Служба преподобнаго отца нашего Григория, иже на Пельшме реце, Вологодскаго чудотворца

НА ВЕЛИ́ЦЕЙ ВЕЧЕРНИ

Блаже́н муж: 1-й антифо́н.

На Го́споди, воззва́х: стихи́ры преподо́бнаго, глас 8.

Подо́бен: О, пресла́внаго чудесе́:

Преподо́бне о́тче Григо́рие,/ мирски́я себе́ отлучи́л еси́ молвы́,/ терпе́нием же, и посто́м, и ча́стыми моли́твами/ плоть твою́ покори́л еси́ ду́ху,/ и зми́я лука́ваго слез ту́чами потопи́л еси́, блаже́нне,/ и к преми́рному возше́л еси́ соверше́нию./ Те́мже, почита́юще па́мять твою́, преподо́бне, мо́лим тя:/ моли́ Христа́ Бо́га/ спасти́ся душа́м на́шим.

Преподо́бне о́тче Григо́рие,/ мирски́й мяте́ж оста́вив и взем крест твой,/ после́довал еси́ Христу́ невозвра́тным по́мыслом,/ и, в пусты́ню всели́вся, преподо́бне,/ душе́вныя стра́сти из ко́рене исто́ргл еси́,/ и, теле́сная чу́вства огорчева́я,/ злострада́ния претерпе́л еси́ во бде́нии с чи́стою со́вестию,/ и А́нгелов собесе́дник быв, блаже́нне,/ моли́ спасти́ся душа́м на́шим.

Преподо́бне о́тче Григо́рие,/ впери́в ум твой к Бо́гу ве́рою,/ плотска́го смеше́ния/ возгнуша́лся еси́ неуста́внаго/ и, крест твой восприи́м,/ Всеви́дцу после́довал еси́,/ те́ло непокори́вое/ по́двиги воздержа́ния и по́мысла си́лою/ порабо́тив Боже́ственному Ду́ху.

Преподо́бне о́тче Григо́рие,/ сла́ву маловре́менную оста́вив/ и в пусты́ню всели́вся,/ был еси́ доброде́тели подви́жник приле́жный,/ жесто́ким воздержа́нием же и посто́м плоть твою́ изнури́в;/ того́ ра́ди Христо́с обогати́ тя чудесы́./ Но помина́й ны, ча́да твоя́,/ ве́рою соверша́ющия всесвяще́нную па́мять твою́,/ и испроси́ спасе́ние душа́м на́шим.

Сла́ва, глас 8. Самогла́сен:

Преподо́бне о́тче Григо́рие,/ ми́ра красоты́ отре́клся еси́,/ и, вся́кое наслажде́ние маловре́менных возненави́дев,/ мона́шеское житие́ па́че возлюби́л еси́,/ и в нем вельми́ подвиза́вся вся́ким злострада́нием,/ за́дняя забыва́я, на пре́дняя же простира́яся;/ и того́ ра́ди А́нгелов собесе́дник бы́ти сподо́бился еси́./ Но помина́й ста́до твое́, е́же собра́л еси́, му́дре,/ чту́щих ве́рою па́мять твою́,/ я́ко дерзнове́ние име́я ко Христу́ Богу,/ моли́ спасти́ся душа́м на́шим.

И ны́не, Богоро́дичен, глас то́йже: Царь Небе́сный:

Вход, проки́мен дне. Чте́ния три преподо́бническая.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На стихо́вне стихи́ры, глас 5.

Подо́бен: Ра́дуйся:

Ра́дуйся, преподо́бне о́тче Григо́рие,/ ты бо, и́го Христо́во на ра́мо взем до́блественне,/ наи́тия вра́жия попра́л еси́,/ в пусты́ню бо всели́вся,/ и в ней обре́л еси́ Небе́сную ле́ствицу./ Те́мже вси ве́рою почита́ем па́мять твою́,/ о всеблаже́нне Григо́рие, мона́шествующих похвало́,/ Христа́ непреста́нно моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Ра́дуйся, о́тче Григо́рие,/ мона́хов мно́гих наста́вник быв,/ те́мже, ве́рою соше́дшеся,/ вси по достоя́нию тя чтим,/ я́ко по́стника и служи́теля Христо́ва изя́щнаго,/ ра́дуяся бо, ше́ствовал еси́ в пусты́ни непрохо́дней, му́дре,/ вся озлобле́ния претерпева́я,/ благода́тию Бо́жиею укрепля́емь,/ те́мже тебе́ взыва́ем:/ о нас моли́ся/ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, о́тче Григо́рие преподо́бне,/ сле́зными исто́чники ду́шу твою́ очища́я/ и всено́щным стоя́нием Бо́га моля́,/ от Него́же благода́тию укрепля́емь,/ земны́я ве́щи му́дре мимоте́кл еси́,/ собра́л же еси́ в ду́шу твою́ Боже́ственное бога́тство Ду́ха:/ непоро́чную моли́тву,/ чистоту́ красноле́пну, бде́ние тве́рдо./ Те́мже и вы́шняго прия́тия насле́дник яви́лся еси́,/ и, ны́не в Небе́сных селе́ниих водворя́яся,/ моли́ спасти́ся душа́м на́шим.

