Служба преподобнаго отца нашего Кирилла, игумена Белоезерскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

О́тче блаже́нне Кири́лле,/ в моли́твах, и бде́ниих, и в воздержа́нии приле́жном/ те́ло с душе́ю Го́сподеви чи́сто предста́вил еси́/ и отту́ду жили́ще и дом Ду́ха Пресвята́го был еси́./ Те́мже, я́ко преподо́бным сожи́тель и пра́ведным,/ вене́ц от руки́ Госпо́дни досто́йно прия́л еси́./ Его́же моли́, Богому́дре,/ дарова́ти душа́м на́шим/ мир и ве́лию ми́лость.

И́же непра́ведно и разбо́йнически по́сланный/ тебе́ оскорби́ти, преподо́бне,/ ви́де Боже́ственную си́лу,/ того́ напра́сное суровство́ возбраня́ющу,/ отону́дуже позна́ свое́ безчелове́чное согреше́ние/ и к тебе́ притече́ покая́нием,/ ты же ми́лостивно его наказа́л еси́./ Богоблаже́нне, о нас моли́,/ дарова́ти душа́м на́шим/ мир и ве́лию ми́лость.

О́тче Кири́лле,/ и́же иногда́ челове́ка, вра́жия сове́та послу́шавша/ и огне́м па́кость хотя́ща тебе́ сотвори́ти,/ но по́мощь Бо́жию, с тобо́ю быва́ющую, позна́вша/ и к тебе́ прибе́гша покая́нием,/ любо́вию прия́л еси́ и, ми́лостивно наказа́в,/ твоему́ ста́ду о́наго сочта́л еси́./ Те́мже моли́ дарова́ти душа́м на́шим/ мир и ве́лию ми́лость.

Сла́ва, глас 6:

Преподо́бне о́тче,/ явле́нием Бо́жия Ма́тере наставля́емь/ и Тоя́ сия́ньми озаря́емь,/ пусты́ню, явле́нную тебе́ от Тоя́, дости́гл еси́/ и, в ней трудолю́бне подвиза́вся,/ вшел еси́ в незаходи́мый свет ра́зума,/ иде́же мно́ги ревни́тели житию́ твоему́ сотвори́л еси́./ Того́ ра́ди и по сме́рти дарова́ния прия́т бе́сы прогоня́ти,/ и исцеле́ния разли́чных неду́гов челове́ком да́руеши,/ ве́рою от души́ притека́ющим к хра́му твоему́ всечестно́му,/ и мо́лишися спасти́ почита́ющих любо́вию па́мять твою́.

И ны́не, Богоро́дичен, а́ще Пятдеся́тница, и ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Я́ко преходя́щую жизнь,/ я́же на земли́, преоби́дел еси́, блаже́нне,/ и та́мо Боже́ственныя улучи́ти сподо́бився,/ тоя́ сия́ние/ прия́л еси́, Богоно́сне.

Стих: Честна́ пред Го́сподем/ смерть преподо́бных Его́.

Христо́вы ра́ди любве́,/ преподо́бне Кири́лле,/ пло́ти рачи́тельное умертви́л еси́ мудрова́ние/ и ду́шу, свобо́дну от страсте́й,/ Бо́гу предста́вил еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Бо́дренными моли́твами/ и сле́зными исто́чники/ Це́ркви ве́рных/ обогати́л еси́,/ Богоблаже́нне.

Сла́ва, и ны́не, Богоро́дичен:

Вы́шнии Тя ли́цы,/ Богоро́дице Де́во,/ пою́т с ни́жними,/ сла́вяще непреста́нно/ Рождество́ Твое́ Пречи́стое.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Пое́м Блаже́н муж: Стихи́ры на 8. Глас 4.

Подо́бен: Зва́нный свы́ше:

Егда́ Пречи́стыя гла́сом/ по́зван быв Богома́тере,/ тогда́ вся су́щая, я́ко не су́щая, преоби́дел еси́/ и в пусты́ню да́льнюю всели́лся еси́, преподо́бне,/ иде́же и теле́сная мудрова́ния/ по́стническими труды́ духу повину́л еси́/ и, стада́ учени́к твои́х в той умно́жив,/ Христу́ приве́л еси́./ Того́ моли́, блаже́нне Кири́лле,/ спасти́ и просвети́ти ду́ши на́ша.

Егда́ Пречи́стыя глас/ услы́шал еси́, пребога́те,/ тогда́ стремле́ние плотско́е/ обузда́л еси́, преподо́бне о́тче,/ и, я́ко Илия́ дре́вле, ум очи́щ,/ в пусты́ню всели́лся еси́,/ и та́мо непреста́нными моли́твами/ к Бо́гу прибли́жился еси́,/ стопа́м вели́каго Анто́ния после́дуя./ Тем и по сме́рти чудесы́ сия́я,/ Христу́ моли́ся/ спасти́ и просвети́ти ду́ши на́ша.

