Служба преподобнаго Сильвестра, игумена Обнорскаго
ВЕ́ЧЕР
Блаже́н муж: 1-й антифо́н. На Го́споди, воззва́х: стихи́ры, глас 5:
Преподо́бне о́тче Сильве́стре,/ измла́да Христа́ возлюби́в,/ мир многомяте́жный оста́вил еси́/ и в пусты́ню всели́лся еси́,/ иде́же Го́споду во дни и в нощи́ порабо́тав,/ вене́ц сла́вы Небе́сныя стяжа́л еси́./ Те́мже, я́ко име́я дерзнове́ние ко Го́споду,/ моли́ спасти́ся душа́м на́шим.
Ди́внаго во отце́х Се́ргия благослове́ние восприи́м,/ я́ко опло́том огражде́н,/ в край полу́нощный прите́кл еси́,/ и ту бде́нием, поще́нием и моли́твою те́ло свое́ изнури́вый,/ я́ко звезда́ пресве́тлая, яви́лся еси́, преподо́бне,/ те́мже све́том благода́ти, я́же в тебе́,/ озари́ нас, моля́щихтися.
Я́коже во дни до́бляго жития́ твоего́/ ве́рнии в оби́тель честну́ю твою́,/ благогове́юще, притека́ху,/ си́це и ны́не мно́зи от край да́льних/ притека́ют поклони́тися моще́м твои́м,/ о́тче преподо́бне,/ мы, та́кожде о́чи серде́ц на́ших/ к тебе́ обраща́юще, те́пле мо́лимся:/ исцели́ неду́ги на́ша душе́вныя,/ вку́пе же и теле́сныя.
И́ны стихи́ры, глас 8:
Прииди́те, лю́дие,/ восхва́лим преподо́бнаго отца́,/ просла́вившаго чудесы́ мно́гими пусты́ню Обно́рскую/ и све́том дел свои́х озари́вшаго сердца́ ве́рных,/ его́же моли́твами ны́не та́кожде мно́зи,/ от тьмы́ грехо́вныя избавля́еми су́ще,/ приво́дятся к све́ту Богове́дения.
Поноше́ния и озлобле́ния, ра́дуяся, прия́л еси́/ в су́етном и многомяте́жном ми́ре сем,/ ны́не же водворя́ешися в Небе́сных черто́зех/ и с ли́ки святы́х, ра́дуяся,/ предстои́ши Творцу́ веко́в, Бо́гу на́шему,/ Того́ моли́ о душа́х на́ших.
Сло́во благода́ти, со́лию растворе́но,/ слы́шавше лю́дие,/ притека́вшии к тебе́ в пусты́ни умудре́ния ра́ди,/ умудри́ у́бо и нас, мо́лимся ти, преподо́бне,/ моли́твами твои́ми и де́йствием благода́ти, я́же в тебе́.
Вся тле́нная и су́етная ве́ка сего́ бла́га/ отри́нув в житии́,/ сподо́бился еси́ вене́ц нетле́ния прия́ти/ от руки́ Госпо́дни,/ его́же и нас да сподо́бит Госпо́дь/ моли́твы ра́ди твоея́, о́тче преподо́бне.
Сла́ва, глас 6:
Прииди́те, ве́рнии,/ восхва́лим просия́вшаго в пусты́ни Обно́рстей свети́льника/ и, припа́дше к многоцеле́бным моще́м его́, возопии́м:/ ра́дуйся, по́стников похвало́;/ ра́дуйся, неду́гующих врачу́;/ ра́дуйся, де́монския си́лы прогони́телю;/ ра́дуйся, всем ве́рующим ве́рное в беда́х/ приста́нище и заступле́ние.
И ны́не, Богоро́дичен: Кто Тебе́ не ублажи́т:
Вход, проки́мен дне и чте́ния 3 преподо́бническая.
Прему́дрости Соломо́ни чте́ние (глава 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их:/ и е́же от нас ше́ствие – сокруше́ние, они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шников, проста́влен бысть./ Восхище́н бысть, да не зло́ба измени́т ра́зум его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 5):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ры, глас 3:
По́двигом до́брым подвиза́лся еси́, блаже́нне,/ и житие́м благоче́стным о́браз был еси́ ста́ду твоему́,/ е́же му́дре упа́сл еси́,/ и, от пусты́ни исходя́ к лю́дем, и́щущим зре́ти тя,/ духо́вне бесе́довал еси́,/ да́руя коему́ждо мир и утеше́ние,/ Сильве́стре преподо́бне.
Сосу́д избра́н Ду́ху Свято́му/ от ю́ности яви́лся еси́, преподо́бне,/ егда́ бо житие́ по́стное провожда́л еси́,/ открове́ние свы́ше прия́л еси́,/ я́ко процвете́т пусты́ня твоя́/ и ста́до и́ноков прии́дет в ню;/ и свет неизрече́нный осиява́ше сокрове́нное селе́ние твое́,/ сла́ву доброде́телей твои́х возвеща́я,/ Сильве́стре блаже́нне.
