Служба преподобнаго отца нашего Парфения, епископа Лампсакийскаго и преподобнаго отца нашего Луки, иже во Елладе

На Го́споди, воззва́х: стихи́ры святи́теля 3 и преподо́бнаго 3.

Стихи́ры святи́теля, глас 1.

Подо́бен: Небе́сных чино́в:

Де́вства тезоимени́тый,/ лампсаки́йский свети́льник,/ чудоде́йств све́тлая денни́ца, Парфе́ний вели́кий/ всех нас созыва́ет па́мятию свое́ю/ торжество́ соверша́ти духо́вное,/ воспева́ющих Спа́са Христа́.

Из млада́ во́зраста Бо́га в себе́ нося́,/ де́монския полки́ огне́м моли́тв твои́х попали́л еси́, преблаже́нне,/ напра́вил еси́, му́дре, лампсаки́йское стадо,/ и́бо, тре́бища и́дольская низложи́в,/ обнови́л еси́ себе́ Бо́гу.

Пропове́дует твое́ чу́до изве́ргшаяся ры́ба,/ ожи́вшая недыха́ющая,/ плод непло́дныя ни́вы и виногра́да,/ дождь дово́льный, омака́ющих обеща́ние./ Чуде́сна твоя́ дела́, священноде́йственне,/ те́мже моли́ спасти́ся нам.

И́ны стихи́ры преподо́бнаго, глас 6.

Подо́бен: Всю отложи́вше:

Весь от ю́ности после́довав Го́сподеви,/ роди́телей оста́вил еси́, сла́вне,/ пристра́стие и любо́вь мирску́ю/ и в пусты́нях пожи́л еси́,/ по́стных житие́ держа́ во смире́нии,/ е́же и сконча́л еси́,/ горя́ ду́хом, преподо́бне,/ до́бре ку́плю соде́лав,/ расточи́в твоя́ име́ния ни́щим/ и би́сер честны́й купи́в – Христа́./ егоже и получи́в жела́ния,/ почил еси́, достославне.

Терпе́л еси́, бие́мь,/ укоря́емь, о́тче,/ ураня́емь от роди́телей за Го́спода,/ Его́же жела́л еси́, славне,/ Его́же ра́ди уязви́вся жела́нием,/ кра́сная в ничто́же вмени́л еси́,/ ма́тере же лише́ние/ и стра́нничество возлюби́л еси́,/ во о́браз обле́клся еси́ мона́шеский, свяще́ннейше./ Но явля́ет тя Бог и не хотя́ща,/ моли́твам ма́терним, Луко́ преподо́бне,/ прекло́нься я́ко Человеколю́бец.

Житие́ скончав твое́ свяще́нное, всесвяще́нне,/ чудеса́ соверши́л еси́, свяще́нне,/ изря́дна и преславна́,/ и Бо́гу, тебе́ пода́вшу зало́г Боже́ствен/ и пре́жде воздая́ния Боже́ственных трудо́в твои́х,/ подае́т же и вене́ц нетле́нен тебе́/ и сла́ву ве́чнующую,/ егда́ я́ко Судия́ прии́дет./ Того́ убо моли́/ изба́витися пою́щим тя при́сно/ от всякаго озлобле́ния,/ Луко́ пречудне.

Сла́ва, и ны́не, пра́здника, глас то́йже.

Самогла́сен. Ге́рманово:

На рука́х ста́рческих во дне́шний день,/ я́ко на колесни́це Херуви́мстей,/ восклони́тися благоизво́ливый, Христе́ Бо́же,/ и нас, пою́щих Тя,/ страсте́й мучи́тельства, призыва́емый, изба́ви/ и спаси́, я́ко Человеколю́бец.

А́ще есть пост, Сла́ва, и ны́не, Богоро́дичен; а́ще ли во вто́рник или́ в четверто́к ве́чера, Крестобогоро́дичен, пи́сан в 10-й день.

На стихо́вне стихи́ры, глас 6.

Подо́бен: Тридне́вен:

Восприими́, – рече́, – Симео́не,/ Зижди́теля вся́ческих рука́ми,/ о ста́рче, подыми́ Христа́,/ Его́же Де́ва Отрокови́ца роди́ без семе́не/ на ра́дость ро́ду на́шему.