Боже́ственный глас/ егда́ услы́шал еси́, блаже́нне Кири́лле,/ тогда́, крест твой взем,/ после́довал еси́ Христу́/ и, любо́вию к Нему́ распала́емь,/ кро́ток и смире́н се́рдцем был еси́./ Те́мже и кро́тких селе́ния насле́довал еси́/ и отту́ду источа́еши/ исто́чник исцеле́ний чту́щим тя./ Христу́, Ему́же рабо́тал еси́,/ Тому́ моли́ся/ спасти́ и просвети́ти ду́ши на́ша.

И́ны стихи́ры, глас 8.

Подо́бен: Что вы нарече́м:

Что тя нарече́м, Кири́лле?/ Реку́, духо́вных вод наполня́ему/ и напоя́ющу жа́ждущих непло́дствующая сердца́;/ исто́чника, источа́юща всегда́ исцеле́ния ве́рным;/ ча́шу, Боже́ственное вино́ иму́щу;/ свети́льника, оте́чество твое́ просвеща́юща./ Мно́га ти имена́/ и бо́льша дарова́ния,/ моли́ спасти́ся душа́м на́шим.

Что тя нареку́, Кири́лле пречу́дне?/ Ученика́, я́ко Госпо́день учени́к был еси́;/ учи́теля, я́ко мно́гих учени́к ко Христу́ приве́л еси́;/ пусты́ни жи́теля, я́ко ту град сотвори́л еси́;/ граждани́на, и́бо в Небе́сный град всели́лся еси́;/ кро́ткаго, я́ко Христа́, кро́ткаго Пастыренача́льника,/ кро́ткое овча́ был еси́./ Его́же моли́/ спасти́ся душа́м на́шим.

Что тя, чу́дне Кири́лле, имену́ем?/ Прему́драго, Христа́ бо ра́ди юро́дство творя́ был еси́;/ беззло́бива, я́ко незло́бив ко озло́бившим тебе́ был еси́;/ стра́нных прии́мника, я́ко Авраа́мле страннолю́бие стяжа́л еси́;/ Исаа́ка, я́ко сам себе́ же́ртву прине́сл еси́;/ чудоде́йственника, я́ко чуде́с дарова́ния от Бо́га прия́л еси́./ Мно́га именова́ния твоя́,/ бо́льша же даро́в прия́тия,/ моли́ спасти́ся душа́м на́шим.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во еже по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Кири́лле,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, Богоро́дичен, а́ще Пятдесятница, и ны́не, пра́здника. Вход. Проки́мен дне. Чте́ния 3.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовали бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 2:

В ти́хое и небу́рное приста́нище безмо́лвия/ вшел еси́, преподо́бне,/ и та́мо Влады́чицу Богоро́дицу сподо́бился еси́ ви́дети,/ и сла́дкий глас, я́ко Авраа́м, услы́шав,/ изы́ти отту́ду глаго́лющ/ и ити́ та́мо, иде́же ме́сто ти угото́вах,/ и па́ки послу́шав,/ Боже́ственных дарова́ний та́мо сподо́бился еси́/ бе́сы прогоня́ти и боля́щия исцеля́ти./ Те́мже мо́лимся и нас душе́вных страсте́й изба́вити,/ соверша́ющих любо́вию честно́е твое́ успе́ние.

Я́ко пресве́тлым венце́м пресла́вно/ от вседержи́тельныя десни́цы Вы́шняго венча́вся,/ Тому́, блаже́нне Кири́лле преподо́бне,/ со дерзнове́нием мно́гим предстоя́,/ приле́жно моли́ся о почита́ющих жизнь твою́/ и пречестно́е твое́ успе́ние ве́рно сла́вящих,/ вся́каго вре́да лука́ваго изба́витися/ свяще́нному ста́ду твоему́/ и душа́м на́шим низпосла́ти мир и ве́лию ми́лость.

Сла́ва, глас 8:

Исцеле́ния оби́льно честны́я мо́щи твоя́/ всегда́ источа́ют ве́рою приходя́щим,/ Богоно́се Кири́лле,/ благоуха́ния всех исполня́юще/ и тьму бесо́вскую дале́че отгоня́юще,/ све́том благоче́стия просвеща́юще ве́рных./ Те́мже мо́лим тя, раби́ твои́,/ вся́каго наве́та вра́жия нас изба́вите,/ я́ко да твой пресве́тлый пра́здник благоче́стно воспева́ем псало́мски/ и, сла́вное успе́ние днесь пе́сньми торжеству́юще,/ прославля́ем тебе́ та́ко просла́вльшаго,/ еди́наго во святы́х Бо́га на́шего.

И ны́не, Богоро́дичен, а́ще Пятдеся́тница, и ны́не, пра́здника.

На стихо́вне стихи́ры, глас 1.

