Служба преподобнаго отца нашего Кирилла, Новоезерскаго чудотворца
НА МА́ЛОЙ ВЕЧЕ́РНИ
Стихи́ры самогла́сны на 4, глас 5:
Приспе́ и ны́не пресве́тлая па́мять всеблаже́ннаго отца́ на́шего Кири́лла,/ да пра́зднуем у́бо, бра́тие, воспева́юще его́,/ в пе́ниих и пе́снех духо́вных,/ печа́льным уте́шителя, отча́янным засту́пника,/ боля́щим исцели́теля,/ и ве́рою и любо́вию почита́юще пресве́тлыя по́двиги его́,/ и возопие́м глаго́люще,/ преблаже́нне о́тче Богоно́се Кири́лле,/ испроси́ у Христа́ Бо́га смире́ние ми́ру/ и спасе́ние душа́м на́шим и ве́лию ми́лость.
Пресве́тлое свети́ло, всеблаже́нне Кири́лле, и́ноком был еси́,/ сия́юще благи́ми де́лы и све́тлыми по́двиги,/ и всю́ду сия́я заре́ю благода́ти чуде́с,/ тем и по преставле́нии твое́м/ и па́ки обогати́ тя Госпо́дь мно́гими чудесы́ и разли́чными исцеле́нии,/ с ве́рою притека́ющим к ра́це моще́й твои́х/ от вся́кия ско́рби здра́вие оби́льно подава́еши.
О́тче преподо́бне Кири́лле,/ сше́дшеся све́тло пра́зднуем/ всечестну́ю па́мять твою́, моля́щеся,/ испроси́, Богому́дре, у Христа́ Бо́га/ смире́ние ми́ру, и спасе́ние душа́м на́шим/ и ве́лию ми́лость.
Ты измла́да Христа́ возлюби́л еси́, о́тче прему́дре Кири́лле,/ и ничто́же и́но па́че сего́ на земли́ поче́л еси́,/ но вся я́ко уме́ты вмени́в/ и Тому́ краткоду́шно после́довал еси́/ посто́м, бде́нием и моли́твами/ и мно́гими труды́ и терпе́нием/ и сего́ ра́ди Госпо́дь, Небе́сный Царь,/ венча́ тя венцо́м нетле́нным во Ца́рствии Свое́м,/ но я́ко име́я дерзнове́ние ве́лие к Нему́,/ мо́лим ти ся, о́тче наш всеблаже́нне Кири́лле/ испроси́ у Христа́ Бо́га побе́ду на враги́ и смире́ние ми́ру,/ спасе́ние душа́м на́шим и ве́лию ми́лость.
Сла́ва, глас 8:
И́нок мно́жество наста́вника тя чтем, о́тче наш Кири́лле,/ тобо́ю бо путь су́щий пра́вый ходи́ти уве́дехом,/ о блаже́н еси́ я́ко Христу́ рабо́та/ и вра́жию обличи́л еси́ си́лу,/ А́нгелом собесе́дниче, и́стым соприча́стниче, преподо́бне,/ с ни́ми же моли́ся Го́сподеви/ поми́ловатися душа́м на́шим.
И ны́не, Богоро́дичен.
На стихо́вне стихи́ры, глас 2.
Подо́бен: До́ме Евфра́фов:
Ты от ю́наго во́зраста,/ преподо́бне Кири́лле,/ сосу́д избра́н бысть Пресвято́му Ду́ху,/ украси́ся преблаги́ми де́лы/ и яви́лся еси́ свети́льник пресве́тел.
Стих: Честна́ пред Го́сподем/ смерть преподо́бных Его́.
О́тче Богому́дре Кири́лле,/ ты и́ноком удобре́ние/ и прозяба́ние пусты́нное,/ ты преподо́бным похвала́ и по́стником сла́ва/ и всем ве́рным утвержде́ние.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Моли́ся, преблаже́нне Кири́лле,/ сохране́ным нам бы́ти зде/ от враг ви́димых и неви́димых/ и тамо в День су́дный муче́нии изба́витися нам,/ да тебе́ непреста́нно почита́ем.
Сла́ва, глас 8:
Прииди́те днесь празднолю́бцы,/ вку́пе стеце́мся и псало́мски воспле́щим рука́ми/ и воспое́м его́, вели́каго отца́ на́шего всеблаже́ннаго Кири́лла,/ пра́зднующе всесвяту́ю па́мять его́./ И́мамы бо его́ пречестны́я мо́щи/ в его́ оби́тели посреде́ Кра́снаго о́строва я́коже друго́е со́лнце сия́я,/ обогаще́н све́тлостию мно́гих чуде́с,/ и и́же с ве́рою приходя́щим ко свято́му гро́бу его́/ при́сно подае́т разли́чныя исцеле́ния,/ те́мже и мы днесь соверша́юще пресве́тлую па́мять его́/ и моля́щеся вопие́м к нему́:/ о преподо́бне о́тче всеблаже́нне Кири́лле,/ моли́ся Христу́ Бо́гу/ да пода́ст смире́ние ми́ру Своему́/ и спасе́ние душа́м на́шим.
И ны́не. Богоро́дичен.
Тропа́рь, глас 8 (пи́сан на вели́цей вече́рни).
