Служба преподобнаго отца нашего Павла Обнорскаго, Вологодскаго чудотворца

ВЕ́ЧЕР

Пое́м Блаже́н му́ж: 1-й антифо́н. На Го́споди, воззва́х: стихи́ры, глас 4.

Подо́бен: Зва́нный свы́ше:

Ве́сь возложи́лся еси́ Вседержи́телю,/ о́тче преподо́бне,/ егда́ тя Боже́ственное жела́ние распали́ и ду́шу впери́,/ тогда́ мир оста́вил еси́ и я́же в ми́ре/ и, взем крест, после́довал еси́ Христу́ невозвра́тным по́мыслом,/ ничто́же предпоче́т па́че любве́ Его́./ Того́ ра́ди Бо́гу благоугоди́л еси́,/ Его́же моли́ спасти́ и просвети́ти ду́ши на́ша.

От ю́ности, преподо́бне, Бо́га возлюби́в,/ Тому́ вседу́шно после́довал еси́./ На ничто́же обраща́яся су́щих в ми́ре,/ но вся уме́ты вмени́в,/ потща́лся еси́ благоугоди́ти Бо́гу,/ за́поведьми Его́ утвержда́яся,/ те́мже и жела́ние коне́чное дости́гл еси́ Христо́ва угожде́ния./ Его́же моли́ спасти́ и просвети́ти ду́ши на́ша.

Основа́ние кре́пко к доброде́телем/ положи́л еси́ в души́ твое́й стра́х Бо́жий:/ сей бо есть нача́ло му́дрости,/ и окормле́ние во всем житии́/ хотя́щим угоди́ти Бо́гу,/ и на сем основа́нии назда́л еси́ кра́сныя доброде́тели/ сохране́нием животво́рных Бо́жиих за́поведей./ Его́же моли́ спасти́ и просвети́ти ду́ши на́ша.

Сла́ва, глас 6:

Оста́вив мир и я́же в ми́ре, преподо́бне,/ после́довал еси́ Христу́,/ безмо́лвным житие́м тща́лся еси́ благоугоди́ти Ему́;/ те́мже удали́лся еси́ бе́гая,/ и водвори́лся еси́ в пусты́ни./ Того́ ра́ди мно́гим душа́м бы́л еси́ во́ждь ко спасе́нию,/ твои́м уче́нием ты́я утвержда́я/ и о́браз благ во всем себе́ предлага́я./ Те́мже во оби́тели твое́й/ творя́щии па́мять твою́ светоно́сную/ ублажа́ют тя, ча́да твоя́,/ и мо́лят тя моли́тися ко Го́споду,/ спасти́ся душа́м нашим.

И ны́не пра́здника, глас 4:

Трепета́ше рука́ Крести́телева,/ егда́ пречи́стому Твоему́ верху́ косну́ся,/ возврати́ся Иорда́н река́ вспять,/ не дерза́ющи служи́ти Тебе́,/ я́же бо устыде́ся Иису́са Навина,/ ка́ко Творца́ своего́ устраши́тися не имя́ше?/ Но все испо́лнил еси́ смотре́ние, Спа́се наш,/ да спасе́ши мир явле́нием Твои́м,/ Еди́не Человеколю́бче.

Вхо́д. Проки́мен дне. Чте́ния три́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры пра́здника, глас 2.

Подо́бен: До́ме Евфра́фов:

Пе́ние новоле́пное/ да пое́т вся тварь/ от Де́вы ро́ждшемуся Христу́/ и кре́щшемуся во Иорда́не днесь.

Стих: Мо́ре ви́де и побеже́,/ Иорда́н возврати́ся вспять.

Труба́ проро́ческая,/ Предте́ча да вопие́т:/ сотвори́те Го́споду,/ кре́щшемуся в струя́х,/ плоды́ изря́днейших дея́ний.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспять?

Возсия́ сро́дный с высоты́/ Боже́ственный Дух,/ в ви́де голуби́не/ зрим несказа́нно,/ ны́не Христу́ притече́.

Сла́ва, глас 8:

Мона́хов мно́жества/ наста́вника тя почита́ем, о́тче наш Па́вле,/ твое́ю бо стезе́ю вои́стинну пра́во ходи́ти позна́хом:/ блаже́н еси́ Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных./ С ни́миже моли́ся Го́сподеви, поми́ловатися душа́м на́шим.

И ны́не, пра́здника, глас 4:

Тебе́, в Ду́се и огни́ очища́юща грех ми́ра,/ зря́ Крести́тель гряду́ща к себе́,/ ужаса́яся и трепе́ща, вопия́ше, глаго́ля:/ не сме́ю держа́ти ве́рх Тво́й пречи́стый,/ Ты мя освяти́, Влады́ко,/ Боже́ственным явле́нием Твои́м,/ Еди́не Человеколю́бче.

Тропа́рь, глас 1:

Боже́ственною любо́вию от ю́ности распала́ем, Па́вле преподо́бне,/ вся, я́же в ми́ре, кра́сная возненави́дев,/ Христа́ еди́наго возлюби́л еси́,/ и сего́ ра́ди во вну́треннюю пусты́ню всели́лся еси́,/ со зверьми́ жи́ти ве́сь Христу́./ Отону́дуже и Всеви́дящее О́ко, твоя́ труды́ ви́дев,/ да́ром чуде́с и по преставле́нии обогати́ тя./ Те́мже вопие́м ти:/ моли́ непреста́нно о всех нас,/ честну́ю па́мять твою́ при́сно в пе́снех почита́ющих.

Сла́ва, и ны́не, пра́здника.

Во Иорда́не креща́ющуся Тебе́, Го́споди,/ Тро́йческое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух в ви́де голуби́не/ изве́ствоваше словесе́ утвержде́ние./ Явле́йся Христе́ Бо́же/ и мир просвеще́й, сла́ва Тебе́.

НА У́ТРЕНИ

На Бог Госпо́дь, тропа́рь пра́здника, два́жды, Сла́ва, свята́го: И ны́не, пра́здника.

По стихоло́гиях седа́льны пра́здника.

По полиеле́и седа́лен свята́го, глас 4.

Подо́бен: Удиви́ся Ио́сиф:

Удиви́ся тво́й духо́вный настоя́тель, вели́кий Се́ргий,/ в тебе́ вели́ко воздержа́ние зря,/ и внима́ше мы́слию хотя́щая от тeбе́ напосле́док бы́ти, Па́вле,/ ви́дев бо твое́, е́же по Бо́гу, житие́, вра́жиими прило́ги ника́коже поколеби́мо,/ свиде́тельствует я́ко оте́ц и храни́тель твоего́ жития́/ и бра́тием Вели́кия Ла́вры своея́ вопия́ше:/ сей, и́же посреди́ нас ме́ньший ви́дится,/ но последи́ в пустыни вели́к свети́льник бу́дет.

Сла́ва, и ны́не пра́здника.

Степе́нна, проки́мен и Ева́нгелие от Матфе́я, зача́ло 43, преподо́бному.

По 50-м псалме́ стихи́ра, глас 6, пи́сана на Го́споди, воззва́х: Сла́ва: Оста́вив мир:

Кано́н пра́здника со ирмосо́м на 6 и преподо́бнаго кано́н на 8. глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Возлюби́в Бо́га, преподо́бне, от всея́ души́ твоея́,/ Тому́ от ю́ности послужи́л еси́ в простоте́ се́рдца твоего́./ Те́мже и просла́ви тя:/ весть бо Госпо́дь сла́вящия Его́ прославля́ти.

От ю́ности, преподо́бне, Бо́гу прилепи́лся еси́/ и невозвра́тно после́довал еси́ живоно́сным Его́ стопа́м:/ удали́вся бо ми́ра, водвори́лся еси́ в пусты́ню./ Те́мже почита́ем па́мять твою́.

Ны́не, преподо́бне о́тче Па́вле, с ли́ки проро́к и апо́стол, му́ченик же и преподо́бных/ во све́те Святы́я Тро́ицы соводворя́яся,/ помина́й ча́да твоя́, ве́рою творя́щия па́мять твою́ светоно́сную.

Богоро́дичен: Без се́мене О́тчею во́лею/ от Боже́ственнаго Духа Бо́жия зачала́ еси́ Сы́на и пло́тию родила́ еси́,/ Су́щаго из Отца́ без ма́тере, нас ра́ди из Тебе́ без отца́.

Катава́сия пра́здника.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище и утвержде́ние.

От мла́да во́зраста, преподо́бне, возлюби́л еси́ пребыва́ти в дому́ Госпо́дни и зре́ти красоты́ Его́./ Те́мже избра́ тя Госпо́дь от ми́ра,/ во е́же служи́ти тебе́ пред лице́м Его́ в преподо́бии и пра́вде.

Удали́вся ми́ра, тру́дное житие́ возлюби́л еси́, преподо́бне,/ е́же ко всем послушли́ву бы́ти, и служи́ти всем от кра́йняго смире́ния,/ и себе́ после́днейша вменя́ти от всех./ Те́мже и Госпо́дь просла́ви тя.

В безмо́лвии возлюби́л еси́ жи́ти, о́тче преподо́бне:/ те́мже удали́вся от челове́к водвори́лся еси́ в пусты́ни, со зверьми́ живы́й./ Того́ ра́ди ны́не во све́те святы́х пребыва́я,/ помина́й творя́щия па́мять твою́.

Богоро́дичен: Неора́нная Ни́ва яви́лася еси́, Кла́с жи́зненный ро́ждши,/ всем причаща́ющимся безсме́ртия Хода́тая,/ во святы́х Свята́го, свя́то почива́ющаго.

Конда́к и и́кос пра́здника.

Та́же седа́лен свята́го, глас 8.

Подо́бен: Прему́дрости:

Пожи́в, преподо́бне, во а́лчбе и жа́жде и в про́чиих злострада́ниих,/ не дая́ поко́я те́лу твоему́, за е́же получи́ти бу́дущий поко́й,/ отону́дуже и жела́ния не погреши́л еси́,/ но получи́л еси́ о́ноя ра́дости,/ щади́мыя лю́бящим Бо́га,/ те́мже помина́й ча́да твоя́ и не забу́ди, я́коже обеща́лся еси́,/ да вси вопию́т ти:/ о́тче наш Па́вле преподо́бне, моли́ Христа Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Стра́хом Бо́жиим огра́ждся от ю́ности, преподо́бне,/ и безмо́лвно Бо́гу послужи́л еси́, во уедине́нии пребыва́я,/ посто́м и жа́ждею смиря́я те́ло,/ моли́твою же чи́стою душу просвеща́я.

Ху́дость ри́зную па́че всех име́л еси́, преподо́бне,/ не возлюби́в мягких и сла́бящих те́ло:/ весть бо от сего́ и душа́ смиря́тися/ и сообразова́тися вну́тренняя вне́шнему устрое́нию.

Безмо́лвие лобыза́в от ю́ности и мно́га ле́та в то́м потруди́вся,/ вся́ким злострада́нием друча́ те́ло твое́ и не дая́ себе́ почива́ти теле́сне,/ да получи́ши бу́дущий поко́й.

Богоро́дичен: Неискусобра́чно родила́ еси́, Де́во,/ и по рождестве́ яви́лася еси́ де́вствующи па́ки./ Те́мже немо́лчными гласы,/ е́же ра́дуйся, Тебе́, Влады́чице, ве́рою несомне́нною взыва́ем.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Свя́тый, обраща́яй из мра́чна неве́дения/ ве́рою воспева́ющия Тя.

Ты процве́л еси́, преподо́бне, в пусты́ни, дави́дски,/ я́коже фи́никс, сия́я доброде́тельми,/ отону́дуже и позна́н бы́л еси́,/ я́ко мно́гим приходя́щим ревнова́ти твоему́ е́же по Бо́гу житию́.

