Служба преподобнаго Симона Радонежскаго
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры преподо́бнаго, глас 5:
Прииди́те, собо́ри Росси́йстии,/ восхва́лим преподо́бнаго Се́ргия,/ приня́вшаго в число́ бра́тии му́жа ди́внаго,/ старе́йшаго из архимандри́тов страны́ Смоле́нския,/ преподо́бнаго Си́мона,/ мно́го лет прове́дшаго в послуша́нии у свята́го игу́мена/ и с ним бо вои́стинну мно́гими труды́ Бо́гу угоди́вшаго./ Сии́ бо ны́не приле́жно мо́лятся о нас,/ соверша́ющих любо́вию све́тлое сие́ торжество́.
Ки́ими пе́сненными добро́тами/ похва́лим преподо́бнаго Си́мона,/ Бо́гу угоди́ти от ю́ности жела́вшаго/ и во стране́ Смоле́нстей доброде́тельми и стро́гой жи́знью просла́вльшагося?/ Сей бо слы́ша о по́двигах ди́внаго Се́ргия,/ сла́ву пре́жнюю ни во что же вменя́ет,/ но с по́сохом проста́го стра́нника и́дет в пусты́ню Ра́донежскую/ и та́мо поко́й души́ свое́й обрета́ет.
Вси помо́лимся Христу́,/ творя́ще па́мять днесь сла́внаго Си́мона,/ бы́вшаго архимандри́та Смоле́нскаго,/ прише́дшаго во оби́тель Се́ргиеву/ и с глубо́ким смире́нием к стопа́м свята́го ста́рца припа́дшаго,/ жела́я быть его́ послу́шником./ О святи́и уго́дницы,/ земли́ на́шея утвержде́ние вы есте́ вои́стинну!
Сла́ва, глас 1:
Земля́ весели́тся и Не́бо ра́дуется,/ творя́ще па́мять днесь смире́ннаго послу́шника Се́ргиева/ Си́мона, архимандри́та Смоле́нскаго,/ укра́шеннаго все́ми доброде́тельми подви́жника,/ в ста́рости масти́те к Бо́гу отше́дшаго,/ и к Престо́лу Сла́вы душе́ю свято́ю предста́вшаго,/ и ны́не моля́щагося о душа́х на́ших.
И ны́не, Богоро́дичен.
На стихо́вне стихи́ры, глас 8:
Обле́кшийся за по́двиги в преподо́бие/ и во святы́ню за незло́бие,/ послуша́ние па́че поста́ и моли́твы поче́тший,/ Богому́дре Си́моне,/ моли́ Многопе́тую Тро́ицу/ спасти́ся душа́м на́шим.
Стих: Честна́ пред Го́сподем/ смерть преподо́бных Его́.
Прииди́те, ве́рнии,/ ублажи́м преподо́бнаго Си́мона,/ и́же жи́знию, та́ко и сме́ртию свое́ю нас наставля́ет:/ честна́ бо пред Го́сподем/ смерть преподо́бных Его́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Я́ко жениху́ целому́дренну,/ возложи́ ти Госпо́дь вене́ц сла́вы,/ и, я́ко неве́сту, украси́ тя Всевы́шний за чистоту́ све́том пресве́тлым,/ Си́моне о́тче наш,/ моли́ся Христу́ Бо́гу/ дарова́ти ми́ру мир и ве́лию ми́лость.
Сла́ва, глас то́йже:
Пусты́ни Ра́донежския яви́лся еси́ до́брое прозябе́ние,/ преподо́бне о́тче Си́моне,/ от ю́ности бо возлюби́л еси́ честно́е житие́,/ духо́вному твоему́ учи́телю после́дуя,/ земна́я вся презре́в,/ соверше́нную любо́вь к Бо́гу стяжа́л еси́/ и к Небе́сным возше́л еси́, ра́дуяся,/ моли́ Христа́ Бо́га спасти́ся душа́м на́шим.
И ны́не, Богоро́дичен.
Тропа́рь, глас 5:
Ра́дуйся, пусты́не Ра́донежская,/ израсти́вшая крин духо́вный,/ в вертогра́де преподо́бнаго Се́ргия:/ Си́мона, архимандри́та Смоле́нскаго,/ позна́вшаго све́тлость послуша́ния/ и ди́внаго птиц виде́ния сподо́бившагося,/ сего́ воспомина́юще, Бо́га прославля́ем.
НА У́ТРЕНИ
На Бог Госпо́дь: тропа́рь преподо́бнаго два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Вельми́ ра́дуемся о тебе́, преподо́бне о́тче Си́моне,/ име́я помо́щника тя и засту́пника,/ пребу́ди, о́тче святы́й, ду́хом твои́м при́сно с на́ми,/ моли́твы творя́ за ны к Бо́гу Вседержи́телю,/ я́ко да изба́вит нас от вся́кия ско́рби и ну́жды,/ да тя при́сно ублажа́ем.
Сла́ва, и ны́не, Богоро́дичен:
О Тебе́, Благода́тная, ра́дуемся и хва́лимся/ и к Бо́гу Тя и́мамы предста́тельство,/ простри́ ру́ку Твою́ святу́ю/ и низпосли́ рабо́м Твои́м по́мощь от Сы́на Твоего́ и Бо́га на́шего.
По 2-м стихосло́вии седа́лен, глас 4:
Любо́вию чту́ще твою́ па́мять,/ мо́лим тя, преподо́бне о́тче Си́моне,/ моли́ приле́жно Христа́ Бо́га на́шего изба́вити нас от вся́кия ско́рби и напа́сти,/ да тя вси се́рдцем и усты́ непреста́нно ублажа́ем.
Сла́ва, и ны́не, Богоро́дичен:
К Тебе́ прибега́ем, Влады́чице,/ я́ко Помо́щнице безпомо́щных и наде́жде ненаде́жных,/ утеше́ние в ско́рбех и по́мощь нам бу́ди,/ от грехо́в и бед избавля́ющи нас, Пречи́стая.
По полиеле́и седа́лен, глас 4:
Влады́це Христу́ после́довав, мир оста́вил еси́/ и, в пусты́ню всели́вся, плоть покори́в ду́ху воздержа́нием,/ весь освяще́н и богоно́сен показа́лся еси́./ Си́моне преподо́бне, моли́ Христа́ Бо́га/ согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Проро́цы Тя, Пречи́стую, предвозвести́ша,/ апо́столы Тя, Пренепоро́чную, пропове́даша,/ Тя, Благода́тную, возвели́чиша святи́тели и му́ченицы,/ Тя, Отра́ду и утеше́ние, ублажи́ша преподо́бнии и пра́веднии./ Тем и мы с ни́ми, Богоро́дицу Тя испове́дающе, благоче́стно велича́ем.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Прииди́те, мона́шествующих мно́жество днесь,/ восхва́лим преподо́бнаго Си́мона,/ подража́теля доброде́телей а́ввы Се́ргия/ пе́сньми и пе́ньми восхва́лим/ и честну́ю его́ ико́ну любе́зно облобыза́ем, глаго́люще:/ ра́дуйся, оте́честву твоему́ пресве́тлый свети́льниче;/ ра́дуйся, я́ко Тро́ице предстои́ши со А́нгелы,/ Ю́же непреста́нно моли́/ дарова́ти ми́ру мир/ и душа́м на́шим ве́лию ми́лость.
Кано́н, глас 4. Его́же краегране́сие: А́нгелу своему́ пе́сни хвале́ния приношу́.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
А́нгельскому пе́нию подража́я,/ вси помо́лимся Христу́, на́шему Сладча́йшему Влады́це,/ сла́ве мона́шествующих, по́стников наслажде́нию,/ и просла́вим подви́жника святы́я оби́тели Ра́донежския – преподо́бнаго Си́мона.
Ны́не вси ученицы́ Се́ргиевы, неувяда́емии цве́ти рая́ мы́сленнаго,/ многоце́ннии сосу́ди, Христо́вы уго́дницы,/ прииди́те и ста́ньте с на́ми,/ да воздади́м сла́ву Бо́гу, ди́вному во святы́х Свои́х.
Гряди́те, лю́дие, воспои́м песнь Христу́ Бо́гу,/ просла́вльшему уго́дники Своя́,/ и ублажи́м преподо́бнаго Си́мона, ны́не на Небесе́х ра́дующагося.
Богоро́дичен: Еди́на Чи́стая и Непоро́чная Де́во, Пречу́дная ми́ра Го́рняго Цари́це,/ моля́щи не преста́й Творца́ и Сы́на Твоего́,/ дарова́ти нам грехо́в оставле́ние и душа́м на́шим спасе́ние.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Любо́вь Боже́ственную в се́рдце свое стяжа́л еси́, преподо́бне о́тче Си́моне,/ в житии́ свое́м вели́кому учи́телю твоему́ а́вве Се́ргию подража́я,/ стра́хом Бо́жиим от лука́вств вра́жиих себе́ всегда́ ограждая́.
Умаща́еши ду́ши еле́ем ра́дости любо́вию тя пою́щих, преблаже́нне Си́моне,/ и ве́рою Христу́ вопию́щих:/ несть свят, па́че Тебе́, Человеколю́бче.
Си́лою Бо́жиею, поспешеству́ющею тебе́, преподо́бне о́тче Си́моне,/ я́ко чу́ден, чудеса́ источа́еши/ и отгоня́еши неду́ги немощству́ющих.
Богоро́дичен: Ве́рою под кров Твой прибега́ющих не пре́зри нас, Богоро́дице Де́во,/ да Тя просла́вим, Чи́стая, во ве́ки.
Седа́лен, глас 4:
Чистото́ю душе́вною Боже́ственно вооружи́вся,/ непреста́нную моли́тву Иису́сову в се́рдце свое́ стяжа́в,/ блиста́нием духо́вным ны́не прославля́ешися,/ те́мже, припа́дая, молю́ тя:/ просвети́ о́чи души́ моея́ и научи́ мя моли́тися,/ да позна́ю сла́дость в Бо́зе пребыва́ния.
Сла́ва, и ны́не, Богоро́дичен:
Под кров Твой держа́вный с ве́рою прибега́ем, Богороди́тельнице Чи́стая,/ покры́й и соблюди́ нас моли́твами Твои́ми,/ да Тя, Богома́ти, при́сно почита́ем.
Песнь 4
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Отцу́ своему́ досточу́дному Се́ргию после́дуя,/ светоно́сным житие́м украси́лся еси́,/ селе́ния в ве́чных оби́телех дости́гл еси́, пребла́женне Си́моне.
Ева́нгельский глас услы́шав, вся земна́я оста́вил еси́, о́тче Си́моне,/ в пусты́ню Се́ргиеву всели́лся еси́/ и, та́мо а́нгельски пожи́в, соде́лал еси́ ду́шу твою́ хра́мом Ду́ху Свято́му,/ указу́я нам путь к Небе́сному ше́ствию.
Мно́гих мои́х прегреше́ний егда́ в помышле́ние прииду́,/ себе́ сама́го пла́чу, но молю́ся:/ моли́ся о мне, уго́дниче Бо́жий, преподо́бне Си́моне.
Богоро́дичен: Услы́ши, Влады́чице, глас мой,/ молю́ся Ти прилежно:/ изба́ви мя ве́чнаго муче́ния.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Поще́ние изря́дное, коленопреклоне́ния и послуша́ния/ храня́ опа́сно до отше́ствия своего́,/ и́миже сподо́бился еси́ нетле́ннаго блаже́нства.
Егда́ виде́ния чу́днаго сподо́бился еси́ а́вва Се́ргий,/ зря Свет в нощи́ Небе́сный и птиц мно́жество,/ предуказу́ющих на мно́жество его́ ученико́в,/ тогда́ и ты, преподо́бне Си́моне, был еси́ сему́ свиде́тель,/ раздели́в ра́дость своего́ учи́теля.
Све́тло житие́ твое́ бысть, преблаже́нне Си́моне,/ обнови́в те́ло твое́ воздержа́нием и чистото́ю,/ в вы́шняя селе́ния ны́не водвори́лся еси́,/ и мой ум утверди́ во и́стиннем пути́ моли́твами твои́ми.
Богоро́дичен: Незаходи́маго Све́та Ма́ти,/ на Тя по Бо́зе наде́жду спасе́ния моего́ возлага́ю и молю́ Тя:/ изба́ви мя от належа́щих бед и скорбе́й,/ да сла́влю Тя, Чи́стая, во ве́ки.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Исцеле́ний бога́тыя кла́сы пожа́л еси́, свяще́нный о́тче,/ и́бо приле́жным трудо́м обогати́в ду́шу твою́,/ доброде́тельная и многопло́дная се́мена в ню ввергл еси́.
Христа́ возлюби́л еси́, Христу́ после́довал еси́,/ Им укрепля́емь, жите́йское мо́ре безбе́дно преплы́л еси́,/ преблаже́нне о́тче Си́моне.
Возвы́сився на доброде́тель и ум очи́стив,/ со А́нгелы ны́не на Небесе́х водвори́лся еси́,/ помина́й и мя, ве́рою чту́щаго па́мять твою́, Си́моне приснопа́мятне.
Богоро́дичен: А́нгелов сла́досте, скорбя́щих ра́досте,/ христиа́н Предста́тельнице, Де́во, Ма́ти Госпо́дня,/ заступи́ нас и изба́ви ве́чных мук.
Конда́к, глас 2:
Возлюби́в, преподо́бне, Боже́ственныя за́поведи,/ чистото́ю душе́вною вооружи́вся,/ непреста́нною моли́твою и трудо́м в пусты́ни Се́ргиевой подвиза́лся еси́,/ Христа́, Сладча́йшаго Иису́са, дости́гл еси́,/ Его́же моли́ непреста́нно о всех нас.
И́кос:
Послуша́ния ра́чительный, благоразу́мия испо́лненный,/ уве́рився тве́рдо, я́ко лу́чше быти послу́шником Се́ргиевым,/ па́че нача́льствовати в ино́м ме́сте,/ страну́ Смоле́нскую оста́вив, прише́л еси́ к а́вве Се́ргию,/ и в пусты́ни Ра́донежстей всели́лся еси́/ и, та́мо а́нгельски пожи́в, Небе́сныя оби́тели дости́гл еси́,/ иде́же ны́не весели́шися, зря́ще Христа́,/ Его́же моли́ непреста́нно о всех нас.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Лесть вра́жию отве́ргше,/ в пещи́ искуше́ний Боже́ственная благода́ть ороси́ тя, преподо́бне,/ и многосве́тла показа́ тя, зову́ща:/ благослове́н Бог оте́ц на́ших.
Егда́ проходи́л еси́ по́двиги по́стныя, о́тче,/ смири́л еси́ себе́ Боже́ственным смире́нием,/ поя́ Бо́гу, в Тро́ице сла́вимому:/ благослове́н Бог оте́ц на́ших.
Небе́сным Све́том Бо́жия благода́ти просвети́в се́рдце твое́, о́тче Си́моне,/ и ду́шу украси́в доброде́тельми,/ Бо́га зрел еси́ в жи́зни сей вре́менней/ и, ны́не в ве́чности с Ним пребыва́я, пое́ши:/ Го́споди и Бо́же, благослове́н еси́.
Богоро́дичен: Иму́щи Тя кре́пкую Засту́пницу, Богороди́тельнице Чи́стая,/ моли́ся, мо́лимся приле́жно, о ве́рою чту́щих Тя.
Песнь 8
Ирмо́с: О́троки благочести́выя в пе́щи/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́, и превозноси́те Его́ во вся ве́ки.
Я́ко свети́льник пресве́тлый, показа́ тя Всевы́шний Госпо́дь,/ Его́же моли́, о́тче преподо́бне, и мою́ ду́шу просвети́ти и к любви́ Го́рней уязви́ти/ да, тобо́ю направля́емь со храни́телем мои́м А́нгелом, получу́ от Христа́ Бо́га ве́лию ми́лость.
Пра́ведник во ве́ки жив бу́дет,/ смерть бо для него́, по апо́столу, – приобре́тение,/ исхо́д от све́та к Све́ту возсия́вшему./ Те́мже вопие́м ти:/ моли́ся о нас ко Го́споду, преподо́бне о́тче Си́моне,/ да просвети́т на́ша помышле́ния.
Ра́достен сей пра́здник христоимени́тым лю́дем Це́ркве Росси́йския,/ наипа́че весе́лие и отра́да насе́льником Ла́вры Се́ргиевы,/ моли́твенно ны́не предстоя́щих Бо́гу, ди́вному во святы́х Свои́х,/ Его́же превозно́сим во вся ве́ки.