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 2.
Подо́бен: Егда́ от Дре́ва:
Ве́рою и любовию и́стинною/ ми́ра от младе́нства отре́кся,/ о́тче преподо́бне Кири́лле,/ ра́дуяся, после́довал еси́ Христу́,/ и мно́гим по́двигом плоть твою́ умертви́л еси́,/ и благода́ть исцеле́ний бога́тно восприя́л еси́/ уставля́ти неду́ги/ и не́мощи разли́чныя,/ и ду́хи лука́выя вельми́ удави́л еси́.
Украше́ние и́ноком быв,/ собра́л еси́ неизче́тно мно́жество/ пе́ти Го́спода, преподо́бне Кири́лле,/ и к Небеси́ всех наста́вил еси́ добре́,/ после́дующих Боже́ственным твои́м уче́нием/ и подо́бящихся твоему́ житию́ доброде́тельному,/ о́тче Кири́лле./ С ни́миже тя почита́ем,/ свяще́нно в преставле́нии твое́м радующеся.
Глас 1:
Преподо́бне о́тче Кири́лле,/ любве́ ра́ди Учи́теля твоего́,/ вся, я́же на земли́, преоби́дел еси́/ и, в пусты́ню всели́вся, плоть твою́ воздержа́нием умертви́л еси́,/ и по́стническими труды́ твое́ житие́ уясни́л еси́;/ отону́дуже и ученики́ себе́ собра́в, ревну́ющих твоему́ житию́,/ сих Христу́ приве́л еси́./ Его́же моли́ спасти́ всех нас, тя почита́ющих.
О́тче Богому́дре Кири́лле,/ воздержа́нием Бо́гу соединя́яся,/ непобежде́н пребы́сть кова́рствии бори́теля/ и раб яви́лся еси́ Вседержи́теля;/ ото́нудуже почита́ем тя/ и, Боже́ственную твою́ па́мять восхваля́юще,/ ра́достно ве́рою пра́зднуем.
Преподо́бне о́тче Кири́лле,/ в пусты́нях при́сно, и в пеще́рах, и в гора́х ве́рою пребыва́я,/ Бо́га взыска́л еси́/ и Сего́ ра́ди обре́л еси́, я́коже возжеле́,/ невозвра́тною душе́ю восхожде́нии до́брыми всегда́/ и́нок мно́жество приве́л еси́ Христу́ спаса́емых.
Преподо́бне о́тче, прему́дре Кири́лле,/ боля́щим ты яви́лся еси́ исцеле́ние,/ и хромы́м хожде́ние ми́лостивно сотворя́еши,/ и всем, притека́ющим с ве́рою к цельбоно́сному гро́бу твоему́,/ прося́щим по́мощи и заступле́ния./ Ты же моли́твами твои́ми/ исцеле́ние неду́гующим неоску́дно по́дававши.
Сла́ва, глас 6:
Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию я́ко мо́щно возшел еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный,/ благотеку́щих обучи́тель, пра́вило доброде́тели изве́стнейшее,/ и ны́не на Небесе́х зерца́лом разре́шшимся,/ о́тче наш Кири́лле,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.
И ны́не, Богоро́дичен: Кто Тебе́ не ублажи́т:
Вход. Проки́мен дне. И чте́ния три.
Прему́дрости Соломо́ни чте́ние (глава́ 3):
Пра́ведных ду́ши в руце́ Божией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всеплодие же́ртвенное, прия́т я./ И во вре́мя посеще́ния их возсияют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиеся на Него разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть,/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Господеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (гла́вы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И, от каменоме́тныя я́рости испо́лнь, паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ры, глас 8, самогла́сны:
Преподо́бне о́тче Кири́лле,/ дар Бо́жий избра́в сам себе́,/ и прине́сл еси́ бде́ние всено́щное,/ и умиле́ние стяжа́в, поуче́ние Боже́ственно,/ коне́чное смире́ние, наде́жду, ве́ру, любо́вь нерастворе́ну,/ трезве́ние и милосе́рдие,/ и́стинное безстра́стие, моли́тву,/ столп тя показа́вше светови́днейший.
Глас 2:
По успе́нии твое́м, блаже́нне,/ учи́тельница быва́ет нам твоя́ ра́ка,/ при́сно бо излива́ющимися чудесы́ вопия́/ и возводя́ к трудо́м и по́двигом, глаго́ля:/ возлюби́те Го́спода, да обря́щете благода́ть ве́чную,/ ничто́же па́че Его́ почти́те,/ да, егда́ прии́дет, и обря́щете поко́й со избра́нными./ Его́же да и мы улучи́м твои́ми моли́твами.
Глас 4:
Житие́ нескве́рно,/ терпе́ние, и кро́тость, и любо́вь нелицеме́рну,/ воздержа́ние, и стоя́ние всено́щное,/ и умиле́ние Боже́ственное, ве́ру и наде́жду и́стинную/ и ми́лование, о́тче, стяжа́в,/ я́ко А́нгел, пожи́л еси́ на земли́ с пло́тию,/ Кири́лле блаже́нне,/ моли́твенниче о душа́х на́ших.
