Служба преподобнаго отца нашего Вукола, епископа Смирнскаго

На Го́споди, воззва́х: стихи́ры пра́здника, глас 1.

Подо́бен: Небе́сных чино́в:

Творе́ц вся́ческих и Изба́витель наш/ Ма́терию Де́вою в це́рковь прино́сится,/ те́мже ста́рец, Сего́ прие́м,/ с ра́достию взыва́ше:/ ны́не отпуща́еши раба́ Твоего́, Бла́же, с ми́ром,/ я́коже изво́лил еси́.

Симео́н, на ру́ки от Де́вы прие́м/ пре́жде всех век рожде́ннаго,/ Спа́са ви́дех, вопия́ше:/ просвеще́ние Твоея́ сла́вы конце́м;/ ны́не отпуща́еши раба́ Твоего́, Бла́же, с ми́ром,/ я́ко ви́дех Тя днесь.

Напосле́док веко́в рожде́на на спасе́ние челове́ков,/ Симео́н, понесы́й на рука́х Спа́са,/ ра́дуяся, вопия́ше:/ ви́дех Свет язы́ков и Сла́ву Изра́иля,/ ны́не отпуща́еши, я́коже рекл еси́, я́ко Бог, от су́щих зде/ веле́нием Твои́м.

И́ны стихи́ры преподо́бнаго, глас 6.

Подо́бен: Тридне́вен:

Све́том Богоде́тельных доброде́телей/ блиста́яся, свяще́ннейше,/ свет положи́лся еси́ на све́щнице та́инственно Боже́ственныя Це́ркве,/ уясня́я сию́, о́тче, свяще́нными уче́нии твои́ми.

Дух тя Святы́й, Вуко́ле свяще́нне, освяти́в,/ тобо́ю святы́ню ве́рою приступа́ющим подае́т, Богоно́се,/ и просвеще́ние, и избавле́ние.

Кра́йнюю бла́гость пропове́дая Бо́га на́шего,/ озло́бленныя ублажа́еши лю́ди, мудре, благода́тно/ приводя́ Спа́су, я́ко свяще́нник свяще́ннейший.

Сла́ва, и ны́не, пра́здника, глас 5:

Испыта́йте писа́ния,/ я́коже рече́ во Ева́нгелиих Христо́с Бог наш,/ в них бо обрета́ем Того́ ражда́ема/ и пелена́ми повива́ема,/ в я́слех полага́ема и млеко́м пита́ема,/ обре́зание прие́млюща и Симео́ном носи́ма,/ не мне́нием, ни привиде́нием,/ но и́стиною ми́рови я́вльшася./ К Нему́же возопии́м:/ Преве́чный Бо́же, сла́ва Тебе́.

Аще есть пост, Сла́ва, и ны́не, Богоро́дичен; аще ли среда́ или́ пято́к, Крестобогоро́дичен (пи́саны сего́ ме́сяца в 11 день).

На стихо́вне стихи́ры, глас 2.

Подо́бен: До́ме Евфра́фов:

Нося́щи Чи́стая/ и Пречи́стая Де́ва/ Соде́теля и Влады́ку/ я́ко Младе́нца на рука́х,/ в це́рковь вхо́дит.

Стих: Ны́не отпуща́еши раба́ Твоего́, Владыко,/ по глаго́лу Твоему́, с ми́ром.

Приими́, о Симео́не,/ Го́спода сла́вы,/ я́коже извести́лся еси́/ от Ду́ха Свята́го:/ се бо прии́де.

Стих: Свет во открове́ние язы́ков,/ и сла́ву люде́й Твои́х Изра́иля.

Ны́не ви́деша,/ Благи́й Бо́же, о́чи мои́/ Твое́ обеща́ние:/ разреши́ мя ско́ро, раба́ Твоего́, Чело́веколюбче.

Сла́ва, и ны́не, глас 5.

Ге́рманово:

Ве́тхий де́ньми, младе́нствовав пло́тию,/ Ма́терию Де́вою в це́рковь прино́сится,/ Своего́ зако́на исполня́я обеща́ние,/ Его́же Симео́н прии́м, глаго́лаше:/ ны́не отпуща́еши с ми́ром, по глаго́лу Твоему́, раба́ Твоего́,/ ви́деша бо о́чи мои́ спасе́ние Твое́, Святый.