Поще́нием и житие́м многотру́дным/ пло́ть твою́ умерщвля́я, преподо́бне,/ кла́дязь в пусты́ни ископа́л еси́,/ и́же, до дне́сь оби́льно источа́я струи́ водны́я,/ вку́пе источа́ет моли́твами твои́ми цельбу́ притека́ющим с ве́рою и упова́нием/ на по́мощь и заступле́ние твое́,/ Сильве́стре Богоно́сне.
Сла́ва, глас 2:
Ки́ими похва́льными венцы́/ увязе́м Сильве́стра вседо́бляго,/ и́же я́ко А́нгел земны́й/ и челове́к Небе́сный в пусты́ни поживе́?/ Ки́ими пе́сньми восхва́лим блаже́ннаго,/ и́же и в житии́ свое́м/ милосе́рдне лю́дем по́мощь благода́тную подая́ше,/ и по успе́нии свое́м, со А́нгелы ликовству́я,/ исцеле́ния к ра́це его́ притека́ющим неоску́дно да́рует?/ Припаде́м у́бо к нему́, бра́тие, моля́щеся,/ да испро́сит нам у Бо́га мир и ве́лию ми́лость.
И ны́не, Богоро́дичен.
На стихо́вне стихи́ры, глас 8:
Ве́ру те́плую имы́й/ в си́лу живоно́сну из ме́ртвых воста́вша Христа́,/ храм Воскресе́ния в пусты́ни Обно́рстей воздви́гл еси́,/ тем и си́лою Христа́, воскре́сшаго и ад попра́вшаго,/ бе́сы мно́гажды изгоня́л еси́,/ и от нас у́бо, мо́лим тя, преблаже́нне,/ отжени́ стра́сти душевре́дныя,/ от лука́ваго в ны вселя́емыя.
Стих: Честна́ пред Го́сподем/ сме́рть преподо́бных Его́.
Посто́м презе́льным/ вся́кое пло́ти мудрова́ние умерщвля́я/ и то́чию бы́лие тра́вное в сне́дь име́я,/ егда́, я́ко челове́к, изнемо́гл еси́, о́тче свяще́нне,/ по́мощь от Го́спода прии́де к тебе́:/ А́нгел бо Бо́жий, во о́бразе чу́днаго му́жа, явле́йся,/ укрепи́ тя и показа́,/ ка́ко си́ла Бо́жия в не́мощи соверша́ется./ Мы же, вы́ну не́мощни су́ще, мо́лим тя, преподо́бне:/ моли́ся ко Го́споду,/ да пода́ст мир и утвержде́ние душа́м на́шим.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ко Го́споду отходя́,/ глаго́лал еси́ бра́тии твое́й, преподо́бне:/ внемли́те, о бра́тия моя́ возлю́бленная,/ Бо́га бо́йтеся, и страх Его́ в се́рдцы свое́м име́йте,/ и за́поведи Госпо́дни сохраня́йте,/ Святы́я же Це́ркве не отлуча́йтеся,/ и в ны́нешнем ве́це потерпи́те ма́ло,/ да прича́стницы бу́дете Ца́рствию Бо́жию./ Мо́лим у́бо тя, преподо́бне:/ испроси́ нам от Го́спода по́мощь,/ заве́т твой святы́й соблюда́ти.
Сла́ва, глас то́йже:
Мона́хов мно́жества,/ наста́вника тя почита́ем, о́тче наш Сильве́стре,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных./ С ни́ми же моли́ся Го́сподеви/ поми́ловатися душа́м на́шим.
И ны́не, Богоро́дичен: Безневе́стная Де́во:
Тропа́рь, глас 6:
И́же измла́да Христа́ возлюби́в/ и ве́рою к Нему́ прибли́жся,/ изнури́л еси́, в пусты́ни живы́й, многострада́льное те́ло твое́./ Тем, блаже́нне Сильве́стре, со А́нгелы ликовству́я,/ моли́ Христа́ Бо́га мир ми́рови дарова́ти/ и бу́ди помо́щник ве́рою призыва́ющим тя на по́мощь/ и чту́щим святу́ю па́мять твою́.
Ин тропа́рь, глас 4:
Я́ко добр блаже́ннаго Се́ргия учени́к,/ ве́ре и благоче́стию его́ подража́я,/ стяжа́л еси́ даро́в Ду́ха Свята́го сокро́вище/ и си́лы мно́ги соде́лал еси́ о Го́споде/ во спасе́ние и утеше́ние ве́рных./ Не оста́ви у́бо и нас, с ве́рою притека́ющих к тебе́,/ Сильве́стре преподо́бне.