Подо́бен: Небе́сных чино́в:

Блиста́нием Боже́ственнаго све́та,/ преподо́бне о́тче, при́сно озаря́емь,/ весь светови́ден был еси́./ Мно́гими укра́шен от Бо́га дарова́ньми,/ во оби́тели дости́гл еси́ Небе́сныя,/ в ни́хже мо́лишися о и́же ве́рою пою́щих тя.

Стих: Честна́ пред Го́сподем/ смерть преподо́бных Его́.

Водвори́лся еси́ в пусты́ню безмо́лвия, блаже́нне,/ и та́мо Небе́сное бога́тство стяжа́л еси́, преподо́бне Кири́лле,/ препроводи́в бо твое́ житие́ во умиле́нии и слеза́х./ Те́мже ра́дости и све́та сын был еси́,/ со А́нгелы всегда́ веселя́ся,/ моли́ о чту́щих тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ста́до, еже стяжа́л еси́ труды́ твои́ми, о́тче,/ не оста́ви, но посеща́й, преподо́бне,/ и, я́ко жив, с на́ми водворя́яся,/ та́ко и ны́не с преподо́бными Влады́це предстоя́,/ моли́ изба́витися всем вся́каго гне́ва и преще́ния/ и бу́дущаго гре́шным томле́ния.

Слава, глас 6:

Тезоимени́тое зва́ние Пречи́стыя я́ко услы́шав,/ по́стническими труды́ себе́ обложи́л еси́,/ ми́ру и страсте́м себе́ умертви́в,/ со Христо́м изво́лил еси́ жи́ти./ Тем и по сме́рти исцеле́ния источа́ет гроб твой,/ преподо́бне Кири́лле,/ ве́рою притека́ющим./ Но, я́ко име́я дерзнове́ние ко прославля́емому во святы́х Христу́,/ моли́ся о и́же ве́рою соверша́ющих па́мять твою́ честну́ю/ и чту́щих труды́ твоя́,/ я́же за Христа́ претерпе́л еси́,/ и нам улучи́ти дерзнове́ние в День Суда́, мо́лимся.

И ны́не, Богоро́дичен, а́ще Пятдеся́тница, и ны́не, пра́здника.

Тропа́рь, глас 1:

Я́ко крин, в пусты́ни дави́дски процве́л еси́, о́тче Кири́лле,/ злостра́стия те́рние искореня́я,/ и собра́л еси́ в ней учени́к мно́жество,/ стра́хом Бо́жиим и уче́нием твои́м наставля́емых,/ и́хже и до конца́, я́ко чадолюби́вый оте́ц,/ не оста́вил еси́, посеща́я, да вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Сла́ва, и ны́не, пра́здника или́ Богоро́дичен.

НА У́ТРЕНИ

На Бог Госпо́дь: тропа́рь, два́жды, и Богоро́дичен.

По 1-й стихоло́гии седа́лен, глас 3.

Подо́бен: Красоте́ де́вства:

Я́ко безпло́тен, о́тче, пожи́л еси́ на земли́/ и превознося́щагося врага́ смири́л еси́./ Те́мже, ны́не с Невеще́ственными ли́ки, блаже́нне, водворяя́ся,/ та́мо блаже́нства наслажда́ешися,/ помина́й па́мять твою́ днесь пра́зднующих,/ да вси ра́достными гла́сы воспева́ем Христа́ Бо́га на́шего,/ да́вшаго тебе́ благода́ть исцеле́ний.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва,/ еди́на Пречистая Ма́ти Де́во, чистото́ю А́нгелы превозше́дшая,/ па́че всех мене́, пе́рсть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По 2-й стихоло́гии седа́лен, глас 8.

Подо́бен: Повеле́нное:

Страсте́й тьму моли́твами твои́ми, о́тче, отгна́л еси́/ и се́рдце твое́ с чу́вствы чи́сто Бо́гу предста́вил еси́./ Сего́ ра́ди в тя всели́ся благода́ть Ду́ха Пресвята́го,/ е́же прови́дети бу́дущая и, я́ко близ су́щая, та проявля́ти,/ и проси́вшим у тебе́ с ве́рою непло́дствия соу́з разреши́л еси́./ Те́мже и нам, мо́лимся, проси́ от Христа́ ве́лию ми́лость.

Сла́ва, и ны́не, Богоро́дичен:

Я́же непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию, прило́гми льсти́ваго/ утверди́, Блага́я, моли́твами ма́терними Твои́ми,/ я́ко да и аз благода́рно сла́влю Тя, Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная.

По полиеле́и седа́лен, глас 8.

