чным оби́телем;/ и по преставле́нии твое́м мно́гая исцеле́ния источа́еши/ с ве́рою приходя́щим и любо́вию твою́ па́мять соверша́ющим./ Те́мже испроси́ нам от Христа́ Бо́га/ мир и ве́лию ми́лость.
Сла́ва, глас 6:
Весели́ся и ра́дуйся, свята́я и боголюбе́зная пусты́ня,/ воспита́вшая досточу́днаго сего́ отца́ на́шего Ти́хона,/ его́же житие́м освяти́ся ме́сто,/ на не́мже в жи́зни сей ве́рою послужи́л е́сть Го́сподеви,/ и просла́вися чудесы́ богодарова́нными:/ се бо и по преставле́нии свое́м источа́ет оби́льная исцеле́ния/ всем, приходя́щим с ве́рою./ Сего́ ра́ди любо́вию благоче́стне целу́юще/ святы́й о́браз священноле́пнаго его́ подо́бия, усе́рдно возопии́м:/ о всеблаже́нне о́тче наш Ти́хоне,/ непреста́нно моли́ся Христу́ Бо́гу/ оте́честву на́шему мир и благоде́нствие дарова́ти,/ нам же, христоимени́тым лю́дем,/ испроси́ мир и ве́лию ми́лость.
И ны́не, глас 6: Творе́ц и Изба́витель мой:
Тропа́рь, глас 4:
Я́ко свети́льник пресве́тлый,/ яви́лся еси́ в Росси́йстей земли́,/ преподо́бне о́тче наш Ти́хоне,/ в пусты́ни всели́вся,/ в не́йже преходя́ жесто́кое жи́тельство,/ я́ко безпло́тен, пожи́л еси́,/ сего́ ра́ди и чуде́с дарова́нием обогати́ тя Бог./ Тем и мы, притека́юще к моще́м твои́м, уми́льно глаго́лем:/ о́тче преподо́бне,/ моли́ Христа́ Бо́га/ спасти́ся душа́м на́шим.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 8:
Преподо́бне о́тче наш Ти́хоне,/ мно́гим воздержа́нием жи́знь твою́ украси́в,/ ученико́м твои́м показа́л еси́ терпе́ния и смиренному́дрия пу́ть,/ веду́щий в жи́знь ве́чную:/ сам же, после́дуя Ева́нгельскому уче́нию,/ жесто́ким житие́м пло́ть твою́ изнури́л еси́./ Те́мже ны́не на Небесе́х водворя́яся/ и Триипоста́сному Божеству́ предстоя́, преподо́бне,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Небе́сную две́рь и киво́т,/ пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́ру и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся Всесвято́му Рождеству́ Твоему́.
По 2-м стихосло́вии седа́лен, глас 4:
Не терпя́ мирска́го наси́лия, удали́лся еси́ в пусты́ню,/ в не́йже благоче́стно Христу́ рабо́тав,/ увяди́л еси́ плотско́е мудрова́ние воздержа́нием/ и, побе́ду взем, над страстьми́ теле́сными воцари́лся еси́./ Те́мже предстоя́ ны́не Престо́лу Госпо́дню,/ всем нам, ве́рою приходя́щим к твоему́ цельбоно́сному гро́бу, Ти́хоне всече́стне,/ испроси́ ве́лию ми́лость.
Сла́ва, и ны́не, Богоро́дичен:
Безневе́стная Чи́стая Богоро́дице Де́во,/ Еди́на Предста́тельнице ве́рных и Покро́ве,/ бед, и скорбе́й, и лю́тых обстоя́ний вся изба́ви,/ и́же на Тя упова́ние иму́щия, Отрокови́це,/ и ду́ши на́ша спаси́ Боже́ственными мольба́ми Твои́ми.
По полиеле́и седа́лен, глас 8:
В пусты́ню, преблаже́нне, всели́лся еси́/ и, в ней проходя́ жесто́кое жи́тельство, я́коже безпло́тен, пожи́л еси́,/ лик мона́шествующих сла́вне совокупи́в./ Те́мже, Богоно́сне о́тче наш Ти́хоне,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и Еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род,/ досто́йно сла́вим Пресвято́е Рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́.
