Служба преподобнаго отца нашего Савватия, начальника пустыни Соловецкаго монастыря

НА ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры на 8, глас 8.

Подо́бен: Му́ченицы Твои́:

Преподо́бне о́тче Савва́тие,/ любве́ ра́ди Христо́вы/ вся, я́же на земли́, преоби́дел еси́/ и, в пусты́ню всели́вся,/ по́стническими труды́ уясни́л еси́ житие́ твое́./ Тем Христо́с чуде́с дарми́ обогати́ тя:/ помина́й нас, чту́щих тя.

Преподо́бен и че́стен/ свети́льник боже́ственный и светоно́сный/ под спу́дом жите́йския толстоты́ никогда́же скрыва́ется,/ но на версе́ полага́ет его́/ высо́ких чуде́с Человеколю́бец./ Того́ моли́твами, Христе́,/ да́руй лю́дем Твои́м ве́лию ми́лость.

Преподо́бне о́тче Савва́тие,/ ты, от ю́ности Христу́ порабо́тився,/ крест всечестны́й на ра́мена твоя́ возложи́л еси́/ и не возврати́лся еси́ вспять,/ но был еси́ упра́влен во Ца́рствие Бо́га,/ Вопло́щшагося во спасе́ние душ на́ших.

В лодии́ теле́сней пла́вая,/ преподо́бне Савва́тие,/ кро́ткими дыха́нии Кро́ткаго Ду́ха/ легко́ преше́л еси́ жите́йскую пучи́ну, му́дре,/ и, на Би́сере многоце́ннем/ твоя́ име́ния прода́в/ и обре́т Его́, в себе́ удержа́л еси́,/ блаже́н быв боже́ственными Его́ сия́нии.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду́ трудо́в твои́х,/ де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ безпоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, Богоро́дичен, глас то́йже: Кто Тебе́ не ублажи́т:

Вход. Проки́мен дне. Чте́ния три.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На стихо́вне стихи́ры, глас 5.

Подо́бен: Ра́дуйся:

Ра́дуйся, свяще́нная главо́,/ преподо́бне о́тче наш Савва́тие,/ а́нгельским лико́м собесе́дниче,/ на земли́ доброде́тельно пожи́л еси́,/ и, прече́стно и нескве́рнено зерца́ло,/ Ду́хом Святы́м озаря́ешися, пребога́те,/ и, озаря́емь, прови́дел еси́ бу́дущая./ Те́мже Христа́ моли́/ пода́ти душа́м на́шим ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, свяще́нная главо́,/ преподо́бне о́тче Савва́тие,/ по́стников непоколеби́мый сто́лпе,/ и страсте́й посека́я коре́ния,/ и де́монов погубля́я стремле́ния,/ кре́стным всеору́жием вся козноде́йствия отгоня́я,/ и, по преставле́нии твое́м жив, Святе́й Тро́ице предстои́ши,/ за ны моля́ся,/ дарова́ти душа́м на́шим ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, свяще́нная главо́,/ преблаже́нне о́тче Савва́тие,/ моли́твою враги́ устраша́я,/ неи́стовыя на святы́ню суду́ Бо́жию предае́ши,/ и приходя́щим с ве́рою/ стра́сти и неду́ги отгоняеши,/ и слуки́я25 исправля́еши,/ и де́моны от челове́к прогоня́еши,/ моли́твою же и свяще́нныя воды́ окропле́нием/ мно́гим исцеле́ния подава́я,/ Христа́ моля́/ дарова́ти душа́м на́шим ве́лию ми́лость.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию я́ко мо́щно возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х, зерца́лом разре́шшимся,/ о́тче наш Савва́тие,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, Богоро́дичен, глас то́йже: Творе́ц и Изба́витель:

Тропа́рь, глас 3:

Удали́вся ми́ра и водвори́вся в пусты́ни,/ до́брым по́двигом подвиза́лся еси́,/ злострада́нием, и внима́нием, и моли́твами,/ отону́дуже и по сме́рти источа́еши исцеле́ния,/ Савва́тие, о́тче наш,/ моли́ Христа́ Бо́га/ спасти́ся душа́м на́шим.

НА У́ТРЕНИ

По 1-м стихосло́вии седа́лен, глас 1:

Подо́бен: Лик а́нгельский:

Житие́ на земли́ благоче́стно сконча́в, чи́сто селе́ние Свята́го Ду́ха яви́лся еси́,/ просвеща́я ве́рою приходя́щия к честно́му гро́бу твоему́, блаже́нне./ Те́мже моли́ Влады́ку Христа́ Бо́га просвети́ти ду́ши на́ша,/ пра́зднующих всечестну́ю па́мять твою́, Савва́тие богому́дре, о́тче наш.

Сла́ва, и ны́не, Богоро́дичен:

Всех Творца́ и Влады́ку, Бо́га же и Соде́теля, Всенепоро́чная Чи́стая,/ Ду́хом Боже́ственным в ложесна́х Твои́х заче́нши, нетле́нно родила́ еси́,/ Его́же сла́вяще, Тя велича́ем, Де́во,/ я́ко пала́ту всех Царя́ и ми́ра защище́ние.

По 2-м стихосло́вии седа́лен, глас 5:

Подо́бен: Собезнача́льное Сло́во:

По́стника Госпо́дня пе́сньми почти́м, умертви́вшаго вся прило́ги страсте́й/ воздержа́нием тве́рдым и кре́пким терпе́нием вои́стину,/ и посрами́вша зело́ проти́внаго всю горды́ню,/ и ны́не моля́щася Го́споду поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз Рождества́/ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл;/ сла́ва Твоя́, Богоро́дице, всем простре́ся,/ во спасе́ние душа́м на́шим.

По полиеле́и седа́лен, глас 8:

Егда́ к Боже́ственному жела́нию ум твой впери́в,/ тогда́ оста́вил еси́ до́лу влеку́щее мудрова́ние/ и в пусты́ню всели́лся еси́, в морски́й о́стров,/ иде́же процве́л еси́, я́ко крин, доброде́тельми прекра́сный, страсте́й искорени́в те́рние,/ и в нем всади́л еси́ плоды́ трудо́в твои́х,/ те́мже и пожа́л еси́ снопы́, неотъе́млемое бога́тство на Небесе́х, Савва́тие преподо́бне,/ моли́ Христа́ Бо́га согреше́ний оставле́ние пода́ти/ честву́ющим любо́вию святу́ю па́мять твою́.

Сла́ва, и ны́не, Богоро́дичен:

Вопло́щшееся Сло́во из утро́бы Твоея́ ро́ждши, Пресвята́я,/ мене́ же, растле́ннаго грехи́ от прило́г лука́ваго, укрепи́, Ма́ти Бо́жия,/ и се́рдце мое́ очи́сти, Богоблагода́тная, Ма́терними Твои́ми моли́твами,/ да и аз благода́рно зову́ Ти:/ Мари́е Богоро́дице, моли́ Сы́на Твоего́ и Бо́га на́шего/ поми́ловати ста́до Твое́, е́же стяжа́ла еси́, Всенепоро́чная.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

И́же на земли́ А́нгела/ и на Небеси́ челове́ка Бо́жия,/ ми́ра благово́ние,/ пи́щу благи́х доброде́телей,/ по́стников похвалу́,/ Савва́тия почти́м:/ насажде́н бо в дому́ Госпо́дни,/ и процвете́ пра́ведно,/ я́ко кедр в пусты́ни,/ умно́жив ста́до Христо́во слове́сных ове́ц/ в преподо́бстве и пра́вде.

Кано́н Богоро́дицы на 6 и преподо́бнаго на 8.

Кано́н преподо́бнаго, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Просвеще́нием Трисо́лнечнаго Божества́ озари́вся, преподо́бне,/ свети́льник сия́я яви́лся еси́,/ просвеща́я ве́рно светоно́сную твою́ па́мять чту́щия.

Со́весть име́л еси́ бла́гу/ и о́ко серде́чное взира́ющее к Бо́гу,/ те́мже и Христо́с внят моли́тве твое́й, му́дре,/ и с преподо́бными сочта́ тя.

Весь Тро́ицы был еси́ жили́ще/ и та́мо душе́вное возложи́л еси́ жела́ние, преподо́бне,/ сего́ ра́ди ве́чную па́мять восприя́л еси́/ и жизнь неконча́емую.

Богоро́дичен: Пло́тию ро́ждши Безпло́тнаго, Богоро́дице Чи́стая,/ стра́сти лю́тыя утоли́ ума́ моего́, Де́во,/ и испра́ви мя, Ма́ти Бо́жия, заблу́ждшаго,/ я́ко да сла́влю Тя.

Катава́сия: Отве́рзу уста́ моя́:

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден па́че Тебе́, Го́споди.

Напо́лнив се́рдце твое́ сле́зными пото́ки, преподо́бне Савва́тие,/ плоды́ вся́ких доброде́телей износя́щее,/ чуде́с показа́нием, преблаже́нне.

Высото́ю смире́ния украша́емый, преподо́бне,/ низве́ргл еси́ на зе́млю велехва́льнаго, Савва́тие, о́тче преблаже́нне,/ изря́дными де́лы твои́ми, посто́м и моли́твами.

Исцеле́ния безчи́сленная источа́ет гроб твой, преблаже́нне о́тче,/ и отго́нит боле́зни челове́ческия, и душе́вныя врачу́ет стра́сти/ похваля́ющих труды́ твоя́, всече́стне.

Богоро́дичен: Из ложе́сн Твои́х возсия́ пресла́вно/ Вели́кое Со́лнце, Христо́с Бог, Богоро́дице Де́во,/ вся земны́я концы́ просвети́в,/ и преподо́бных ли́к че́стно прия́т.

Седа́лен, глас 4:

Жите́йское мо́ре воздержа́нием без труда́ преплы́в,/ ко приста́нищу ти́хому безстра́стия, ра́дуяся, приста́л еси́,/ преподо́бне о́тче наш Савва́тие, богому́дре и преблаже́нне.

Сла́ва, и ны́не, Богоро́дичен:

Де́вство и рождество́, вы́ше естества́, в Тебе́, Богоро́дице, совокупи́ся,/ я́ко всех Соде́теля и Бо́га воплоти́вшагося породила́ еси́,/ Спа́са душ на́ших.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти:/ сла́ва си́ле Твое́й, Го́споди.

Зе́млю до́льнюю премину́в, Небе́сную стяжа́л еси́ жизнь,/ и со безпло́тными ли́ки смеси́лся еси́, преподо́бне Савва́тие,/ соде́лав ду́шу твою́ храм Ду́ха Свята́го,/ и кро́тких зе́млю насле́довал еси́.

Я́ко Христо́во, смире́ние возлюби́в, преподо́бне Савва́тие,/ стяжа́л еси́ безстра́стие,/ смири́в же всю де́монскую горды́ню, блаже́нне,/ низложи́в, низве́ргл еси́.

Возсия́в, я́ко со́лнце от восто́ка, чуде́с луча́ми/ и а́нгельскому житию́ поревнова́в,/ непреста́нными моли́твами, преподо́бне,/ просвети́л еси́ всю подсо́лнечную.

Богоро́дичен: Блажи́т Тя, Пресвята́я Богоро́дице,/ всяк во́зраст и вся́ка душа́ ве́рных,/ Бо́жие бо Сло́во па́че ума́ и сло́ва родила́ еси́, Препе́тая.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́ ино́го бо́га не зна́ем.

Возсия́ тебе́ Госпо́дь от Де́вы,/ Его́же возжеле́л еси́, преподо́бне Савва́тие,/ жили́ще име́ющу в морсте́м о́строве любве́ ра́ди Его́,/ и ны́не Того́ сла́вы наслажда́ешися непреста́нно.

Еди́ной Христо́ве любви́, преподо́бне Савва́тие, приложи́вся/ и все́ю душе́ю потща́вся испо́лнитель Бо́жиих за́поведей бы́ти,/ и мно́гих чуде́с, преподо́бне, прия́л еси благода́ть.

Незло́бив и кро́ток быв, вся зло́бы вра́жия погуби́л еси́,/ и, ми́лостив до конца́ я́влься,/ ми́лость душе́вную стяжа́л еси́ от Еди́наго Бо́га,/ и благода́ть и ми́лость прия́л еси́ и́стинную.

Богоро́дичен: Воспо́йте Го́сподеви, вся земля́,/ по́йте вси яви́вшемуся из чре́ва Де́вы неизрече́нно/ и Сию́ ве́рным показа́вшему тве́рдую наде́жду и похвалу́.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Си́лою Христо́вою укрепля́емь, преподо́бне Савва́тие,/ вся кова́рства лука́ваго низве́ргл еси́/ и ны́не безстра́стия умо́м очище́нным предстои́ши Бо́гу Вседержи́телю,/ на Него́же все жела́ние возложи́л еси́.

Твоя́, всеблаже́нне Савва́тие, преподо́бныя мо́щи, во гро́бе лежа́ще,/ неду́ги врачу́ют, де́монския же полки́ отгоня́ют всегда́/ от души́ приходя́щих с ве́рою.

Боже́ственных повеле́ний, о́тче, нра́вы стяжа́в,/ кро́тость, и безмо́лвие, и смире́ние,/ сего́ ра́ди от Благоде́теля Бо́га бога́тно дарова́ние прия́л еси́,/ исцеле́ния да́р тре́бующим да́руеши.

Богоро́дичен: Душе́вныя моя́ стра́сти, Пречи́стая, исцели́,/ Я́же Безстра́стия бы́вши исто́чник,/ просвети́вшая преподо́бных ли́ки Рождество́м Твои́м.

