Служба преподобнаго отца нашего игумена Макария, Калязинскаго чудотворца
ВЕ́ЧЕР
На Го́споди, воззва́х: стихи́ры, глас 5.
Подо́бен: Ра́дуйся:
Ра́дуйся, свяще́нная главо́,/ о́тче Мака́рие Богому́дре,/ Бо́жия ра́зума вода́ми напоя́емь,/ и плод благоуха́нен яви́лся еси́/ житие́м твои́м от ю́ности, преподо́бне./ А́ще и челове́к естество́м был еси́,/ но А́нгельски на земли́ пожи́л еси́,/ страх Бо́жий возлюби́в и за́поведей Его́ при́сно поуча́лся./ Тих же и уте́шителен словесы́ показа́вся,/ ми́лостив и кро́ток был еси́/ и ны́не ра́дости Го́спода твоего́ сподо́бился еси́,/ приле́жно моли́ся/ дарова́ти душа́м на́шим ве́лию ми́лость.
Ра́дуйся, преподо́бне о́тче Мака́рие,/ кра́снеи твои́ но́зе до́блественне к тече́нию просте́рл еси́,/ и пусты́ню дости́гл еси́,/ и храм в сла́ву Святы́я Тро́ицы воздви́гл еси́,/ и мно́жество мона́хов собра́л еси́,/ и доброде́тельми ты́я просвети́л еси́,/ и всели́лся еси́, иде́же Свет невече́рний,/ иде́же А́нгел ликостоя́ния,/ с ни́миже предстоя́, преподо́бне,/ моли́ спасти́ся душа́м на́шим.
До́бре тече́ние соверши́в, Мака́рие преподо́бне,/ ко Христу́ восхожде́ние получи́л еси́,/ честны́я же твоя́ мо́щи во гро́бе затворе́ны,/ земли́ предава́емы./ Земля́ же от свои́х недр предае́т тя священноле́пна,/ це́ла же и неразруши́ма,/ благоуха́нием и чудесы́ удивля́ема;/ честна́я же твоя́ ра́ка па́че ка́мене сапфи́ра, о́тче, показа́ся,/ содержа́щи многоцеле́бныя мо́щи твоя́./ Те́мже Христа́ Бо́га моли́ дарова́ти нам ве́лию ми́лость.
Сла́ва, глас 8:
Кто изглаго́лет до́блести твоя́, Мака́рие преподо́бне?/ Ра́вно А́нгелом житие́ пожи́л еси́,/ воздержа́нием ум очи́стив,/ сле́зными тече́нии ду́шу просвети́л еси́./ Тем и ны́не, све́тло укра́шен,/ предстои́ши со А́нгелы, ра́дуяся,/ сугу́бым венце́м увя́злся еси́./ Приле́жно, о́тче Мака́рие, моли́ся, блаже́нне,/ прося́ ми́ра ми́ру и стране́ на́шей утвержде́ния,/ и нас сохрани́, ста́до твое́, моли́твами твои́ми.
И ны́не, Богоро́дичен: Ца́рь Небе́сный:
Вход. Проки́мен дне. И чте́ния преподо́бническая.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (главы́ 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ры, глас 5:
Преподо́бне о́тче,/ от ю́ности име́я смиреному́дрие,/ кро́ток душе́ю и се́рдцем был еси́,/ возжеле́в отлучи́тися мирски́х наслажде́ний,/ теле́сныя стра́сти умори́л еси́ поще́нием/ и к безстра́стия высоте́, о́тче, возше́л еси́,/ и, светода́тельными заря́ми просвеща́емь,/ источа́еши исцеле́ния,/ и отго́ниши ду́хи лука́выя от притека́ющих ти с ве́рою./ Тем па́мять твою́ почита́ем, досточу́дне.
Преподо́бне о́тче,/ в пусты́ни жи́тельствуя,/ еди́ному Бо́гу себе́ возложи́л еси́,/ те́сный пу́ть ше́ствовав,/ воздержа́нием пло́ть умертви́л еси́,/ ду́шу же безстра́стием украси́в,/ по́стником похвала́ был еси́, Мака́рие,/ неви́димаго врага́ победи́л еси́/ и был еси́ чи́сто прия́телище Боже́ственнаго Ду́ха./ Те́мже вопие́м ти:/ мир ми́ру испроси́/ и душа́м на́шим ве́лию ми́лость.