Та́же степе́нна. 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви, о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Прииди́те, правосла́вных собо́ри,/ све́тло пра́зднуим па́мять преподо́бнаго отца́ на́шего Ти́хона,/ по́стников похвалу́, пусты́ни украси́теля,/ благоче́стия учи́теля,/ све́том благода́ти просвеще́ннаго,– раздая́теля Боже́ственных сокро́вищ,/ врача́ неду́жных,/ ему́же ны́не моля́щеся, глаго́лем:/ о́тче всеблаже́нне,/ не преста́й моля́ся Христу́ Бо́гу о чту́щих тя,/ дарова́ти нам мир и ве́лию ми́лость.
Кано́н Богоро́дице со ирмосо́м на 6 и свята́го на 8, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Всего́ себе́ Вседержи́телю Бо́гу возложи́в, Богому́дре,/ к Тому́ жела́нием и любо́вию ум твой впери́л еси́,/ да, со Христо́м пребыва́я, жи́знь ве́чную насле́дуеши.
Упова́нием на Бо́га Всеблага́го укрепля́емь, преблаже́нне Ти́хоне,/ к бу́дущим благи́м простира́лся еси́ посто́м и моли́твами.
Ди́вно житие́ твое́, всеблаже́нне,/ ку́пно же и смире́ние, е́же от ю́ности стяжа́л еси́,/ сего́ ра́ди от всего́ ми́ра отлучи́в себе́,/ был еси́ мона́х благоиску́сен, цветя́ в доброде́телех.
Богоро́дичен: Вопло́щшееся из пречи́стых ложе́сн Твои́х, Де́во Всечи́стая, Бо́жие Сло́во,/ всем изъясни́ ве́лию Боже́ственную любо́вь:/ челове́ческое бо естество́ ли́ку А́нгельскому совокупи́/ и в Небе́сная возведе́.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Вели́ко к Бо́гу дерзнове́ние стяжа́л еси́, преподо́бне Ти́хоне, посто́м и моли́твами,/ Его́же ми́лостива бы́ти к нам испроси́.
Вре́менных и до́льних возгнуша́вся,/ высо́кая, при́сно пребыва́ющая, возлюби́л еси́,/ Боже́ственным раче́нием распаля́я боголюби́вую твою́ ду́шу,/ и, сотвори́в Всевы́шняго во́лю,/ восприя́л еси́ блага́я Небе́сная.
Жела́я, преподо́бне, насыща́тися при́сно пребыва́ющия сла́дости,/ бы́лии самора́сленными в пусты́ни пита́лся еси́/ и та́ко по́двиг жития́ твоего́ соверша́л еси́,/ ны́не же наслажда́ешися присносу́щных благ.
Богоро́дичен: Твою́ по́мощь пода́ждь ми, рабу́ Твоему́, Де́во Влады́чице,/ вразуми́ и руково́дствуй мя на пути́ спасе́ния,/ изба́ви мя бед и скорбе́й, я́ко ро́ждшая всех Избавле́ние.
Седа́лен, глас 4:
Многомяте́жие ми́ра и непостоя́нную суету́, я́ко прах, вмени́в/ и стяжа́в жи́знь а́нгельску, Бо́гу угоди́л еси́;/ те́мже и нас от тлетво́рных страсте́й изба́ви, мо́лимся,/ твою́ па́мять при́сно в пе́снех почита́ющих,/ блаже́нне Ти́хоне, о́тче наш.
Сла́ва, и ны́не, Богоро́дичен:
Я́ко невозде́ланная, Де́во, лоза́,/ красне́йший грозд прозябла́ еси́, источа́ющ нам вино́ спасе́ния,/ всех веселя́щее ду́ши же и телеса́./ Те́мже я́ко вину́ Тя до́брых блажа́ще,/ при́сно со А́нгелом вопие́м Ти:/ ра́дуйся, Благода́тная.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Пото́ки сле́зными пусты́ню напои́л еси́, блаже́нне,/ се́мя трудо́в твои́х се́я в ней,/ те́мже и стори́чный плод ра́достне пожа́л еси́, вопия́:/ сла́ва си́ле Твое́й, Го́споди.
Помина́я, преподо́бне Ти́хоне, после́дний де́нь жи́зни сея́,/ на всяк час гото́вился еси́ ко исхожде́нию,/ благи́ми де́лы украша́я ду́шу твою́,/ ожида́я прише́ствия Влады́ки твоего́.
