Служба преподобнаго отца нашего Исидора Пилусиотскаго

Аще несть поста́, быва́ет слу́жба пра́здника и свята́го Иси́дора. А́ще ли есть пост, то́чию свята́го.

На Го́споди, воззва́х: стихи́ры пра́здника 3 и свята́го 3.

Стихи́ры пра́здника, глас 4.

Подо́бен: Дал еси́ зна́мение:

Зако́н, и́же в Писа́нии,/ исполня́я, Человеколю́бец/ в це́рковь ны́не прино́сится,/ и Сего́ прие́млет ста́рыми рука́ми Симео́н ста́рец,–/ ны́не отпуща́еши мя,– вопия́,–/ ко о́ному блаже́нству,/ ви́дех бо Тя днесь, пло́тию ме́ртвенною обложе́наго,/ живото́м госпо́дствующа/ и сме́ртию влады́чествующа.

Свет во открове́ние язы́ков/ яви́лся еси́, Го́споди,/ на о́блаце седя́ ле́гце,/ Со́лнце Пра́вды,/ зако́на сено́вное исполня́я, Симео́н взыва́ше:/ из истле́ния мя разреши́,/ я́ко ви́дех Тя днесь.

Недр Роди́теля не отлу́чься Божество́м,/ вопло́щься, я́коже изво́лил еси́,/ объя́тиями де́ржим Присноде́вы,/ на ру́ки пода́лся еси́ Богоприи́мца Симео́на/ руко́ю Твое́ю держай вся́ческая,/ те́мже ны́не отпуща́еши мя,/ ра́достно взыва́ше,/ в ми́ре раба́ Твоего́,/ я́ко ви́дех Тя, Влады́ко.

И́ны стихи́ры свята́го, глас то́йже.

Подо́бен: Я́ко до́бля:

Виде́нии и дея́ньми к Бо́гу возвыша́яся,/ житие́, всему́дре, соверши́л еси́,/ ви́дения восхожде́ние дея́ние водрузи́в,/ и му́дре жела́емых возлюби́л еси́ после́днее,/ его́же быв жела́ния внутрь,/ удосто́ился еси́ блаже́ннаго ны́не конца́/ и трисо́лнечнаго сия́ния.

Наводне́нием благода́ти/ и одожде́ньми слове́с твои́х/ напоя́еши вся Богому́дрыя,/ к го́рнейшей му́дрости ча́ши уста́ твоя́ поло́жь,/ я́ко от исто́чника бога́тно ты поче́рпл еси́/ и разда́л еси́ всю́ду лучи́ уче́ний,/ посыла́я, и уча́, и наказу́я досточу́дне.

Воздержа́нием мудрова́ние пло́тское умертви́л еси́,/ в живоно́сную ме́ртвость одея́вся,/ и, душе́вное устрое́ние/ разшири́в, преподо́бне, я́ве,/ вмести́тельное дарова́ний Ду́ха соверши́л еси́,/ и прия́телище был еси́ Богодохнове́нных уче́ний/ и прему́дрости су́щия па́че ума́ пребыва́ние.

Сла́ва, и ны́не, пра́здника, глас 2.

Ге́рманово: Днесь Симео́н на ру́ки Го́спода сла́вы подъе́млет,/ Его́же под мра́ком пе́рвее Моисе́й ви́де,/ на го́ре Сина́йстей скрижа́ли даю́ща ему́./ Сей есть, И́же во проро́цех глаго́ляй и зако́на Творе́ц./ Сей есть, Его́же Дави́д возвеща́ет, И́же всем стра́шный,/ име́яй ве́лию и бога́тую ми́лость.

Аще есть пост, Сла́ва, и ны́не, Богоро́дичен. Аще ли среда́ или́ пято́к, Крестобогоро́дичен (пи́сан сего́ ме́сяца во 12 день).

На стихо́вне стихи́ры, глас 2.

Подо́бен: До́ме Евфра́фов:

Восприими́, о Симео́не,/ Го́спода сла́вы,/ я́коже извести́лся еси́/ от Ду́ха Свята́го:/ Се бо прии́де.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Нося́щи Чи́стая/ и Пречи́стая Де́ва/ Соде́теля и Влады́ку/ я́ко Младе́нца на рука́х,/ в це́рковь вхо́дит.

Стих: Свет во открове́ние язы́ков/ и сла́ву люде́й Твои́х Изра́иля.

Ве́лие и стра́шное та́инство,/ и стра́нное смотре́ния:/ И́же вся объе́мля/ и младе́нцы созида́яй,/ я́ко Младе́нец на рука́х но́сится.