Земны́й А́нгеле, Небе́сный челове́че был еси́, преподо́бне,/ исто́чник умиле́ния и ми́лования,/ струя́ пучи́ны, гре́шником пору́чник,/ ма́слина вои́стинну Бо́жия плодови́та и трудо́в твои́х,/ уте́ши ли́ца, Кири́лле чу́дне,/ ве́рно восхваля́ющим тя.
Сла́ва, глас 6:
Преподо́бне о́тче Кири́лле,/ явле́нием Бо́жия Ма́тере наставля́емь/ и того́ сия́нием озаряемь,/ и пусты́ню, на ню́же зван бысть, дости́гл еси́/ и, в ней трудолю́бно подвиза́вся,/ вшел еси́ в незаходи́мый свет ра́зума,/ иде́же мно́гих Го́сподеви ревни́телей твоему́ житию́ устро́ил еси́./ Те́мже и по сме́рти от Бо́га дарова́ния прия́л еси́,/ бе́сы прогони́ти и исцеле́ния разли́чных неду́гов челове́ком дарова́ти,/ ве́рою от души́ притека́ющим ко хра́му твоему́ всечестно́му./ Моли́ спасти́ почита́ющих любо́вию святу́ю па́мять твою́.
И ны́не, Богоро́дичен: Творе́ц и Изба́витель:
На стихо́вне стихи́ры, глас 1.
Подо́бен: Прехва́льнии:
О́тче преподо́бне Кири́лле,/ твоя́ кра́сная память – по́стником собра́ние и весе́лие,/ чуде́с бо благода́тию просла́вился еси́ от Бо́га,/ Его́же моли́ дарова́ти душа́м на́шим/ мир и ве́лию ми́лость.
Стих: Честна́ пред Го́сподем/ смерть преподо́бных Его́.
О́тче Кири́лле преподо́бне,/ твоего́ уста́ва по́стнаго проти́внии убоя́шася/ и про́кляти бы́ша/ твои́ми непреста́нными моли́твами, всехва́льне,/ и́бо сожи́тельствующа Бо́га стяжа́в в себе́./ Его́же моли́ дарова́ти душа́м на́шим/ мир и ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
О́тче преподо́бне Кири́лле,/ Христа́ возлюби́в вся́ко/ и Того́ Боже́ственным стопа́м после́довал еси́,/ крест на ра́мо взем, неосла́бно ше́ствовал еси́,/ и живе́ши, Богоно́се, ду́хом./ И ны́не моли́ даровати душа́м на́шим/ мир и ве́лию ми́лость.
Сла́ва, глас 6:
Тезоимени́то зва́ние Пречи́стыя я́ко услы́шав,/ по́стническими труды́ себе́ обложи́в,/ ми́рови и страсте́м себе́ умертви́в,/ и со Христо́м изво́лил еси́ жи́ти;/ тем и по сме́рти исцеле́ния источа́ет гроб твой,/ преподо́бне Кири́лле, ве́рою притека́ющим./ Но, я́ко име́я дерзнове́ние к прославля́емому во святы́х Христу́,/ моли́ся о и́же ве́рою соверша́ющих па́мять твою́,/ и чту́щих труды́ твоя́, я́же за Него́ претерпе́л еси́,/ и нам улучи́ти дерзнове́ние в день суда́, мо́лимся.
И ны́не: Богоро́дице, Ты еси́ Лоза́ и́стинная:
Тропа́рь, глас 8:
Бо́жиим Ду́хом подвиза́емь,/ слез твои́х ту́чами изсо́хшее напои́л еси́,/ и безпло́тное в пусты́ни житие́ показа́л еси́,/ и е́же из глубины́ се́рдца бо́дренными моли́твами и посто́м/ благодея́ния труды́ уплодоноси́л еси́,/ и вселе́нную всю просвети́л еси́ сия́нием чуде́с твои́х,/ о́тче наш Кири́лле./ Моли́ Христа́ Бо́га, спасти́ся душа́м на́шим.
Сла́ва, и ны́не, Богоро́дичен: И́же нас ра́ди:
НА У́ТРЕНИ
По 1-й кафи́зме седа́лен, глас 3.
Подо́бен: Красоте́ де́вства:
Я́ко безпло́тен, о́тче, пожи́л еси́ на земли́,/ превознося́щагося врага́ смири́л еси́./ Те́мже ны́не с невеще́ственными ли́ки, блаже́нне, водворя́яся,/ та́мо блаже́нства наслажда́яся,/ помина́й па́мять твою́ днесь пра́зднующих,/ да вси ра́достными пе́сньми воспева́ем Христа́ Бо́га на́шего,/ такову́ю тебе́ благода́ть да́вшаго.
Сла́ва, и ны́не, Богоро́дичен:
Боже́ственная ски́ния была́ еси́ Сло́ва, Еди́на Пречи́стая Ма́ти Де́во,/ чистото́ю А́нгелы превозше́дшая, па́че всех мене́, персть бы́вша,/ оскверне́на плотски́ми прегреше́ньми, очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
По 2-й кафи́зме седа́лен, глас 8.
Подо́бен: Повеле́нное та́йно:
Страсте́й тьму моли́твами твои́ми, о́тче, отгна́л еси́,/ се́рдце твое́ в чу́вствии чи́сто Бо́гу предста́вив./ Те́мже в тя всели́ся благода́ть Ду́ха Пресвята́го,/ е́же ве́дети бу́дущая, я́ко близ су́щая ты проявля́я,/ и проси́вшим у тебе́ с ве́рою непло́дствия соуз разреши́л еси́./ Те́мже и мы мо́лимся:/ проси́ нам от Христа́ ми́ра и ве́лия ми́лости.
Сла́ва, и ны́не, Богоро́дичен:
От крове́й Твои́х, Чи́стая, воплоще́ннаго Бо́га ро́ждшая,/ измене́на мя при́сно греха́ми, и прило́ги лука́ваго, Богоблагода́тная,/ утверди́ се́рдце мое́, Блага́я, Твои́ми моли́твами,/ я́ко да и аз благода́рственно зову́ Ти:/ Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная.
По полиеле́и седа́лен, глас 8.
Подо́бен: Прему́дрости:
В пусты́ню, преблаже́нне, всели́вся,/ и в ней пречестны́й храм Бо́жия Ма́тере воздви́гл еси́/ и мно́жество и́ночествующих тамо собра́л еси́ Го́сподеви и с тобо́ю рабо́тающих,/ и́хже сохрани́ от вся́каго вре́да лука́ваго,/ да вси благода́рственно вопие́м ти:/ преблаже́нне Кири́лле, моли́ Христа́ Бо́га/ грехо́в оставле́ние дарова́ти чту́щим лю́бовию святу́ю па́мять твою́.
Сла́ва, и ны́не, Богоро́дичен:
Я́ко Де́ву и Еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род,/ досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.
Степе́нна, 1-й антифо́н 4-го гла́са. Проки́мен: Честна́ пред Госпо́дем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Ева́нгелие от Матфе́я, зача́ло 43. По 50-м псалме́ стихи́ра, глас 6, пи́сана на стихо́вне, Сла́ва.
Кано́н Богоро́дице со ирмосо́м на 6 и свято́му два кано́на, на 8, глас 2.
Песнь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися.
Слуга́ Бо́жий быв, о́тче Кири́лле,/ сохрани́л еси́ я́ко свяще́нник спаси́тельная повеле́ния,/ мирско́е смуще́ние оста́вил еси́ и, крест свой взем,/ живоно́сным стопа́м, всеблаже́нне, после́довал еси́.
Спасе́нию Хода́тая све́дый, ра́зум Богодохнове́нный/ и все Писа́ние благоче́стно проше́л еси́, о́тче преподо́бне Кири́лле,/ свяще́нства отону́ду прие́м сано́вное.
От ю́ности твоея́, о́тче, ум к Бо́гу впери́в,/ тле́нными нетле́нная, я́ко до́брый купе́ц, искупи́л еси́./ Те́мже, ны́не соше́дшеся, па́мять твою́ почита́ем.
Богоро́дичен: Возсия́в, я́ко со́лнце, из Тебе́, Ма́ти Присноде́во,/ И́же от Отца́ пре́жде век неви́димый, Имже пресла́вно те́лом опису́емь,/ благоче́стия заре́ю челове́ки просвети́л есть.
Други́й кано́н, глас 2.
Песнь 1
Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.
Песносло́вити достохва́льную па́мять твою́ усе́рдно, преподо́бне,/ благода́ть дана́ ти, Кири́лле./ Моли́ о нас и о всех, согреши́вших, о оставле́нии.
И́ноческий свой крест взем, преподо́бне, после́довал еси́ Христу́ Вседержи́телю/ и, умертви́в плоть, жи́зни ве́чныя сподо́бился еси́, преподо́бне.
Зако́ну Бо́жию повину́яся, досточу́дне,/ страстна́я взыгра́ния увяди́л еси́ воздержа́ния по́двигом/ и безстра́стия благода́тию обогати́лся еси́.
Богоро́дичен: И́же Тебе́ ра́ди нетле́нием обога́щшеся, Богороди́тельнице Пречи́стая,/ ра́дуйся, Обра́дованная, вопие́м Ти,/ преподо́бных и пра́ведных украше́ние.
Песнь 3
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой внегда́ пе́ти:/ несть Свят, я́коже Бог наш,/ и несть пра́веден, па́че Тебе́, Го́споди.
От нас ны́не сло́во похвале́ния плето́мо прие́мля, Богоно́се,/ весели́ся, твои́ми боле́зньми наслажда́яся, зовы́й, преподо́бне:/ Ты еси́ Бог наш.
Словеса́ услы́шав Влады́чня, оста́вил еси́ мир и я́же в не́м,/ приве́л еси́ се́мя твое́ Го́сподеви, зовы́й:/ Ты еси́ Бог наш.
Ра́йскую жизнь и та́мо святы́х весе́лие всегда́ во уме́ твое́м помина́я, преподо́бне,/ те́мже и во слеза́х, и в воздыха́ниих всю свою́ жизнь, о́тче Кири́лле, проше́л еси́/ и сего́ ра́ди и по сме́рти от Христа́ чудесы́ просла́вился еси́.
Богоро́дичен: Ты Еди́на па́че всех, я́же от ве́ка вели́ких, сподо́билася еси́ и вы́ше естества́,/ Бо́га бо, Невмести́маго все́ю тварию, во утро́бе Твое́й понесла́ и воплоти́ла еси́./ Тем Тя, Богоро́дицу, вси велича́ем.
Ин
Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.
Вод живо́тных испо́лнится Боже́ственнаго Ду́ха, Богоно́се,/ душа́ твоя́ ре́ки чуде́с то́чит,/ неду́жным исцеле́ние подая́.
К широте́ рáйстей всели́лся еси́, всеблаже́нне Кири́лле,/ те́сную ше́ствовав стезю́,/ и бесо́в кова́рствия, и ше́ствия безчи́сленная утесни́л еси́.
Тече́нием твои́х слез напая́емь, я́ко дре́во плодоно́сно, Кири́лле,/ благопло́дне поле́зныя прине́сл еси́ доброде́тели,/ чуде́с Боже́ственную благода́ть прие́мь.
Богоро́дичен: Еди́н Благи́й про́йде утро́бу, воплоща́емь,/ и Челове́к ви́ден бысть соверше́н,/ Его́же моли́ спасти́ пою́щия Тя.
Седа́лен, глас 1:
Мона́шествовав Богоуго́дне и доброде́тельно пожи́в,/ благода́ть исцеле́ния прия́л еси́, блаже́нне Кири́лле, зна́мения соверши́в стра́шна;/ оби́тель же совокупи́в свяще́нную,/ приве́л еси́ мно́жество спаса́емых Го́сподеви, пребога́те./ Сла́ва Бо́гу, просвети́вшему тя,/ сла́ва венча́вшему тя,/ сла́ва святу́ю твою́ па́мять просла́вльшему.
Сла́ва, и ны́не, Богоро́дичен:
Ру́це Твои́ Боже́ственнеи,/ и́маже Созда́теля понесла́ еси́, Де́во Пречи́стая,/ вопло́щшагося благосты́нею, просте́рши,/ умоли́ Его́ изба́вити нас от искуше́ний, и страсте́й, и бед,/ хва́лящих тя любо́вию и вопию́щих:/ сла́ва все́льшемуся в Тя,/ сла́ва проше́дшему из Тебе́,/ сла́ва изба́вльшему нас Рождество́м Твои́м.
Песнь 4
Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Отве́рзл еси́, Кири́лле, две́ри своя́, Авраа́му уподо́блься, всем тре́бующим, преподо́бне Кири́лле,/ тем Христо́с отверза́ет ти Небе́сная врата́, преблаже́нне.
Во всечестны́й и во свяще́ннический сан украси́лся еси́, Кири́лле блаже́нне,/ и и́ноческому три́знищу, ра́дуяся, прите́кл еси́,/ всем до́мом, преблаже́нне, приводи́м.
Посто́м и моли́твами те́ло твое́, о́тче Кири́лле, изнури́л еси́/ и сего́ ра́ди сподо́бился еси́ ви́дети неизрече́нная блага́я, я́же святы́м угото́ванная,/ с ни́миже, о́тче Кири́лле, о нас моли́.
Богоро́дичен: Исцеля́я Е́вино дре́внее преступле́ние, в Тебе́, Пренепоро́чную и Пречи́стую, всели́ся/ и всего́ мя, челове́ка, вообрази́в па́дшаго,/ Пребоже́ственный.
Ин
Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.
Распе́н себе́ самаго́ страсте́м и ми́рови, Богому́дре о́тче,/ на Кресте́ распросте́ршу дла́ни Христу́ угоди́л еси́, Кири́лле:/ Его́же моли́ спасти́ ду́ши на́ша.
По́двигом страда́ния плотски́я умертви́л еси́ у́ды,/ ме́ртвыя же моли́твою возста́вил еси́,/ и приходя́щия усе́рдно ве́рою чу́дно оправда́л еси́,/ и всяк неду́г, о́тче, исцели́л еси́.
Ду́ха Свята́го присво́ил еси́ твое́й души́ и́скренно,/ И́мже па́стырь избра́н показа́лся еси́, о́тче Богомудре,/ и и́нокующим украше́ние прекра́сное.
Богоро́дичен: Я́ко дождь на руно́, Чи́стая,/ в честно́е чре́во Твое́ Сло́во сни́де воплоща́емо,/ и погуби́ многобо́жия одожде́нием, Всенепоро́чная,/ и го́рькую зи́му разори́л есть.
Песнь 5
Ирмо́с: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.
Христокра́сному одержа́лся еси́ житию́, Кири́лле блаже́нне,/ всем че́стен яви́вся./ Весть бо вои́стинну доброде́тель, сла́вне, соверша́ти сию́ иму́щих,/ яви́л бо ся еси́ свяще́нник Христо́в достоприя́тен.
Си́лою Боже́ственною укрепля́емь, блаже́нне Кири́лле, мирску́ю любо́вь кре́пко отве́ргл еси́,/ и Влады́це, ра́дуяся, прише́л еси́ во́льным твои́м нра́вом,/ и сохрани́в ве́ру невреди́му, и вене́ц сла́вы, Богому́дре, прия́л еси́.
Дне́сь воспева́ема свяще́нная па́мять твоя́, преподо́бне Кири́лле,/ весели́т ученики́ твоя́/ и, честно́е твое́ успе́ние сла́вяще, глаго́лют:/ моли́твами твои́ми, о́тче, соблюди́ воспева́ющих тя.
Богоро́дичен: Еди́ну нам во двою́ существу́ ви́диму Ипоста́сь/ Еди́на Благослове́нная ражда́еши неизрече́нно, Бо́жие Сло́во, воплоти́вшееся за ми́лость неизрече́нную,/ Того́ моли́ сохрани́тися пою́щим Тя.
Ин
Ирмо́с: Све́та пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо, Тебе́, ино́го бо́га не зна́ем.
И́же в ми́лость Бо́га моля́, о́тче преподо́бне Кири́лле,/ напо́лнил еси́, я́коже Илия́ чва́нец, еле́я, сосу́д вели́к,/ от зря́щих удивля́емь ве́рно.
Яко чист душе́ю, ты, во изступле́нии быв,/ ви́дел еси́ всю зе́млю, я́ко под заре́ю сия́ющу,/ Еди́наго Бо́га почита́ющу, всеблаже́нне Кири́лле.
Чудоде́йствуя о Христе́,/ воде́ истещи́ моли́твою, преподо́бне Кири́лле, мо́лиши Подвигополо́жника,/ я́же, пребыва́ющи, пропове́дает чудеса́.
Богоро́дичен: Живы́й на Небесе́х восхоте́ всели́тися в ложесна́ Твоя́, Чи́стая,/ я́ко да нас хра́мы Тро́ице сотвори́т,/ Тя, Богоро́дицу, пропове́дающих.
Песнь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Жите́йских веще́й, о́тче Кири́лле, нестоя́щее све́дый,/ сие́ оста́вил еси́/ и к воздая́нию потща́ся Го́рняго жре́бия, пребога́те.
Благоче́стно и́нок мно́жество пита́ти не оста́вил еси́, о́тче блаже́нне Кири́лле,/ тем пи́щи бо́льшия во оби́телех Небе́сных сподо́бился еси́.
Ме́сто, е́же сподо́бися прия́ти честны́я мо́щи твоя́, преподо́бне, освяти́ся/ и по мно́гим стра́нам прославля́емо есть,/ я́ко в себе́ мо́щи твоя́ име́ет.
Богоро́дичен: Неискусому́жная Пречи́стая, родила́ еси́ и пребыва́еши Де́вою,/ явля́ющи Божества́ и́стиннаго Сы́на и Бо́га Твоего́ о́бразы.
Ин
Ирмо́с: Во глубине́ грехо́вней содержи́мь есть, Спа́се,/ и в пучи́не жите́йстей обурева́емь,/ но, я́коже Ио́ну от зве́ря,/ и мене́ от страсте́й возведи́ и спаси́ мя.
Светосия́нии просвеща́емь Свята́го Ду́ха, чудотво́рче Кири́лле,/ и́нокующим свети́льник све́тел яви́лся еси́.
Я́ко пресла́вно житие́ твое́,/ и́мже ста́до и́нок приве́л еси́ к ра́зуму спаси́тельному.
Жи́тель быв Ца́рства Небе́снаго, богому́дре Кири́лле,/ сего́ улучи́ти моли́ ве́рою тя при́сно ублажа́ющим.
Богоро́дичен: Из утро́бы Твоея́, Чи́стая,/ возсия́в пра́вды Невече́рнее Со́лнце и ве́рных просвети́,/ Богоро́дице, Де́во Всепе́тая.
Конда́к, глас 8:
Взбра́нному и кре́пкому адама́нту,/ прогони́телю бесо́в, но́вому чудотво́рцу/ победи́тельная, страсте́й злых свободи́вшеся,/ благода́рственная воспису́ем ти, о́тче наш Кири́лле./ Но я́ко име́я дерзнове́ние у престо́ла Христо́ва,/ ве́рою чту́щих тя, град же и лю́ди, моли́твою твое́ю сохраня́й,/ ты бо еси́ ста́ду твоему́ похвала́ и утвержде́ние.
И́кос:
Услы́шав Христо́в глаго́л и оста́вив плотска́я мудрова́ния,/ бога́тство и сла́ву, я́ко прах, вмени́в/ и на стра́сти, я́ко безпло́тен, подвиза́вся,/ и безпло́тных ликостоя́нию чистото́ю уподо́бися,/ ра́зума дарова́ния прия́л еси́./ Тем в песнех си́це ти вопие́м, реку́ще:/ ра́дуйся, Кири́лле преподо́бне и Богоно́се, Небе́сный челове́че, земны́й А́нгеле./ Ра́дуйся, кроме́ ми́ра су́етнаго пусты́ню соде́лавый в Кра́снем о́строве/ и в не́м оби́тель соста́вив./ Ра́дуйся, я́ко в ней и́нок мно́жество собра́л еси́ и от них слы́шиши си́це реку́щих:/ ра́дуйся, и́нокующим о спасе́нии хода́тай./ Ра́дуйся, уныва́ющим о́браз утеше́ния./ Ра́дуйся, и́ноком от наве́т вра́жиих изба́вителю./ Ра́дуйся, ско́рбем губи́телю на́шего естества́,/ я́ко отгоня́я по́мыслы зло́бныя./ Ра́дуйся, скорбя́щим душе́ю сла́дкое утеше́ние и ра́дости Боже́ственныя пода́телю./ Ра́дуйся, наш предста́телю и изба́вителю./ Ра́дуйся, преподо́бне о́тче Кири́лле, и́ноком удобре́ние.
Песнь 7
Ирмо́с: Богопроти́вное веле́ние/ беззако́ннующаго мучи́теля высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.
Избра́нием суда́ украси́лся еси́, свяще́нник быв, Кири́лле, о́тче преподо́бне./ Тем вшел еси́ внутрь вы́шняго хра́ма незаходи́мыя зари́,/ своего́ священнотворе́ния плодо́в наслажда́яся, поя́:/ благослове́н Бог оте́ц на́ших.
Оте́ческая возлюби́л еси́ ликостоя́ния, и в ли́цех оте́ц ра́достно просла́вился/ и, Христу́ предстоя́, всеблаже́нне преподо́бне Кири́лле,/ прие́млеши своего́ служе́ния всего́ воздая́ния, воспева́я:/ благослове́н Бог оте́ц на́ших.
Источа́ет чудеса́ честна́я ра́ка твоя́, преподо́бне, преизоби́лующи благода́тию,/ и ве́рою приходя́щим здра́вие подае́т,/ Христу́ от души́ вопию́щим:/ благослове́н Бог оте́ц на́ших.
Богоро́дичен: Из утро́бы Ты, Де́во, Пра́вды Со́лнце породи́ла еси́, Христа́,/ дебельство́м пло́ти приобщи́вшася челове́ком, и Де́вою пребыла́ еси́,/ Тем воспева́ем:/ благослове́н, Пречи́стая, плод Твоего́ чре́ва.
Ин
Ирмо́с: Вети́и яви́шася о́троцы/ любому́дрейшии дре́вле,/ от Богоприя́тныя бо души́ Богосло́вяще устна́ми, поя́ху:/ Пребоже́ственный отце́в и наш Бо́же, благослове́н еси́.
Ме́ртвость живоно́сную стяжа́в сласте́й отложе́нием,/ те́мже больны́я исцеля́ти сподо́бился еси́, Кири́лле,/ Пребоже́ственный отце́в, вопия́, Бо́же, благослове́н еси́.
Непщева́вше умори́ти без ума́ чародея́ньми, о́тче, лука́выми/ тебе́, блюдо́маго Боже́ственною всех Зижди́теля дла́нию,/ несмы́сленно постыде́вшеся, обличе́ни бы́ша су́щим в тебе́ проразуме́нием.
Богоро́дичен: Исцели́ души́ моея́ стра́сти, безстра́стия исто́чник ро́ждшая несказа́нно,/ и умиле́ния ту́чу пода́ждь ми, хода́тайствуя мне утеше́ния,/ свята́я Богоро́дице.
Песнь 8
Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́, я́ко Го́спода,/ и превозноси́те во вся ве́ки.
Соверше́нною чистото́ю, и любо́вию Христа́ возжеле́л еси́, священнотаи́нниче о́тче,/ непреста́нными гла́сы вопия́:/ по́йте Го́спода, вся дела́, и превозноси́те Его́ во ве́ки.
Мирску́ю красоту́ оста́вив во́лею, Христу́, блаже́нне, прише́л еси́,/ благоле́пия Того́ жела́я зре́ти, и во оби́тели святы́я всели́лся еси́,/ по́йте Го́спода, вопи́я, вся дела́, и превозноси́те Его́ во ве́ки.
Ны́не пусты́ня весе́лием, о́тче, красу́ется,/ име́я мо́щи твоя́, Кири́лле преподо́бне;/ ученицы́ же, твоему́ житию ревну́юще/ и о твое́й па́мяти ра́дующеся, Творцу́ вопиют:/ Го́спода воспева́йте, дела́, и превозноси́те Его́ во ве́ки.
Богоро́дичен: Свяще́нными Тя гла́сы Бо́жии проро́цы, Чи́стая, быва́ющу Ма́терь провозгласи́ша я́сно все́ми владе́ющаго, Пречи́стая,/ Его́же превозно́сим Го́спода во ве́ки.
Ин
Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Над страстьми́ тлетво́рными ца́рствовав о Христе́, богому́дре о́тче,/ в Ца́рствии Небе́снем сподоби́лся еси́ жи́ти со все́ми святы́ми,/ до́бре пожи́в и Всеви́дца Бо́га возлюби́в.
Твоя́ святы́я моли́твы прие́мля, Бог/ су́щим во оскуде́нии с тобо́ю подава́ше я́же к животу́ вы́ну,/ вельми́ на земли́ прославля́я тя, чудоде́йственный Кири́лле всеблаже́нне.
Укра́шся добро́тами Боже́ственными, ко кра́сным черто́гом преста́вился еси́,/ с Бо́гом, о́тче, пребыва́я,/ и Сего́ Боже́ственныя красоты́ в непроходи́мыя ве́ки наслажда́ешися.
