Служба преподобнаго отца нашего Никандра пустынножителя, Псковскаго чудотворца
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Прехва́льнии му́ченицы:
Богоблаже́нне Ника́ндре,/ тя пустыня сокры́ла есть,/ но горе́ Госпо́дь просла́ви,/ и отту́ду чуде́сная содева́еши:/ на земли́ бо ти бы́вшу,/ сле́зными струя́ми врага́ потопи́л еси́/ и ны́не на Небесе́х, Христо́ви предстоя́,/ моли́ся о чту́щих тя.
Блаже́нне о́тче Ника́ндре,/ ты тяготу́ дневну́ю поне́сл еси́,/ в пусты́ню всели́вся/ и полки́ бесо́вския разгна́в/ благода́тию Свята́го Ду́ха,/ и ны́не со святы́ми сла́вы Бо́жия наслажда́ешися,/ Ему́же моли́ся,/ низпосла́тися нам, чту́щим тя,/ ми́ру и ве́лией ми́лости.
Преподо́бне о́тче Ника́ндре,/ тя устраши́шася бе́сове/ и от челове́к отгна́ни бы́ша/ моли́твами твои́ми, всебога́те,/ и притека́ющим с ве́рою/ здра́вие незави́стно всем подае́ши,/ Христо́ви моля́ся/ умири́ти мир и спасти́ нас,/ пра́зднующих святу́ю твою́ па́мять.
Сла́ва, глас 2:
Прииди́те, празднолю́бных собо́ри,/ ра́достно похва́лим похвалу́ спасе́ния на́шего,/ Ника́ндра всеблаже́ннаго,/ я́ко, в те́ле сый, безпло́тнаго врага́ победи́/ и, со земны́ми живы́й, Небе́сныя благода́ти сподо́бися,/ бу́дущее сказу́я, я́ко настоя́щее,/ зане́ просвети́л есть душе́вная очеса́ у́мным богови́дением./ Сего́ ра́ди, соше́дшеся, любе́зно возопие́м ему́, глаго́люще:/ ра́дуйся, преподо́бне о́тче наш,/ рачи́телю безмо́лвия, пусты́нный жи́телю,/ терпе́ния бе́здна, столп кре́пости,/ приле́жно мо́лим тя/ низпосла́ти нам твои́ми моли́твами грехо́в очище́ние/ и ве́лию ми́лость.
И ны́не, Богоро́дичен, глас то́йже:
Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.
На стихо́вне стихи́ры, глас 2.
Подо́бен: До́ме Евфра́фов:
Дом Ду́ху Пресвято́му/ себе́ предугото́вав,/ преподо́бне Ника́ндре,/ и во Христа́ ве́рою утверди́вся,/ помози́ и нам проти́ву ко́зней диа́вольских.
Стих: Честна́ пред Го́сподем/ смерть преподо́бных Его́.
Дом, иде́же есть ико́на/ преподо́бнаго Ника́ндра,/ ве́рным всем спасе́ние/ и от неду́г исцеле́ние быва́ет/ ве́рою приходя́щим.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Дом себе́ от пусты́ни посто́м и моли́твою/ на Небесе́х притяжа́л еси́,/ преподо́бне Ника́ндре, о́тче наш,/ сего́ ра́ди мо́лим тя,/ да обря́щем ми́лость в День Су́дный.
Сла́ва, глас 8:
Доброде́тельнаго жития́ твоего́ плоды́, преподо́бне,/ кто изчи́слити возмо́жет от земноро́дных?/ От ю́ности бо Христо́ви после́довав/ и в за́поведех Его́ ходя́ день и нощь,/ посто́м и моли́твою, кро́тостию и незло́бием,/ в чи́стей со́вести Тому́ порабо́тал еси́/ и ны́не трудо́м твои́м воздая́ние/ от руки́ Вседержи́теля бога́тно восприя́л еси́./ Сего́ ра́ди мо́лим тя,/ всеблаже́нне Ника́ндре, о́тче наш,/ моли́ спасти́ся душа́м на́шим.
И ны́не, Богоро́дичен, глас то́йже: Безневе́стная Де́во:
Тропа́рь зри на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 6.
Подо́бен: Все отло́жше:
Все отве́ргл еси́ мирско́е пристра́стие/ и, плоть свою́ преоби́дев,/ Христа́ Еди́наго возлюби́л еси́,/ Ему́же и после́довав,/ в пусты́ню всели́лся еси́, преподо́бне,/ иде́же мно́га ле́та трудолю́бне подвиза́яся,/ неосла́бно да́же до сме́рти/ поревнова́л еси́ житию́ святы́х оте́ц,/ с ни́миже ны́не лику́еши на Небесе́х,/ предстоя́ Христо́ви в неизглаго́ланней ра́дости,/ Его́же со дерзнове́нием моли́ о душа́х на́ших.
Все возложи́в на Небесе́х упова́ние/ и та́мо сокро́вище некра́домое себе́ сокры́в,/ земна́я вся расточи́л еси́,/ дом и сро́дство оста́вив,/ легко́ поте́кл еси́ во след Христа́,/ взыску́я жи́тельства ве́чнаго, е́же и получи́л еси́,/ и ны́не, преблаже́нне Ника́ндре,/ о чту́щих досто́йно па́мять твою́ со дерзнове́нием моли́ся,/ во е́же спасти́ся нам.
