Служба преподобнаго отца нашего Тимофея, иже в Символех и иже во святых отца нашего Евстафия, архиепископа Антиохийскаго

На Го́споди, воззва́х: стихи́ры, глас 8.

Подо́бен: О, пресла́внаго чудесе́!

О́тче Богому́дре Тимофе́е,/ воздержа́нием мно́гим/ и ча́стыми моли́твами/ страсте́й взыгра́ния/ до конца́ потреби́л еси́/ и, безстра́стия благода́ть прие́м,/ прия́телище яви́лся еси́ Боже́ственнаго Ду́ха./ Те́мже ду́хи отгоня́еши всегда́ лука́выя,/ живы́й и по сме́рти, Богоблаже́нне.

О́тче Богому́дре Тимофе́е,/ Авраа́му подо́бник нело́жен был еси́,/ исцеля́я всю́ду/ к тебе́ прибега́ющия./ И́овлеву стяжа́л еси́ в боле́знех кре́пость,/ Дави́дову кро́тость име́я,/ житие́ равноа́нгельно на земли́ пожи́л еси́,/ жела́ние получи́л еси́ коне́чное,/ о нас моля́ся.

О́тче Богому́дре Тимофе́е,/ целому́дрия о́браз,/ воздержа́ния подписа́тель,/ благоче́стия зрак/ и исто́чник умиле́ния,/ правосла́вия утвержде́ние непоколеби́мо,/ исцеле́ний струя́ присноте́чна,/ со́лнце незаходи́мо,/ ча́до Боже́ственныя благода́ти/ и мона́шествующих яви́лся еси́ удобре́ние, прече́стне.

И́ны стихи́ры святи́телю, глас то́йже.

Подо́бен: Что вы нарече́м:

Име́я житие́ Небе́сно,/ от Бо́га свяще́нствовати положе́н был еси́ вои́стинну/ и приноси́л еси́ Ему́ слу́жбы умо́м чи́стым./ Беды́ претерпе́л еси́, блаже́нне, и боле́зни,/ пропове́дания ра́ди Боже́ственнаго/ и тве́рдыя и́стины,/ ю́же твои́ми словесы́ утверди́л еси́,/ безу́мныя облича́я я́вственно.

Сло́вом свяще́нных твои́х тече́ний/ запали́л еси́ я́ве хвра́стие А́рия злочести́ваго хуле́ния,/ Отцу́ невмеща́юща Сы́ну/ естество́м именова́тися равноче́стну,/ всесвяще́нне Евста́фие,/ и сердца́ просвети́л еси́,/ и и́стиною удержа́л еси́/ ве́рою творя́щих па́мять твою́.

Помава́я жезло́м слове́с твои́х,/ всесвяще́нный па́стырю,/ ста́до Бо́жие слове́сное соблю́л еси́ тем/ от волк вся́ких невреди́мо./ Те́мже тя до́брый Па́стырь/ введе́ во огра́ду Небе́сную,/ иде́же оте́честии избра́ннии пра́ведных ду́си,/ Евста́фие Богоно́се преблаже́нне.

Сла́ва, и ны́не, Богоро́дичен, глас 8.

Подо́бен то́йже:

Кому́ уподо́билася еси́, окая́нная душе́,/ к покая́нию ника́коже возни́чущи/ и огня́ не ужаса́ющися,/ злых ожида́ющаго?/ Воста́ни, и Еди́ну к заступле́нию ско́рую призови́ и возопи́й:/ Де́во Ма́ти, моли́/ Твоего́ Сы́на и Бо́га на́шего/ изба́вити мя от се́ти льсти́ваго.

Крестобогоро́дичен.

Подо́бен то́йже:

А́гница А́гнца я́ко ви́де,/ на Дре́ве просте́рта во́лею Кре́стнем,/ вопия́ше ма́терски,/ боле́знующи с пла́чем:/ Сы́не Мой, что стра́нное сие́ виде́ние?/ Всем живо́т дая́й я́ко Госпо́дь,/ ка́ко умерщвля́ешися, Долготерпели́ве,/ земны́м подая́ воскресе́ние?/ Сла́влю Твое́ мно́гое, Бо́же Мой, снизхожде́ние.

