Служба преподобнаго отца нашего Иоанникия Великаго и святаго мученика Никандра, епископа Мирскаго, и Ермея пресвитера
На Го́споди, воззва́х: стихи́ры на 6, Преподо́бнаго 3, глас 4.
Подо́бен: Зва́нный свы́ше:
И́же све́том облиста́н Боже́ственным,/ егда́ чистото́ю ума́ воззре́л еси́,/ и подо́бно разсуди́в не стоя́щих, ве́чно бу́дущая,/ тогда́ огнь в се́рдцы, о́тче, прие́м,/ еле́ни подо́бно разже́глся еси́ Боже́ственною любо́вию/ и, забы́в плоть и кровь,/ угото́вился еси́ к подвиго́м по́стническим,/ и́хже ра́ди теле́сныя стра́сти души́ твое́й покори́л еси́.
На восхожде́ние Боже́ственных гор высоты́ всели́лся еси́,/ не смиря́емь смире́ннаго сего́ телесе́ ну́ждами, о́тче, бе́дными, Иоанни́кие./ Бде́нными стоя́нии/ и вседне́вными моли́твами Благо́му сочета́вся,/ просвети́лся еси́ и проро́чества прия́л еси́ дар/ зре́ти да́льняя, я́ко бли́жняя,/ и предглаго́лати ве́рным бу́дущая./ Тем, я́ко Боже́ственнаго учи́теля, тя сла́вим.
Де́монская стремле́ния и стре́лы/ кре́пко притупи́л еси́ воображе́нии моли́тв/ и на тех взял еси́ побе́ды Бо́жиею си́лою, достосла́вне./ Отсю́ду по́чести тебе́, о́тче, чуде́с Благи́й дарова́,/ смире́нием упоко́ився се́рдца твоего́./ Те́мже и ми́ро благово́нное твоя́ честны́я источа́ют мо́щи:/ благово́ние бо яви́лся еси́ Христо́во, Иоанни́кие.
И́ны стихи́ры му́ченика, глас 2.
Подо́бен: Егда́ от Дре́ва:
Зва́ние тезоиме́нное/ прие́м от Боже́ственнаго Про́мысла,/ сие́ вещми́, о́тче, зна́менав, утверди́л еси́:/ ра́тных бо мно́жества и собо́р мучи́телей/ в терпе́нии твое́м победи́л еси́./ Тем вене́ц побе́ды прие́м,/ ве́рою взыва́л еси́:/ сла́ва непобеди́мей держа́ве Твое́й, Человеколю́бче.
Ми́ра благово́ннейшая/ нам врачева́ний источа́еши днесь, Ника́ндре,/ в Боже́ственней па́мяти твое́й,/ и отго́ниши, му́дре, мглу скорбе́й/ и стра́сти теле́сныя,/ и бога́тыя благода́ти исполня́еши/ собо́р всех, вопию́щих Христу́:/ Ты еси́ неистоще́нное ми́ро,/ благоуха́ющее пою́щия Тя.
Име́я дерзнове́ние ко Христу́,/ прославля́емому еди́ному во святы́х Его́,/ Того́ моли́, преподо́бне Ника́ндре,/ о всех, любо́вию соверша́ющих твою́ па́мять/ и восхваля́ющих твоя́ исправле́ния,/ я́ко да неизрече́нных о́ных благ и нетле́нныя сла́вы/ о́бщницы бу́дем благода́тию.
Сла́ва, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х./ Де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.
И ны́не, Богоро́дичен или́ Крестобогоро́дичен.
Подо́бен: Тридне́вен:
Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное, е́же ви́жу, та́инство, Сы́не Мой?/ Ка́ко на Дре́ве умира́еши, пло́тию пове́шен,/ Жизни́ Пода́телю?
На стихо́вне Окто́иха. Сла́ва, глас 8.
Мона́хов мно́жества/ наста́вника тя почита́ем, о́тче наш Иоанни́кие,/ твое́ю бо стезе́ю вои́стинну пра́во ходи́ти позна́хом./ Блаже́н, еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных:/ с ни́миже моли́ся Го́споду/ поми́ловатися душа́м на́шим.
И ны́не, Богоро́дичен или́ Крестобогоро́дичен.
Подо́бен: О, пресла́внаго чудесе́!