Преподо́бне о́тче,/ Боже́ственнаго Ду́ха благода́тию собра́л еси́ лик мона́шествующих,/ во́инствующих Христу́,/ с ни́миже до́бре подвиза́вся,/ тече́ние соверши́л еси́ твоего́ му́жества,/ неукло́нно к Небеси́ преводя́щую стезю́ ше́ствовал еси́/ и ны́не со А́нгелы лику́еши,/ предстоя́ Престо́лу Всецаря́./ Моли́ся, блаже́нне, о ста́де твое́м,/ е́же му́дре собра́л еси́,/ да сохране́но бу́дет твои́ми моли́твами.
Сла́ва, глас 6:
Прииди́те, празднолю́бцы,/ усе́рдно вси стеце́мся,/ ве́рно торжеству́ем в честне́й па́мяти преди́внаго отца́,/ пе́сньми воспева́юще всечестно́е и равноа́нгелом житие́ его́,/ по святе́м бо его́ преставле́нии/ честны́я мо́щи подаю́т исцеле́ния./ К нему́же возопие́м:/ ра́дуйся, преподо́бне Мака́рие,/ свети́льниче многосве́тлый,/ мона́шествующим спасе́ния хода́тай./ Но, я́ко име́я дерзнове́ние ко Христу́ Бо́гу,/ не преста́й моля́ся о чту́щих па́мять твою́.
И ны́не, Богоро́дичен: Творе́ц и Изба́витель:
На стихо́вне стихи́ры, глас 8.
Подо́бен: О, пресла́внаго чудесе́:
О, пресла́вное чу́до!/ Я́ко звезда́ от за́пада,/ Мака́рие, провозсия́л еси́/ и был еси́ пра́вило доброде́телей,/ мона́хов утвержде́ние,/ по́стников удобре́ние./ Те́мже, соше́дшеся в па́мять твою́,/ Христа́ возвели́чим,/ прославля́ющаго Своя́ уго́дники.
Стих: Честна́ пред Го́сподем/ смерть преподо́бных Его́.
О, пресла́вное чу́до!/ В после́дняя времена́,/ я́ко заря́, облиста́л еси́, Мака́рие,/ мона́х и́стинен был еси́,/ любве́ яви́лся еси́ испо́лнен/ и, я́ко А́нгел на земли́ пожи́л еси́,/ изобража́я в себе́ добро́ту Боже́ственную./ Тем па́мять твою́/ почита́ем, досточу́дне.
Стих: Блаже́н муж, боя́йся Го́спода,/ в за́поведех Его́ восхо́щет зело́.
О, пресла́вное чу́до!/ Мака́рие ди́вный,/ Креста́ си́лою вооружи́вся,/ и, я́ко кре́пкий во́ин,/ победи́ неви́димых враго́в ополче́ния,/ и со А́нгелы ны́не водворя́ется./ Те́мже в па́мять его́ возопие́м:/ того́ моли́твами, Христе́ Бо́же,/ спаси́ ду́ши на́ша, я́ко Милосе́рд.
Сла́ва, глас 8:
Мона́хов мно́жества/ наста́вника тя почита́ем, о́тче наш Мака́рие,/ твое́ю бо стезе́ю вои́стинну пра́во ходи́ти позна́хом./ Блаже́н еси́ Христу́ рабо́тав,/ и вра́жию обличи́л еси́ си́лу,/ А́нгелов собесе́дниче,/ преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.
И ны́не, Богоро́дичен: Безневе́стная Де́во:
Тропа́рь, глас 8:
Плотска́я мудрова́ния, о́тче Мака́рие,/ воздержа́нием и бде́нием умертви́л еси́,/ ме́сто бо, на не́мже по́ты твоя́ излия́л еси́,/ я́ко труба́, вопие́т к Бо́гу,/ пове́даюши твоя́ исправле́ния,/ и по сме́рти честны́я твоя́ мо́щи источа́ют исцеле́ния./ Те́мже вопие́м ти:/ моли́ Христа́ Бо́га, да спасе́т ду́ши на́ша.