Подо́бен: Прему́дрости:

В пусты́ню, преблаже́нне, всели́лся еси́,/ и в ней прече́стен храм Бо́жия Ма́тере воздви́гл еси́,/ и мно́жество мона́шествующих та́мо собра́л еси́,/ Го́сподеви с тобо́ю рабо́тающих,/ и́хже сохраня́й от вся́каго прило́га лука́ваго, да вси благода́рственно вопие́м ти:/ преблаже́нне Кири́лле, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Тезоимени́тое зва́ние Пречи́стыя я́ко услы́шав,/ по́стническими труды́ себе́ обложи́л еси́,/ ми́ру и страсте́м себе́ умертви́в,/ со Христо́м изво́лил еси́ жи́ти./ Тем и по сме́рти исцеле́ния источа́ет гроб твой,/ преподо́бне Кири́лле,/ ве́рою притека́ющим./ Но, я́ко име́я дерзнове́ние ко прославля́емому во святы́х Христу́,/ моли́ся о и́же ве́рою соверша́ющих па́мять твою́ честну́ю/ и чту́щих труды́ твоя́,/ я́же за Христа́ претерпе́л еси́,/ и нам улучи́ти дерзнове́ние в День Суда́, мо́лимся.

Кано́н Богоро́дицы со ирмосо́м на 6. И свята́го два кано́на на 8. Кано́н свята́го Кири́лла. Творе́ние Пахо́мия, иеромона́ха Святы́я Горы́, его́же краегране́сие: Похвалу́ пою́ Кири́ллу, но́вому чудотво́рцу. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.

Прекра́сная лоза́ виногра́да Христо́ва был еси́, прему́дре Кири́лле,/ и грозд пресла́дкий яви́лся еси́,/ Боже́ственную сла́дость ве́рным источа́еши, блаже́нне,/ ку́пно же и ра́дование пою́щим тя.

О́тче Кири́лле, не терпя́, враг в нача́ле твоего́ жития́ бу́рю воздви́же,/ дре́вом напра́сно хотя́ умертви́ти тебе́,/ а́ще не бы Боже́ственный глас возгласи́л тя, Богому́дре.

Христа́, нас ра́ди смири́вшагося, подража́в/ и крест твой взем, преподо́бне, Того́ стопа́м после́довал еси́,/ вся́ко мирско́е пристра́стие от Тебе́ оттря́сл еси́, пребога́те.

Богоро́дичен: Во двою́ естеству́ Еди́н от Святы́я Тро́ицы,/ от чи́стых крове́й Твои́х воплоти́вся, боголе́пно про́йде,/ и́же от Ада́ма спаса́я, Пречи́стая, бла́гостию.

Други́й кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Я́ко вели́ко вои́стинну дерзнове́ние стяжа́в, преподо́бне, к Бо́гу,/ сбыти́ю зри́тель сподо́бился еси́ бы́ти/ и непло́дная ложесна́ многопло́дна моли́твами твои́ми показа́л еси́.

На воде́ поко́я и на зла́це воздержа́ния, о́тче,/ учени́к твои́х стада́ му́дре упа́сл еси́/ и, ны́не с на́ми неви́димо водворя́яся, моли́ о чту́щих па́мять твою́.

Ум твой к Бо́гу любо́вию впери́в,/ тле́нными нетле́нная искупи́л еси́./ Те́мже вся́ка душа́, спаса́ема тобо́ю, тя прославля́ет.

Богоро́дичен: Ма́нием вся Содержа́й/ из Тебе́ па́че сло́ва ражда́ется, Ма́ти Чи́стая,/ преподо́бныя венча́вый, ве́рно Тебе́ сла́вящия, Ма́терь Бо́жию.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

А́ще и в ми́ре су́щая, о́тче, преоби́дел еси́,/ но та́мо преми́рная и нетле́нная стяжа́л еси́,/ иде́же глас пра́зднующих и ра́йское наслажде́ние.

Льсти́вый враг хотя́ тебе́ па́кость сотвори́ти, преподо́бне,/ лука́выя челове́ки на тя вооружа́ет,/ тебе́ же прирази́вся, постыде́ся, Христу́ бо тя соблюда́ющу.

Уже́ пресла́вное твое́ житие́ всю́ду, преподо́бне, прославля́ется,/ и чудеса́ твоя́ в конце́х пропове́даются,/ те́мже, в па́мять твою́ соше́дшеся, почита́ем тя.

Богоро́дичен: Пло́ти бре́нней соедини́вся, И́же от Отца́ единоро́дный, в ложесна́х Твои́х,/ еди́н от двою́ про́йде без истле́ния/ и соблюде́ невреди́мо де́вство Твое́, Всепе́тая.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Волна́м, преподо́бне, и́менем Госпо́дним запрети́в и е́зеро укроти́в,/ лю́ди от потопле́ния спасл еси́ моли́твами твои́ми, Кири́лле блаже́нне.

Жела́нием, е́же к Бо́гу, и Того́ любо́вию па́че огня́ распала́емь, о́тче,/ целому́дренно в преподо́бии и пра́вде пожи́л еси́, преподо́бне Кири́лле.

