Служба преподобнаго отца нашего Георгия Хозевита и преподобныя Домники

На Го́споди, воззва́х: стихи́ры преподо́бнаго, глас 4.

Подо́бен: Я́ко до́бля:

Твоея́ души́ краегра́дия помысло́в/ не поколеба́ша прило́ги, блаже́нне:/ ты бо, я́коже забра́ло, предложи́в/ тве́рдое твое́ поще́ние,/ соблю́л еси́ тебе́ сама́го/ от лю́таго борца́ неуя́звлена/ и невре́дна весьма́/ и предста́л еси́ Влады́це всех,/ победи́тельно венча́емь.

Долележа́нием та́емь, и слеза́ми дручи́мь,/ и всено́щными стоя́нии изнуря́емь,/ мона́хов бы́л еси́ о́браз велича́йший,/ и о́бщее пра́вило, и хвалы́ вене́ц./ Всяк бо вид доброде́телей испра́вил еси́,/ и Вы́шняго Ца́рствия насле́дник яви́лся еси́, му́дре, воздержа́нием.

Ни пути́ долгота́ возмо́же,/ ниже́ мест же́стость/ разсла́бити, преподо́бне, теплоту́ к Бо́гу ше́ствия твоего́,/ и та́мо у́бо быв, и на ме́стех возвесели́вся,/ иде́же но́ги ходи́ша Бо́га нашего,/ не неради́л еси́ отню́д,/ до́ндеже дости́гл еси́/ воздержа́нием и боле́зньми,/ и к Сио́ну Небесному.

И́ны стихи́ры преподо́бныя, глас то́йже.

Подо́бен: Дал еси́ зна́мение:

Серде́чное жела́ние явля́ющи слеза́ми,/ умиле́нием, сла́вная, зе́млю омочи́ла еси́,/ и власы́ оте́рла еси́ Христо́во подно́жие,/ помышля́ющи же, и Того́ я́ко прису́ща ви́дящи,/ Его́же возлюби́ла еси́/ и стопа́м после́довала еси́ мы́слию,/ виде́ньми же Боже́ственнейшими/ твою́ душу просвети́ла еси́.

От за́падов возсия́ла еси́ к восто́ку, всеблаже́нная,/ я́ко звезда́ светле́йшая луча́ми блиста́ющи/ твои́х доброде́тельных дея́ний, преподо́бная,/ и просвети́ла еси́ ве́рных мы́сли сия́нием чуде́с твоих./ Те́мже тя блажи́м, и твою́ па́мять почита́ем,/ Христа́ велича́юще,/ че́стно тя просла́вльшаго.

Уязви́вшися жела́нием Христо́вы любве́,/ о Домни́ко всехва́льная,/ Тому́ после́довала еси́,/ отве́ргшися тле́нныя сла́вы,/ и плотски́х сласте́й,/ и вся́каго жития́ ина́го наслажде́ния./ Тем тя всели́ в светле́йший черто́г/ Иису́с Человеколю́бец и Спас душ наших.

Сла́ва, и ны́не, глас 1:

Облага́яй Не́бо о́блаки,/ струя́ми одева́ется днесь Иорда́нскими,/ и мои́м очища́ется чище́нием,/ ми́ра взе́мляй грех,/ и от сро́днаго свы́ше свиде́тельствуется Ду́ха,/ Сын, Единоро́ден Сый Вы́шняго Отца́./ К Нему́же возопии́м:/ явле́йся и спасый нас,/ Христе́ Бо́же наш, сла́ва Тебе́.

На стихо́вне стихи́ры, глас 6.

Подо́бен: А́нгельския предыди́те си́лы:

Светлый и просвеща́яй челове́ки,/ Свет самосия́нный Ты сый, Иису́се мой,/ в струя́х Иорда́нских кре́щся,/ весьма́ просия́л еси́,/ Све́те, Единосу́щный Отцу́ Твоему́,/ И́мже вся тварь просве́щшися, Христе́, зове́т Тебе́:/ благослове́н, явле́йся Бо́же наш, сла́ва Тебе́.