Сла́ва, и ны́не, Богоро́дичен: И́же нас ра́ди:
НА У́ТРЕНИ
На Бог Госпо́дь: тропа́рь то́йже, два́жды, Сла́ва, и ны́не, Богоро́дичен.
По 1-й стихоло́гии седа́лен, глас 8:
Заре́ю Боже́ственнаго сия́ния просвети́вся,/ оста́вил еси́ ми́ра жития́ вся/ и восприя́л еси́ со безпло́тными житие́ невеще́ственно,/ Ду́ха Боже́ственными благода́тьми усугу́бився,/ отону́дуже исцеле́ний дар восприя́л еси́./ Тем вопие́м ти:/ моли́ Христа́ Бо́га спасти́ся душа́м на́шим.
Сла́ва, и ны́не, Богоро́дичен:
Небе́сное благоче́стие си́лам и похва́льную высоту́ душа́м на́шим,/ Ма́терь Де́ву Отрокови́цу восхва́лим, ве́рнии:/ ра́дуйся, я́же А́нгелов Творца́ во утро́бе носи́вши./ Ра́дуйся, па́дающим очище́ние, Бо́га Сло́во вопло́щши./ Ра́дуйся, Неве́сто неневе́стная.
По 2-й стихоло́гии седа́лен, глас 2:
Страстны́я тьмы́ отбе́г, к безстра́стию путе́м наставля́емь,/ к Све́ту невече́рнему восте́кл еси́/ и, от Сего́ озари́вся, нетле́ния бога́тство насле́довал еси́./ Моли́ непреста́нно о всех нас.
Сла́ва, и ны́не, Богоро́дичен:
Души́ моея́ ле́ность лю́тую и се́рдца моего́ пренеможе́ние, Ма́ти Бо́жия,/ воззре́вши, исцели́ моли́твами Твои́ми/ и спасе́ных ча́сти сподо́би, избавля́ющи мя тьмы́ и муче́ния,/ я́ко еди́на упова́ние мое́ и утеше́ние.
По полиеле́и седа́лен, глас 6:
Воздержа́нием мно́гим мудрова́ния пло́ти умертви́л еси́,/ ду́шу украси́в оде́ждею безстра́стия,/ сле́зныя ка́пли с тече́нии по́тов совокупи́л еси́,/ Прише́д умо́м ко И́стинному Рачи́телю,/ испроси́ нам ве́лию ми́лость.
Сла́ва, и ны́не, Богоро́дичен:
От се́рдца стена́ние и от утро́бы Ти приноша́ю,/ Твое́, Пренепоро́чная, проси́ благопребы́тное заступле́ние:/ поми́луй всестрастну́ю мою́ ду́шу,/ умилосе́рди многоми́лостиваго Бо́га/ изба́вити мя суда́ и е́зера о́гненнаго,/ еди́на Благослове́нная.
Та́же, степе́нна, 1-й антифо́н, 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ безпоро́чно поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.
Кано́н, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Отве́рзи ми, Христе́, устне́ воспе́ти по́двиги уго́дника Твоего́, преподо́бнаго Мака́рия,/ да моли́твами свои́ми о́блак разори́т неве́дения моего́.
Блаже́нное житие́ на земли́ пожи́в, преподо́бне,/ Небе́сное наслажде́ние дости́гл еси́/ и ны́не со А́нгелы лику́еши.
Па́мять твоя́, Мака́рие преподо́бне, я́ко пресве́тлое со́лнце, возсия́,/ в ню́же нам испроси́ от Бо́га благода́ть и ми́лость/ и согреше́ний избавле́ние.
Богоро́дичен: Благослове́н Плод, Пречи́стая, чре́ва Твоего́,/ И́мже земни́и вси кля́твы изба́вихомся, Благослове́нная Всечи́стая,/ несказа́нное чу́до, неве́домое слы́шание,/ всех ве́рных спасе́ние.
Други́й кано́н, глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая.
Ума́ чи́стыми светлостьми́ Боже́ственная зря,/ му́жеским нра́вом, блаже́нне, к подвиго́м устреми́лся еси́,/ преми́рными блиста́нии трисо́лнечнаго све́та озаря́емь.
Поста́вив но́зе на ка́мени ве́ры,/ не поколеба́лся еси́, блаже́нне, от искуше́ний и наве́т вра́жиих,/ но, я́ко огнепа́льна звезда́, попаля́я вся благода́тию Пресвята́го Ду́ха.
Зако́ны Боже́ственный соблюда́я,/ побе́ду ве́чную взял еси́, преподо́бне, прогони́ти ду́хи лука́выя/ и сих до конца́ низложи́л еси́.
Богоро́дичен: Неизглаго́ланно зачала́ еси́ Бо́га/ и па́че естества́ родила́ еси́, Пречи́стая Влады́чице,/ земны́я от прегреше́ний изме́ншаго./ Те́мже молю́ Тя: мно́гих мя согреше́ний изба́ви.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.
Кре́пкою твое́ю моли́твою, о́тче, возше́л еси́ к преми́рному наслажде́нию/ и от честны́я ра́ки чуде́с сия́ния испуща́еши, Мака́рие.
В Боже́ственней па́мяти твое́й дне́сь соше́дшеся,/ воспева́ем твоя́ по́двиги, и боле́зни, и исправле́ния, о́тче преподо́бне.
Чу́дно житие́ твое́ яви́ся, преподо́бне,/ благода́тию Боже́ственнаго Ду́ха обложе́н,/ блаже́нную кончи́ну прия́л еси́, о́тче, ра́дуяся.
Богоро́дичен: От ложе́сн Твои́х, Пречи́стая,/ пра́вды Со́лнце возсия́ и мир просвети́,/ Его́же Боже́ственными заря́ми и мене́ просвети́.
Ин
Ирмо́с: Еди́не ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.
Я́коже честны́й би́сер, твоя́ мо́щи, преподо́бне, все́ми ви́димы, предлежа́т,/ разли́чная исцеле́ния неоску́дно подаю́ще.
Лику́ют собра́ния мона́шествующих, моле́бный соверша́юще пра́здник/ в честне́м твое́м преставле́нии, от души́ вопию́ще:/ помина́й ны, приснопомина́ющия тя.
Напра́вился еси́, преподо́бне, к Боже́ственным приста́нищем/ окормле́нием Христа́ Бо́га на́шего,/ напа́стей преше́д свире́пых волн.
Богоро́дичен: Де́ло, е́же соде́лал еси́, Го́споди, кто ска́жет?/ Ю́же бо прокля́л еси́ в печа́лех роди́ти ча́да,/ Сын Ея́ показа́лся еси́,/ и ра́дуется же́нское отпа́дшее естество́ о Тебе́, Бо́зе, Богоро́дицы ра́ди.
Седа́лен, глас 8:
Храни́тель сый Боже́ственных повеле́ний Влады́ки, сла́вне,/ чи́стое житие́ твое́ показа́ тя священноде́теля Боже́ственна,/ ка́плями по́тов твои́х пре́лести лю́тое у́глие погаси́л еси́/ и в ти́хое приста́нище дости́гл еси́,/ зри́ши, блаже́нне, Его́же возжеле́л еси́./ Те́мже вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
В простоте́ души́, я́ко А́нгел, пожи́в, блаже́нне,/ страсте́й разгна́л еси́ душетле́нную пре́лесть Боже́ственною благода́тию.
Че́стен сосу́д яви́лся еси́ Боже́ственнаго Ду́ха,/ нося́ в се́рдцы твое́м, блаже́нне, Боже́ственныя арома́ты,/ услажда́я сердца́ ве́рно па́мять твою́ почита́ющих.
Пресве́тлым венце́м обложе́н, предстои́ши Престо́лу всех Царя́:/ моли́ся, преблаже́нне, о ве́рою пра́зднующих Боже́ственную па́мять твою́.
Богоро́дичен: Зако́ны в Тебе́ испраздни́шася естества́,/ па́че естества́ бо Сло́во родила́ еси́./ Те́мже Тя ве́рою молю́:/ па́че естества́ челове́ча, Всенепоро́чная, мно́го согре́шша и Бо́га уда́льшася,/ обра́щшася, спаси́ мя моли́твами Твои́ми.
Ин
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Поче́т до́брыми твои́ми нра́вы Бо́га Преблага́го, Мака́рие./ Те́мже исцеле́ний исто́чник излива́еши,/ зной отгоня́я боле́зней же и печа́лей, му́дре.
Ны́нешняго жития́ красоты́ вся уме́ты вмени́л еси́,/ да Христа́ приобря́щеши,/ и сего́ ра́ди до́бре потруди́лся еси́, венцено́сче великоимени́тый.
Просте́р ум ко еди́ному Влады́це,/ вене́ц нетле́ния от Него́ прия́л еси́,/ сия́ющий све́тлыми светоли́тии и бога́тыми дарова́нии,/ иде́же перворо́дных жили́ща.
Богоро́дичен: Влады́чице ми́ра, Богоро́дице, помози́ ми,/ прелука́вый враг поглоща́ет мя зе́льне лю́тыми воспомина́нии и помышле́нии,/ я́же от Бо́га мя разлуча́ют,/ не оста́ви у́бо мене́, ниже́ пре́зри.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Егда́ благода́тию Ду́ха смире́нную стяжа́л еси́ му́дрость,/ ражда́ющему смерть врагу́ глубоку́ я́зву дал еси́/ и высокоу́мный того́ нрав до конца́ низложи́л еси́.
Возше́д ко оби́телем ве́чным, ли́ку преподо́бных причта́лся еси́, Мака́рие,/ с ни́миже нас помина́й, на земли́ тебе́ помина́ющих.
Да ублажи́тся досто́йно Мака́рий:/ поще́нием бо, и моли́твами, и слеза́ми Бо́гу соедини́ся/ и вся просвеща́ет духо́вною благода́тию.
Богоро́дичен: О Ма́ти Де́во Отрокови́це,/ я́же необыме́ннаго Бо́га пло́тию ро́ждшая,/ А́нгелов сла́ва и де́монов я́зва, Богоневе́сто,/ мое́ се́рдце, уязви́вшееся грехо́м, цельбы́ Боже́ственныя сподо́би.
Ин
Ирмо́с: Твой мир да́ждь нам, Сы́не Бо́жий,/ ино́го бо, ра́зве Тебе́, бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́.
Стра́сти попали́л еси́ огне́м воздержа́ния,/ ду́шу озари́в Боже́ственными сия́нии,/ де́монов прогони́тель яви́лся еси́, Боже́ственным Ду́хом просвеща́емь.
До́блести твоя́, Мака́рие, человекоуби́йца зре́ти не моги́й,/ искуше́ния тебе́ простира́ет,/ и́мже мужему́дренно противля́яся, до конца́ сего́ низложи́л еси́.
Мирска́го смуще́ния отбе́гл еси́,/ доброде́тельми удобри́в житие́ твое́,/ мона́хов утвержде́ние был еси́, о́тче Мака́рие преподо́бне.
Богоро́дичен: Ты кре́пость моя́, Ты похвала́ и ра́дование,/ Храни́тельница ми и заступле́ние, и прибе́жище,/ и Предста́тельница непобеди́ма, Пресвята́я Богоро́дице,/ те́мже спаси́ раба́ Твоего́.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
На земли́ до́бре пожи́л еси́, преподо́бне,/ и святы́х све́тлости, и ве́чных наслажде́ний блаже́нства ви́дети сподо́бился еси́.
Честна́ смерть яви́ся блаже́ннаго Мака́рия пред Тобо́ю, Бо́же вся́ческих,/ его́же па́мять почита́ющим врачевство́ безме́здно яви́л еси́.
Ду́ха благода́ть прия́л еси́, о́тче,/ неду́ги от челове́к прогоня́ти и вред де́монский истребля́ти,/ вели́кий уго́дник показа́вся Христа́ Бо́га на́шего.
Богоро́дичен: На́йде на Тя Вседе́тельный Дух, Всенепоро́чная,/ и Сло́во Бо́жие в Тя всели́ся,/ и пло́ть бы́сть несказа́нно, пребы́в неизме́нен.
Ин
Ирмо́с: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш:/ Ты бо кре́пость немощству́ющих и исправле́ние.
Ду́ха си́лою, блаже́нне, мы́сленных волко́в че́люсти сокруши́л еси́/ и просвеще́нным ра́зумом Небе́сную тишину́ получи́л еси́.
По́стническим огне́м искуси́вся, о́ко се́рдца твоего́ преочи́стив,/ и доброде́тельным нра́вом ду́шу просвети́л еси́.
Вни́де в тя раче́ние Соде́теля, Богому́дре,/ оста́вль земны́х пристра́стие,/ единосе́льник показа́лся еси́ Вы́шним служи́телем.
Богоро́дичен: Без се́мене во чре́ве Бо́га зачала́ еси́,/ Де́ва пребы́вши по рождестве́, Чи́стая, стра́шнем./ Те́мже хвала́ми Тя сла́вим, Тобо́ю изба́вльшеся кля́твы, Пречи́стая.
Конда́к, глас 2.
Подо́бен: Вы́шних ища́:
Вы́шних жела́я, воздержа́нием, и труды́, и по́ты наслади́вся,/ жела́ние пло́ти твоея́ обузда́в,/ чуде́с дар прие́м от Христа́ Бо́га,/ свети́льник яви́лся еси́ пресве́тлый./ Те́мже Христо́ва Це́рковь пе́сньми сла́вит тя,/ преподо́бне Мака́рие, о́тче наш.
И́кос:
А́нгел земны́й и челове́к Небе́сный,/ просия́л еси́ в воздержа́нии вся́цем/ моли́твою, и посто́м, и чистото́ю/ и, Боже́ственное тече́ние сконча́в,/ Вы́шняго нетле́ния прича́стник был еси́, Богоно́се,/ дерзнове́ние стяжа́в к Человеколю́бцу Бо́гу,/ И́же исцеле́ний благода́ть на неду́ги разли́чныя тебе́ дарова́./ Те́мже ти ве́рою вопие́м:/ ра́дуйся, всеблаже́нне о́тче, по́стников похвало́;/ ра́дуйся, целому́дрия сто́лпе,/ и́мже де́монския шата́ния искорени́шася;/ ра́дуйся, свети́льниче многосве́тлый,/ и́же чуде́с сия́нии вселе́нную просвеща́еши;/ ра́дуйся, я́ко ста́ду твоему́ подава́еши по́мощь и заступле́ние;/ ра́дуйся, крестоно́сному наро́ду на́шему похвала́ и утвержде́ние,/ его́же соблюди́ моли́твами твои́ми от враг ненаве́тна,/ да вси вопие́м ти:/ ра́дуйся, преподо́бне Мака́рие, о́тче наш.
Песнь 7
Ирмо́с: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
К Све́ту незаходи́му возше́д/ и, я́ко со́лнце, просвеща́еши вселе́нную,/ Све́та бо дела́ соверши́л еси́, Мака́рие преподо́бне,/ и ны́не вопие́ши:/ оте́ц на́ших Бо́же, благослове́н еси́.
Плотска́я движе́ния, преподо́бне, воздержа́нием и на земли́ лега́нием умертви́л еси́/ и доброде́телей просвеще́нием просия́л еси́, вопия́ Христу́:/ оте́ц на́ших Бо́же, благослове́н еси́.
Чу́дно житие́ твое́, преподо́бне, яви́ся,/ благода́тию Боже́ственнаго Ду́ха обложе́н,/ блаже́нную кончи́ну прия́л еси́, о Христе́ ра́дуяся,/ к Нему́же и взыва́л еси́:/ оте́ц на́ших Бо́же, благослове́н еси́.
Богоро́дичен: Ны́не вся испо́лнишася све́та Боже́ственнаго Тобо́ю, Пречи́стая,/ Ты бо две́рь яви́лася еси́, е́юже ми́ру Бог прии́де,/ просвеща́я ве́рою зову́щия:/ оте́ц на́ших Бо́же, благослове́н еси́.
Ин
Ирмо́с: Тебе́, у́мную, Богоро́дице, пе́щь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Воздержа́ния росо́ю до́блественне страстну́ю пе́щь погаси́л еси́,/ слез же ка́плями, возду́шных князе́й написа́ния растерза́л еси́/ и со дерзнове́нием вопия́л еси́ Христу́:/ оте́ц на́ших Бо́же, благослове́н еси́.
По́стников ты был еси́ похвала́, Мака́рие,/ кре́пко низложи́в де́монская шата́ния,/ и ны́не наслажда́ешися неизрече́нныя красоты́, вопия́ Христу́:/ оте́ц на́ших Бо́же, благослове́н еси́.
Еди́ному Бо́гу возложи́в ду́шу и помышле́ние, те́сный пу́ть ше́ствовал еси́,/ тем получи́л еси́ Небе́снаго Ца́рствия наслажде́ние./ И ны́не взыва́еши:/ оте́ц на́ших Бо́же, благослове́н еси́.
Богоро́дичен: Тро́ице во еди́нстве правосла́вно служа́ще,/ Тя, Ма́ти Де́во Чи́стая, я́ко Бо́га пло́тию ро́ждшую пропове́дающе,/ земни́и, боже́ственне пое́м:/ оте́ц на́ших Бо́же, благослове́н еси́.
Песнь 8
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Боже́ственными добро́тами наслажда́яся, чуде́с сия́нии вся просвеща́еши/ и де́монскую тьму́ разоря́еши Бо́жиею благода́тию, поя́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Блиста́яся благода́тию Боже́ственнаго Ду́ха, преподо́бне Мака́рие,/ честно́е твое́ творя́щим успе́ние/ све́тлыми твои́ми моли́твами испроси́ грехо́в отпуще́ние, пою́щим:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Заря́ми тве́рдых по́двиг твои́х, я́ко со́лнце, возсия́л еси́:/ врачева́ния источа́еши и вся́ку боле́знь облегча́еши Христу́ вопию́щим:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Богоро́дичен: Я́ко разбо́йник, взыва́ю Ти:/ помяни́ мя, Человеколю́бче./ Пла́чу, я́ко блудни́ца, и вопию́:/ согреши́х, я́ко дре́вле блу́дный,/ ка́ющася приими́ мя, отча́яннаго, Богоро́дицы ра́ди,/ да усе́рдно вопию́:/ свяще́ннии, воспо́йте, лю́дие, и превозноси́те Христа́ во ве́ки.
Ин
Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Ду́ха благода́ть прии́м, о́тче Мака́рие, сосу́д избра́нный показа́лся еси́,/ святы́ню прии́м от Христа́ Бо́га, Ему́же непреста́нно вопия́:/ да благослови́т тва́рь вся Го́спода и превозно́сит во вся ве́ки.
Боже́ственною си́лою укрепля́емь, победи́л еси́ неви́димых враг ополче́ния,/ к Све́ту прибли́жился еси́ невече́рнему, при́сно воспева́я:/ да благослови́т вся тва́рь Го́спода и превозно́сит во вся ве́ки.
Мона́шествующих был еси́ пра́вило пра́вости и стра́сти вся кре́пко попра́л еси́./ Те́мже, возше́д на высоту́, научи́л еси́ воспева́ти:/ да благослови́т тва́рь вся Го́спода и превозно́сит во вся ве́ки.
Богоро́дичен: Спасе́ния хода́таица нам яви́лася еси́, Богоро́дице,/ ро́ждшая Спа́са и Влады́ку всех./ Те́мже молю́ Тя:/ спасе́ния сподо́би смире́нную мою́ ду́шу/ песносло́вити Тя ве́рно во вся ве́ки.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Ра́ка, иде́же лежи́т честно́е те́ло твое́, исто́чник содева́ет чуде́с,/ к не́йже притека́юще, от вся́кия скве́рны и страсте́й избавля́емся.
Огне́м Боже́ственнаго стра́ха ду́шу распали́л еси́,/ и к сия́нию невече́рнему восте́кл еси́,/ и ны́не, блаже́нне, трисо́лнечным све́том озаряемь.
Мирски́я сла́дости возненави́дев,/ му́жеским нра́вом к подвиго́м устреми́лся еси́/ и преподо́бным красота́ ле́потна был еси́,/ тем па́мять твою́ почита́ем, досточу́дне.
Богоро́дичен: Низложи́ вознесе́нныя/ и победи́ полки́ иноплеме́нных, Де́во Чи́стая, хотя́щия бра́нем,/ и Твоя́ рабы́ невре́дны от них сохрани́, Отрокови́це.
Ин
Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем.
Мраз нощны́й до́блественне претерпе́л еси́ и вар дневны́й поне́сл еси́,/ дом Прему́дрости Бо́жия был еси́/ и возше́л еси́ на го́ру Боже́ственнаго ра́зума.
А́лчбою, и моли́твами непреста́нными, и чистото́ю Бо́гу соединя́яся,/ мно́жества мона́шествующих научи́л еси́/ веще́ственных всех огреба́тися.
Ста́до твое́, о́тче, возгна́л еси́ на па́жить чи́сту воздержа́ния,/ и приве́л еси́ к безстра́стия исто́чнику,/ и ны́не потщи́ся, па́стырю до́брый, сохрани́ти сие́ невре́дно.
Богоро́дичен: О Пресвята́я Де́во, Ма́ти Бо́га Вы́шняго!/ Твое́ Рождество́ на земли́ спасе́ние яви́ся гре́шником и смире́нным,/ о Тебе́ бо спасо́хомся, ве́ровавшии,/ но спаса́еши мя ны́не и во вся ве́ки жи́зненныя.
Свети́лен:
Многосве́тлый свети́льник, пусты́нное воспита́ние, чистоты́ сокро́вище,/ А́нгелом собесе́дниче, дом Ду́ха Пресвята́го, Мака́рие преподо́бне,/ непреста́нно моли́ся о ве́рою почита́ющих пречестну́ю па́мять твою́.
Богоро́дичен:
Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственных объя́тиях Боже́ственное Сло́во,/ Его́же пе́сньми досто́йно сла́вим.
На хвали́тех стихи́ры, глас 4.
Подо́бен: Я́ко до́бля:
От ю́ности возложи́вся Влады́це всех,/ Сего́ возжеле́л еси́,/ кре́пко к подвиго́м му́жески устреми́лся еси́,/ и обогати́лся еси́ Боже́ственною благода́тию/ твори́ти исцеле́ния/ и чудоде́йствовати пресла́вная,/ и возше́ствие к Небеси́ обре́л еси́,/ и, со А́нгелы лику́я, непреста́нно моли́ся/ о ста́де твое́м, Богоблаже́нне.
Со́лнца све́тлейши/ свяще́нная па́мять твоя́ провозсия́,/ всеблаже́нне Мака́рие,/ пресве́тлыми светлостьми́ озаря́я вся,/ по́двиги твоя́ почита́ющия./ Не преста́й моли́ся, блаже́нне,/ Просла́вльшему святу́ю твою́ па́мять/ и чуде́с сокро́вище тя су́щим в ми́ре/ Дарова́вшему, преподо́бне.
Мирски́я красоты́, блаже́нне,/ ра́дуяся, избе́гл еси́,/ тогда́ предпоче́л еси́/ те́сный и боле́зненный пу́ть/ и зело́ жесто́кий,/ и в слеза́х препроводи́л еси́ все житие́ твое́, преподо́бне./ Те́мже утеше́ния Боже́ственнаго/ и непреста́ннаго весе́лия/ ны́не наслажда́ешися, Мака́рие.
Сла́ва, глас 2:
Преподо́бне о́тче,/ измла́да в доброде́тели приле́жно подвиза́вся,/ сосу́д был еси́ Свята́го Ду́ха./ Тем и чуде́с дарова́ния прие́м,/ челове́ки научи́л еси́ преоби́дети маловре́менных,/ ны́не же неизрече́нным све́том све́тло сия́еши,/ просвети́ на́ша помышле́ния,/ о́тче преподо́бне Мака́рие.
И ны́не, Богоро́дичен.
Славосло́вие вели́кое. Ектении́ и отпу́ст.
НА ЛИТУРГИ́И
Блаже́нны от кано́на, песнь 3-я, пе́рваго кано́на, и песнь 6-я, втора́го кано́на. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:
