Служба преподобнаго Севастиана, иже на Сохоте реце, Пошехонскаго чудотворца
ВЕ́ЧЕР
Блаже́н муж: На Го́споди, воззва́х: стихи́ры, глас 8.
Подо́бен: О, пресла́внаго чудесе́:
Преподо́бне о́тче Севастиа́не,/ мирски́я себе́ отлучи́л еси́ молвы́,/ терпе́нием же, и посто́м, и ча́стыми моли́твами/ плоть свою́ покори́л еси́ ду́хови/ и зми́я лука́внаго сле́зными ту́чами потопи́л еси́, блаже́нне,/ к преми́рному взы́де соверше́нию,/ те́мже, почита́юще па́мять твою́, преподо́бне, мо́лим тя: моли́ Христа́ Бо́га/ спасти́ся душа́м на́шим.
Преподо́бне о́тче Севастиа́не,/ мирски́й мяте́ж оста́вль и взем крест свой, после́довал Христу́ невозвра́тным по́мыслом/ и в пусты́ню всели́ся, преподо́бне,/ душе́вныя стра́сти из ко́рене исторга́я/ и теле́сныя чу́вства огорчева́я,/ злострада́ния претерпе́вая во бде́нии с чи́стою со́вестию,/ и А́нгелом собесе́дник быв, блаже́нне,/ моли́ спасти́ся душа́м на́шим.
Преподо́бне о́тче Севастиа́не,/ впери́в ум свой к Бо́гу ве́рою,/ плотска́го смеше́ния возгнуша́ся неуста́внаго/ и, крест свой восприи́м,/ Всеви́дцу после́довал еси́,/ те́ло непокори́вое по́двиги воздержа́ния/ и по́мыслы силою Боже́ственною порабо́тив,/ моли́ спасти́ся душа́м на́шим.
Преподо́бне о́тче Севастиа́не,/ сла́ву бо маловре́менную оста́вль,/ в пусты́ню всели́ся/ и бысть доброде́тели подви́жник приле́жный,/ жесто́ким же воздержа́нием и посто́м плоть свою́ изнури́в,/ того́ ра́ди Христо́с обогати́ тя чудесы́,/ но помина́й нас, ча́да твоя́,/ ве́рою соверша́ющия всесвяще́нную па́мять твою́,/ испроси́ спасе́ние душа́м на́шим.
Сла́ва, глас 4:
Стеце́мся и́ноческое мно́жество,/ соше́дшеся, пра́здник соста́вим,/ честна́я бо па́мять отца́ на́шего Севастиа́на/ сердца́ на́ша озаря́ет неви́димо,/ до́брыми возсия́ющи де́лы,/ сего́ ра́ди, согла́сно воспева́юще, рцем:/ ра́дуйся, ве́рный ра́бе Христа́ Бо́га;/ ра́дуйся, по́стником све́тлая похвало́;/ ра́дуйся, и́ночествующим наста́вниче;/ ра́дуйся, исцеле́нием исто́чниче;/ о нас моли́, преподо́бне, всех Царя́, Христа́ Бо́га на́шего,/ изба́витися от собла́зн льсти́ваго/ и спасти́ся душа́м на́шим.
И ны́не, Богоро́дичен: И́же Тебе́ ра́ди:
Вход. Проки́мен дне. И чте́ния преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие, сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (главы́ 5, 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́, конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 1:
На земли́ сый Богонасажде́нным при исхо́дищих живо́тных вод дре́вом,/ благопло́днаго се́рдца твоего́ розги́/ живо́тною напои́л еси́ покая́нных слез водо́ю, преподо́бне о́тче,/ и духо́вныя возрасти́л еси́ ве́лия кро́тости и смире́ния плоды́,/ те́мже вознесе́н на Го́рнюю высоту́ блаже́нства,/ насажде́нный десни́цею Бо́жиею в раи́ Небе́снем,/ наслажда́ешися нетле́нныя пи́щи от живо́тнаго дре́ва Христа́ Бо́га,/ Его́же мо́лиши приле́жно/ о спасе́нии душ на́ших.
