Служба преподобнаго отца нашего Никона, игумена честныя обители Живоначальныя Троицы, ученика Сергия чудотворца

НА МАЛОЙ ВЕЧЕРНИ

На Го́споди, воззва́х: стихи́ры на 4, глас 1.

Подо́бен: Всехва́льнии му́ченицы:

О́тче преподо́бне Ни́коне,/ от ю́ности твоему́ Влады́це подо́бяся,/ ди́вно житие́ проше́л еси́,/ о́браз всем доброде́тели собо́ю показу́я,/ человеколю́бия Бо́жия благода́ти пучи́ну в себе́ име́я./ Те́мже моли́ся/ дарова́ти душа́м на́шим мир и ве́лию ми́лость.

О́тче преблаже́нне Ни́коне,/ кто по́двиги и страда́ния твои́ пове́сть,/ я́же подъя́л еси́, Христу́ после́дуя?/ Не дал бо еси́ сна твои́м очесе́м,/ ни ве́ждом дрема́ния,/ и́миже ду́шу твою́ от страсте́й свободи́л еси́,/ слеза́ми непреста́нными очища́я,/ и ны́не моли́ся/ дарова́ти душа́м на́шим мир и ве́лию ми́лость.

О́тче преподо́бне Ни́коне,/ чистоту́ теле́сную и душе́вное умиле́ние/ от ю́ности твоея́ сохрани́л еси́/ и очи́ма Бо́га зре́ти сподо́бился еси́,/ Тому́ еди́ному служа́ стра́хом и тре́петом,/ наста́вник был еси́ твоему́ стаду./ Те́мже моли́ся/ дарова́ти душа́м на́шим мир и ве́лию ми́лость.

Сла́ва, глас 6:

Прииди́те, мона́хов мно́жество, днесь,/ духо́вно возвесели́мся в наро́читом пра́зднице,/ и́бо пресве́тлая па́мять отца́ на́шего наста́,/ в ню́же, соше́дшеся, согла́сно воспое́м, глаго́люще:/ ра́дуйся, Ни́коне, пресла́вне,/ Небе́сный челове́че, и земны́й А́нгеле,/ и Ду́ха Свята́го оби́телище;/ ра́дуйся, ве́рным похвала́ и утвержде́ние/ и всея́ Росси́йския земли́ пресве́тлый свети́льниче;/ ра́дуйся, я́ко Тро́ице предстоя́ со А́нгелы,/ Ю́же непреста́нно моли́/ дарова́ти душа́м на́шим мир и ве́лию ми́лость.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Дом Свята́го Ду́ха был еси́, преподо́бне,/ зе́льным поще́нием, я́ко благово́нными арома́ты,/ напая́я ду́шу твою́.

Стих: Честна́ пред Го́сподем/ смерть преподо́бных Его́.

Дрема́ния не дал еси́ очесе́м твои́м, преподо́бне,/ до́ндеже ду́шу от страсте́й свободи́л еси́/ и возме́здие обре́л еси́, со А́нгелы водворе́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Боже́ственным жела́нием уязви́вся, преподо́бне,/ житие́ непоро́чно проходя́,/ до́ндеже дости́гл еси́ Ца́рскаго Престо́ла.

Сла́ва, глас 8:

Имя́ше Боже́ственная твоя́ душа́ и непоро́чная/ Ду́ха Пресвята́го исполне́ние,/ о́тче преподо́бне Ни́коне./ От ю́ности нося́ соверше́н смысл,/ любо́вию Христо́вою разгара́яся,/ Тому́ после́довал еси́./ Держа́вно над страстьми́ воцари́лся еси́,/ ко́зни де́монския, низло́ж, пове́ргл еси́,/ по́двиг тече́ния твоего́ соверши́л еси́./ И ны́не во Све́те невече́рнем водворя́яся/ и Тро́ице со А́нгелы предстоя́,/ моли́ изба́витися ста́ду твоему́/ от ви́димых и неви́димых враг/ и спасти́ ду́ши на́ша.

И ны́не, Богоро́дичен.

Тропа́рь, глас 1: Послуша́ния до́брый рачи́тель быв: (зри день сей ни́же).

Сла́ва, и ны́не, Богоро́дичен воскре́сен.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 6.

Подо́бен: Все отло́жше:

Весь от ю́ности Го́споду возложи́лся еси́,/ Ни́коне преподо́бне,/ земну́ю красоту́ и сла́ву в ничто́же вмени́в,/ Христа́ еди́наго возлюби́л еси́,/ и, Того́ крест на ра́мена взем,/ Боже́ственне вооружи́вся,/ Ла́вры вели́каго Се́ргия дости́гл еси́,/ и от него́ посыла́емь быва́еши/ к духо́вному настоя́телю Афана́сию,/ и та́мо жела́емых тобо́ю от него́ сподобля́ешися./ И ны́не на Небесе́х со А́нгелы Тро́ице предстоя́./ Ни́коне о́тче наш,/ моли́ спасти́ся душа́м на́шим.

Стра́шное Христо́во прише́ствие/ в се́рдцы твое́м прии́м, Ни́коне преподо́бне,/ разу́мно мимотеку́щих жития́ уступи́л еси́/ и, сла́ву маловре́менную презре́в,/ молча́ние восприя́л еси́:/ на земли́ бо му́жески подвиза́лся еси́/ и плоть потща́лся еси́ покори́ти ду́ху,/ ду́шу же и ум от страсте́й очи́стив,/ ревнова́л житию́ вели́каго Се́ргия./ С ни́мже ны́не на Небесе́х Престо́лу Влады́ки всех предстои́ши,/ со дерзнове́нием моля́ся о душа́х на́ших.

Преподо́бне о́тче Ни́коне,/ измла́да возлюби́в добро́ту Влады́чню/ и к Тому́ жела́ние невозвра́тно име́я,/ оте́чество и род оста́вил еси́;/ бога́тство и сла́ву возненави́дев,/ Христу́ еди́ному после́довал еси́;/ равноа́нгельно во оби́тели Пресвяты́я Тро́ицы пожи́в,/ огра́ду мона́шествующим созда́л еси́./ И ны́не на Небесе́х со А́нгелы Тро́ице предстои́ши,/ Ни́коне преподо́бне,/ со дерзнове́нием моля́ся о душа́х на́ших.

И́ны стихи́ры, глас 4.

Подо́бен: Зва́нный свы́ше:

Егда́ Боже́ственное раче́ние на́йде на тя, блаже́нне Ни́коне,/ тогда́, мирска́я мудрова́ния дале́че отри́нув,/ к Боже́ственному Се́ргию прите́кл еси́,/ и от него́ наставля́емь,/ посыла́ешися в монасты́рь, Высо́кое нарица́емо,/ к того́ ученику́ Афана́сию;/ и та́мо о́браза мона́шескаго и свяще́нства сподобля́ешися,/ мно́гим доброде́тели о́браз быв./ Те́мже мо́лим тя:/ моли́, преподо́бне, спасти́ и просвети́ти ду́ши на́ша.

Судо́м Бо́жиим и повеле́нием вели́каго/ па́ки ко отцу́ и па́стырю в монасты́рь прихо́диши/ и от него́ с вели́кою любо́вию, о́тче, прие́млешися./ Отону́дуже и по преставле́нии духо́внаго твоего́ отца́/ па́стырь от него́ поставля́ешися тоя́же оби́тели,/ иде́же це́рковь прекра́сну в сла́ву Святы́я Тро́ицы,/ преподо́бне Ни́коне, воздви́гл еси́,/ Ю́же непреста́нно о всех чту́щих тя моли́/ спасти́ и просвети́ти ду́ши на́ша.

Егда́ Боже́ственное наи́тие на́йде на тя, преподо́бне,/ тогда́ мирска́я возненави́дел еси́,/ и Христу́ прихо́диши,/ и, Того́ яре́м взем,/ по стопа́м блаже́ннаго Се́ргия изво́лил еси́ ходи́ти,/ иде́же о́браз мно́гим доброде́тели быв/ и мно́гим воздержа́нием и моли́твами/ подо́бник твоему́ отцу́ во всем./ Те́мже мо́лим тя,/ моли́ся, преподо́бне, спасти́ и просвети́ти ду́ши на́ша.

Сла́ва, глас 2:

Жела́нием бу́дущих, преподо́бне,/ доброде́тельно пожи́л еси́,/ чистото́ю душе́вною спаси́тельныя пути́ проше́л еси́/ и го́рдаго змия воздержа́нием уби́л еси́,/ Небе́сная же во́инства удиви́л еси́ терпе́нием твои́м,/ чи́стое прия́телище Ду́ха Пресвята́го, о́тче, был еси́./ И сего́ ра́ди от Вседе́тельныя Десни́цы венча́лся еси́/ и чуде́с дарова́ний от Него́ сподо́бился еси́:/ моли́ спасти́ся душа́м на́шим.

И ны́не, Богоро́дичен воскре́сен.

Вход. Проки́мен дне. Чте́ния 3.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Днесь ликовству́ет ра́достно Боже́ственная и вели́кая Ла́вра/ и хва́лится твои́ми Богоуго́дными дея́нии,/ име́ющи твоя́ святы́я мо́щи, блаже́нне Ни́коне,/ от ни́хже святы́ню почерпа́ем оби́льно:/ подаю́т бо здра́вие/ с ве́рою притека́ющим к честне́й твое́й ра́це./ Те́мже, просве́щшеся тобо́ю, глаго́лем:/ сподо́би и нас сла́вы Небе́сныя Христо́вы, блаже́нне,/ и твое́ ста́до сохраня́й/ и спаси́ ду́ши на́ша.

Глас 2:

Па́мять твоя́ во век пребыва́ет,/ преподо́бне о́тче Ни́коне,/ и кро́тость се́рдца твоего́, уго́дниче Христо́в блаже́нне, просия́/ па́че со́лнечнаго сия́ния,/ озаря́ющи ве́рных сердца́,/ и́бо вои́стинну честна́я ра́ка Боже́ственных моще́й твои́х,/ я́ко труба́, велегла́сно свиде́тельствует,/ благоуха́ющи благода́тию Пресвята́го Ду́ха,/ и прогоня́ющи мрак грехо́вный,/ и нас науча́ющи благодари́ти и сла́вити Бо́га,/ тебе́ просла́вльшаго.

Ве́лия сла́ва жития́ твоего́, о́тче наш Ни́коне,/ вся, я́же земна́я, оста́вив,/ еди́наго Христа́ возлюби́л еси́/ и, Тому́ служа́ чи́стою со́вестию,/ на земли́ А́нгельски пожи́л еси́,/ де́монская выше́ния149 разори́л еси́,/ возше́д на высоту́ Небе́сную:/ блаже́н еси́, я́ко та́ко Христу́ рабо́тав./ Те́мже и мы, тобо́ю путь жи́зни позна́вше,/ тя непреста́нно ублажа́ем.

Сла́ва, глас 2:

Преподо́бне и Богоблаже́нне о́тче наш Ни́коне,/ град живу́щий Бо́жий,/ вы́ше ра́зума благи́х восприя́л еси́ жела́ния./ А́нгельское житие́ соверши́в,/ и ны́не на Небесе́х водворя́ешися,/ испе́рва подо́бну добро́ту о́браза сохрани́в/ и на подо́бствие, я́коже мо́щно,/ восхо́д безпа́костно обре́т,/ и, Бо́гу со дерзнове́нием предстоя́,/ зерца́лом разу́мным чи́сто зри́ши Святу́ю Тро́ицу;/ за чту́щия тя ве́рою и любо́вию помоли́ся,/ о́тче наш Ни́коне.

И ны́не, Богоро́дичен воскре́сен.

На стихо́вне стихи́ры, глас 2.

Подо́бен: До́ме Евфра́фов:

От ю́ности оте́ческому житию́ поревнова́в во всем, преподо́бне,/ те́мже оста́вил еси́ вся, я́же в ми́ре, жите́йская мудрова́ния,/ моля́ о нас Человеколю́бца.

Стих: Честна́ пред Го́сподем/ смерть преподо́бных Его́.

Послуша́ния от се́рдца жела́я, му́дре,/ ми́ра и су́щих в нем жите́йских отре́клся еси́./ И сего́ ра́ди в вы́шних со А́нгелы Христу́ предстои́ши,/ о всех моля́ся.

Стих: Что возда́м Го́сподеви о всех,/ я́же воздаде́ ми?

А́ще и юн те́лом, преподо́бне Ни́коне,/ но многоле́тных житие́м превозше́л еси́,/ все плотско́е мудрова́ние отсе́к,/ преподо́бному послуша́нию повину́лся еси́.

Сла́ва, глас 8. Самогла́сен:

Помышля́я о́но житие́ и век пребыва́ющий,/ век сей, я́ко маловре́менен, оста́вил еси́/ и потща́лся еси́ тле́ющими нетле́нная стяжа́ти:/ отону́дуже и те́ло порабо́тил еси́ ду́ху,/ да Христа́ еди́наго приобря́щеши./ Его́же моли́ спасти́ся всем,/ любо́вию свяще́нную па́мять твою́/ в пе́снех при́сно почита́ющим.

И ны́не, Богоро́дичен.

Тропа́рь, глас 1:

Послуша́ния до́брый рачи́тель быв,/ преподо́бне Ни́коне приснопа́мятне,/ Це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Сла́ва, ин тропа́рь, о́бщий, преподо́бным Се́ргию и Ни́кону Ра́донежским, глас 8:

Я́ко трисве́тлаго со́лнца светоза́рныя зве́зды,/ Тро́йческим све́том озаря́ета сердца́ ве́рных,/ сосу́ды Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии зако́ноположи́телие,/ и це́рквам благоле́пие, и благове́рным, и святи́телем, и всем лю́дем,/ вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас: посеща́йте чад свои́х,/ я́ко иму́щие дерзнове́ние ко Святе́й Тро́ице,/ Богому́дре, Се́ргие с чу́дным ученико́м свои́м Ни́коном,/ и моли́те Христа́ Бо́га да спасе́т ду́ши на́ша.

И ны́не, Богоро́дичен воскре́сен по гла́су.

НА У́ТРЕНИ

На Бог Госпо́дь: тропа́рь свята́го два́жды.

Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Яви́лся еси́ днесь:

Век, и́же на земли́, я́ко преходя́щий, возненави́дев, блаже́нне,/ и век он, я́ко непреходя́щий, от се́рдца возлюби́в,/ ему́же и насле́дник яви́лся еси́./ О всех нас Христа́ моли́, при́сно в пе́снех, преподо́бне,/ твою́ па́мять почита́ющих.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во препросла́вленная,/ я́коже прорекла́ еси́.

По 2-м стихосло́вии седа́лен, глас 2.

Подо́бен: Милосе́рдия су́щи:

Мона́шеское житие́ от се́рдца, преподо́бне, возлюби́в,/ и сего́ ра́ди мир и я́же в ми́ре возненави́дев, блаже́нне Ни́коне,/ духо́вному твоему́ отцу́ послуша́нием и́скренним вда́лся еси́./ С ни́мже Го́споду моли́ся спасти́ся всем нам.

Сла́ва, и ны́не, Богоро́дичен:

Милосе́рдия су́щи исто́чник,/ ми́лости сподо́би нас, Богоро́дице,/ при́зри на лю́ди согреши́вшия,/ яви́ я́ко при́сно си́лу Твою́,/ на Тя бо упова́юще, ра́дуйся, вопие́м Ти,/ я́коже иногда́ Гаврии́л, Безпло́тный Архистрати́г.

По полиеле́и седа́лен, глас 8.

Подо́бен: Прему́дрости:

Му́дрости измла́да подо́бию навы́к/ и сего́ ра́ди вся, я́же в ми́ре, возненави́дев, преподо́бне,/ Христа́ еди́наго возлюби́л еси́./ Отону́дуже духо́вному твоему́ отцу́ всеконе́чно послуша́нию вда́лся еси́,/ от него́же тоя́же оби́тели па́стырь пресла́вно устроя́ешися,/ и мно́гим в доброде́тели о́браз быв:/ с ни́мже моли́ся Го́споду, Ни́коне преподо́бне,/ грехо́в оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́/ и, я́ко младе́нца, дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Та́же степе́нна, 1-й антифо́н 4-го гла́са. Проки́мен: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

От ю́ности, преподо́бне, изво́лил еси́ Бо́гу рабо́тати,/ тогда́ духо́вное раче́ние распали́ ду́шу твою́,/ и, вско́ре роди́тели оста́вив,/ вели́каго отца́ дости́гл еси́./ Он же, ви́дев твое́ душе́вное жела́ние,/ вма́ле искуше́ние налага́ет/ да тя сотвори́т тепле́йша рачи́теля;/ ты же смире́ние показу́еши,/ рече́ннаго отце́м достиза́еши/ и от него́ навы́кл еси́ доброде́телем,/ ко отцу́ па́ки возвраща́ешися/ и па́стырь поставля́ешися./ И ны́не, преблаже́нне Ни́коне,/ предстоя́ Престо́лу всех Царя́,/ испроси́ мир ми́ру, и Це́ркве Росси́йстей утвержде́ние,/ и спасе́ние душа́м на́шим.

Кано́н Богоро́дицы со ирмосо́м на 6, и преподо́бнаго кано́н на 8. Творе́ние Пахо́мия иеромона́ха, и́же от Святы́я Горы́, его́же краегране́сие: Похвалу́ блаже́нному Ни́кону тку́. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Прему́дростию ра́зума украша́емь, преподо́бне Ни́коне,/ весь Христу́ порабо́тился еси́, к Нему́ жела́ние твое́ име́я,/ Его́же моли́ спасти́ от бед пою́щия тя.

О всех Христа́ моли́, преподо́бне Ни́коне, па́мять твою́ любо́вию пою́щих,/ изба́витися ве́чнаго муче́ния,/ да тебе́ вси, я́ко те́пла предста́теля, пе́сньми велича́ем.

Христу́ весь порабо́тився, преподо́бне Ни́коне,/ и к Нему́ все жела́ние име́я,/ и Того́ ра́ди любве́ ми́ра с жела́ньми его́ отре́кся./ Сего́ ра́ди тя вси пе́сньми ублажа́ем, Ни́коне всеблаже́нне.

Все твое́ жела́ние к Богу́ му́жески впери́в, в Вы́шних селе́ние сотвори́л еси́ пресла́вно./ Те́мже тя пе́сньми, блаже́нне Ни́коне, почита́ем.

А́ще и дале́че житие́м,/ но близ ве́рою и любо́вию духо́внаго твоего́ настоя́теля,/ и с ним вку́пе пресла́вно чудеса́ твори́ши,/ вку́пе же и Бо́гу предстоите́, о всех нас моля́щеся.

Богоро́дичен: Му́дрости прему́дростныя прия́телище была́ еси́, Пренепоро́чная,/ Свой бо храм от Твои́х пречи́стых крове́й, Чи́стая,/ созда́ти благоизво́ли на спасе́ние на́ше.

Катава́сия: Отве́рзу уста́ моя́:

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́/ в Боже́ственней Твое́й сла́ве/ венце́в сла́вы сподо́би.

Лю́ди вся, тебе́ ве́дущия/ и заступле́ния твоего́ ча́ющия, не пре́зри, о́тче,/ но, ели́ко мо́щно, предста́тельствуй,/ всем поле́зная прося́ моли́твами твои́ми.

Упова́ние име́л еси́, блаже́нне Ни́коне, и прибе́жище всех Бо́га,/ Того́ моли́, мо́лим тя, о нас,/ любо́вию воспева́ющих тя, приснопа́мятне.

Боже́ственным жела́нием, преподо́бне Ни́коне, разжига́емь,/ мирску́ю красоту́ преоби́дел еси́, мона́шеское житие́ возлюби́в./ Те́мже был еси́ преподо́бным единожи́тель и пра́ведным.

Богоро́дичен: Исцеле́ний Тя исто́чник, в Твою́ утро́бу вшед, показа́,/ Ма́ти Бо́жия Пречи́стая,/ мою́ у́бо ду́шу исцели́.

Ин конда́к, о́бщий, преподо́бным Се́ргию и Ни́кону Ра́донежским, глас 8.

Подо́бен: Взбра́нной:

В по́стницех приобщи́вшеся Вели́кому Анто́нию/ и Евфи́мию Иерусали́мскому поревнова́вше в по́двизех,/ я́ко А́нгели, на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы́ повсегда́,/ сего́ ра́ди ра́достно вас почита́ем и любо́вию вопие́м вам:/ ра́дуйтеся, преподо́бнии отцы́, Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.

Ин и́кос, о́бщий, преподо́бным Се́ргию и Ни́кону Ра́донежским:

Свяще́нная и Богому́драя дво́ица оте́ц пречу́дная,/ на земли́ до́бре подви́гшеся, целому́дренно и пра́ведно пожи́вшая,/ по́стнически испыта́вшеся любо́вию и наде́ждею вооружи́вшеся,/ разори́ша хи́тростне вра́жия кова́рства/ и с ли́ки святы́х всех Пресвяты́я Тро́ицы Престо́лу предстоя́ще,/ Ея́же Све́том просвеща́еми, побе́дными венцы́ венча́стася/ и во всем ми́ре чуде́с заря́ми блиста́юща,/ поле́зная нам проси́та от Бо́га моли́твами ва́шими Богоприя́тными,/ я́ко да ра́достно вас чтим и любо́вию вопие́м ва́ма:/ ра́дуйтася, отца́ преблаже́нная, Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.

Ин седа́лен, о́бщий, преподо́бным Се́ргию и Ни́кону Ра́донежским, глас 8.

Подо́бен: Прему́дрости:

Па́влово насажде́ние и Аполло́сово восприе́мый напое́ние/ и ва́ю ве́рою насажде́ние и уче́нием напое́ние, и́же возраща́яй Бо́г,/ прия́л есть и́ноких благоче́стия ве́рою,/ моли́твами ва́шими возрасти́в/ и умно́жил есть и от того́ я́ко ве́рна раба́ и де́лателя разу́мна/ и трудо́м возме́здия досто́йно прия́ла еста́, Се́ргие Богому́дре и Ни́коне свяще́нне,/ Богоно́сная отца́, па́стыря и учи́теля,/ Христа́ моли́та стране́ победи́тельная на ва́рвары дарова́ти/ и ста́до ва́ше в ми́ре сохрани́ти и спасти́ ду́ши на́ша.

Седа́лен, глас 3:

Укрепля́емь Боже́ственною си́лою, преподо́бне Ни́коне,/ возмо́гл еси́ оскуде́ние, от безбо́жных ага́рян бы́вшее, напо́лнити:/ це́рковь бо но́ву и оби́тель красне́йшу па́че воздви́гл еси́./ Те́мже тя вси́ ублажа́ем.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́, персть бы́вша,/ оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зовущия:/ сла́ва, Христе́, си́ле Твое́й.

Невозвра́тно ше́ствовав вводя́щий путь к Небе́сному гра́ду, Ни́коне преподо́бне,/ иде́же наста́ви тя Святы́й Дух,/ оби́тель име́я се́рдце твое́.

Смире́ние вознося́щее, Ни́коне блаже́нне, в се́рдце име́л еси́,/ отону́дуже тя и мы мо́лим уще́дрити смире́ние на́ше.

Страстьми́ разли́чными коле́блемыя/ и ве́рою притека́ющия к твоему́ гро́бу, блаже́нне Ни́коне,/ святы́м твои́м хода́тайством вся посети́ ми́лостивно к Человеколю́бцу.

Мрак страсте́й от се́рдца твоего́ ты, преподо́бне Ни́коне, очи́стив,/ Христо́ва повеле́ния вои́стинну свет прие́м,/ в посте́ просия́л еси́, умертви́в те́ло,/ ду́хом же, Ни́коне, ожи́л еси́.

Богоро́дичен: Очище́ние всех земны́х,/ ве́рою молю́ и припа́даю, Благослове́нная,/ моли́твами Твои́ми Судию́ и Сы́на Твоего́ ми́лостива сотвори́,/ я́ко да по до́лгу сла́влю Тя.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.

У́зкий и приско́рбный путь ше́ствовал еси́, преподо́бне Ни́коне,/ восхожде́ньми Боже́ственными се́рдца твоего́,/ а́може отца́ твоего́ наста́виша тя моли́твы.

От грехо́вных боле́зней мя облегчи́ ско́рбных,/ и се́рдца моего́ лю́тость утоли́,/ и согреше́ний оставле́ние испроси́,/ и́маши бо послу́шающа Христа́ чи́стыя твоея́ моли́твы.

Стра́сти теле́сныя воздержа́нием, о́тче, увяди́в,/ я́ко дре́во многопло́дное, плод чу́ден прино́сиши Бо́гу:/ своя́ чу́дная исправле́ния, Ни́коне преподо́бне.

Всесве́тлый свети́льник яви́лся еси́,/ озаря́я поющия тя, Ни́коне преподо́бне./ И сего́ ра́ди мо́лим тя:/ ве́чнаго муче́ния изба́ви ны, пою́щия тя.

Богоро́дичен: Ума́ моего́ уврачу́й изступле́ние, Всенепоро́чная,/ и исцели́ стра́сти душе́вныя и уны́ния тьму́ отжени́,/ я́ко да восхвалю́ Тя по достоя́нию, Богоро́дице Всепе́тая.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Свое́ се́рдце, преподо́бне Ни́коне,/ Святы́я Тро́ицы жили́ще и дом созда́л еси́./ Вси, ве́рою притека́ющии к честне́й твое́й ра́це,/ просвеще́ние, и освяще́ние, и очище́ние, всеблаже́нне Ни́коне, прие́млем.

Твоя́, всеблаже́нне Ни́коне, свяще́нныя и всесвяты́я мо́щи,/ во гро́бе лежа́ще, неду́ги врачу́ют,/ де́монския же полки́ прогоня́ют всегда́,/ ве́рным же источа́ют исцеле́ния оби́льная,/ тебе́ по достоя́нию при́сно блажа́щим.

Я́ко весь Христу́ приближа́яся ясне́йши,/ помяни́ всех, ве́рою помина́ющих тя, Ни́коне всече́стне,/ грехо́в проще́ния у Христа́ прося́/ и Небе́снаго Ца́рствия восприя́тия.

Богоро́дичен: Еди́на всем поможе́ние,/ помози́ нам, бе́дствующим,/ и ру́ку пода́ждь, и к приста́нищу введи́ спасе́ния, Отрокови́це Богоблагода́тная.

Конда́к, глас 4.

Подо́бен: Яви́лся еси́:

Духо́вному твоему́ настоя́телю, о́тче Ни́коне,/ вся́чески прилепи́вся/ и от него́ наставля́емь,/ во всем Христо́ви порабо́тився,/ мона́хов был еси́ чинонача́льник/ и преподо́бных сожи́тель,/ с ни́миже Христа́ Бо́га моли́ непреста́нно о всех нас.

И́кос:

Ка́ко возмогу́ воспе́ти твоя́ исправле́ния?/ Или́ изрещи́ труды́ твоя́,/ и́миже труди́лся еси́ по отце́ твое́м,/ а́ще не ты пода́си ми сло́во, недосто́йному рабу́ твоему́?/ ты бо был еси́ по отце́ мона́хов нача́льник,/ с ни́миже Христа́ Бо́га моли́ непреста́нно о всех нас.

Песнь 7

Ирмо́с: Не послужи́ша тва́ри, Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Вся мимотеку́щая привре́менная пристра́стия, преподо́бне Ни́коне, отрази́в,/ всю наде́жду к Бо́гу стяжа́л еси́,/ И́мже де́йствуеши пресла́вная чудеса́.

Твоея́ души́ тве́рдое и благостоя́нное ра́зума, преподо́бне Ни́коне,/ ника́коже лука́вый возмо́же соврати́ти,/ Бо́гу помога́ющу ти, досточу́дне.

Ми́ру умертви́вся, бу́дущую жизнь насле́дил еси́, о́тче,/ исцеле́ний Боже́ственную благода́ть источа́еши пою́щим:/ благослове́н Бог оте́ц на́ших.

Нельсти́вно навы́к пре́жде тебе́ бы́вших оте́ц по́стническому житию́, преподо́бне,/ но тех житие́м пожи́в, Богоблаже́нне, воспева́я:/ благослове́н Бог оте́ц на́ших.

Богоро́дичен: Глаго́лом проро́ческим после́дующе, Де́во,/ Богоро́дицу, Тя испове́дуем:/ родила́ бо еси́ отроча́ всех древне́йшее, Емману́ил нарица́емое./ Ему́же зове́м:/ благослове́н Бог оте́ц на́ших.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

Му́жествовав, победи́л еси́ страстна́я взыгра́ния вся,/ ум просвеще́н име́я, возмо́гл еси́,/ я́же ви́де отца́ творя́ща, сия́ де́тели испо́лнити:/ те́мже тя вси ублажа́ем, Ни́коне всеблаже́нне.

Мы́слию очище́нною, прему́дре Ни́коне, Бо́гу приближа́яся,/ всем всяк быв, да Христа́ приобря́щеши./ Те́мже, в Небе́сныя оби́тели всели́вся, преподо́бне,/ дерзнове́нно зри́ши Святу́ю Тро́ицу,/ Ю́же непреста́нно моли́ спасти́ вся,/ правосла́вно тя почита́ющия.

Серпо́м моли́тв, о́тче Ни́коне, страстна́я те́рния изсе́к/ и возде́лав воздержа́ния ра́лом150 душе́вную зе́млю,/ ввергл еси́ семена́ благоче́стия в ней:/ те́мже исцеле́ния плоды́ пожина́еши.

Доброде́телей тя прия́телище нарица́ем, преблаже́нне,/ я́ко молча́ния дру́га, и бде́ния де́лателя,/ и о́браз целому́дрия, и моли́твы жили́ще некра́домое,/ и чуде́с сокро́вище, и моли́твенника о почита́ющих па́мять твою́, Ни́коне блаже́нне.

Богоро́дичен: Ма́ти Бо́жия Всенепоро́чная,/ души́ моея́ я́звы исцели́,/ сла́сти утоли́ пло́ти моея́,/ омраче́нное се́рдце мое́ просвети́,/ и умири́ ум мой от вся́каго вре́да,/ и вра́жиих мя изба́ви напа́стей.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ чи́стая Присноде́во.

Слез твои́х пролия́нием грехо́вный огнь погаси́л еси́,/ безстра́стия же во́ду исцеле́ний чи́стаго пи́ва151 пою́щим источа́еши,/ блаже́нне Ни́коне досточу́дне.

Ра́ка, иде́же лежи́т свято́е те́ло твое́, преподо́бне Ни́коне,/ чуде́с благода́ть источа́ет,/ просвеща́ющи на́ша ду́ши и телеса́ и обогаща́ющи/ предста́теля тя те́пла и засту́пнника иму́щия.

Днесь с на́ми собо́ри А́нгел и преподо́бных веселя́тся/ в па́мять твою́, блаже́нне Ни́коне,/ с ни́ми же помина́й ны, чту́щия тя ве́рно, досточу́дне.

Уста́ви свяще́нными твои́ми моли́твами воздвиза́емое на ны смуще́ние/ и челове́к всех озлобле́ние,/ я́ко име́я дерзнове́ние ко Влады́це и Бо́гу на́шему, Ни́коне досточу́дне.

Богоро́дичен: О, па́че ума́ чуде́с Твои́х!/ Бо́жия бо Сло́ва воплоти́вшагося, Еди́наго родила́ еси́/ па́че естества́, Ма́ти Де́во,/ вся́ческая Боже́ственным свои́м хоте́нием му́дре держа́ща и окормля́юща.

Свети́лен:

Святы́ни храм был еси́, преподо́бне,/ по Боже́ственному прича́стию ра́йский граждани́н,/ в не́мже наслажда́ешися невозбра́нно дре́ва зна́ния и нетле́нныя сла́вы,/ па́мять творя́, Ни́коне преподо́бне,/ о и́же ве́рою хва́лящих тя, о́тче Богому́дре.

Сла́ва, и ны́не, Богоро́дичен:

Ра́дуйся, ве́рных похвало́;/ ра́дуйся, преподо́бных утвержде́ние;/ ра́дуйся, правосла́вных сла́во;/ ра́дуйся, све́те су́щих во тьме;/ ра́дуйся, хра́ме пресвяты́й;/ ра́дуйся, Бо́жий раю́;/ ра́дуйся, кля́твы разреше́ние, Благослове́нная Мари́е.

На хвали́тех стихи́ры, на 4, глас 6.

Подо́бен: Все отло́жше:

Вели́кая исправле́ния по́стнических по́двиг/ вели́каго отца́, вои́стинну чу́днаго Се́ргия,/ Ни́коне блаже́нне,/ привлеко́ша тя жела́нне по́стническому сосло́вию,/ и ди́вно доброде́телем его́ вообра́жся тому́ сожи́тием,/ и сострада́лец по́двигом до́блествен,/ я́ко учени́к того́ и́стинен,/ учи́тель же худо́жен того́ ча́дом./ И ны́не моли́ся, преподо́бне,/ поми́ловатися душа́м на́шим.

Мно́жество по́двиг и по́тов твои́х по́стнических/ раздражи́ша сопоста́та пра́ведных,/ наведе́ бо язы́ки раскопа́ти жили́ще честно́е,/ но по́ты преподо́бнаго вели́каго Се́ргия/ во ве́ки сия́ют пред Бо́гом./ Те́мже тобо́ю па́че утверди́/ и бо́льше сие́ распространи́,/ но мо́лим тя, преподо́бне,/ подви́гнув вели́каго на моли́тву,/ возбраня́й при́сно ва́рвар стремле́ние/ и никогда́ же попусти́ обори́ти, Ни́коне блаже́нне.

Дре́во доброве́твенно, се́нно и благопло́дно,/ на вода́х прекра́сно жи́зненных вои́стинну насажде́нное,/ пита́ющее приходя́щия и осеня́ющее опаля́емыя,/ ты еси́, о́тче преподо́бне,/ напая́емь уче́нии Се́ргия,/ и́миже пита́л еси́ твоя́ ученики́./ Те́мже мо́лим тя:/ осени́ лю́ди, заступа́я от язы́ческих наше́ствий,/ низлага́я их пре́жде воста́ния./ Нас же в ми́ре соблюди́, Ни́коне, твои́ми моли́твами.

Сла́ва, глас 2. Самогла́сен:

Па́мять пра́ведника – ра́дость боя́щихся Го́спода,/ хвала́ бо его́ – сла́дость ве́рных есть:/ блаже́н бо вои́стинну,/ его́же избра́ и прия́т Го́сподь./ Те́мже мы, веселя́щеся,/ почита́ем па́мять преподо́бнаго,/ ему́же ны́не в па́мять его́ моля́щеся,/ я́ко иму́щу дерзнове́ние,/ о побе́де нам на язы́ки проти́вныя,/ е́же низложи́ти востаю́щия непра́ведно,/ пода́ти же мир ми́ру, и це́рквам единомы́слие,/ и душа́м на́шим ве́лию ми́лость.

И ны́не, Богоро́дичен.

НА ЛИТУРГИ́И

Блаже́нны от кано́на свята́го пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви: Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Ева́нгелие от Матфе́я, зача́ло 10. Прича́стен: В па́мять ве́чную.