НА У́ТРЕНИ
По 1-м стихосло́вии седа́лен, глас 4:
Вменя́я вся тщету́ бы́ти за превосходя́щее разуме́ние Христа́ Иису́са, Го́спода на́шего,/ Его́ еди́наго вожделе́л еси́,/ Его́ еди́наго, я́ко би́сера многоце́ннаго, взыска́л еси́,/ с Ни́мже водворя́яся дне́сь в Небе́сных черто́зех,/ моли́ся, уго́дниче Бо́жий, да сподо́бимся бы́ти ве́чных благ прича́стницы.
Сла́ва, и ны́не, Богоро́дичен:
Пречи́стая Де́во Богоро́дице,/ приими́ моли́тву раб Твои́х/ и от бед привре́менных и от мук ве́чных изба́ви нас, воспева́ющих Тебе́:/ Благода́тная, ра́дуйся.
По 2-м стихосло́вии седа́лен, глас 2:
Пречи́стому Твоему́ о́бразу покланя́емся, Всеми́лостиве,/ к нему́ же Сильве́стр блаже́нный воздева́ше ру́це, моля́йся./ Пощади́ нас, Спа́се, моли́твами отца́ Богоно́снаго.
Сла́ва, и ны́не, Богоро́дичен:
В бе́здну зол впа́дшии, глас моле́бный возно́сим к Тебе́, Влады́чице:/ изведи́ ны милосе́рдою десни́цею Твое́ю из глубины́ грехо́вныя/ и возведи́ на го́ру доброде́телей, Пречи́стая.
По полиеле́и седа́лен, глас 8:
Обогати́л еси́ ве́рныя сокро́вищем чуде́с твои́х, преподо́бне Сильве́стре,/ мо́лим у́бо тя:/ да не оскуде́ют ми́лости твоя́ к гре́шным рабо́м твои́м,/ лобыза́ющим честны́я мо́щи твоя́ и чту́щим святу́ю па́мять твою́.
Сла́ва, и ны́не, Богоро́дичен:
Заступле́ние еси́, Де́во Чи́стая, и прибе́жище/ всем, обурева́емым волна́ми жите́йскими,/ не́сть бо ины́я, ра́зве Тебе́, наде́жды нам, гре́шным,/ в бе́здну грехо́вную впа́дшим.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 2:
Сла́вны и прехва́льны труды́ твоя́, преподо́бне Сильве́стре:/ ко Го́споду бо еди́ному горя́ любо́вию/ и в Нем еди́ном ве́рою и наде́ждою утвержда́яся,/ вся подъя́л еси́ Его́ ра́ди;/ ны́не же, от руку́ Его́ вене́ц сла́вы восприя́в,/ моли́ся, преподо́бне, да сподо́бимся Небе́снаго насле́дия соприча́стницы бы́ти.
Кано́н, глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь/ пои́м, вопия́ше.
Пода́ждь ми си́лу, Многоми́лостиве Го́споди,/ пе́сньми восхвали́ти просла́вленного Тобо́ю Богоно́снаго отца́ Сильве́стра,/ да бу́дет ми предста́тель пред непристу́пным вели́чеством Сла́вы Твоея́.
Мона́шествующих Богодухнове́нное удобре́ние яви́лся еси́, преподо́бне,/ бра́тию сло́вом, со́лию растворе́нным,/ и де́лы благи́ми во благоче́стии утвержда́я.
Глаго́лал еси́, о́тче Сильве́стре, бра́тии твое́й,/ я́ко а́ще стя́жеши по сме́рти дерзнове́ние ко Го́споду,/ хода́тай бу́деши о оби́тели твое́й./ Те́мже, вене́ц сла́вы прии́м, моли́ся о недосто́йных рабе́х твои́х.
Богоро́дичен: Его́же родила́ еси́ неизрече́нно, Сы́на и Бо́га,/ моли́, Де́во Всесвята́я, сохрани́тися достоя́нию Твоему́/ от бед малове́рия и злых помысло́в шата́ния.
Ин кано́н, глас то́йже.
Песнь 1. Ирмо́с то́йже
Уподо́бился еси́ купцу́, и́щущему би́сера многоце́ннаго,/ оста́вль бо кров о́тчий, и вменя́я вся тщету́ бы́ти, да Христа́ приобря́щеши,/ Тому́ после́довал еси́,/ Его́ ра́ди стра́сти и озлобле́ния претерпе́л еси́,/ с Ни́мже и прославля́ешися дне́сь, о́тче Богому́дре.
В терпе́нии мно́зе стяжева́я ду́шу свою́, преподо́бне,/ слеза́ми же ороша́я посте́лю свою́,/ обре́л еси́ невозмуща́емое поко́ище,/ его́же и нас сподо́бит Госпо́дь.
Предзря́ Го́спода пред собо́ю вы́ну/ и от пути́ за́поведей Его́ николи́же уклоня́яся,/ обеща́лся еси́ во исхо́де живота́ твоего́ бы́ти моли́твенником о бра́тии;/ сицево́е обетова́ние при́сно па́мятуем, су́ще многогре́шнии.
Богоро́дичен: Бо́га пло́тию неизрече́нно ро́ждшая, Всесвята́я Ма́ти Де́во,/ приими́ моли́тву на́шу/ и изба́ви нас от вся́кия ну́жды и печа́ли.
