Служба преподобнаго Саввы Крыпецкаго, иже во Псковских пределех
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 5.
Подо́бен: Ра́дуйся, Живоно́сный Крсте́:
Все свое́ душе́вное жела́ние/ те́пле от ю́ности своея́ возне́с ко Го́споду,/ ду́шу с те́лом посто́м очи́стил еси́,/ Бо́жия же ра́зума вода́ми напая́емь,/ плод благоуха́нен яви́лся еси́ житие́м свои́м,/ о́тче Са́вво преподо́бне./ А́ще и челове́к естество́м был еси́,/ но а́нгельски на земли́ пожи́л еси́,/ страх Бо́жий возлюби́в/ и за́поведем Его́ при́сно поуча́яся,/ всем же тих и уте́шителен/ словесы́ показа́лся еси́,/ ми́лостив же и кро́ток был еси́/ и ны́не сам бла́гости ве́чныя/ от Го́спода своего́ сподо́бился еси́,/ Ему́же приле́жно моли́ся/ дарова́ти душа́м на́шим мир и ве́лию ми́лость.
Богому́дре Са́вво, о́тче преподо́бне,/ пра́выми свои́ми стопа́ми/ тече́ние до́блественно к воздержа́нию просте́рл еси́/ и, ми́ра оша́явся,/ в пусты́ню дости́гл еси́ ра́достно,/ иде́же пе́рвее сам в себе́ Ду́ха Бо́жия водвори́л еси́,/ та́же храм из пусты́ни Бо́гу воздви́гл еси́,/ к нему́же и и́нок мно́жество собра́л еси́,/ с ни́миже а́нгельски на земли́ пожи́в/ и доброде́тельми сих просвети́в, возве́л еси́,/ иде́же свет невече́рний,/ иде́же а́нгельское предстоя́ние,/ с ни́миже приле́жно моли́ Христа́ Бо́га/ дарова́ти душа́м на́шим мир и ве́лию ми́лость.
Преподо́бне Са́вво, о́тче наш,/ в пусты́ни еди́н жи́тельствуя,/ еди́ному Бо́гу себе́ возложи́л еси́,/ от ми́ра те́сный пу́ть ше́ствовав,/ на широту́ пути́ ве́чнаго возше́л еси́,/ ду́шу безстра́стием украси́в,/ ре́вностнейших сподви́жников одушеви́л еси́,/ неви́димаго врага́ победи́в,/ ви́димо его́ изгоня́л еси́,/ сам и́нок и́стинен быв,/ тьмы́ и́нок воспита́л еси́,/ с ни́миже в Небе́сней оби́тели ны́не лику́я,/ предстои́ши Престо́лу всех Царя́, Христа́ Бо́га,/ Ему́же за ны приле́жно моли́ся/ дарова́ти душа́м на́шим мир и ве́лию ми́лость.
Сла́ва, глас 2:
Прииди́те, празднолю́бцы всех конце́в земли́,/ дне́сь благоче́стно восхва́лим псалмы́ и пе́сньми/ свято́е и честно́е преставле́ние блаже́ннаго отца́ Са́ввы,/ па́че ми́ра пусты́нную добро́ту возлюби́вшаго,/ вождя́ слепотству́ющим, по́стником украше́ние,/ исто́чника чуде́с, к Бо́гу моли́твенника непосты́дна./ Соше́дшеся у́бо, о празднолю́бцы,/ единогла́сно пе́сньми похва́льными воспои́м, глаго́люще:/ ра́дуйся, и́ноческаго жития́ пра́вило,/ о́бразе и вождю́ ко спасе́нию изве́стне,/ ра́дуйся, свети́льниче наш пресве́тлый,/ озаря́яй нам пути́ стро́потны46 светлостьми́ жития́ твоего́,/ ра́дуйся, и́же в беда́х и напа́стех нам вели́кое утеше́ние/ и те́плый предста́телю рабо́м твои́м./ Со дерзнове́нием у́бо ны́не предстоя́ Христу́ Бо́гу,/ моли́ Его́ о и́же ве́рою и любо́вию почита́ющих/ святу́ю па́мять твою́.
И ны́не, Богоро́дичен, глас то́йже:
Никто́же, притека́яй к Тебе́, посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.
На стихо́вне стихи́ры, глас 2.
Подо́бен: До́ме Евфра́фов:
От земны́х к Небе́сным оби́телем,/ пресла́вне Са́вво о́тче, преше́л еси́/ и та́мо святы́х че́сти сподо́бился еси́,/ с ни́миже моли́ся/ спасти́ся душа́м на́шим.
Стих: Честна́ пред Го́сподем/ сме́рть преподо́бных Его́.
Ны́не собо́р и́ночествующих/ тебе́, Са́вво о́тче, предста́,/ заря́ми луче́й святы́ни твоея́,/ я́ко со́лнцем, све́тло облиста́емь,/ прославля́ет све́тлость твоея́ души́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Соше́дшеся, ли́цы оте́ц,/ к свяще́нному ковче́гу моще́й Са́ввы,/ блаже́ннаго отца́ на́шего,/ почти́м любо́вию святу́ю па́мять его́,/ сла́вяще Го́спода.