Те́ло твое́ посто́м и моли́твами, о́тче, удручи́л еси́/ и сего́ ра́ди наслажда́ешися ве́чнаго блаже́нства,/ иде́же святы́х собо́ри и преподо́бных ли́цы веселя́тся.

Богоро́дичен: Боговиде́нием просвеща́емь,/ проро́к явле́нно зрит го́ру Бо́жию благослове́нную,/ земны́х украше́ние, еди́ну Всепе́тую.

Седа́лен, глас 4.

Подо́бен: Вознесы́йся:

Приспе́ пра́здник честна́го твоего́ успе́ния, блаже́нне Кири́лле,/ просвеща́я всех пра́зднующих па́мять твою́ све́тло/ и Христа́ непреста́нно пе́сньми всегда́ сла́вящих.

Сла́ва, и ны́не, пра́здника или́ Богоро́дичен:

И́же на престо́ле Херуви́мстем седя́й и в не́дрех О́тчих водворя́яся/ я́ко на престо́ле святе́м седи́т Свое́м, Влады́чице, в не́дрех Твои́х;/ вопло́щся бо Бог вои́стинну, воцари́ся над все́ми язы́ки,/ и разу́мно ны́не пои́м Ему́,/ Его́же умоли́ спасти́ся рабо́м Твои́м.

Песнь 4

Ирмо́с: Христо́с моя́ си́ла,/ Бог и Госпо́дь,/ Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

О́тче преподо́бне, сна твои́ма очи́ма не дал еси́, ни ве́ждома дрема́ния,/ до́ндеже сподо́бился еси́ ви́дети пра́ведных селе́ния,/ я́же угото́ва Бог лю́бящим Его́.

Уже́ не ктому́ врази́, ниже́ челове́цы лука́вии,/ мо́гут к тебе́ прибли́житися, Кири́лле преподо́бне:/ ви́деша бо благода́ть Бо́жию, тебе́ всегда́ соблюда́ющую.

Богоро́дичен: На Тя упова́ние мое́ возложи́х, Ма́ти Присноде́во, спасе́ния моего́/ и Тя Предста́тельницу име́ю живота́ моего́,/ тве́рду же и непоколеби́му.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Бо́дренными моли́твами, о́тче, и сле́зными пото́ки/ Це́рковь ве́рных напои́л еси́,/ блаже́нне Кири́лле.

Е́же на земли́ вре́менное житие́ твое́/ в безмо́лвии мно́зе пожи́л еси́, Христу́ поя́:/ сла́ва си́ле Твое́й, Го́споди.

От млада́го во́зраста в воздержа́нии, о́тче, пре́был еси́,/ плод мног доброде́тели Бо́гу, преподо́бне, прине́сл еси́/ и сего́ ра́ди от Не́го просла́вился еси́.

Богоро́дичен: Всели́вся в Тя Невмести́мый/ и, вмести́вся, показа́ Тя небе́с ши́ршу, Де́во,/ те́мже Тя ублажа́ем.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Изря́дно твое́ житие́ в после́дния ро́ды и пресла́вно яви́ся,/ чудеса́ же твоя́ всю́ду ве́рным излия́шася./ Те́мже тя вси, о́тче, ублажа́ем.

Ра́йския добро́ты жела́я, преподо́бне Кири́лле,/ и тоя́ ра́ди в слеза́х и воздыха́ниих, бде́ниих же и моли́твах твою́ жизнь препроводи́л еси́/ и отту́ду насле́дил еси́ жела́емое тебе́ блаже́нство.

Пресве́тлый твой пра́здник, о́тче, благоче́стно пра́зднующим/ подава́й свы́ше спасе́ние и избавле́ние,/ да тя вси, блаже́нне Кири́лле, непреста́нно воспева́ем.

Богоро́дичен: Лю́дем я́ко вои́стинну ти́хое приста́нище Христо́с Тебе́ яви́,/ ве́рою и любо́вию Тя, и́стинную Влады́чицу, Всенепоро́чная,/ от со́вести чи́сты Богоро́дицу испове́дающим.

Ин

Ирмо́с: Вску́ю мя отрину́л еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пу́ти моя́ напра́ви, молю́ся.

Пото́ки сле́зными, о́тче, страсте́й пучи́ну изсуши́л еси́,/ и в зе́млю обетова́ния преше́л еси́,/ и та́мо ра́йское житие́ прия́л еси́, е́же угото́ва Бог лю́бящим Его́.

Христа́, тобо́ю слепы́м да́рующая здра́вие, о́тче, моли́,/ и мне о́чи душе́вныя просвети́ти,/ до́ндеже не обря́щет мя негото́ва нощь глубо́кая/ и тьма отча́яния, молю́ся.

Богоро́дичен: Украси́лася еси́ де́вства пречи́стыми добро́тами/ и пе́рвый Е́вы покры́ла еси́ студ злообра́зный, Христа́ ро́ждши,/ одея́ние безсме́ртия да́рующаго Тебе́ чту́щим.