Ты, преподо́бне, явле́н бы́л еси́ от доброде́тельнаго жи́тельства,/ от него́же всем ви́дящим созидова́тися душа́ми и к ре́вности воздвиза́тися,/ е́же отрещи́ся ми́ра и твоему́ житию́ подо́битися.

Ты, преподо́бне, смири́вся па́че всех,/ и от сего́ приобре́т умиле́ние души́ и сле́з исто́чник непрестаю́щ,/ и сия́ вмени́в хлеб день и нощь, по проро́ческому рече́нию.

Богоро́дичен: Тя ору́жие непобеди́мое на враги́ предлага́ем,/ Тя, утвержде́ние и наде́жду на́шего спасе́ния, Богоневе́сто, стяжа́хом.

Песнь 6

Ирмо́с: Пожру́ Ти со гласом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ре́бр Твоих/ исте́кшею кро́вию.

Позна́в Бо́га, преподо́бне, по вме́стному челове́ком,/ те́мже и позна́н был еси́ от Бо́га по и́мени про́чих оте́ц/ и душ па́стырь устро́ен бы́л еси́,/ сия́ наставля́я к доброде́телем и приводя́ Бо́гу спаса́емы.

Возлюби́в, блаже́нне, всено́щное бде́ние,/ сим очища́я ум тво́й,/ ду́шу же просвеща́я, и те́ло твое́ смиря́я,/ и ко дневны́м трудо́м благопоко́рно устроя́я.

Любо́вь к Бо́гу и к бли́жнему стяжа́в, зако́на и проро́к исполня́я глави́зну,/ и́бо не любя́й бли́жняго, ниже́ Бо́га возлюби́ти мо́жет,/ ты же, преподо́бне о́тче наш Па́вле, обоя́ испо́лнил еси́.

Богоро́дичен: О, чу́до, всех чуде́с нове́йшее!/ Я́ко Де́ва во утро́бе вся́ческая Содержа́щаго/ неискусому́жно заче́нши, не тесновмести́.

Конда́к, глас 8

Подо́бен: Взбра́нной воево́де:

Все твое́ у́мное жела́ние к Бо́гу впери́в,/ и Тому́ невозвра́тно от души́ после́довал еси́, в пусты́ню всели́вся,/ и та́мо а́нгельски пожи́в, мно́гим пу́ть бы́л еси́ ко спасе́нию./ Сего́ ра́ди и Христо́с тя просла́ви, и да́ром чуде́с обо́гати́./ Те́мже вси́ вопие́м ти́:/ ра́дуйся, Па́вле преподо́бне, пусты́нный жи́телю.

И́кос:

Удали́вся, преподо́бне, от челове́ков, и безмо́лвно житие́ возлюби́в,/ и пусты́ню дости́г споспе́шну к сему́ лю́бящим Бо́га,/ и в то́й мно́га ле́та пожи́л еси́,/ оскорбля́емь от де́монов, и от ненака́занных челове́к,/ и вся сия́ претерпе́л еси́, Бо́гу тя укрепля́ющу,/ и о́ных не́мощь обличи́л еси́ терпе́нием твои́м,/ и отсю́ду устро́ен бы́л еси́ па́стырь душ,/ сих у́бо словесы́ уча́, де́лы же показу́я изве́стне и разу́мне./ Те́мже и ча́да твоя́ пра́зднующе па́мять твою́, вопию́т ти:/ ра́дуйся, Па́вле преподо́бне, пусты́нный жи́телю.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че, не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Поще́нием огради́вся от ю́ности,/ сим те́ло твое́ смиря́я и благопоко́рно души́ сотворя́я,/ к сему́ же и стра́сти успива́я,/ без стуже́ния от сих пребы́л еси́, поя́ Христу́:/ благослове́н Бог оте́ц на́ших.

Язы́ка воздержа́ние испра́вил еси́, о́тче преподо́бне,/ от многоглаго́лания сему́ возбраня́я, на моли́тву же сего́ простира́я,/ и е́же то́чию ну́ждная глаго́лати к по́льзе слы́шащих и пе́ти Христу́:/ благослове́н Бог оте́ц на́ших.