Сла́ва, глас 8. Самогла́сен:

Преподо́бне и преблаже́нне, святе́йший о́тче Григо́рие,/ любве́ ра́ди Христо́вы вся оста́вил еси́,/ бога́тство и сла́ву в ничто́же вмени́в,/ и, в пусты́ню вшед, бде́ние же и сухояде́ние восприи́м/ и е́же на земли́ лега́ние,/ и́миже чистоту́ душе́вную и теле́сную испра́вил еси́,/ устна́ми же и умо́м соверше́нное безмо́лвие,/ у́зкий путь и безстра́стный и ско́рбную жизнь,/ ра́дуяся, ше́ствовал еси́./ Те́мже ве́рою вопие́м ти:/ о всеблаже́нне Григо́рие,/ Христа́ непреста́нно моли́/ спасти́ся душа́м на́шим.

И ны́не, Богоро́дичен, глас то́йже: Безневе́стная Де́во:

Тропа́рь, глас 8:

Любо́вию Христо́вою, богому́дре, просвети́вся, доброде́тельми облиста́л еси́/ и, вся́кое наслажде́ние плотско́е возненави́дев и в пусты́ню всели́вся,/ в не́йже вельми́ подвиза́лся еси́ в жи́зни сей вре́менней/ в пе́ниих, и во бде́ниих, и в поще́ниих,/ сего́ ра́ди и Христо́с да́ром чуде́с обогати́ тя;/ но помина́й нас, чту́щих пресве́тлую па́мять твою́, преподо́бне о́тче Григо́рие,/ и моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь свята́го два́жды. Сла́ва, и ны́не, Богоро́дичен.

По 1-м стихосло́вии седа́лен, глас 5.

Подо́бен: Собезнача́льное:

Печа́ли жития́ отве́ргся и а́нгельское восприи́м житие́,/ воздержа́нием ду́шу удобри́л еси́/ и чуде́с благода́ть от Бо́га прия́л еси́ бога́тно, Григо́рие блаже́нне;/ о нас моли́ся, благоче́стно восхваля́ющих тя.

Сла́ва, и ны́не, Богоро́дичен:

Пречи́стая Де́во, нас поми́луй, ве́рою прибега́ющих к Тебе́, Милосе́рдой,/ и прося́щих Твоего́ те́плаго, Влады́чице, заступле́ния,/ мо́жеши бо, я́ко Блага́, всех спасти́, я́ко су́щи Ма́ти Бо́га вы́шняго,/ Ма́терними Твои́ми мольба́ми при́сно объе́мши, Богора́дованная.

По 2-м стихосло́вии седа́лен, глас 8.

Подо́бен: Прему́дрости:

Мно́гим воздержа́нием, преподо́бне, житие́ твое́ украси́в,/ путь показа́л еси́ хотя́щим, веду́щий в жизнь, доброде́тельми и смире́нием,/ ми́ра бо отве́ргся и вся, я́же в ми́ре кра́сная, преоби́дев,/ Ева́нгельским уче́нием после́довал еси́,/ жесто́ким у́бо житие́м плоть твою́ изнуря́я,/ и го́рдаго зми́я воздержа́нием уби́л еси́,/ те́мже на Небесе́х водворя́ешися, Трисо́лнечному Божеству́ предстоя́, блаже́нне Григо́рие,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и де́моном игра́лище в ра́зуме бы́вша,/ потщи́ся тех злоде́йства мя изба́вити и све́тлое жили́ще доброде́телей соверши́,/ Светоно́сная, Нетле́нная, отжени́ о́блак страсте́й/ и Вы́шняго прича́стия сподо́би и све́та невече́рняго моли́твами Твои́ми.