Стих: Мо́ре ви́де и побеже́,/ Иорда́н возврати́ся вспять.

Я́ко дово́льно насы́титися Боже́ственныя сла́вы,/ прииди́те мы́сленно, очи́стим чу́вствия/ и Христа́ ви́девше, пло́тию креща́ема,/ и льсти́ваго сокруша́юща главу́,/ ра́достно песносло́вяще, Тому́ возопие́м:/ благослове́н, явле́йся Бо́же наш, сла́ва Тебе́.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспять?

Водо́ю живи́тельною Ты напая́еши, Иису́се мой,/ в реце́ Иорда́не благоутро́бием,/ нас, изгоре́вшия жа́ждею, Человеколю́бче,/ я́ко от исто́чника Твоего́ напи́вшеся/ безсме́ртнаго и светоно́снаго, Христе́, пое́м:/ благослове́н, явле́йся Бо́же наш, сла́ва Тебе́.

Сла́ва, и ны́не, глас 2:

На Иорда́нстей реце́/ видев Тя Иоа́нн, к себе́ гряду́ща, глаго́лаше:/ Христе́ Бо́же, что к рабу́ прише́л еси́,/ скве́рны не имы́й, Го́споди?/ Во и́мя же чие́ Тя крещу́?/ Отца́? – но Того́ но́сиши в Себе./ Сына? – но Сам еси́ воплоти́выйся./ Духа Свята́го? -/ И Сего́ ве́си дая́ти ве́рным усты́./ Явле́йся Бо́же, поми́луй нас.

Тропа́рь пра́здника, глас 1:

Во Иорда́не креща́ющуся Тебе́, Го́споди,/ Тро́йческое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух в ви́де голуби́не/ изве́ствоваше словесе́ утвержде́ние./ Явле́йся Христе́ Бо́же/ и мир просвеще́й, сла́ва Тебе́.

НА У́ТРЕНИ

На Бог Госпо́дь: тропа́рь пра́здника, три́жды.

По 1-й стихоло́гии седа́лен, глас 4.

Подо́бен: Удиви́ся Ио́сиф:

Иису́с Нави́н во Иорда́не реце́, преводя́ лю́ди, и Бо́жий киво́т,/ сеннопи́шет бу́дущее благоде́тельство:/ о́браз бо нам изображе́ния, и начерта́ние нело́жно порожде́ния,/ та́йное прехожде́ние обои́ми сеннопи́шет Духом./ Христо́с яви́ся на Иорда́не освяти́ти во́ды.

Сла́ва, и ны́не: то́йже.

По 2-й стихоло́гии седа́лен, глас 8.

Подо́бен: Свире́лей па́стырских:

Креща́ется Христо́с, просвеща́я мир./ С высоты Оте́ц свиде́тельствова, глаго́ля:/ Сей есть Сын Мой, о Не́мже благоизво́лих,/ Того́ послу́шайте,/ Сей есть просвеща́яй вселе́нную благоутро́бием Свои́м,/ крести́выйся и спасы́й я́ко Бог род челове́ческий.

Сла́ва, и ны́не, то́йже.

Кано́н пра́здника пе́рвый (зри в сам день пра́здника), со ирмосо́м на 6, глас 2. И святы́х два кано́на, на 8. Кано́н преподо́бнаго, глас 4.

Песнь 1

Ирмо́с: Отве́рзу уста́ моя́,/ и напо́лнятся Духа,/ и сло́во отры́гну Цари́це Ма́тери,/ и явлю́ся, светло торжеству́я,/ и воспою́, ра́дуяся, Тоя́ чудеса́.

Отверзе́ние уст да́ти мне благода́ть моли́ прему́дрости, Гео́ргие, нача́ло Иису́са,/ я́ко да воспою́ твою́ па́мять по досто́инству, неразумный,/ пе́сньми Боже́ственными, ра́дуяся.

На земли́ пожи́л еси́, я́ко безпло́тен, сла́вне,/ совокупи́лся же еси́ отсю́ду безпло́тным лико́м,/ Безпло́тнаго пе́сньми трисвяты́ми поя́ и прие́мля Сего́ осия́ние.