Песнь 6

Ирмо́с: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ страда́вшаго и погребе́нию да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,/ ми́лость сию́ оста́вили есте́.

Влады́ку ум поста́вил еси́ над страстьми́ теле́сными, блаже́нне,/ те́мже и Пресвята́го Ду́ха селе́ние, Богоно́се, был еси́./ Его́же моли́ и нас свободи́ти от страсте́й, да тя почита́ем.

Я́ко победи́в ве́ка сего́ кня́зя тьмы, возше́л еси́ к Небе́сным,/ побе́ды вене́ц нося́ от вседержи́тельныя руки́ Бо́га на́шего,/ моли́ от бед спасти́ся тебе́ почита́ющим.

Плотско́е мудрова́ние, е́же на земли́, о́тче, умертви́л еси́/ и на Небесе́х житие́ стяжа́л еси́,/ иде́же святы́х ду́си ра́дуются, пою́ще с тобо́ю Влады́ку твоего́.

Богоро́дичен: Пречи́стая Влады́чице, ро́ждшая челове́ком ко́рмчию и Го́спода,/ страсте́й мои́х непостоя́нное и лю́тое отжени́ смуще́ние/ и тишину́ пода́ждь се́рдцу моему́.

Ин

Ирмо́с: Очи́сти мя, Спа́се/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

В пусты́ни безмо́лвия водвори́лся еси́, преподо́бне,/ и отту́ду к Небе́сному гра́ду преше́л еси́, иде́же Бо́гу угоди́вших жили́ща,/ с ни́миже о нас, блаже́нне, моли́ся.

Чи́сто житие́ твое́ от ю́ности име́л еси́, блаже́нне,/ и того́ ра́ди Пречи́стыя Бо́жия Ма́тере изря́дный служи́тель был еси́,/ и прече́стен храм Той воздви́гл еси́, в не́мже Госпо́дь сла́вится.

От страсте́й тиме́ния чи́ста тя обре́т, всели́ся в тя Дух Пресвяты́й,/ тем и чуде́с дарова́ния тебе́ да́рует/ еди́н во святы́х прославля́емый Бог наш.

Богоро́дичен: Зачала́ еси́ вои́стинну Боже́ственное Сло́во во утро́бе Твое́й/ и Сие́ па́че естества́, Всенепоро́чная, родила́ еси́,/ Его́же моли́ от бед всем изба́витися, рабо́м Твои́м.

Конда́к, глас 8.

Подо́бен: Взбра́нной:

Яко преоби́дев тле́нная и до́лу влеку́щая мудрова́ния, о́тче,/ к Вы́шнему тече́нию ра́достно устреми́лся еси́,/ и та́мо со святы́ми Пресвяте́й Тро́ице предстоя́,/ моли́ от враг сохрани́тися ста́ду твоему́,/ я́ко да, свято́е твое́ успе́ние пра́зднующе, вопие́м:/ ра́дуйся, преблаже́нне Кири́лле, о́тче наш.

И́кос:

А́ще и челове́к, о́тче, был еси́ по естеству́,/ но па́че челове́ка житие́ соверши́л еси́:/ вся бо, я́же в ми́ре сла́дкая и кра́сная, преоби́дев, после́довал еси́ Христу́./ Те́мже и от всех слы́шиши:/ ра́дуйся, я́ко, Пречи́стою наставля́емь, пусты́ню дости́гл еси́./ Ра́дуйся, я́ко в той прече́стен храм Бо́жии Ма́тери воздви́гнувый;/ ра́дуйся, я́ко в нем Бог прославля́ется./ Ра́дуйся, собра́вый та́мо учени́к мно́жество;/ ра́дуйся, я́ко с те́ми приле́жно Го́сподеви рабо́тал еси́./ Ра́дуйся, удиви́вый А́нгелы житие́м твои́м;/ ра́дуйся, я́ко тобо́ю челове́цы по́льзовашася./ Ра́дуйся, и́же чудесы́ всех удиви́вый;/ ра́дуйся, преше́дый от земны́х на Небе́сная./ Ра́дуйся, я́ко, Тро́ице предстоя́, о нас мо́лишися;/ ра́дуйся, исто́чниче чуде́с неисчерпа́емый./ Ра́дуйся, ве́рных пле́нник изба́вителю;/ ра́дуйся, преблаже́нне Кири́лле, о́тче наш.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти/ благослове́н еси́, Бо́же оте́ц на́ших.

Очи́стив от страсте́й, преподо́бне о́тче, ум твой/ и Вседержи́телю с преподо́бных ли́ки и пра́ведных предстоя́, всегда́ вопие́ши:/ благослове́н Бог оте́ц на́ших.

Врач преизря́дный ми́ру яви́лся еси́, блаже́нне,/ исцеля́я всех, ве́рою притека́ющих ко хра́му твоему́ свято́му/ и Христу́ от души́ вопию́щих непреста́нно:/ благослове́н Бог отец на́ших.