Сла́ва, и ны́не, глас то́йже, самогла́сен:

Свяще́ннаго Свяще́нная Де́ва принесе́ во святи́лище святи́телю,/ просте́р же ру́це, Симео́н прия́т Сего́, ра́дуяся, и возопи́:/ ны́не отпуща́еши раба́ Твоего́, Владыко,/ по глаго́лу Твоему́, с ми́ром, Го́споди.

Тропа́рь, глас 8:

В тебе́, о́тче, изве́стно спасе́ся е́же по о́бразу:/ прии́м бо крест, после́довал еси́ Христу́/ и, де́я, учи́л еси́ презира́ти у́бо плоть, прехо́дит бо/ прилежа́ти же о души́, ве́щи безсме́ртней:/ те́мже и со А́нгелы сра́дуется, преподо́бне Иси́доре, дух твой.

Сла́ва, и ны́не, пра́здника, глас 1:

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с, Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,/ да́рующаго нам воскресе́ние.

НА У́ТРЕНИ

На Бог Госпо́дь: тропа́рь пра́здника, два́жды.

Сла́ва, свята́го. И ны́не, пра́здника.

По 1-й стихоло́гии седа́лен, глас 1.

Подо́бен: Лик А́нгельский:

Сы́й со Отце́м на Престо́ле святе́м, прише́д на зе́млю, от Де́вы роди́ся/ и Младе́нец бысть, ле́ты Сы́й неопи́сан,/ Его́же прии́м Симео́н на ру́ки, ра́дуяся, глагола́ше:/ ны́не отпуща́еши, Ще́дре, возвесели́в раба́ Твоего́.

Сла́ва, и ны́не, то́йже.

По 2-й стихоло́гии седа́лен, глас 4.

Подо́бен: Ско́ро предвари́:

Пло́тию младе́нствовавша от неискусому́жныя Ма́тере/ рука́ми ста́рыми твои́ми объя́л еси́, Симео́не, Христа́ Бо́га на́шего,/ прия́л еси́ исхо́да отве́т сла́вно,/ улучи́л еси́ чуде́с непреста́нную благода́ть,/ тем тя достодо́лжно вси сла́вим.

Сла́ва, и ны́не, то́йже.

Кано́н пра́здника, со ирмосо́м на 8 и ин кано́н свята́го на 4, его́же краегране́сие: Тя, мона́шествующих сла́ву, пою́, о́тче. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне сто́пами,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.

Сокруше́ннаго се́рдца стена́ние услы́шав, Влады́ко,/ души́ моея́ лю́тое сокруше́ние исцели́ моли́твами преподо́бнаго Твоего́, Христе́,/ я́ко Всеси́лен.

Вшед, ты, Богоно́се, в де́тельную доброде́тель, Иси́доре,/ виде́нием чи́стым и кра́сным явле́нием Бо́гу бесе́дуя всегда́,/ я́ве обогати́лся еси́.

Прему́дрости ча́ши прине́с твоя́ уста́, прему́дре,/ и́же отону́ду дарова́ний исто́чник поче́рпл еси́,/ Бо́гу побе́дную песнь воспева́я.

Богоро́дичен: Я́ко на ле́гцем о́блаце, Соде́тель на Тебе́ прии́де/ низложи́ти, я́ко Си́лен, еги́петская, Влады́чице Чи́стая, рукотворе́нная,/ Христо́с, я́ко Всеси́льный.

Ин. Песнь 3

Ирмо́с: Несть свят,/ я́ко же Ты, Го́споди, Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Ума́ остро́тою, му́дре, су́щих собра́в, пресла́вне, естество́,/ и́мже нача́льную вину́, я́ко чист Богосло́в,/ неле́стно пости́гл еси́.

Поуче́ние положи́в я́сно сме́рти житию́, Богоно́се треблаже́нне,/ страсте́й ве́щныя вины́ умертви́л еси́,/ безстра́стия объя́т быв жела́нием.

В след ра́дуяся Христа́, крест твой носи́в/ после́довал еси́, о́тче, в посте́ тве́рдем/ и Се́му, я́ко мо́щно, уподо́бился еси́ жития́ чистото́ю.

Богоро́дичен: Зако́нных естества́ кроме́ Влады́ку ро́ждши, Богоро́дице Де́во,/ дре́внюю преслуша́ния кля́тву разори́ла еси́,/ благослове́ния исто́чник источа́ющи.

Конда́к, глас 4.