Катава́сия по уста́ву.
Песнь 3
Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
За́поведь твою́ блюсти́ повелева́я, преподо́бне,/ наказа́л еси́ за́поведь преступи́вшаго,/ но, прии́м сего́ покая́ние,/ благосе́рде исцели́л еси́ слепо́тствовавшаго.
Богоно́снаго Се́ргия благослове́ние прии́м, блаже́нне,/ взыска́л еси́ пусты́ни и о́браз был еси́ дво́ице учени́к его́,/ и́же, стопа́м твои́м после́довавше близ тебе́ водвори́шася и святоле́пныя оби́тели устро́иша.
Ско́рбию испо́лнил еси́ сердца́ бра́тии,/ жи́знь вре́менную оставля́я, Сильве́стре,/ ны́не же ра́достию исполня́еши взира́ющих на нетле́нныя мо́щи твоя́.
Богоро́дичен: Милосе́рдия исто́чниче, Влады́чице Пресвята́я,/ бу́ди покро́в всем, прибега́ющим к Тебе́ с ве́рою тве́рдою,/ наде́ждою несумне́нною и любо́вию чи́стою.
Ин. Ирмо́с то́йже
Ревну́я, я́ко добр во́ин Христо́в, о зако́не Госпо́днем,/ в зако́не поуча́л еси́ бра́тию твою́, о́тче преподо́бне;/ мы та́кожде поуча́емся словесы́ и дея́ньми твои́ми во спасе́ние душ на́ших.
Преподо́бному Се́ргию после́дствуя и того́ житию́ подража́я,/ пусты́ню возлюби́л еси́/ и та́мо, на ка́мени ве́ры утвержда́яся по́мыслы твои́ми,/ основа́л еси́ Богоблагослове́нную оби́тель во спасе́ние притека́ющих к ней.
Зело́ мно́гими напа́стьми и тружде́нием/ отяготи́лся еси́ в су́етном ве́це сем,/ мно́жайше восприе́млеши блага́я по отше́ствии твое́м во оби́тель Отца́ Небе́снаго.
Богоро́дичен: Милосе́рдия две́ри отве́рзи нам, Благослове́нная Богоро́дице,/ наде́ющиися на Тя, да не поги́бнем,/ но да изба́вимся Тобо́ю от бед:/ Ты бо еси́ спасе́ние ро́да христиа́нскаго.
Ин конда́к, глас 6:
По́двигом до́брым подвиза́лся еси́, преподо́бне,/ и ду́шу твою́, я́ко же́ртву чи́сту и непоро́чну, Бо́гу прине́сл еси́,/ по успе́нии твое́м явля́ешися те́плый наш пред Бо́гом моли́твенник,/ сего́ ра́ди, ве́рою притека́юще к тебе́, взыва́ем:/ ра́дуйся, преподо́бне о́тче Сильве́стре.
Ин и́кос:
Свети́льник, нога́ма твои́ма положи́вый зако́н Госпо́день и свет стезя́м твои́м,/ се́рдце же утверди́вый на ка́мени ве́ры,/ в не́йже стоя́ и хваля́ся упова́нием сла́вы Бо́жия,/ избе́гл еси́ жите́йския тли, преподо́бне,/ и к све́ту Ца́рствия Бо́жия упра́влен сый, призира́еши на ны, моля́ся ко Го́споду,/ да обря́щемся сы́нми Све́та/ и Ца́рствие Бо́жие насле́дити сподо́бимся.
Седа́лен, глас 4:
Блаже́нства Го́рняго взыску́я,/ вся кра́сная ми́ра сего́ оста́вил еси́, преподо́бне,/ чад твои́х духо́вных наказу́я, я́ко вся мирска́я прехо́дят,/ еди́но же пребыва́ет вы́ну сокро́вище благоче́стия.
Сла́ва, и ны́не, Богоро́дичен:
На Престо́ле со Отце́м и Святы́м Ду́хом ве́чно ца́рствующего/ нескусому́жно родила́ еси́, Присноде́во, Сы́на Бо́жия,/ тем Тя, я́ко Богома́терь, пе́сньми немо́лчными ублажа́ем.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Си́ла Христо́ва в тебе́ откры́ся, преподо́бне,/ бесо́в бо изгоня́еши,/ слепы́м зре́ние, глухи́м слы́шание, немощству́ющим исцеле́ние подае́ши.
Ду́хом горя́, Го́сподеви рабо́тая и то́ки слез источа́я,/ мно́зи благоче́стия плоды́ в пусты́ни Обно́рстей возрасти́л еси́,/ и́миже до дне́сь пита́ются к тебе́ с ве́рою притека́ющии.
Труды́, бде́ние и сухояде́ние изнури́ша те́ло твое́, Сильве́стре,/ оба́че, свы́ше укрепле́н, Спа́са просла́вил еси́, взыва́я;/ сла́ва си́ле Твое́й, Го́споди.