Конда́к, глас 2:

Жите́йския молвы́ отбе́г,/ всели́лся еси́ в морски́й о́стров, му́дре,/ и, крест твой взем, Христу́ после́довал еси́,/ в моли́твах, и во бде́ниих, и в поще́ниих,/ злострада́ньми плоть твою́ изнуря́я:/ тем был еси́ преподо́бных удобре́ние./ Сего́ ра́ди любо́вию па́мять твою́ пра́зднуем,/ преподо́бне Савва́тие,/ моли́ Христа́ Бо́га непреста́нно о всех нас.

И́кос:

Ка́ко возмогу́ твоя́ премно́гая чудеса́, о́тче, изрещи́/ или́ труды́ твоя́ и злострада́ния, и́миже потруди́лся еси́, преподо́бне Савва́тие,/ а́ще не ты, свя́те, пода́си ми сло́во, недосто́йному рабу́ твоему́?/ Ты бо еси́ мона́хов похвала́ и утвержде́ние,/ с ни́миже Христа́ Бо́га моли́ непреста́нно о всех нас.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Всех теку́щих, привре́менных страсте́й, преподо́бне Савва́тие,/ сподо́бился еси́ убежа́ти, всю наде́жду стяжа́в к Бо́гу,/ Его́же ра́ди де́йствуеши, блаже́нне, пресла́вная чудеса́, поя́:/ отце́в на́ших Бо́же, благослове́н еси́.

Ору́жием моли́тв твои́х лука́выя победи́в полки́,/ с Небесе́ благода́ть прия́л еси́ цели́ти неду́ги/ и прогоня́ти де́моны от взыва́ющих ве́рою:/ благослове́н Бог отце́в на́ших.

Плоть твою́ повину́в ду́ху, о́тче преподо́бне Савва́тие,/ в воздержа́нии вся́цем пожи́л еси́, в труде́х и бде́ниих, прехва́льне,/ име́я чи́сту со́весть, житие́ Небе́сное, воспева́я:/ благослове́н Бог отце́в на́ших.

Богоро́дичен: Ору́жие, Чи́стая Де́во, храня́щее пре́жде врата́ Еде́мская,/ плещи́ всем дае́т26,/ низложи́вшим по́стнически бори́теля врага́ и при́сно взыва́ющим:/ отце́в на́ших Бо́же, благослове́н еси́.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Мы́слию очище́нною, преподо́бне Савва́тие, к Бо́гу приближа́яся/ и всем всяк быв, да Христа́ приобря́щеши,/ моли́ спасти́ вся пою́щия тя,/ преподо́бне о́тче.

Слез твои́х ка́пли погаси́ша огнь грехо́вный,/ реку́ же чуде́с показа́л еси́ всем нам,/ вся́кия стра́сти потопля́ющу притека́ющих к тебе́,/ о́тче прехва́льне.

Ве́ру и наде́жду неразори́му и любо́вь и́стинную име́л еси́, о́тче,/ и боже́ственное прираде́ние,/ терпе́ние бла́го и поуче́ние духо́вных слове́с,/ смиренному́дрие и соверше́нное беззло́бие.

Богоро́дичен: Спаси́ мя, Ма́ти Бо́жия, нача́ло спасе́ния ми́ра я́вльшися,/ избавля́ющи мя молвы́27, и нечи́стых страсте́й, и вся́кия проти́вныя ско́рби,/ да Тя сла́влю во вся ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Процве́л еси́ в по́двизех по́стнических, прехва́льне о́тче наш Савва́тие,/ я́ко ши́пок благово́нен,/ и, я́коже крин,/ объюха́л28 еси́ со́вести ве́рных доброде́тельми и чудесы́./ Те́мже, преподо́бне, отжени́ от нас стра́сти смердя́щия.

Отве́рзеся тебе́, о́тче, Небе́сное Ца́рствие, сконча́вшему до́брое тече́ние,/ и ви́диши, я́же А́нгели ви́дят,/ и трудо́в воздая́ние тебе́ подае́т по́чести Христо́с,/ честву́я тя, Своего́ уго́дника./ Те́мже тя, преподо́бне, ублажа́ем.

Слез твои́х проли́тием огнь грехо́вный погаси́л еси́,/ Бо́гу угоди́в, Савва́тие преподо́бне,/ сокруши́л еси́ де́монов ко́зни./ Те́мже, предстоя́ще ра́це моще́й твои́х,/ ве́рно ублажа́ем тя, досточу́дне.

Богоро́дичен: Пощади́ мя, Го́споди, пощади́, егда́ хо́щеши ми суди́ти,/ и не осуди́ мене́ во огнь, ниже́ я́ростию Твое́ю обличи́ мене́:/ мо́лит Тя, Христе́, ро́ждшая Тя Де́ва,/ и а́нгельстии чи́ни, и преподо́бных собо́ри.

Свети́лен:

Святы́ни храм был еси́, блаже́нне, по боже́ственному прича́стию,/ ра́йский граждани́н, в не́мже напитава́ешися невозбра́нно дре́ва разу́мнаго и нетле́нныя сла́вы,/ па́мять творя́, Савва́тие, о́тче богому́дре, ве́рно хва́лящих тя.

Сла́ва, и ны́не, Богоро́дичен:

Ра́дуйся, ве́рных похвало́, ра́дуйся, преподо́бных утвержде́ние,/ ра́дуйся, правосла́вных сла́во, ра́дуйся, свет су́щих во тьме,/ ра́дуйся, хра́ме пресвяты́й, ра́дуйся, Бо́жий раю́,/ кля́твы разреше́ние, Благослове́нная Мари́е.

На хвали́тех стихи́ры на 4, глас 5.

Подо́бен: Преподо́бне о́тче:

Преподо́бне о́тче, богоно́се Савва́тие,/ вельми́ подвиза́лся еси́ во вре́менней жи́зни,/ пе́сньми, и посто́м, и моли́твами/ о́браз быв твои́м ученико́м./ И ны́не лику́еши с безпло́тными,/ Христа́ непреста́нно славосло́вя,/ от Бо́га Бо́га Сло́ва, Изба́вителя,/ прекло́ньшаго главу́ на Кресте́/ и изба́вльшаго род челове́ческий от пре́лести./ Того́ у́бо моли́, преподо́бне,/ дарова́ти нам мир и ве́лию ми́лость.

Преподо́бне о́тче, богоно́се Савва́тие,/ и́стинно сподо́бился еси́ блаже́нныя жи́зни,/ ю́же чистото́ю и поще́нием обре́л еси́,/ преста́вився бо отсю́ду, живе́ши и́стинную жизнь,/ со А́нгелы Христа́ непреста́нно славосло́вя,/ из Де́вы неизрече́нно Плоть прии́мшаго,/ испрове́ргшаго а́да/ и воскреси́вшаго ме́ртвыя от ве́ка./ Того́ моли́, Тому́ помоли́ся, преподо́бне,/ дарова́ти вселе́нней мир и ве́лию ми́лость.