Тропа́рь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кано́н преподо́бнаго, глас 8.

Песнь 1

Ирмо́с: Пои́м Го́сподеви, вси лю́дие,/ в мори́ Чермне́м фарао́на погрузи́вшему,/ побе́дную песнь пою́ще, я́ко просла́вися.

Тя, мы́сленную звезду́, на высоте́, о́тче, воздержа́ния просия́вшую све́тло/ и ве́рных сердца́ озаря́ющу,/ блаже́нне Тимофе́е, восхваля́ем при́сно.

Име́я к Бо́гу протяже́нно ума́ твоего́ о́ко,/ уны́ния сон от души́ оттря́сл еси́, о́тче,/ и храм был еси́ Боже́ственнаго Ду́ха, и ме́сто свяще́ния, Тимофе́е.

Лука́ваго ко́зни, смире́нием огражде́н, о́тче, преше́л еси́ невре́дно,/ и к Бо́гу возвы́сился еси́,/ и Того́ сла́вы вы́ну наслажда́ешися, блаже́нне Тимофе́е.

Богоро́дичен: Несказа́нно Бо́га, Творца́ вся́ческих, во чре́ве заче́ншую безсе́менно/ и пло́тию я́ко и́стинно ро́ждшую Богоро́дицу,/ Отрокови́цу, и де́вствующую,/ пе́сньми почита́ем.

Ин кано́н святи́теля, глас 7.

Песнь 1

Ирмо́с: Поспе́шествовавшему Бо́гу во Еги́пте Моисе́ови,/ извести́ Изра́иля,/ Тому́ Еди́ному пои́м, я́ко просла́вися.

И́же отце́в верх, я́ко Сло́ва благода́тию оде́янна,/ вели́каго Евста́фия пе́сньми восхваля́ем.

Побо́рник ве́ры я́влься,/ Христо́ву Це́рковь неплене́ну боре́нием е́реси сохрани́л еси́, преподо́бне.

Уста́ Словесе́ быв, отры́гнул еси́ уче́ния пучи́ну, преподо́бне,/ в не́йже потопи́л еси́ А́риево злоче́стие.

Богоро́дичен: Я́же сло́вом пло́тию па́че сло́ва ро́ждши Нача́льника Жи́зни,/ Того́ непреста́нно моли́ спасти́ся душа́м на́шим.

Песнь 3

Ирмо́с: Утвержде́ние мое́, Спа́се, еси́,/ прибе́жище мое́ и си́ла;/ поколеба́вшееся се́рдце мое́ утверди́ в стра́се Твое́м,/я́ко несть свят, я́коже Ты, Бог наш.

Ущедря́я всех ми́лованием, ины́й Авраа́м был еси́,/ прие́мля отвсю́ду приходя́щия, о Тимофе́е,/ и те́ми угожда́я всех Бо́гу.

Умертви́л еси́, о́тче, я́же на земли́ твоя́ у́ды, я́ко глаго́лет апо́стол,/ жи́зни Небе́сней прича́стник показа́лся еси́,/ в не́йже чту́щия тя при́сно помина́й.

Восто́ка твои́х дел, о́тче, со́лнце был еси́ незаходи́мо,/ луча́ми по́двиг концы́ озаря́я при́сно/ и де́монов разоря́я омраче́ние.

Богоро́дичен: Свята́я Де́во, Царя́ ца́рствующих Роди́тельнице,/ плени́цы прегреше́ний мои́х расто́ргни/ и наста́ви к покая́ния стезя́м моли́твами Твои́ми.

Ин

Ирмо́с: Утверди́ся се́рдце мое́ в Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Ты, ору́жие извле́к и́стинное, яви́лся еси́ благоче́стия первонача́льник,/ сопроти́вныя ве́ре пробо́д, Евста́фие.

Ты, любоболе́зненно возде́лав Це́рковь/ се́рпом уче́ний твои́х, блаже́нне, из ко́рене вся посе́кл еси́ тем пле́велы.

Старе́йшинствуя со сла́вою И́стинному,/ су́щаго вои́стинну нача́льника лжи А́рия, Богоблаже́нне,/ порази́л еси́ ка́мением слове́с твои́х.

Богоро́дичен: Роди́лся еси́ несказа́нно,/ яви́лся еси́, я́коже благоволи́л еси́, Спа́се наш,/ и мир обнови́л еси́, Го́споди.

Седа́лен, глас 8.

Подо́бен: Прему́дрости:

Научи́вся Сло́ву, нас ра́ди от Де́вы ро́ждшемуся без истле́ния,/ Сего́ Божество́ безбо́жным пропове́дал еси́/ и мно́ги приве́л еси́ Бо́гови ве́рою,/ свяще́нных чуде́с мно́гими явле́ньми./ Те́мже, Богоно́се, святу́ю твою́ па́мять творя́ще,/ благода́тию твое́ю ду́ши просвеща́ем/ и согла́сно вопие́м ти:/ Богоно́се Тимофе́е, моли́ Христа́ Бо́га/ грехо́в оставле́ние пода́ти чту́щим любо́вию святу́ю па́мять твою́.

Сла́ва, седа́лен, глас 3.

Подо́бен: Красоте́ де́вства:

Единосу́щнаго Отцу́ и Ду́ху Сло́ва пропове́дал еси́, о́тче Евста́фие,/ и безу́мнаго тве́рдо жи́лами уче́ний твои́х А́рия удави́л еси́,/ ху́лящаго на пра́вое уче́ние./ Те́мже спричте́ся лико́м, ра́дуяся, Боже́ственных пропове́дник оте́ц,/ с ни́миже нас помина́й.

И ны́не, Богоро́дичен:

Я́ко невозде́ланная, Де́во, лоза́, красне́йший грозд прозябла́ еси́,/ источа́ющ нам вино́ спасе́ния,/ всех веселя́щее ду́ши же и телеса́./ Те́мже, я́ко вину́ Тя до́брых блажа́ще при́сно,/ со А́нгелом вопие́м Ти:/ ра́дуйся, Благода́тная.

Крестобогоро́дичен:

Неискусобра́чная, Чи́стая и Ма́ти Твоя́, Христе́,/ ви́дящи Тя, ме́ртва ви́сяща на Кресте́,/ ма́терски пла́чущи, глаго́лаше:/ что Тебе́ воздаде́ евре́йский беззако́нный собо́р и неблагода́рный,/ и́же мно́гих и вели́ких Твои́х, Сы́не Мой, даро́в наслади́выйся?/ Пою́ Твое́ Боже́ственное снизхожде́ние.

Песнь 4

Ирмо́с: Из горы́ приосене́нныя, Сло́ве, проро́к,/ Еди́ныя Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяше си́лу Твою́.

Ты, моли́твами утвержда́яся при́сно,/ мы́сленных враго́в лу́ки и стре́лы, я́коже младе́нец стреля́ния, вмени́л еси́,/ о́тче пресла́вне Тимофе́е.

Е́же к нам Христо́ва смотре́ния/ любо́вию покланя́яся, Богому́дре, о́бразу,/ искуше́ние мук претерпе́л еси́, от сего́ отмета́ющихся,/ о, Тимофе́е.

Я́коже не́кий столп,/ непоколеби́м был еси́,/ при́сно к Бо́гу в славосло́вии ника́коже почива́я,/ в сих пребы́л еси́ красота́х прича́стник,/ о, Тимофе́е.

Богоро́дичен: Но́во на земли́ родила́ еси́ Отроча́,/ е́же от Отца́ пре́жде всех век рожде́ннаго нетле́нно, Ма́ти Чи́стая,/ христиа́н исправле́ние.

Ин

Ирмо́с: Небеса́ покры́ла есть/ доброде́тель Твоя́, Го́споди,/ и Твоего́ хвале́ния вся испо́лнил еси́./ Сла́ва си́ле Твое́й, Человеколю́бче.