Стих: Ны́не отпуща́еши раба́ Твоего́, Владыко,/ по глаго́лу Твоему́, с ми́ром.

Зако́на Творца́ и Бо́га,/ Его́же трепе́щут А́нгельская мно́жества,/ соше́дшеся, воспои́м, лю́дие, Еди́наго Благоде́теля и зако́ну Законода́теля/ во спасе́ние душ на́ших.

Стих: Свет во открове́ние язы́ков/ и сла́ву люде́й Твои́х Изра́иля.

Ны́не отпуща́еши, Влады́ко, раба́ Твоего́, я́коже рекл еси́, с ми́ром,/ я́ко ви́дех Тя, Христе́, Све́та Первове́чнаго,/ соу́з мя плотски́х, во открове́ние язы́ков и Изра́илю.

Сла́ва, и ны́не, глас 6. Иоа́нна мона́ха:

Да отве́рзется дверь Небе́сная днесь,/ безнача́льное бо Сло́во О́тчее/ нача́ло прии́м под ле́ты,/ не отсту́пль Своего́ Божества́, от Де́вы я́ко Младе́нец четыредесятодне́вен/ Ма́терию во́льне прино́сится в Це́рковь зако́нную,/ и Сего́ на ру́ки прие́млет ста́рец,/ отпусти́, зовы́й, раба́, Влады́ко,/ и́бо о́чи мои́ ви́деста спасе́ние Твое́./ Прише́дый в мир спасти́ род челове́чь,/ Го́споди, сла́ва Тебе́.

Тропа́рь святы́х, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Сла́ва, и ны́не, пра́здника, глас 1:

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,/ да́рующаго нам воскресе́ние.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, святы́х: И ны́не, пра́здника.

По 1-й стихоло́гии седа́лен, глас 4:

Подо́бен: Удиви́ся Ио́сиф:

Младе́нствуеши мене́ ра́ди, Ве́тхий де́ньми,/ чище́нием приобща́ешися, Чисте́йший Бо́же,/ да плоть уве́риши мне, ю́же от Де́вы;/ и сим Симео́н поуча́яся, позна́ Тя, Бо́га, я́вльшагося пло́тию,/ и, я́ко Жизнь, лобза́ше и, ра́дуяся, ста́рчески взыва́ше:/ отпусти́ мене́, Тебе́ бо ви́дех, Живота́ вся́ческих.

Сла́ва, и ны́не, то́йже.

По 2-й стихоло́гии седа́лен, глас 1.

Подо́бен: Лик А́нгельский:

Сый со Отце́м на престо́ле святе́м, прише́д на зе́млю, от Де́вы роди́ся/ и Младе́нец бысть, ле́ты Сый неопи́сан,/ Его́же прии́м Симео́н на ру́ки, ра́дуяся, глаго́лаше:/ ны́не отпуща́еши, Ще́дре, возвесели́в раба́ Твоего́.

Сла́ва, и ны́не, то́йже.

Кано́н пра́здника, со ирмосо́м на 6, и святы́х на 8.

Ин кано́н святи́теля, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Уясня́ют доброде́телей благода́тию днесь всех нас,/ в све́тлое торжество́ мудраго святи́теля,/ я́коже зарю́, испуща́я светоно́сная чуде́с сия́ния.

На го́ру безстра́стия, преподо́бне, возне́сл еси́ ум/ и, во мрак писа́ний вшед,/ невеще́ственнаго, Парфе́ние, све́та, преподо́бне, испо́лнен яви́лся еси́, славне.

Ору́жие, я́ко вои́стинну извле́к, и́же есть глаго́л Бо́жий,/ вра́жию уязви́л еси́ кре́пость,/ святи́телю Парфе́ние,/ те́мже победи́тельная на де́моны ты прия́л еси́.

Богоро́дичен: Роди́тель в раи́ бысть за́висть сме́рти челове́ком,/ его́же, ро́ждься, Де́во, из Тебе́ Сын Бо́жий Оте́чь/ с шу́мом потреби́, безсме́ртие пода́в ро́ду на́шему.

Ин кано́н преподо́бнаго, глас 6.