Моля́ся не преста́й, о́тче наш Ти́хоне, о всех, чту́щих па́мять твою́,/ прося́ избавле́ния от злых обстоя́ний и скорбе́й вся́ческих,/ да тя вси, я́ко отца́ чадолюби́ва, непреста́нно воспева́ем.
Богоро́дичен: Я́ко Богоизбра́нну Отрокови́цу, произше́дшую из чресл ца́рских,/ Ца́рь всех, Христо́с Госпо́дь возлюби́в/ и вы́шшу Херуви́м и Серафи́м показа́в,/ ве́сь, Богоро́дице, всели́ся в Тя.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Я́ко дре́во благора́сленно при вода́х, насажде́н быв, о́тче преподо́бне Ти́хоне,/ ве́тви доброде́телей мно́ги израсти́л еси́,/ под се́нь твою́ вся прие́мля, хотя́щия спасе́ния.
Моли́твенник тепл в жи́зни сей был еси́, блаже́нне о́тче наш Ти́хоне,/ хода́тайствы твои́ми здра́вие всем подава́я неоску́дное,/ тем и ны́не па́че в моли́тву предлага́ем тя,/ прося́ще тобо́ю прия́ти ми́лости и грехо́в оставле́ние.
Ца́рство Небе́сное стяжа́л еси́ произво́льною нището́ю,/ отону́дуже источа́еши оби́льно дарова́ния духо́вных исцеле́ний/ всем, ве́рно почита́ющим пречестну́ю твою́ па́мять,/ преподо́бне о́тче наш Ти́хоне.
Богоро́дичен: Возсия́ из Тебе́ мы́сленное Со́лнце/ и све́тлыя лучи́ Своего́ Божества́ простре́, Богоро́дице Влады́чице,/ тем Тя вси непреста́нными пе́нии велича́ем.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Мо́щи твоя́, преподо́бне,/ мно́гая исцеле́ния источа́ют ве́рою приходя́щим,/ о́тче наш Ти́хоне.
Непреста́нными твои́ми к Бо́гу, о́тче наш Ти́хоне, моли́твами/ Небе́сных селе́ний дости́гл еси́,/ иде́же е́сть Свет неизрече́нный/ и наслажде́ние преподо́бных,/ с ни́ми же предстои́ши всех Бо́гу, о́тче Ти́хоне.
Но́щь тебе́, я́ко де́нь, блаже́нне, вменя́шеся:/ не дал бо еси́ поко́я телеси́ твоему́,/ ни сна очесе́м, ни ве́ждом дрема́ния,/ до́ндеже дости́гл еси́ поко́я Небе́снаго.
Богоро́дичен: Расто́ргни мои́х прегреше́ний рукописа́ние/ и да́руй ми разреше́ние от одержа́щих мя печа́лей и страсте́й/ Твои́ми моли́твами, Влады́чице.
Конда́к, глас 8:
Оте́чества удали́вся, преподо́бне,/ в пусты́ню всели́лся еси́,/ иде́же жесто́кое житие́ твое́ показа́л еси́/ и, мно́гих доброде́тельми удиви́в,/ дарова́ние чуде́с от Христа́ прия́л еси́./ Те́мже помина́й нас, чту́щих па́мять твою́, да зове́м ти:/ ра́дуйся, преподо́бне Ти́хоне, о́тче наш.
И́кос:
Возлюби́в, преподо́бне о́тче наш Ти́хоне, Христо́вы Боже́ственныя за́поведи/ и возненави́дев ми́ра сего́ наслажде́ние,/ оста́вив оте́чество, прите́кл еси́ усе́рдно в пусты́ню/ и был еси́ в ней свети́льник,/ просвеща́яй зде́шния страны́ блиста́нием духо́вным./ Те́мже со тща́нием приходя́ще к тебе́, зове́м:/ ра́дуйся, преподо́бне Ти́хоне, о́тче наш.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Му́жески в пусты́ни подвиза́лся еси́/ и, зарю́ духо́вную восприе́м,/ взя́лся еси́ к высоте́ Небе́сней, преподо́бне о́тче Ти́хоне,/ иде́же и ны́не со А́нгелы прославля́ешися.