Глас 2:
Прииди́те, Боголюбе́зное ста́до, и́ноческое собра́ние/ с празднолюбе́зными чи́нми христиа́нскаго мно́жества/ многоимени́тых люде́й Бо́жиих,/ днесь восхва́лим Христо́ва рачи́теля,/ граждани́на пусты́ннаго,/ и́ноком прему́драго наста́вника,/ пусты́нником похвалу́ святоле́пную,/ Боже́ственныя пе́сни принесе́м ему́,/ сей бо, рве́ние Боже́ственно в се́рдцы прии́м,/ мирску́ю пре́лесть всю оста́вив,/ Христу́ после́дова,/ труды́ по́стническими прости́раяся,/ бесо́вския па́губы победи́ му́жески/ Ду́ха Свята́го ору́жием непобеди́мым./ Те́мже, возше́д на ле́ствицу доброде́телей,/ дости́же круги́ о́ны Небе́сныя,/ иде́же Богонача́льным све́том со А́нгельскими ли́ки просвеща́яся,/ моли́твенник непреста́нен быва́ет за ду́ши на́ша.
В ти́хое и небу́рное приста́нище безмо́лвия вшед,/ в отхо́дную пусты́ню Боголюбе́зную,/ иде́же с Бо́гом еди́н безмо́лствова,/ те́сным путе́м и приско́рбным при́сно ше́ствова,/ та́мо житие́ а́нгельское проходи́л еси́/ и неудо́бь покори́вое пло́ти возрази́в воздержа́нием,/ научи́в сего́ повинова́тися/ благо́му по́мыслу хоте́ния Бо́жия./ Те́мже Свет безстра́стия возсия́ тебе́,/ Присносу́щнаго Христа́ Бо́га на́шего,/ Его́же непреста́нно моли́, мо́лимся,/ от вся́ких зол нас изба́вити,/ и́же всечестно́е твое́ успе́ние пра́зднующих,/ и спасти́ ду́ши на́ша.
Сла́ва, глас 6:
Ра́дуйся, пусты́ня свята́я и Боголюбе́зная,/ израсти́вшая отца́ сего́ досточу́днаго/ и воспита́вшая самора́сленными свои́ми бы́лии,/ его́же житие́м освяти́вши ложесна́ своя́,/ небу́рное приста́нище всем ве́рным обре́теся,/ той бо просла́ви Бо́га доброде́тельным житие́м свои́м,/ в жи́зни сей ве́рно послужи́в Ему́,/ сего́ ра́ди и Бог просла́ви того́ чудесы́ Свои́ми Богодарова́нными,/ оби́лие исцеле́ний подава́ет/ приходя́щим с ве́рою к цельбоно́сному свято́му его́ гро́бу,/ со стра́хом поклоня́ющеся,/ благоче́стне целу́юще пресвята́го о́браза священноле́пное его́ подо́бие,/ любе́зно вопие́м к нему́:/ о всеблаже́нне о́тче наш Севастиа́не,/ моли́ся неотсту́пно Пресвяте́й Тро́ице/ оте́честву дарова́ти на враги́ посо́бие и кре́пкое одоле́ние/ и христоимени́тыя лю́ди от зол спасти́ вся́ческих/ и душа́м на́шим испроси́ мир и ве́лию ми́лость.
И ны́не, Богоро́дичен, глас 6: Богоро́дице, Ты еси́ лоза́:
На стихо́вне стихи́ры, глас 8.
Подо́бен: Ки́ими похва́льными венцы́:
Ки́ими похва́льными венцы́/ увязе́м отца́ на́шего Севастиа́на?/ Доброде́телем сокро́вище,/ сосу́д чистоты́,/ прия́телище благода́ти,/ исто́чник исцеле́нием,/ его́же ра́ди враго́м шата́ние Христо́с низложи́,/ име́яй ве́лию ми́лость.