Песнь 1

Ирмо́с: Я́ко по су́ху пешеше́ствовав Изра́иль/ по бе́здне стопа́ми,/ гони́теля фарао́на/ ви́дя пото́пляема,/ Бо́гу, побе́дную песнь пои́м, вопия́ше.

Сло́во ми даждь, Богови́дче, предстоя́ престо́лу Влады́ки твоего́,/ воспе́ти све́тлое и светоно́сное житие́ твое́, Луко́,/ разори́в мглу ума́ моего́.

Всекре́пко тя возлюби́в, свяще́нный, Спа́се,/ к по́стничеству приступи́ тве́рдо,/ ско́рби и труды́ и боле́зни терпя́,/ и́миже обре́те сла́дость некончаему́.

Утружда́я те́ло, о́тче Луко́, воздержа́нием всегда́,/ бде́нием ча́стым и озлобле́нием вся́цем, му́дре,/ стремле́ния страсте́й лю́тых уста́вил еси́.

Богоро́дичен: Господороди́тельнице Де́во,/ я́же Бо́га пло́тию ро́ждши, неразлу́чнаго Отцу́,/ воплоще́нна за милосе́рдие земны́х,/ томле́ния мя страсте́й покажи́ превы́шша.

Ин. Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Я́коже фи́никс цветоно́сен,/ доброде́тели на земли́, преподо́бне,/ безсме́ртия плоды́ на Небесе́х скрыл еси́.

Храм тя всех Бо́гу живу́щая в тебе́ показа́ благода́ть себе́, преподо́бне,/ ея́же ра́ди просла́вился еси́, Парфе́ние.

Пречестны́м от Бо́га архиере́йства укра́шься, сла́вне, одея́нием,/ священноде́йственник досто́ин Того́ яви́лся еси́ благосты́ни.

Богоро́дичен: Разруши́ся кля́твы на́шея средогра́дие, Чи́стая Влады́чице, па́че ума́ Рождество́м Твои́м,/ и Боже́ственному естеству́ совокупи́хомся.

Ин

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Воскрили́вся те́плым раче́нием Спа́са, роди́телей любо́вь презре́л еси́,/ Его́же ра́ди и был еси́, о Луко́, стра́нен всех сла́дких, блаже́нне.

Храм Госпо́день себе́ соде́лати хотя́, в пусты́нях всели́лся еси́,/ я́коже дре́вле Илия́, с де́моны боря́ся,/ те́мже обре́л еси́ кончи́ну блаже́нную.

Вся́кой Боже́ственней за́поведи, я́коже благопокори́в раб, яви́лся еси́, всеблаже́нне,/ до́бре сия́ соверша́я и смиря́я себе́:/ те́мже высоту́ прия́л еси́ Небе́сную.

Богоро́дичен: Де́во Ма́ти Бо́жия,/ ро́ждшая Сло́во па́че сло́ва, я́вльшееся нас ра́ди, моли́ приле́жно безслове́сия вся́каго мя изба́вити.

Конда́к Парфе́ния, глас 3:

Подо́бен: Де́ва днесь:

Чуде́с прия́л еси́ Боже́ственную благода́ть,/ Богому́дре свяще́нне Парфе́ние,/ чудотво́рче Богоно́се,/ вся ве́рных стра́сти очища́я, ду́хи лука́вства, о́тче, изгоня́я,/ сего́ ра́ди тя воспева́ем,/ я́ко ве́лия таи́нника Бо́жия благода́ти.

Конда́к Луки, глас 8:

Избра́вый Тя Бог пре́жде созда́ния во Свое́ благоуго́дие,/ и́миже ве́дяще судьба́ми,/ при́сно от утро́бы освяща́ет/ и Своего́ раба́ показа́ тя,/ исправля́я твоя́ стопы́ Луко́, я́ко Человеколю́бец./ Ему́ ны́не, ра́дуяся, предстои́ши.

Седа́лен, глас 3.

Подо́бен: Боже́ственныя ве́ры:

Испо́лнь Ду́ха Боже́ственнаго сый, де́лы просия́ благоче́стия,/ свяще́нне чудотво́рче Парфе́ние,/ от ле́сти челове́ки обрати́л еси́,/ боля́щих стра́сти исцеля́я./ О́тче преподо́бне, Христа́ Бо́га моли́/ спасти́ся душа́м на́шим.

