Служба преподобнаго Пахомия Нерехтскаго, игумена Сыпанова монастыря во И́мя Живоначальныя Троицы, Костромского чудотворца

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 4.

Подо́бен: Зва́нный свы́ше:

Егда́ восле́д Бо́га возгоре́ся ду́хом, преподо́бне,/ тогда́ воспали́ Боже́ственный о́гнь ду́шу твою́ взыска́ти Го́спода,/ па́че же,– реку́,– Госпо́дь тебе́ взыска́,/ и́же от ю́ности оста́вя мирско́е пребыва́ние,/ и восприя́ а́нгельский о́браз, и рабо́тая Го́сподеви/ во мно́зех труде́х, и по́двизех, и коленопреклоне́ниих, и в поще́ниих,/ Христа́ Бо́га моли́, блаже́нне Пахо́мие,/ спасти́ и просвети́ти ду́ши на́ша.

В ми́ре житие́ возненави́де,/ и тогда́ ми́ра красоты́ отве́ржеся, пребога́те,/ и восприя́ и́ноческий чин,/ и в живоно́сную ме́ртвость оде́яся,/ и, сокро́вище доброде́телей стяжа́в, пло́ть порабо́ти ду́ху,/ и бы́сть жи́тель пусты́нный,/ возрасти́л еси́ ве́лия кро́тости и смире́ния плоды́,/ Христа́ Бо́га моли́, преподо́бне Пахо́мие,/ спасти́ и просвети́ти ду́ши на́ша.

Жела́я улучи́ти Небе́сную добро́ту,/ земна́я вся оста́вил еси́,/ в вы́шних ум свой восприя́ благода́тию Боже́ственнаго Ду́ха,/ па́стырь и́стинен показа́ся,/ ве́тви смире́ния возрасти́л еси́/ и освяще́н дом Пресвята́го Ду́ха соде́я,/ ско́рбным путе́м и те́сным ше́ствоваше,/ сего́ ра́ди уго́дник Бо́жий све́тел ми́ру показа́ся./ Тем ны́не, пречи́стому Све́ту причаща́яся,/ не забу́ди ста́до твое́, преподо́бне,/ Христа́ Бо́га моли́, о́тче Пахо́мие,/ спасти́ и просвети́ти ду́ши на́ша.

Сла́ва, глас 6:

Богови́димаго в по́двизех восхва́лим пустыннолюби́теля,/ смире́ния рачи́теля и кро́тости учи́теля,/ церко́внаго строи́теля,/ и́же любве́ ра́ди Бо́жия мир оста́вльшаго/ и трудолю́бие поне́сшаго,/ благоче́стия подража́теля,/ Пахо́мия пе́ньми и пе́сньми почти́м,/ честну́ю и многоцеле́бную его́ ра́ку зря́ще,/ се бо вопию́т чудеса́ его́,/ мы же, обстоя́ще, любе́зно облобыза́ем, глаго́люще:/ ра́дуйся, пресла́вне о́тче Пахо́мие,/ с ра́достию от Ду́ха Свя́та Ца́рство Небе́сное пожа́л еси́/ и на подо́бствие, я́коже мо́щно, возше́л еси́./ И ны́не на Небесе́х чи́сте зри́ши Святу́ю Тро́ицу,/ испроси́ стране́ на́шей одоле́ние на сопоста́ты,/ и це́рквам благоле́пие,/ и душа́м на́шим ве́лию ми́лость.

И ны́не, Богоро́дичен: Кто Тебе́ не ублажи́т, Пресвята́я Де́во:

Вход, проки́мен дне, чте́ния 3 преподо́бническая.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На стихо́вне стихи́ры, глас 2.

Подо́бен: До́ме Евфра́фов:

К моще́м твои́м прибега́ем,/ свя́те Пахо́мие,/ исцели́ на́ша стра́сти,/ я́коже исцели́л еси́ разли́чныя мно́гая боле́зни.

Стих: Честна́ пред Го́сподем/ смерть преподо́бных Его́.