Мир преоби́дел еси́ премирными мы́сльми твои́ми,/ пости́вся же в ми́ре, иде́же воспита́ся Христо́с,/ отше́л же еси́ к нетле́нному ми́ру,/ лико́м совокупи́вся перворо́дных, му́дре.

Богоро́дичен: Отве́рз уста моя, Чи́стая,/ предвозглаго́лю воспе́ти Тя, Му́дрость ро́ждшую Ипоста́сную,/ но, я́ко нечи́ст, Всечи́стую я́ко ле́по пе́ти Тя не моги́й, прошу́ по́мощи.

Ин кано́н преподо́бныя, его́же краегране́сие: Доброотрокови́цу ны́не честву́ю Домни́ку. Ио́сиф. Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися.

Боже́ственным жела́нием ду́шу, сла́вная, впери́вши,/ плотска́я ловле́ния прелете́ла еси́./ Те́мже молю́ тя:/ уловле́на мя сетьми́ змии́ными твои́ми моли́твами, всему́драя Домни́ко, изба́ви.

После́довала еси́ ра́дующися Христу́,/ в след Сего́ ходи́вши свяще́ннаго законоположе́ния, всечестна́я,/ и дев чино́м сочи́слилася еси́, я́ко дева и непоро́чная./ Те́мже тя почита́ем, ве́рою соше́дшеся, досточу́дная.

Дрема́нием зло́бы ника́коже, сла́вная, воздрема́вшися/ побде́ла еси́ светоза́рными дея́ньми/ и к Све́ту Невече́рнему отшла́ еси́, отону́дными светлостьми́ облия́на,/ и просвеща́еши пою́щия тя.

Богоро́дичен: И пре́жде рождества́ нетле́нна, Чи́стая,/ и по рождестве́, Ма́ти Бо́жия, преесте́ственно пребыла́ еси́./ Те́мже, Тя пожела́вши Боже́ственным Духом,/ Домни́ка в след Тебе́ нетле́нна приведе́ся,/ Всецарю́ Сы́ну Твоему́, Чи́стая.

Ин. Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик Себе́ совоку́пльшия духо́вно утверди́,/ в Боже́ственней Твое́й сла́ве/ венце́в сла́вы сподо́би.

Омыва́яся слеза́ми твои́ми, от бре́ния мирска́го плоть очи́стил еси́,/ и я́коже струя́ми ре́чными,/ си́ми де́монов полки́ по́стнически потопи́л еси́.

Преподо́бне, непоро́чне и пра́ведне житие́ преше́л еси́, му́дре,/ к сему́ и боле́зньми по́стническими неболе́зненную жи́знь насле́довал еси́,/ Богоблаже́нне Гео́ргие.

Объе́мся Боже́ственным жела́нием, всеблаже́нне, к ме́стом Сио́нским отше́л еси́,/ и та́мо пребы́л еси́, да́же до сме́рти, всему́дре,/ изнуря́я боле́зньми плоть твою́.

Богоро́дичен: Твоего́ песносло́вца заблу́ждша, Отрокови́це, к пути́ покая́ния напра́ви,/ я́же Сло́во ро́ждшая, ми́ра очища́ющаго грехи́, Богоневе́сто.

Ин

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Пла́ватели в мо́ри обурева́емыя спасла́ еси́,/ еле́й со благослове́нием пусти́вши в мо́ре/ и преложи́вши в тишину́, Домни́ко, обурева́ние.

Невеще́ственными сия́ющую тя луча́ми,/ А́нгел светови́ден возвести́ иера́рху, прише́дшую к Ца́рскому гра́ду23/ Боже́ственным манове́нием.

Ве́трилом окриле́на воздержа́ния,/ дости́гла еси́ в безстра́стия, сла́вная, приста́нища./ Приста́нище же была́ еси́ во глубина́х зло́бы попо́лзшимся.

Богоро́дичен: Укрепи́, Де́во, не́мощь мою́,/ си́лу Вы́шняго ро́ждшая, е́же бы́ти всем подаю́щую,/ и Домни́ки па́мять возвели́чившую.