Все жела́ние устреми́в к Бо́гу,/ пусты́ню дости́гл еси́, преподо́бне,/ и, в ней водвори́вся ра́достно,/ со зверьми́ бра́лся еси́ и бе́сы,/ и́хже и победи́л еси́ му́жественно,/ я́ко Христо́с укрепи́ тя и сла́вна показа́ чудотво́рца,/ Ника́ндре пребога́те./ Те́мже па́мять твою́ любо́вию пра́зднуем и ве́рно мо́лимся:/ моли́ о душа́х на́ших.
Все претерпе́л еси́ плотско́е озлобле́ние от лета́ющих живо́тных/ и не пощади́л еси́ своея́ кро́ве,/ в пусты́не живы́й, всеблаже́нне,/ ра́ны подъя́л еси́ от злонра́вных,/ вопия́ о них ко Го́споду:/ не поста́ви им греха́ сего́;/ и, всего́ себе́ истощи́в, преподо́бне Ника́ндре,/ подража́л еси́ Христу́ Бо́гу на́шему,/ Его́же со дерзнове́нием моли́ о душа́х на́ших.
Сла́ва, глас 5:
Стеце́мся ны́не, о празднолю́бцы,/ псалмы́ и пе́сньми похва́лим преподо́бнаго/ и, веселя́щеся, воспое́м, глаго́люще:/ ра́дуйся, те́плый помо́щниче,/ Ника́ндре всеблаже́нне, пустынножи́телю,/ ра́дуйся, весе́лие на́ше духо́вное/ и исцели́телю немощны́х чу́вствы,/ боля́щим гото́вое здра́вие,/ ны́не же и нас, чад свои́х,/ пресве́тло чту́щих па́мять твою́, не забу́ди,/ помина́я у Престо́ла всех Царя́ и Бо́га,/ низпосла́ти душа́м на́шим мир и ве́лию ми́лость.
И ны́не, Богоро́дичен, глас то́йже: В Чермне́м мо́ри:
Та́же вход. Проки́мен дне.
И чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.
На лити́и стихи́ры, глас 3:
Ны́не наста́ день све́тлаго весе́лия,/ испо́лнен торжества́ духо́внаго,/ я́ко Всецари́ца и Ма́ти Бо́жия благоизво́ли храни́ти/ и покрыва́ти во хра́ме Свое́м/ благода́тию Сы́на Своего́ и Бо́га/ о́браз уго́дника Своего́,/ от него́же сла́дкое благово́ние дае́тся ве́рным/ и струя́ незави́стна истека́ет исцеле́ний боля́щим./ Те́мже и мы, ра́дующеся, зове́м:/ предвари́ изба́вити нас от вся́ких бед,/ преподо́бне Ника́ндре, о́тче наш.
Весели́ся, пусты́ня непло́дствующая иногда́,/ ны́не бо нам плод ра́дости от Тебе́ прозябе́,/ и воня́ благода́ти Бо́жия мироуха́ет,/ ея́же наслажда́ющеся, Христа́ славосло́вим,/ И́же естество́ на́ше ми́лостивно призре́,/ я́ко просла́ви прославля́ющаго Его́,/ преподо́бнаго отца́ на́шего Ника́ндра,/ сла́вою непристу́пнаго све́та на Небесе́х/ и на земли́ чуде́с де́йством обогати́./ Сего́ ра́ди и зове́м ему́ непреста́нно:/ моли́, мо́лим тя, спасти́ся душа́м на́шим.
Прииди́те, вси лю́дие,/ похва́лим похвалу́ спасе́ния на́шего,/ Ника́ндра преподо́бнаго,/ жи́теля пусты́ннаго и Небе́снаго граждани́на,/ ему́же похваля́ему, весели́тся ве́рных сосло́вие:/ сей бо во́ин яви́ся непобеди́м вои́стину,/ му́жественно во́инствовав Царе́ви Си́лам,/ ополча́яся посто́м и моли́твами и вся́ким духо́вным воздержа́нием во вре́менней жи́зни./ И та́ко победи́ пресла́вно проти́вника, мы́сленнаго Амали́ка,/ и в ра́дость Госпо́дню с побе́дным венце́м вни́де,/ прие́мля за труд от руки́ Вседержи́теля воздая́ние мно́го,/ Его́же и мо́лит о душа́х на́ших.
Кто не воспое́т или́ кто не просла́вит тя,/ преподо́бне Ника́ндре, о́тче наш,/ зря многоцеле́бную ико́ну твою́,/ ю́же окружа́ют неви́димо А́нгели/ и де́йствуют о Бо́зе, моли́твами твои́ми,/ душа́м на́шим спасе́ние и телесе́м здра́вие?/ На земли́ бо ти еще́ жи́ву су́шу,/ стра́сти плотски́я до конца́ победи́л еси́./ Удиви́шася по́двигу твоему́ Небе́снии чи́ни,/ ви́девше тя, во пло́ти су́ща, безпло́тныя враги́ победи́вша,/ плоть же и земна́я вся вмени́вша я́ко не су́ща./ Сего́ ра́ди ны́не Небе́сная блага́я вся насле́довал еси́/ и со святы́ми все́ми ра́дуешися во сла́ве Христа́ Бо́га на́шего,/ Ему́же приле́жно помоли́ся, мо́лимся, и о нас,/ досто́йно чту́щих святу́ю па́мять твою́,/ во е́же спасти́ся душа́м на́шим.
Сла́ва, глас 5:
Ра́дуйся ны́не, мона́шеское достоя́ние/ и все христимени́тое мно́жество,/ день преставле́ния отца́ на́шего све́тло почти́м:/ днесь бо коне́ц по́двига своего́ восприя́т непобеди́мый/ и ра́достно вни́де в со́нмы пра́ведных,/ с ни́миже веселя́ся, Христо́ви предстои́т,/ оде́ян во сла́ву ве́чныя ра́дости./ Те́мже и мы, к ико́не его́ припа́дающе, со слеза́ми возопие́м:/ засту́пниче наш, Ника́ндре всебога́те,/ непреста́нно моли́ся о нас,/ во е́же спасти́ся невре́дным от вся́каго зла/ ве́рою чту́щим всечестну́ю па́мять твою́, преподо́бне.