Сла́ва, седа́лен преподо́бнаго, глас 8.

Подо́бен: Прему́дрости:

От младе́нства возлюби́в доброде́тель, сла́дких всех оша́ялся еси́, му́дре,/ поще́ние и воздержа́ние изве́стно показу́я,/ и, ма́терне жела́ние нивочто́же вмени́в, стра́нничеству себе́ тай вдал еси́./ Па́ки же возвеща́ет тя Бог ма́тери твое́й,/ рыда́ющей лише́ния твоего́ пра́ведно всеизря́днейше./ С не́юже ны́не живы́й моли́ Христа́ Бо́га прегреше́ний оставле́ние пода́ти/ пра́зднующим любо́вию святу́ю па́мять твою́.

И ны́не, пра́здника, глас то́йже:

Подо́бен: Свире́лей па́стырских:

Роди́лся еси́ на земли́, Собезнача́льный Отцу́,/ прине́слся еси́ в це́рковь, Непостижи́мый./ Ра́дуяся же, ста́рец на ру́ки Тя восприя́т, зовы́й:/ ны́не отпуща́еши, его́же посети́л еси́, по глаго́лу Твоему́,/ благоизво́ливый спасти́ я́ко Бог род челове́ческий.

А́ще есть пост, Сла́ва, и ны́не, Богоро́дичен; а́ще среда́ или́ пято́к, Крестобогоро́дичен (пи́саны се́го ме́сяца в 11-й день).

Ин. Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Та́ин неизглаго́ланных насла́ждься Бо́жиих, треблаже́нне,/ науча́яся Боже́ственно Того́ сокрове́нным,/ те́мже и ра́зума ре́ки, Парфе́ние, источи́л еси́.

Весь взе́мся, Богоно́се, мы́слию к Небеси́ Боже́ственнее,/ сла́ву ви́дел еси́ мы́сленно неизрече́нную,/ те́мже и равноа́нгелен на земли́ яви́лся еси́, Парфе́ние.

Весели́тся со А́нгелы вся тварь,/ я́же па́че ума́ зря́щи соверша́ема, о́тче, тобо́ю зна́мения,/ те́мже и вино́внаго сим воспева́ет, я́ко Бо́га си́льна.

Богоро́дичен: Я́ко пресла́вна и неизглаго́ланна, Богоро́дице, но́ваго Твоего́ Рождества́/ и́стинно суть, Чи́стая, та́инства стра́шна и ужа́сна,/ в ни́хже мысль и ум побежда́ется, Пречи́стая.

Ин

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи.

Незло́бив, преподо́бен, пра́веден,/ и кро́ток, и цел яви́лся еси́, о́тче Луко́,/ те́мже ублажи́лся еси́ от всех Творца́ и Влады́ки, всеблаже́нне.

Ви́дев зави́дяй тя до́бре проходя́ща житие́,/ разжже́ся и напа́стей мно́жество тебе́ воздви́же,/ но изобличи́ся тощ волк, всу́е сло́вом зи́нув.

Ума́ пра́востию житие́ упра́вил еси́ к лу́чшим,/ всеблаже́нне,/ жела́ний всех кра́йнейшее жела́я, о́тче, ви́дети,/ е́же благополу́чно и получи́л еси́.

Богоро́дичен: Красну́ добро́тою Тя па́че всех обре́т же́н,/ Кра́сный, Де́во Чи́стая, в Твою́ утро́бу всели́ся/ и злообра́зия мя страсте́й и тьмы изба́ви.

Ин. Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обращаяй из мра́чна неве́дения/ ве́рою воспева́ющия Тя.

Пома́зался еси́ вои́стинну еле́ем Ду́ха, Парфе́ние, по достоя́нию служи́ти Го́споду,/ сла́вою тя украси́вшему.

Глубину́ испыта́я писа́ния, пресла́вне,/ многоце́нный би́сер – Христа́ – избра́в,/ Его́же ста́ду разда́л еси́.