Стих: Честна́ пред Го́сподем/ смерть преподо́бных Его́.
Ки́ими пе́сненными добро́тами/ похва́лим на́шего наста́вника?/ Пусты́ннаго граждани́на, целому́дрию храни́теля,/ боля́щим врача́ безме́здна,/ его́же ра́ди враго́м шата́ние Христо́с низложи́,/ име́яй ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ки́ими смире́нными устна́ми/ ны́не воспое́м Севастиа́на преподо́бнаго?/ В честне́м пра́зднице твое́й па́мяти/ духо́вно пра́зднующе, мо́лим тя:/ моли́ся Христу́ Бо́гу о ча́дех свои́х,/ тебе́ бо те́пла предста́теля, и храни́теля, и моли́твенника ко Влады́це стяжа́хом,/ подаю́щему ми́рови ве́лию ми́лость.
Сла́ва, глас 8:
И́нок мно́жества/ наста́вника тя чтим, о́тче наш Севастиа́не,/ тобо́ю бо путь су́щий пра́вый ше́ствовати позна́хом,/ блаже́н еси́, Христо́ви рабо́тав,/ и вра́жию обличи́л еси́ си́лу,/ А́нгелом собесе́дниче и преподо́бным соприча́стниче и пра́ведным,/ с ни́миже моли́ся Го́сподеви/ поми́ловатися душа́м на́шим.
И ны́не, Богоро́дичен: Безневе́стная Де́во:
Тропа́рь, глас 4:
Удали́вся ми́ра и водвори́вся в пусты́ни,/ до́брым по́двигом подвиза́ся,/ злострада́нием, и внима́нием, и моли́твами,/ отоню́дуже и по сме́рти источа́еши исцеле́ния,/ Севастиа́не, о́тче наш,/ моли́ Христа́ Бо́га/ спасти́ся душа́м на́шим.
И ны́не, Богоро́дичен: Е́же от ве́ка утае́нное:
НА У́ТРЕНИ
По 1-м стихосло́вии седа́лен, глас 1.
Подо́бен: Лик а́нгельский:
Житие́ на земли́ благоче́стно сконча́в,/ чи́сто селе́ние Свято́му Ду́ху яви́ся,/ просвеща́я и́же ве́рою приходя́щих к честно́му гро́бу твоему́, блаже́нне,/ те́мже моли́ Влады́ку Христа́ Бо́га просвети́ти ду́ши на́ша,/ пра́зднующия всечестну́ю па́мять твою́, Севастиа́не Богому́дре,о́тче наш.
Сла́ва, и ны́не, Богоро́дичен:
Всех Творца́ и Влады́ку, Бо́га же и Соде́теля, Всенепоро́чная Чи́стая,/ Ду́хом Боже́ственным в ложесна́х Твои́х зача́т/ и без истле́ния родила́ еси́,/ Его́же сла́вяще, Тя велича́ем, Де́во,/ я́ко пала́ту всех Царя́ и ми́рови заступле́ние.
По 2-м стихосло́вии седа́лен, глас 3.
Подо́бен: Боже́ственныя ве́ры:
Боже́ственным жела́нием безсме́ртия, Севастиа́не, одержи́м/ и крест на ра́мо взем,/ в пусты́ню жела́нием всели́лся еси́,/ иде́же, преподо́бне, Го́сподеви собра́ ста́до./ Те́мже и моли́твенника те́пла стяжа́хом ко Го́споду.
Сла́ва, и ны́не, Богоро́дичен:
Ми́лостивое бысть селе́ние Сло́ву Еди́на Всечи́стая Де́ва,/ чистото́ю А́нгелы превосходя́щи,/ и́же па́че всех мене́, прах бы́вшаго, оскверне́наго плотски́ми согреше́ньми,/ очи́сти Боже́ственными вода́ми,/ моли́твами Твои́ми подаю́щи нам ве́лию ми́лость.