И ны́не, Богоро́дичен, глас то́йже: Храм и дверь еси́:
На стихо́вне стихи́ры, глас 5.
Подо́бен: Ра́дуйся:
Ра́дуйся, преподо́бне о́тче,/ Ника́ндре прему́дре,/ ты бо непобеди́м яви́лся еси́ ра́тник/ проти́ву бесо́вскаго ополче́ния,/ кре́пко бо препоя́сався в живоно́сную ме́ртвость/ и кре́стное ору́жие в се́рдцы свое́м стяжа́в,/ уби́л еси́ мысленнаго Копрони́ма мече́м ве́ры,/ и от пусты́ни, я́ко со́лнце, лучи́ испуща́еши,/ и озаря́еши сердца́ ве́рою чту́щих тя,/ и от всех зол изыма́еши пресла́вно./ Те́мже лобыза́юще святу́ю твою́ ико́ну,/ любе́зно мо́лим,/ низпосла́тися моли́твами твои́ми, свя́те,/ ми́ру спасе́нию/ и душа́м на́шим ве́лией ми́лости.
Стих: Честна́ пред Го́сподем/ смерть преподо́бных Его́.
Ра́дуйся, жела́телю вы́шних,/ пусты́нный жи́телю,/ и́же, трудолю́бно подвиза́вся,/ маловре́менное житие́ до конца́ возненави́дел еси́/ и до́лу влеку́щим отню́дь не порабо́тал еси́,/ ревну́я от ю́ности житию́ Го́сподеви благоугоди́вших/ и путь непостоя́ннаго мо́ря доброде́тельно преплы́вших,/ легко́ поне́сл еси́ и́го Христо́во,/ тем и Свята́го Ду́ха прече́стен дом показа́лся еси́./ И ны́не, преподо́бне Ника́ндре,/ све́тло зряй Святу́ю Тро́ицу,/ моли́ изба́вити нас от напа́стей вся́ческих/ и от враг ви́димых и неви́димых/ и душа́м на́шим да́ти ве́лию ми́лость.
Стих: Блаже́н муж, боя́йся Господа,/ в за́поведех Его́ восхо́щет зело́.
Ра́дуйся, Ника́ндре пребога́те,/ победи́телю вра́жиих сил,/ уго́дниче и дру́же Христо́в и́скренний/ и моли́твенниче наш непосты́дный,/ по́стником похвала́ и утвержде́ние,/ трудолю́бцем о́браз спасе́нный,/ пусты́нником ти́хое и немяте́жное безмо́лвие/ и всем пра́ведным весе́лие,/ нам же, гре́шным, спасе́ние,/ в беда́х по́мощь и заступле́ние,/ прибе́жище и покро́в стра́нным,/ здра́вие разли́чно боля́щим:/ тем моли́ся, мо́лимся,/ душа́м на́шим да́ти мир и ве́лию ми́лость.
Сла́ва, глас 7:
Ра́дуются ны́не собо́ри мона́шествующих/ в пречестне́м хра́ме Бо́жия Ма́тере,/ Тоя́ бо моли́твами и си́льным поможе́нием/ отца́ себе́ притяжа́хом/ и ны́не ко о́бразу его́ припаде́м, глаго́люще:/ преподо́бне о́тче наш Ника́ндре,/ потщи́ся нас, чад свои́х, чи́сты предста́вити Го́сподеви,/ Его́же со Пресвято́ю Богоро́дицею вку́пе и со все́ми святы́ми приле́жно моли́, всеблаже́нне,/ правосла́вному наро́ду на́шему пода́ти здра́вие и всем ве́рным спасе́ние,/ очище́ние грехо́в и ве́лию ми́лость.
И ны́не, Богоро́дичен, глас то́йже: Под кров Твой, Влады́чице:
Тропа́рь, глас 4:
Глас Боже́ственный, и́же во Ева́нгелии, услы́шав,/ преподо́бне о́тче Ника́ндре:/ прииди́те ко Мне, вси тружда́ющиися и обремене́ннии,/ и Аз упоко́ю вы,/ и прие́м крест, после́довал еси́ Христу́,/ мир оста́вль, в пусты́ню всели́лся еси́,/ поще́нием же и бде́нием Небе́сный дар восприи́м,/ и ду́ши неду́жных, приходя́щих к тебе́ с ве́рою, исцеля́еши:/ те́мже и со А́нгелы сра́дуется, преподо́бне, дух твой.
Ин тропа́рь, глас 6:
Свети́ло незаходи́маго све́та/ стране́ на́шей яви́лся еси́, богоблаже́нне,/ до́блественне претерпе́в вра́жия озлобле́ния,/ бие́ние и ра́ны я́ко оде́жда нетле́ния вмени́шася тебе́,/ со зверьми́ бо бра́вся/ и от челове́к злых прободе́ния прия́в,/ о тех моли́лся еси́:/ не поста́ви им греха́ сего́, глаго́ля;/ те́мже Влады́це Христу́ уподо́бился еси́,/ достохва́льне Ника́ндре, о́тче наш,/ моли́ся о душа́х на́ших.
НА У́ТРЕНИ
На Бог Госпо́дь: тропа́рь преподо́бнаго два́жды.