Богоро́дичен: Помози́, Пресвята́я Богоотрокови́це, правосла́вным лю́дем,/ да сотру́т си́лы сопроти́вных,/ и страну́ на́шу ненаве́тну от злых и ми́ра испо́лнь соблюди́.
Ин. Ирмо́с то́йже
Благоуха́я ми́рами доброде́телей/ и не во еди́ном от благода́тных дарова́ний лиша́яся, всечестны́й Сильве́стре,/ ве́мы, я́ко с ли́ки пра́ведных предстои́ши ны́не/ пред Престо́лом Го́спода Вседержи́теля и мо́лишися за нас,/ да насле́дницы бу́дем жи́зни ве́чныя.
Честву́юще святы́я мо́щи твоя́ и помина́юще гове́ние и поще́ние твое́, труды́ и бде́ние,/ хва́лим и превозно́сим просла́вившаго тя Го́спода,/ Ему́же предстои́ши дне́сь, моля́ся о душа́х на́ших.
Сла́вим Отца́, Сы́на и Свята́го Ду́ха Бо́га,/ да́рующаго благода́ть святы́м Свои́м/ и тех моли́твами избавля́ющего нас от лю́тых обстоя́ний.
Богоро́дичен: Всесвята́я Ма́ти Де́во,/ Спа́са и Просвети́теля душ на́ших ро́ждшая,/ моли́ся, да, изба́вльшеся от тьмы́ грехо́вныя,/ сподо́бимся с ли́ки святы́х водвори́тися в селе́ниих Небе́сных.
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Очесы́ у́мными во вся дни живота́ твоего́ на Го́спода воскре́сшаго взира́яй,/ в пусты́ни храм Воскресе́ния воздви́гл еси́,/ в не́мже святы́я мо́щи твоя́ почива́ющи,/ я́вственне преднапису́ют ме́ртвеннаго телесе́ на́шего во о́браз безсме́ртныя сла́вы облече́ние.
Кня́зи, и боля́ре, и простцы́ прихожда́ху к ме́сту селе́ния твоего́, Сильве́стре,/ и от уст твои́х глаго́лы наказа́ния духо́внаго в сла́дость слу́шаху.
Прише́льца иногда́, в пусты́ню прише́дша,/ зрак твой, смире́ния и поще́ния испо́лнь, удиви́,/ и сего́ стяжа́л еси́, я́ко пе́рваго от учени́к твои́х.
Богоро́дичен: Пренепоро́чная Де́во,/ моли́твами Твои́ми пода́ждь нам из пусты́ни Сильве́стра досточу́днаго/ цве́ты доброде́телей благоуха́нныя вы́ну износи́ти.
Ин. Ирмо́с то́йже
Седя́щия иногда́ во тьме́ неве́дения и мра́чнаго неве́рия/ водворе́нием свои́м в пусты́ни Обно́рстей просвети́л еси́,/ умудря́я вы́ну словесы́ и дея́ньми, я́ко пропове́дник Бо́жия благода́ти./ Мы же мо́лимся, да моли́твами твои́ми испро́сиши у Христа́ Бо́га/ свет ве́ры и спасе́ние душа́м на́шим.
Вожделева́юще слы́шати сла́достныя глаго́лы уст твои́х, преподо́бне о́тче Сильве́стре,/ мно́зи от стран да́льних притека́ху к тебе́,/ та́кожде и мы, чту́ще святу́ю па́мять твою́,/ к тебе́ с ве́рою притека́ем.
Я́коже иногда́ неве́домаго прише́льца умудри́л и смири́л еси́, о́тче преподо́бне,/ та́кожде и нас, не умудре́нных во спасе́нии, ниже́ ве́дущих,/ ка́ко подоба́ет непра́вая и стро́потная оставля́ти,/ моли́твами твои́ми умудри́ и озари́.
Богоро́дичен: Богода́нной души́ моея́ свети́льник угаси́х/ и све́та стезе́й Госпо́дних не уве́дех,/ оба́че, Ма́ти Све́та, из мра́ка грехо́внаго вопию́:/ озари́ мя, омраче́ннаго и заблу́ждшаго, и напра́ви к приста́нищу спасе́ния.
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.
Мо́ря жите́йскаго треволне́ний отбе́г, в пусты́ню прите́кл еси́/ и, ти́хое приста́нище обреты́й,/ в Бо́зе еди́ном живо́т твой полага́л еси́, преподо́бне.
Деви́цу иногда́, бе́сом лю́те му́чиму, чу́дным явле́нием твои́м исцели́л еси́,/ егда́ спя́щей бы́лие тра́вное по́дал еси́./ Тем чу́до узре́вшии восхвали́ша тя, преподо́бне.
Обе́т изрече́ еди́н от ве́рных ти храм созда́ти,/ иде́же мо́щи твоя́ святы́я почива́ху,/ его́же и созда́л е́сть./ Те́мже от бед и скорбе́й изба́вил еси́ его́, блаже́нне.