Богоро́дичен: Живы́й исто́чник, я́ко во́ду жи́зни поро́ждши,/ ду́шу мою́, иста́явшую грехо́вным пла́менем, Богоро́дице Де́во, напо́й,/ да Тя сла́влю во ве́ки.
Песнь 9
Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.
Ду́хом, о́тче, обнища́в,/ Небе́сное Ца́рство восприя́л еси́ со все́ми избра́нными, сла́вы неизрече́нныя исполня́емь,/ боле́зней по́честь прие́мля, блаже́нне Кири́лле, воздая́ния,/ сего́ ра́ди тя ве́рою и любо́вию ублажа́ем.
Моще́й твои́х ра́ка ве́рно приступа́ющим источа́ет исцеле́ний ре́ки,/ стра́сти душ потопля́ющи и теле́с боле́зни отъе́млющи, блаже́нне Кири́лле,/ моли́твенниче ве́рою при́сно блажа́щих тя.
Совокупля́яся с преподо́бными све́тлыми ста́ды,/ сия́нием невече́рним мы́сленно, о́тче Кири́лле, озаря́емь,/ Боже́ственную твою́ па́мять творя́щия просвети́ ве́рныя/ и улучи́ти спасе́ние моли́твами твои́ми сподо́би.
Богоро́дичен: Облиста́еши всех чуде́с заря́ми Твои́ми, Богоблагода́тная Чи́стая,/ страсте́й и скорбе́й отъе́млющи мглу и свет весе́лия мы́сленный простира́ющи./ Ма́терь Бо́гу, Тя велича́ем.
Ин
Ирмо́с: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.
Ми́лостивно вмести́лся еси́, о́тче, вся́ческих Благоде́телю,/ незло́бия добро́тою украша́емь и кро́тостию и красото́ю доброде́телей сия́я,/ те́мже тя вси ублажа́ем.
Песнь Бо́гу возсыла́ти с безпло́тными сподо́бися,/ я́ко соблю́д о́нех жития́ чистоту́,/ терпе́нием сла́ву восприя́л еси́.
Приими́ от нас, Богоно́се, приноси́мое ти моле́ние от чи́ста се́рдца/ и возда́ждь мольба́ми твои́ми согреше́ний оставле́ние/ и спасе́ние, всече́стне.
Богоро́дичен: Я́ко ко́рень су́щим вои́стинну, нетле́нная Де́во,/ вси ве́рнии, наде́ющеся, хвала́ми почита́ем.
Свети́лен.
Подо́бен: Не́бо звезда́ми:
Ангельскаго жития́ жела́я, удали́лся еси́, Кири́лле, в пусты́ню/ и стра́сти плотски́я покори́л еси́, равноа́нгелен яви́лся еси́,/ о́тче наш Кири́лле Богоно́се.
Сла́ва, и ны́не, Богоро́дичен:
Держа́ва на́ша, Чи́стая,/ Твоя́ рабы́ сохрани́ вся невре́дны,/ Тя бо стяжа́хом Еди́ну прибе́жище душа́м на́шим.
На хвали́тех стихи́ры, на 4, глас 8.
Подо́бен: О, пресла́внаго чудесе́:
Кири́лле многонаро́читый,/ мирско́е украше́ние оста́вль, му́дре,/ боле́зньми воздержа́ния кре́пкими/ стра́сти покори́л еси́ плотски́я, низложи́в/ и многоко́зненнаго победи́в врага́,/ вене́ц с пра́ведными прия́л еси́./ Того́ моли́твами, Го́споди,/ всем нам пода́ждь/ мир и ве́лию ми́лость.
Свы́ше дарова́ний чуде́с/ от Бо́га сподо́бился еси́, блаже́нне Кири́лле,/ от приходя́щих с ве́рою челове́к, бе́сы прогоня́я/ и разли́чныя неду́ги исцеля́я/ моли́твами твои́ми, преподо́бне./ Те́мже вси па́мять твою́,/ соше́дшеся, любо́вию почита́ем.
Воздержа́ние изря́дное, стоя́ние всено́щное,/ бде́нно о́ко, усмотря́ющо Боже́ственныя добро́ты, име́л еси́, блаже́нне Кири́лле,/ те́мже исцеле́ния благода́ть прия́т,/ стра́сти лю́тыя исцеля́ти./ Сего́ ра́ди тя мо́лим:/ испроси́, о́тче, всем ве́лию ми́лость.
Сла́ва, глас 2:
Пусты́ня, пре́жде бесо́вская жили́ща име́ющи,/ ны́не же, Кири́лле, учени́к твои́х мно́жеством испо́лнена, украша́ется,/ храм бо прече́стен Бо́жия Ма́тере в себе́ име́ющи,/ разли́чными добро́тами укра́шен./ Те́мже, в не́м соше́дшеся и честны́й гроб твой обстоя́ще,/ любе́зно покланя́емся и мо́лимся/ Це́ркви единомы́слие дарова́ти/ и правосла́вному во́инству на́шему на враги́ спосо́бствовати моли́твами твои́ми,/ и нам испроси́ мир, и душа́м на́шим ве́лию ми́лость.
И ны́не, Богоро́дичен.
Славосло́вие вели́кое и отпу́ст.
На Литурги́и слу́жба преподо́бническая.