Ве́ры собира́я победи́тельная,/ стрела́ми слове́сными нечести́ваго Богому́дренно низложи́л еси́, о́тче, А́рия.

Слове́с твои́х све́тлость, я́коже мо́лния, изше́дши,/ А́риево злосла́вие попаля́ет,/ Евста́фие прему́дре.

Огражде́ние положи́в словесы́ твои́ми,/ я́коже виногра́ду Госпо́дню,/ Це́ркви, преподо́бне.

Богоро́дичен: Родила́ еси́ пло́тию, Де́во Чи́стая, И́же пре́жде Тебе́ Безнача́льнаго Сло́ва/ и по Тебе́ па́че Сло́ва, из Тебе́ вочелове́чшася.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Умо́м очище́нным предстоя́ Тро́ице, блаже́нне,/ и отону́дными заря́ми осия́емь, о́тче,/ су́щия ны во тьме, бе́дствующия душе́вными страстьми́, просвеща́еши всегда́.

Плоть воздержа́нием, ду́шу безстра́стием украси́в, му́дре,/ Царя́ вся́ческих уго́дник яви́лся еси́/ и от Него́ я́ве чуде́с дары́ прия́л еси́, Тимофе́е.

Не умо́м льсти́вным, но просты́м се́рдцем проси́вши, приступи́вшая непло́ды/ ве́рною моли́твою благоча́дна явля́ется от непло́дства,/ пою́щи Христа́ Бо́га на́шего.

Богоро́дичен: Всели́вся во чре́во Твое́ живы́й в Вы́шних,/ Тя соде́ла Небе́с ши́ршую, Мари́е Богоро́дице:/ Его́же о всех нас, я́ко Блага́я, не преста́й моля́щи, Богоневе́сто.

Ин

Ирмо́с: У́тренюет дух мой к Тебе́, Бо́же,/ зане́ Свет еси́,/ и Твоя́ повеле́ния бы́ша исцеле́ния рабо́м Твои́м,/ Человеколю́бче.

Мрак разори́л еси́ ересе́й/ и возсия́л еси́ конце́м всем зари́ уче́ний твои́х,/ Евста́фие блаже́нне.

Ору́жии огражда́еми, Евста́фие, уче́ний твои́х,/ настоя́щия Боже́ственней ве́ре е́реси побежда́ем.

Богоро́дичен: Де́во, не преста́й моля́щи Бо́га, из Тебе́ ро́ждшагося пло́тию,/ изба́витися рабо́м Твои́м от вся́каго обстоя́ния.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

До́бре твое́ соблюда́я де́вства досто́инство во всей твое́й жи́зни,/ жене́ никогда́же в лице́ зрел еси́,/ е́же от сего́ вред до конца́ отрази́в.

В приста́нище мы́сленное устреми́лся еси́, волна́ми сласте́й не омочи́вся,/ всеблаже́нне Тимофе́е,/ но Ду́ха живоно́сными ве́тры до́бре преплы́л еси́, всесла́вне.

Удали́лся еси́ псало́мски, в гора́х живы́й,/ в пусты́нях при́сно, му́дре, водворя́яся,/ до́ндеже вшел еси́ в Бо́жий град Небе́сный,/ Тимофе́е блаже́нне.

Богоро́дичен: На плещу́ Херуви́мску неопи́санно седя́й/ опи́санно в Твое́ чре́во всели́ся пло́тию, а не Божество́м,/ и из Тебе́ про́йде, спаса́я мя, Всенепоро́чная.

Ин

Ирмо́с: Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:/ Всеси́льне Спа́се, поми́луй нас.

Слове́с твои́х Богодохнове́нных ве́тром/ ути́шил еси́ бу́рю ерети́чествующих,/ в приста́нище благоче́стия Це́рковь направля́я,/ пребла́женне.

В доброде́тели непоро́чен сый, преподо́бне,/ сла́вен яви́лся еси́ сло́вом и житие́м,/ Це́ркве Христо́вы удобре́ние.