Молча́нием в пусты́ни язы́к твой обузда́л еси́/ и немяте́жным житие́м во пло́ти а́нгельски, о́тче наш Ти́хоне, пожи́л еси́.
Вои́стинну благи́я жи́зни сподо́бился еси́, преподо́бне о́тче Ти́хоне,/ чистото́ю и поще́нием сию́ обре́т,/ и ны́не со Безпло́тными чи́ны Бо́гу предстои́ши.
Богоро́дичен: Разуме́ти рождества́ Твоего́, Чи́стая,/ неизглаго́ланную глубину́ недоуме́ет ум челове́ч:/ Бог бо, истощи́в Себе́ за милосе́рдие,/ воплоще́нием Свои́м всего́ мя обнови́.
Песнь 8
Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Сле́зными пото́ки, преподо́бне о́тче наш Ти́хоне,/ зе́млю се́рдца твоего́ напои́л еси́/ и, предстоя́ в моли́твах, непоколеби́м,/ Творца́ всех славосло́вил еси́.
Бо́дренными твои́ми бде́нии, блаже́нне Ти́хоне, и ча́стыми воздыха́нии/ благода́ть Ду́ха Свята́го возрасте́ в тебе́, о́тче,/ и сла́вна тя показа́.
Поще́ния страда́ньми и до́блестными по́двиги твои́ми, преблаже́нне о́тче Ти́хоне,/ кла́сы Боже́ственныя возрасти́л еси́,/ и́миже пита́еши благоче́стно почита́ющия па́мять твою́.
Богоро́дичен: Всеблага́я Влады́чице,/ Преблага́го Бо́га пло́тию ро́ждшая,/ озло́бленное страстьми́ мое́ се́рдце очи́сти,/ да ве́рою и любо́вию сла́влю Тя.
Песнь 9
Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Пучи́ною слез твои́х, преподо́бне о́тче Ти́хоне,/ злонача́льнаго зми́я потопи́л еси́/ и я́ко победоно́сец изря́ден к Небе́сным возше́л еси́,/ иде́же непреста́нно со А́нгельскими ли́ки сла́виши всех Бо́га.
Житие́ незло́биво име́л еси́, преподо́бне о́тче Ти́хоне,/ и укра́шено по́ты страда́ния, прехва́льне,/ того́ ра́ди Боже́ственныя ра́дости испо́лнися дух твой.
Хва́лится тобо́ю, преподо́бне о́тче наш Ти́хоне, град твой Калу́га,/ я́ко венце́м ца́рским обложи́вся,/ име́я мо́щи твоя́ в преде́лех свои́х,/ я́ко до́бра стра́жа от Го́спода.
Богоро́дичен: Препе́тая Де́во, Бо́га пло́тию ро́ждшая,/ сла́вящия Тя прича́стники Боже́ственнаго Све́та покажи́/ и изба́ви ны гее́нны о́гненныя и вся́каго вре́да вра́жия моли́твами Твои́ми.
Свети́лен:
Мраз нощны́й претерпе́л еси́,/ и тяготу́ ва́ра дневна́го поне́сл еси́,/ и сих ра́ди ве́чное наслажде́ние восприя́л еси́,/ Христо́в уго́дниче, блаже́нне Ти́хоне, моли́ спасти́ся душа́м на́шим.
Сла́ва, и ны́не, Богоро́дичен:
По Бо́зе на Тя упова́ем, Пресвята́я Де́во Богоро́дице, и мо́лимся Тебе́:/ Твои́ми мольба́ми к Сы́ну Твоему́ и Бо́гу на́шему/ неврежде́нны до конца́ ны сохрани́.
На хвали́тех стихи́ры на 4, глас 8, самогла́сны:
Боже́ственною си́лою укрепля́емь,/ чу́вственныя стра́сти победи́л еси́ воздержа́ния бразда́ми,/ житие́ непоро́чно пожи́в в пусты́ни, пресла́вне,/ тем и обогати́ тя Бог дарова́нием чуде́с,/ Его́же моли́ спасти́ся душа́м на́шим.
Чи́стый сосу́д показа́лся еси́,/ исто́чник исцеле́ний излива́я,/ по́стников удобре́ние, мона́шествующих подкрепле́ние,/ гра́ду на́шему Калу́ге похвала́ и утвержде́ние,/ Ти́хоне преподо́бне о́тче наш.