Конда́к преподо́бнаго, глас 4.

Подо́бен: Яви́лся еси́:

Яви́лся еси́ свети́ло пресве́тлое, Гео́ргие,/ озаря́я Боже́ственными заря́ми ве́рно зову́щия ти:/ моли́ о нас Влады́ку Христа́,/ я́вльшагося во струя́х,/ и просве́щшаго земноро́дныя.

Седа́лен, глас 5.

Подо́бен: Собезнача́льное Сло́во:

Мно́гаго в поще́нии и сла́внаго Небе́снаго граждани́на,/ и ве́рных моли́твенника воспои́м ны́не и велича́ем,/ и́бо Благоизво́лившему взы́ти на Крест потща́ся угоди́ти/ боле́зньми непоро́чными вои́стинну и сла́вным свои́м житие́м.

Сла́ва, преподо́бныя, глас 4.

Подо́бен: Ско́ро предвари́:

Плоть распя́ла еси́ со страстьми́/ и все любле́ние ко Христу́ име́ла еси́, Домни́ко, Жениху́ твоему́ нетле́нному./ Сего́ ра́ди прия́ла еси́ вене́ц/ и А́нгельским лико́м сочи́слилася еси́, преподо́бная,/ моля́щися Тому́ приле́жно о чту́щих тя.

И ны́не, пра́здника, глас то́йже:

Струи́ освяти́л еси́ Иорда́нския,/ держа́ву сокруши́л еси́ грехо́вную, Христе́ Бо́же наш,/ приклони́л еси́ дла́ни Себе Предте́чеве,/ и спасл еси́ от ле́сти челове́ческий род./ Темже Тя мо́лим:/ спаси́ ду́ши на́ша.

Ин. Песнь 4

Ирмо́с: Седя́й в сла́ве на Престо́ле Божества́,/ во о́блаце ле́гце,/ прии́де Иису́с Пребоже́ственный,/ Нетле́нною Дла́нию, и спасе́ зову́щия:/ сла́ва, Христе́, си́ле Твое́й.

Поще́ньми, я́ко снедьми́, любоче́стно пита́яся,/ ду́шу твою́, блаже́нне, ны́не веселя́щуюся, предста́вил еси́ Творцу́ всех,/ призва́вшему тя к Вы́шней Боже́ственней сла́дости, ра́дующася.

Не́бо не́кое яви́лся еси́, дея́ньми, я́ко звезда́ми, укра́шен,/ нося́, я́коже со́лнце, Го́спода,/ твою́ душу, я́ко луну́, озаря́юща и показу́юща Своея́ сла́вы прича́стника.

Влады́ка, с Небесе́ нас ра́ди сшед,/ Сио́н обре́те Боже́ственное вои́стинну жили́ще,/ иде́же все́лься ты жела́нием/ я́коже ле́ствицею, к Вы́шнему возше́л еси́ Сио́ну,/ в сем до́льнем пожи́в.

Богоро́дичен: Седя́й в не́дрех присносу́щно Роди́вшаго неопи́санно/ на Твоих объя́тиих яви́ся ны́не опи́санно седя́,/ Ро́ждшую Тя показа́в по рождестве́ Присноде́ву, и и́стинно нетле́нну.

Ин

Ирмо́с: Прише́л еси́ от Де́вы,/ не хода́тай, ни А́нгел, но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти:/ сла́ва си́ле Твое́й, Го́споди.

Облиста́ла еси́ просвеще́ние врачева́ний, отгоня́щи страсте́й омраче́ние, и де́монов полки́,/ вся же просвети́ла еси́ благоче́стно к тебе́, Домни́ко, приходя́щия.

Жени́х тя, Царь Небе́сный, сла́вная, прославля́ет пред ца́рствующим на земли́,/ удивля́ющимся твоему́ нескве́рному житию́ и чудесе́м.

Услы́шатель моли́тв твои́х сый, Госпо́дь, я́ве прозна́менует твое́ место,/ в не́мже учи́лище воздви́гла еси́,/ ду́хи лука́вствия, Домни́ко, отгна́вши.

Богоро́дичен: Умерщвле́ния риз Ада́м совлече́ся Боже́ственным Рождество́м Твои́м/ и во оде́жду облече́ся,/ Еди́но, ю́же истка́ во утро́бе Твое́й, Сло́во воплоща́емо.

Ин. Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя мир подава́ющая.

Удиви́шася А́нгели и все преподо́бных сосло́вие,/ вои́стинну непреста́нное боле́зней твои́х зря́ще, и жития́ жесто́кое:/ ты бо, я́ко безду́шный боле́знуя ка́мень,/ сконча́л еси́ доброде́телей исправле́ние.

Вся́ку просия́ у́бо ду́шу вели́кий, вся исполня́я светоли́тия,/ и тьмы свобожда́я страсте́й, я́коже чисте́йшее и ны́не со́лнце,/ испуща́я спаси́тельное движе́ние.

Оте́чества устрани́лся еси́ твоего́, му́дре Гео́ргие,/ па́че подоба́ющих житию́ Христа́ возлюби́в устра́ньшагося челове́ком./ Те́мже бы́л еси́ Тому́ досто́ин, Го́рния удостоя́емь благода́ти.

Богоро́дичен: Украси́ла еси́, Чи́стая, Ты челове́ков исполне́ние:/ Ты бо яви́лася еси́ простра́ннейши небе́сныя широты́,/ ро́ждшая Бо́га Сло́во, я́ко ко́жу, небеса́, Отрокови́це, просте́ршаго,/ и земны́я возсозда́вшаго.

Ин

Ирмо́с: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Зе́млю возде́лавши/ и ра́лом моли́тв секу́щи душе́вную бразду́ многопло́дну,/ пожа́ла еси́ пло́д в Боже́ственных жи́тницах, чи́стая, соблюда́емь.

Просвеща́ющи чи́стый твой по́мысл,/ сия́ние Вседе́тельнаго Ду́ха, показу́ет да́льная, я́ко близ,/ и бу́дущих предглаго́лет сбытие́.

Си́ла Ду́ха священнодействи́теля тя сотворя́ет ма́стию Богоде́тельною служе́ния,/ па́ствити свяще́нныя ду́ши повелева́я, Домни́ко Богому́драя.

Богоро́дичен: Свята́го Го́спода Господороди́тельнице, всех родила́ еси́,/ Его́же от души́ Домни́ка жела́ющи,/ страстьми́ тлетво́рными облада́вши, Де́во, пою́щи Тя.

Ин. Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя,/ Иису́се, Царю́ сил.

Возопи́л еси́ к Бо́гу с непреста́нными слеза́ми,/ и жития́, я́ко от ки́та, лю́таго тя спасе́/ к небу́рным и приснотеку́щим исто́чником обоже́ния.

Четвероуго́льну доброде́телей лик тя поста́ви сте́ну, блаже́нне,/ мы́сленных враго́в не боя́щася верхостреля́ний:/ я́ко кре́пок бо побежда́еши искуси́теля.

Я́ко овча́, в Хози́в честны́й прите́кл еси́,/ дея́нии же, я́ко жезло́м, подпира́яся,/ к Еде́му напра́вил еси́ того́ вруче́ныя о́вцы.

Богоро́дичен: Всели́ся я́ко Челове́к во утро́бу Твою́ Госпо́дь,/ челове́ка мя нетле́нных сел сподобля́я,/ презира́я моя дея́ния беззако́нная, Чи́стая, и прегреше́ния.

Ин

Ирмо́с: В бездне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли́, Бо́же, мя возведи́.

Свяще́нное проро́чество воздви́гла еси́ Боже́ственнаго Заха́рии, проро́ка Богому́драго,/ с ни́мже во хра́ме святе́м лику́еши, Домни́ко Богому́драя.

Струя́ яви́лася еси́ исцеле́ний оби́льна, отмыва́ющи пла́мень страсте́й/ и источа́ющи свяще́ние спаси́тельное, господоиме́нная де́во всехва́льная.

Я́ко добру́, я́ко красну́, я́ко че́стну,/ я́ко де́вства заря́ми сия́ющую,/ тя Жени́х Госпо́дь Себе совво́дит, сла́вная.

Богоро́дичен: Мене́ ра́ди по мне бы́сть Младе́нец, Всесоверше́нный,/ обновля́я мя обветша́вшаго страстьми́, Тебе́ ра́ди, Всесвята́я Богоневе́сто.

Конда́к и и́кос пра́здника.

Ин. Песнь 7

Ирмо́с: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Не вдал еси́ себе́, боле́зньми изнуря́емь поще́ния, сатанинским помысло́м:/ ум бо нескита́телен к могу́щему спаса́ти Го́споду ты стяжа́в,/ всяк прило́г оттря́сл еси́.

Низулежа́ньми, бде́ньми и поще́ньми твоя вся умертви́л еси́ у́ды, я́же на земли́,/ и ны́не нетле́нную и неболе́зненную жи́знь живе́ши, блаже́нне,/ о нас моля́ся, пою́щих тя с любо́вию.

Присносу́щаго Гро́б возжела́л еси́ кра́йне ви́дети и поклони́тися, му́дре,/ и, та́мо быв, изво́лил еси́ преподо́бно воздержа́нием соумертви́тися, преподо́бне,/ за милосе́рдие умертви́вшемуся.

Богоро́дичен: Не послужи́ша тва́ри, и́же Творца́ Тя позна́вшии Ро́ждшую,/ но Бо́га и́стинна, из Тебе́ возсия́вшаго Сло́ва, ве́дуще, Отрокови́це, зову́т:/ отце́в Госпо́дь и Бог, благослове́н еси́.

Ин

Ирмо́с: Богопроти́вное веле́ние/ беззако́ннующаго мучи́теля высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Ум тво́й, воззре́ньми су́щими к Бо́гу обожа́емь всегда́, Богови́ден бы́сть./ Отсю́ду уклони́лася еси́ ми́лования плотска́го, пою́щи, Богому́драя:/ Сый благослове́н и препросла́влен.

Та́инства Боже́ственная тебе́ открыва́ет Бог Пресу́щный, в тебе́ почива́яй:/ ви́дела бо еси́ прише́дша свята́го А́нгела и освяти́вша,/ честна́я, во́д естество́ Духом.

Хра́м Боже́ственнаго Ду́ха бы́вши,/ во хра́ме святе́м су́щи, услы́шала еси́ глас, уча́щий тя Боже́ственным та́йнам,/ и е́же от телесе́, честна́я, отше́ствие ца́рствующаго.

Богоро́дичен: Кре́пость моя́ и пе́ние, и спасе́ние есть Госпо́дь,/ и́же Тя Ма́терь Всечи́сту, и Неве́сту неневе́стну предызбра́в./ Его́же о рабе́х Твои́х при́сно не преста́й моли́ти, Чи́стая.

Ин. Песнь 8

Ирмо́с: О́троки бла́гочестивыя в пещи́/ Рожде́ство́ Богоро́дичо спасло́ есть./ Тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Отню́д дрема́ния твои́м ве́ждам,/ ниже́ сна твои́м очесе́м, о́тче, дал еси́,/ до́ндеже сотвори́л еси́ место уго́дно тебе́ сама́го, и селе́ние Вседержи́теля,/ Его́же вся пою́т дела́, и превозно́сят во ве́ки.

Обре́л еси́ возме́здие трудо́в безме́рных, всеблаже́нне,/ ра́й, его́же предугото́ва того́ жела́ющим от души́ Госпо́дь,/ о́бщее ца́рство зову́щим непреста́нно:/ по́йте и превозноси́те Его́ во ве́ки.

Обре́те оби́тель Хози́вская тя пра́вило и изве́стнейший о́браз,/ всяк проше́дша доброде́тельных дея́ний вид,/ преподо́бных похвало́, му́дре Гео́ргие./ Темже пожи́вше Боже́ственне, с тобо́ю игра́ют во вся ве́ки.