Что ти принесе́м, блаже́нне,/ за твоя́ е́же к нам щедро́ты?/ Но мо́лим тя, свя́те, всегда́ за ны моли́ся Христу́,/ тебе́ бо и́мамы хода́тая ко Христу́,/ испроси́ да́ти нам оставле́ние грехо́в.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Зерца́ло, и звезда́ Бо́жия,/ и моли́твенник ко Христу́/ за ны, гре́шныя,/ целу́ем мо́щи твоя́ честны́я,/ раби́ многогре́шнии.

Сла́ва, глас 8:

И́нок мно́жества,/ наста́вника тя чтим, о́тче наш Пахо́мие,/ тобо́ю бо пу́ть вои́стинну пра́вый ходи́ти позна́хом,/ блаже́н еси́, я́ко Христу́ рабо́тав,/ и вра́жию обличи́л еси́ си́лу,/ А́нгелом собесе́дниче, преподо́бным единокро́вне и пра́ведным,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 4:

Жите́йских молв, преподо́бне, отве́ргся/ и, я́ко птищ обре́те себе́ в пусты́ни безмо́лвие,/ в моли́твах и бде́нии прилежа́ Бо́гови,/ преподо́бне о́тче Пахо́мие,/ и оста́ви дре́внее пребыва́ние,/ и оты́де в пусты́ню, и в ней водвори́ся,/ и соста́ви оби́тель во И́мя Пресвяты́я Тро́ицы,/ и процве́л еси́, а́ки фи́никс,/ и бы́сть о́браз утеше́ния духо́внаго./ Те́мже, преподо́бне Пахо́мие,/ моли́ Пресвяту́ю Тро́ицу спасти́ся душа́м на́шим.

НА У́ТРЕНИ

По 1-м стихосло́вии седа́лен, глас 4:

Светоли́тием сия́я, я́ко заря́,/ просия́л еси́ в пусты́ни чудесы́ свои́ми, Пахо́мие,/ с ве́рою приходя́щим к тебе́.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих, моли́тву прие́мши от нас,/ не преста́й моля́щи Человеколю́бца спасти́ся рабо́м Твои́м.

По 2-м стихосло́вии седа́лен, глас 1:

Повеле́нием Бо́жиим дои́де в пусты́ню/ и оби́тель соста́ви на ме́сте, нарица́емом Сыпа́нове, во И́мя Пресвяты́я Тро́ицы,/ Е́йже предстои́ши, преподо́бне Пахо́мие,/ моли́ о спасе́нии душ на́ших.

Сла́ва, и ны́не, Богоро́дичен:

Упова́ние христиа́ном, Пречи́стая Де́во,/ Его́же родила́ еси́ па́че ума́, Сло́ва,/ непреста́нно моли́ с Вы́шними си́лами/ да́ти оставле́ние грехо́в всем и исправле́ние жития́,/ ве́рою и любо́вию при́сно Тя сла́вящим.

По полиеле́и седа́лен, глас 1:

Бо́гови примеси́ся, преподо́бне о́тче наш Пахо́мие,/ Госпо́дне дарова́ние улучи́л еси́,/ благода́тию Его́ мно́жество ополче́ния бесо́в отгна́л еси́,/ те́мже пресла́вно подвиза́ся непреста́нною свое́ю моли́твою ко Христу́ Бо́гу,/ и о нас, ча́дех свои́х, моли́, грехо́в оставле́ние дарова́ти нам.

Сла́ва, и ны́не, Богоро́дичен:

Светоно́сен Тя све́щник позна́хом, Деви́це,/ Боже́ственное сия́ние во утро́бе носи́вший,/ те́мже мо́лим Тя, Чи́стая,/ све́том Свои́м озари́ ду́ши пою́щих Тя.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Пахо́мие,/ во всю зе́млю изы́де веща́ние исправле́ний твои́х,/ тем на Небесе́х обре́те мзду трудо́в свои́х,/ бесо́вская разори́л еси́ по́лчища/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Го́споду,/ мир испроси́ душа́м на́шим.