Преподо́бне о́тче Ти́хоне,/ измла́да в доброде́тели приле́жно обучи́вся,/ орга́н был еси́ Свята́го Ду́ха/ и, от Него́ прие́м чуде́с де́йство,/ ны́не Боже́ственным све́том осиява́ешися,/ просвети́ и на́ша сердца́ и мы́сли/ и моли́ спасти́ся душа́м на́шим.
Све́тлое и богоуго́дное житие́ твое́,/ я́ко свет, вои́стинну на земли́ показа́ся,/ блаже́нне о́тче наш Ти́хоне./ Те́мже и ви́димая вся оста́вил еси́/ и Непостижи́маго зре́ти сподо́бился еси́,/ Его́же моли́, преподо́бне, спасти́ся душа́м на́шим.
Сла́ва, глас 6:
Житие́ твое́ в пусты́ни благоче́стно препроводи́л еси́,/ доброде́тельми укра́шено,/ посто́м бо и моли́твою,/ я́ко венце́м Боже́ственным, венча́лся еси́,/ ны́не же Влады́чню Престо́лу предстои́ши,/ со А́нгельскими лику́я во́инствы./ Сего́ ра́ди тя в пе́снех почита́ем,/ Ти́хоне, преподо́бне о́тче наш,/ моли́ спасти́ся душа́м на́шим.
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод Живота́./ Тебе́ мо́лимся: моли́ся, Влады́чице,/ с преподо́бным отце́м на́шим Ти́хоном и со все́ми святы́ми/ поми́ловатися душа́м на́шим.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:
Моли́тва
О свяще́нная главо́, вели́кий чудотво́рче, преподо́бне о́тче наш Ти́хоне, преблаже́нне и пресла́вне, Ду́ха Свята́го исполне́ние, по́стников похвало́, мона́шествующих сла́во, пусты́ни украси́телю, те́плый о нас, моли́твенниче, ны́не со а́нгельскими во́инствы предстоя́ у Престо́ла всех Царя́ сла́вы Го́спода, и наслажда́яся све́та Единосу́щныя Тро́ицы, и с Го́рними си́лами воспева́я Трисвяту́ю пе́снь, я́ко дерзнове́ние име́я, моли́ся Всеми́лостивому Влады́це спасти́ вся, ве́рующия во И́мя Его́: испроси́ мир и тишину́ Святы́м Це́рквам ниспосла́ти, ве́ре Правосла́вней укрепле́ние, ви́димыя и неви́димыя враги́ низложи́ти, гра́ды на́ши утверди́ти, мир ве́сь умири́ти. Моли́ Ми́лостиваго Бо́га, да твои́м благоприя́тным хода́тайством вся правосла́вныя христиа́ны изба́вит Он от гла́да, губи́тельства, тру́са, пото́па, огня́, меча́, от наше́ствия иноплеме́нник и междоусо́бныя бра́ни, ста́рыя да подкрепи́т, ю́ныя да наста́вит, нему́дрыя умудри́т, боля́щия исцели́т, плене́нныя и ю́зники свободи́т, сироты́ засту́пит, младе́нцы воспита́ет и вся лю́ди сохрани́т от всех бед и напа́стей, и от нападе́ния вра́жия, и смертоно́сныя я́звы, и тлетво́рных ветр, и от вся́каго зла. Дне́сь же с ве́рою приходя́щих рабо́в твои́х, со стра́хом и любо́вию припа́дающих к многоцеле́бным моще́м твои́м и о́браз подо́бия твоего́ любе́зно целу́ющих, я́ко те́плый наш засту́пниче, сохрани́ и в ско́рбных обстоя́ниих на́ших предста́ни, душе́вных и теле́сных страсте́й свободи́; в де́нь стра́шнаго Суда́ шу́ияго стоя́ния изба́ви и с десны́ми овца́ми моли́твами твои́ми ста́ти сподо́би и слы́шати блаже́нный о́ный глас Влады́ки, Христа́ Бо́га на́шего: прииди́те, благослове́ннии Отца́ Моего́, насле́дуйте угото́ванное вам Ца́рство от сложе́ния ми́ра. Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и со Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.