По полиеле́и седа́лен, глас 8.
Подо́бен: Прему́дрости:
Нищету́ у́бо возлюби́л еси́ па́че бога́тства тле́ннаго/ и сою́зом любве́ привяза́ся,/ земна́я и мимотеку́щая возненави́дев, блаже́нне,/ пусты́нное озлобле́ние усе́рдно подъе́м,/ те́мже и к ре́вности а́нгельскаго жития́ воздви́гл еси́ мно́жество и́ночествующих,/ преподо́бне о́тче наш Севастиа́не,/ моли́ Христа́ Бо́га грехо́в оставле́ние дарова́ти нам и ве́лию ми́лость.
Сла́ва, и ны́не, Богоро́дичен:
О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть, пре́жде век Сый Бог наш./ Ложесна́ бо Твоя́ престо́л сотвори́/ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь,/ сла́ва Тебе́.
Степе́нна 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 4: Стеце́мся, и́ноческое мно́жество: (зри сла́вник на вече́рни).
Кано́н Богоро́дице со ирмосо́м на 6 и свято́му на 8. глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Земна́я и мимотеку́щая, я́ко уме́ты, вмени́в,/ Христа́ еди́наго приобре́л еси́,/ Его́же любо́вию уязви́в ду́шу свою́, Севастиа́не преподо́бне,/ моли́ся ко Го́споду нас просвети́ти.
Возше́д на высоту́ доброде́телей, до́лу влеку́щия сла́сти оплева́л еси́,/ сла́дость показа́л еси́ спасе́ния, о́тче преподо́бне, ста́ду твоему́.
Нахожде́ния вра́жия лука́вых духо́в/ от Бо́га сокруше́нным се́рдцем прие́м по́мощь, Севастиа́не блаже́нне,/ и воздержа́нием огради́вся, победи́л еси́ их.
Богоро́дичен: Прему́дрость Бо́жию, вои́стинну Сло́во О́тчее несказа́нно ро́ждшая,/ души́ моея́ лютую я́зву исцели́/ и серде́чную боле́знь, Ма́ти Бо́жия, укроти́.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Попали́л еси́ у́глием воздержа́ния страсте́й те́рние, преподо́бне,/ и прогна́л нечи́стыя ду́хи, Богоблаже́нне.
Я́ко свети́льник, свою́ ду́шу сле́зными пото́ки украша́я, преподо́бне,/ и се́рдце свое́ поже́рл еси́ Бо́гови.
Стра́сти душетле́нныя успи́л еси́ бо́дростными моли́твами и бде́ньми, всеблаже́нне,/ те́мже в Небе́сный черто́г всели́ся, ра́дуяся.
Богоро́дичен: Уста́ви неуста́вное помышле́ний мои́х, Чи́стая, смуще́ние, Ма́ти Бо́жия,/ е́же к Сы́ну Твоему́ направля́ющи моя́ движе́ния.
Седа́лен, глас 5.
Подо́бен: Ра́дуйся:
Ра́дуйся, преподо́бне, прине́сл еси́ себе́ Христо́ви же́ртву жи́ву,/ от ю́ности усе́рдно рабо́тая Христу́ Бо́гу пе́сньми, посто́м и воздержа́нием,/ и водвори́ся в пусты́ни, еди́н ко Еди́ному бесе́дуя./ Тем ви́дев Госпо́дь твое́ до́брое изволе́ние,/ со все́ми учини́ тя пра́ведными и преподо́бными,/ водвори́ тя в Небе́сном Ца́рствии со А́нгелы Христу́ пе́ти песнь немо́лчную,/ но я́коже и́маши дерзнове́ние к Нему́, моли́, мо́лимся, спасти́ся душа́м на́шим.