Нищету́ самово́льную Христа ра́ди стяжа́в,/ и от всех жите́йских безыме́нен пребы́л еси́,/ доброде́тельми же обогати́лся еси́/ и мно́гих к ре́вности воздви́гл еси́, науча́я пе́ти Христу́:/ благослове́н Бог оте́ц на́ших.

Богоро́дичен: Вы́шняго освяще́нное Боже́ственное селе́ние, ра́дуйся!/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Целому́дрие стяжа́в попремно́гу и чистоту́ теле́сную, я́коже подоба́ет святы́м,/ и́стинное же смире́ние и сокруше́ние се́рдца вельми́ удержа́л еси́/ и ско́рбных нанесе́ние, ра́дуяся приима́л еси́, поя́ Бо́гу:/ благослови́те, вся дела́ Госпо́дня, Го́спода.

Стра́х Бо́жий стяжа́в в себе́ и сим наказа́в чу́вства твоя́,/ е́же не преходи́ти свои́х преде́лов, ни поврежда́тися от сих уму́,/ и отсю́ду Бо́гу угоди́л еси́, во смире́нии поя́:/ благослови́те, вся дела́ Госпо́дня, Го́спода.

Зве́рие ди́вии, преподо́бне, кровоя́дцы су́ще, приходя́ще к тебе́, кро́тцы быва́ху,/ от бла́года́ти Бо́жия, живу́щия в тебе́, ничто́же ти́ ско́рбно показу́юще,/ но и повеле́нию твоему́ повинова́хуся, пою́щаго:/ благослови́те, вся дела́ Госпо́дня, Го́спода.

Богоро́дичен: Ты еди́на во всех ро́дех, Дево Пречи́стая, Ма́ти яви́лася еси́ Бо́жия,/ Ты Божества́ была́ еси́ жили́ще, Всенепоро́чная,/ не опали́вшися огне́м Непристу́пнаго Све́та./ Те́мже Тя вси благослови́м, Мари́е Богоневе́сто.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем веселя́щеся, Тя, Богоро́дице, велича́ем.

Пребы́вшу ти́, о́тче, мно́га ле́та в пусты́ни/ в безмо́лвии и поще́нии, и всех ско́рбных в терпе́нии/ и попремно́гу Бо́гу угоди́вшу,/ отону́дуже и Он тя прославля́ет я́ко Своего́ уго́дника.

Поще́нием насажде́н быв, я́ко дре́во при вода́х, блаже́нне, воздержа́ния,/ процве́л еси́ доброде́тельми, и в ме́ру дости́г во́зраста исполне́ния Христо́ва,/ и духо́внаго соверше́ния получи́л еси́, я́коже мо́щно челове́ку.

Ты у́бо, преподо́бне, хоте́л еси́ утаи́тися от челове́к, и еди́н безмо́лвствовати,/ но Бог не оста́ви тебе́ неве́дома бы́ти,/ но всем показа́ житие́ твое́ доброде́тельное,/ на по́льзу хотя́щим стопа́м твои́м после́довати.

Богоро́дичен: Я́же всеми влады́чествующи тварьми́,/ лю́дем Твоим да́руй побе́дное одоле́ние,/ врага́ полага́ющи примири́тельна Це́ркви,/ да Тя я́ко Богоро́дицу велича́ем.

Свети́лен:

Поревнова́в, блаже́нне, преподо́бному Се́ргию,/ от него́же и наста́влен быв на духо́вныя по́двиги,/ многоле́тне потруди́лся еси́ в безмо́лвии, и посте́, и про́чиих страда́ниих/ и ны́не во свете Святы́я Тро́ицы соводворя́яся, нас помина́й.

Сла́ва, и ны́не, пра́здника.

На хвали́тех стихи́ры, на 4, глас 8.

Подо́бен: О, пресла́внаго чудесе́!