Я́ко име́я от Бо́га неистощи́му благода́ть, му́дре,/ пресла́вна источа́еши чудеса́ всем,/ чудотво́рче Парфе́ние.

Богоро́дичен: Да кропи́т Не́бо весе́лие и благода́ть на земли́,/ воздаде́ бо Ей ны́не весе́лие в высоту́, Еди́ну Богороди́тельницу.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Трудо́в твои́х воздая́ние от Богатода́вца восприе́м, о́тче преподо́бне,/ пучи́на чуде́с всем яви́лся еси́,/ неду́ги отгоня́я приступа́ющим к тебе́.

Не поколеба́лся еси́, о́тче, врага́ премно́гими прило́ги,/ не ужаса́лся еси́ возвыше́ния его́,/ стал же еси́, я́ко столп тве́рд, непоколе́блен,/ во смире́ние, я́ко во броня́, оде́явся.

Добре́ соверши́в свяще́нное житие́ твое́, всеблаже́нне,/ и прие́м от Бо́га Вседержи́теля благода́ть исцеле́ний,/ слепы́я просвети́л еси́, хромы́я и разсла́бленныя здра́вы содева́я.

Богоро́дичен: Лю́дие, по́йте, Ю́же вои́стинну ро́ждшую Сло́во Бо́жие несказа́нно/ и пребы́вшую па́ки по Рождестве́ Де́ву нетле́нну,/ я́ко всем предста́тельство и спасе́ние на́ше.

Ин. Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кровию.

Тру́бит вселе́нней всей, Парфе́ние, Богоно́сное твое́ житие́,/ кра́сных чуде́с дарова́нии, пресла́вне, веща́нием Ду́ха.

Кропи́л еси́ сыноположе́ния во́ду ста́ду твоему́,/ нече́стия скве́рну омыва́я уче́нии твои́ми, Парфе́ние,/ и просвеща́я све́том благода́ти.

Богоро́дичен: Ра́зума нетле́ннаго плод прозябла́ еси́, Богороди́тельнице, ми́ру,/ при́сно живы́й Хода́тай нетле́ния явля́ем ве́рою и любо́вию чту́щим Тя.

Ин

Ирмо́с: Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Разори́ся дре́вняя твоя́, льстивому́дре, я́же на ны, кре́пость,/ и бе́з ве́сти бы́ша мно́гая твоя́ кова́рства, лукавне:/ се бо прост и незло́бив ю́ноша тя низложи́.

Не дал еси́, преподо́бне, твои́ма очи́ма дрема́ния, ни ве́ждома поко́я,/ до́ндеже всю низложи́л еси́ хи́трость лестца́,/ разли́чныя тебе́ напа́сти на всяк день воздвиза́ющаго.

Целому́дренно соверши́л еси́ твое́ житие́/ и до́бре стра́нныя прие́мля всегда́,/ ми́луя же бога́тно и дово́льно,/ те́мже и получи́л еси́ нетле́нную сла́ву и наслажде́ние.

Богоро́дичен: От Тро́ицы родила́ еси́ Ты Еди́наго пло́тски, Богороди́тельнице Пречи́стая,/ па́че ума́ же и сло́ва./ Те́мже вопию:/ Тро́ицы Боже́ственныя мя моли́твами Твои́ми покажи́ жили́ще.

Кондак и икос пра́здника.

Ин. Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Ду́ха в тебе́ все́льшаяся Боже́ственная благода́ть, му́дре,/ храм и це́рковь тя сла́вы я́ко вои́стинну устро́и, Парфе́ние: в ню́же Оте́ц, и Сын, и Сам Уте́шитель всели́ся.

Огне́м Боже́ственным/ нече́стия попали́л еси́, преподо́бне, всю терно́вную лесть на земли́/ и все́ял еси́ ста́ду твоему́ Боже́ственная уче́ния,/ присноживо́тны плоды́ принося́щая.

У́дицею язы́ка из глубины́ пре́лести, Парфе́ние, дре́вле твое́ ста́до извле́кл еси́ к жи́зни;/ ны́не же, о́тче, моли́твами твои́ми уловля́еши от вся́каго ро́да ры́бна/ благода́тию.