Тя ви́дящи, пригвожда́ема на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне, вопия́ше, Ча́до сла́дкое,/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли́ всех изба́вивый милосе́рдием Твои́м?
Тропа́рь, глас 8:
Слез твои́х тече́ньми пусты́ни безпло́дное возде́лал еси́,/ и, и́же из глубины́ воздыха́ньми, во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Иоанни́кие, о́тче наш:/ моли́ Христа́ Бо́га спасти́ся душа́м на́шим.
Сла́ва, глас 4:
Му́ченик Твой, Го́споди, Ника́ндр,/ во страда́нии свое́м ве́нец прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.
НА У́ТРЕНИ
Еди́н кано́н Окто́иха, и преподо́бнаго на 4, и му́ченика на 4. Кано́н преподо́бнаго, его́же краегране́сие: Предте́чева тя подража́теля хвалю́. Ио́сиф, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Све́том благода́ти озаря́емь, преподо́бне,/ ве́рою па́мять твою́ торжеству́ющия просвети́/ и тьмы́ грехо́вныя моли́твами твои́ми изба́ви, Иоанни́кие.
Путь вводя́щий невозвра́тно ше́ствовал еси́ ко гра́ду Небе́сному, Иоанни́кие,/ Святы́й бо наста́ви тя Дух, почива́яй в се́рдцы твое́м.
Вышша́ющее смире́ние, Иоанни́кие, име́л еси́,/ тем мо́лимся тебе́:/ уще́дри, преподо́бне, смире́ние на́ше/ и боле́зни вся облегчи́ серде́ц на́ших.
Богоро́дичен: Па́дших воззва́ние и стоя́щих укрепле́ние су́щи, Всенепоро́чная,/ тем молю́ся Тебе́:/ па́дший мой ум грехо́м испра́ви, Влады́чице, я́ко да сла́влю Тя.
Кано́н му́чеников, глас 4.
Песнь 1
Ирмо́с: Ли́цы изра́ильтестии/ невла́жными стопа́ми/ понт53 Чермны́й и вла́жную глубину́ прогна́вше,/ вса́дники триста́ты54, враги́ ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.
Честны́й пра́здник честны́х страда́лец священному́чеников,/ свяще́нную па́мять днесь свяще́нными песнопе́ньми/ ны́не Свяще́ннейшая Христо́ва Це́рковь, священноле́пно соверша́ющи,/ пе́сньми украша́ется, сия́ почита́ющи.
Честно́ю пома́зан ма́стию свяще́нничества ве́рно, священнонача́льниче Ника́ндре,/ честне́йшу сию́ от крове́й твои́х обагре́ньми соде́лал еси́, в ра́дости зовя́:/ воспои́м Бо́гу на́шему, я́ко просла́вися.
Путь муче́ния теку́ще,/ весе́лие и́стинное в нем я́ве показу́юще,/ обогати́стеся благода́тию чуде́с и дарова́ний Небе́сных, му́ченицы,/ согла́сно вопию́ще:/ воспои́м Бо́гу на́шему, я́ко просла́вися.
Богоро́дичен: Неопи́санный в не́дрех Оте́ческих,/ в не́дрех Ма́терних пло́тски Христо́с опису́ется,/ по рождестве́ Сию и́стинно Де́ву па́че ума́ сохрани́в,/ Ему́же велегла́сно вопие́м:/ воспои́м Бо́гу на́шему, я́ко просла́вися.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия духо́вно утверди́,/ в Боже́ственней Твое́й сла́ве/ венце́в сла́вы сподо́би.
Теку́щая пребыва́ющими измени́л еси́,/ смы́сленно прие́м твой крест, Иоанни́кие,/ и на невосходи́мыя го́ры, я́ко Илия́ вели́кий, возше́д, пребы́л еси́.
Путь тебе́, зело́ жела́емый, отце́в показа́ дво́ица,/ ю́же обре́л еси́ ле́ты множа́йшими сокрове́нну в гора́х,/ проро́ческим да́ром просвеще́н, блаже́нне.
Коле́блеми страстьми́ разли́чными,/ ве́рою притека́ем к твоему́ покро́ву, Иоанни́кие,/ святы́ми твои́ми хода́тайствы вся ны посети́, моля́ся Человеколю́бцу.