Подо́бен: Яви́лся еси́:

Денни́цу другу́ю тя Це́рковь обре́тши, пресла́вне,/ твои́х слове́с мо́лниями освеща́ема,/ взыва́ет ти́:/ ра́дуйся, всеблаже́нне Богому́дре Иси́доре.

Седа́лен, глас 3.

Подо́бен: Боже́ственныя ве́ры:

Кни́га ра́зума уче́ния, бога́тством ве́ры сочинена́,/ Пресвято́му яви́лся еси́ Ду́ху,/ открыва́я Боже́ственная тре́бующим и жизнь сокро́вищствуя хотя́щим./ О́тче преподо́бне, Христа́ Бо́га мо́ли/ дарова́ти нам ве́лию ми́лость.

Сла́ва, и ны́не, седа́лен пра́здника, глас 8.

Подо́бен: Воскре́с:

Роди́лся еси́ на земли́ Собезнача́льный Отцу́,/ прине́слся еси́ в це́рковь Непостижи́мый./ Ра́дуяся же, ста́рец на ру́ки Тя восприе́м, зовы́й:/ ны́не отпуща́еши, его́же посети́л еси́, по глаго́лу Твоему́,/ благоизво́ливый спасти́ я́ко Бог род челове́ческий.

А́ще е́сть пост, Сла́ва, и ны́не, Богоро́дичен; а́ще сре́да или́ пято́к, Крестобогоро́дичен (пи́саны сего́ ме́сяца в 10 день).

Ин. Песнь 4

Ирмо́с: Христо́с моя́ си́ла,/ Бог и Госпо́дь, честна́я Це́рковь,/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Незави́стно, преподо́бне, Христу́ повину́яся,/ да́нное тебе́ бога́тство, я́ко благопокори́в раб, разда́л еси́,/ и несказа́нныя тя ра́дости Влады́ка сподо́би.

Прему́дрости пучи́ну преплы́в,/ до́брый би́сер, я́ко добр купе́ц, приобре́л еси́/ и сей то́кмо сокро́вище неоску́дно стяжа́л еси́.

Боже́ственным Ду́хом осия́емь,/ лучи́ слове́с со́лнечно всем испусти́л еси́,/ спасе́ния ве́рным, Богоявле́нне, жела́я.

Богоро́дичен: Я́ко вои́стинну неизглаго́ланна и непости́жна/ Твоего́, Богоро́дице, Боголе́пнаго суть Рождества́ су́щим на зе́мли/ и на Небеси́, Присноде́во, та́инства.

Ин. Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Умерщвле́нием, всему́дре, страсте́й вне быв и пло́ти,/ любо́вию Бо́гу прибли́жился еси́, Пресвятому́ и Пресве́тлому Све́ту/ и Еди́ному, истязу́ющему чистоту́.

Боже́ственным сия́нием твои́м, бла́же,/ ум, Богоно́сец, озари́в,/ столп всесве́тел бысть,/ всем посыла́я Боже́ственнаго Све́та Боже́ственныя зари́/ и мрак неве́дения отгоня́.

Хотя́й всем я́ко Благ, всему́дре, спасти́ся,/ наста́вника заблу́ждшим тя показа́,/ мно́гия обраща́ти ко спасе́ния пути́,/ Иси́доре треблаже́нне, о́тче пребога́те.

Богоро́дичен: Вои́стинну усты́ и душе́ю, Влады́чице ми́ра Блага́я,/ испове́даю Тя, Всенепоро́чная, воплоще́нна Бо́га ро́ждшую, Чи́стая,/ и жития́ Тя предста́тельницу ве́рою предлага́ю.

Ин. Песнь 6

Ирмо́с: Жите́йское мо́ре,/ воздвига́емое зря напа́стей бу́рею, к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Словесы́ су́дными укра́шься я́ко иере́й,/ слове́сно разсуди́л еси́, Богоно́се, и те́лом и душе́ю,/ и го́ршее лу́чшему повину́в смы́сленно, досточу́дне.

Благомо́щно Еги́пта страсте́й и пи́щи/ ты, мона́шествующих похвало́,/ воздержа́тельными, сла́вне, я́звами, истязу́я уязви́л еси́,/ ве́рным услажда́я прехожде́ние.

Богоро́дичен: Нося́й вся́ческая си́лою Боже́ственною/ и содержа́й, я́ко Благоутро́бен,/ Твои́ми объя́тии, Пречи́стая, вопло́щься, я́ко Младе́нец но́сится,/ И́же Отцу́ по Существу́ Соприсносу́щный.

Конда́к и и́кос пра́здника.