Богоро́дичен: В храм Твой, Влады́чице, сходя́щеся, вопие́м Ти:/ Ты еси́ покро́в ме́сту сему́ свято́му,/ иде́же Сильве́стр Богоно́сный жи́тельствоваше./ Спаси́ у́бо ны, зде покланя́ющияся тебе́,/ и всем христиа́ном бу́ди Помо́щница.
Ин. Ирмо́с то́йже
Мо́ря жите́йскаго треволне́ний отбе́г и в пусты́ни всели́вся,/ та́мо на всяк час моля́ся и тружда́яся,/ я́ко до́бль во́ин Христо́в,/ вся сопроти́вныя си́лы дале́че отгна́л еси́.
Мно́зи, притека́юще к ра́це твое́й, о́тче, прие́млют цельбу́;/ молю́ся, пода́ждь и мне,/ немоществу́ющему душе́ю и те́лом, врачева́ние.
Я́коже иногда́ благочести́вый храмозда́тель/ изба́влен бы́сть моли́твами твои́ми от напа́стей,/ та́ко и нас, с ве́рою притека́ющих к ра́це твое́й,/ моли́твами твои́ми заступи́ от обдержа́щих нас зол.
Богоро́дичен: Лю́тыя пло́ти моея́ стра́сти утоли́, Пресвята́я Де́во,/ и заблу́ждшаго мя к ти́хому приста́нищу напра́ви.
Конда́к, глас 6:
По́двигом до́брым подвиза́лся еси́, преподо́бне,/ и ду́шу твою́, я́ко же́ртву чи́сту и непоро́чну,/ Ду́ху Свято́му прине́сл еси́,/ и по сме́рти твое́й ста́до твое́ духо́вное соблюда́еши,/ и в боле́знех ско́ро посеща́еши./ Те́мже мо́лим тя, преблаже́нне:/ с ли́ки преподо́бных моли́ Христа́ Бо́га,/ да спасе́т правосла́вныя христиа́ны/ и пода́ст лю́дем в ми́ре глубо́це устро́итися, да зове́м ти:/ ра́дуйся, Сильве́стре, и́ноком духо́вный па́стырю и наста́вниче.
И́кос:
И́ноков вои́стинну началово́ждь яви́лся еси́, Богому́дре Сильве́стре,/ смире́нию бо Христо́ву после́дуя,/ крест Его́ на ра́мена подъя́л еси́,/ и терпе́нием, поще́нием и моли́твою ста́ду твоему́ о́браз был еси́./ Те́мже и бра́тия, я́ко отца́ и наста́вника тя почита́юще,/ зря́ще тя ко Го́споду отходя́ща, ско́рбию исполня́хуся;/ и́мже веща́л еси́ глаго́лы утеше́ния:/ потерпи́те,– глаго́ля,– ма́ло в ны́нешнем ве́це, бра́тия возлю́бленная,/ и венцы́ прии́мете от Христа́ Бо́га и Спа́са душ на́ших./ Его́же моли́, преподо́бне, мир ми́рови дарова́ти/ и душа́м на́шим ве́лию ми́лость.
Песнь 7
Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
Изря́ден подвигополо́жник был еси́, преподо́бне,/ во́ду на ра́менах твои́х нося́ и бы́лие еди́ное вкуша́я./ Тем просла́ви тя благослове́нный Бог оте́ц на́ших.
Не отхожда́ху лю́дие от ке́ллии твоея́, преподо́бне,/ словесе́м твои́м духоно́сным внима́юще,/ и, восхваля́юще Го́спода, взыва́ху:/ благослове́н Бог твой и Бог оте́ц на́ших.
Чудесы́ мно́гими просла́ви тя Христо́с Бог наш,/ и́миже удивля́еми, лю́дие всея́ страны́ Росси́йския восклица́ют:/ благослове́н Бог оте́ц на́ших.
Богоро́дичен: Та́йну хра́мов, зде красу́ющихся, уразуме́им, ве́рнии, и возглаго́лем:/ покры́й нас, Богома́ти, честны́м Твои́м покро́вом,/ и помози́ моли́твами твои́ми, блаже́нне Сильве́стре,/ да дости́гнем сла́внаго из ме́ртвых воскресе́ния и сре́тения Госпо́дня на возду́се.
Ин. Ирмо́с то́йже
Богому́дрыя глаго́лы, я́ко благопло́дныя се́мена,/ восприя́в в се́рдце свое́ от до́бляго Се́ргия,/ возрасти́л еси́ я, о́тче Сильве́стре, в дре́во бла́госенноли́ственное;/ сего́ ра́ди мно́зи, прите́кше к тебе́, обрета́ют под се́нию благода́ти, я́же в тебе́,/ мир и спасе́ние душе́вное.
А́ще и мно́гою зело́ тьмо́ю объя́та бы́сть пусты́ня Обно́рская,/ но свет благоче́стия твоего́ озари́ ю и показа́ тя свети́льника су́ща,/ испо́лнена еле́ем Бо́жия благода́ти.
Ликовству́я, принесе́м дне́сь, ве́рнии, хвалу́ и благодаре́ние Бо́гови:/ нетле́нием бо просла́ви уго́дника Своего́/ и дарова́ ему́ благода́ть исцеле́ний.
Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
В ве́ре Боже́ственней вы́ну утвержда́яся,/ ве́рою, я́ко столп непоколеби́мый, стоя́,/ храм во сла́ву Воскре́сшаго Го́спода в пусты́ни Обно́рстей воздви́гл еси́,/ в не́мже де́йствием благода́ти Бо́жией си́лы мно́зи соде́яшася/ и процвете́ святы́ня Госпо́дня, показу́я,/ я́ко ты, о́тче преподо́бне Сильве́стре,/ вои́стинну был еси́ избра́нный сосу́д благода́ти и храм Бо́жий.
Святы́я Це́ркве не отлуча́йтеся,– глаго́лал еси́ бра́тии твое́й, преподо́бне,/ наказу́я, я́ко да во хра́ме воспева́ют ве́рнии Го́спода/ и превозно́сят Его́ во ве́ки.
О́троцы блаже́ннии во огни́, я́ко зла́то в горни́ле, искуша́еми, Го́спода воспева́ху;/ си́це Сильве́стр Богому́дрый, огне́м терпе́ния искуша́емь и очища́емь, взыва́ше:/ Го́спода по́йте и превозноси́те во вся ве́ки.
Богоро́дичен: Проле́й мольбы́ к Сы́ну Твоему́, неизрече́нно милосе́рдому,/ да спасе́т ны от вся́каго зла́го обстоя́ния,/ Присноде́во Богоблагода́тная.
Ин. Ирмо́с то́йже
Во едине́ние ве́ры, в сою́з же любви́/ поуче́ньми твои́ми приводи́л еси́ бра́тию;/ сицевы́х благ, я́ко би́сера, и́щуще, притека́ем к предста́тельству твоему́,/ преподо́бне о́тче Сильве́стре.
Я́ко ве́рный в дому́ Бо́жии раб, благоугожда́я Бо́гови,/ си́лою и де́йствием благода́ти Его́ мно́гая соверши́л еси́ зна́мения,/ озаря́я словесы́ и де́лы твои́ми сердца́ ве́рных./ Моли́ся у́бо, о́тче,/ да зна́менается и на нас, гре́шных, свет лица́ Бо́жия.
Си́лою и де́йством Победи́теля сме́рти и а́да/ до́блестно побежда́л еси́ вся сопроти́вныя си́лы,/ вы́ну сла́вя и превознося́ Го́спода.
Богоро́дичен: Засту́пнице ро́да христиа́нскаго,/ к Тебе́ притека́юще, мо́лимся:/ бу́ди нам, обурева́емым волно́ю жите́йских попече́ний, покро́в и заступле́ние,/ да благослови́м и превозно́сим Тя во вся ве́ки.
Песнь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Незри́мый лю́дем в пусты́ни пребыва́л еси́,/ с Бо́гом неви́димым духо́вне бесе́дуя, Сильве́стре блаже́нне,/ тем и ангелоподо́бен был еси́./ Сего́ ра́ди тя ублажа́ем.
Сла́вы от челове́к не ища́,/ от челове́к сокрове́н был еси́, сокрове́нне в Бо́зе пребыва́я,/ но, я́ко сла́вою Бо́жиею просла́вленна, ты ублажа́ем.
Благосе́рдно приими́, Богому́дре Сильве́стре, пе́сни сия́,/ во сла́ву и́мене твоего́ сложе́нныя,/ и помоли́ся о мне, гре́шнем рабе́ твое́м.
Богоро́дичен: Богоро́дице Де́во, упова́ние христиа́ном,/ бу́ди стена́ кре́пкая и огражде́ние всем ве́рующим,/ да Тя, я́ко Ма́терь Бо́га Сло́ва Премилосе́рдую, велича́ем.
Ин. Ирмо́с то́йже
Я́ко пустыннолюби́вая го́рлица, в пусты́ни Обно́рстей всели́вся,/ стяжа́л еси́ неоску́дная сокро́вища благода́ти;/ тоя́ моли́твами твои́ми, преподо́бне Сильве́стре, да сподо́бити нас Всеблаги́й Бог.
Вся уме́ты вмени́в Христа́ ра́ди/ и Ему́ после́довав небоя́зненно, в пусты́ни водворя́яся,/ с Ни́мже и воцари́лся еси́ дне́сь, преподо́бне,/ во оби́телех Отца́ Небе́снаго.
Предстоя́ же пред Го́сподем и дерзнове́ние к Нему́ име́я,/ моли́ся, да и мы, одержи́ми лю́тыми грехи́ и напа́стьми мно́гими,/ услы́шим сладча́йший глас Его́:/ до́брый ра́бе, благи́й и ве́рный,/ вни́ди в ра́дость Го́спода твоего́.
