Служба преподобнаго Симеона, Новаго Богослова
12 октября́ (по ст. ст.) па́мять пра́зднуем и́же во святы́х отца́ на́шего Симео́на, Но́ваго Богосло́ва, пренесенную с 12 ма́рта (по ст. ст.).
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 2.
Подо́бен: Егда́ от Дре́ва:
Егда́ уязви́лся еси́ сла́дкою стрело́ю любве́ Боже́ственныя,/ Симео́не преподо́бне,/ тогда́ презре́л еси́ пло́ть и кро́вь/ и роди́телей отве́ргл еси́ име́ние, Богому́дре,/ сро́дников пристра́стие,/ бога́тство и сла́ву тще́тную./ Те́мже, умерщвле́н быв су́щим в ми́ре,/ сокрове́нным во Христе́ житие́м пожи́л еси́, досточуднейше.
Егда́ со́вести твоея́, о́тче,/ прилежа́ние име́л еси́/ и вся, ели́ка ти вменя́ше та, блаже́нне, сотвори́л еси́,/ уча́ся, моля́ся, пла́ча и постя́ся,/ тогда́ облиста́ тя Свет Небе́сный,/ и́же на высоте́ Небе́сней/ яви́ ти о́блак све́тел,/ возвеща́я Наста́вившаго тя.
Егда́ отцу́ твоему́, Симео́не, духо́вному повину́лся еси́/ и все мудрова́ние твое́/ и всю во́лю твою́ тому́ покори́л еси́,/ тогда́ кра́йним смире́нием обогати́лся еси́, о́тче,/ и от смире́ния Боже́ственное разсужде́ние обре́л еси́/ и прозре́ние Боже́ственное явля́емых творе́ний,/ словеса́ сокрове́нная испытующее.
Егда́ восхожде́ния свяще́нная в твое́м се́рдце положи́л еси́/ и от си́лы к вя́щшей си́ле, о́тче, возше́л еси́,/ тогда́ Свет тя Небе́сный всего́ облиста́/ и прему́дрости дар даде́ бога́тый./ Те́мже мно́зи неве́дущии,–/ отку́ду толи́кая прему́дрость? – глаго́лаху,/ чудеси́ удивля́еми.
Сла́ва, глас 4:
Небеси́ и земли́ торжество́ быва́ет/ в па́мять твою́, Симео́не Богосло́ве,/ дне́сь бо А́нгели торжеству́ют/ и вся, я́же на Небесе́х, торжеству́ющая Це́рковь перворо́дных,/ посреде́ иму́ще дух твой всесве́тел,/ торжеству́ет же и я́же на земли́ во́инствующая Це́рковь правосла́вных,/ я́ко неотъе́млемое бога́тство и многотала́нтное сокро́вище стяжа́вши,/ Богодухнове́нная твоя́ списа́ния,/ и́хже и нам причасти́тися плода́,/ и́же есть в нас сами́х де́йственное стяжа́ние Боже́ственныя благода́ти,/ умоли́ Христа́, Спа́са душ на́ших.
И ны́не, Богоро́дичен, глас то́йже:
От вся́ких бед рабы́ Твоя́ сохрани́,/ благослове́нная Богоро́дице,/ да Тя сла́вим, наде́жду душ на́ших.
На стихо́вне стихи́ры, глас 2:
Подо́бен: До́ме Евфра́фов:
Колесни́цу доброде́телей/ четыреко́нную угото́вав,/ возше́л еси́ на ню, о́тче,/ и ко открове́нием Госпо́дним/ возвы́сился еси́.
Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.
Пропове́дник у́мныя моли́твы/ показа́лся еси́,/ пра́вило трезве́ния Боже́ственнаго,/ орга́н прему́дрости/ и труба́ обоже́ния.
Стих: Уста́ пра́веднаго ка́плют прему́дрость,/ устне́ же муже́й пра́ведных ка́плют благода́ти.
Благода́ть испове́дует/ тебе́ вся Це́рковь,/ я́ко твои́ми словесы́/ ко обре́тению Боже́ственныя благода́ти/ возста́вися.
Сла́ва, глас и подо́бен то́йже:
Сла́ва Тебе́, о Тро́ице,/ О́тче, Сы́не и Ду́ше,/ я́ко во всем ми́ре Симео́на,/ о́трока Твоего́,/ Твое́ю благода́тию просла́вила еси́.
И ны́не, глас и подо́бен то́йже:
О ве́ще сла́дкия и И́мене,/ Мари́е, моли́ся/ Сы́ну Твоему́/ со преподо́бным Твои́м/ о нас, рабе́х Твои́х
Тропа́рь (зри на вели́цей вече́рни). Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Пое́м Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры, глас 4:
Подо́бен: Я́ко до́бля:
Богосло́вов со́нме и преподо́бных собо́ре,/ соше́дшеся дне́сь, да восхва́лим Симео́на преподо́бнейшаго/ и но́ваго су́ща Богосло́ва вои́стинну./ Сей бо, восприи́м все сия́ние Святы́я Тро́ицы,/ возгреме́ ми́ру та́инственнаго богосло́вия/ я́же па́че ума́ догма́ты.
О́тчу псалти́рь, Сы́на кра́сный кимва́л,/ Свята́го Ду́ха Боже́ственный орга́н,/ Тро́ицы всея́ пропове́дника открове́ний,/ скрижа́ль честну́ю, тайнопи́санную благода́ти,/ пе́сньми восхва́лим Боже́ственными/ Симео́на Богоно́снаго, Богосло́вов похвалу́.
Ве́лие чу́до благода́ти и стра́нное/ на тебе́, Симео́не ди́вне, соверши́ся./ Ты бо сый неприча́стен прему́дрости вне́шния,/ показа́лся еси́ вои́стинну Богосло́в Богодухнове́н,/ и учи́тель позна́лся еси́ Богому́др ми́рови,/ и свети́льник вселе́нныя свяще́нными твои́ми списа́ньми.
Не́бо многозве́здное,/ разли́чными дарова́ньми пове́дающее сме́ртным всем/ благода́ти Боже́ственныя та́инства,/ и о́бразы просвеще́ния, и ме́ры непреле́стно,/ и глубины́ соверше́нства,/ Боже́ственными пе́сньми от всех досто́йно да восхва́лится/ Симео́н Богосло́в, Це́ркве удобре́ние.
И́ны стихи́ры, глас 8.
Подо́бен: О, пресла́внаго чудесе́:
О, пресла́внаго чудесе́,/ ка́ко тя Дух Бо́жий,/ Симео́не всеблаже́ннейше,/ предуве́дев издале́ча, от ми́ра отлучи́,/ я́ко да испо́лнит, я́же предуста́ви,/ и, бога́тыми Свои́ми дарова́ньми украси́в,/ тя ми́ра всего́ показа́ Богосве́тла свети́льника,/ сло́во жи́зни иму́ща, преподо́бне.
О, пресла́внаго чудесе́,/ ка́ко в после́дняя времена́ Сам Дух Святы́й,/ И́же дре́вле просвети́ апо́столы благода́тию/ и учи́тели ми́ра сотвори́,/ Той просвеща́ет и тя, треблаже́нне,/ и равноапо́стольна показу́ет конце́м земли́,/ и наста́вника мно́гих, и учи́теля Богому́дрейша.