Блаже́нна пречестна́я оби́тель твоя́,/ о́тче богому́дре,/ иму́щи в себе́ честны́я твоя́ мо́щи, блаже́нне,/ я́же с ве́рою приходя́щим подаю́т оби́льно исцеле́ния;/ блаже́ни ученицы́ твои́,/ и́же такова́го отца́ ча́да нареко́шася./ Преподо́бне Савва́тие,/ моли́твенниче те́плый,/ моли́ся ко Го́споду о душа́х на́ших.

Ны́не всесвяще́нное и непоро́чное те́ло твое́,/ преподо́бне о́тче наш Савва́тие,/ лежа́ще во оби́тели твое́й,/ в не́йже мно́го труди́лся еси́,/ исцеле́ния неоску́дно подае́т/ с ве́рою приходя́щим./ Те́мже мо́лим тя, о́тче блаже́нне:/ моли́твами твои́ми ко Го́споду/ душе́вное нам и теле́сное здра́вие пода́ти испроси́,/ тя ве́рою блажа́щим.

Сла́ва, глас 6:

Прииди́те, вси мона́шествующии,/ прииди́те, празднолю́бцы и по́стников сосло́вие,/ ве́рою соше́дшеся, и́стиннаго по́стника днесь почти́м, вопию́ще:/ ра́дуйся, ше́ствовавый по стопа́м Влады́ки Христа́/ у́зкий путь и безпристра́стное житие́./ Я́коже дре́вле Авраа́м пра́ведный и отцы́ преподо́бнии,/ страннолю́бие притяжа́л еси́,/ та́коже пресели́вся от оте́чества твоего́/ и всели́вся во о́строве морсте́м,/ и в нем тече́ние по́двиг твои́х сконча́л еси́,/ и ны́не источа́ют исцеле́ния честны́я твоя́ мо́щи,/ всем притека́ющим с ве́рою и вопию́щим:/ о всеблаже́нне и преподо́бне,/ по́стников похвало́ и собесе́дниче безпло́тных,/ мона́хов наста́вниче,/ о нас Христу́ Бо́гу моли́ся,/ да всегда́ па́мять твою́ любо́вию пра́зднуем.

И ны́не, Богоро́дичен, глас то́йже: Никто́же, притека́яй к Тебе́:

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Ева́нгелие от Луки́, зача́ло 24. Прича́стен: В па́мять ве́чную:

И́на слу́жба преподо́бнаго отца́ на́шего Савва́тия, Солове́цкаго нача́льника и чудотво́рца

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чино́в:

На Не́бо теку́щую возше́д/ четверосну́зную29 доброде́телей колесни́цу,/ о́тче Савва́тие,/ преми́рных дости́гл еси́/ и, та́мо водворя́яся,/ наслажда́ешися неизрече́нных благ.

До́льних, я́ко непостоя́тельных,/ преоби́дел еси́ разу́мне,/ вы́шняя пребыва́тельная/ возлюби́л еси́, блаже́нне,/ та́мо простира́яся/ доброде́телей восхожде́ньми.

Лу́чших быв рачи́тель,/ и ко стяжа́нию сих устреми́ся,/ го́ршая досто́йно отри́ну,/ пра́востию смы́сла/ до́бре разсужда́я,/ Савва́тие о́тче.

Сла́ва, глас 2:

Прииди́те, по́стническое сосло́вие, днесь:/ ублажи́м и́же вои́стину блаже́ннаго,/ по́стником бо удобре́ние яви́ся,/доброде́тельми украша́яся изря́дно./ Те́мже, любо́вию соше́дшеся,/ духо́вне торжеству́ем, к нему́же возопии́м:/ о преблаже́нне Савва́тие, о́тче наш,/ я́ко име́я дерзнове́ние ко Христу́ Бо́гу,/ мир и оставле́ние испроси́/ и́же любо́вию чту́щим всечестну́ю па́мять твою́.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

На стихо́вне стихи́ры, глас 2.

Подо́бен: До́ме Евфра́фов:

Дом доброде́телей/ ты показа́ся/ и прия́телище дарова́нием,/ преподо́бне/ о́тче Савва́тие.

Стих: Честна́ пред Го́сподем/ смерть преподо́бных Его́.

Страсте́м истерза́тель,/ пло́ти томи́тель,/ язы́ку воздержа́тель,/ сласте́м умертви́тель был еси́,/ преподо́бне Савва́тие.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Чи́стыми твои́ми моли́твами/ Бо́гови прибли́жився,/ благода́ть и́маши/ нечи́стыя отгоня́ти ду́хи от челове́к,/ преподо́бне Савва́тие.

Сла́ва, и ны́не, Богоро́дичен, глас и подо́бен то́йже:

Обра́дованная, ра́дуйся,/ Я́же Ра́дость ми́ру ро́ждшая,/ Христа́ Жизнода́вца,/ и прама́тернюю, Де́во,/ печа́ль отъе́мшая.

Тропа́рь, глас 4, пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры на 8, глас 2.

Подо́бен: Егде́ от Дре́ва:

Егда́ уязви́лся еси́ боже́ственным жела́нием,/ тогда́ вся, я́же в ми́ре кра́сная, ни во что́же вмени́в,/ восле́д Спаси́теля изы́де,/ бога́тство мимотеку́щее презре́ до́блественне,/ сла́ву же и могу́тство,/ я́ко ничто́же су́щее, оплева́./ Моли́, мо́лим тя,/ спасти́ и просвети́ти ду́ши на́ша.

Егда́ ты вни́де в кино́вию,/ тогда́ своея́ во́ли, Савва́тие,/ до конца́ совлече́ся,/ настоя́щему повину́яся неразсу́дне/ и всем покаря́яся рабо́тая,/ доса́ды и безче́стия прие́мля ра́дуяся./ Те́мже и Госпо́дь, зря твое́, о́тче,/ предложе́ние бла́го,/ прославля́ет тя.

Егда́ обе́ты и́ночества Го́сподеви возда́л еси́,/ тогда́ у́мное о́ко/ бо́дро зре́ти поста́вил еси́,/ мы́сленныя враги́ слеза́ми потопля́я/ и непоро́чно ходи́ти в путе́х зако́на Госпо́дня/ ду́шу наставля́я, Савва́тие./ Дерзнове́ние име́я к Бо́гу,/ моли́, мо́лим тя,/ спасти́ и просвети́ти ду́ши на́ша.

Сла́ва, глас 8:

Что ти принесе́м, преподо́бне,/ я́ко неоску́дно излива́еши тре́бующим благода́ти?/ И́бо те́ло твое́, о́тче, чистоты́ жили́ще показа́ся,/ те́мже и посеще́нием Свята́го Ду́ха озари́вся,/ нетле́нно в на́ше благослове́ние соблюда́ется,/ благода́тных луч сия́ния испо́лнено,/ и́хже бе́сове не терпя́ще зре́ти, дале́че отбега́ют,/ да́нный ти благода́ти трепе́щуще./ Ихже от душ на́ших и теле́с отжени́, мо́лим тя,/ ненаве́тны нас при́сно соблюда́й тех ла́яния/ твои́ми моли́твами.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чтения три преподо́бническая.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ра хра́ма и преподобнаго.