Богоро́дичен: Кропле́нием ми́лости Твоея́, Де́во,/ у́глие погаси́ мои́х страсте́й, Богора́дованная,/ и уга́сший возжзи́ свети́льник се́рдца моего́,/ златы́й свети́льниче, Всенепоро́чная.
Ин
Ирмо́с: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.
Слове́сныя мре́жи55 простира́я,/ су́щия в пре́лести, чудоде́йствуя, уловля́л еси́,/ обро́к многообра́зен от Де́вы, Ника́ндре, Возсия́вшему сия́ принося́.
Розга́56 благопло́днейшая Ти́това са́да был еси́ Кри́тскаго свети́льника,/ гро́зды57 нося́ слове́сныя, сла́дость нам точа́щая спаси́тельную,/ Ника́ндре блаже́нне.
Со Ерме́ем Боже́ственным олядене́вшая сердца́ Креста́ ра́лом58 возде́ласте, му́дрии,/ и плодоно́сны благода́ти яви́сте:/ тем блажи́ми есте́.
Богоро́дичен: Ниже́ Небе́сный ум мо́жет па́че ума́ рождество́ Твое́ сказа́ти, Отрокови́це,/ ума́ бо пе́рваго во чре́ве, Сло́во, Чи́стая зачала́ еси́,/ вся́ческая сло́вом соста́вившее.
Седа́лен, глас 8.
Подо́бен: Прему́дрости:
Страсте́й мрак очи́стив,/ Христо́вых повеле́ний я́ко и́стинно свет прие́м,/ в посте́ просия́л еси́/ и, умертви́в те́ло, ду́хом ожи́л еси́,/ вра́жия се́ти попра́л еси́, блаже́нне./ Тем и вы́шних безпло́тных А́нгелов/ соприча́стник был еси́, Ду́ха благода́тию,/ Иоанни́кие, о́тче наш,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.
Сла́ва, му́чеников, глас 4.
Подо́бен: Вознесы́йся:
Святи́тельства и́стины Боже́ственным пома́занием/ и муче́ния свяще́нною и́стинно кро́вию просвеще́ни, сла́внии,/ совокупи́стеся чино́м, ра́дующеся, безпло́тных А́нгел./ Тем пра́зднуем честну́ю ва́шу па́мять,/ моля́щеся всем очище́ние пода́ти моли́твами ва́шими, святи́и.
И ны́не, Богоро́дичен:
Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.
Крестобогоро́дичен:
Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́./ Его́же, Благослове́нная, моля́щи не преста́й проще́ние прегреше́ний нам дарова́ти.
Песнь 4
Ирмо́с: Неизсле́дный Бо́жий сове́т,/ е́же от Де́вы воплоще́ния,/ Тебе́, Вы́шняго,/ проро́к Авваку́м, усмотря́я, зовя́ше:/ сла́ва си́ле Твое́й, Го́споди.
Го́ры высоча́йшия пости́г,/ верхи́ де́монов возвыша́емыя смире́нием смири́л еси́, му́дре,/ и на них му́жествовал еси́, сла́ва мона́шествующих и утвержде́ние.
Я́ко мече́м обоюдоо́стрым, Христо́вым стра́хом вооружи́вся,/ зми́я отсту́пника низложи́л еси́ разу́мно/ и чу́вственно, блаже́нне, свяще́нными побе́дами прославля́емь.
Весь Боже́ственным Ду́хом распали́вся, о́тче, мраз претерпе́л еси́,/ мно́жайшими ле́ты в пусты́нях вселя́яся, ища́й Го́спода,/ благода́тию тя Боже́ственною согрева́юща.
Богоро́дичен: Тя, очище́ние всех земны́х, ве́рою молю́ и припа́даю, Благослове́нная:/ ми́лостива ми Судию́ и Сы́на Твоего́ сотвори́,/ я́ко да по до́лгу сла́влю Тя.
Ин
Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зову́щия:/ сла́ва, Христе́, си́ле Твое́й.
Колесни́ца яви́стеся Сло́ва, у́мно Сего́ нося́ще,/ тем привя́зани к ко́нем, лю́те же влачи́ми,/ не отверго́стеся Сего́, ни победи́стеся,/ к Небе́сней стезе́ я́ве подвиза́еми.
Темни́цам приближа́ющеся и у́зами облага́еми,/ от уз льсти град и лю́ди спасо́сте/ и ю́зою59 любве́ связа́стеся Свя́заннаго пло́тию нас ра́ди, всеблаже́ннии.
Со А́нгелы Влады́ку заключе́нии сла́вляху,/ Небе́сным Хле́бом, всесла́внии, пита́еми./ Тем пло́ти боле́зней небрего́сте,/ си́льнейшии ран бы́вше.
Богоро́дичен: На Престо́ле высо́цем стра́шно седя́й,/ на Ма́терних объя́тиях, Младе́нец быв, седи́т,/ па́дший о́браз исправля́я и обоже́ние су́щим из Ада́ма да́руя.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.
Ше́ствовал еси́, преподо́бне, те́сный и приско́рбный путь/ Боже́ственными восхожде́ньми се́рдца,/ и виде́нии разширя́емь, и положе́нием обожа́емь я́ве./ Тем бысть мона́шествующим утвержде́ние и украше́ние.
О́ко очи́стившу помышле́ния, преподо́бне,/ благода́ть тебе́ даде́ся проро́чества,/ я́ко настоя́щая глаго́лати бу́дущая,/ зре́ти же да́льняя, я́ко бли́жняя./ О Иоанни́кие, Бо́жие оби́телище!
Боле́зни мя изба́ви грехо́в и скорбе́й,/ утоли́ се́рдца моего́ боле́знь и грехопаде́ний разреше́ние да́руй,/ Благоде́теля Бо́га имея́, послу́шающа честны́х твои́х моли́тв.
Богоро́дичен: Ума́ моего́ уврачу́й изступле́ния, Всенепоро́чная,/ и уврачи́ стра́сти души́ моея́, и уны́ния тьму отжени́;/ я́ко да восхваля́ю Тя пе́сненно, Присноблаже́нная Богоро́дице Всепе́тая.
Ин
Ирмо́с: Просвеще́ние Твое́, Го́споди, низпосли́ нам,/ и от мглы прегреше́ний разреши́ ны, Бла́же,/ Твой мир да́руяй.
В просвеще́ние ве́ры путево́ждствовал еси́ лю́ди,/ и, оста́вльше тьму идолонеи́стовства,/ ча́да Све́та бы́ша хода́тайством твои́м, Ника́ндре.
Просвети́тельными Ду́ха блиста́юще заря́ми,/ муче́ний нощь преидо́сте безвре́дно,/ реша́ще мглу безбо́жия, свети́льницы сла́внии.
Па́вловых вод испо́лнен Тит быв,/ тя напая́ше, показу́я реку́,/ струи́ му́тныя безбо́жия потопля́ющу, Ника́ндре.
Богоро́дичен: А́гнца и Го́спода ро́ждшая пло́тию, Де́во,/ еди́на нескве́рная ски́ние, Боже́ственный ковче́же, честны́й свети́льниче,/ ду́шу мою́ озари́.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Увяди́в60 стра́сти теле́сныя,/ я́ко дре́во узре́лся еси́ высокове́рхое,/ плоды́ чуде́сныя и честна́я исправле́ния свяще́ннейше нося́, Богоблаже́нне.
Уврачи́ тя Госпо́дь явле́нием Евста́фия му́ченика,/ яд всепа́губный испи́вша, всеблаже́нне,/ чрез ру́ку непра́ведную и бе́дствующа.
Тьмам боле́зней приобщи́лся еси́,/ те́лом не́мощен пребы́в, Иоанни́кие./ Тем ве́рою зову́ ти:/ боле́зни утоли́ се́рдца моего́.
Богоро́дичен: Еди́на всех по́моще, помози́ нам, бе́дствующим,/ и ру́ку пода́ждь, и к приста́нищем введи́ спасе́ния,/ Отрокови́це Богоблагода́тная.
Ин
Ирмо́с: Возопи́, прообразу́я погребе́ние тридне́вное,/ проро́к Ио́на в ки́те моля́ся:/ от тли изба́ви мя, Иису́се, Царю́ сил.
Пригвожда́ема гвоздьми́ телеса́ му́чеников,/ страсте́й подража́теле Спа́са явля́хуся,/ пригвозди́вшагося на Кресте́ и от тли мир спа́сшаго.
Пучи́ну мук преидо́сте, му́ченицы,/ окормле́нием Свята́го Всеси́льнаго Ду́ха/ и к Боже́ственному приста́нищу приста́сте, сла́вы исполня́еми.
Победи́л еси́, тезоимени́тне, муже́й вся́кое противле́ние уби́йц,/ святи́телю приснопа́мятне Ника́ндре,/ и венцы́ сла́вы прия́л еси́, Бо́гу предстоя́.
Богоро́дичен: Погуби́ла еси́ прама́тере, Отрокови́це, укори́зну,/ благослове́ньми нас Венча́вшаго пло́тию ро́ждши,/ и скорбь тоя́ в ра́дость и́стинную преложи́ла еси́.
Конда́к, глас 8.
Подо́бен: Взбра́нной:
Звезда́ яви́лся еси́ всесве́тлая, в ми́ре просвеща́яй/ и су́щия во мра́це страсте́й облистава́яй,/ врач же крепча́йший яви́лся еси́,/ но я́ко прия́л еси́ благода́ть исцеле́ний,/ прося́щим тя пода́ждь исцеле́ние, да зове́м:/ ра́дуйся, о́тче Иоанни́кие.
И́кос:
Други́й, о́тче, яви́лся еси́ врач и предста́тель,/ неду́ги одержи́мым и скорбьми́, Иоанни́кие чу́дне,/ исцеля́я всех, ве́рно притека́ющих под Боже́ственный кров твой./ Тем и от нас слы́шиши:/ ра́дуйся, отца́ блага́го ко́рене о́трасль;/ ра́дуйся, ма́тере блага́я ветвь;/ ра́дуйся, и́же тех любо́вь отри́нувый;/ ра́дуйся, и́же еди́наго Бо́га прие́мый;/ ра́дуйся, я́ко оста́вил еси́ земно́е во́инство;/ ра́дуйся, я́ко низложи́л еси́ ва́рварскую горды́ню;/ ра́дуйся, стена́ и храни́тель лю́дем бы́вый;/ ра́дуйся, оружие и столп ми́рови явлься;/ ра́дуйся, языческия разрушая бра́ни;/ ра́дуйся, свети́льниче, сия́я чудесы́;/ ра́дуйся, наги́х покрови́телю;/ ра́дуйся, плене́нных изба́вителю;/ ра́дуйся, о́тче Иоанни́кие.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Се́рдце твое́ Тро́ицы жили́ще соде́лал еси́,/ три созда́в хра́мы,/ в ни́хже Боже́ственною благода́тию, Иоанни́кие, ми́ро источа́еши/ в просвеще́ние и очище́ние ве́рно тебе́ приходя́щих.
Душа́ твоя́, светозаре́нием Боже́ственнаго Ду́ха освеща́ема при́сно,/ душ зря́ше ве́рно приходя́щих тебе́ сове́ты, блаже́нне,/ проро́ческими прозна́ньми свяще́нно удивля́ема.
Неду́гов, обурева́ющих мя, блаже́нне, души́ же и телесе́/ твои́ми святы́ми моли́твами ско́ро изба́ви и пе́ти сотвори́:/ препе́тый оте́ц на́ших Бо́же, благослове́н еси́.
Богоро́дичен: Непреме́ннаго ро́ждшая еди́на Го́спода, Богора́дованная,/ десни́цею Его́, Чи́стая, премени́ти мой ум моли́ся к лу́чшим,/ лю́те превраща́емый жите́йскими печа́льми.
Ин
Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.
Свяще́нную твою́ оде́жду обагри́в, блаже́нне, обагре́ньми крове́й,/ соверши́л еси́ све́тльшую, Ника́ндре,/ отце́в, вопия́, Бо́же, благослове́н еси́.
Приближа́ющеся огню́,/ несомне́нною любо́вию к Творцу́ не опали́стеся, вопию́ще, блаже́ннии:/ оте́ц на́ших Бо́же, благослове́н еси́.
Пе́щи пла́мень, вам угото́ванный на муче́ние,/ преврати́сте на ро́су Ду́хом Вседе́тельным, вопию́ще:/ оте́ц на́ших Бо́же, благослове́н еси́.
Богоро́дичен: Воплоще́нное Сло́во ражда́еши несказа́нно, Чи́стая Де́во,/ зову́щия от смерти́ избавля́юща:/ оте́ц на́ших Бо́же, благослове́н еси́.
Песнь 8
Ирмо́с: О́троки благочести́выя в пещи́,/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.
Стоя́ высоко́ на горе́, я́ко на све́щнице свети́льник, преподо́бне,/ всех помышле́ния ве́рою просвеща́л еси́,/ показу́я изря́днейше словесы́ и де́лы стезю́ жи́зни/ и возводи́ ты́я Боже́ственным сло́вом к высоте́ безстра́стия.
Ум безстра́стием очи́щшему, бесе́довал еси́ Го́споду Вседержи́телю,/ от Него́же неизглаго́ланным, преподо́бне, науча́емь,/ проро́чески предглаго́лал еси́, просвеща́я ду́ши, я́ко велича́йш, всеблаже́нне, проро́к./ Тем тя согла́сно, ве́рнии, восхваля́ем.
Постиго́ша мя ра́ны тя́жкия, и неду́зи разли́чнии смуща́ют;/ сих мя изба́ви, о́тче, молю́ся тебе́,/ я́ко от Бо́га прие́м, Иоанни́кие, благода́ть врачева́ти стра́сти/ и боле́зни ве́рных облегчева́ти.
Тро́ичен: Со все́ми Вы́шними во́инствы –/ Отца́, Сы́на и Свята́го Ду́ха –/ Тро́ицу Неразде́льную, Несозда́нное Божество́ песносло́вяще:/ Свят, Свят, Свят, возопии́м в ра́дости,/ еди́на Власть, Нача́ло и Ца́рство.
Богоро́дичен: Яви́лася еси́ А́нгелов превы́шшая, Бо́га неизрече́нно воплоти́вши,/ Того́ умоли́, Влады́чице Всенепоро́чная,/ плотски́х вы́шша страсте́й бы́ти мя умо́м,/ высото́ю смире́ния,/ песносло́вяща Твою́ велича́йшую благода́ть.
Ин
Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́ благослови́те, по́йте Го́спода.
Иера́рх че́стен был еси́,/ ника́коже чужде́ю кро́вию, свое́ю же, Ника́ндре, вшед в Го́рний храм и поя́:/ благослови́те вся дела́ Госпо́дня Го́спода.
На седа́лищи, восхвали́в Го́спода, пресви́теров Ерме́й сла́вный,/ удобри́вся кро́вию муче́ния, зове́т:/ благослови́те вся дела́ Госпо́дня Го́спода.
Свяще́нно предсоверша́юще свята́я,/ же́ртвы честны́я яви́стеся/ и в воню́ принесо́стеся благово́ния Го́споду, вопию́ще:/ благослови́те вся дела́ Госпо́дня Го́спода.
Богоро́дичен: Зол мои́х пучи́ну изсуши́,/ благоутро́бия пучи́ну ро́ждшая, Изба́вителя и Го́спода,/ Ему́же вопие́м, Де́во:/ вся дела́ благослови́те Госпо́дня Го́спода.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Укрепи́ся Бо́гу, ум твой утверди́вшу удержа́ти стра́сти,/ А́нгел в телеси́ отсю́ду, о́тче, ты был еси́,/ и со А́нгелы на Небесе́х живе́ши всегда́,/ сла́вы Престо́лу предстоя́ и Све́та невече́рняго исполня́емь.
Яко́же на Небеси́, в гора́х и верте́пах всели́лся еси́, преподо́бне:/ тем укроти́шася тебе́ ди́вии зве́рие,/ покори́вшу стра́сти душе́вныя, неудо́бь покори́мыя, Иоанни́кие, и пра́ведну же бы́вшу./ Сего́ ра́ди ве́рно тя почита́ем.
Твоя́ свяще́нныя и святы́я мо́щи во гро́бе лежа́ще,/ неду́ги погружа́ют и попаля́ют полки́ де́монския всегда́,/ му́дре Иоанни́кие,/ Бо́жиею благода́тию источа́ют всем врачева́ния,/ ве́рно тя при́сно блажа́щим.
Уже Христу́ приближа́яся я́снше и чи́стше,/ помяни́ ве́рою тя помина́ющих, Иоанни́кие,/ грехо́в проще́ния нам прося́, и неду́гов всех избавле́ния,/ и Небе́снаго Ца́рствия селе́ние.
Богоро́дичен: Просвети́, Чи́стая, души́ моея́ о́чи, Свет ро́ждшая,/ да не пости́гнет мя грехо́вная тьма тяжча́йшая,/ ниже́ глубина́ покры́ет мя отча́яния,/ но Ты мя спаси́ и окорми́ ко приста́нищу Боже́ственнаго хоте́ния.
Ин
Ирмо́с: Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.
На дре́ве, му́дре, терпели́вно растяга́емь и свеща́ми опаля́емь,/ ро́су Небе́сную прия́л еси́ руко́ю А́нгельскою, му́чениче Ника́ндре,/ паля́щия же ме́ртвы показа́л еси́ живоно́сными твои́ми моли́твами.
Ви́дестеся виде́ние стра́шно:/ обнажа́еми, и безслове́сным привязу́еми,/ и на мно́жайше, страстоте́рпцы, влеко́ми,/ и це́ли явля́еми, огню́ приближа́ющеся, и неопаля́еми,/ Ду́хом Боже́ственным соблюда́еми.
Днесь Ми́рская свяще́нная митропо́лия пра́зднует велегла́сно,/ град всяк на весе́лие созыва́ющи,/ в па́мяти ва́шей сей, всехва́льнии,/ в не́йже свяще́нное ва́ше страда́ние соверши́сте.
Отве́рзеся вам Не́бо, и А́нгели восхожде́нию восплеска́вше,/ чи́ни преподо́бных и пра́ведных возвесели́шася, взыгра́шася му́ченицы;/ с ни́миже все́льшеся, помяни́те помина́ющия вас, святи́и.
Богоро́дичен: Све́том мя озари́ Твои́м, Всенепоро́чная, ро́ждшая Свет непристу́пный,/ разжени́ о́блаки души́ моея́, и тьмы мя исхити́, молю́ся,/ и Боже́ственнаго спасе́ния сподо́би, Пречи́стая, Еди́на Присноде́во.
Свети́лен:
Подо́бен: Ду́хом во святи́лищи:
Благода́ть преизбы́сть Бо́жия в души́ твое́й, му́дре Иоанни́кие, безпло́тно живу́ща./ Тем чту́щия тя страсте́й изба́ви те́мных облако́в,/ к ти́хому приста́нищу вводя́ и отгоня́я полки́ де́монския.
Богоро́дичен: Сотвори́ и́стинно с Тобо́ю вели́чия Сын предве́чный О́тчим сове́том:/ Жизнь бо нетле́нную без стра́сти родила́ еси́/ и пребыла́ еси́ я́коже пре́жде рождества́, ма́терских избе́гше боле́зней,/ и Де́ва, па́ки по рождестве́ пребы́вши Де́ва.
На стихо́вне Окто́иха. Сла́ва, глас 6:
Е́же по о́бразу соблю́д невреди́мо,/ ум – влады́ку над страстьми́ па́губными по́стнически поста́вив,/ во е́же по подо́бию я́коже мо́щно возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ прави́ло доброде́телей изве́стнейшее,/ и ны́не на Небесе́х зерца́лом разре́шшимся,/ о́тче наш Иоанни́кие,/ чи́сте зри́ши Святу́ю Тро́ицу,/ моля́ся непосре́дственне/ о и́же ве́рою и любо́вию чту́щих тя.
И ны́не, Богоро́дичен или́ Крестобогоро́дичен.
Подо́бен: Все отло́жше:
Ору́жие, я́коже рече́ Симео́н,/ се́рдце Твое́ про́йде, Пречи́стая Влады́чице,/ егда́ узре́ла еси́ из Тебе́ Возсия́вшаго неизрече́нным сло́вом,/ от беззако́нных я́ко осужде́на,/ возноси́ма на Кресте́,/ о́цтом и же́лчию напая́емаго,/ ре́бра же пробода́ема,/ и ру́це и но́зе пригвожда́емы,/ и, рыда́ющи, восклица́ше,/ ма́терски вопию́щи:/ что сие́, Ча́до сладча́йшее, но́вое та́инство?
НА ЛИТУРГИ́И
Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви о всех: Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя Его́. Ева́нгелие от Матфе́я, зача́ло 10. Прича́стен: В па́мять ве́чную