О́тче Симео́не блаже́нне,/ ты, кра́снаго Христа́ возлюби́в тепле́йше,/ поте́кл еси́ восле́д Боже́ственней благода́ти,/ до́ндеже всего́ Его́ ввел еси́ в ду́шу твою́ и се́рдце твое́./ О́ле любве́ твоея́!/ е́юже жил еси́ ты при́сно во Христе́/ и в тебе́ та́кожде при́сно живя́ше Той.
У́глем Боже́ственным, преподо́бне, устне́ прикосну́в,/ и ум измени́ся Ду́хом,/ и о́гнь ве́сь был еси́,/ и о́гненная разуме́в словеса́, Богому́дре,/ и пропове́дал еси́, и руко́ю твое́ю сия́ написа́л еси́,/ и́мже прие́млющий о́гнь и те быва́ют/ и та́йно в ду́шу прие́млют Боже́ственное измене́ние.
Сла́ва, глас 6:
Возсия́ дне́сь Це́ркви,/ я́коже звезда́ у́тренняя,/ Богосло́ва Симео́на честно́е торжество́./ Прииди́те у́бо, слове́с его́ рачи́телие,/ воеди́но совоку́пльшеся,/ богосло́вными пе́сньми к нему́ рцем, глаго́люще:/ ра́дуйся, и́же по пе́рвом Богосло́ве Иоа́нне и второ́м Богосло́ве Григо́рии/ тре́тий яви́лся еси́ Богосло́в и напе́рсник;/ ра́дуйся, и́же но́ваго Изра́иля,/ я́ко столп о́гненный,/ веще́ственным 27 исполне́нием за́поведей/ в зе́млю безстра́стия наставля́яй изве́стнейше;/ ра́дуйся, и́же, я́ко столп о́блачный,/ духо́вным виде́нием/ к соверше́нству возмо́жному челове́ком возводя́й,/ моли́ о нас, любо́вию соверша́ющих па́мять твою́.
И ны́не, Богоро́дичен: Кто Тебе́ не ублажи́т:
Вход. Све́те Ти́хий: Проки́мен дне и чте́ния три преподо́бническая.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (гла́вы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ры самогла́сны.
Глас 1:
Небе́сный я́ко вои́стинну подоба́ет име́ти язы́к/ хотя́щим восхвали́ти Симео́на, Небе́снаго челове́ка./ Сей бо в Ду́се зре́нием несре́дственне/ соедини́вся Свято́му по естеству́,/ свят по прича́стию бы́сть;/ Пе́рвому Све́ту свет вторы́й нарече́ся,/ и по существу́ Бо́гу бог по благода́ти соде́яся./ Те́мже святоле́пная, светосия́нная и Богообра́зная/ подоба́ет возда́ти ему́ в пе́снех,/ я́ко да мо́лится приле́жно Го́сподеви/ освяти́тися, просвети́тися и обожи́тися душа́м на́шим.
Глас 2:
Богому́дре о́тче Симео́не,/ тя чи́стый обре́т сосу́д/ вседе́тельная Свята́го Ду́ха благода́ть,/ всего́ Себе́ тя привлече́/ и духо́вныя Своя́ зако́ны,/ я́коже в кни́зе, на скрижа́лех се́рдца твоего́/ Боже́ственным Све́том начерта́./ Те́мже у́бо твой ум исто́чник показа́ многотеку́щий,/ источа́яй высо́каго Бо́жия ве́дения мы́сли,/ язы́ком же твои́м, я́коже тро́стию,/ подви́жническаго любому́дрия доброписа́ догма́ты/ и зало́г я Христо́вой Це́ркви оста́ви,/ и́хже ны́не чте́ния услади́вшеся,/ мо́лимтися о е́же сподо́битися плодо́в сих получи́ти/ и нам, ублажа́ющим тя.
Глас 3:
Благода́ть испове́мы твоея́ свя́тости,/ Симео́не, о́тче наш преподо́бне,/ я́ко, честны́ми твои́ми списа́ньми/ пре́дняго заблужде́ния изба́вив,/ ко и́стинному пути́ спасе́ния нас наста́вил еси́,/ тем бо, я́ко в зерца́ле светле́йшем, чи́сте смотря́ще,/ вельми́ удаля́емся во Христе́ жития́ же и соверше́нства,/ о себе́ саме́х скорби́м,/ дале́че отло́жше самомне́ние, е́же в себе́ име́хом./ Я́ко вои́стинну твоя́ списа́ния су́ть Боготво́рный свет,/ и́мже познаю́щии преобража́ются ко обоже́нию/ и соединя́ются Христу́,/ спаса́ющему ду́ши на́ша.
Глас 3:
Кто не просла́вит,/ или́ кто я́коже свята́го тя не почти́т,/ Симео́не Богонауче́нне?/ Тя бо Свята́я Тро́ица/ освяща́ющею и Боготворя́щею Свое́ю просла́ви благода́тию,/ твое́ житие́ свя́то,/ чудесы́ мно́гими укра́шенно,/ кончи́на твоя́ свя́та,/ и списа́ния твоя́ светле́йше трубы́/ твою́ пропове́дят свя́тость,/ свят у́бо сый/ и к Бо́гу святы́х мно́гое иму́щий дерзнове́ние,/ моли́ о нас, любо́вию сла́вящих/ твое́ свято́е и́мя.
Глас 4:
Воспле́щим в свяще́нных пе́снех дне́сь, празднолю́бцы,/ в па́мять Симео́на, Но́ваго Богосло́ва./ Сей бо, чу́вственных вся́ческих отсту́пль,/ мы́сленне к себе́ обрати́ся,/ обра́щся же, моли́твою у́мною обогати́ся,/ обогати́ся же то́ю, презре́нную личи́ну страсте́й очи́сти,/ очи́стив же, мир по́мыслов стяжа́,/ умирився же, смири́ся,/ смири́в же ся, Боже́ственныя любве́ сподо́бися,/ возлюби́в же Боже́ственное озаре́ние во уме́,/ в се́рдце воипоста́сное восприя́т Боже́ственныя благода́ти просвеще́ние./ Те́мже я́ко возлюби́в Боже́ственная/ и изве́стно сим научи́вся,/ я́ко науче́нный незави́стно научи́/ и обоже́ния преесте́ственный дар нам подаде́,/ моля́ся приле́жно Го́сподеви спасти́ся душа́м на́шим.
Глас 4:
Челове́че Бо́жий, и Но́вый Богосло́ве,/ и му́жу жела́ний духо́вных,/ ты, и́стинную ма́нну, Христа́, непреста́нно истека́ющую,/ име́я в се́рдце твое́м,/ Богосло́вская твоя́ уче́ния нам предлага́еши,/ я́ко ма́нну духо́вную и Небе́сную,/ нача́льным и сре́дним и соверше́нным подлежа́щую/ и всем вся быва́ющую,/ я́коже в пусты́ни дре́вле ма́нна,/ и́миже просвеща́еши ум,/ се́рдце умиля́еши, услажда́еши ду́шу,/ слух поража́еши, помышле́ние изступля́еши,/ и от земли́ и земны́х сию́ прелага́еши,/ пресыще́ния не наво́диши,/ но но́вый всегда́ чту́щим обрета́ешися,–/ уста́ми твои́ми глаго́лаше Дух Пресвяты́й,/ просвеща́яй и освяща́яй ду́ши на́ша.