Богоро́дичен: Богоро́дице, христиа́ном Помо́щнице,/ Твое́ предста́тельство стяжа́вше, раби́ Твои́,/ благода́рно Тебе́ вопие́м:/ ра́дуйся, Пречи́стая Богоро́дице Де́во,/ и от всех нас бед моли́твами Твои́ми изба́ви,/ еди́на, вско́ре предста́тельствующая.
Свети́лен:
В черто́г Го́спода сла́вы возше́д/ и оде́жду имы́й, убеле́нну све́том доброде́телей,/ моли́ Христа́ Бо́га, преподо́бне,/ да да́рует всем правосла́вным в ве́ре сконча́ти живо́т свой/ и облещи́ся в оде́жду нетле́ния.
Богоро́дичен:
Ри́зу пода́ждь нам све́тлу, Богома́ти,/ зла́том благи́х дел преиспещре́нну,/ да прославля́ем вы́ну Твое́ благоутро́бие.
На хвали́тех стихи́ры на 4, глас 8:
Прииди́те, лю́дие,/ ублажи́м Сильве́стра досточу́днаго,/ в де́брех пусты́нных а́нгельски жи́тельствовавша/ и ле́ствицею доброде́телей Небесе́ дости́гша,/ и со слеза́ми возопии́м ему́, глаго́люще:/ моли́ Бо́га о нас, преподо́бне о́тче наш.
Ру́бищем иногда́ облече́н был еси́, преподо́бне,/ ны́не же оде́ждою сла́вы боготка́нною укра́шен еси́:/ гла́дом иногда́ пло́ть твою́ изможда́л еси́,/ ны́не же хле́ба живо́тнаго насыща́ешися./ Тем, Престо́лу Сла́вы предстоя́,/ помяни́ нас, гре́шных, преподо́бне,/ и моли́ спасти́ся всем нам.
Я́коже исходи́л еси́ иногда́ из пусты́ни к лю́дем,/ приходя́щим к тебе́, преподо́бне,/ и любо́вне к ним бесе́довал еси́,/ сло́во спасе́ния возвеща́я,/ си́це и нас не отжени́,/ усе́рдно притека́ющих к тебе́,/ и уще́дри нас, моля́щихся тебе́.
Дом Ду́ха Свята́го вои́стинну показа́лся еси́,/ о́тче Сильве́стре,/ мо́щи бо твоя́ источа́ют чуде́с мно́жество,/ и вси, те́пле ве́рующии, исцеле́ние безме́здное улуча́ют./ Мо́лим у́бо тя, блаже́нне,/ дарова́ти здра́вие телесе́м и душа́м на́шим.
Сла́ва, глас 6:
Что́ возда́мы, преподо́бне,/ за ми́лости твоя́ неизрече́нныя?/ Я́ко на прося́щих по́мощи твоея́ призира́еши/ и прибега́ющим к тебе́ с ве́рою/ засту́пник те́плый явля́ешися./ Приими́ же́ртву моле́ний на́ших/ и вознеси́ ю к Престо́лу Всевы́шняго,/ иде́же водворя́ешися, моля́ о душа́х на́ших.
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.
Славосло́вие вели́кое и отпу́ст
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 4: Честна́ пред Го́сподем/ сме́рть преподо́бных Его́. Стих: Что́ возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Матфе́я, зача́ло 10. Прича́стен: В па́мять ве́чную:
Моли́тва
О честна́я главо́! Ду́ха Свята́го обита́лище и А́нгелов собесе́дниче, преблаже́нне о́тче Сильве́стре! Житие́м богоуго́дным вене́ц сла́вы Небе́сныя стяжа́вый и у Го́спода дерзнове́ние ве́лие имы́й, моли́ся о рабе́х твои́х, с ве́рою твоея́ по́мощи тре́бующих и с упова́нием на милосе́рдие твое́ к тебе́ прибега́ющих. Испроси́ у Го́спода Человеколю́бца всем лю́дем, коему́ждо для блага́го жи́тельствования и спасе́ния потре́бная: Це́ркви – мир и тишину́, правосла́вным христиа́ном – на враги́ побе́ду и одоле́ние, неду́жным – исцеле́ние, си́рым – вспоможе́ние, немощству́ющим ве́рою – в ве́ре утвержде́ние, ю́ным – в благоче́стии воспита́ние, всем лю́дем – безмяте́жие и от всех бед и скорбе́й избавле́ние, воззыва́емым от жи́зни сея́ вре́менныя – свято́е напу́тствие, преста́вльшимся – блаже́нное в Го́споде упокое́ние. Услы́ши, Богоно́сне, усе́рдное моле́ние гре́шных и недосто́йных раб твои́х и ми́лости твоя́ бога́тыя изле́й на ны, да, щедро́тами твои́ми обогаща́еми, сла́вим всечестно́е и великоле́пое И́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.