Тропа́рь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́,/ я́же веще́й и́стина,/ сего́ ра́ди стяжа́л еси́ смире́нием высо́кая,/ нището́ю бога́тая./ О́тче Вуко́ле,/ моли́ Христа́ Бо́га,/ спасти́ся душа́м на́шим.

Сла́ва, и ны́не, пра́здника, глас 1:

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,/ да́рующаго нам воскресе́ние.

НА У́ТРЕНИ

По 1-й стихоло́гии седа́лен, глас 1.

Подо́бен: Ка́мени запеча́тану:

В це́рковь прине́слся еси́ Жизнь вся́ческих,/ мене́ ра́ди младе́нствовав,/ под зако́ном был еси́,/ дре́вле начерта́в на скрижа́лех зако́н на горе́ Сина́йстей,/ да вся измени́ши от зако́нныя дре́вняя рабо́ты./ Сла́ва милосе́рдию Твоему́, Спа́се,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.

Сла́ва, и ны́не, то́йже.

По 2-й стихоло́гии седа́лен, глас 5.

Подо́бен: Собезнача́льное Сло́во:

В це́рковь прине́слся еси́ обы́чная исполня́я,/ Творе́ц, и Влады́ка, и зако́на Да́тель, Спа́се,/ и на рука́х Симео́на благоволе́нием Твои́м носи́тися пло́тию,/ И́же всем стра́шный и всю тварь содержа́й,/ восхоте́л еси́, Еди́не Ще́дре, Свет Твой всем откры́ти нам.

Сла́ва, и ны́не, то́йже.

Кано́н пра́здника со ирмосо́м на 8 и ин кано́н свята́го, его́же краегране́сие: Вуко́ла вели́каго воспою́ сла́ву. Ио́сиф. Глас 6.

Песнь 1

Ирмо́с: Я́ко по су́ху, пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.

Боже́ственными светлостьми́ и свяще́нными/ и светоно́сными сия́ньми просвеща́емь при́сно,/ мою́ озари́ ду́шу, све́тлый твой пра́здник, о́тче, чту́щаго.

Всесве́тлу тя звезду́ мы́сленное показа́в Со́лнце,/ светлостьми́ твои́х доброде́телей уясни́ зе́млю,/ святи́телю Христо́в, Вуко́ле всему́дре.

Житие́ при́сно освяще́нно, и чи́сто, и скве́рнам несме́сно показу́я,/ Христо́в свяще́н сосу́д, му́дре, позна́лся еси́ на земли́,/ Вуко́ле преславне.

Богоро́дичен: И́же Отцу́ Сый Единоро́ден/ па́че ума́ во чре́ве Твое́м вопло́щься Боголе́пно,/ челове́ки обожи́, Чи́стая, за мно́жество щедро́т Преблаги́й.

Ин. Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Сын дне и све́та быв, святи́телю,/ труды́ Боже́ственными, всели́лся еси́ я́ве во све́тлостех ны́не святы́х,/ благода́тию сия́я.

Пропове́дая Еди́но благоче́стно Тро́ицы Существо́,/ многобо́жную лесть искорени́л еси́ от земли́, я́ко святи́тель че́стен,/ я́ко Сло́ва и́стинный служи́тель.

Путь показа́л еси́ жи́зни всем прельще́нным от враго́в наве́та/ и приве́л еси́ ты́я, я́ко па́стырь слове́сен, спасе́ны,/ Сло́ву, Первопа́стырю.

Богоро́дичен: Приста́нище бу́ди ми и страж,/ лю́тыми треволне́нии страсте́й неосла́бно обурева́ему при́сно,/ в мо́ри, Чи́стая, жития́,/ Еди́на Присноде́во.

Седа́лен свята́го, глас 4.

Подо́бен: Вознесы́йся:

Свяще́нства све́том сия́я, просвети́л еси́ лю́ди, святи́телю,/ и и́дольскую тьму потреби́л еси́,/ заре́ю же исцеле́ний страсте́й мглу разори́в,/ преше́л еси́ к незаходи́мому сия́нию, о нас моля́, приле́жно тя чтущих,/ Вуко́ле блаженне.

Сла́ва, и ны́не, пра́здника, глас то́йже.

