Служба преподобнаго отца нашего Льва, епископа Катанскаго

На Го́споди, воззва́х: стихи́ры, глас 8.

Подо́бен: Го́споди, а́ще и на суди́щи:

Го́споди, Ты святи́теля в ми́ре,/ апо́столов прее́мника, показа́л еси́,/ де́лы и словесы́ пра́вых уче́ний пропове́дника,/ и сего́ ра́ди наста́вника положи́л еси́ святи́телей/ и сла́вы соприча́стника нетле́нныя Твоея́.

Столп тя, Льве, Христо́ва Це́рковь жив/ и глаго́льника держа́щи/ пра́вых уче́ний Сло́ва,/ сего́ зря́щи непоколеби́ма и́стины,/ при́сно пребыва́ет,/ сла́вящи Влады́ку всех и Го́спода,/ тя просла́вльшаго.

Го́споди, Ты святи́теля сло́во/ изощре́н показа́л еси́ меч на злоче́ствующих/ в Правосла́вную ве́ру Твою́/ и, тем посека́я ло́жная мудрова́ния,/ благоче́стия в ми́ре умно́жил еси́ уче́ния, Влады́ко.

Сла́ва, и ны́не, Богоро́дичен.

Подо́бен то́йже:

Ви́ждь моего́ сокруше́ннаго се́рдца стена́ния, Богоневе́стная,/ приими́, Де́во Мари́е,/ и не отри́ни, Всенепоро́чная,/ рук мои́х, Чи́стая, воздея́ние,/ я́ко благолюби́ва,/ да пою́ и велича́ю возвели́чившую род наш.

Крестобогоро́дичен, подо́бен то́йже:

А́гнца Тя,/ егда́ А́гница и Де́ва, к заколе́нию ведо́ма, узре́,/ со слеза́ми, Сло́ве, после́доваше/ и взыва́ше:/ где тщи́шися, Ча́до Мое́?/ сше́ствую Тебе́, Сладча́йший,/ не терплю́ бо не зре́ти Тебе́,/ Иису́се Мой Многоми́лостиве.

Тропа́рь, глас 4:

Пра́вило ве́ры и о́браз кро́тости,/ воздержа́ния учи́теля,/ яви́ тя ста́ду твоему́,/ я́же веще́й и́стина,/ сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Льве,/ моли́ Христа́ Бо́га/ спасти́ся душа́м на́шим.

Кано́н, его́же краегране́сие: Льва, исто́чник сущь чуде́с, чту. Ио́сиф. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Свети́льника тя Боже́ственна Христо́ва све́тла/ Це́рковь стяжа́вши, Льве му́дре,/ доброде́телей твои́х сия́ньми и чуде́с бога́тно просвеща́ется.

От младе́нства возложи́л еси́ себе́ сама́го всех Влады́це,/ и умерщвле́нием сласте́й жива́ Сего́ был еси́ же́ртва,/ закала́я себе́ без кро́ве, блаже́нне.

Житие́ твое́ сия́ет, доброде́тельми укра́шено/ и чуде́с блиста́ньми удобре́но, Богоно́се,/ проявле́на тя всем соде́ла.

Богоро́дичен: Храм Ты была́ еси́ Бо́жий, Нескве́рная Отрокови́це,/ все́льшемуся па́че ума́ в Тя, Богоро́дице,/ и лесть от душ челове́ческих отгна́вшему.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Спаси́тельна, о́тче, и благоче́стна уче́ния правосла́вия храня́ невре́дна,/ ста́до упа́сл еси́ на па́житех живоно́сных/ и в Небе́сную огра́ду вве́л еси́.

Возше́д на высоту́ доброде́телей, преподо́бне,/ пома́зание свяще́нно прия́л еси́/ и Превысо́каго, всему́дре, восхвали́л еси́ высоча́йшим седа́лищем,/ послужи́в благода́тию Тому́, я́ко А́нгел.

Напа́сти претерпе́в Христа́ ра́ди, преподо́бне,/ безсме́ртию причасти́лся еси́ обоже́ния;/ ми́ро же благово́нно непреста́нно источа́я,/ освяща́еши ве́рою к тебе́ притека́ющия.