Посто́м и воздержа́нием лице́ твое́ украси́л еси́, преподо́бне,/ светле́йши наипа́че яви́лся еси́ многоразли́чными бра́шны пита́ющихся./ Те́мже и Христу́ вопие́ши:/ благослове́н Бог оте́ц на́ших.

Богоро́дичен: Тя, Пресвята́я Ма́ти Присноде́во, позна́хом, земни́и, спасе́ние,/ и́бо в не́дрех Отца́ неразлу́чно живы́й из Тебе́ воплоща́ется./ Те́мже благослове́на еси́ в род и род.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

От мирска́го треволне́ния избе́г, преподо́бне,/ в ти́хое приста́нище дости́гл еси́ Небе́снаго пребыва́ния, вопия́:/ оте́ц на́ших Бо́же, благослове́н еси́.

В пусты́ню, я́коже дре́вний Анто́ний, всели́лся еси́/ и в ней вели́каго Ефре́ма слеза́ми и посто́м подража́л еси́, Христу́ поя́:/ благослове́н еси́, Го́споди Бо́же оте́ц на́ших.

Вся́кими, о́тче, о́бразы и́же с тобо́ю ученики́ направля́л еси́/ по стезя́м пра́вым путе́й твои́х ходи́ти и с тобо́ю Христу́ пе́ти:/ оте́ц на́ших Бо́же, благослове́н еси́.

Богоро́дичен: Го́ру Тя проро́к Дании́л Боже́ственным Ду́хом прорече́, Де́во,/ из нея́же ка́мень – Христо́с без руки́ отсече́ся/ и сокруше́ние соде́ла истука́нней пре́лести.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Гроб, иде́же положено́ бысть честно́е те́ло твое́, преподо́бне,/ освяти́ всех, к нему́ притека́ющих,/ исто́чник исцеле́ния источа́я от души́ Христу́ вопию́щим/ и превознося́щим Его́ во ве́ки.

Во вре́мя гла́да, раздробля́я, преподо́бне, ни́щим хлеб твой,/ тех а́лчбу уста́вил еси́,/ и мене́, та́ющего гла́дом, Боже́ственных дея́ний напита́й:/ да возмогу́ и аз со все́ми пе́ти Го́спода во вся ве́ки.

И́же с тобо́ю ученицы́ твои́, уче́нию твоему́ повину́ющеся, преподо́бне,/ земна́я оста́вльше, во след тебе́ к Небе́сным преидо́ша,/ и с тобо́ю пою́т Христу́, и превозно́сят Его́ во ве́ки.

Богоро́дичен: В рождестве́ боле́зни избежа́ла еси́, Пречи́стая,/ и, ро́ждши, па́ки Де́вою пребыла́ еси́:/ вся бо твори́т Иису́с, Бог и Челове́к,/ Его́же превозно́сим во ве́ки.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Бу́дущаго ра́ди жития́ на Небесе́х на земли́ ми́ру умертви́лся еси́, о́тче./ Сего́ ра́ди жив Бо́гу предстоя́, вопие́ши:/ Тя превозно́сим, Го́спода, во ве́ки.

Све́том Тройческим, о́тче, просвеща́емь,/ твою́ жизнь благоче́стно сконча́л еси́/ и по́стных собо́ры приве́л еси́ Христу́ вопи́ти:/ Тя превозно́сим, Го́спода, во ве́ки.

С Небе́сными во́инствы всегда́, преподо́бне, Тро́ицу несозда́нную,/ неразде́льное Божество́ славосло́виши, блаже́нне, и превозно́сиши во ве́ки.

Богоро́дичен: Во утро́бе Твое́й пе́рвейша Тебе́ заче́нши, Богома́ти, Чи́стая Де́во,/ родила́ еси́ несказа́нно Бо́га и Царя́,/ Его́же превозно́сим во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Жития́ сего́ непостоя́нную пучи́ну немяте́жно преше́л еси́, преподо́бне,/ ко́рмчию Ма́терь Бо́жию име́я, на сие́ наставля́ющую тя./ Те́мже и ко приста́нищем приста́л еси́ А́нгельскаго пребыва́ния.

Я́ко зре́лая и чисте́йшая пшени́ца, кроме́ всех зло́бных пле́вел,/ в Небе́сных жи́тницах соблю́лся еси́, преподо́бне,/ хлеб сла́дкий жела́я принести́ся Небе́сному Царю́,/ Его́же ра́ди вся в ми́ре преоби́дел еси́.

Вели́ким отце́м, дре́вле в посте́х и по́двизех просия́вшим, подо́бяся, о́тче,/ вся дни жи́зни твоея́ во слеза́х и труде́х препроводи́л еси́,/ до́ндеже дости́гл еси́ блаже́нную кончи́ну, ю́же и они́ насле́доваша.