Сла́ва, и ны́не, Богоро́дичен.
По 1-м стихосло́вии седа́лен, глас 4:
Глас Госпо́день слы́шан тебе́ бысть, преподо́бне, в пусты́ню зовы́й,/ в не́йже и́стинный поко́й обре́л еси́,/ посто́м, моли́твами и слеза́ми подвиза́лся день и нощь,/ житие́м Варлаа́му и Се́ргию преподо́бным уподо́бился еси́ пресла́вно/ и отту́ду бесо́вския полки́ прогна́л еси́./ Ны́не же и о́браз твой источа́ет исцеле́ние боля́щим,/ нам же спасе́ние подае́т и ве́лию ми́лость.
Сла́ва, и ны́не, Богоро́дичен:
Упова́ние и прибе́жище христиа́ном,/ Богоро́дице Присноде́во Мари́е,/ не пре́зри упова́ющих на Тя рабо́в Твои́х,/ тре́буем бо всегда́ Твоея́ по́мощи и заступле́ния,/ я́ко Ма́ти еси́ Зижди́теля всех, Христа́ Бо́га на́шего./ Тем и велича́ем Рождество́ Твое́, Пречи́стая, и вопие́м:/ ра́дуйся, Де́во Препросла́вленная;/ ра́дуйся, преподо́бных похвало́;/ ра́дуйся, Богора́дованная Влады́чице;/ ра́дуйся, спасе́ние душа́м на́шим и ве́лия ми́лость.
И чте́ние от жития́ преподо́бнаго отца́ на́шего Ника́ндра чудотво́рца.
По 2-м стихосло́вии седа́лен, глас 1:
Вои́стину пресла́вно житие́ твое́, преподо́бне,/ и А́нгелом благогове́йно, и́мже и подо́бник был еси́,/ посто́м и моли́твами плотски́я огнепа́льныя стра́сти умертви́в,/ и, ны́не жив, со живу́щими во стране́ живы́х ра́достно пое́ши Тро́ицу Единосу́щную.
Сла́ва, и ны́не, Богоро́дичен:
Тя, Пресвята́я Богоро́дице, А́нгели пою́т непреста́нно,/ я́ко Соде́теля тех и Бо́га на́шего, несказа́нно во чре́ве Твое́м заче́нши,/ родила́ еси́ неискусому́жно во спасе́ние на́ше и избавле́ние;/ Его́же и мо́лиши при́сно/ су́щим на земли́ здра́вие дарова́ти и ми́ру всему́ умире́ние./ Те́мже и зове́м Ти:/ ра́дуйся, всех родо́в весе́лие;/ ра́дуйся, Де́во, христиа́н похвало́.
И па́ки чте́ние от жития́ преподо́бнаго.
По полиеле́и седа́лен, глас 8:
Ка́ко тя ублажи́м, преподо́бне,/ или́ ки́има устна́ма просла́вим твою́ досточу́дную па́мять?/ А́нгела тя в ле́поту нарица́ем земна́го и Небе́снаго челове́ка,/ еще́ бо ти во пло́ти су́щу,/ гла́са Бо́жия сподо́бился еси́ слы́шати/ и явле́ние преподо́бнаго Алекса́ндра Сви́рскаго, чудотво́рца, ви́дети,/ к по́двигу на неви́димыя си́лы укрепля́юща тя,/ и́хже, подвиза́яся, победи́л еси́/ и от челове́к отгоня́еши при́сно,/ сего́ ра́ди зове́м:/ ра́дуйся, богоблаже́нне Ника́ндре, о́тче наш.
Сла́ва, и ны́не, Богоро́дичен:
Де́во Пренепоро́чная и Неискусому́жная Мари́е,/ при́зри и посети́ рабо́в Твои́х,/ ве́рно пою́щих и хва́лящих Тя во хра́ме Твое́м, Препе́тая:/ ра́дуйся, Богоблагода́тная Богоро́дице Всепе́тая;/ ра́дуйся, спасе́ние на́ше и утвержде́ние;/ ра́дуйся, просвети́вшая род наш светоно́сным Рождество́м Сы́на Твоего́ и Бо́га на́шего,/ и́мже искорени́ся лесть бесо́вская;/ ра́дуйся, совокупи́вшая до́льняя Небе́сным:/ ра́дуйся, Неве́сто Неневе́стная.
И па́ки чте́ние от жития́ преподо́бнаго.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне и достоблаже́нне о́тче Ника́ндре,/ тебе́ постыде́шася бе́сове и исчеза́ху, пла́чуще,/ я́ко победи́л еси́ их моли́твами твои́ми;/ и челове́цы, напра́сно уязвля́ющии тя, посра́млени бы́ша;/ зве́ри же приви́деннии, устраши́вшеся, отбего́ша,/ си́лою бо кре́стною тех прогна́л еси́;/ ты же непобеди́м Христо́ви предстои́ши,/ И́же тя равноче́стна святы́м показа́,/ Ему́же и моли́ся о душа́х на́ших.
Кано́н свята́го Ника́ндра, его́же краестро́чие: Ника́ндре преподо́бне, ра́дуйся. Глас 4.
Песнь 1
Ирмо́с: Раздели́в пучи́ну Чермну́ю Бог,/ фарао́на погрузи́вый в ней,/ прове́д Моисе́я немо́кренно в пусты́ню/ и одожди́в ма́нну в снедь лю́дем Изра́илевым,/ я́ко Всеси́лен.
Наста́ви мя, Го́споди, на путь ра́зума,/ све́тло воспе́ти уго́дника Твоего́,/ его́же сло́вом Твои́м в пусты́ню изве́л еси́,/ и враги́ его́ под но́ги тому́ покори́в,/ я́ко Всеси́лен.