По полиеле́и седа́лен, глас 8.

Подо́бен: Прему́дрости:

Нищету́ у́бо возлюби́л еси́ па́че бога́тства тле́ннаго/ и сою́зом любве́ привяза́ся,/ земна́я и мимотеку́щая возненави́дев, блаже́нне,/ пусты́нное озлобле́ние усе́рдно подъе́м,/ те́мже и к ре́вности а́нгельскаго жития́ воздви́гл еси́ мно́жество мона́шествующих,/ преподо́бне о́тче наш Григо́рие, моли́ Христа́ Бо́га/ грехо́в оставле́ние дарова́ти нам и ве́лию ми́лость.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся/ и Младе́нец бысть пре́жде век сый Бог наш;/ ложесна́ бо Твоя́ престо́л сотвори́ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви: Вся́кое дыха́ние: Ева́нгелие преподо́бническое.

По 50-м псалме́ стихи́ра, глас 8: Преподо́бне и преблаже́нне: зри на вече́рни, на стихо́вне, сла́вник.

Кано́н Богоро́дицы, со ирмосо́м на 6.

И свята́го, на 8. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Земна́я и мимотеку́щая я́ко уме́ты вмени́в,/ Христа́ Еди́наго приобре́л еси́,/ Его́же любо́вию уязви́в ду́шу твою́, Григо́рие преподо́бне,/ моли́ся ко Го́споду нас просвети́ти.

Возше́д на высоту́ доброде́телей,/ до́лу влеку́щия сла́сти оплева́л еси́,/ сла́дость показа́л еси́ спасе́ние,/ о́тче преподо́бне, ста́ду твоему́.

Нахожде́ния вра́жия лука́вых духо́в,/ от Бо́га сокруше́нным се́рдцем прие́м по́мощь,/ Григо́рие блаже́нне,/ и воздержа́нием огради́вся, победи́л еси́ их.

Богоро́дичен: Прему́дрость Бо́жию вои́стину,/ Сло́во О́тчее несказа́нно ро́ждшая,/ души́ моея́ лю́тую я́зву исцели́/ и серде́чную боле́знь, Ма́ти Бо́жия, укро́ти́.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Попали́л еси́ у́глием воздержа́ния/ страсте́й те́рние, преподо́бне,/ и прогоня́я нечи́стыя ду́хи, богоблаже́нне.

Я́ко свети́льник,/ твою́ ду́шу сле́зными пото́ки украша́я, преподо́бне,/ се́рдце твое́ поже́рл еси́ Бо́гу.

Стра́сти душетле́нныя успи́л еси́/ бо́дростными моли́твами и бде́ньми, всеблаже́нне,/ те́мже в Небе́сный черто́г всели́лся еси́, ра́дуяся.

Богоро́дичен: Уста́ви неуста́вное помышле́ний мои́х, Чи́стая, смуще́ние,/ Ма́ти Бо́жия,/ к Сы́ну Твоему́ направля́ющи моя́ движе́ния.

Седа́лен, глас 8.

Подо́бен: Прему́дрости:

Красоты́ мирски́я от млады́х ногте́й, преподо́бне, возненави́дев,/ Христа́ же Еди́наго от се́рдца возлюби́л еси́/ и, Тому́ вседу́шно прилепи́вся,/ я́ко безпло́тен, на земли́ пожи́л еси́ с пло́тию,/ сла́ву же мимотеку́щую и бога́тство в ничто́же вмени́в,/ Небе́сное бога́тство восприя́л еси́ и сла́ву ве́чную./ Те́мже и ублажа́ем свято́е Твое́ успе́ние/ и, в нем торжеству́юще, вопие́м ти:/ богоно́сне о́тче наш Григо́рие,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен: Я́ко Всенепоро́чная: пи́сан по 2-м стихосло́вии.

Песнь 4

Ирмо́с: Услы́шах, Го́споди,/ смотрения Твоего́ та́инство,/ разуме́х дела́ Твоя́/ и просла́вих Твое́ Божество́.

Я́ко в поро́де благово́нней и доброде́тели в раи́ одушевле́ннем,/ воздержа́нием процве́л еси́,/ и́мже пита́еши чту́щия тя.

Ми́ра любве́ отре́кся, дости́же го́рняго Иерусали́ма,/ иде́же Христо́с со Отце́м и Ду́хом,/ и венца́ от Него́ сподо́бися, со безпло́тными ли́ки поя́:/ сла́ва си́ле Твое́й, Го́споди.

Законополо́жника воздержа́нию мона́хов и пра́вило кро́тости,/ я́ко Моисе́я тя и Дави́да вои́стину/ стяжа́вше, о́тче, ублажа́ем.

Богоро́дичен: Под ле́том бы́вша,/ И́же от Отца́ безле́тно возсия́вшаго,/ Богома́ти, нам родила́ еси́,/ Его́же моли́ спасти́ пою́щия Тя.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Страсте́й мглу отгна́в, преподо́бне, заря́ми, о́тче, по́двиг твои́х/ и просвеще́ние ду́ха в се́рдцы восприи́м, Григо́рие,/ и́мже попали́л еси́ вся де́монская ополче́ния/ и лико́м по́стническим причта́лся еси́.

Погаси́в стра́сти росо́ю воздержа́ния, о́тче блаже́нне,/ бога́тно вжегл еси́ огнь любве́, и ве́ры, и поще́ния,/ свети́льник, просвеща́яся безсме́ртием, и дне сын, о́тче, был еси́.

Удобри́в свяще́нную твою́ ду́шу,/ о́тче всеблаже́нне Григо́рие, изволе́нием простоты́,/ и ху́дость ри́зную име́л еси́,/ те́мже украше́ние доброде́тельно показа́лся еси́/ чту́щим всечестну́ю па́мять твою́.

Богоро́дичен: Еди́на ро́ждши Де́ва, еди́на муженеиску́сна яви́лася еси́, Всенепоро́чная,/ во утро́бе бо Сло́во О́тчее прие́мши безнача́льное,/ и млеко́м дои́ши, Де́во, чу́до стра́нно/ и, де́вствующи, зако́ны обновля́еши естества́.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Собра́л еси́ в души́ твое́й боже́ственныя плоды́ Ду́ха:/ непоро́чну моли́тву, чистоту́ же кра́сну/ и бде́ние тве́рдо, воздержа́ния боле́зни,/ и́миже храм показа́лся еси́ Бо́га Вседержи́теля.

Душе́вный ра́зум впери́в, сла́вне,/ и чу́вствия окорми́в, му́дре,/ святы́ню благоче́стия су́щим на земли́ возвеща́л еси́/ и е́же к Небеси́ восхожде́ние.

Земны́х веще́й ху́дость мимоте́кл еси́, му́дре,/ невеще́ственною же моли́твою на Небеса́ возлете́л еси́/ и вы́шняго восприя́тия насле́дник яви́лся еси́/ жития́ соверше́нием.

Богоро́дичен: Прия́ла еси́ вои́стину Боже́ственное Сло́во в ложесна́ Твоя́/ и Сего́ па́че естества́, Пречи́стая, родила́ еси́,/ Его́же мольба́ми Твои́ми умоли́/ от бед вся изба́вити рабы́ Твоя́.

Конда́к, глас 8:

Христо́вою любо́вию уязви́вся, преподо́бне,/ и Тому́ невозвра́тным жела́нием после́довал еси́,/ вся́кое наслажде́ние плотско́е возненави́дев/ и в пусты́ню всели́вся, в ней вельми́ подвиза́лся еси́;/ тем и Христо́с да́ром чуде́с обогати́ тя./ Помина́й нас, чту́щих пресве́тлую па́мять твою́, да зове́м ти:/ ра́дуйся, преподо́бне Григо́рие, о́тче наш.

И́кос:

Ева́нгельский глас, о́тче, услы́шав,/ вся оста́вил еси́ плотска́я мудрова́ния,/ бога́тство и сла́ву в ничто́же вмени́в,/ и на стра́сти, я́ко безпло́тен, подвиза́лся еси́,/ и безпло́тных ликостоя́нием чистото́ю уподо́бился еси́,/ и ра́зума дарова́ние от Бо́га прия́л еси́,/ е́же пода́ждь в пе́снех пою́щему ти си́це:/ ра́дуйся, Григо́рие преподо́бне и богоно́сне,/ Небе́сный челове́че и земны́й А́нгеле,/ ра́дуйся, Ду́ха Свята́го прекра́сное оби́телище,/ ра́дуйся, богоблаже́нне, вельми́ подвиза́вся во вре́менней жи́зни,/ по достоя́нию обогати́лся еси́ благода́тию Ду́ха,/ ея́же дарова́ние пода́ждь нам, ча́дом твои́м, да зове́м ти:/ ра́дуйся, преподо́бне Григо́рие, о́тче наш.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

В зла́це боже́ственных наказа́ний ста́до, о́тче, воспита́л еси́/ и жезло́м уче́ния зве́ри отгна́в ересе́й, поя́:/ отце́в на́ших Бо́же, благослове́н еси́.