Богоро́дичен: Сы́на Безле́тна, от Отца́ возсия́вша,/ Ты, во утро́бе несказа́нно заче́нши, родила́ еси́, Богома́ти Чи́стая Де́во,/ моли́ непреста́нно о рабе́х Твои́х Того, я́ко Человеколю́бца Бо́га,/ спасти́ род наш.

Ин

Ирмо́с: Чи́стую сла́вно почти́м,/ лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.

Потреби́ страстна́я двиза́ния ума́ моего́, Христе́, и ле́ность уны́ния отжени́,/ в пра́вый путь Твой ходи́ти наста́ви моли́твами уго́дника Твоего́ Кири́лла,/ да я́ко Благоде́теля велича́ю Тя.

Певце́м, тебе́ пою́щим, о́тче, и во хвале́нии сла́вящим,/ пода́ждь свы́ше спасе́ние и избавле́ние,/ да ктому́ тебе́ мно́жае в пе́снех велича́ют.

Руко́ю моею недосто́йною приноси́мое тебе́ с трудо́м от усе́рдия хвале́ние/ приими́, Богоблаже́нне Кири́лле, и хода́тай к Бо́гу бу́ди ми, молю́ся,/ изба́вити мя та́мошняго муче́ния,/ да непреста́нно в пе́снех велича́ю тя.

Богоро́дичен: В Тя всели́вся, Пренепоро́чная,/ пе́рвее родонача́льным злообра́зно запе́ншаго человекоуби́йцу низложи́, роди́вся,/ и всех нас спасе́.

Свети́лен.

Подо́бен: Посети́л ны:

Пречестну́ю и свяще́нную па́мять твою́ соверша́ющих, преподо́бне Кири́лле,/ и мно́гия труды́ твоя́ пою́щих,/ не преста́й, моля́ Изба́вителя от напа́стей избавля́ти нас/ и селе́нию святы́х сподо́бити.

Богоро́дичен:

Почита́ют Рождество́ Твое́ Безпло́тных чи́ни,/ ра́дости бо земны́я Ты еди́на испо́лнила еси́./ Те́мже Тя, Всенепоро́чная, ве́рнии, сла́вим, пе́сньми славосло́вяще:/ Свет бо су́щим во тьме возсия́ла еси́ и Со́лнце незаходя́щее.

На хвали́тех стихи́ры, на 4, глас 8.

Подо́бен: О, пресла́внаго чудесе́:

Свы́ше дарова́ния чуде́с/ от Бо́га сподо́бился еси́,/ блаже́нне Кири́лле:/ бе́сы от челове́к, ве́рою приходя́щих, прогони́ти/ и разли́чными неду́ги одержи́мыя/ исцеля́ти моли́твами твои́ми./ Те́мже вси, в па́мять твою́ соше́дшеся,/ любо́вию тебе́ почита́ем.

Свяще́нными твои́ми, о́тче, моли́твами/ хле́бы во вре́мя гла́да умно́жил еси́/ и а́лчущих мно́гих препита́л еси́./ Те́мже тя мо́лим, преподо́бне Кири́лле:/ и нас душе́внаго гла́да премени́/ и Боже́ственными бра́шны/ напита́й, мо́лимся,/ я́ко да любо́вию тя почита́ем.

Вина́ недоста́тки Бо́жией це́ркви,/ моли́твами твои́ми, о́тче,/ сосу́д испо́лнил еси́/ и на мно́га времена́/ довле́ти той дарова́л еси́./ Те́мже и нас, почита́ющих па́мять твою́,/ вино́м Бо́жия любве́ напо́й всех,/ да прославля́ем пречестно́е успе́ние твое́.

Сла́ва, глас 2:

Пусты́ня, я́же иногда́ бесо́м жили́ща иму́щи,/ ны́не же учени́к твои́х, Кири́лле,/ мно́жеством наполня́ема, украша́ется,/ храм в себе́ прече́стен Ма́тере Бо́жия иму́щи,/ разли́чными добро́тами удобре́н./ Те́мже, в нем днесь соше́дшеся,/ и честны́й гроб твой обстоя́ще,/ и любе́зно покланя́ющеся, мо́лимся:/ Це́рквам единомы́слие дарова́ти моли́ся,/ и оте́честву на́шему на враги́ посо́бствуй моли́твами твои́ми,/ и душа́м на́шим испроси́ мир и ве́лию ми́лость.

И ны́не, Богоро́дичен.

Славосло́вие вели́кое. И отпу́ст.

НА ЛИТУРГИ́И

Блаже́нны 1-го кано́на, песнь 3-я на 4, и 2-го кано́на, песнь 6-я на 4. Проки́мен: Честна́ пред Го́сподем: Стих: Что возда́м Го́сподеви: Апо́стол к Гала́том, зача́ло 213. Аллилуи́я, глас 6: Блаже́н муж, боя́йся Го́спода: Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник.