Служба преподобнаго отца нашего Илариона Новаго и святаго Стефана чудотворца

Стихи́ры, глас 4.

Подо́бен: Дал еси́ зна́мение:

Житие́ нескве́рно,/ терпе́ние, и кро́тость,/ и любо́вь нелицеме́рну,/ воздержа́ние безме́рно,/ всено́щное стоя́ние,/ умиле́ние Боже́ственно,/ ве́ру, наде́жду и́стинну в сострада́нии, о́тче, стяжа́в,/ я́ко А́нгел пожи́л еси́ на земли́ с пло́тию,/ Иларио́не блаже́нне,/ моли́твенниче о душа́х на́ших.

Земны́й А́нгел/ и Небе́сный челове́к был еси́, преподо́бне,/ исто́чник умиле́ния,/ сострада́ния струя́,/ пучи́на чуде́с,/ гре́шных пору́чник,/ ма́слина вои́стинну Бо́жия плодови́та,/ еле́ем трудо́в твои́х умаща́я ли́ца,/ Иларио́не чу́дне,/ ве́рно восхваля́ющих тя.

Ум твой, просвеща́емь/ Боже́ственными ра́зумы,/ теле́сных, страсте́й превы́ше бы́сть,/ неприме́шен земны́м,/ нося́ начерта́ние/ и изобража́я в себе́ Боже́ственную добро́ту,/ и познава́емь ве́сь Богови́днейший/ соде́йством Ду́ха,/ Иларио́не о́тче наш,/ мона́шествующих украше́ние.

И́ны стихи́ры свята́го Стефа́на, глас то́йже.

Подо́бен: Я́ко до́бля:

Мона́х и́стиннейший,/ звезда́ светле́йшая/ и исто́чник быв умиле́ния,/ любве́ яви́лся еси́ испо́лнен/ и кро́ток, и тих,/ сострада́телен и смире́н,/ беззло́бив, непоро́чен, о́тче Стефа́не./ Сего́ ра́ди Христо́с тя/ преподо́бных поставля́ет стадо́м па́стыря,/ чудоде́йствии почита́ема.

Бде́ние всено́щное/ и воздержа́ние неизрече́нно,/ моли́тву нему́тну,/ житие́ Боже́ственно,/ ве́ру, наде́жду и́скренню,/ правосла́вну му́дрость,/ чу́дно пребыва́ние/ и велича́йшее сострада́ние, о́тче, име́л еси́,/ и у́мер, и пре́жде конца́ облиста́в во зна́мениих пресла́вных./ Те́мже тя почита́ем, преподо́бне Стефа́не.

Я́ко звезду́ многосве́тлу,/ и я́ко со́лнце незаходи́мо,/ и я́ко не́бо одушевле́нное,/ Боже́ственными чудесы́, я́ко звезда́ми, укра́шено,/ и я́ко цве́тник благово́нный, и рай сла́дости,/ я́ко исто́чник свяще́ния,/ я́ко превели́ка врача́ немощству́ющих,/ я́ко па́стыря и до́браго на́шего предста́теля,/ восхваля́ем тя, Стефа́не.

Сла́ва, и ны́не, Богоро́дичен, глас и подо́бен то́йже:

Ту́чами Ду́ха Пресвята́го, Пречи́стая,/ мою́ мы́сль ороси́,/ Я́же ка́плю ро́ждшая, Христа́,/ неизче́тно безме́рная беззако́ния челове́ков/ щедро́тами измы́вшую,/ изсуши́ исто́чник страсте́й мои́х/ и пото́ка мя сподо́би/ пи́щи живы́я при́сно/ моли́твами Твои́ми.

Крестобогоро́дичен. Подо́бен то́йже:

На Кресте́ Тя я́ко узре́/ пригвожде́на, Го́споди,/ А́гница и Ма́ти Твоя́ дивля́шеся,/ и – что виде́ние сие́,– взыва́ше,– Сы́не вожделе́нне?/ Сия́ Ти неве́рный собо́р воздаде́ беззако́нный,/ мно́гих Твои́х чуде́с наслади́выйся./ Но сла́ва неизглаго́ланному/ соше́ствию Твоему́, Влады́ко.

Кано́н преподо́бнаго Иларио́на, его́же краегране́сие: Твоя́ ти́хия восхвалю́, о́тче, нра́вы. Творе́ние Ио́сифа. Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися.

Сострада́телен, и кро́ток быв, о́тче,/ и цел, и тих я́ко вои́стинну ду́хом,/ сострада́ния Боже́ственнаго мя хода́тайством твои́м, Иларио́не, сподо́би,/ я́ко да воспою́ тя ны́не, в тишине́ се́рдца моего́.

Очи́стився, о́тче, от де́тства и взем крест твой, Го́сподеви после́довал еси́,/ стра́сти теле́сныя воздержа́нием же и ча́стыми моли́твами увяди́л еси́/ и безстра́стием украша́яся.

Восприе́м ты Госпо́дне и́го ле́гкое,/ и, Того́ послу́шая оправда́ний, Иларио́не преподо́бне,/ тяжча́йшее грехо́вное отве́ргл еси́, всему́дре, бре́мя, святы́ню пристяжа́в.

Богоро́дичен: Мои́х прегреше́ний плени́цы, Влады́чице, расто́ргни,/ Твоего́ Сы́на и Бо́га моля́щи,/ и му́чащий мя, Присноде́во, грех низложи́,/ я́ко да восхвалю́ Тя при́сно, Всенепоро́чная, спаса́емь.

Ин кано́н, свята́го Стефа́на, его́же краегране́сие: Твоя́ честву́ю, всеблаже́нне, Боже́ственныя труды́. Творе́ние кир Ио́сифа. Глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Боже́ственную па́мять твою́, Богому́дре о́тче, ве́рно пра́зднующе,/ всех Го́спода при́сно сла́вим,/ тя просла́вльшаго мно́гими, Стефа́не, чудесы́.

Ум твой, манове́нии Боже́ственными, всему́дре, обожа́емь,/ всеконе́чно отврати́ся от страсте́й пло́ти/ и а́нгела тя на земли́ показа́, Стефа́не.

Подъя́л еси́ по́стничества боле́зни, о́тче,/ и стра́сти умертви́л еси́ пло́ти неудобоудержа́нныя,/ и в безстра́стие, я́ко во оде́жду све́тлу, я́ве оде́ялся еси́.

Распе́н у́ды твоя́ воздержа́нием,/ Христу́, о́тче, пожи́л еси́, Кресто́м смерть погу́бльшему/ и исцеле́ний оби́льною благода́тию обогати́вшему тя.

Богоро́дичен: Зачала́ еси́, Пречи́стая, неизрече́нным сло́вом/ вся содержа́щаго земны́я концы́ и Сего́ родила́ еси́,/ Его́же моли́ приле́жно поми́ловати ны.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Житие́ твое́, я́ко со́лнце, возсия́, преподо́бне, све́тлыми дея́нии,/ мона́шествующих ли́ки просвети́/ и де́монскую тьму́ отгна́.

Был еси́ тиша́йш се́рдцем, преподо́бне, и смире́н ду́хом,/ и любве́ Боже́ственныя испо́лнен,/ благоприве́тлив обы́чай име́яй всегда́.

Ка́плями твои́х слез угаси́л еси́ у́гли грехо́вныя, то́чиши же, я́ко пре́жде конца́/ и по конце́, му́дре, исцеле́ний пучи́ну притека́ющим.

Богоро́дичен: Исцели́ я́звы души́ моея́, Влады́чице,/ и ума́ испра́ви движе́ния/ к во́лям из Тебе́ вопло́щшагося Сло́ва, молю́ся.

Ин

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Де́лы честны́ми и исправле́нии доброде́тельными, о́тче, просия́л еси́,/ я́коже звезда́ всесве́тлая, мона́шествующих собо́ру/ и просвети́л еси́ чуде́сными сия́нии подсо́лнечную.

Си́лою благода́ти Ду́ха враги́ безпло́тныя низложи́л еси́,/ и возне́слся еси́ благосла́вно смире́нною му́дростию,/ и чуде́с самоде́латель, о́тче му́дре, был еси́.

Ерети́чествующих, о́тче, уста́ и́стины сло́вом загради́л еси́/ и, гоне́ния претерпе́в, вене́ц Боже́ственный восприя́л еси́,/ кроме́ я́звы быв, му́дре, му́ченик изря́днейш.

Богоро́дичен: Да Бог Челове́к бу́дет, Бог бы́сть Челове́к,/ из Тебе́, Еди́ныя Чи́стыя, нача́ло прие́м Безнача́льный./ Сего́ ра́ди Тя, Де́во, ве́рнии, ублажа́ем.

Седа́лен, глас 4.

Подо́бен: Ско́ро предвари́:

Бо́гу освяти́л еси́ твою́, всеблаже́нне, жи́знь,/ быв изря́днейш священноде́тель, и́стинно Христо́в, свяще́ннейше./ Те́мже, по мно́гих и по́тех, и боле́знех ра́дуяся,/ к невеще́ственным преста́вился еси́ ски́нием/ и ны́не источа́еши нам струи́ врачева́ний.

Сла́ва, седа́лен, глас 1.

Подо́бен: Гроб Твой:

Я́ко со́лнце, све́тло возсия́вши, о́тче, па́мять твоя́,/ ве́рных сердца́ просвеща́ет, стра́сти отгоня́ющи и тьмы́ изъе́млющи./ Ю́же ве́рою чи́стою соверша́ющия покры́й,/ сохрани́ от искуше́ний жите́йских нас, о́тче Стефа́не.

И ны́не, Богоро́дичен:

Безневе́стная Чи́стая Богоро́дице Де́во,/ Еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний вся изба́ви,/ на Тя упова́ние, Отрокови́це, иму́щия,/ и ду́ши на́ша спаси́ Боже́ственными моли́твами Твои́ми.

Крестобогоро́дичен:

Зря́щи Тя, Христе́, Всенепоро́чная Ма́ти, ме́ртва на Кресте́ просте́рта, вопия́ше:/ Сы́не Мой, Собезнача́льне Отцу́ и Ду́ху, что неизрече́нное Твое́ сие́ строе́ние?/ И́мже спасл еси́ пречи́стых рук Твои́х, Ще́дре, созда́ние.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Очи́стив твое́ се́рдце,/ честны́ми восхожде́ньми ум впери́л еси́ Еди́наго Бо́га зре́ти добро́ту недомы́сленную/ и отону́дными светлостьми́ озаря́тися.

Сказа́ние слове́с Боже́ственных творя́,/ ра́зум Боже́ственный, о́тче, отту́ду поче́рпл еси́,/ всем же преда́л еси́ благоче́стно, Иларио́не, к тебе́ притека́ющим.

Глаго́л твои́х сла́достию сердца́ ути́ши притека́ющих к тебе́,/ творя́ бо я́же учи́л еси́ сло́вом благоприя́тным,/ в сострада́нии любо́вь име́л еси́, преподо́бне.

Богоро́дичен: Госпо́дь Тя Госпожу́ и Влады́чицу всех соде́ла, Пречи́стая:/ из Твои́х бо ложе́сн воплоти́ся,/ от о́бласти вра́жия Свое́ созда́ние изба́вив.

Ин

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.

Ка́плями свяще́нных твои́х слез напои́вся,/ дре́во яви́лся еси́, Стефа́не, плодови́то, му́дре,/ плоды́ принося́ доброде́телей благово́нныя, и чудеса́ безчи́сленна источа́еши./ Те́мже благоче́стно тя почита́ем.

Я́ко Боже́ственный зри́тся рай, му́дре, храм,/ име́я твои́х моще́й ра́ку, цве́ты разли́чныя принося́ чуде́с,/ и́миже сердца́ наслажда́ются ве́рою, Стефа́не,/ при́сно хва́лящих тя.

Слепы́я разреша́еши и уставля́еши лю́тыя челове́ков неду́ги в сла́ву Христо́ву,/ от Него́же, благода́тию трудо́в обогати́вся, возвели́чился еси́,/ просвети́лся еси́ и просла́вился еси́,/ сла́во мона́шествующих, о́тче наш.

Богоро́дичен: Свята́я Богоро́дице, освяти́ ны,/ Я́же Пресвята́го ро́ждши пло́тию, уподо́битися восхоте́вша челове́ком,/ и Небе́снаго жи́тельства вся покажи́, Пречи́стая, прича́стники моли́твами Твои́ми.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Истка́л еси́ себе́ спасе́ния, преподо́бне, ри́зу/ от сво́йственных боле́зней твои́х,/ се́ю оде́явся, и кня́зя тьмы́ в студ ве́чный обле́кл еси́.

Пло́ти сла́сти воздержа́нием, преподо́бне, увяди́л еси́/ и благода́ть Небе́сную, о́тче, восприя́л еси́, Иларио́не,/ врачева́ти вся́кия челове́ков неду́ги.

Твои́ к Бо́гу непреста́нно ру́це воздева́еме/ руки́ льсти́ваго, о́тче, благочести́выя изба́виша/ и вся́кому боля́щему здра́вие пода́ша.

Богоро́дичен: Кре́пость ве́рных и преподо́бных была́ еси́ держа́ва,/ Тобо́ю бо, Чи́стая, всем истеко́ша лу́чшая/ и на земли́ живу́щии к Небеси́ восхо́дят.

Ин

Ирмо́с: Твой мир да́ждь нам, Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́.

Миродохнове́нен быв Боже́ственными доброде́тельми,/ источи́л еси́, му́дре, по успе́нии ми́ро благово́нное,/ удивля́емь ве́рными челове́ки, любо́вию честву́ющими тя.

Велича́йшими показа́нии чуде́с стра́шных, Стефа́не всему́дре, просия́л еси́/ и пре́жде сме́рти, досточу́дне, и по изше́ствии,/ и свяще́нном твое́м погребе́нии.

Свя́то соверши́в твое́ житие́ о Христе́, Стефа́не Богому́дре, о́тче наш,/ со святы́ми всели́лся еси́/ и ны́не освяща́еши ве́рою честву́ющия тя.

Богоро́дичен: Ро́ждши, Пренепоро́чная, Бо́га Емману́ила,/ Челове́ка я́ве за милосе́рдие бы́вша,/ Сего́ моли́ я́ко Человеколю́бца, Чи́стая, уще́дрити согре́шшия.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Умертви́вся, Иларио́не, ми́ру всему́,/ ны́не живе́ши, преста́вився в Небе́сныя хра́мы/ и живоно́сное всегда́ исцеле́ний источа́еши де́йство.

Благозва́нен, кро́ток, незло́бив, непоро́чен,/ и преподо́бен, и благоумиле́н, и тих ду́хом/ был еси́, о́тче пребога́те.

Сострада́нием безме́рным украша́емь/ и нищелю́бия добро́тою честву́емь,/ Бо́жий уго́дник бли́жний, Иларио́не, показа́лся еси́, всеизря́дне.

Я́ко че́стно твое́ житие́ и непоро́чно,/ я́ко предо́бр и красе́н нрав твой,/ я́ко стра́шна чудеса́, я́же соверша́еши всегда́, всечу́дне.

Богоро́дичен: Черто́г Бо́жий нескве́рный,/ престо́л огнеобра́зный Вседержи́теля,/ Богоро́дицу, вси ро́ди родо́в, ублажа́ем.

Ин

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Исправля́еши, о́тче, хромы́я, вооча́еши слепы́я,/ ходи́ти же твори́ши разсла́бленныя, о Христе́,/ и отгоня́еши лука́выя ду́хи, Стефа́не преподо́бне.

Струя́ истека́ет при́сно, я́ко от исто́чника чи́ста,/ от честны́я твоея́ ра́ки исцеле́ний бога́тно, блаже́нне,/ страсте́й изсуша́ющи всяк пото́к.

Чу́ден чудоде́латель и па́стырь и́стинен, о́тче Стефа́не, я́влься,/ сохраня́й при́сно ста́до твое́,/ е́же совокупи́л еси́ мно́гими по́ты твои́ми.

Богоро́дичен: На Тя, я́ко дождь на руно́, соше́д, Богоро́дице, Спас,/ изсуши́ я́ве то́ки безбо́жия,/ ду́ши же напои́в при́сно чту́щих Тя.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Ору́жии уязви́л еси́ твои́х подвиго́в безпло́тнаго зми́я/ и всеконе́чно истреби́л еси́./ Те́мже чуде́с по́честь восприя́л еси́,/ стра́сти люте́йшия душ же и теле́с исцеля́ти, преподо́бне.

Сло́во твое́ происхо́дит, я́коже роса́, отгоня́ зной уны́ния, преподо́бне,/ приходя́щих тебе́ ве́рою, о́тче наш,/ и доброде́тельными твои́ми при́сно просвеща́я нра́вы ду́хом.

Страсте́й самоде́ржца ум сотвори́в, я́ве ца́рствовал еси́, я́ко победи́тель изря́ден,/ и язы́ки иноплеме́нныя побори́л еси́,/ и изгуби́л еси́, му́дре, де́монов стра́сти всепа́губныя.

Не поколеба́ша, преподо́бне, твоего́ се́рдца столпа́ недви́жимаго искуше́ний ве́тры,/ на ка́мени бо утверди́ся Госпо́дни любве́,/ е́юже укрепля́емь, мно́гим был еси́ Боже́ственное, о́тче, утвержде́ние.

Тро́ичен: Пою́ Тя, Тричи́сленную Ли́цы, Тро́ице Пресу́щественная,/ неразде́льну, неслия́нну Еди́ницу, естество́м же недомы́сленну,/ Еди́наго Вседержи́теля Бо́га – О́тче, Сло́ве и Ду́ше Святы́й.

Богоро́дичен: О́бразы Тя издале́ча прообразова́ше/ благода́ть Ду́ха проро́ческими пропове́дании,/ го́ру ту́чну свя́ту, две́рь спаси́тельную, сви́ток же нове́йший, Чи́стая,/ и киво́т Тя имену́ющи.

Ин

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Священноде́йствовал еси́, я́коже тебе́ сама́го у́глием по́стническаго пребыва́ния,/ ве́сь Христо́во показа́лся еси́, о́тче, благово́ние/ и ве́рных ли́ца благово́нствуеши при́сно, чудоде́йствуя па́че ума́.

Правосла́вия сия́я блиста́нии, отгна́л еси́ тьму́ ересе́й, му́дре,/ и, гоне́ния на ле́та мно́жайшая претерпе́в, му́ченик без кро́ве был еси́./ Те́мже ве́рно тя восхваля́ем.

Терпе́ние стяжа́в мно́гое, воздержа́ние, ве́ру и любо́вь и́стинну,/ яви́лся еси́ оте́ц сиро́т, вдови́ц предста́тель сострада́телен и смире́н,/ Стефа́не, мона́хов сла́во и похвало́.

Твоему́ удиви́ся полк злоу́мных всено́щному стоя́нию и моли́твенному пожда́нию,/ слеза́м и воздыха́нию к Зижди́телю и́стинней любви́,/ и́миже низложи́л еси́ тех, Стефа́не, кова́рствия.

Богоро́дичен: Ка́ко пита́еши млеко́м Сы́на безо́тча,/ пита́ющаго вся́ко дыха́ние, Ма́ти Чи́стая?/ Ка́ко на рука́х но́сиши содержа́щаго вся?/ Па́че ума́ чу́до Твое́./ Тем пое́м при́сно вели́чия Твоя́.

Песнь 8

Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Привре́менную оста́вив жития́ сла́ву, о́тче, и претека́ющее наслажде́ние,/ сла́ву же неотъе́млему и пи́щу немимотеку́щую на Небесе́х восприя́л еси́, всему́дре,/ со все́ми, боя́щимися Го́спода.

Все твое́, се́туя, проше́л еси́ житие́,/ тем блаже́нства сподо́бился еси́ и утеше́ния, ему́же причаща́ются святи́и,/ в земли́ кро́тких, ра́дуяся, ны́не, преподо́бне, всели́лся еси́,/ я́ко смы́слен же и разу́мен.

Честна́ твоя́ пред Бо́гом яви́ся смерть, о́тче свяще́ннейше:/ Того́ бо почти́л еси́ ико́ну и гоне́ния претерпе́л еси́,/ оскорбля́емь от мучи́телей, преподо́бне,/ му́ченик всем показу́яся.

Уста́вил еси́ я́ве ловце́в, о́тче, негодова́ние/ и умно́жил еси́ сих ловле́ния, и́же пре́жде не получи́ша,/ Бо́гу послу́шавшу, преподо́бне, моли́тв твои́х, священноде́йственне всеблаже́нне.

Богоро́дичен: Скве́рны мя страсте́й и ка́ла грехо́внаго, Богора́дованная, отмы́й/ и две́рь мне отве́рзи покая́ния, попо́лзшемуся,/ и соде́ржно прегреше́ньми, Чи́стая, срета́ющемуся, и Бо́га прогне́вающему.

Ин

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Преподо́бно преподо́бная, всеблаже́нне, соверша́я,/ преподо́бным сочта́лся еси́ и всем избра́нным,/ с ни́миже тя почита́ем и ра́це моще́й твои́х покланя́ющеся,/ Стефа́не о́тче Богоно́се.

Ума́ чистоту́ стяжа́в, му́дре,/ Ду́ха зерца́ло был еси́ кра́сно, Сего́ явле́ния прие́мля/ и лю́ди просвеща́я твои́ми уче́нии.

Ви́дится пресла́вное, всеблаже́нне, тобо́ю, всему́дре, соверша́емое:/ от еди́наго бо твоего́ жена́ виде́ния/ прису́щаго ей неду́га отре́шшися, пра́во ше́ствоваше.

Тро́ичен: Воспои́м Безнача́льнаго Отца́, и Сы́на, и Ду́ха Свята́го,/ неразде́льное нача́ло, присносу́щную держа́ву, Триипоста́сное Естество́,/ еди́ну сла́ву и еди́но Ца́рство.

Богоро́дичен: Вопло́щся Безпло́тный из Тебе́ боголе́пне,/ Его́же моли́, Пречи́стая, стра́сти пло́ти моея́ умертви́ти/ и оживи́ти мою́ умерщвле́нную ду́шу грехми́.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем всепе́тую Богоро́дицу велича́ем.

Врачева́ния гроб твой Ду́ха благода́тию источа́я,/ изсуша́ет страсте́й ту́чи, ду́хи отго́нит пре́лести/ и просвеща́ет всех сердца́, Иларио́не преподо́бне,/ ве́рно блажа́щих тя.

Я́ко ши́пок, процве́л еси́ в цве́тнице поще́ния,/ я́ко сладково́нный крин, я́ко я́блоко благово́нно,/ и облагоуха́л еси́ всех благочести́вых ду́ши и сердца́, Иларио́не сла́вне,/ моли́твенниче о благохва́лящих тя.

Сострада́ние име́л еси́, любо́вь, и смире́ние, и ми́лостыню,/ и обы́чай прост, ве́ру и́стинну и наде́жду,/ житие́ че́стно и нрав прав, Иларио́не преподо́бне, мона́шествующих удобре́ние.

Па́мять твоя́ дне́сь, я́ко со́лнце, возсия́,/ благочести́вых сердца́ све́тлостию боле́зней твои́х/ и чуде́с сия́ньми я́ко вои́стинну просвеща́ющи, о́тче,/ в ню́же вся помяни́, ве́рно чту́щия тя.

Богоро́дичен: Глас Тебе́ прино́сим Гаврии́лов, ра́дующеся:/ ра́дуйся, глаго́люще, ме́сто свяще́ния;/ ра́дуйся, преподо́бных сла́во и всех ве́рных спасе́ние,/ Ея́же ра́ди обожи́хомся, Богоро́дице Присноде́во.

Ин

Ирмо́с: Светоно́сный о́блак, в о́ньже всех Влады́ка,/ я́ко дождь с Небесе́ на руно́ сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Стопа́м после́дуя, Богоно́се, благоче́стно и преподо́бно пожи́вшим на земли́,/ кро́ток, незло́бив яви́лся еси́,/ сострада́телен, и смире́н, и тих, Стефа́не,/ и любве́ испо́лнен Боже́ственныя,/ сего́ ра́ди тя ве́рно восхваля́ем.

Я́коже сладково́нное ми́ро, я́ко пречи́стый крин, я́ко ши́пок, о́тче, благоцвету́щ,/ благово́ние испуща́еши от честны́я твоея́ ра́ки безчи́сленных врачева́ний,/ злосмра́дныя неду́ги отгоня́ ве́рою приступа́ющих тебе́ те́пле.

Тя, па́стыря Боже́ственнаго и подража́теля вели́каго Началопа́стыря Христа́,/ мо́лим, Богому́дре:/ су́щия твоего́ ста́да ны́не о́вцы, нас спаса́й от лука́вых волко́в/ святы́ми хода́тайствы твои́ми при́сно.

Всесвята́я твоя́ па́мять, я́коже со́лнце ве́лие, возсия́вши,/ све́тло озаря́ет тва́рь,/ ю́же соверша́юще благоче́стно, вопие́м ти, Стефа́не:/ моли́твами твои́ми всех мы́сли озари́в, покры́й и сохрани́ ны.

Богоро́дичен: Грехолюби́в сый в нераде́нии жив,/ и Суди́ща, Чи́стая, неумы́тнаго трепе́щу,/ на не́мже мя соблюди́ Твои́ми святы́ми мольба́ми, Богоневе́сто, неосужде́нна,/ да я́ко Предста́тельницу при́сно ублажа́ю Тя.