Ин. Песнь 7

Ирмо́с: Росода́тельну у́бо пещь соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

На тве́рди ве́ры поста́ви, о́тче, я́коже со́лнце, Влады́ка тя,/ просвеща́ти сия́нием мы́сленным ду́ши вопию́щих приле́жно:/ благослове́н еси́, Бо́же оте́ц на́ших.

Скве́рны плотски́я и духо́вныя отмы́л еси́, блаже́нне, сле́з излия́ньми/ и, быв, Богоно́сне, свет су́щим на зе́мли,/ вся научи́л еси́ вопи́ти:/ благослове́н еси́, Бо́же оте́ц на́ших.

Богоро́дичен: На недви́жимем ве́ры стоя́ще основа́нии,/ Тя, Богома́терь Чи́стая, испове́дуем Богоро́дицу:/ Сло́во бо Бо́жие без семе́не родила́ еси́ нам./ Благослове́н, Пречи́стая, Плод чре́ва Твоего́.

Ин. Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Я́ко словесну же́ртву, о́тче, все́ житие́ твое́ в воню́ благово́ния прине́сл еси́/ на Кресте́ тебе́ ра́ди пове́шеному Христу́,/ Его́же превозно́сим во вся ве́ки.

Мно́жиши бога́тство и по сме́рти,/ одушевле́на словеса́ твоя́ я́коже многоце́нно всем ве́рным насле́дие оста́вль,/ превознося́щим Христа́ во вся ве́ки.

Украси́лся еси́, преблаже́нне, добро́тою слове́с твои́х,/ Свята́го бо Ду́ха яви́лся еси́ трость,/ пиша́ благоче́стно ра́зум Боже́ствен/ превознося́щим Го́спода во вся ве́ки.

Богоро́дичен: К Твоему́ кро́ву прибега́ю, Всенепоро́чная,/ и Предста́тельницу жи́зни моея́ Тя ны́не предлага́ю,/ Тя, па́че ума́ Бо́га Сло́ва ро́ждшую./ Его́же превозно́сим во вся ве́ки.

Ин. Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Я́коже заря́ све́та, облиста́ в твою́ ду́шу благода́ти сло́во, преподо́бне, тобо́ю же вся земля́ испо́лнися того́ сия́ния./ Ему́же причаща́ющиися, твоея́ му́дрости сокро́вищу, о́тче, удивля́емся.

Тре́м Ли́цам во Еди́нстве Естества́,/ оте́ческим после́дуя уче́нием, Богому́дренно покланя́тися научи́л еси́,/ чти́ти Богословя́щия Несозда́нную Безнача́льную Тро́ицу,/ всем ве́рным просвеще́ние источа́ющую.

Обре́т трудо́в твои́х воздая́ния на Небесе́х, жизнь безконе́чную прие́м,/ пою́щим, прему́дре, па́мять твою́ испроси́ спасе́ние, блаже́нне Иси́доре, престо́лу Бо́жию со А́нгелы ны́не предстоя́.

Богоро́дичен: Тле́нен Сло́во Бо́жие нетле́нное о́браз прие́м,/ челове́ки в нетле́ние облече́,/ благоволе́нием О́тчим все́лься в Тя, Обра́дованная./ Те́мже, Пречи́стая, с Небе́сными во́и Тя велича́ем.

Свети́лен пра́здника.

Сла́ва, и ны́не, то́йже.

На стихо́вне стихи́ры пра́здника, глас 2.

Подо́бен: До́ме Евфра́фов:

Скве́рны кроме́/ Христо́с ражда́ется от Де́вы,/ я́ко от Отца́ нетле́нно/ Сын пре́жде денни́цы,/ и́же Ада́ма избавля́яй.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Две́ри Небе́сныя, отве́рзитеся:/ Христо́с бо в це́рковь/ я́ко Младе́нец/ Ма́терию Де́вою/ Бо́гу и Отцу́ прино́сится.

Стих: Свет во открове́ние язы́ков/ и сла́ву люде́й Твои́х Изра́иля.

Угль, проявле́йся/ Боже́ственному Иса́ии,– Христо́с,/ я́ко клеща́ми,/ рука́ми Богоро́дицы/ ны́не ста́рцу дае́тся.

Сла́ва, и ны́не, глас 7:

Свет во открове́ние язы́ков,/ прише́л еси́ на зе́млю с Небесе́, Спа́се наш/ и, произше́д из Де́вы,/ почи́л еси́ на объя́тиих пра́веднаго Симео́на:/ подоба́ше бо Ти, Жизнода́вче всех,/ от ста́рца позна́тися,/ я́ко прии́де отпусти́ти его́, по глаго́лу Твоему́,/ име́яй ве́лию ми́лость.