Кано́н Богоро́дице со ирмосо́м на 6 и преподо́бному Пахо́мию на 8, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь/ пои́м, вопия́ше.

Наста́ви мя, Го́споди Бо́же мой,/ да возмогу́ благоче́стно уго́дника Твоего́, преподо́бнаго Пахо́мия,/ сла́вное и честно́е восхвали́ти торжество́.

Отве́рзи ми, Го́споди, ум мой и да́руй ми смысл,/ е́же хвале́ние принести́ Твоему́ уго́днику, преподо́бному Пахо́мию.

Живоно́сным ору́жием кре́стным прии́м на враги́ ополче́ние,/ озари́ ум мой, молю́ся,/ оби́льно всю зе́млю напая́я сло́вом уче́ния,/ а́ки прему́др чинонача́льник наш.

Богоро́дичен: Пресу́щное Сло́во существо́ прии́м,/ от чи́стых крове́й Твои́х богосоде́ла,/ нас нетле́ния изба́ви, Чи́стая,/ сего́ ра́ди Тя при́сно сла́вим.

Песнь 3

Ирмо́с: Не́сть свят,/ я́коже Ты, Го́споди, Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Боле́зньми свои́ми бразду́ душе́вную, му́дре Пахо́мие, до́бре соде́ла/ и клас безстра́стия чу́ден израсти́л еси́.

Кро́тостию смиря́шеся, молча́нием украша́шеся,/ ум всегда́ в вы́шних име́я,/ во пло́ти а́нгельски, о́тче, пожи́л еси́.

А́ще и в ми́ре су́щая, о́тче Пахо́мие, преоби́дел еси́,/ но та́мо преми́рная и нетле́нная стяжа́л еси́,/ иде́же глас пра́зднующих и ра́йское наслажде́ние.

Богоро́дичен: Спа́са Ро́ждшая, спаси́ мя,/ и́же в бу́ре всех сласте́й обурева́ема,/ Христа́, тишину́, моли́ о пою́щих Тя.

Седа́лен, глас 4:

Всено́щное стоя́ние и ва́ра дневна́го тяготу́ понесе́ и мно́гии труды́ показа́/ и сего́ ра́ди уго́дник бы́сть, блаже́нне Пахо́мие,/ моли́ спасти́ся душа́м на́шим.

Сла́ва, и ны́не, Богоро́дичен:

Чи́стая, Всенепоро́чная и Неискусобра́чная же,/ Еди́на Безле́тнаго Сы́на и Сло́ва Бо́жия в ле́та поро́ждши,/ Сего́ со святы́ми и честны́ми патриа́рхи, с ученики́, и проро́ки, и преподо́бными моли́/ дарова́ти нам очище́ние и ве́лию ми́лость.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Егда́ прии́де в пусты́ню и еди́н с Бо́гом безмо́лвствуя,/ дре́вие, возра́стшее от земли́, собесе́дники себе́ име́яше,/ до́ндеже снидо́шася к тебе́ бра́тия.

Христа́ Животво́рца оде́яся ме́ртвостию и стопа́м Его́ после́дуя,/ те́мже Ему́ предстоя́ и моли́твою благода́ть восприя́.

Зарю́ невече́рнюю вну́трь в се́рдцы прии́м,/ и от нея́ просия́л еси́, и всестра́стную мглу потреби́л еси́.

Богоро́дичен: Чистоте́ жили́ще, селе́ние Влады́ки всех/ и проро́ком всем сбытие́,/ Благодарова́нная Чи́стая, пою́щия Тя уще́дри.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,/ от мра́ка грехо́внаго взыва́юща.

Егда́ в жи́зни сей бы́сть стро́ящий в пусты́ни оби́тель,/ Бог же ви́де твоя́ труды́ и дая́ше благода́ть,/ мно́зи лю́дие помога́ше ти.

Боже́ственным манове́нием, о́тче, плотско́е житие́ отри́нув,/ после́довал еси́ любо́вию зову́щему Христу́, преподо́бне Пахо́мие.