Изба́ви ны, Бо́же, от уст душепа́губнаго во́лка/ моли́твами преподо́бнаго Своего́,/ и́же невре́дно премину́ жите́йскую пучи́ну,/ его́же ра́ди одожди́ на ны бога́тую Твою́ ми́лость,/ я́ко Всеси́лен.
Кто подо́бне по́двиги твоя́ исчи́слити возмо́жет, пресла́вне Ника́ндре,/ и́миже подвиза́яся, врага́ победи́л еси́?/ И ны́не сла́вно твори́ши чудеса́ де́йствием Свята́го Ду́ха,/ Бо́га Всеси́льна.
А́ще и тьма́ми покуша́шеся враг отъя́ти сокро́вище души́ твоея́,/ но, уя́звен быв мече́м кре́пкаго ти воздержа́ния, побеже́,/ ты же госпо́дствуеши у Царя́ сла́вы,/ Бо́га Всеси́льна.
Богоро́дичен: Богоро́дице, Присноде́во Мари́е,/ простри́ ми ми́лостивне десни́цу на по́мощь, умоля́ющи Сы́на Твоего́ и Бо́га,/ я́ко уя́звен есмь лю́те и на Тя то́чию наде́жду мою́ положи́х,/ Ты мя уще́дри.
Катава́сия: Отве́рзу уста́ моя́:
Песнь 3
Ирмо́с: Утверди́ся се́рдце мое́ в Го́споде,/ даю́щем моли́тву моля́щемуся,/ я́ко лук си́льных изнемо́же/ и немощству́ющии препоя́сашася си́лою.
Непоколеби́мь пребы́л еси́ о Го́споде, преподо́бне,/ даю́щем спасе́ние прося́щим смире́нно,/ го́рдость же бесо́вская низпаде́ся,/ ви́девши тя во пло́ти препоя́савшагося Бо́жиею си́лою.
Дарова́ тебе́ Госпо́дь, всебога́те,/ бога́тство неотъе́млемыя сла́вы,/ е́же возставля́ти разсла́бленных,/ те́мже и нас препоя́ши си́лою.
Разу́мно препоя́сався, свя́те,/ во оде́жду смире́ннаго богоразу́мия,/ не́мощны сотвори́ супоста́ты на́ша,/ моли́твами твои́ми, мо́лимся.
Богоро́дичен: Наде́жда и упова́ние на́ше, Влады́чице ми́ра,/ Блага́я Помо́щнице,/ спаси́, и в кре́пости рог вознеси́ правосла́вных, и лю́ди на́ша от вся́ких бед и от разли́чных обстоя́ний свободи́.
Ин конда́к, глас 8:
Богосия́нная звездо́ ве́ры, я́же возсия́ в Ру́сстей земли́,/ о́тче преблаже́нне Ника́ндре,/ слеза́ми и посто́м и бде́нием и моли́твами удруча́л еси́ те́ло свое́,/ те́мже и обре́л еси́ Небе́сную жизнь, и ра́достно та́мо со А́нгелы ликовству́еши,/ сего́ ра́ди да зове́м ти:/ ра́дуйся, о́тче преподо́бне Ника́ндре, пусты́нный жи́телю.
Седа́лен, глас 3:
Я́ко заря́ со́лнечная, пресве́тло сия́еши/ и всем ве́рно прибега́ющим под кров ми́лости твоея́, преподо́бне,/ весе́лие подае́ши и душа́м спасе́ние;/ стяжа́л бо еси́ мно́гое дерзнове́ние ко Христу́ Бо́гу,/ Ему́же и моли́ся непреста́нно, Ника́ндре, о́тче наш всеблаже́нне,/ прегреше́ний оставле́ние дарова́ти нам и ве́лию ми́лость.
Сла́ва, и ны́не, Богоро́дичен:
Под Твое́ благоутро́бие притека́юще, мо́лим, Богоро́дице Де́во,/ не пре́зри рыда́ния на́шего и моли́твы,/ но ускори́ изба́вити от бед и скорбе́й лю́ди безотве́тны,/ Ты бо еди́на еси́ изве́стнейшее христиа́ном упова́ние,/ и, к Тебе́ прибега́юще, вси спаса́емся.
Песнь 4
Ирмо́с: Небеса́ доброде́тель Твоя́ покры́ла есть,/ и земля́ испо́лнися сла́вы Твоея́, Христе́,/ те́мже ве́рно вопие́м:/ сла́ва си́ле Твое́й, Го́споди.
Еди́наго Бо́га в се́рдце твое́м име́я, преподо́бне,/ в пусты́ни трудолю́бно пожи́л еси́, Ника́ндре, о́тче наш, взыва́я ве́рно:/ сла́ва си́ле Твое́й, Го́споди.
Пресве́тел и че́стен свети́льник ты еси́, о́тче Ника́ндре,/ не за́йде бо свет доброде́тельнаго твоего́ жития́ под спуд забве́ния,/ но, я́ко со́лнце, озаря́ет ве́рно Христо́ви пою́щих:/ сла́ва си́ле Твое́й, Го́споди.
Расточи́л еси́ име́ние твое́, о́тче, Христа́ ра́ди,/ от Него́же и глас услы́шав, в пусты́ню всели́лся еси́/ и на высоту́ доброде́телей возше́л, взыва́я:/ сла́ва си́ле Твое́й, Го́споди.