О́тче преподо́бне,/ ты Бо́га возлю́бив от ю́ности,/ к Нему́ прилепи́лся еси́,/ оста́вив мир с попече́ньми его́:/ и, от всех обнажи́вся жите́йских,/ безмо́лвно житие́ пожи́л еси́,/ несму́тным умо́м вы́ну служа́ Бо́гу,/ и во смире́нии мно́зе и умиле́нии души́./ Того́ ра́ди просла́ви тя Вели́кий Дарода́тель.

Преподо́бне о́тче Па́вле,/ ты Бо́гу после́дуя,/ всех возлюби́л еси́,/ и от всех люби́м бы́л еси́/ блага́го ра́ди жи́тельства и нра́ва благопристу́пнаго,/ я́коже ктому́ не я́ко челове́ка име́ти, но я́ко А́нгела./ Отону́дуже и душ попече́ние восприя́л еси́,/ наставля́я сия́ твои́ми уче́ньми/ к Небе́сному насле́дию.

Преподо́бне, о́тче Па́вле,/ ты на Бо́га о всем упова́ние возложи́в,/ хра́м прече́стен Живонача́льныя Тро́ицы воздви́гл еси́,/ Бо́гу ти́ помога́ющу,/ и оби́тель созда́л еси́/ в пребыва́ние хотя́щим спасти́ся./ И о сих всех промышля́я я́ко при́сный оте́ц,/ всех наставля́я, и науча́я,/ и собо́ю исправля́я,/ да получа́т бу́дущее блаже́нство.

Сла́ва, глас 3:

Преблаже́нне о́тче наш Па́вле,/ вся су́щия с тобо́ю учи́л еси́, глаго́ля:/ ча́да, ели́ка си́ла есть, подвиза́йтеся о свое́м спасе́нии/ и терпи́те ско́рби лю́тыя, да получите́ бу́дущее блаже́нство./ Никтоже, в ле́ности пребыва́я, получи́т бу́дущих благ,/ но зако́нно зде́ стра́ждущии, та́мо зако́нно венчава́ются пра́ведными венцы́.

И ны́не, пра́здника.

Славосло́вие великое и отпу́ст. Ча́с пе́рвый и коне́чный отпу́ст.

На Литурги́и слу́жба преподо́бническая.

Моли́тва

О до́брый наш па́стырю и Богому́дрый наста́вниче, преподо́бне о́тче Па́вле! Услы́ши нас, гре́шных, моля́щихся тебе́ и призыва́ющих в по́мощь ско́рое предста́тельство твое́, виждь нас, гре́шных, в толи́цех обстоя́ниих су́щих, виждь нас, немощны́х, отвсю́ду уловля́емых, вся́каго бла́га лише́нных и умо́м от малоду́шия помраче́нных, потщи́ся, уго́дниче Бо́жий, не оста́вити нас в грехо́вном плену́ бы́ти, да не бу́дем в ра́дость враго́м на́шим и не у́мрем в лука́вых дея́ниях на́ших. Моли́ о нас, недосто́йных, Соде́теля на́шего и Влады́ку, Ему́же ты со Безпло́тными ли́ки предстои́ши. Ми́лостива к нам сотвори́ Бо́га на́шего в ны́нешнем ве́це и в бу́дущем, да не возда́ст нам по дело́м на́шим и по нечистоте́ серде́ц на́ших, но по Свое́й бла́гости возда́ст нам, на твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем и, к цельбоно́сному гро́бу твоему́ припа́дающе, исцеле́ния про́сим: изба́ви нас, уго́дниче Христо́в, от злых, находя́щих на нас, и укроти́ во́лны страсте́й и бед, востаю́щих на нас, да ра́ди святы́х твои́х моли́тв не обы́мет нас напа́сть и не погря́знем в пучи́не грехо́вней и в ти́не страсте́й на́ших. Моли́, преподо́бне отче Па́вле, Христа́ Бо́га на́шего, да пода́ст нам ми́рное жи́тельство, оставле́ние грехо́в, душа́м на́шим спасе́ние и велию ми́лость. Ами́нь.