Богоро́дичен: Ви́деша А́нгели, Богороди́тельнице,/ стра́нно Рождество́м Твои́м естество́ тле́нное ро́да пе́рстнаго,/ к нетле́нному па́ки прите́кшее житию́ и сла́ве Небе́сней.

Ин

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди Бо́же оте́ц на́ших.

Ра́ка твои́х моще́й, Луко́, исто́чник показа́ся исцеле́ний,/ к не́йже всяк притека́я, избавля́ется вся́ческих страсте́й,/ тя блажа́, преподо́бне, и поя́ Влады́ку твоего́.

Зна́мении велича́йшими, о́тче, просла́ви тя Господь,/ Его́же просла́вил еси́ ты боле́зньми воздержа́ния пе́рвее,/ благослове́н бо, взыва́л еси́, Бог оте́ц на́ших.

В житии́ пресве́тел, и в чудесе́х велича́йш,/ и во всех до́брых яви́лся еси́ непрело́жен, преподо́бне,/ те́мже трудо́в обре́л еси́ воздая́ние – Ца́рствие Бо́жие.

Богоро́дичен: Лю́ди и град Твой спаса́й,/ Богороди́тельнице Всенепоро́чная, предста́тельство на́ше,/ ве́рою несомне́нною вопию́щих Ти:/ благослове́н, Всечи́стая, Плод чре́ва Твоего́.

Ин. Песнь 8

Ирмо́с: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ добро́детелию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Жезло́м ве́ры, му́дре, е́ллинския хра́мы разори́л еси́/ и хра́мы воздви́гл еси́, преподо́бне, Спа́су и Бо́гу на́шему,/ в ни́хже же́ртвы чи́сты прине́сл еси́, поя́ Ему́:/ благослови́те, вся дела́ Госпо́дня, Го́спода.

Заколе́ние благово́нно сам себе́ прине́сл еси́, му́дре,/ воздержа́ния огне́м уха́ние возпосла́л еси́ непоро́чно/ в Боже́ственный и непристу́пный же́ртвенник Бо́жий,/ поя́, Парфе́ние:/ благослови́те, вся дела́ Госпо́дня, Го́спода.

Име́я Боже́ственную благода́ть от Бо́га, о́тче Парфе́ние,/ источа́еши исцеле́ния приступа́ющим к тебе́, преподо́бне,/ очища́я неду́ги и отгоня́ кре́пко де́монов полки́,/ вино́внаго сим пе́ти я́ко Бо́га, науча́я при́сно.

Богоро́дичен: И́же естество́м Непристу́пный везде́,/ Сын и Сло́во Божие, в Тя все́лься, Чи́стая,/ и оде́явся, Пресвята́я, в наш о́браз, я́ко Милосе́рд,/ яви́ся, благопристу́пен пло́тию, и поживе́ с на́ми./ Сего́ ра́ди любо́вию Тя чту, и пою́, и хвалю́.

Ин

Ирмо́с: За зако́ны оте́ческия/ блаже́нный в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Вред вся́кия стра́сти, преподо́бне, отгоня́еши,/ о́тче Луко́ блаже́нне,/ прокаже́нныя очища́я, укрепля́я немощны́я и сля́ченныя,/ разреша́я содержи́мыя у́зы и хромы́я вку́пе и слепы́я исцеля́я,/ Го́спода по́йте, зовы́й, и превозноси́те во вся ве́ки.

Неболе́зненну обре́л еси́ сла́ву, преподо́бне,/ боле́зни мно́ги подъе́м и по́двиги,/ бде́ние и изможде́ние телесе́,/ поще́ние, и озлобле́ние, и низулега́ние,/ и вся́ко и́но друче́ние пло́ти любве́ ра́ди Соде́теля Твоего́,/ с Ни́мже ны́не живы́й весели́шися./ Того́ у́бо моли́ спасти́ся всем,/ ве́рою и любо́вию тя велича́ющим.

Разли́чных ра́ди боле́зней, преподо́бне, и доброде́телей/ вшел еси́ в Небе́сное Ца́рство,/ веселя́ся ны́не ве́чно и Влады́ки всегда́ наслажда́яся добро́тами,/ со А́нгелы пе́ние трисвято́е пое́ши:/ Го́спода по́йте, дела́, и превозноси́те во вся ве́ки.