Зе́льным поще́нием, я́ко благово́нною пи́щею, пита́я ду́шу твою́, преподо́бне Григо́рие,/ те́мже и Трисо́лнечному Божеству́ предста́ти сподо́бился еси́, со А́нгелы поя́:/ отце́в на́ших Бо́же, благослове́н еси́.

В приста́нище ти́хое вшед, богому́дре, жите́йских пла́ваний отбе́г/ и волну́емых в бу́ри стра́шней спаси́тельное окормле́ние был еси́, воспева́я:/ отце́в на́ших Бо́же, благослове́н еси́.

Богоро́дичен: Изба́вихомся вси от страсте́й и бед, обстоя́ний и неду́гов многообра́зных/ моли́твами Твои́ми, Богома́ти,/ Сы́ну Твоему́ зову́ще:/ благослове́н Бог отце́в на́ших.

Песнь 8

Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.

В поще́ниих кре́пкое и в моли́твах неле́ностное,/ терпе́ние во искуше́ниих, Григо́рие преподо́бне, на земли́ показа́л еси́,/ Бо́гу предстоя́, зове́ши:/ хвали́те и превозноси́те Его́ во ве́ки.

Уязви́вся боже́ственным жела́нием, всеблаже́нне,/ те́мже и непоро́чно и пра́ведно житие́ проше́л,/ до́ндеже дости́гл еси́ Ца́рскаго Престо́ла, со А́нгелы поя́:/ хвали́те и превозноси́те Его́ во ве́ки.

Укра́шен доброде́тельми, в по́стницех я́ко А́нгел показа́лся еси́,/ во све́те неизрече́нныя сла́вы почива́еши,/ песнь воспева́я Христу́ Бо́гу:/ хвали́те, по́йте и превозноси́те Его́ во ве́ки.

Богоро́дичен: Поглоще́ннаго боле́зньми и па́дшаго/ возста́ви, Богома́ти,/ я́ко да Тя сла́влю во вся ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Душетле́нныя стра́сти победи́в/ и я́ко па́стырь и́стинный, упа́сл еси́ слове́сное ста́до,/ я́ко цве́ты ра́йскими, напитава́я сих благода́тию, блаже́нне.

У́зкий и приско́рбный ше́ствовав путь, о́тче Григо́рие,/ теле́сне у́бо преста́вился еси́, ду́хом же жив Бо́гу предстои́ши,/ но я́ко име́я дерзнове́ние к Бо́гу, моли́ спасти́ся нам.

Преде́л неукло́нен ве́ры/ и воздержа́ния о́браз иму́ще по́двиги твоя́, преподо́бне,/ вои́стину Зижди́теля пе́сньми велича́ем.

Богоро́дичен: В Тя всели́ся, Всенепоро́чная,/ и и́же пе́рвее родонача́льным злообра́зно запе́нша/ человекоуби́йцу низложи́в,/ Роди́выйся из Тебе́ вся ны спасл есть.

Свети́лен:

Мирска́го пристра́стия, я́ко от скве́рны, уклони́лся еси́,/ и, а́лчбою плоть увяди́в, обнови́л еси́ ду́шу му́жеством, преподо́бне,/ и сла́вою обогати́лся еси́ Небе́сною, сла́вне./ Те́мже моля́ не преста́й о хва́лящих тя,/ о́тче Григо́рие преподо́бне.

Сла́ва, и ны́не, Богоро́дичен:

Вои́стину Богоро́дицу Тя испове́дуем, Влады́чице, спа́сшиися Тобо́ю,/ Бо́га бо неизрече́нно родила́ еси́,/ разо́ршаго Кресто́м смерть,/ к Себе́ же приве́дша преподо́бных собо́ры,/ с ни́миже Тя восхваля́ем, Де́во.