Сла́ва, глас 5:
Преподо́бне о́тче,/ не дал еси́ сна свои́ма очи́ма,/ ни ве́ждома дрема́ния,/ до́ндеже, ду́шу и те́ло от страсте́й свободи́в,/ себе́ угото́вал еси́ в дом и жили́ще Бо́гу,/ пусты́ню же свою́ во оби́тель бра́тии,/ в не́йже совоку́пно с ни́ми сла́вил еси́/ Отца́, и Сы́на, и Свята́го Ду́ха,/ Тро́ицу Единосу́щную,/ Ю́же моли́ и ны́не, о́тче наш,/ о е́же спасти́ся душа́м на́шим.
И ны́не, глас то́йже:
Обра́дованная, хода́тайствуй/ Твои́ми моли́твами/ и испроси́ душа́м на́шим мно́жество щедро́т/ и очище́ние прегреше́ний, мо́лимся.
Тропа́рь пи́сан на вели́цей вече́рни.
Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 6.
Подо́бен: Все отло́жше:
Ми́ра возненави́дев,/ Христа́ же возлюби́в,/ Сио́на духо́внаго жи́тель/ показа́лся еси́, о́тче Са́вво,/ наставле́нием учи́теля своего́,/ преподо́бнаго Евфроси́на,/ соверше́ннаго смиренному́дрия дости́гл еси́,/ та́же и други́я к смиренному́дрию сам приве́л еси́,/ мно́га же искуше́ния претерпе́в/ и Боже́ственным Ду́хом себе́ вооружи́в,/ мно́гим искуша́емым помо́гл еси́,/ с ни́миже и лука́ваго победи́л еси́/ си́лою И́же от Де́вы возсия́вшаго/ Христа́ Бо́га на́шего,/ Ему́же со дерзнове́нием моли́ся/ при́сно о душа́х на́ших.
Все свое́ жела́ние серде́чное ко Влады́це Христу́,/ о́тче Богому́дре Са́вво, впери́л еси́,/ и, вся мирска́я вмени́в за уме́ты,/ пусты́ню ми́ру предпоче́л еси́,/ ю́же пречестны́м хра́мом/ в сла́ву Иоа́нна Богосло́ва украси́л еси́,/ и мно́жество и́нок себе́ привле́кл еси́,/ и доброде́телем научи́л еси́,/ и вся к лицу́ Небе́снаго Царя́ приве́л еси́,/ иде́же свет невече́рний,/ иде́же А́нгел ликостоя́ние./ С ни́миже предстоя́, преподо́бне,/ и нас помина́й, чад свои́х,/ со дерзнове́нием моля́ Христа́ Бо́га/ при́сно о душа́х на́ших.
Преподо́бне о́тче Са́вво,/ ты, Госпо́дним жела́нием распали́вся,/ от чужди́х стран взыска́ти Го́спода прише́л еси́/ и па́че в стране́ пусты́нней Его́ обре́л еси́,/ иде́же, стра́сти мирски́я воздержа́нием оттря́с,/ сам и́нныя47 наста́вил еси́/ и мно́жество сподви́жников и смоли́твенников/ в сла́ву Христо́ву собра́л еси́,/ те́мже и Госпо́дь тя просла́ви/ луча́ми чуде́с твои́х,/ Его́же со дерзнове́нием моли́/ спасти́ся душа́м на́шим.
Сла́ва, глас 8:
Рачи́тель быв Небе́снаго жития́/ и равностоя́тель Безпло́тных сил,/ о́тче Са́вво, преблаже́нне чудотво́рче,/ церко́вное утвержде́ние,/ богохрани́мому гра́ду Пско́ву свети́льниче,/ и́ночеству удобре́ние,/ при́зри ны́не на нас, пра́зднующих пречестну́ю па́мять твою́,/ мы бо, ча́да твоя́ и о́вцы слове́сных твои́х па́житей,/ я́коже ко отцу́ и па́стырю на́шему,/ к тебе́ ны́не стеко́хомся,/ приими́ ми́лостивно на́ше ма́лое моле́ние/ и испроси́ нам у Христа́ мир и ве́лию ми́лость.
И ны́не, Богоро́дичен: Ца́рь Небе́сный:
Проки́мен дне. И чте́ния 3 преподо́бническая.
Прему́дрости Соломо́новы чте́ние (главы́́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́в тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 4:
Егда́ Боже́ственное жела́ние на́йде на тя,/ преподо́бне о́тче Са́вво,/ тогда́, мирска́я вся возненави́дев,/ ко Христу́ еди́ному еди́н прихо́диши/ и, Того́ яре́м взем,/ а́ще и по стопа́м Евфроси́на ходи́ти изво́лиши,/ оба́че сам быв про́чим о́браз воздержа́ния,/ моли́твами же подо́бник своему́ отцу́ и учи́телю./ Мы же мо́лим тя, о́тче наш:/ моли́ся Го́споду Бо́гу/ о е́же спасти́ и просвети́ти ду́ши на́ша.
Егда́ Боже́ственное раче́ние распали́ тя,/ блаже́нне о́тче Са́вво,/ тогда́, зре́ти жела́я Боже́ственную све́тлость жития́ отше́льнаго,/ житие́ вожделе́л еси́ безмо́лвное,/ и, во пло́ти быв, я́ко безпло́тный,/ в безлю́дную и безпло́дную пусты́ню всели́лся еси́,/ ю́же слеза́ми свои́ми оплодотвори́л еси́,/ и, я́ко ма́слина, сам в ней возра́сл еси́/ жела́нием улучи́ти Влады́це своему́ предстоя́ние./ Ны́не же, священноле́пно ду́хом предстоя́ Бо́гу,/ со А́нгелы ликовству́еши,/ мы же мо́лим тя:/ моли́ся, преподо́бне о́тче наш, Бо́гу/ о е́же спасти́ и просвети́ти ду́ши на́ша.
Егда́ Боже́ственное просвеще́ние озари́ тя, о́тче Са́вво,/ тогда́ свет твой не утаи́ся и в пусты́ни/ и от тьмы грехо́вныя привлече́ к тебе́ мно́гия,/ и́мже благода́тную оби́тель созда́л еси́,/ в необурева́емое приста́нище и душа́м во спасе́ние,/ Пода́телю же благода́ти Бо́гу/ и в че́сть благода́тных уго́дников Его́/ благоле́пны хра́мы на славосло́вие воздви́гл еси́,/ в ни́хже и сам до́бре подвиза́вся,/ по преставле́нии твое́м почи́л еси́./ Ны́не же со святы́ми сожи́тельствуя,/ моли́ Бо́га о е́же спасти́ и просвети́ти ду́ши на́ша.
Сла́ва, глас 5:
До́бре тече́ние свое́ соверши́в,/ Са́вво преподо́бне,/ ду́хом ко Христу́ восхожде́ние получи́л еси́,/ честны́я же твоя́ мо́щи по святе́м преставле́нии/ оби́тели и бра́тии твое́й оста́вил еси́ под земле́ю,/ я́же, я́ко ни́ва, до́бре возде́ланная,/ в не́дра своя́ прия́вши сие́ се́мя тле́ния,/ произрасти́ нетле́ние/ и яви́ тя, а́ки цвет, благоуха́нием благода́ти,/ и а́ки дре́во, плодоно́сием чуде́с удивля́юще,/ я́ко и пе́рсть, облежа́вшая свяще́нныя мо́щи, и гроб твой,/ Боже́ственною се́ю си́лою напита́вшиися,/ то́чат ве́рным многоразли́чныя да́ры,/ на освяще́ние душа́м же и телесе́м/ всех к тебе́ вопию́щих:/ моли́ Христа́ Бо́га/ дарова́ти нам ве́лию и бога́тую ми́лость.
И ны́не, Богоро́дичен: Храм и две́рь еси́:
На стихо́вне стихи́ры, глас 8.
Подо́бен: О, пресла́внаго чудесе́:
О пресла́вное чу́до!/ Я́ко звезда́ от чужди́х стран,/ полно́щней стране́ на́шей,/ Са́вво, провозсия́л еси́/ и просвети́л еси́ всех/ луча́ми доброде́телей твои́х,/ быв и́ноком утвержде́ние,/ по́стником пра́вило./ Те́мже, соше́дшеся ны́не в па́мять твою́,/ Христа́ возвелича́ем,/ прославля́юща Своя́ уго́дники.
Стих: Честна́ пред Го́сподем/ сме́рть преподо́бных Его́.
О пресла́вное чу́до!/ Са́вва оте́ц во пло́ти,/ Креста́ си́лою вооружи́вся,/ я́ко кре́пкий во́ин,/ победи́ безпло́тных враго́в ополче́ния,/ совле́кся же пло́ти,/ со А́нгелы водворя́ется./ Те́мже, пра́зднующе па́мять его́, воспое́м:/ того́ моли́твами, Христе́ Бо́же,/ спаси́ ду́ши на́ша, я́ко Милосе́рд.
Стих: Блаже́н муж, боя́йся Го́спода,/ в за́поведех Его́ восхо́щет зело́.
О пресла́вное чу́до!/ В после́дняя времена́ па́че пе́рвых/ яви́ся до́бльственник ве́ры и доброде́телей,/ и при ве́чере веко́в, я́ко у́тренняя заря́,/ облиста́ полно́щныя страны́,/ и с челове́ки я́ко А́нгел на земли́ поживе́,/ изобража́я в себе́ добро́ту Боже́ственную./ Те́мже, па́мять его́ пра́зднующе, воспои́м:/ того́ моли́твами, Христе́ Бо́же,/ спаси́ ду́ши на́ша.
Сла́ва, глас 5:
Преблаже́нне Са́вво, о́тче наш,/ всех су́щих с тобо́ю учи́л еси́, глаго́ля:/ ча́да, ели́ка си́ла есть, подвиза́йтеся о свое́м спасе́нии/ и терпи́те тесноту́ настоя́щую,/ да полу́чите простра́нство бу́дущее./ Никто́же бо, в ле́ности пребыва́я,/ получи́т плоды́ трудо́в,/ и то́чию зде законностра́ждущии/ та́мо зако́нно венча́ются от Христа́ Бо́га/ неувяда́емыми венцы́.
И ны́не, Богоро́дичен: Утоли́ боле́зни:
На благослове́нии хле́бов тропа́рь преподо́бнаго, два́жды, и Богоро́дице, Де́во, ра́дуйся: еди́ножды.
Тропа́рь преподо́бнаго, глас 8:
Пусты́ни яви́лся еси́ до́брое насажде́ние, преподо́бне,/ от ю́ности бо и в ми́ре изво́лил еси́ чи́стое житие́;/ ревну́я же бо́льшему, и дом оте́ческий оста́вил еси́,/ и, вся кра́сная ми́ра сего́ презре́в,/ от чужды́х стран прише́л еси́/ во оби́тели Богоспаса́емаго гра́да Пско́ва,/ и послуша́нию преподо́бнаго Евфроси́на преда́лся еси́;/ та́же простира́яся умо́м еще́ к вя́щшему,/ всели́лся еси́ в пусты́ню,/ в не́йже оби́тель прече́стну воздви́гл еси́,/ и мно́жество и́нок собра́л еси́,/ и их наста́вил еси́ на пу́ть и́стинный./ Те́мже и Христо́с, Ему́же в же́ртву себе́ прине́сл еси́,/ ви́дев твоя́ благи́я труды́,/ я́ко пресве́тла тя свети́льника,/ и по преставле́нии чудесы́ обогати́, Са́вво, о́тче наш./ Моли́ся у́бо при́сно ему́ о стране́ на́шей,/ е́же дарова́тися ей на враги́ побе́дам,/ ста́ду же твоему́ от враг ненаве́тну пребы́ти,/ и всем нам спасти́ся.
Ин тропа́рь, глас 7:
От мирска́го жития́ изше́д,/ отверже́нием же ми́ра Христу́ после́довал еси́/ и, в пусты́ни все́лься,/ равноа́нгельное житие́ пожи́л еси́,/ отону́дуже, веселя́ся, преше́л еси́ к Небе́сным черто́гом,/ и ны́не, со А́нгелы Влады́чню Престо́лу предстоя́,/ помина́й нас, чад свои́х,/ я́же собра́л еси́, Богому́дре,/ да ра́достию от души́ вопие́м:/ ра́дуйся, Са́вво,/ о́тче преблаже́ннейший.
НА У́ТРЕНИ
На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Зако́нно устро́ив свою́ жи́знь,/ страстна́я взыгра́ния до конца́ укроти́л еси́,/ над ни́миже и побе́дный вене́ц прия́в, Са́вво, о́тче наш,/ моли́ спасти́ся душа́м на́шим.
Сла́ва, и ны́не, Богоро́дичен:
Под кров Твой, Пречи́стая Де́во, нас, прибега́ющих, моли́тву прии́мши,/ не преста́й моля́щи Человеколю́бца Бо́га/ спасти́ся душа́м на́шим.
По 2-м стихосло́вии седа́лен, глас 1:
Смири́л еси́ страсте́й свои́х воста́ния умерщвле́нием пло́ти, преподо́бне о́тче Са́вво,/ и жи́знь безстра́стную по сме́рти прия́л еси́./ Те́мже дне́сь Христо́ва Це́рковь пра́зднует твою́ святу́ю па́мять/ и пое́т тя, всем преподо́бным украше́ние.
Сла́ва, и ны́не, Богоро́дичен:
Наста́ви ны на пу́ть покая́ния,/ уклоня́ющияся при́сно к злым безпу́тием/ и Преблага́го прогне́вающия Го́спода, Неискусобра́чная Благослове́нная Мари́е,/ прибе́жище отча́янных челове́ков, Бо́жие обита́лище.
По полиеле́и седа́лен, глас 8:
Влады́це Христу́ во всем, о́тче Са́вво, после́довал еси́/ и по стезя́м его́ Ца́рствия насле́дник соде́лался еси́,/ нам же по блаже́ннем преставле́нии честны́я твоя́ мо́щи в насле́дие оста́вил еси́, точа́щия исцеле́ния разли́чна./ Те́мже ти вопие́м:/ моли́ Христа́ Бо́га и боле́зней душе́вных исцеле́ние подава́й/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Вся́каго преще́ния и озлобле́ния челове́к спаси́ нас, Пречи́стая Де́во,/ Тебе́ бо и́мамы покро́в и заступле́ние прибега́ющим к Тебе́, Богома́ти,/ и рожде́ннаго из Тебе́ Бо́га на́шего,/ Его́же моли́ изба́витися рабо́м Твои́м.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 3:
Ра́дуйся, преподо́бне о́тче Са́вво,/ пусты́нный граждани́не,/ до́бре наста́вниче отше́льником, му́дре./ Сам бо зако́н Госпо́день до́бре извы́к/ и ве́ру соблю́д непоколеби́му,/ о́браз яви́лся еси́ ста́ду/ и при́сно о спасе́нии его́ хода́тай ко Христу́ Бо́гу,/ не оставля́я их и по святе́м преставле́нии свое́м,/ промышля́я же всегда́ о ча́дех свои́х поле́зная./ Не преста́й у́бо моли́тися Влады́це Христу́,/ е́же не оскуде́ти твое́й оби́тели,/ ю́же соста́вил еси́ мно́гими по́ты и труды́,/ пода́ждь и земли́ плодоро́дие на пропита́ние нам,/ всем же мир и спасе́ние душа́м.
Кано́н Богоро́дице, со ирмосо́м на 6, глас 6: Прича́щшися Е́ва са́ду: зри в Окто́ихе в Неде́лю на у́трени и кано́н преподо́бному Са́вве на 8, глас то́йже.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.
Наста́ви мя, Го́споди Бо́же мой,/ да возмогу́ благоче́стно уго́дника Твоего́, преподо́бнаго Са́ввы,/ сла́вное и честно́е восхвали́ти успе́ние.
Му́жески подвиза́вся во пло́ти, преподо́бне о́тче Са́вво,/ и быстроту́ духо́вную восприи́м,/ взя́лся еси́ на высоте́ Небе́сней, иде́же ны́не со А́нгелы прославля́ешися./ Та́мо и нас помина́й.
На высоте́ Небе́сней сый, преподо́бне,/ нам испроси́ от Бо́га благода́ть, и ми́лость,/ и согреше́нием оставле́ние.
Зако́ны Боже́ственныя соблюда́я,/ сам бра́тии твое́й законополо́жник был еси́/ и, победи́в ко́зни лука́ваго, то́йжде побе́де их научи́л еси́./ Моли́твами твои́ми защити́ и нас от наве́тов сего́.
Богоро́дичен: Пресу́щное Сло́во, естество́ плотско́е прии́м от чи́стых крове́й Твои́х,/ плотска́го тле́ния нас изба́ви, Чи́стая./ Сего́ ра́ди Тя при́сно сла́вим.
Катава́сия: Крест начерта́в, Моисе́й:
Песнь 3
Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Вы́спреннею моли́твою, о́тче Са́вво,/ я́ко крила́ми, возлете́л еси́ к преми́рному наслажде́нию с ли́ки оте́ц,/ с ни́миже водворя́ешися в неизрече́нней ра́дости Го́спода своего́,/ нам же от честны́я своея́ ра́ки чуде́с сия́ния, а́ки луча́, излива́я,/ сердца́ восхища́еши зову́щих:/ ра́дуйся, светоно́сне о́тче наш.
Вои́стинну блаже́нныя жи́зни сподо́бился еси́, преподо́бне о́тче Са́вво,/ целому́дрием и поще́нием освяти́в ду́шу и плоть свою́,/ нас же к славосло́вию тя дви́жеши, зову́щих:/ ра́дуйся, светоно́сне о́тче наш.
Я́коже честны́й би́сер твоя́ мо́щи, гроб и честна́я пе́рсть твоя́ нам обрето́шася, Са́вво о́тче преподо́бне,/ шестьдеся́т бо лет пребы́вше сокрове́ни,/ ны́не все́ми ви́димы предлежа́т,/ разли́чна исцеле́ния неоску́дно подаю́ще./ Те́мже вопие́м ти:/ ра́дуйся, светоно́сне о́тче наш.
Богоро́дичен: Из ложе́сн Твои́х, Пречи́стая, пра́вды Со́лнце, Христо́с, возсия́,/ Его́же Боже́ственными заря́ми и мое́ окая́нство просвети́, омраче́нное грехи́.
Катава́сия: Жезл во о́браз та́йны прие́млется:
Седа́лен, глас 3:
Боже́ственным жела́нием к безсме́ртию воспаря́я, о́тче Са́вво,/ кресто́м Христо́вым умерщвле́нное те́ло свое́ обрати́л еси́ в нетле́ние,/ пусты́ню же свою́ град Небе́сный сотвори́л еси́/ и, пло́тяных бра́тий собра́в, во ангелоподо́бных претвори́л еси́,/ с ни́миже сла́вя в Трех Ипоста́сех Единосу́щную и Нераздели́мую Тро́ицу, сам просла́вился еси́./ Мы же тя моли́твенника те́пла стяжа́хом к Бо́гу.
Сла́ва, и ны́не, Богоро́дичен:
Ми́лости исто́чниче, чистоты́ храни́лище, еди́на Пречи́стая Ма́ти Де́во,/ чистото́ю А́нгелы превосходя́щи, очи́сти мене́, па́че всех оскверне́на плотски́ми прегреше́нии,/ и вку́пе с преподо́бным отце́м на́шим Са́ввою пода́ждь ми сле́зы умиле́ния,/ да омы́юся и́ми, стра́стный,/ и сподо́блюся Твоея́ ве́лия ми́лости.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Безме́рное смире́ние восприи́м, к Боже́ственней высоте́ возне́слся еси́,/ и ны́не, в ра́йских селе́ниих водворя́яся, о́тче Са́вво,/ помина́й и нас в моли́твах твои́х.
Благоуха́нный сосу́д яви́лся еси́ Боже́ственному Ду́ху/ и всех сердца́ услажда́еши Боже́ственными арома́ты доброде́телей твои́х./ Ны́не же, в ра́йских селе́ниих водворя́яся,/ помина́й и нас в моли́твах твои́х.
Ста́до твое́, преподо́бне, му́дре упра́вил еси́/ и от жи́зни сей к Небеси́ упа́сл еси́ благоче́стно./ Ны́не же, в ра́йских селе́ниих с ним водворя́яся,/ помина́й и нас в моли́твах твои́х.
Богоро́дичен: Чистоты́ селе́ние, жили́ще Влады́ки всех,/ Хода́таице о всех ми́лостивная, Богора́дованная Де́во Ма́ти Мари́е,/ пою́щия Тя уще́дри.
Катава́сия: Услы́шах, Го́споди:
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Бо́дренными бде́нии и ча́стыми воздыха́нии/ благода́ть Ду́ха возрасте́ в тебе́, о́тче наш Са́вво,/ те́мже сла́вна тя показа́ и по преставле́нии.
Благода́ть целе́ния от Бо́га прии́м, о́тче Са́вво,/ хотя́ща челове́ка я́звою умре́ти и жи́зни отча́явшася,/ моли́твами ученико́в твои́х к тебе́ о нем/ и водо́ю с честны́я твоея́ пе́рсти вско́ре исцели́л еси́.
Боле́зньми зу́бными, и тряса́вицею, и огневи́цею,/ и бесно́вании, и ра́нами стра́ждущих,/ я́ко врач преесте́ственный, мгнове́ние врачева́л еси́,/ исцеля́я и ду́ши от я́звы грехо́вныя.
Богоро́дичен: По рождестве́ Боже́ственнем пребыла́ еси́, Де́во, я́коже пре́жде,/ Бог бо, Тобо́ю рожде́йся, сохрани́ Тя непоро́чну./ Те́мже: ра́дуйся, Де́во Неневе́стная,– взыва́ем Ти.
Катава́сия: О треблаже́нное Дре́во:
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.
По́двиги твои́ми духо́вную и теле́сную ни́ву в пусты́ни твое́й возде́лал еси́/ и в насыще́ние душ и теле́с бра́тии твоея́ кла́сы многопло́дны возрасти́л еси́,/ и́миже и пита́еши благоче́стно восхваля́ющих тя/ и по твое́м отше́ствии к Бо́гу, Са́вво, преподо́бне о́тче наш.
Не́когда, преподо́бне о́тче Са́вво, по преставле́нии твое́м/ приидо́ша разбо́йницы но́щию ко оби́тели твое́й,/ хотя́ще озло́бити ученики́ твоя́ и мня́ще восхи́тити сокро́вище некра́домое,/ ты же еди́ным явле́нием свои́м устраши́л еси́ их/ и сокро́вище спасе́ния покая́нием им дарова́л еси́ ту́не.
Ка́плями по́тов твои́х, преподо́бне, пусты́ню ороси́л еси́,/ от ни́хже сия́ процвете́ кри́ны благоуха́нными,/ услаждающими населя́ющия и посеща́ющия ю́/ и сла́вящия тя при́сно.
Честна́ сме́рть яви́ся пред Тобо́ю блаже́ннаго отца́ Са́ввы, Го́споди вся́ческих,/ просла́вил бо еси́ его́ пред А́нгелы и челове́ки/ и оста́нки моще́й его́ исто́чник исцеле́ний ми́ру яви́л еси́.
Богоро́дичен: Преблага́я Влады́чице, Я́же Всеблага́го Бо́га пло́тию ро́ждшая,/ тле́нное страстьми́ мое́ се́рдце изреши́ сете́й,/ да ве́рою и любо́вию пою́ и велича́ю Тя.
Катава́сия: Во́днаго зве́ря во утро́бе/ дла́ни Ио́на крестови́дно распросте́р:
Конда́к, глас 1:
Возсия́ от пусты́ни сла́вному гра́ду Пско́ву/ но́вое све́тлое со́лнце,/ чуде́с луча́ми всех озаря́ющее/ и благода́тне согрева́ющее,/ тьму́ же вся́ких искуше́ний и наве́тов/ и хлад грехо́вный отженя́ющее./ Прииди́те у́бо, пра́зднующе блаже́нную па́мять/ сего́ свети́льника на́шего, воспои́м:/ сла́ва Бо́гу, та́ко промышля́ющему о нас,/ сла́ва уго́днику Его́, сохраня́ющу нас!/ Ты же, преподо́бне о́тче Са́вво,/ о и́же твою́ при́сно па́мять почита́ющих/ моли́ Христа́ Бо́га,/ я́ко да ми́лостив бу́дет нам и в День су́дный.
И́кос:
Всеси́льное Ду́ха Свята́го де́йство и бу́яя ми́ра избира́ет, да прему́дрый посрами́т,/ и немощна́я ми́ра, да посрами́т кре́пкая,/ и худоро́дная ми́ра, и уничиже́нная, и не су́щая, да су́щая упраздни́т,/ я́ко да не похва́лится вся́ка плоть пред Бо́гом, рече́ апо́стол./ Си́це блаже́нный наш оте́ц Са́вва,/ не велему́дрствуя, мудре́ц яви́ся мудре́йший ве́ка сего́,/ немощству́яй, посрами́ кре́пкая,/ неведо́мый ро́дом, превзы́де сла́вою благоро́дных,/ уничиже́н, превознесе́ся па́че го́рдых/ и, я́ко ничто́же сый в ми́ре, покори́ себе́ су́щая,/ оста́вив сро́дники своя́ по пло́ти, сниска́ мно́жайшия по ду́ху,/ покори́вся науче́нию преподо́бнаго Евфроси́на, сам сравни́ся ему́ во учи́тельстве,/ удали́вся от ми́ра, весь мир привлече́ к себе́,/ и безпло́дная пусты́ня его́ произрасти́ оби́льную жа́тву спасе́ния всем./ Те́мже пра́зднующе дне́сь пресла́вную па́мять его́,/ бра́тия и ученицы́, соше́дшеся, возопие́м ему́:/ о́тче и наста́вниче наш, преподо́бне Са́вво,/ спаса́й нас при́сно и моли́ Христа́ Бо́га,/ я́ко да ми́лостив бу́дет нам и в День су́дный.
Песнь 7
Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
К све́ту незаходи́мому заше́л еси́, блаже́нне,/ лучеза́рне же па́ки возше́д, озари́л еси́, я́ко со́лнце, зе́млю Росси́йскую и град Псков./ Те́мже прославля́юще Бо́га, тобо́ю нас просвети́вшаго,/ при́сно пое́м, я́коже и ты сам воспева́л еси́:/ благослове́н Бог оте́ц на́ших.
Чу́дным житие́м, преподо́бне, благода́ть Боже́ственнаго Ду́ха стяжа́л еси́/ и, блаже́н быв в животе́ свое́м,/ блаже́нную кончи́ну прия́л еси́ о Христе́,/ к Нему́же, ра́дующеся о тебе́, тебе́ же подража́юще, взыва́ем:/ оте́ц на́ших Бо́же, благослове́н еси́.