Преблаже́нне, Богоприя́тне о́тче наш Пахо́мие,/ непреста́нно ста́до твое́ вопие́т ти:/ моли́твами свои́ми ко Го́споду спаси́ нас, мо́лим тя.

Богоро́дичен: Ме́сто освяще́ния и мы́сленную трапе́зу, Чи́стая,/ Хлеб – Христа́ – Жи́знь всех прие́мшую, пое́м Тя.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостива.

Ка́плями по́тов твои́х, преподо́бне, враго́в ополче́ния попра́л/ и дости́гл еси́ А́нгельския невеще́ственныя ли́ки.

Храм быв Трисо́лнечнаго Божества́,/ стра́шныя куми́ры потреби́л еси́, преподо́бне Пахо́мие,/ от ни́хже и нас изба́ви.

Терпе́ние и моли́тву стяжа́в, держа́вна смире́ния испо́лнь/ и тве́рдо любле́ние ко Христу́, о́тче, стяжа́л еси́.

Богоро́дичен: Богоро́дице, Ро́ждшая незаходи́мое Со́лнце,/ всего́ мя просвети́, омраче́ннаго страстьми́.

Конда́к, глас 4:

В пусты́ни безмо́лвствуя,/ еди́нствующу тя, Богоно́се, взыску́ющу ти Го́спода,/ Бо́гу же тебе́ не оста́вльшу еди́ному бы́ти в пусты́ни,/ и Того́ повеле́нием снидо́шася к тебе́ не́колико бра́тии,/ с ни́миже ти моля́щуся Го́сподеви,/ Тро́ице прече́стен храм воздви́же,/ в не́мже предстоя́ще, преподо́бне Пахо́мие,/ моли́ся о спасе́нии душ на́ших.

И́кос:

Пусты́нный граждани́н, о́тче, показа́ся,/ оста́вил оте́чество свое́ град Влади́мир и честну́ю оби́тель царя́ Константи́на/ и хожда́ше по страна́м мно́гим и по честны́м оби́телем/ и, Бо́гом наставля́емь, дои́де в пусты́ню и в ней селе́ние сотвори́./ Мы же к тебе́ сицева́я рцем:/ ра́дуйся, преподо́бне о́тче Пахо́мие,/ и́же в пусты́ни Тро́ице прече́стен храм созда́вый/ и в нем Бо́жие славосло́вие устро́и и о́бщее житие́ соста́ви;/ ра́дуйся, поуча́я ве́рныя ко спасе́нию;/ ра́дуйся, стра́нным корми́телю, па́че всего́ прилежа́вый о церко́вном строе́нии;/ ра́дуйся, распространи́вый пусты́ню и многочелове́чну устро́и ю;/ ра́дуйся, устро́ивый общежи́тельный монасты́рь, нарица́емый на Сыпа́нове;/ ра́дуйся, я́ко Бог тебе́ показа́ наста́вника о́бласти гра́да Костромы́;/ ра́дуйся, я́ко вели́кий град Кострома́ тобо́ю хва́лится,/ име́я мо́щи твоя́ во о́бласти свое́й;/ ра́дуйся, я́ко нарица́емому ме́сту Не́рехте хвала́ и утвержде́ние;/ ра́дуйся, преподо́бне Пахо́мие, моли́ся о спасе́нии душ на́ших.

Песнь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Умертви́ пло́ти свое́й мудрова́ние, Богоно́се,/ и де́йством Свята́го Ду́ха, Пахо́мие, отце́м собесе́дник яви́ся/ и непреста́нно вопие́ши:/ благослове́н Бог оте́ц на́ших.

Яви́лся еси́ отгони́тель духово́м нечи́стым,/ Боже́ственнаго Ду́ха селе́ние чи́сто был еси́, взыва́ше:/ благослове́н Бог оте́ц на́ших.

Хва́лится, преподо́бне, град твой,/ я́ко во о́бласти его́ сокрове́нны бы́ста мо́щи твоя́/ и я́ко добра́ граждани́на от Бо́га прия́л е́сть.