Подо́бен: Удиви́ся Ио́сиф:

Младе́нствуеши мене́ ра́ди, Ве́тхий де́ньми,/ чище́нием приобща́ешися, Чисте́йший Бо́же,/ да плоть уве́риши мне, ю́же от Де́вы./ И сим Симео́н поуча́яся, позна́ Тя, Бо́га, я́вльшагося пло́тию,/ и, я́ко Жизнь, лобза́ше и, ра́дуяся, ста́рчески взыва́ше:/ отпусти́ мене́, Тебе́ бо ви́дех, Живота́ всяческих.

Аще есть пост, Сла́ва, и ны́не, Богоро́дичен; аще среда́ или́ пято́к, Крестобогоро́дичен (пи́саны в 17-й день).

Ин. Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь,/ Боголе́пно пое́т, взыва́ющи,/ от смы́сла чи́ста о Го́споде пра́зднующи.

Предве́даяй Бог твое́й, Богоблаже́нне, души́ красоту́ и ума́ чистоту́,/ священнопропове́дника му́дра свяще́нно тя рукополага́ет.

От Ду́ха просвеща́емь, су́щия во тьме пре́лести просвеща́еши/ и Креще́нием сы́ны дне соверша́еши,/ святи́телю пресла́вне.

Обре́т тя, благода́тию сия́юща, сла́вный Богосло́в,/ ру́ку возлага́ет Боже́ственными вожде́ньми/ и свяще́нника соверша́ет свяще́нна,/ Вуко́ле всему́дре.

Богоро́дичен: Разу́мно в купине́ Тя Моисе́й узре́, священнообразу́ему,/ Огня́, хотя́щаго бы́ти во утро́бе,/ явля́ет та́инственно, Богоро́дице Присноде́во.

Ин. Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Святи́тельскую свяще́нную оде́жду носи́в свяще́нно,/ нечести́выя просвети́л еси́, честны́й святителю,/ Еди́ницу Несозда́нную в Трие́х Ли́цех, Вуко́ле, пропове́дая.

От уст во́лка мы́сленнаго исхи́тил еси́ лю́ди,/ уче́ньми Богогла́сных твои́х уст,/ и ерети́чествующая незатворе́нная уста́/ твои́ми Богосло́вии загради́л еси́, о́тче.

Ме́рзкий победи́ся твои́ми свяще́нными словесы́ Маркио́н/ и изри́неся вся́каго безме́стия изрыга́яй ти́ну злосмра́дну,/ Вуко́ле сла́вне.

Богоро́дичен: Зако́ны естества́ Иису́с, Пресу́щественный Бог, обновля́ет, Всенепоро́чная, из Твоея́ утро́бы ражда́яся,/ Еди́н, осуществова́вый вся во́лею.

Ин. Песнь 6

Ирмо́с: Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию Ти:/ возведи́ от тли живо́т мой,/ Многоми́лостиве.

Вознося́щее смире́ние, чистоту́ ума́, любо́вь нелицеме́рну,/ ве́ру и наде́жду име́я чи́сту, Вуко́л сла́вный/ Тро́ице яви́ся жили́ще.

Вельми́ украси́вша сми́рняном свяще́нное седа́лище, тя, прехва́льне,/ тайново́ждствует Дух, Су́щаго по тебе́ па́стыря Полика́рпа,/ руко́ю твое́ю, Вуко́ле, соверша́ема.

Разуме́в зва́ние твое́ ду́хом, прему́дре,/ су́щаго по тебе́ благода́тию слове́сным овца́м наста́вника приво́диши к престо́лу,/ доброде́телей сия́нием блиста́юща.

Богоро́дичен: Дверь благода́ти, отве́рзшая челове́ком дверь Небе́сную,/ покая́ния две́ри ми пресве́тло отве́рзи, Влады́чице,/ и от врат сме́ртных свободи́.

Конда́к и и́кос пра́здника.

Ин. Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Вразумля́я неразу́мныя, исправля́я же ле́стию попо́лзшияся,/ о́тче, спасл еси́ и Бо́гу приве́л еси́ чи́сты,/ Тому́ песнопою́щия благоче́стно:/ благослове́н еси́, Бо́же оте́ц на́ших.

Украси́шася, всеблаже́нне, лани́ты твоя́, воплоще́ние пропове́дающия,/ за неизрече́нное милосе́рдие Возсия́вшаго нам,/ к Нему́же вопия́л еси́ приле́жно:/ благослове́н еси́, Бо́же оте́ц на́ших.