Неконча́емым блаже́нством с ли́ки святы́х ны́не наслажда́яся,/ блажи́ши и нас, преподо́бне, то́ками исцеле́ний от честна́го гро́ба и пе́рсти твоея́./ Те́мже, тебе́ я́коже Боже́ственное сокро́вище стяжа́вше,/ до́ндеже в животе́ есмы́, тебе́ же подража́юще, при́сно вопие́м:/ благослове́н Бог оте́ц на́ших.
Богоро́дичен: Пресвята́я Де́во, Све́та Незаходи́маго, Бо́га ро́ждшая,/ пою́щия Тя прича́стники покажи́ све́та и вся́каго вре́да изба́ви,/ моля́щися о нас со отце́м на́шим, при́сно воспева́вшим:/ благослове́н Бог оте́ц на́ших.
Катава́сия: Безу́мное веле́ние:
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Стра́сти душе́вныя и боле́зни теле́сныя врачу́еши, о́тче Са́вво,/ приступа́ющих к тебе́ от всея́ души́,/ исцели́ и на́ша неду́ги душ и теле́с,/ да, тобо́ю сохраня́еми, тя превозно́сим во вся ве́ки.
Мирска́го и пусты́ннаго диа́вола посрами́вый и победи́вый,/ огражда́й и нас при́сно от наве́тов его́ и искуше́ний,/ да, тобо́ю сохраня́еми, тя превозно́сим во вся ве́ки.
Чистоты́ и целому́дрия наста́вниче,/ не обину́лся еси́ воспрети́ти вход и княги́не во оби́тель твою́,/ сохрани́ и нас несобла́знены в чистоте́ и целому́дрии,/ да, тобо́ю сохраня́еми, тя превозно́сим во вся ве́ки.
Нельсти́вый пропове́дниче покая́ния,/ жесто́це облича́л еси́ от ми́ра в пусты́ню к тебе́ приходя́щия,/ наказу́й обличи́тельне и на́ше жестокосе́рдие,/ да, тобо́ю к покая́нию обраща́еми,/ тя превозно́сим во вся ве́ки.
Богоро́дичен: Изба́вльшеся пе́рвыя кля́твы рождество́м Твои́м,/ Всеблагослове́нная Отрокови́це Богора́дованная, мо́лим:/ изба́ви нас и ве́чнаго осужде́ния,/ да, Тобо́ю избавля́еми, Тя превозно́сим во вся ве́ки.
Катава́сия: Благослови́те, о́троцы:
Песнь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Сам в пусты́ни посто́м изнури́вый плоть свою́/ и пе́рвее я́годинами, во И́мя Святы́я Тро́ицы дарова́нными тебе́, пита́выйся,/ научи́ и нас посту́ твоему́, блаже́нне,/ па́че же насыща́й нас духо́вныя пи́щи.
Спасы́й оби́тель свою́ от нахожде́ния враго́в,/ испроси́ от Го́спода правосла́вным лю́дем кре́пость на проти́вныя,/ па́стырем же му́дрость и сове́т проти́ву всех наве́тов вну́тренних.
Смертоно́сную я́зву теле́сную притека́ющих к свяще́нней ра́це твое́й/ еди́ным прикоснове́нием и пе́рстию гро́ба твоего́ исцели́вый,/ уврачу́й смертоно́снейшую я́зву душ на́ших моли́твами твои́ми.
Разбо́йников, зломы́сливших на оби́тель твою́, пощади́вый,/ и к покая́нию обрати́вый, и спасы́й,/ пощади́ и нас, припа́дающих ти ве́рою и любо́вию,/ обрати́в и на́ша ду́ши к покая́нию,/ и спаси́ моли́твами твои́ми.
Богоро́дичен: Све́том Твои́м мя, Богора́дованная в жена́х Де́во, просвети́, молю́ся,/ и огня́ ве́чнаго изба́ви,/ я́ко да велича́ю Тя и по до́лгу воспою́ вели́чия Твоя́.
Катава́сия: Та́ин еси́, Богоро́дице, рай:
Свети́лен:
Поревнова́в, блаже́нне, преподо́бному Евфроси́ну/ и от него́же наста́влен быв на духо́вныя по́двиги,/ с ним во свя́тости сравни́лся еси́/ и, мно́го лет в пусты́ни Кры́петстей потруди́вся в безмо́лвии, посте́, воздержа́нии и в злострада́ниих,/ ны́не, во све́те Святы́я Тро́ицы водворя́яся, блаже́нствуеши.
Сла́ва, и ны́не, Богоро́дичен:
Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и носи́ла еси́ на руку́ Боже́ственное Сло́во,/ Его́же пе́сньми досто́йно с Тобо́ю сла́вим.
На хвали́тех стихи́ры, глас 8.
Подо́бен: О, пресла́внаго чудесе́:
Преподо́бне о́тче Са́вво,/ ты в пусты́ни а́нгельское сожи́тельство обре́л еси́/ и, ми́ра отчужди́вся,/ мир душе́вный стяжа́л еси́,/ возненави́дев му́дрость ве́ка сего́,/ Небе́сною просвети́лся еси́,/ отженя́я пе́рвее притека́вшия к тебе́,/ из них по сих лик ангелоподо́бных бра́тий соста́вил еси́/ и пусты́ню во град Небе́сный/ претвори́л еси́.
Преподо́бне о́тче Са́вво,/ похва́л и че́сти во оби́телех оша́явся,/ в пусты́ни па́че просла́влен был еси́,/ искуше́ний же го́рдости/ от мирска́го диа́вола устраня́яся,/ в безмо́лвии пусты́нным диа́волом/ зле́е искуше́н был еси́,/ но побежда́ющего мир диа́вола/ во уедине́нии смире́нием/ посрами́л и победи́л еси́.