Сла́ва, и ны́не, Богоро́дичен:
К Богоро́дице возопии́м любо́вию:/ ра́дуйся, гра́де Госпо́день;/ ра́дуйся, ски́птре Дави́дов./ Ра́дуйся, пала́то одушевле́нная;/ ра́дуйся, ру́чко Боже́ственныя ма́нны./ Ра́дуйся, неопали́мая купино́;/ ра́дуйся, свеще́ пресве́тлая и свети́льниче златы́й./ Ра́дуйся, гора́ Бо́жия приосене́нная;/ ра́дуйся,огнено́сный престо́ле./ Ра́дуйся, ле́ствице и дверь Небе́сная;/ ра́дуйся же́зле, невла́жно прозя́бший./ Ра́дуйся, вся спаса́ющи от вся́ких бед и скорбе́й;/ ра́дуйся, Богоро́дице, ми́ру спасе́ние.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Я́ко в поро́де22 благово́нней и доброде́тели в раи́ одушевле́ннем,/ воздержа́нием прове́л еси́,/ и́мже пита́еши чту́щия тя.
Ми́ра любве́ ра́ди отре́кся, дости́же Го́рняго Иерусали́ма,/ иде́же Христо́с со Отце́м и Ду́хом./ И венца́ от Него́ сподо́бися, со Безпло́тными поя́:/ сла́ва си́ле Твое́й, Го́споди.
Зако́ноположника воздержа́нную и́ноком и пра́вило кро́тости,/ я́ко Моисе́я тя и Дави́да, вои́стинну стяжа́вше, о́тче, ублажа́ем.
Богоро́дичен: Под ле́том бы́вша, И́же от Отца́ безле́тно возсия́вшаго, Богома́ти, нам родила́ еси́./ Его́же моли́ спасти́ пою́щия Тя.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый?/ И покры́ла мя есть чужда́я тьма, окая́ннаго,/ но обра́ти мя и к све́ту за́поведей Твои́х пути́ моя́ напра́ви, молю́ся.
Страсте́й мглу отгна́в, преподо́бне, заря́ми, о́тче, по́двиг твои́х,/ просвеще́ние Ду́ха в се́рдцы восприи́м, Севастиа́не,/ и́мже попали́ вся бесо́вская ополче́ния/ и лико́м по́стническим причте́ся.
Погаси́в стра́сти росо́ю воздержа́ния, о́тче блаже́нне,/ бога́тно вжегл еси́ огнь любве́ и ве́ры/ и поще́ния свети́льник, просвеща́яся безсме́ртием, и дне сын, о́тче, был еси́.
Удобри́в свяще́нную свою́ ду́шу, о́тче всеблаже́нне Севастиа́не, изволе́нием простоты́,/ и ху́дость ри́зную име́л еси́,/ те́мже украше́ние доброде́тельно показа́ся/ чту́щим всечестну́ю па́мять твою́.
Богоро́дичен: Еди́на ро́ждши Де́вою, Еди́на Неискусому́жная яви́ся, Всенепоро́чная,/ во утро́бе бо Сло́во О́тчее прии́мши Безнача́льное, и млеко́м дои́ши, Деви́це,/ чу́до стра́нное!/ и, де́вствующи, зако́ны обновля́еши естества́.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Собра́л еси́ в души́ свое́й Боже́ственныя плоды́ Ду́ха:/ непоро́чну моли́тву, чистоту́ же кра́сну и бде́ние тве́рдо, воздержа́ния боле́зни,/ и́миже храм показа́ся Бо́гу Вседержи́телю.
Душе́вный ра́зум впери́в, сла́вне,/ и чу́вствия окорми́в, му́дре,/ святы́ни благоче́стия су́щим на земли́ возвеща́я/ и е́же к Небеси́ восхожде́ние.
Земны́х веще́й ху́дость мимоте́кл еси́, му́дре,/ невеще́ственною же моли́твою на Небеса́ возлете́,/ Вы́шняго восприя́тия насле́дник яви́ся жития́ соверше́нием.
Богоро́дичен: Прия́ла еси́ вои́стинну Боже́ственное Сло́во в ложесна́ Твоя́/ и Сего́ па́че естества́, Пречи́стая, родила́ еси́./ Его́же мольба́ми Твои́ми умоли́ от бед изба́вити рабы́ Твоя́.
Конда́к, глас 3.
Подо́бен: Де́ва днесь:
Сия́нием Ду́ха Пресвята́го, му́дре Севастиа́не, просве́щся,/ оста́вил еси́ я́же в житии́ молвы́,/ пусты́ню же дости́г, преподо́бне о́тче,/ возвесели́л еси́ и́же над все́ми Бо́га и Зижди́теля./ Сего́ ра́ди прославля́ет тя Христо́с, блаже́нне, Вели́кий Дарода́тель.
И́кос:
Уясни́ ми язы́к и укрепи́ ми ум, Христе́ Бо́же, моли́твами Пречи́стыя Твоея́ Ма́тере,/ язы́к ми благоглаго́лати пода́ждь на похвалу́ и на умоле́ние Твоего́ уго́дника,/ свещу́ души́ моея́ уны́лую, ю́же, воздрема́в, угаси́х,/ моли́твами преподо́бнаго Севастиа́на просвети́/ и не отлучи́ мене́, Христе́, мно́го согреши́вша, ли́ка преподо́бных Твои́х,/ Ты бо спаса́еши всех, я́ко Вели́кий Дарода́тель.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Всем жела́нием прилепи́лся еси́, воздержа́нием тве́рдым своему́ Влады́це,/ Того́ ны́не пита́ешися сия́нии, зовы́й:/ оте́ц на́ших Бо́же, благослове́н еси́.
Зе́льным поще́нием, я́ко благово́нною пи́щею, пита́я ду́шу свою́, преподо́бне Севастиа́не,/ те́мже и трисо́лнечному Божеству́ предста́ти сподо́бися, со А́нгелы поя́:/ оте́ц на́ших Бо́же, благослове́н еси́.
В приста́нище ти́хое вшед, Богому́дре, жите́йских пла́ваний отбе́г/ и волну́емым в бу́ри стра́шней спасе́нное окормле́ние быв, воспева́я:/ оте́ц на́ших Бо́же, благослове́н еси́.
Богоро́дичен: Изба́вихомся вси от страсте́й и бед,/ обстоя́ний и неду́г многообра́зных моли́твами Твои́ми, Богома́ти,/ Сы́ну Твоему́ зову́ще:/ благослове́н Бог оте́ц на́ших.
Песнь 8
Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся веки.
В поще́ниих кре́пкое и в моли́твах неле́ностное,/ терпе́ние во искуше́ниих, Севастиа́не преподо́бне, на земли́ показа́в,/ Бо́гови предстоя́, зове́ши:/ хвали́те и превозноси́те Его́ во ве́ки.
Уязви́ся Боже́ственным жела́нием, всеблаже́нне,/ те́мже непоро́чно и пра́ведно житие́ про́йде,/ до́ндеже дости́же Ца́рскаго Престо́ла, со А́нгелы поя́:/ хвали́те и превозноси́те Его́ во ве́ки.
Укра́шен доброде́тельми и в по́стницех, я́ко А́нгел, показа́ся,/ во све́те неизрече́нныя сла́вы почива́еши, песнь воспева́я Христу́ Бо́гу:/ хвали́те, по́йте и превозноси́те Его́ во ве́ки.
Богоро́дичен: Поглоще́ннаго боле́зньми и па́дшася возста́ви, Богома́ти,/ я́ко да Тя сла́влю во вся ве́ки.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Душетле́нныя стра́сти победи́в,/ я́ко Па́стырь и́стинный упа́сл еси́ слове́сное ста́до,/ я́ко цветы́ ра́йскими, напитава́я сих благода́тию, блаже́нне.