Богоро́дичен: Спаси́ мя, Ма́ти Спа́сова, содержи́ма глубино́ю согреше́ний,/ да Твое́ заступле́ние велича́ем, Чи́стая,/ и Сы́на Твоего́, Христа́, Бо́га на́шего:/ благослове́н Бог оте́ц на́ших.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Ви́де у́бо преподо́бный оби́тель устро́ену,/ и яви́ся ле́пота церко́вная соста́влена,/ и па́ки от земли́ к Небе́сным взы́ти тща́ся и всех пе́ти науча́я:/ Го́спода по́йте и превозноси́те Его́ во ве́ки.

По успе́нии твое́м не́кий брат бори́м бы́сть по́мыслом душевре́дным,/ и́же пло́ть на дух вою́ет,/ ты же явле́нием свои́м сего́ исцели́, Христо́ви вопия́:/ Го́спода по́йте и превозноси́те Его́ во ве́ки.

Блаже́нне Богогла́се, прово́диши пою́щия тя ко Христу́/ очище́ны от тиме́ния стра́стнаго моли́твами твои́ми,/ вопию́щих, Пахо́мие, и глаго́лющих:/ благослове́н Бог оте́ц на́ших.

Богоро́дичен: Ты Ада́ма, Де́во, па́дшаго Дщи яви́ся,/ Бо́жия же Ма́ти, обнови́вшаго мое́ существо́,/ Его́же пое́м и превозно́сим во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Сла́ву Вседержи́теля жела́я ви́дети,/ обнови́л еси́ души́ кре́пость и сла́вою обогати́ся Небе́сною.

Честно́е украше́ние благода́ти, о́тче преподо́бне Пахо́мие,/ испроси́ свяще́нником на́шим,/ во́ином во бране́х кре́пость и здра́вие телесе́м,/ я́ко да непреста́нно тя велича́ем.

Пра́веден и непоро́чен, о́тче, был еси́,/ Бо́гови послужи́л еси́ в преподо́бии,/ те́мже почи́ла есть Тро́ица в се́рдце твое́м,/ Ея́же ны́не наслажда́ешися, досточу́дне.

Богоро́дичен: Тя дре́вле Авваку́м прови́де го́ру несеко́мую,/ из Нея́же Бог яви́ся,/ истле́вшия ны обнови́ла е́сть.

Свети́лен:

Устро́ивый оби́тель и созда́ хра́мы Бо́жия/ и собра́вый и́нок мно́жества,/ в моли́твах прилежа́ Го́сподеви/ и ны́не, со дерзнове́нием предстоя́ Христо́ви,/ моли́ся о ста́де свое́м, Пахо́мие, о́тче наш.

Богоро́дичен:

Еди́н Чи́стый, Еди́н Госпо́дь Тя Еди́ну избра́,/ Чисте́йшу всея́ тва́ри, Пренепоро́чная,/ от чи́стых крове́й Твои́х воплоти́ся.

На хвали́тех стихи́ры, глас 8. Самогла́сны:

Боже́ственною си́лою оде́явся,/ умертви́л еси́ себе́ ми́рови/ и, житие́ непоро́чно пожи́в, пресла́вне,/ единожи́тель святи́телю Алекси́ю,/ Боже́ственному митрополи́ту, был еси́.

По́двиг трудо́в твои́х/ чистоты́ сосу́д показа́ся,/ и Бо́жиим повеле́нием исцеле́ние челове́ком да́руеши,/ по́стником удобре́ние, и́нокующим похвала́,/ Пахо́мие, преподо́бне о́тче наш.

Сла́ва, глас 6:

Преподо́бне о́тче Пахо́мие,/ во всю зе́млю изы́де веща́ние исправле́ний твои́х,/ тем на Небесе́х обре́те мзду трудо́в свои́х,/ бесо́вская разори́л еси́ по́лчища/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Го́споду,/ мир испроси́ душа́м на́шим.

И ны́не: Богоро́дице, Ты еси́ лоза́ и́стинная:

Славосло́вие вели́кое и отпу́ст.

На Литурги́и слу́жба преподо́бническая