Преподо́бне о́тче Са́вво,/ сам сый храм Ду́ха Бо́жия нерукотворе́нный,/ рукотворе́нныя хра́мы Бо́гу воздви́гл еси́,/ чистоты́ и целому́дрия учи́тель,/ де́вственному напе́рснику Христо́ву/ оби́тель твою́ посвяти́л еси́,/ наста́вник бра́тии,/ ино́му жезл правле́ния вручи́л еси́,/ ду́хом вознесы́йся к Бо́гу,/ нам неотлу́чно мо́щи твоя́ оста́вил еси́,/ и́мже предстоя́ще ны́не, пра́зднующии твое́ успе́ние,/ я́ко при́сно с на́ми живу́ща тя и́мамы,/ почерпа́юще от них всегда́ то́ки исцеле́ний.
Сла́ва, глас 6:
Са́вво, о́тче преподо́бне,/ ки́ими досто́йными венцы́ увязе́м тя/ или́ что нарече́м тя?/ Отца́ ли?/ Но ты па́че отце́в возлюби́л еси́ нас./ Учи́теля ли?/ Но ты сам па́че всех/ в зако́не Госпо́дни день и но́щь поуча́лся еси́./ Па́стыря ли?/ Но ты не от ста́да пита́лся еси́/ и па́че сам ове́ц свои́х пита́л еси́./ Нача́льника ли?/ Но ты всем послужи́л еси́./ Бра́та ли?/ Но ты всех старе́йший был еси́./ Сла́вим у́бо тя я́ко А́нгела на́шего храни́теля,/ уте́шителя ско́рбным, врача́ боля́щим,/ защи́тителя наве́туемым, предста́теля всех у Бо́га/ и при́сно моли́твенника о душа́х на́ших.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, с преподо́бным отце́м Са́ввою,/ поми́ловатися душа́м на́шим.
Славосло́вие вели́кое. Ектении́. И отпу́ст.
На Литурги́и слу́жба преподо́бническая.
Моли́тва
О преподо́бне о́тче Са́вво, пусты́нный подви́жниче, в телеси́ А́нгеле, во́ине Христо́в до́блественне, ве́ры пра́вило, Це́ркви утвержде́ние, благоче́стия о́бразе, доброде́телей свети́ло, трудо́в, поста́, воздержа́ния, чистоты́ и целому́дрия предводи́телю, помо́щниче всем нужда́ющимся, стра́нствующим вождю́, пла́вающим ко́рмчию, обурева́емым приста́нище, ослабева́ющим по́моще, оби́димым заступле́ние, печа́льным утеше́ние, вдови́цам и си́рым покро́ве, а́лчущим пита́ние, наги́м одея́ние, пла́чущим утеше́ние, боля́щим исцеле́ние, ненаде́ющимся наде́яние, христиа́н всех хода́тайство, предста́тельство и защище́ние! При́зри ми́лостивно на ны, припа́дающия к святы́м моще́м твои́м, внемли́ моли́твам на́шим и пода́ждь коему́ждо от нас благопотре́бная, проси́мая от Тебе́. Ве́мы, свя́тче Бо́жий, я́ко и́маши дерзнове́ние ко Влады́це Христу́ Бо́гу, и, ели́ка а́ще воспро́сиши у Него́, да́стся нам. А́ще же и недосто́йни есмы́ благода́ти Его́, оба́че твоя́ же моли́тва да сотвори́т ны ея́ досто́йны, мно́го бо мо́жет приле́жная моли́тва пра́веднаго, я́коже рече́ апо́стол. Сам у́бо ты воздви́гни нас из глубины́ грехо́вныя, неве́рныя просвети́, еретики́ обрати́, заблужде́ния в нас от Правосла́вия к позна́нию и́стинныя ве́ры наста́ви, всей же Це́ркви исхода́тайствуй мир и святы́ню, единомы́слие в ве́ре, умо́в благопостоя́ние, соревнова́ние в благоче́стии, единоду́шие в братолю́бии, ве́рность к оте́честву, пре́данность предержа́щей вла́сти, нача́льствующим пра́вду и суд, подчине́нным же безро́потное повинове́ние, госпо́дствующим кро́тость и человеколю́бие, рабо́м же нестропти́вость, роди́телем благопопече́ние о ча́дех, ча́дом же страх и послуша́ние, де́вствующим чистоту́ и целому́дрие, бра́чным же ве́рность и непоро́чность ло́жа; всем же гре́шным покая́ние, ка́ющимся проще́ние, в злоключе́ниих же терпе́ние и упова́ние, в наде́жде же спасе́ние да́руй. Изба́ви же всех нас от гла́да, губи́тельства, от тру́са и пото́па, от огня́ и меча́, от нахожде́ния иноплеме́нных и междоусо́бныя бра́ни, и от нападе́ния вра́жия, и от тлетво́рных ветр, и от смертоно́сныя я́звы, и от напра́сныя сме́рти, и от вся́каго зла, да, та́ко вси тобо́ю просвеща́еми, наставля́еми, утеша́еми, утвержда́емы и сохраня́емы, сла́вим просла́вившаго тя Бо́га, Отца́, и Сы́на, и Свята́го Ду́ха, и твое́ предста́тельство, всегда́, ны́не, и при́сно, и во ве́ки веко́в. Ами́нь.