Облада́в воздержа́нием телесе́, страстьми́, сла́вне,/ необлада́н льсти́ваго яви́лся еси́ прило́гами/ и ны́не воспева́еши неле́стно:/ благослове́н еси́, Бо́же оте́ц на́ших.

Богоро́дичен: Изба́вльшеся дре́вняго осужде́ния Рождество́м Твои́м, Всенепоро́чная,/ я́ко Вла́дычицу воспева́ем Тя,/ спа́сшиися, Де́во, Тебе́ ра́ди,/ вопию́ще и глаго́люще ве́рно:/ благослове́на, Я́же Бо́га пло́тию ро́ждшая.

Ин. Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Процве́л еси́, я́ко фи́никс, во дво́рех Бо́жиих,/ до́лжным пра́ведных сном усну́л еси́;/ прино́сит же наслажде́ние Боже́ственный твой гроб чу́до зря́щим,/ Вуко́ле Богопропове́дниче.

Бо́жие Бог Сло́во Ипоста́сное/ свяще́нна святи́теля тя поставля́ет, помазу́юща лю́ди свяще́нно,/ святи́телю наста́вниче сми́рняном,/ свети́льниче вселе́нныя.

Вопло́щшагося Сло́ва Богосло́вил еси́ и мно́ги от безслове́сия лю́ди спасл еси́,/ Боже́ствен быв учени́к возсия́вшаго в Богосло́вии,/ Вуко́ле Богоно́се.

Богоро́дичен: Свяще́нно науча́шеся Твои́м та́инством проро́ков, Богоро́дице,/ Боже́ственное сословие,/ издале́ча разуме́в и я́сно излага́я/ Богозна́мения Боже́ственнаго Рождества́ Твоего́.

Ин. Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Я́ко свет, я́ко заря́, я́ко вели́кое со́лнце,/ я́ко мо́лния, Христо́ву Це́рковь облиста́л еси́,/ и ве́рных мы́сли просвети́л еси́,/ и в невече́рних ме́стех всели́лся еси́,/ поя́ трисвяты́ми гла́сы Тро́ицу несозда́нную.

Пло́ти и ми́ра вне быв священноде́йственне, ко преми́рным, ра́дуяся, преше́л еси́ чино́м,/ обожа́емь положе́нием светле́йшим,/ те́мже па́мять твою́ ве́рою соверша́ем на земли́,/ Вуко́ле всему́дре.

Земля́ те́ло твое́ блаже́нное покрыва́ет,/ я́ве исцеле́ния точа́що и дарова́ния,/ Не́бо же дух со избра́нными но́сит и́же от ве́ка,/ Боже́ственными сия́ньми укра́шен вои́стинну, Вуко́ле сла́вне.

Богоро́дичен: Гла́сом А́нгеловым/ вели́каго сове́та А́нгела, Чи́стая, Христа́ Емману́ила породи́ла еси́,/ ко А́нгелом до́льныя совокупля́юща,/ Еди́на Благослове́нная, Еди́на Всепе́тая,/ Еди́на вино́вна на́шего, Де́во, обоже́ния.

Свети́лен пра́здника.

Сла́ва, и ны́не, то́йже.

На стихо́вне стихи́ры, глас 2.

Подо́бен: До́ме Евфра́фов;

Днесь Спаси́тель/ я́ко Младе́нец принесе́н бысть/ в це́рковь Госпо́дню,/ и рука́ми престаре́лыми/ ста́рец Того́ подъе́млет.

Стих: Ны́не отпуща́еши раба́ Твоего́, Владыко,/ по глаго́лу Твоему́, с ми́ром.

Младе́нец пло́тию,/ Ве́тхий де́ньми,/ ви́дим есть пресла́вно/ во дне́шний день/ и в це́рковь прино́сится.

Стих: Свет во открове́ние язы́ков/ и сла́ву люде́й Твои́х Изра́иля.

Приими́, о Симео́не,/ – Всечи́стая вопия́ше, -/ во объя́тия я́ко Младе́нца/ Го́спода Сла́вы/ и ми́ра спасе́ние.

Сла́ва, и ны́не, глас и подо́бен то́йже:

Ве́лие и стра́шное та́инство/ и стра́нное смотре́ния,/ И́же вся объемля/ и младе́нцы созида́яй,/ я́ко Младе́нец на рука́х но́сится.