Богоро́дичен: Из Твои́х Пречи́стых чресл, Богороди́тельнице,/ Сло́во Бо́жие произы́де несказа́нно,/ Его́же объе́мши, от зол изба́вити умоли́ зову́щих:/ сла́ва си́ле Твое́й, Го́споди.
Песнь 5
Ирмо́с: Мрак разреши́ греха́ моего́,/ внегда́ возсия́ти Ти/ у́тро све́тлое за́поведей Твои́х,/ Го́споди, непристу́пный Све́те.
Его́же возлюби́л еси́/ и Ему́же порабо́тал еси́ от ю́ности, о́тче,/ Того́ умоли́ мрак грехо́вный от души́ моея́ разгна́ти/ сия́нием духо́вным.
Приложи́л еси́, о́тче, труды́ ко трудо́м сугу́бо,/ сего́ ра́ди и мно́гая блага́я Небе́сная приложи́шася тебе́./ Те́мже тя мо́лим:/ приложи́ и нам ми́рнаго жития́ и ра́йскаго весе́лия.
О те́ле твое́м небреги́й, преподо́бне,/ пребы́л еси́ на земли́, о Небе́сных поуча́яся,/ иде́же ны́не ра́дуяся живе́ши;/ моли́ у́бо и нам ра́дости тоя́ сопричасти́тися.
Богоро́дичен: Нескве́рная А́гнице и Богоотрокови́це Мари́е,/ Твои́ми моли́твами укрепи́вшеся, святи́и победи́ша бесо́вския си́лы./ Те́мже и нам, упова́ющим на Тя, ско́ро предста́ни в по́мощь,/ да посра́мятся и паду́т вси явля́ющии рабо́м Твои́м зла́я.
Песнь 6
Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в, / но, я́ко Бог, из глубины́ возведи́ живо́т мой, Многоми́лостиве.
Дале́че от Бо́га грех мя отри́ну,/ и в пучи́не зол погружа́юся, увы́ мне!/ Но, о предста́телю наш те́плый,/ изба́ви от належа́щия ско́рби ду́шу мою́, преподо́бне Ника́ндре.
Оста́ви мя си́ла моя́, и лю́те окружа́ют мя ско́рби,/ те́пле у́бо припа́даю ти, преподо́бне Ника́ндре:/ пода́ждь ми долго́в разреше́ние, молю́ся, исцеле́ние телеси́ и души́ спасе́ние,/ моли́твами твои́ми, всебога́те.
Бе́здною грехо́в сляца́емь, окая́нный,/ во глубине́ отча́яния потопля́юся,/ но, предвари́в моли́твами твои́ми, о́тче,/ руково́дствуй мя во све́те богове́дения, я́ко оте́ц благоутро́бный.
Богоро́дичен: Безнача́льный Бог из Тебе́ роди́ся, Де́во,/ и по рождестве́ Тя Де́ву соблюде́ нетле́нно,/ Того́ нам ми́лостива сотвори́, мо́лимся,/ и от нахожде́ний лютых зол сохрани́, я́ко Милосе́рда.
Конда́к, глас 1:
Я́ко лучу́ тя со́лнечную Христо́с показа́, преподо́бне,/ сия́еши бо в земли́ Росси́йстей чуде́с благода́тию/ и отгоня́еши тьму страсте́й же и скорбе́й/ от приходя́щих к тебе́ с ве́рою./ Те́мже почита́ем твою́ па́мять, Ника́ндре, о́тче наш, и вопие́м ти:/ ра́дуйся, пустынножи́телей красото́/ и стране́ на́шей похвало́ и утвержде́ние.
И́кос:
Проро́ческое сло́во де́лом соверши́л еси́, богому́дре,/ удали́вся бо ми́ра и в пусты́ню всели́вся, преподо́бне,/ Бо́га обре́л еси́ Помо́щника тебе́,/ и Той тя бога́тно просла́ви и чуде́с благода́тию обогати́ пресла́вно,/ я́ко и от о́браза твоего́ здра́вие боля́щим истека́ет незави́стно./ Те́мже, сте́кшеся, день преставле́ния твоего́ духо́вно пра́зднуем,/ по́двиги твоя́ почита́юще и похва́льная воспева́юще:/ ра́дуйся, по́стниче терпеливоду́шный, трудополо́жниче смиренному́дрый,/ исто́чниче слез непресыха́емый, сто́лпе моли́твенный неподви́жимый,/ сказа́телю бу́дущих нело́жный, послуша́ния бе́здно и высота́ смире́ния,/ изве́стный насле́дниче Небе́снаго Ца́рствия, помо́щниче скорбя́щим милосе́рдый,/ засту́пниче ко Влады́це Христу́ Бо́гу непрело́жный,/ вели́кому Новугра́ду и Пско́ву све́тлая добро́то/ и всем ве́рным спасе́ние и сла́во, преподо́бне Ника́ндре, о́тче наш,/ стране́ на́шей похвало́ и утвержде́ние.
Песнь 7
Ирмо́с: Образу злато́му не поклони́вшеся, о́троцы авраа́мстии/ искуша́хуся, я́ко зла́то в горни́ле,/ в пещи́ о́гненней, я́ко в черто́зе све́тлем,/ ликова́ху, пою́ще:/ благослове́н еси́, Бо́же оте́ц на́ших.
Ничто́же предпоче́л еси́ земны́х па́че Небе́сных,/ но, я́ко зла́то в горни́ле, искуси́лся еси́, в пусты́не живы́й, весь светови́ден быв,/ не помрачи́ бо тя нощь бесо́вския пре́лести,/ зане́, всегда́ во све́те богомы́слия пребыва́я, взыва́л еси́:/ Бо́же, благослове́н еси́.