Сла́ва, глас 5:
В свяще́нный о́блак духо́внаго зре́ния вшед,/ Симео́не Богови́днейший,/ преизбы́точеством светоли́тия непристу́пен сый,/ самому́, е́же не ви́дети, ниже́ ве́дети,/ ви́дети и ве́дети сподо́бился еси́ в нем/ Су́щаго и Непостижи́маго Бо́га и Неви́димаго,/ сие́ бо есть вои́стинну, е́же ви́дети и ве́дети./ Те́мже Его́, я́ко ничто́же су́ща вся́ческих зде́шних преесте́ственне лише́нием/ и отринове́нным Богосло́вием богосло́вил еси́,/ всех су́щих удале́н чу́вственных и мы́сленных,/ да́же себе́ сама́го,/ и, во еди́нем Бо́зе пребыва́я,/ Его́же моли́ спасти́ся па́мять твою́ почита́ющим.
И ны́не, Богоро́дичен, глас то́йже:
Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.
На стихо́вне стихи́ры, глас 5.
Подо́бен: Ра́дуйся:
Ра́дуйся, Богосве́тлый уме́ Богосло́вия,/ пра́вило верне́йшее,/ Тро́ицы уразуме́вый до́бре степе́ни и ме́ры,/ втору́ю и пе́рвую Божества́:/ Оте́ц бо – вина́ Сы́на, но не пе́рвейший,/ Сын же – па́ки от Отца́, но не вторы́й,/ Единосу́щна бо Тро́ица и Сопресто́льна,/ Несказа́нна, Непостижи́ма, Собезнача́льна,/ Неразде́льна и Соприсносу́щна вся –/ Оте́ц, Сын и Дух Святы́й,/ Ю́же ны́не моли́ душа́м на́шим пода́ти ве́лию ми́лость.
Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.
Ра́дуйся, свяще́нный кни́жниче/ высо́каго Богосло́вия Ду́ха,/ сокро́вищнице виде́ний та́инственных Бо́га,/ язы́че Це́ркве сладкоглаго́ливый,/ уве́девый та́инства хище́ния несказа́нность,/ долгото́ и широто́, глубино́ и высото́ ве́дения,/ свя́тости печа́ть неудобоподража́емая,/ извая́ние благода́ти,/ о́бразе Христо́в одушевле́нный,/ Пе́рваго Све́та сия́ние,/ се́мене гро́ма порожде́ние,/ Христа́ моли́ пода́ти душа́м на́шим ве́лию ми́лость.
Стих: Уста́ пра́веднаго ка́плют прему́дрость,/ устне́ же муже́й пра́ведных источа́ют благода́ти.
Ра́дуйся, по́стников добро́то,/ иере́ев пресла́вная похвало́,/ благода́тей Боже́ственных до́ме,/ доброде́телей сокро́вище,/ сугу́быя любве́ жили́ще,/ кро́тости селе́ние,/ моли́твы де́ятелище, виде́ния и дея́ния хра́ме,/ смире́ния кра́сное приста́нище,/ свети́льниче разсужде́ния,/ звездо́ прозре́ния и предви́дения ве́лия,/ со́лнце, озаря́ющее концы́ земли́./ Христа́ моли́ душа́м на́шим пода́ти ве́лию ми́лость.
Сла́ва, глас 8:
Прииди́те, вся мно́жества ве́рных,/ в па́мять Богосло́ва Симео́на соше́дшеся,/ благода́рственное хвале́ние и сла́ву Бо́гу принесе́м, глаго́люще:/ сла́ва е́же о нас человеколю́бию Твоему́, душелю́бче Го́споди,/ я́ко Симео́на, раба́ Твоего́, бога́тыми дарова́ньми украси́в,/ и Боже́ственным Твои́м Све́том озари́в,/ и Но́ваго Богосло́ва поста́вив,/ дарова́л еси́ нам я́ко свети́льника в просвеще́ние помраче́нных,/ и наста́вника заблу́ждших,/ и пе́стуна мона́шествующих, и жа́ло неради́вых,/ и́мже науча́емся иска́ти при́сно у́мным обраще́нием себе́,/ разу́мно стяжа́ти благода́ть Свята́го Ду́ха/ и обруче́ние отту́ду прия́ти/ соверше́ннаго на Небесе́х наслажде́ния,/ его́же и нас сподо́би, Бо́же,/ вели́кия ра́ди Твоея́ ми́лости.
И ны́не, Богоро́дичен.
На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды.
Тропа́рь, глас 3.
Подо́бен: Боже́ственныя ве́ры:
Боже́ственное озаре́ние, Симео́не о́тче,/ восприя́в в души́ твое́й,/ свети́ло в ми́ре показа́лся еси́ светле́йшее,/ разгоня́я того́ мракобе́сие/ и всех уверя́я иска́ти, ю́же погуби́ша, благода́ть Ду́ха,/ Его́же приле́жно моли́/ дарова́ти нам ве́лию ми́лость.
Ин тропа́рь, новососта́вленный, глас 1.
Подо́бен: Ка́мени запеча́тану:
Вне́шния му́дрости пребыва́я неприча́стен,/ Боже́ственныя же преиспо́лнен был еси́ последи́/ и Но́вый Богосло́в вои́стинну все́ми позна́ся, Симео́не./ Сего́ ра́ди твою́ па́мять, о́тче му́дре, почита́юще, тебе́ вопие́м:/ сла́ва тя просла́вльшему Христу́,/ сла́ва тя ди́вна Показа́вшему,/ сла́ва Де́йствующему тобо́ю всем исцеле́ния.
НА У́ТРЕНИ
На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1.
Подо́бен: Гроб Твой, Спа́се:
Па́мять твоя́, му́дре Симео́не,/ соверша́ема до́бре от нас, лю́бящих тя чад твои́х,/ ум наш озари́, и се́рдце к вя́щшей любви́ Богодухнове́нных слове́с твои́х воздви́гла есть,/ и согре́ к соверше́нству, ему́же науча́еши те́ми я́сно.
Сла́ва, глас и подо́бен то́йже:
Се яви́ся нам Богосло́ва Но́ваго благознамени́тая и честна́я па́мять,/ в не́йже помина́ющи его́ святы́ню,/ велича́ется от ве́рных празднолю́бцев и пропове́дуется в Це́ркви,/ я́ко су́щи всем спаси́тельна.
И ны́не, Богоро́дичен:
Де́ва вои́стинну пре́жде рождества́, Де́во!/ Де́ва вои́стинну в рождестве́, Де́во!/ Присноде́ва по рождестве́ пребыва́еши, Де́во!/ Те́мже молю́ся:/ я́коже кня́зь де́вственных,/ де́вствовати мя умо́м, душе́ю же и те́лом, Де́во, укрепи́.
По 2-м стихосло́вии седа́лен, глас 4.
Подо́бен: Удиви́тся Ио́сиф:
Удивля́ет всяк ум бы́вшее в тебе́, Богосло́ве Симео́не, чу́до,/ ты бо ви́ден был еси́ над земле́ю, внегда́ моли́тися, о́тче,/ четыре́х локте́й стоя́, му́дре,/ я́коже не́кий безпло́тный, взе́мшийся иногда́, я́коже а́нгел Бо́жий,/ нося́й еще́ земно́е и до́лу тяготе́ющее те́ло./ О, каковы́я сла́вы сподо́бился еси́, всеблаже́нне.
Сла́ва, глас и подо́бен то́йже:
Богосло́ве, зри́телю Небе́сных благи́х,/ пе́вче Трисве́тлаго Еди́наго Божества́,/ и ны́не сла́вим тя, сла́вы сподо́бльшагося от Отца́, Сы́на и Ду́ха,/ дом и храм Боже́ственный бы́вши Пресвяты́я, преподо́бне, Тро́ицы,/ таи́нниче Тоя́ и побо́рниче./ Ра́дуйся у́бо, похвало́ преподо́бных, Симео́не богосла́вне.
И ны́не, Богоро́дичен:
Неискусобра́чная Чи́стая,/ ка́ко восприе́млеши во утро́бе Содержа́щаго руко́ю дыха́ние вся́ческих?/ Пове́ждь нам сло́во та́инства Твоего́. –/ Всеи́стинно есть сие́, о челове́че,/ и преста́ни, испыту́я неудобозри́мую высоту́, и глубину́, и долготу́, и широту́/ неизрече́ннаго рождества́ Моего́!/ Побежда́ет бо вои́стинну ум всяк челове́ч же и а́нгельский.
По полиеле́и седа́лен, глас 8.
Подо́бен: Прему́дрости и Сло́во:
Доброде́телей луг обше́д, Симео́не, и ища́ Писа́ний Ду́ха цве́ты добре́йшия,/ от ни́хже собра́л еси́ пра́вду пчелы́ му́дрыя же и трудолю́бныя, о́тче,/ и, я́коже сот, дея́ние стяжа́л еси́ разу́мно,/ я́коже некта́рным и сладча́йшим ме́дом, всеблаже́нне,/ обогати́лся еси́ зре́нием де́ятельным, Боговиде́ния вино́вным./ Моли́ся Христу́ Бо́гу прегреше́ний оставле́ние дарова́ти нам,/ любо́вию чту́щим святу́ю па́мять твою́.
Сла́ва, глас и подо́бен то́йже:
Списа́ний твои́х кни́га, о́тче му́дре, врачева́ние есть духо́вное,/ дре́во жи́зни нетле́нное, некта́р безсме́ртия,/ еле́й и мед, от ка́мене происте́кший,/ аермо́нская роса́, сла́дости рай,/ изоби́лия рог, пе́сней пе́снь,/ сокро́вищнице му́дрости и ве́дения./ Сего́ ра́ди вопие́м ти:/ да́руй нам мы́сленно, Богосло́ве, сих сво́йства,/ любо́вию чту́щим сея́ чте́ния.
И ны́не, Богоро́дичен:
Солнцезра́чная колесни́це Дави́да,/ порфиропостла́нный одр Соломо́на,/ сви́ток Богоначерта́нный Иса́ии,/ и одушевле́нная ски́ния Моисе́я,/ и стена́ адама́нтова Амо́са Ты еси́,/ свети́льник златокова́нный,/ дще́рь Заха́рии, Дании́ла же гора́,/ скрижа́ль чернобе́лая Авваку́ма и наро́читый проро́ков глас./ Моли́ся Сы́ну Твоему́ и Бо́гу прегреше́ний оставле́ние дарова́ти/ покланя́ющимся ве́рою, Де́во, рождеству́ Твоему́.
Та́же степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Ле́тнюю па́мять твою́ дне́сь,/ Богосло́ве Симео́не, пра́зднуем,/ ты бо о́гнь, его́же прии́де Христо́с воврещи́ на зе́млю,/ в се́рдце твое́м восприи́м,/ пре́жде скуде́льный сосу́д,/ о́гнен ве́сь яви́лся еси́,/ я́коже разжже́нное желе́зо./ Те́мже и тя́жкая те́ла твоего́ дебе́лость/ прекова́ся Боже́ственным огне́м в легча́йшую и Боже́ственнейшую,/ по Боже́ственном же огни́ ле́гкаго дунове́ния/ ум твой Боже́ственнаго просвеще́ния сподо́блен,/ совоку́пленному те́лу твоему́ мно́гая предаде́ добро́ты зна́мения,/ сего́ ра́ди и священноде́йствующу ти Бо́гу 28,/ я́коже со́лнце, показа́лся еси́ зря́щим./ О, чудесе́, ко́их дарова́ний сподобля́ется/ бре́нное сме́ртных естество́/ благода́тию Христа́, спаса́ющаго ду́ши на́ша.
Кано́н Богоро́дице с ирмосами на 6 и свято́му два кано́на на 8. Кано́н пе́рвый, его́же краегране́сие: Симео́на прославля́ю Богосло́ва. Глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Ду́ха орга́н показа́вся, свяще́ннейше Симео́не,/ и благода́ти гу́сли доброгласныя,/ и мене́ соде́лай благода́ти гу́сли,/ я́ко да твоя́ благода́ти воспою́ в благода́ти.
Ум всесве́тлый Богосло́вия яви́ся,/ гром Небе́сный дне́сь огласи́ громогла́сная поуче́ния прему́дрости./ Просвети́теся, вси, и внемли́те.
Разуме́ти кто мо́жет твоего́ Боже́ственнаго ве́дения, прему́дре,/ высоту́ неудобовосходи́мую, глубину́ неизсле́диму,/ неудобозри́мую широту́ и долготу́ вку́пе,/ его́же сподо́бился еси́, Богови́днейше?
Богоро́дичен: Оде́ждо нарече́нная ца́рская вопло́щшагося Бо́га Сло́ва, Пречи́стая,/ Богоукраше́нную, ю́же погуби́х, оде́жду благода́ти Боже́ственныя/ па́ки ми оде́й хода́тайством Твои́м.
Ин кано́н, без краегране́сия, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Тро́ице Свята́я и Еди́нице Присносу́щная,/ Светотво́рный Исто́чниче, от Него́же вся́ко дая́ние бла́го низхо́дит,/ просвети́ се́рдце мое́, я́ко да воспою́ досто́йно/ пра́во о Тебе́ учи́вша и богосло́вивша добре́йше.
Вся глубины́ Свята́го Ду́ха в Боже́ственном Ду́се испыта́в, о́тче,/ си́ми потопле́н не был еси́, присносла́вне,/ но, обре́т би́серы многоце́нныя, изве́л еси́ Богосло́вия догма́ты.
Зерца́ло, о́тче, пресве́тлое новоочище́нное соде́лав ум и се́рдце,/ бога́тно ты восприя́л еси́ мо́лнии Ду́ха и блаже́н яви́ся,/ Бо́га бо в се́рдце твое́м узре́л еси́, я́коже сам пове́даеши.
Богоро́дичен: Ты яви́лася еси́, Де́во, о́браз Богоизвая́нный,/ украше́ние тва́ри, чу́до А́нгелов,/ подо́бие изнача́льныя добро́ты, всесли́чное29 вещество́ Сло́ва воплоще́ния и Бо́га неподража́емое подража́ние.
Катава́сия по уста́ву.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Был еси́ храм освяще́н Бо́жий,/ я́коже же́ртву чи́сту, ум Твой име́я, свя́те,/ моли́тву – я́ко жертвоприноше́ние же/ и я́ко же́ртвенник – пра́вейшее се́рдце твое́.
Моисе́я, спребыва́юща Бо́гу, я́коже дре́вле просла́вися лице́,/ та́ко, о́тче, и твое́ лице́, в неприступных пребыва́ющу ти,/ Боже́ственным Све́том просла́вися, всесве́тлое, я́коже со́лнце.
Яви́ся во времена́ после́дняя кни́га твоя́, о́тче Симео́не,/ ле́ствица, нас возводя́щая от земли́ к Небе́сным,/ и звон свяще́ннейший, спя́щих возставля́ющий.
Богоро́дичен: Я́коже мир, в ми́ре яви́лася еси́ в ма́лом, Превелича́йшая Де́во,/ от не су́щих бо вся́ческая в ми́ре Созда́вый,/ ми́ру Невмести́м, Тебе́ ве́сь вмести́м бы́сть.
Ин
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Ле́ствица показа́лся еси́ ты пе́сненная, прему́дре, кни́гою твое́ю вопия́/ и воззва́ние Боже́ственныя благода́ти сла́дкое,/ я́ко ве́сну, явля́я, ю́же по креще́нии,– увы́! – погуби́хом.
Тебе́ распя́ся мир, о Симео́не преподо́бне, дея́нием,/ и ты, о́тче, ми́ру распя́лся еси́ му́дре умо́м,/ сугу́бое бо креста́ есть дея́ние, я́коже отцы́ глаго́лют сие́ преподо́бнии.
С лучи́ Боже́ственными обща́яся, преподо́бне,/ и́миже естество́м прихо́дит тебе́ вся́ческих открове́ние,/ да́льняя зре́л еси́, я́коже зде су́ща, треблаже́нне,/ и, я́коже настоя́ща,– последи́ иму́щая бы́ти.
Богоро́дичен: Я́коже коры́сть и сокро́вище обреты́й весели́тся,/ си́це обре́тше и аз, Де́во, Твое́ Боже́ственное и́мя/ и о́браз Твой, я́коже многоце́нное бога́тство,/ ра́дуюся, имену́я Тя и целу́я.
Седа́лен, глас 4.
Подо́бен: Вознесы́йся на Крест:
Мона́шествующих пра́вило и украси́тель,/ по́стников наста́вник и общежи́тельных детоводи́тель/ и всех наслажде́ние показа́лся еси́, свяще́ннейше Симео́не Богосло́ве,/ те́мже и ны́не моли́ся со дерзнове́нием Зижди́телю о нас,/ ве́рою и любо́вию чту́щих па́мять твою́, преподо́бне.
Сла́ва, глас и подо́бен то́йже:
От Богоно́сных еди́н и и́стинен явля́яся,/ от богосло́вов же тре́тий сый/ и от преподо́бных еди́н и ве́лий ты бы́сть/ ме́рностию, любо́вию соверше́нною, Симео́не Богому́дре, и чистото́ю вся́ческою,/ и си́ми вся́ческими доброде́тельми, и́миже возвы́сился еси́ ко Го́споду, преподо́бне.
И ны́не, Богоро́дичен:
Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л доны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.
Песнь 4
Ирмо́с: Неизсле́дный Бо́жий сове́т 30 ,/ е́же от Де́вы воплоще́ния/ Тебе́, Вы́шняго, проро́к Авваку́м усмотря́я, зовя́ше:/ сла́ва си́ле Твое́й, Го́споди.
Зако́ном Влады́ки повину́яся, му́дре, за́поведи вся испо́лнил еси́,/ в ни́хже обре́л еси́ сокры́та Христа́, сия́ запове́давша,/ и Его́ благода́тию обогати́лся еси́.
Язы́к, вити́йствующий ри́торскими хи́тростьми и смышле́ньми,/ не мо́жет просла́вити дарова́ния твоя́,/ я́же па́че естества́ прия́л еси́, о́тче Симео́не Богопросла́вленне.
Обре́л еси́ неудо́бь обрета́емое дре́вле и ны́не бога́тство, Симео́не Богопросла́вленне,/ е́же обожи́тися и восхи́титися уму́ твоему́ от земли́ к Небе́сным./ О, стра́ннаго слы́шания!
Богоро́дичен: Словесе́м Твои́м после́дующе, Пречи́стая,/ вси ро́ди, ублажа́ем Тя, я́ко ро́ждшую Блаже́ннаго Бо́га,/ блаже́нны показа́вшего умы́ и челове́ки Боже́ственною благода́тию.
Ин
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Ты, обре́т Со́лнце ино́е, мы́сленное, в се́рдце и пу́ть соде́яв све́том Его́,/ дости́гл еси́, му́дре, Ду́ха си́лою гор преми́рных,/ и слы́шал, и ви́дел еси́,/ я́же не ле́ть су́ть слы́шати и ви́дети стра́стному коему́ челове́ку.
Иису́с тебе́ Еди́н бя́ше при́сно попече́ние,/ пи́ща языка́, се́рдца поуче́ние, дыха́ние, живо́т,/ Свет и сла́дость сладча́йшая,/ теплота́, просвеща́ющая помышле́ние, веселя́щая се́рдце,/ попаля́ющая стра́сти и слез источа́юща то́ки.
Что ми зла́то, что ми ка́мень сапфи́р,/ что ми ина́го живота́ вожделе́ние?/ Мне пи́ща, сла́ва и весе́лие Богодухнове́нная твоя́ су́ть списа́ния, о́тче,/ в ни́хже наслажда́юся и, сия́я, источа́ю от оче́с сладча́йшия сле́зы.
Богоро́дичен: О Мариа́м, мировожделе́нное и́мя!/ Ты, Де́во, посреде́ Бо́га стои́ши и челове́ков,/ и у́бо Бо́га соде́лала еси́ Челове́ка, челове́ки же – бо́ги благода́тию./ Благодари́м, Де́во, посре́дство Твое́ сие́, и́мже ве́сь мир спасла́ еси́.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й,/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.
Любве́ горя́ огне́м в се́рдце твое́м,/ ве́сь во изступле́нии был еси́/ и Бо́гу еди́ному всему́, возлю́бленному от Тебе́, сраствори́лся еси́,/ я́коже еди́н дух бы́ти с Ним, свяще́ннейше.
Се ны́не возсия́ Свет Боже́ственныя благода́ти!/ Се безсме́ртие ма́нны живо́тныя всем предлага́ется Симео́н, Боже́ственный оте́ц!/ Прииди́те и наслади́теся, живота́ жа́ждущии.
Ри́торов красне́йший показа́вся ду́хом,/ я́же о Бо́зе и Боже́ственнем словеса́ боголе́пнейше богосло́вствовал еси́ нам,/ те́мже но́вый нарече́ся Богосло́в, тезоимени́те.
Богоро́дичен: О Ма́ти всесве́тлая Све́та Пе́рваго,/ просвети́ ду́шу несве́тлую све́том Твои́м,/ я́ко да Свет ви́жду па́ки Перве́йший,/ И́же из Тебе́ озари́ нас и Тя просвети́вший,/ Сей бо от Све́та то́йжде.
Ин
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
О, мно́гаго дерзнове́ния, и́мже ко Влады́це всех обогати́лся еси́,/ ты бо, я́коже дру́гу, собесе́довал еси́ Ему́ в се́рдце твое́м/ и, я́коже отце́м ча́до обнима́емое, возглаша́л еси́:/ Иису́се, Иису́се мой сладча́йший!
Бо́жия быв уста́, я́коже Бо́жии словеса́ глаго́ля, блаже́нне,/ ты бо Богодухнове́нными уче́ньми твои́ми и словесы́/ изве́л еси́ от недосто́йных мно́жество честны́х/ и досто́йны Небе́снаго Ца́рствия яви́л еси́.
Ка́ко изреку́ ве́лие на тебе́ бы́вшее чу́до благода́ти?/ Ты бо свет сый, Свет зря и Све́ту совокупля́яся,/ во све́те и глаго́леши, и му́дрствуеши, и составля́еши списа́ния твоя́ светообра́зная.
Богоро́дичен: И́маши, Влады́чице ми́ра, и́маши во́лею Твое́ю си́лу сопу́тствующую,/ я́ко еди́на ро́ждшая всеси́льнаго Сло́ва и Го́спода./ Те́мже, а́ще то́кмо восхоте́ла ми еси́ спасти́ся,/ легко́ аз, Де́во, спасу́ся.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Реку́ приснотеку́щую Боже́ственныя благода́ти,/ от мы́сленнаго Еде́ма истека́ющую,/ прииди́те, в пе́снех почти́м и живота́ струя́ми ея́ наслади́мся.
Покая́ния учи́тель, пропове́дник просвеще́ния благода́ти,/ свяще́ннейший ны́не Симео́н ублажа́ется,/ пожи́вший в ми́ре сем житие́м равноа́нгельским.
Победи́в кре́постию Ду́ха, и труды́ воздержа́ния, и слеза́ми,/ Симео́не преподо́бне, стра́сти душе́вныя же и теле́сныя,/ к безстра́стию кра́йнему дости́гл еси́.
Богоро́дичен: Бо́га безсе́менно зачала́ еси́, Де́во,/ и нетру́дно носи́ла еси́ во утро́бе Твое́й,/ нетле́нно же Сего́ родила́ еси́./ О, трегу́баго чудесе́!/ Кто не ужасне́тся!
Ин
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Ду́ха Боже́ственную благода́ть, преподо́бне о́тче, в се́рдце, я́ко исто́чник, стяжа́в,/ и воды́ живы́я Богому́дрия пото́ки источи́л еси́,/ и бразды́ душе́вныя, жа́ждею истоще́нныя, напои́л еси́.
Даде́ся ти и чуде́с си́ла, и исцеле́ний благода́ть, о о́тче,/ я́ко да ничи́мже ме́ньше бу́деши святы́х,/ те́мже, и живы́й, и уме́рый, твори́л еси́ чудеса́ мно́га, му́дре,/ и исцеле́ния си́лою Ду́ха.
Удивля́хуся лю́дие, слу́шающе му́дрость слове́с твои́х,/ и, я́коже иногда́ иуде́е вопия́ху о Христе́,/ си́це си́и, о́тче, взыва́ху:/ благода́ть слове́с мно́гая и му́дрость ему́ отку́ду даде́ся?
Богоро́дичен: Ру́це Твои́ и сосцы́, о Влады́чице, Сы́ну Твоему́ хода́тайствующи, яви́,/ совокупи́ с Твои́ми, Де́во, страда́ньми О́наго крест, и копие́, и я́звы, и тро́сть,/ и та́ко уми́лостиви Его́ к нам, мно́го согреши́вшим.
Конда́к, глас 3.
Подо́бен: Де́ва дне́сь:
Све́том просвеще́н Трисо́лнечным, Богому́дре,/ Богосло́в яви́лся еси́ Пребоже́ственныя Тро́ицы./ Свы́ше прему́дростию слове́с обогати́вся,/ источи́л еси́ Богому́дрия Боже́ственныя струи́,/ от ни́хже пию́ще, вопие́м:/ ра́дуйся, треблаже́нне Симео́не Богонауче́нне.
И́кос:
Пресвяты́й Дух, И́же пре́жде ры́бари некни́жныя умудри́/ и ри́торы и Богосло́вы их показа́,/ Той и в после́дняя времена́, в чи́стей твое́й душе́ всели́вся, Симео́не святе́йший,/ ри́тора ри́торов и Богосло́ва тя прему́дра из некни́жнаго и нему́драго соде́ла,/ добропи́шуща и ди́вно излага́юща догма́ты пресуще́ственнаго Богосло́вия/ и та́инства Боже́ственнаго Све́та/ и я́же в души́ та́йно быва́ющая разли́чная де́йства Боже́ственныя благода́ти Свята́го Ду́ха,/ и́хже и мы чте́ния наслажда́ющеся, тя ублажа́ем, достоблаже́ннейше о́тче,/ я́ко преесте́ственна и Небе́сна челове́ка,/ и, святы́й пра́здник твой любо́вию соверша́юще, согла́сно вопие́м:/ ра́дуйся, треблаже́нне Симео́не преподо́бне.
И чте́тся месяцесло́в дня, си́речь 12 октября́. Та́же глаго́лем: В то́йже ме́сяц двенадцатаго числа́ па́мять пра́зднуем преподо́бнаго и Богоно́снаго отца́ на́шего Симео́на, Но́ваго Богосло́ва, пренесенную с 12 ма́рта, егда́ он преста́вися к Бо́гу, поели́ку сия́ па́мять совпадает с Вели́кой Четыредесятницей.
Стихи́:
Пре́жде име́л еси́ язы́к вме́сто кни́ги, вме́сто же язы́ка и́маши ны́не кни́гу.
Восхо́диши на двоюнадеся́тое Не́бо зве́здное, Симео́не!
Того́ святы́ми моли́твами, Христе́ Бо́же наш, поми́луй и спаси́ нас. Ами́нь.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Излия́ся благода́ть во устне́ твои́ бога́тая свы́ше, о свяще́нне Симео́не,/ и полнота́ се́рдца даде́ся ти, я́ко песо́к морски́й,/ от тя Умудри́вшаго, я́коже иногда́ Соломо́ну.
Многосве́тлое и всезлато́е благода́ти и сия́нное со́лнце Це́ркве Христо́вы,/ честну́ю проходя́щее всю тве́рдь и тре́звости сия́ющее блиста́ньми,/ Симео́н да похва́лится!
Слове́снейший слове́сных, Богонауче́нный и духоно́сный,/ ты Богосло́в Христо́в показа́лся еси́ конце́м земли́, Симео́не преподо́бне,/ напе́рсный вторы́й и Григо́рий, огнедухнове́нный Богосло́в.
Богоро́дичен: Огнеобра́зный престо́ле и пла́меннейшее Христа́ Всецаря́ высо́кое не́бо,/ от вся́кия стра́сти ни́зменныя мя свободи́/ и бре́ннаго обстоя́ния, Присноде́во Мари́е!
Ин
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Не памятозло́бив показа́лся еси́, христоподража́телен ве́сь и тиша́йший,/ враги́ бо, о́тче, и́же тя уби́ти иска́ху, благоде́тельствовал еси́ всегда́,/ до́ндеже их дарми́ дру́ги себе́ соде́лал еси́.
Ты, ключе́м обогати́вся, Писа́ний Ду́ха благода́тию, преподо́бне,/ егда́ восхоте́л еси́, о́тче, отве́рзл еси́ нетру́дно/ и сло́вом показа́л еси́ сокро́вище Писа́ний утае́нное.
Ты, очи́стив те́ло от страсте́й, треблаже́нне,/ ду́шу же свободи́в сладостра́стия и ум от пристра́стия,/ мертв был еси́ те́лом и пре́жде сме́рти плотски́я ду́хом воскреси́л еси́.
Богоро́дичен: Боже́ственных сия́ний неистощи́мый исто́чник Ты, Де́во, была́ еси́,/ глуби́н сокрове́нных и непостижи́мости Бо́жия явле́ние/ и избра́нное Бо́гом пре́жде век наме́рение.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Яви́лся еси́ мы́сленный, всеблаже́нне, рай, во Еде́ме Богонасажде́нный,/ име́я посреде́ тебе́, я́ко дре́во жи́зни, цвету́щее сладкопло́дное, Христа́ прозя́бшаго, преподо́бне,/ о́крест же, я́ко древеса́, крася́щаяся плода́ми же и листа́ми,–доброде́тели вся́ческия.
Уподо́бился еси́ купцу́, о не́мже рече́ Христо́с, Симео́не преподо́бне,/ ты бо, я́же стяжа́л еси́, вся прода́л еси́/ и би́сер прия́л еси́ многоце́нный, его́же сокры́л еси́ вну́трь се́рдца,/ и возвесели́лся еси́ о сем неизрече́нно.
Но́вое не́бо узре́ся, о́тче,/ Го́спода, я́коже со́лнце превели́кое, све́тлое и златоза́рнейшее име́я в пе́рсех твои́х,/ и, я́коже луну́ всесве́тлую, среброблиста́ющую, благода́ть Ду́ха стяжа́в,/ и, я́коже све́тлыя зве́зды, честна́я списа́ния твоя́.
Богоро́дичен: Свята́го Святы́х я́ко ро́ждши, во святы́х при́сно Почива́юща,/ и я́ко еди́на воздви́гшая побе́ду на враги́ неви́димыя, Пречи́стая,/ ум соблю́дшая па́че смы́сла неразу́мнаго,/ нарица́ешися от всех пра́ведно Пресвята́я.
Ин
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Жела́ния Боже́ственная име́л еси́ в се́рдце твое́м, свя́те,/ я́же су́ть Бо́га Свет неизрече́нный,/ отону́дуже Богоприя́тен и обоже́н ве́сь был еси́,/ ве́сь пребыва́я в Возлю́бленном от Тебе́,/ и страстьми́ стражда́ Боже́ственныя одержи́мости и изступле́ния,/ и стиха́ми пе́сни любве́ спису́я.
Тро́йчески узре́л еси́ Тро́ицу несозда́нную –/ Ум, Сло́во и Дух – умо́м, сло́вом и ду́хом,/ Еди́ницу же а́бие едини́чне воспе́л еси́,/ соедини́в воеди́но ум твой, сло́во и дух,/ и естество́м был еси́ по о́бразу Бо́жию,/ хоте́нием же показа́лся еси́ по подо́бию, о́тче.
Глубины́ смире́ния дости́гл еси́, приснопа́мятне,/ е́же Сам Дух сотвори́ во утро́бе твое́й,/ отту́ду сподо́бился еси́ на высоту́ соверше́нства взы́ти, му́дре, ели́ко возмо́жно челове́ком,/ и Ду́ха испо́лнитися дарова́ний разли́чных,/ и А́нгел яви́тися, я́ко безпло́тный, во пло́ти.
Богоро́дичен: Но́щь греха́ отвсю́ду обы́де мя, окая́ннаго,/ просвеще́ние бо бы́ти пи́щу непщева́х,/ отону́дуже измени́хся недо́брым измене́нием, к те́мным приходя́ дея́ниям./ Свет ро́ждшая, просвети́ мя, Де́во,/ и Боже́ственным измене́нием измени́ мя всего́.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Ра́дуйся ны́не ра́достию вои́стинну безконе́чною и неизрече́нною, Симео́не треблаже́нне,/ иде́же селе́ние ра́дости благода́тное,/ пла́кася бо зде вре́менне, на Небесе́х уте́шился еси́/ и весели́шися ве́чно ра́достным и блаже́нным весе́лием.
Зри́ши сла́дкаго Иису́са лице́м к лицу́,/ Его́же пре́жде зре́ти сподо́бился еси́, но зерца́лом в гада́нии./ Наслаждайся у́бо, свя́те, взыгра́й и лику́й, приобща́яся ны́не Возлю́бленнаго тобо́ю,/ и нас, почита́ющих тя, помина́й.
Приими́ песнь сию́, ю́же прино́сим, Симео́не преподо́бне,/ я́ко ме́ньший дар мно́гаго до́лга, его́же к тебе́ и́мамы,/ и награ́ду про́сим дарова́ти, Ду́ха благода́ть, и нам, моли́твами твои́ми,/ ю́же зло́бою мно́гою отврати́хом от себе́.
Богоро́дичен: Творе́ния и Созда́теля Посре́дница несре́дственне пребыла́ еси́, Чи́стая,/ те́мже и полноту́ всех благода́тей прие́млеши, Всенепоро́чная,/ и подае́ши всем челове́ком же и А́нгелом,/ отону́дуже пода́ждь сию́ и нам, Влады́чице, непотре́бным рабо́м Твои́м.
Ин
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Неве́сте Царя́ Христа́ – Це́ркви, му́дре, твоя́ словеса́ оста́вил еси́,/ я́ко неве́стину кра́сну и пе́стру ри́зу,/ я́ко златоби́серный вене́ц, и сосу́д, и ковче́г,/ я́ко ого́рлицы31 же, и гри́вны32, и пе́рстни, и ушеря́зи33.
Чин преступи́л еси́ ра́бский и нае́мников да́же превозше́л еси́/ и, я́коже сын отцу́, ны́не предстои́ши Христу́,/ и́скренний и и́стинный, зря́щий и зри́мый от Него́, обожа́емь несре́дственне,/ Христу́ сонасле́дник и насле́дник Бо́жий, свя́те.
Вем, я́ко не сме́ет язы́к восхвали́ти тя, Симео́не,/ бо́га по благода́ти су́ща./ Но па́ки вем, я́ко твое́ человеколю́бие прие́млет и еди́ное наме́рение души́./ Сего́ ра́ди приими́ моя́ сия́ пе́ния, треблаже́нне,/ я́коже оте́ц отроча́те косноязы́чия.
Богоро́дичен: Уте́шительницу предлага́ем к Бо́гу Тя, Де́во, раби́ Твои́ вси,/ те́мже, Чи́стая, моли́тву принеси́ Твоему́ Сы́ну, Отцу́ же и Ду́ху,/ Еди́ному всех Творцу́, Тро́ице Святе́й,/ я́ко да нас уще́дрит и спасе́т, всего́ ми́ра Спаси́тельнице.
Свети́лен, глас 2.
Подо́бен: Жены́, услы́шите:
Богосло́ва вси Симео́на благопохва́лим,/ мона́шествующих удобре́ние и свяще́нников сла́ву,/ Богосло́вов похвалу́ и ве́рных украше́ние,/ благода́ти трубу́ и Це́ркве Христо́вы живоно́сное свети́ло.
Сла́ва, глас то́йже.
Подо́бен: Со ученики́ взы́дем:
Чу́вственное у́бо со́лнце, зау́тро восходя́ще, просвеща́ет мир ве́сь,/ дости́гше же за́пада, оба́че своя́ скрыва́ет лучи́./ Ты же, преподо́бне о́тче, со́лнце яви́лся еси́ незаходи́мое,/ в нощи́ и во дни свяще́нными словесы́ твои́ми просвеща́я ве́сь мир,/ те́мже со́лнца был еси́ чу́вственнаго вельми́ лу́чший.
И ны́не, Богоро́дичен:
По Бо́зе, Пренепоро́чная, Ты Бог показа́лася еси́,/ Втори́чная иму́щи Святы́я Тро́ицы,/ ве́ры нача́ло пе́рвое и наде́жды основа́ние,/ утвержде́ние дея́ния и олта́рь Богозре́ния,/ краестро́чие проро́ков всех и Писа́ний скрижа́ль,/ небесе́ и земли́ зна́мение и стихи́я ми́ра.
На хвали́тех стихи́ры на 4, глас 1.
Подо́бен: Небе́сных чино́в;
Прииди́те, ве́рных ли́цы,/ торжеству́им Но́ваго Симео́на Богосло́ва па́мять/ и сего́ о́бразу свяще́нному благоче́стно поклони́мся,/ первоо́бразу воздаю́ще чрез него́ че́сть и поклоне́ние.
Блаже́нных наро́ди ны́не свеселя́тся/ ду́ху твоему́, о́тче, невеще́ственному на Небеси́,/ мы же, твои́ раби́,/ свяще́нная твоя́ списа́ния иму́ще и пользуя их,/ душе́вно на земли́ весели́мся.
Тро́ичность души́ твоея́ очи́стив, преподо́бне,/ от скве́рны вся́кия доброде́телей тро́ицею –/ поще́нием, и любо́вию, и моли́твою –/ Тро́ицы был еси́ Пребоже́ственныя храм свяще́нный,/ Симео́не, о́тче приснопа́мятне.
Светонача́льныя Тро́ицы ны́не облиста́емь бога́тными луча́ми,/ Симео́не Богосло́ве,/ моли́ся непреста́нно о нас,/ ве́рою чту́щих тя/ и святу́ю твою́ па́мять ра́достно соверша́ющих, всехва́льне.
Сла́ва, глас 8:
Кто возглаго́лет широту́ любве́,/ ю́же к бли́жнему име́л еси́, Симео́не святе́йший?/ Ты бо, не то́кмо живы́й,/ словесы́ и де́лы ко двору́ Небе́сному наставля́л еси́ ста́до Христо́во,/ но и по сме́рти, я́коже оте́ц любе́зный,/ в сосцы́ возрасти́тельныя и в кре́пкую пи́щу/ Богому́друю твою́ кни́гу нам пре́дал еси́,/ е́юже пита́еши в му́жа соверше́нна/ и в ме́ру во́зраста Христо́ва возво́димся./ Вои́стинну удобри́шися пе́сненно се́рдце и уста́ твоя́/ от вина́ ди́внаго обоже́ния,/ его́же и нас улучи́ти сподо́би/ ко Го́споду моли́твами твои́ми.
И ны́не, Богоро́дичен:
Влады́чице, приими́ моли́твы раб Твои́х,/ и изба́ви нас/ от вся́кия ну́жды и печа́ли.
Славосло́вие вели́кое и отпу́ст. И быва́ет пома́зание бра́тии еле́ем от лампа́ды преподо́бнаго.
Стихи́ры на целова́ние, глас 5:
Прииди́те, Тро́ицы рачи́теля/ и вели́каго в преподо́бных служи́теля Христо́ва,/ мона́шествующих похвалу́ и по́стников сла́ву -/ Но́ваго Богосло́ва пе́сньми почти́м.
Богоблагода́тнаго Симео́на любо́вию восхва́лим,/ ту́не просвеща́ющаго/ и́же с благогове́нием и внима́нием велича́йшим/ Боже́ственную его́ кни́гу чту́щих.
В Боже́ственном дому́ твое́м и хра́ме/ ны́не соше́дшеся,/ тебе́ припаде́м благогове́йно,/ просвеще́ния прося́ще и грехо́в разреше́ния,/ Симео́не, моли́твами твои́ми, я́же ко Го́споду.
НА ЛИТУРГИ́И
Блаже́нны от кано́нов преподо́бнаго, песнь 3-я пе́рваго кано́на и песнь 6-я втора́го кано́на. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Уста́ пра́веднаго поуча́тся прему́дрости, и язы́к его́ возглаго́лет суд. Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:
* * *
Примечание Преосвященного Парфения, епископа Левкийского.
Не смуща́йся, челове́че, ча́стым отождествле́нием святости с обожением преподобным Никодимом Святогорцем, автором сего Богослужебного последования, да и самим преподобным Симеоном, Новым Богословом, но смотри в православной Минеи следующие тексты:
4 ма́рта, преподо́бнаго Гера́сима Иорданскаго, седа́лен по́сле 3-й пе́сни кано́на: «положе́нием бог был еси́».
8 июля, великому́ченика Прокопия. Сла́ва стихи́р стихо́вных на вече́рне: «положе́нием бог был еси́, обожа́емь прича́стием».
6 а́вгуста, Преображе́ние Госпо́дне, 2-го кано́на 9-я пе́снь, тропа́рь 1: «Да Твое́ пока́жеши я́ве неизрече́нное второ́е сни́тие, я́ко да вы́шний Бог яви́шися, посреде́ стоя́ бого́в апо́стол на Фаво́ре».
4 сентября, проро́ка Моисе́я, 4-я стихи́ра на Го́споди, воззва́х: «и е́же обожи́тися над фарао́ном, я́ко бог, обе́том и благода́тию стяжа́в».
20 ноября́, преподо́бнаго Григо́рия Декаполи́та, на у́трени свети́лен: «Святы́ни храм был еси́, иера́рше, по Боже́ственному же прича́стию ны́не бог быва́еши и рая́ граждани́н».
23 ноября́, святи́теля Амфило́хия Икони́йскаго, свети́лен: «бог положе́нием быв».
У святого Василия Великого есть мысль такая: «Я человек, но мне поставлена задача быть богом».
«Аз рех: бо́зи есте́, и сы́нове Вы́шняго вси» (Пс. 81, 6; Ин. 10, 34).
Все даты указаны по старому стилю.