Богоро́дичен: Не отсту́пльша неразлу́чнаго от Отече́скаго не́дра, Чи́стая,/ родила́ еси́ неискусому́жно,/ несказа́нно же Челове́ка соверше́нна су́ща./ Его́же моли́ да́ти ми кре́пость лука́вых помышле́ний прило́г вся́кий низложи́ти до конца́/ и во́лю Боже́ственную Того́ де́лати всегда́, да Тя велича́ю.

Ин. Песнь 9

Ирмо́с: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Тиме́ние оттря́с и́стинно плотски́х страсте́й, треблаже́нне,/ всего́ себе́ к Боже́ственней пресели́ жи́зни и наслажде́нию невеще́ственному,/ иде́же, лику́я, назира́еши ны.

Цве́ты мы́сленныя, Богоно́сне, я́ко в наслажде́нии нетле́нне/ во святе́й твое́й па́мяти, чуде́с добро́ту пожина́юще,/ разли́чно исплете́н вене́ц, де́йствия обно́сим.

Ты, прете́к, я́же в ми́ре,/ и с Небе́сными, о Богоно́сне, безпло́тными ли́ки лику́я,/ о́тче Парфе́ние, о нас моли́ся,/ творя́щих твою́ па́мять ве́рно.

Богоро́дичен: Пою́ Твою́ благода́ть, Де́во,/ и велича́ю Твою́ сла́ву,/ Ты бо просвеще́ние души́ моея́ еси́ вои́стинну и утеше́ние,/ ско́рая по́мощь, и спасе́ние, и заступле́ние.

Ин

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Твоя́ боле́зни, о́тче, и по́двиги кто изрещи́ возмо́жет зе́млен?/ и́хже ра́ди достойну мзду восприя́л еси́ от Бо́га,/ был бо еси́ прия́телище Боже́ственнаго Ду́ха,/ преподо́бен, прав, и́стинен, пра́веден и непоро́чен.

Во оби́телех о́ных я́ко водворя́яся жела́нных/ и добро́т Боже́ственных насыща́яся,/ рая́ же Боже́ственнаго цвето́в ны́не наслажда́яся в сы́тость и ра́дуяся,/ па́мять к Бо́гу о нас сотвори́, всеблаже́нне.

Тро́ичен: Еди́но Естество́ Триипоста́сное,/ трисия́нное Существо́ и неразлу́чная Си́ло,/ О́тче, Сы́не и Святы́й Ду́ше, Еди́но Божество́,/ спаса́й ве́рою Тя Еди́наго велича́ющия, Бо́га в Трие́х Ли́цех.

Богоро́дичен: Разуме́ти не мо́жет Твоего́ та́инства зе́млен ум,/ Де́во Богоро́дице Всепе́тая,/ пре́жде бо Рождества́ безму́жно зачала́ еси́,/ пребыла́ же еси́ Де́ва и по Рождестве́,/ родила́ же еси́ Сло́во, Отцу́ Соприсносущное.

Свети́лен пра́здника.

Сла́ва, и ны́не, то́йже.

На стихо́вне стихи́ры, глас 2.

Подо́бен: До́ме Евфра́фов:

Нося́щи, Чи́стая/ и Пречи́стая Де́во,/ Соде́теля и Влады́ку/ я́ко Младе́нца на рука́х,/ в це́рковь вхо́дит.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Приими́, о Симео́не,/ Го́спода Сла́вы,/ я́коже извести́лся еси́/ от Ду́ха Свята́го:/ се бо прии́де.

Стих: Свет во открове́ние язы́ков/ и сла́ву люде́й Твои́х Изра́иля.

Ны́не ви́деша,/ Благи́й Бо́же, о́чи мои́/ Твое́ обеща́ние,/ разреши́ мя ско́ро,/ раба́ Твоего́, Человеколю́бче.

Сла́ва, и ны́не, глас и подо́бен то́йже:

Ра́дуйся, Я́же ра́дость/ ми́ра прии́мшая,/ Христа́ Жизнода́вца,/ и уста́вльшая печа́ль,/ Де́во, прама́терню.