Богоро́дичен: Его́же родила́ еси́, Богоро́дице, несказа́нно, Бо́га на́шего,/ моля́щи не преста́й, изба́витися от бед пою́щим Тя, Чи́стая Присноде́во.

Конда́к, глас 4.

Подо́бен: Яви́лся еси́ днесь:

Я́ко звезда́ многосве́тлая,/ от восто́ка возсия́в,/ озари́л еси́ в сердца́х ве́рных/ доброде́тели чуде́с твои́х,/ чудотво́рче всеблаже́нне Тимофе́е.

Песнь 7

Ирмо́с: А́нгелом о́троки из огня́ спаcы́й и гремя́щую пещь преложи́вый на ро́су,/ благослове́н еси́, Бо́же оте́ц на́ших.

Угаси́в страсте́й пла́мень слез росо́ю,/ благода́ть чуде́с источи́л еси́,/ и́миже очища́еши скве́рны страсте́й, Тимофе́е.

Блаже́нство Боже́ственное нело́жно получи́л еси́,/ кро́тких, преподо́бне, насле́довал еси́ зе́млю/ и ра́дости избра́нных насыща́яся.

Разреше́ние грехо́в творя́щим любо́вию свяще́нную па́мять твоего́ преставле́ния,/ я́ко дерзнове́ние обре́т, блаже́нне, испроси́.

Богоро́дичен: Изба́вленнии вси от пе́рвый кля́твы/ пресвяты́м Рождество́м Твои́м, благослове́нная Еди́на,/ Тя благослови́м, Богоро́дице Нескве́рная.

Ин

Ирмо́с: В пещи́ су́ще халде́йстей,/ Авраа́мстии о́троцы/ ликова́ху со А́нгелом, глаго́люще:/ оте́ц на́ших Бо́же, благослове́н еси́.

Ерети́чествующих брань ору́жием Ду́ха, му́дре, победи́в,/ по́чести нетле́нныя прия́л еси́, от Христа́ венча́емь.

Меч обоюдуо́стр уста́ твоя́ на нечести́вых, о́тче, показа́шася,/ под руко́ю Сло́ва покрыва́ема,/ я́ко сих брань посе́к.

Уче́ния лопа́тою разве́ял еси́ А́риеву лесть, я́ко пле́вы,/ во одушевле́нную, о́тче, жи́тницу собира́я пшени́цу ве́ры.

Богоро́дичен: Богоро́дицу вси почти́м, я́ко Спа́са родила́ есть,/ ве́рою взыва́юще:/ ра́дуйся, Рабо́ и Ма́ти Христа́ Бо́га на́шего.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Страстоуби́йца был еси́ воздержа́нием мно́гим и зе́льными боле́зньми бде́ния,/ восхожде́ньми при́сно доброде́телей, преподо́бне, поуча́яся в се́рдцы/ и от сла́вы преходя́ в сла́ву неконча́емыя жи́зни и нетле́ния.

Я́ко же́ртву, преподо́бне,/ моли́твы твоя́ к Бо́гу Пречи́стому ты прине́сл еси́, чи́сты от души́,/ Боже́ственно де́йство от Него́ прия́л еси́ чуде́с:/ де́моны отгоня́ти и челове́ческия цели́ти не́мощи.

Ненавистозло́бен и незло́бив,/ ми́лостив, и кро́ток,/ и пра́вдою укра́шен, о́тче, был еси́,/ преподо́бен, непоро́чен,/ оша́яся вся́кия непра́вды,/ столп мона́шествующих,/ те́мже тя почита́ем, ве́рнии, во ве́ки.

Богоро́дичен: Еди́ну Тя избра́, добро́ту Иа́ковлю, О́тчее Сло́во/ и во утро́бе Твое́й всели́ся, я́коже благоволи́,/ па́че всех красне́йший Челове́к, Всечи́стая, про́йде,/ омраче́нное на́ше очища́я естество́.

Ин

Ирмо́с: Еди́наго Безнача́льнаго Царя́ Сла́вы,/ Его́же благословя́т Небе́сныя си́лы/ и трепе́щут чи́ни А́нгельстии,/ по́йте, свяще́нницы,/ лю́дие, превозноси́те Его́ во ве́ки.

Жезло́м прему́дрости твоея́ писа́ний раздели́в Боже́ственную пучи́ну,/ Христо́в святи́телю,/ и преложи́л еси́ к земли́ правосла́вия но́ваго Изра́иля,/ ариани́ты же, я́ко еги́птяны, удави́л еси́.

Небе́снаго ты сшед виде́ния на столп хала́нский А́риев,/ размеси́л еси́ языки́ ерети́чествующих,/ Евста́фие му́дре,/ единогла́сную ве́ру пропове́дуя во ве́ки.

Испове́даньми твои́ми, я́же по и́стине,/ на за́паде жизнь сконча́л еси́;/ возсия́л еси́ па́ки на восто́це ста́ду твоему́, му́дре,/ зарю́ благоче́стия испуща́я во ве́ки.

Богоро́дичен: Созда́вшаго Ада́ма по о́бразу, и от смеше́ния его́ проше́дша,/ и спа́сша челове́ческий род,/ по́йте, свяще́ннии,/ лю́дие, превозноси́те Его́ во ве́ки.

Песнь 9

Ирмо́с: Благослове́н Госпо́дь Бог Изра́илев,/ воздви́гнувый рог спасе́ния нам,/ в дому́ Дави́дове о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Свяще́ния храм, умиле́ния исто́чник,/ сострада́ния струя́ яви́лся еси́, му́дре,/ любве́ же безме́рная пучи́на,/ Госпо́день уго́дник нело́жен, и Небе́сный граждани́н,/ и А́нгелов единокро́вник, и чуде́с точе́ние.

Хвали́тися ми́лости, о́тче, суда́ све́дый, не презре́л еси́ стра́нна,/ но всем благ, милосе́рдия отве́рзл еси́, преподо́бне,/ оте́ц быв си́рых и вдови́ц засту́пник,/ и наги́х одея́ние, и пи́ща а́лчущих.

От земли́ отлучи́лся еси́ к Небеси́,/ иде́же име́л еси́, еще́ ходя́ во пло́ти, до́бре житие́, преподо́бне,/ нам очище́ние согреше́ний моля́ дарова́ти,/ ве́рно чту́щим твою́ святу́ю па́мять.

Струю́ нам всегда́ честна́я твоя́ ра́ка исцеле́ний источа́ет, о́тче,/ страсте́й излия́ния вся́ческих изсуша́ющи/ и вся́ку напоя́ющи ду́шу к благопло́дию Боже́ственному,/ свяще́нне Тимофе́е, Христо́в уго́дниче.

Богоро́дичен: Глаго́лом Твои́м после́дующе,/ ро́ди родо́в, Блаже́нная, Тя блажи́м при́сно:/ Бо́га бо, и́стинно Блаже́ннаго, родила́ еси́, Пресвята́я Чи́стая,/ вся блаже́нны Тому́ рабо́тающия нело́жно творя́ща.

Ин

Ирмо́с: Па́че естества́ Ма́терь/ и по естеству́ Де́ву,/ Еди́ну в жена́х Благослове́нную,/ пе́сньми, ве́рнии, Богоро́дицу велича́ем.

И́же в писа́ниих, грозд, учи́тельно изгне́т,/ напои́л еси́ ве́рных вина́, о́тче; и́стины Христо́вы,/ сердца́ веселя́ща.

Ору́жие обо́юду остро́, нося́, Богосло́вный Твой язы́к,/ посе́кл еси́ лука́вый А́рия гнев,/ непови́нную и душе́вную кровь, блаже́нне, излива́ющ.

Наро́читый святы́й день всесвяты́я твоея́ па́мяти творя́ще духо́вно,/ тя мо́лим:/ моли́ приле́жно, святи́телю, спасти́ся нам.

Богоро́дичен: Ю́же во чре́ве заче́ншую неопи́санное Сло́во/ и дверь Боже́ственныя жи́зни нам я́вльшую,/ Пречи́стую вои́стинну Богоро́дицу велича́ем.