Богоро́дичен: У́гля Боже́ственнаго и светоза́рнаго клеще́,/ купино́, огне́м не опали́вшися Божества́,/ хвра́стныя моя́ вся попа́ли стра́сти и огня́ исхити́ ве́чнующаго.

Седа́лен, глас 3

Подо́бен: Боже́ственныя ве́ры:

Вели́кое со́лнце, вселе́нней возсия́л еси́ доброде́телей твои́х сия́ньми,/ и чуде́с све́тлостию просвети́в ве́рных собо́ры,/ и отгна́в страсте́й омраче́ние, Льве преподо́бне,/ Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чься,/ плоть быв во чре́ве Твое́м,/ но Бог, вочелове́чився, пребы́сть, И́же по Рождестве́ Ма́терь Тя Де́ву,/ я́ко пре́жде Рождества́, сохрани́в Всенепоро́чну, Еди́н Госпо́дь./ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва,/ нетле́нная Де́во Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́,/ ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Земледе́лав ни́ву твоего́ ра́зума, стокра́тный клас прине́сл еси́, пребога́те,/ доброде́телей Боже́ственных и исцеле́ний.

Свята́я твоя́, сла́вне, ра́ка вы́ну еле́й святы́й источа́ет,/ освяща́ющи ду́ши, ве́рою к тебе́ притека́ющия.

Неду́гов очище́ние, лука́вых де́монов отгони́тель, святи́телю, был еси́/ и ве́рных челове́ков прибе́жище.

Богоро́дичен: Всем Невмести́мый, Пречи́стая, вмеща́ется во утро́бе Твое́й,/ спаса́я мя бла́гостию, погруже́ннаго мно́гими грехи́.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Умо́м чисте́йшим Ума́ всех Вино́внаго смотря́я,/ от Него́ прия́л еси́ дарова́ний зарю́, Богодохнове́нне,/ исцеле́ний свяще́нная светоли́тия,/ и́миже разреша́еши страсте́й омраче́ние.

Пре́лестьми де́монскими вся ве́рующия Христу́ прельща́ющаго,/ о́гненному суду́ пре́дал еси́ пра́ведно, блаже́нне,/ и ду́ши изба́вил еси́ всегуби́тельнаго сего́ вре́да,/ я́ко па́стырь и́стинен и спаси́телен.

Разгоре́вшуся огню́ посреди́ стал еси́, неопали́м, пресла́вне,/ Боже́ственная бо роса́ Свята́го окру́жи тя Ду́ха,/ я́ко священнотаи́нника,/ я́ко служи́теля Боже́ственныя сла́вы,/ я́ко Вы́шния све́тлости прича́стника.

Богоро́дичен: Ви́девше дре́вле Боже́ственнейше, Богора́дованная,/ честни́и проро́цы та́инства глубину́ неизрече́нную честна́го Рождества́ Твоего́, Пречи́стая,/ разли́чными о́бразы, я́ко вмести́ша, Сего́ провозвести́ша.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Слепи́и моли́твами твои́ми, о́тче, прия́ша прозре́ние, Богому́дре:/ Христа́ бо соде́йственника име́я и к Нему́ души́ твоея́ о́чи стяжа́в вы́ну,/ проше́ния бога́тно прия́л еси́.

Был еси́ царю́, чу́дне, стра́шен,/ внегда́ иды́й во дворы́ его́, носи́л еси́ оде́ждою у́глие горя́щее:/ прославля́ше бо тя Бог,/ Его́же житие́м твои́м, Льве, просла́вил еси́.

Благоуха́ет ра́ка моще́й твои́х и излива́ет при́сно, всеблаже́нне,/ я́коже исто́чник чист и благово́нный, еле́й Боже́ственный,/ и́мже отгоня́ются неду́зи от ве́рных и здра́вие тре́бующим да́руется.

Богоро́дичен: Освяти́ ду́шу мою́, Де́во, Свято́е ро́ждшая Сло́во,/ вои́стинну во святы́х я́ко пречи́сто почива́ющаго Еди́наго Бо́га на́шего,/ и да́руй ми, я́ко ми́лостива, умиле́ния ту́чу, Всенепоро́чная.

Конда́к, глас 8.

Подо́бен: Я́ко нача́тки:

Я́коже свети́льника превели́ка, Це́рковь и́мать, всеблаже́нне,/ тебе́, па́че со́лнца сия́юща,/ ю́же твои́ми моли́твами сохрани́, блаже́нне,/ непобеди́му, и непоколеби́му от е́реси вся́кия, и нескве́рну,/ я́ко приснопа́мятный.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Чино́м Боже́ственным безпло́тным с пло́тию подо́бяся, Богому́дре,/ служи́л еси́ Бо́гу, непреста́нно воспева́я:/ благослове́н еси́, Го́споди Бо́же, во ве́ки.

У́ши глухи́я, всеблаже́нне, моли́твами твои́ми отве́рзл еси́ Боже́ственными/ и хромы́м я́вственно по́дал благотече́ние,/ благослове́н еси́, вопия́, Го́споди Бо́же, во ве́ки.

Ма́нием Боже́ственным Влады́ки неопале́н пре́был еси́, вшед, посреди́ огня́;/ неприча́стный же Сего́, судо́м пра́ведным опаля́ется Илиодо́р,/ моли́твою твое́ю.

Богоро́дичен: Твоего́ чре́ва не опали́ Божества́ Огнь, Де́во Ма́ти,/ воплоща́ется из Тебе́, концы́ ороша́я Боже́ственными светлостьми́./ Сего́ ра́ди Тя пое́м.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Излия́ся благода́ть, о́тче, во устна́х твои́х, священнотаи́нниче,/ сего́ ра́ди тя, Льве, Бог пома́за, святи́теля, лю́дем, вопию́щим:/ благослови́те, вся дела́ Госпо́дня, Го́спода.

Царю́, всеблаже́нне, Преве́чнующему благоугоди́л еси́,/ земно́му, Льве, царю́ предста́л еси́, у́глие нося́/ и сего́, о́тче, ужаса́я мысль чудоде́йствы, зело́ пресла́вными.

Я́ко ма́слина, о́тче, насажде́на быв плодови́та в дому́ Госпо́дни,/ плод приноша́еши по кончи́не, от Боже́ственнаго те́ла твоего́ еле́й Боже́ственный,/ ве́рных всяк неду́г отгоня́я всегда́, к тебе́ с любо́вию, му́дре, притека́ющих.

Богоро́дичен: Хоте́нием вся соверша́яй, Всенепоро́чная, Благослове́нная,/ восхоте́в, во чре́во Твое́ всели́ся, и пло́тию яви́ся,/ и обожи́ мя, истле́вша пре́жде льсти́ваго злым сове́том.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Да тя Боже́ственными гла́сы блажи́м, преподо́бно пожи́вша,/ и на Небеса́ возше́дша, и ра́дующася:/ от страсте́й, и скорбе́й нас моли́твами твои́ми спаса́й, и от обстоя́ний,/ святи́телю и па́стырю досточу́дне.

Я́ко розга́ виногра́да и́стиннаго быв, о́тче,/ прозя́бл еси́ доброде́тельны гре́зны, чуде́с сла́дость иска́пающия,/ от ни́хже пию́ще ве́рно, здра́вие прие́млют и ра́дость хва́лящии тя при́сно,/ Льве всему́дре.

Те́ло твое́ бысть храм Свята́го и честна́го, о́тче, Ду́ха/ и ны́не лежи́т внутрь Боже́ственнаго хра́ма,/ его́же созда́л еси́ в сла́ву, Льве, и честь Луки́и му́ченицы,/ чуде́с источа́я нам ре́ки, благоче́стно тя почита́ющим.

Я́коже со́лнце светоза́рно, доброде́тельными свеща́ми концы́ озаря́я при́сно,/ и ны́не к Све́ту преми́нул еси́ незаходи́мому./ Те́мже светоно́сную твою́ па́мять пра́зднующия, Льве пребога́те,/ омраче́ний вселю́тых изба́ви.

Богоро́дичен: Страшу́ся Твоего́, Еди́не Царю́, втора́го прише́ствия/ и убоя́хся, безме́рно согреши́в Тебе́/ и по ра́зуме не утве́рждься;/ но я́ко сый Благ,/ обрати́ и спаси́ мя ро́ждшия Тя благоприя́тными, Иису́се, моли́твами.