Глас 1. Самогла́сен:

Преподо́бне о́тче Савва́тие,/ соше́дшеся любо́вию в па́мять твою́,/ ко всечестны́м и чудотво́рным твои́м моще́м,/ све́тло торжеству́юще, в гла́сех пе́сненных пою́ще,/ дави́дски глаго́лем:/ блаже́н муж, боя́йся Го́спода,/ непоро́чно бо в путе́х Госпо́дних ходи́л еси́,/ те́мже со преподо́бными водворя́яся,/ с ни́миже моли́ся Го́сподеви,/ поми́ловатися душа́м на́шим.

Глас 2:

Предстоя́ще знаменоно́сным моще́м/ преподо́бнаго отца́ на́шего,/ о празднолю́бцы, / возопии́м похва́льными гла́сы, глаго́люще:/ ка́ко тя ублажи́м, Савва́тие,/ на земли́ пожи́вша па́че челове́ка/ и в вы́шних блажи́маго со все́ми уго́ждшими Го́сподеви?/ С ни́миже предстоя́ во Све́те Боже́ственнем,/ моли́, мо́лим тя, изба́витися нам от собла́зн льсти́ваго/ и спасти́ся душа́м на́шим.

Глас 3:

Ка́я пе́ния ти принесе́м, преподо́бне,/ тебе́ в Небе́сных пребыва́ющу?/ Но е́же в па́мять твою́ сте́кшеся,/ пе́ние пе́сней сплета́ем, похваля́юще Го́спода,/ прие́мша твоя́ труды́ и по́двиги/ и бога́тно возда́вша:/ телеси́ у́бо источа́ти здра́вие боля́щим,/ ду́шу же на преми́рная прия́т, боже́ственными заря́ми облиста́я ту./ Те́мже моли́, о́тче,/ я́ко имы́й дерзнове́ние ко Го́споду,/ мир ми́рови дарова́ти,/ и Це́рквам единомы́слие,/ и душа́м на́шим ве́лию и бога́тую ми́лость.

Глас 4:

Днесь соше́дшеся, бра́тие,/ духо́вне почти́м честна́го отца́ на́шего,/ и́же посто́м те́ло свое́ изнури́вша,/ воздержа́нием же стра́сти охуди́вша,/ и бде́нием ум очи́стивша,/ моли́твою же ду́шу просве́щша,/ нището́ю бога́тство прие́мша благода́ти/ и послуша́нием Бо́га благопослу́шна стяжа́вша,/ чистото́ю жили́ще Пресвята́го Ду́ха бы́вша./ Его́же ра́ди враго́в шата́ния Христо́с низложи́в,/ да́рует нам мир и ве́лию ми́лость.

Глас 6:

Преподо́бне о́тче Савва́тие,/ измла́да доброде́тели приле́жне обучи́вся,/ орга́н бысть Свята́го Ду́ха/ и, от Него́ прии́м чуде́с де́тель,/ научи́л еси́ челове́ки преоби́дети сла́дкая./ И́стины боже́ственным све́том чи́сте сия́я,/ просвети́ на́ша ра́зумы/ ко спасе́нию душ на́ших.

Прииди́те, празднолю́бцы/ и по́стническое сосло́вие,/ ве́рою соше́дшеся,/ и́стиннаго по́стника почти́м днесь, Савва́тия,/ с весе́лием ше́ствовавшаго по стопа́м Влады́ки своего́/ у́зкий путь и безстра́стную жизнь,/ и ве́рою возопие́м:/ о всеблаже́нне,/ преподо́бным сожи́телю и по́стником похвало́,/ о нас моли́ся ко Го́споду/ поми́ловатися душа́м на́шим.

Преподо́бне и богоно́се Савва́тие,/ любве́ ра́ди Христо́вы вся оста́вил еси́,/ и в пусты́ню доше́д,/ ника́коже боя́ся неви́димых враг кова́рствия:/ а́ще бо и мно́гажды приидо́ша на тя,/ скрежета́нием зу́бным я́рость показу́юще,/ ты же моли́твами свои́ми,/ я́ко дым, без ве́сти сих сотвори́/ от непоро́чныя ти души́ и кре́пкаго терпе́ния твоего́./ Христа́ моли́ спасти́ся душа́м на́шим.

Прииди́те, и́ночествующих мно́жество, днесь,/ Савва́тия, благоче́стия подража́теля,/ пе́сньми и пе́ньми восхва́лим/ и честну́ю его́ ико́ну, обстоя́ще,/ любе́зно облобыза́ем, глаго́люще:/ ра́дуйся, пресла́вне Савва́тие,/ и́ноком наста́вниче и по́стником пресла́вный свети́льниче;/ ра́дуйся, я́ко чи́сте Чисте́йшему Све́ту совоку́плься;/ ра́дуйся, я́ко Тро́ице предстоя́ со А́нгелы,/ Ю́же непреста́нно моли́/ дарова́ти душа́м на́шим ве́лию ми́лость.

Сла́ва, глас 6:

Преподо́бне о́тче Савва́тие,/ боже́ственною любо́вию ты ми́ра отчужди́ся,/ и за И́же нас ра́ди с Небе́с Стра́нствовавша стра́нен был еси́,/ и в на́ше спасе́ние Страда́вшаго ра́ди труды́ поне́сл еси́,/ по́двигом и посто́м путь смире́ния обре́те,/ и́мже и прибли́жился еси́/ И́же нас ра́ди смири́вшуся Сло́ву Бо́жию да́же до Креста́ и сме́рти./ Сего́ ра́ди па́мять твою́ све́тло пра́зднующе,/ про́сим твои́ми моли́твами от Христа́ Бо́га прия́ти/ стране́ на́шей побе́дное на враги́ одоле́ние,/ и ми́ру умире́ние,/ и Це́рквам единомы́слие,/ и душа́м на́шим ве́лию ми́лость.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.

На стихо́вне стихи́ры, глас 8.

Подо́бен: О, пресла́внаго чудесе́:

Прииди́те и приими́те, бра́тие,/ лию́щияся благода́ти/ от моще́й преподо́бнаго отца́ на́шего Савва́тия,/ той бо подвиза́ся без ле́ности/ во вре́менней жи́зни/ и я́ко безпло́тен во пло́ти поживе́./ Те́мже прия́т да́ры от Христа́ Бо́га/ и нам про́сит очище́ния/ и ве́лия ми́лости.

Стих: Честна́ пред Го́сподем/ смерть преподо́бных Его́.

Приноси́те ве́ру вси хотя́щии исцеле́ния/ и прие́млите незави́стно,/ почерпи́те вино́, ду́ши веселя́щее,/ ника́коже сумня́щеся,/ всем бо окри́н30 благода́ти предстои́т:/ испо́лнь честне́йшая ча́ша/ преблаже́ннаго отца́ на́шего Савва́тия,/ излива́ет приходя́щим с ве́рою/ душа́м и телесе́м здра́вие.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Исто́чник приснотеку́щий врачевства́ безме́зднаго/ мо́щи знаменоно́снаго отца́ на́шего Савва́тия,/ и всяк приходя́й прие́млет,/ подава́ет бо приходя́щим с ве́рою./ О вели́кия благода́ти!/ О си́лы живоно́снаго мертвеца́!/ Его́же моли́твами, Иису́се Царю́,/ спаси́ ду́ши на́ша,/ я́ко Еди́н Милосе́рд.

Сла́ва, глас 1:

Досто́йно по́чести прия́л еси́, Савва́тие,/ от ве́дящаго та́йная Го́спода:/ а́ще и в пуста́я места́ отше́л еси́,/ но и по сме́рти твоя́ чудеса́ во вселе́нней показа́ша тя,/ Бо́гу прославля́ющу тя/ и твоя́ по́двиги всем показу́ющу./ Ему́же ны́не предстоя́,/ о нас, предстоя́щих ти, моли́ся приле́жно,/ получи́ти нам предстоя́ния Боже́ственнаго,/ и неизрече́нныя сла́вы о́ноя насыща́тися,/ и блаже́нства восприя́ти/ твои́ми к Бо́гу моли́твами.

И ны́не, Богоро́дичен, глас то́йже: Се, испо́лнися Иса́иино прорече́ние:

Тропа́рь, глас 3:

Удали́вся ми́ра и водвори́вся в пусты́ни,/ до́брым по́двигом подвиза́лся еси́,/ злострада́нием, и внима́нием, и моли́твами,/ отону́дуже и по сме́рти источа́еши исцеле́ния,/ Савва́тие, о́тче наш,/ моли́ Христа́ Бо́га/ спасти́ся душа́м на́шим.

Ин тропа́рь, глас 4:

От ю́ности твоея́, преподо́бне,/ весь себе́ Го́сподеви предложи́в/ и земна́я вся оста́вль,/ Христо́вым стопа́м те́пле после́довал еси́/ и безпло́тным сожи́тель яви́лся еси́/ и всем преподо́бным соо́бщник, преблаже́нне Савва́тие./ Тем мо́лим ти ся, о́тче:/ моли́ся о нас непреста́нно Христу́ Бо́гу,/ я́ко да ми́лостив бу́дет нам в День Су́дный.

НА У́ТРЕНИ

По 1-м стихосло́вии седа́лен, глас 4:

Пусты́ни морска́го ото́ка31 все́льник, безмо́лвное житие́ проходя́,/ жела́я прилепи́тися по Бо́зе, немяте́жну мысль соблюда́я,/ Бо́га получи́л еси́, Его́же моли́, Савва́тие,/ спасти́ся пою́щим тя.

Сла́ва, и ны́не, Богоро́дичен:

И́же на Престо́ле Херуви́мсте седя́й и в не́дрех О́тчих водворя́яйся,/ я́ко на Престо́ле святе́м Свое́м седи́т, Влады́чице, в не́дрех Твои́х, во пло́ти Плотоно́сец,/ Бог бо вои́стину воцари́ся над все́ми язы́ки, и разу́мно ны́не пое́м Ему́,/ Его́же моли́ спасти́ся рабо́м Твои́м.

По 2-м стихосло́вии седа́лен, глас 5:

Молвы́ жите́йския отлучи́вся, и́ноческое пребыва́ние возлюби́в,/ воздержа́нием ду́шу удобри́л еси́, чудесе́м де́йство прие́м от Бо́га,/ Его́же моли́, Савва́тие, о нас, восхваля́ющих тя.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз Рождества́/ в Тебе́ позна́ся, Чи́стая Присноде́во,/ ужаса́ет ми ум и удивля́ет по́мысл,/ сла́ва Твоя́, Богоро́дице, всем простре́ся, во спасе́ние душа́м на́шим.

По полиеле́и седа́лен, глас 8:

По́стника Госпо́дня пе́сньми почти́м,/ я́ко воздержа́нием, и тве́рдым поще́нием, и терпе́нием посра́мльша вои́стину сопроти́внаго./ Те́мже и́нокующим яви́ся похвала́, и согла́сно вопие́м ему́:/ преподо́бне о́тче Савва́тие, моли́ Христа́ Бо́га/ грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

От крове́й Твои́х, Чи́стая, Воплоще́ннаго Бо́га Ро́ждшая,/ изменя́ема мя при́сно грехо́м и прило́ги лука́ваго, Богоблагода́тная,/ утверди́ се́рдце мое́, Блага́я, Ма́терними Ти моли́твами,/ да и аз благода́рственно зову́ Ти: Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 5:

Преподо́бне и богоно́сне о́тче наш Савва́тие,/ глас Ева́нгелия услы́шав,/ после́довал еси́ Христу́ поще́нием и бде́нием,/ и всено́щным стоя́нием, и моли́твами,/ стра́нством и терпе́нием,/ те́мже прия́т дар источа́ти исцеле́ния./ И нам благода́ть возда́ждь твои́х моли́тв,/ да всегда́ любо́вию па́мять твою́ чтим и ублажа́ем.

Кано́н Богоро́дицы на 6 и преподо́бнаго на 8.

Кано́н преподо́бнаго, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Препе́тая Соесте́ственная Тро́ице, Преблаги́й Бо́же,/ И́же па́че ума́ да́ры рабо́м Свои́м дая́,/ и моему́ мра́чному уму́ све́тлую посли́ благода́ть, всех страсте́й очища́ющую,/ песнь ны́не начина́ющу ми.

Твоя́ похвалы́ нача́ти хотя́щу ми, Савва́тие,/ моли́твами твои́ми посли́ благода́ть,/ стра́сти души́ и телесе́ очища́ющу ми и ум просвеща́ющу,/ да воспою́ твоя́ по́двиги, преподо́бне.

Жела́ние боже́ственно в се́рдцы прие́м,/ усе́рдно мирска́го многово́лненнаго смуще́ния отбе́г,/ к ти́хому приста́нищу безмо́лвия прии́де./ Те́мже и Христо́с изволе́ние твое́ прия́т, о́тче.

Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на/ и пло́тию родила́ еси́, Пречи́стая,/ И́же из Отца́ без ма́тере и нас ра́ди из Тебе́ без отца́.

Катава́сия: Отве́рзу уста́ моя́:

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Возвесели́л еси́, о́тче,/ над все́ми Су́щаго Бо́га терпе́нием свои́м,/ те́мже тя досто́йно просла́ви.

Показа́ тя Христо́с, Савва́тие, звезду́ пресве́тлу,/ кры́ющася, я́ко во о́блаце, в пусты́ни,/ чудесы́ озаря́юща нас.

Доброде́телей труды́ и по́ты, Савва́тие,/ поко́й со все́ми святы́ми прия́л еси́,/ и́хже и возвесели́л еси́ свои́м житие́м.

Богоро́дичен: Ты еди́на су́щим на земли́/ и́же па́че естества́ благи́х Хода́таица, Ма́ти Бо́жия, яви́ся,/ те́мже Ти, ра́дуйся, вопие́м.

Седа́лен, глас 8:

По́стничеством вооружи́вся, блаже́нне, стра́сти победи́в и плоть покори́в ду́хови,/ бесово́м прогони́тель показа́ся, и неду́ги целя́./ Те́мже, любо́вию па́мять твоего́ успе́ния почита́юще,/ про́сим восприя́ти исправле́ние житию́ и ми́ру умире́ние, вопию́ще ти:/ преподо́бне Савва́тие, о́тче наш, моли́ Христа́ Бо́га/ грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́сто Творцу́,/ я́ко Неискусому́жная Ма́ти Изба́вителя,/ я́ко прия́телище су́щи Уте́шителя, Всепе́тая,/ беззако́ния мя су́ща скве́рно жили́ще и де́монов игра́лище в ра́зуме бы́вша,/ потщи́ся и сих злоде́йствия мя изба́вити, све́тло жили́ще доброде́тельми соде́лавши,/ Светопода́тельная и Нетле́нная, разжени́ о́блак страсте́й/ и вы́шняго прича́стия сподо́би и Све́та Невече́рняго/ моли́твами Твои́ми.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Вме́сто от ме́ста преходя́,/ бе́гая сла́вы челове́ческия,/ Небе́сныя сла́вы рачи́тель был еси́, о́тче преподо́бне.

Терпели́вно труд проходи́л еси́ в кино́вии,/ томя́ плоть и порабоща́я разу́мне,/ до́брыми утвержда́яся.

Боле́знь боле́зньми отража́ти разсуди́в,/ во́лею в рабо́ту вдава́яся Христа́ ра́ди,/ страсте́й рабо́ты избежа́л еси́.

Богоро́дичен: Неискусобра́чно родила́ еси́, о Де́во,/ и по Рождестве́ па́ки яви́лася еси́ де́вствующи,/ те́мже немо́лчными гла́сы, е́же ра́дуйся,/ Тебе́, Влады́чице, ве́рою несумне́нною вопие́м.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Разгна́в страсте́й мрак, о́тче,/ к све́ту доброде́телей доше́д и све́тел быв,/ мра́чныя ду́хи лука́вствия отгоня́еши от челове́к, Савва́тие.

Тьму бесо́в потребля́я, Савва́тие, чи́стыми ти моли́твами,/ тьму грехо́в мои́х потреби́, о́тче,/ чистоту́ доброде́телей наставля́я мя твори́ти.

Страстьми́ очерне́на мя, о́тче, прило́ги чужда́го всего́ бы́вша,/ предста́тель те́плый бу́ди ми,/ вся́каго зла избавля́я и исцеля́я стру́пы язв мои́х.

Богоро́дичен: Тя ору́жие непобеди́мое на враги́ предлага́ем,/ Тя утвержде́ние и наде́жду на́шему спасе́нию, Богоневе́сто, и́мамы.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Преше́д мо́ре, в пусте́м ото́це вселя́ешися, страсте́й мо́ре изсуша́я/ и то немо́кренно проходя́, крестови́дным поще́нием разделя́я,/ в тве́рдости доброде́телей вселя́яся, о́тче,/ бесо́в кре́пость разруши́л еси́.

Во успе́нии твое́м, о́тче, бу́ри ве́лии бы́вшей,/ Иоа́ннови стремле́ние уставля́ет и твоему́ погребе́нию слу́жит,/ Фео́дор же от истопле́ния в мо́ри предста́тельством твои́м пресла́вно спаса́ется,/ Го́споду тя прославля́ющу.

Вси и́же в мо́ри обурева́емии к твоему́ предста́тельству прибега́ют,/ и, тя призыва́юще, беду́ющии спаса́ются,/ и нас, бе́дствующих лю́те и напа́стьми одержи́мых,/ ми́лостивно, о́тче, предста́в, спаси́.

Богоро́дичен: О, чу́до, еже всех чуде́с нове́йшее!/ Я́ко Де́ва во утро́бе И́же вся́ческая Содержа́щаго сло́вом,/ неискусому́жно прие́мши, нете́сно вмести́.

Конда́к, глас 3:

Я́ко звезда́ всесве́тлая,/ доброде́тельми сия́ющи, чуде́с лучи́ испуща́ющи,/ обою́ду богатя́ приходя́щих,/ ду́ши исцеля́еши и телеса́,/ благода́ть име́я, Савва́тие,/ прославля́ет бо Своя́ Си Вели́кий Дарода́тель.

И́кос:

Простри́ ми ру́ку Твою́, благода́ть подаю́щу, Бла́же,/ Еди́не Го́споди Бо́же, да восхвалю́ Твоего́ раба́,/ я́ко, ми́ра вся презре́в, усе́рдно Тебе́ после́дова,/ Твоему́ неизрече́нному, е́же в на́ше спасе́ние, стра́нствию, Влады́ко:/ стра́нен быва́я, служа́ па́че, а не слугу́емь,/ обходя́ же и ра́туя врага́, его́же и низложи́,/ сам себе́ озе́мствуя32 во ото́це мо́ря, жела́я прилепи́тися Бо́гу./ Те́мже, и уме́р, я́ко жив, близ всем беду́ющим обрета́ется,/ бе́сы отгоня́я, цельбы́ точа́,/ прославля́ет бо Своя́ Си Вели́кий Дарода́тель.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Просла́вити восхоте́в Влады́ка и яви́ти тя, тая́щася Своего́ раба́,/ гроб твой зна́меньми и си́лами обогати́/ и в мо́ри беду́ющих и тя призыва́ющих спаса́ет, вопию́щих:/ благослове́н еси́ в хра́ме сла́вы Твоея́, Го́споди.

Свяще́нный Зоси́ма свяще́нныя твоя́ мо́щи, о́тче, нетле́нны обре́т во гро́бе,/ усе́рдно подъе́млет, я́ко многоце́нное бога́тство нося́,/ неистощи́мо сокро́вище свое́й кино́вии сокры́в, вопия́ше:/ благослове́н еси́ в хра́ме сла́вы Твоея́, Го́споди.

Ни гроб, хода́тай забве́ния, возмо́же твоя́ доброде́тели, о́тче, утаи́ти:/ трубы́ бо ясне́йше зна́меньми пропове́да твоя́ боле́зни по́стническия, и́миже Бо́гови прибли́жился еси́,/ я́же зря, чу́дный Зоси́ма со ученики́ вопия́ше:/ благослове́н еси́ в хра́ме сла́вы Твоея́, Го́споди.

Богоро́дичен: Вы́шняго освяще́нное Боже́ственное Селе́ние, ра́дуйся,/ Тебе́ бо ра́ди дае́тся ра́дость, Богоро́дице, вопию́щим Ти:/ благослове́нна Ты в жена́х, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Прилепи́ся любо́вию ти, о́тче Савва́тие, блаже́ный Зоси́ма,/ бде́ния при́сно но́щию в гробни́це ти творя́,/ твою́ по́мощь на враги́ прие́мля/ и ча́дом свои́м засту́пника тя име́я, с ни́миже поя́ше:/ благослови́те, вся дела́ Госпо́дня, Го́спода.