Богоро́дичен: Исцеле́ния и цельбы́ подаю́тся оби́льно, Пресвята́я Влады́чице,/ всем, с ве́рою к Тебе́ прибега́ющим.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Насле́дниче Боже́ственных селе́ний,/ а́нгельски, о́тче Си́моне, на земли́ пожи́л еси́,/ те́мже со А́нгелы ны́не лику́ет дух твой.
Очи́сти на́ша согреше́ния, Сло́ве, и просвети́ о́чи серде́чныя,/ е́же чи́сто зре́ти Твою́ све́тлость Боже́ственнаго светоли́тия,/ моли́твами уго́дников Твои́х преподо́бных Се́ргия и Си́мона.
Шу́ия ча́сти избе́гл еси́,/ десны́я же страны́ сподо́бился еси́, преподо́бне,/ моли́ о нас, о́тче, да твои́ми моли́твами сподо́бимся и мы узре́ти Христа́/ и услы́шати вожделе́нный глас Его́:/ прииди́те, благослове́ннии, насле́дуйте угото́ванное вам Ца́рствие от сложе́ния ми́ра.
Богоро́дичен: Ум мой умири́ и просвети́, Ма́ти Всеблага́я,/ и напра́ви мя ходи́ти непреткнове́нно путе́м спасе́ния,/ я́ко да при́сно ублажа́ю Тя.
Свети́лен:
Процве́л еси́, я́ко фи́никс, дави́дски, о́тче,/ и оби́тель яви́лся еси́ Ду́ха Пресвята́го,/ И́же сла́вна тя вселе́нней показа́./ О нас непреста́нно моли́, почита́ющих ве́рою пречестну́ю па́мять твою́,/ преподо́бне Си́моне.
Сла́ва, и ны́не, Богоро́дичен:
Просвети́, Чи́стая Де́во, се́тующее се́рдце мое́,/ при́сно преступле́ньми и жите́йскими мно́гими молва́ми отягоще́нное,/ и не оста́ви мене́, своево́льнаго, еди́наго,/ я́ко да сла́влю Тя и любо́вию пою́ Тя, Препе́тая.
На хвали́тех стихи́ры, глас 4:
В послуша́ние ве́ры плени́л еси́, преподо́бне, весь ум,/ да благи́ми де́лы украси́ши ю,/ дости́гл еси́ безмо́лвнаго приста́нища,/ моли́ся Христу́ Бо́гу, о́тче Си́моне,/ спасти́ и просвети́ти ду́ши на́ша.
Преподо́бне о́тче Си́моне,/ душе́ю потруди́лся еси́ в богомы́слии,/ те́лом же – в послуже́нии тре́бующим от Тебе́ по́мощи,/ моли́ся Пастыренача́льнику Христу́,/ да упасе́т нас, чту́щих святу́ю па́мять твою́,/ в правове́рии, любви́ и единомы́слии.
Преподо́бне о́тче,/ измла́да доброде́тели приле́жно обучи́вся,/ наипа́че же послуша́нию и кро́тости,/ орга́н был еси́ Свята́го Ду́ха/ и, от Него́ прии́м дар прозре́ния,/ увеща́л еси́ челове́ки ше́ствовати путе́м Христо́вым,/ моли́ся и о нас, преподо́бне, ко Христу́ Бо́гу/ и Его́ Пречи́стой Ма́тери/ Небе́сных селе́ний сподо́битися.
Сла́ва, глас 8:
Воспо́йте, лю́дие, песнь но́ву,/ я́ко ди́вна сотвори́ Госпо́дь,/ просла́вив уго́дника Бо́жия, преподо́бнаго Си́мона,/ любе́знаго послу́шника а́ввы Се́ргия,/ ра́но ду́хом позна́вшаго,/ я́ко лу́чше бы́ти в послуша́нии во святе́й оби́тели,/ не́жели нача́льствовати в ино́м ме́сте.
И ны́не, глас то́йже:
Свети́ся и ра́дуйся, Ла́вра Се́ргиева,/ возрасти́вшая цве́ты ра́йския,/ А́нгелы земны́я и Небе́сныя челове́цы,/ трисвяту́ю песнь сла́дце воспева́ющия,/ и мы, гре́шнии, им подража́юще,/ просла́вим Бо́га, в Тро́ице сла́вимаго.
На Литурги́и слу́жба вся преподо́бническая.