На хвали́тех стихи́ры на 4, глас 6. Самогла́сны:

Богому́дре Григо́рие,/ сла́ву маловре́менную оста́вив/ и в пусты́ню всели́вся,/ плотско́е мудрова́ние все ду́ху повину́л еси́;/ поще́ньми и страда́ньми утверди́вся,/ ко отце́м преста́вился еси́ в ста́рости до́брей./ Те́мже мо́лим тя ны́не, ча́да твоя́:/ моли́ о нас, спасти́ся душа́м на́шим.

Возсия́ днесь пресве́тлая и всепра́зднственная па́мять твоя́,/ о́тче преподо́бне Григо́рие,/ созыва́ющи многочи́сленное по́стников сосло́вие/ и преподо́бных ликостоя́ние,/ А́нгелы же с челове́ки/ я́ко вои́стину к похвале́нию/ в Тро́ице покланя́емаго Бо́га на́шего,/ Его́же моли́ о душа́х на́ших.

Богоно́сне и преподо́бне, блаже́нный о́тче Григо́рие,/ не дал еси́ сна твои́м очесе́м,/ ни ве́ждом дрема́ния,/ серде́чное жела́ние е́же ко Христу́ си́ми явля́я,/ Его́же от ю́ности возлюби́л еси́,/ и живя́ше в тебе́ Христо́с Бог наш/ со Отце́м и Святы́м Ду́хом./ Того́ моли́, богоблаже́нне о́тче,/ спасти́ся душа́м на́шим.

Сла́ва, глас 8:

Преподо́бне о́тче Григо́рие,/ глас Ева́нгельский услы́шав,/ мир оста́вил еси́,/ бога́тство и сла́ву в ничто́же вмени́в,/ ду́шу с те́лом очи́стив от всех страсте́й,/ и Свята́го Ду́ха прекра́сная оби́тель яви́лся еси́ и вселе́ние,/ и ра́дость ве́чную восприя́л еси́, блаже́нне и прему́дре./ Те́мже и стада́ мона́хов со архиере́йскими чи́нми, чудесы́ удивля́еми,/ достоле́пно и ра́достно от души́ вопие́м Ти:/ богоблаже́нне преподо́бне о́тче наш Григо́рие,/ моли́ Христа́ Бо́га уще́дрити мир/ и спасти́ ду́ши на́ша.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На Литурги́и слу́жба преподо́бническая.

Моли́тва

О свяще́нная главо́, преподо́бне о́тче, преблаже́нне а́вво Григо́рие! Не забу́ди чад твои́х, и́хже богоуго́дными труды́ и моли́твенными по́двиги духо́вно породи́л еси́; помина́й нас во святы́х твои́х благоприя́тных моли́твах и назида́й предста́тельством твои́м ста́до твое́, е́же сам упа́сл еси́; моли́ за ны, о́тче свяще́нный, де́ти твоя́ духо́вныя, я́ко име́яй дерзнове́ние к Небе́сному Царю́; не премолчи́ за ны ко Христу́ и не пре́зри нас, ве́рою и любо́вию чту́щих тя. Помина́й недосто́йных нас пред Престо́лом Вседержи́теля, тебе́ бо даде́ся благода́ть моли́тися за ны. А́ще бо те́лом преста́вился еси́ от нас, но и по сме́рти жив во Христе́ пребыва́еши. Не отступи́ от нас ду́хом, сохраня́й нас от стрел вра́жиих, от пре́лести бесо́вския и ко́зней диа́вольских, па́стырю наш до́брый. Се бо, ра́кою моще́й твои́х пребыва́я с на́ми, свято́ю твое́ю душе́ю с Небе́сными Си́лами у Престо́ла Вседержи́телева предстои́ши и та́мо досто́йно сла́виши Го́спода. Те́мже, припа́дающе со умиле́нием, мо́лимся тебе́ о спасе́нии душ на́ших: испроси́ нам вре́мя на покая́ние и невозбра́нно прейти́ от земли́ на Не́бо чрез мыта́рства го́рьких бесо́в, да твои́м предста́тельством от ве́чныя му́ки изба́вльшеся, Небе́сное Ца́рствие насле́довати сподо́бимся со все́ми пра́ведными, от ве́ка угоди́вшими Христу́ Го́споду на́шему, Ему́же подоба́ет вся́кая сла́ва, честь и поклоне́ние, ны́не и в безконе́чныя ве́ки веко́в. Ами́нь.