Насле́дник ото́ка, насле́дник и доброде́телем ти, о́тче,/ блаже́нный Зоси́ма снасле́дник и ве́чнаго ти блаже́нства бысть,/ отню́дуже и беду́ющим ку́пно предстае́те, те́мже спаса́еми вопию́т:/ благослови́те, вся дела́ Госпо́дня, Го́спода.

О дво́ице присноблаже́нная,/ я́ко еди́но блаже́нство иму́щая от Бо́га, версто́33 предо́брая, Савва́тие и Зоси́мо,/ нас, призыва́ющих вы, те́плым предста́тельством ва́шим от всех лю́тых спаса́йте, пою́щих:/ благослови́те, вся дела́ Госпо́дня, Го́спода.

Богоро́дичен: Ты, еди́на во всех ро́дех, Де́во Пречи́стая, Ма́ти яви́лася еси́ Бо́гу,/ Ты Божеству́ бысть пребыва́ние, Всенепоро́чная,/ не опали́вшися огне́м Непристу́пнаго Све́та./ Те́мже вси Тя благослови́м, Мари́е Богоневе́стная.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Восприе́м я́ко ны́не трудо́в свои́х и по́тов, преподо́бне,/ честь и сла́ву неистле́нну от Христа́ Бо́га,/ свы́ше нас назира́й, твоя́ по́двиги почита́ющих,/ бога́тныя ти да́ры бога́тно нам источа́я.

Ны́не на Небесе́х пра́ведным свеселя́ся, Савва́тие, с ни́миже Христо́ви предстоя́,/ моли́ мир ми́рови пода́ти, и Це́рквам еди́нство, стране́ на́шей побе́дная,/ и всем скорбя́щим предста́тельство и спасе́ние, о́тче.

Приими́ песнь твоего́ раба́, о́тче,/ бога́тными благода́тьми возда́ждь грехо́в оставле́ние, жития́ исправле́ние, и лю́тых избавле́ние,/ на Суде́ ми́лость, и Небе́снаго Ца́рствия насле́дие,/ иде́же ты пребыва́еши, о́тче.

Тро́ичен: Еди́но у́бо Боже́ственное Существо́, но Соста́вми Тро́ицу,/ вси ве́рнии, восхва́лим,/ в неслия́нных Соста́вех Отца́ Пребезнача́льна, Сы́на и Ду́ха Всесвята́го.

Свети́лен:

Свети́льника, свы́ше просвеща́емаго, озаре́ние де́тельми прие́млюща,/ ны́не па́мятию свое́ю ду́ши на́ша освеща́ющаго,/ достодо́лжно почти́м.

Сла́ва, и ны́не, Богоро́дичен:

По Бо́зе упова́ние иму́ще на Тя, Пречи́стая Де́во, мо́лим Ти ся:/ ко И́же из Тебе́ Ро́ждшемуся мольба́ми/ невреди́мы до конца́ нас сохрани́.

На хвали́тех стихи́ры самогла́сны на 4, глас 6:

Савва́тие, преблаже́нне о́тче наш,/ ты мирски́я сла́вы возгнуша́ся и бежа́,/ вы́шния сла́вы жела́я, ю́же и получи́,/ и ны́не тоя́ наслажда́ешися./ Те́мже и мы днесь, в па́мять твою́ сте́кшеся,/ ра́достию псало́мски пое́м:/ сон че́стен пред Го́сподем смерть преподо́бных Его.

Блаже́н еси́, о́тче преподо́бне,/ и добро́ту боже́ственную прие́мля был еси́,/ я́ко лоза́ плодови́та, израща́я доброде́тели,/ и́хже ра́ди ны́не в преми́рных водворя́яся,/ проси́ и нам получи́ти ми́ра от Христа́ Бо́га/ и ве́лия ми́лости.

Позна́хом тя, о́тче, боже́ственных рачи́теля,/ я́ко, доброде́телем усе́рдно прилежа́л еси́,/ восхожде́ние в се́рдце свое́м полага́я./ Я́коже во удо́ли умиле́ния/ слеза́ми се́я пшени́цу де́телей,/ ра́достию рукоя́ти объе́млеши ны́не на Небесе́х,/ отню́дуже помина́й нас, чту́щих тя.

Сла́ва, глас 8:

Мона́хов мно́жества/ наста́вника тя чтим, о́тче наш Савва́тие,/ твое́ю бо стезе́ю пра́вою вои́стину ходи́ти позна́хом./ Блаже́н еси́, Христо́ви рабо́тав/ и вра́жию обличи́в силу,/ А́нгелом собесе́дниче, преподо́бным единокро́вне и Зоси́ме соприча́стниче,/ с ни́миже моли́ся Го́сподеви,/ уще́дрити ми́ра и спасти́ ду́ши на́ша.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную:

Моли́тва

О преподо́бне о́тче, уго́дниче Христо́в Савва́тие, все́ю душе́ю Го́спода возлюби́вый, и удали́выйся в пусты́ню сию́, и тече́ние по́двига спаси́тельнаго соверши́вый! О ве́рный ра́бе Царя́ Небе́снаго, учи́телю доброде́телей, о́бразе смире́ния, граждани́не пусты́нный, А́нгелом собесе́дниче, Херуви́ме земны́й, челове́че Небе́сный! О све́те немра́чный ото́ка Солове́цкаго, па́че же ве́лие свети́ло всея́ Це́ркве правове́рных! Молю́ся ти, прече́стне, аз, многогре́шный (и́мя рек): услы́ши убо́гое мое́ моле́ние, вонми́ глаго́лом нечи́стых усте́н мои́х, твоея́ ны́не по́мощи тре́бующаго. Се бо враг прелука́вый на вся́ко вре́мя тщи́тся мя погуби́ти, иски́й го́рько поглоти́ти ду́шу мою́, и несть мне спасе́ния, иде́же по́мощь прия́ти, зане́ не́мощию пло́ти моея́ обложе́н есмь и страстьми́ весь до́лу приклони́хся, не и́мам к Бо́гу дерзнове́ния. Ны́не же то́чию к твоему́ поверга́ю себе́ заступле́нию: поми́луй мя, омраче́ннаго все́ми злы́ми де́лы, воздежи́ о мне всечестне́и твои́ ру́це ко Го́споду, о моли́твенниче те́плый, Савва́тие преподо́бне, да за благоутро́бие щедро́т Свои́х пода́ст ми грехо́в оставле́ние, и в День Су́дный изба́вит мя ве́чнаго муче́ния, и Ца́рствия Своего́ сподо́бит благода́тию Свое́ю, Ему́же бу́ди всегда́ слава́, честь и поклоне́ние во ве́ки. Ами́нь.