Еди́н Еди́ному Го́споду прилепи́вся, богоблаже́нне,/ моли́твами и посто́м вы́ну Тому́ бесе́довал еси́,/ те́мже и венце́м неувяда́емыя по́чести оде́ян,/ ра́достно вшел еси́ с му́дрыми де́вами в неве́стник Христо́в, вопия́:/ Бо́же, благослове́н еси́.
Ре́сна21 па́мять твоя́, преподобне Ника́ндре,/ свет вторы́й ве́рным лю́дем яви́ся,/ ю́же пра́зднующе, бога́тно луча́ми чуде́с озаря́емся и Христу́ вопие́м:/ Бо́же, благослове́н еси́.
Богоро́дичен: Виждь, Влады́чице, души́ моея́ злосмра́дныя ра́ны, и́хже самохо́тне подъя́х, окая́нный,/ и не могу́ приложи́ти пла́стыря, но, е́ле жив сый, вопию́:/ ми́лостива мне Врача́ всех и Бо́га Ма́терними Твои́ми моли́твами сотвори́,/ я́ко да спа́сшися воспою́ Ти:/ благослове́н, Пречи́стая, Плод Твоего́ чре́ва.
Песнь 8
Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
А́ще и в пусты́ни сокры́лся еси́, преподо́бне,/ но не утаи́ся доброде́тельнаго жития́ твоего́ све́тлость,/ снизше́д бо свы́ше, преподо́бный Алекса́ндр/ на неви́димыя враги́ побе́ду дарова́ и пе́ти тя укрепи́:/ вся дела́, благослови́те, по́йте Го́спода.
Дре́во благоплодови́то гроб твой обре́теся посреде́ пусты́ни,/ от него́же чуде́сный виногра́д обыма́юще,/ непреста́нно ду́ши наслажда́ем, и от напа́стей изменя́емся,/ и почита́ем терпе́ние твое́, Ника́ндре преподо́бне, Христа́ славосло́вяще, зове́м:/ вся дела́, благослови́те, по́йте Го́спода.
Увы́ мне, что сотворю́, окая́нный, зря многосве́тлыя ико́ны твоея́ зрак,/ блиста́ющийся о доброде́тели, ея́же не стяжа́х отню́д?/ Но, о преподо́бне Ника́ндре,/ наста́ви мя на путь пра́вый, вопи́ти Христу́ и́стинно:/ вся дела́, благослови́те, по́йте Го́спода.
Богоро́дичен: от Тебе́, Пресвята́я Богоро́дице,/ излия́ся вода́ живо́тная на омове́ние скве́рны всеми́рныя,/ е́юже благоволи́ и мое́ се́рдце прохлади́ти и окропи́ти росо́ю моли́тв/ в кро́ве крил Твои́х во ве́ки вся.
Песнь 9
Ирмо́с: Велича́ем вси/ человеколю́бие Твое́, Христе́, Спа́се наш,/ сла́во раб Твои́х и ве́нче ве́рных,/ возвели́чивый па́мять Ро́ждшия Тя.
Иде́же осеня́ет благода́ть Твоя́, Христе́, Спа́се наш,/ та́мо быва́ет сла́ва рабо́м Твои́м и венцы́ по́честей терпя́щим ве́рно./ Тем и нам да́руй ми́лости Твоя́, почита́ющим па́мять преподо́бнаго Твоего́.
Сло́во твое́ и́стинно и житие́ богоуго́дно на земли́ изобрази́л еси́, преподо́бне,/ ны́не же и на Небесе́х Христо́ви предстоя́,/ моли́ся возвели́чити держа́ву благове́рных царе́й и во́инство ми́ром огради́ти.
Я́коже предре́кл еси́, богодухнове́нне,/ сохрани́тися от бед погре́бшим те́ло твое́ иногда́, и бысть та́ко,/ и нас ны́не от належа́щих обстоя́ний ми́лостивно заступи́,/ я́ко да спа́сшеся тобо́ю, ве́рно возвели́чим па́мять твою́.
Богоро́дичен: Ко́е Тебе́ дарова́ние принесе́м, Богоро́дице,/ или́ что веща́ти и́мамы, гре́шнии?/ То́чию уми́льно вопие́м, моля́щеся:/ спаси́ рабы́ Твоя́, Богоблагода́тная Отрокови́це,/ я́ко да Тя при́сно велича́ем.
Свети́лен:
От ю́ности, о́тче, дом Ду́ху Пресвято́му яви́лся еси́,/ во кро́тости со смиренному́дрием всего́ себе́ поручи́в Го́сподеви,/ И́же и призре́ неукло́нно на ти́хость души́ твоея́./ Тем ны́не и зе́млю кро́тких на Небесе́х насле́довав, ве́чно лику́еши.
Сла́ва, и ны́не, Богоро́дичен:
Ра́дуйся, Тебе́ зове́м, Благослове́нная Богоро́дице Де́во,/ я́ко Тобо́ю присносу́щныя ра́дости прича́стницы бы́хом,/ Живо́т бо наш и Спасе́ние недомы́слимо и вы́ше естества́ родила́ еси́,/ сего́ ра́ди непреста́нно ублажа́ют Тя ро́дове родо́в,/ я́коже пре́жде прорекла́ еси́.
На хвали́тех стихи́ры, глас 8.
Подо́бен: О, пресла́внаго чудесе́:
О, пресла́вное чу́до!/ Сад благопло́дный о́браз твой,/ преподо́бне Ника́ндре,/ ве́рным лю́дем явля́ется днесь/ и, я́ко со́лнце в полу́дне, сия́ет,/ чудесы́ озаря́я досто́йно чту́щих па́мять твою́,/ и нощь несве́тлых скорбе́й прогоня́еши/ от приходя́щих к тебе́ с ве́рою/ и ве́рно пою́щих тя.
О, пресла́внаго твоего́ жития́,/ богому́дре Ника́ндре!/ Ка́ко не удиви́мся, земноро́днии?/ Я́ко, во пло́ти сый,/ безпло́тным А́нгелом уподо́бился еси́,/ с ни́миже ны́не лику́еши во све́те невече́рнем на Небесе́х,/ предстоя́ Христо́ви в ра́дости,/ Ему́же моли́ся о нас,/ любо́вию хва́лящих тя.
О пречу́дне Ника́ндре,/ пустынножи́телю пресла́вный,/ дре́вним святы́м равностоя́телю,/ во сла́ве присносу́щней соводворя́ешися,/ све́тло зри́ши Лице́ Святы́я Тро́ицы,/ от Нея́же мы́сленно просвети́вся благода́тию,/ и нетле́ннаго сопричасти́лся еси́ Ца́рствия,/ его́же и нам помоли́ся улучи́ти и от печа́ли изба́витися,/ да пра́зднуем ра́достно па́мять твою́.
О досточу́днаго твоего́ терпе́ния,/ о му́жества душе́внаго,/ о нра́ва непобеди́маго,/ достоблаже́нне Ника́ндре!/ Побе́де тезоимени́т я́влься,/ вои́стину победи́л еси́ нача́ла тьмы и вла́сти возду́шныя/ и, в Небе́сное насле́дие отше́д ра́дуяся,/ восприя́л еси́ бога́тно воздая́ние/ от Царя́ Христа́ и Бо́га на́шего.
Сла́ва, глас 8:
Мона́хов мно́жество,/ днесь духо́вно торжеству́юще,/ псало́мски восхва́лим па́мять преподо́бнаго отца́ Ника́ндра./ Блаже́н еси́, о́тче,/ я́ко путе́м нечести́вых не ходи́л еси́,/ но, в зако́не Госпо́дни поуча́яся день и нощь,/ мо́ре страсте́й жезло́м воздержа́ния разве́рзл еси́,/ и, в пусты́ни поживы́й, я́ко вторы́й Моисе́й,/ врага́ попра́л еси́,/ и, у́мнаго богови́дения сподо́бився,/ во обетова́нное Оте́чество вшел еси́,/ иде́же ку́пно со святы́ми/ пое́ши, веселя́ся, Тро́ицу Единосу́щную.
И ны́не, Богоро́дичен, глас то́йже: Влады́чице, приими́:
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я, и слу́жба вся преподо́бническая.
Моли́тва
О преподо́бне и достоблаже́нне о́тче наш Ника́ндре, по́стниче терпеливоду́шный, безмо́лвия рачи́телю предо́блий, учи́телю спасти́ся хотя́щим прему́дрый, наказа́телю лени́вым прети́хий, разреши́телю тлетво́рных страсте́й незло́бивый, му́жу жела́ний, прозорли́вства пророческаго испо́лнение, предвозгла́сная бу́дущих благ цевни́це, адама́нте ве́ры во Христа́ несеко́мый, незы́блемый терпе́ния сто́лпе, за́поведей Творца́ твоего́ соверши́телю благопослушли́вый, плотоно́сный Ангеле и Ду́ха Свята́го вмести́лище благово́нное, жи́телю пусты́нный и бесо́в прогони́телю, исполни́телю всех доброде́телей смиренному́дрый, Небе́сный челове́че и сожи́телю го́рним чинонача́лием, кро́тостию ду́ха зе́млю кро́тких насле́довавый, дру́же Христо́в и уго́дниче Пресвяты́я Богоро́дицы, Я́же и ра́ку цельбоно́сных моще́й твои́х во хра́ме Свое́м просла́вити благоизво́ли, изоби́льно от нея́ чуде́сному дождю́ на ве́рных излива́тися повеле́вши! К не́йже припа́дающе с любо́вию, мо́лим тя, досточу́дне: не преста́й моли́ти Пресвяту́ю и Живонача́льную Тро́ицу, низпосла́ти стране́ на́шей мир и благоде́нствие, на враги́ же побе́ду и одоле́ние, и от наве́т вра́жиих во́инству на́шему сохрани́тися в ми́ре, Це́рквам согла́сие и всем лю́дем тишину́ и изоби́лие благи́х дарова́ти. И угаси́, блаже́нне, моли́твами твои́ми, паря́щия на ны разжже́нныя бесо́вския стре́лы, да не прико́снется нам зло́ба грехо́вная. И, всем вся ми́лостивне да́руя, при́зри и на мя, смире́ннаго раба́: свя́зан бо есмь лю́те плени́цами прегреше́ний и влеко́мь, увы́ мне! в пучи́ну стра́стнаго мо́ря неодержа́нно. Сего́ ра́ди приле́жно молю́ святы́ню твою́, пребога́те, и припа́даю к ра́це моще́й твои́х со слеза́ми: предста́ни мне на пути́ бе́дственнаго жития́ сего́, расто́ргни у́зы, отжени́ стра́сти, осла́би от грехо́вных вери́г, изба́ви мя от належа́щия ско́рби и от вся́каго зла, разреши́ мя от боле́зненных уз и спасе́ние души́ умоли́ мне, я́ко да воспою́ и просла́влю в Тро́ице сла́вимаго Еди́наго Бо́га, Отца́ и Сы́на и Свята́го Ду́ха, ны́не и в безконе́чныя ве́ки веко́в. Ами́нь.