Узкий и приско́рбный ше́ствовав путь, о́тче Севастиа́не,/ теле́сне у́бо преста́вися, ду́хом же жив Бо́гови предстои́ши,/ но я́ко име́я дерзнове́ние к Бо́гу, моли́ спасти́ся нам.
Преде́л неукло́нен ве́ры и о́браз воздержа́ния иму́ще по́двиги твоя́, преподо́бне,/ вои́стинну Зижди́теля пе́сньми велича́ем.
Богоро́дичен: В Тя всели́вся, Всенепоро́чная,/ И́же пе́рвее родонача́льныя злообра́зно запе́нша человекоуби́йцу низложи́в, Роди́выйся из Тебе́ вся ны спасл есть.
Свети́лен:
А́нгельское житие́ жела́я, удали́л еси́ себе́ в пусты́ни/ и, стра́сти покори́в плотски́я, ра́вен А́нгелом яви́ся,/ о́тче наш Богоно́се Севастиа́не.
Богоро́дичен:
Держа́вным Твои́м покро́вом/ от враго́в наве́та нас, Чи́стая, Своя́ рабы́, соблюди́ невре́дны,/ Тя бо Еди́ну и́мамы прибе́жище в ну́ждах.
На хвали́тех стихи́ры, глас 8.
Подо́бен: О, пресла́внаго чудесе́:
Преподо́бне о́тче Севастиа́не,/ ты, и́го Христо́во на ра́мо взем до́блественне,/ наи́тие вра́жие попра́л еси́,/ сего́ ра́ди тя, ве́рнии, почита́ем, о преблаже́нне,/ и́нокующим похвало́./ Те́мже Христа́ непреста́нно моли́/ спасти́ ду́ши на́ша.
Ве́рою соше́дшеся вси,/ я́ко по́стника тя Христо́ва почита́ем, Севастиа́не,/ ра́дуяся у́бо, ше́ствовал еси́/ в пусты́ни непроходи́мей, му́дре,/ наста́вник был еси́ че́стен./ Те́мже мы тебе́ ве́рою взыва́ем, блаже́нне:/ по́стников похвало́, о нас моли́ся ко Го́споду/ поми́ловатися душа́м на́шим.
Преподо́бне о́тче наш,/ бу́дущия ра́ди жи́зни при реце́ Сохо́те всели́ся,/ ника́коже бо́йся неви́димыя враги́,/ мно́гажды тща́ния творя́щия тебе́,/ ты же моли́твами сих без ве́сти творя́ше./ О терпели́вый душе́ю в пу́сте ме́сте,/ чу́дное овча́, Христа́ А́гнца Па́стыря име́я,/ те́мже тя ве́рою вси чтим и ублажа́ем.
Сла́ва, глас 6:
Псало́мски пе́сньми днесь почти́м преподо́бнаго с весе́лием о Го́споде/ и па́ки рече́м:/ ра́дуйся, блаже́нства тезоимени́те Севастиа́не,/ ра́йскаго ра́дования напо́лнивыйся/ и от Христа́ Бо́га нетле́нный вене́ц прия́л еси́,/ я́ко свети́льник пресве́тлый, ду́шу свою́ просвети́л еси́./ И ны́не та́ко пе́сньми вси возопии́м:/ ра́дуйся, преподо́бне о́тче наш.
И ны́не, Богоро́дичен, глас 6:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся: моли́ся, Влады́чице,/ поми́ловатися душа́м на́шим.
НА ЛИТУРГИ́И
Блаже́нны от кано́на преподо́бнаго, пе́сни 3-я и 6-я. Проки́мен, глас 4: Честна́ пред Го́сподем: Стих: Что возда́м Го́сподеви: Апо́стол к Гала́том, зача́ло 213. Ева́нгелие от Луки́, зача́ло 24. Прича́стен: В па́мять ве́чную.