Богоро́дичен: Яви́ся прост Боже́ственным естество́м, из Тебе́, Богороди́тельнице, вои́стинну сло́жен/ за неизрече́нную ми́лость Свои́м Божество́м, плоть от крове́й Твои́х прие́м./ Те́мже Тя Богоро́дицу, ве́дуще, песносло́вим во вся ве́ки.

Ин

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки.

Укра́шена доброде́тельми,/ и чуде́с ря́снами упещре́на,/ к кра́сному черто́гу Царя́ Христа́, До́мнико, востекла́ еси́,/ пою́щи и превознося́щи Его́ во ве́ки.

После́довавши Христу́, я́ко Па́стырю чи́сту, а́гнице свята́я,/ к Небе́сней огра́де, в не́йже назнамена́нных ове́ц соводворе́ние есть,/ с ра́достию всели́лася еси́, преподо́бная.

Манове́нием Бо́га вседе́тельным отложе́ние уве́девши твоего́ телесе́,/ ра́достну хвалу́ чисте́йшею душе́ю всех вино́вному приноси́ла еси́,/ Ему́же тво́й, чи́стая, в ру́ки преложи́ла еси́ дух.

Богоро́дичен: Пресу́щественный Бог существу́ется нас ра́ди от Твои́х крове́й,/ истле́вшее существо́ обнови́ти хотя за милосе́рдие, Дево, и ми́лость,/ препросла́вленный во вся ве́ки.

Ин. Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная Богоро́дице,/ Чи́стая Приснодево.

Вся́кую сла́дость жития́ оплева́л еси́ Вы́шния ра́ди сла́дости,/ жесто́кому бо пребыва́нию па́че сла́дкаго жития́ поревнова́л еси́/ и страсте́й потща́лся еси́ угаси́ти пе́щь мно́гими твои́ми слеза́ми, Гео́ргие,/ мона́шествующих честно́е украше́ние.

Ны́не я́ко вои́стинну пред Бо́гом стои́ши, всему́дре,/ Ему́же воздержа́нием присво́итися пе́рвее потща́лся еси́,/ и Того́ явле́ний наслажда́ешися я́ве./ Те́мже всем дава́й, чту́щим тя, просвеще́ние и Боже́ственных прича́стие.

Взя́лся еси́ к Све́ту Незаходи́мому, сла́вне, тьмы жития́ изба́вився,/ и Вседержи́телю и Трисо́лнечному Свету предстои́ши с Вы́шними чи́нми,/ и отону́дныя наслажда́ешися испуща́емыя све́тлости, блаже́нне,/ и нас озаря́еши пою́щих тя.

Богоро́дичен: Всего́ мя Бог обожи́ти хотя, ве́сь едини́тся Тебе́,/ и непости́жное всем та́инство новоде́йствуется:/ ражда́еши Де́ва Нетле́нна, и плоть ви́дится Бог./ Его́же чту́ще, Тя ны́не блажи́м, Мари́е, я́коже Сама́ прорекла́ еси́.

Ин

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Свяще́ннейшии ли́цы, в честне́м твое́м успе́нии начина́юще,/ Боже́ственней твое́й души́, зря́щим яви́шася свяще́нными песнопе́нии,/ в ме́сто путеводя́ще тя селе́ния чу́днаго,/ иде́же шум пра́зднующих, сла́вная.

Я́ко лозы́ Боже́ственныя благора́сленнейшая розга́ я́вльшися,/ умиле́ния нам Боже́ственныя израсти́ла еси́ гро́зды,/ источа́ющия вино́ исцеле́ний, Домни́ко,/ и ду́ши и сердца́ ве́рно чту́щих тя веселя́щее.

Теле́сных страсте́й, и душе́вных скве́рн,/ и вся́каго вра́жия наве́та изба́ви ны́ моли́твами твои́ми,/ к покро́ву твоему́ любо́вию прибега́ющия, Домни́ко,/ и тво́й пра́здник соверша́ющия боже́ственный и честны́й.

Я́ко со́лнечную лучу́, озаря́ющую мир,/ я́ко неве́сту Христо́ву предо́бру, и я́ко го́рлицу любоче́стну,/ я́ко ма́слину, я́ко ке́др, я́ко су́щу избра́нну голуби́цу/ восхваля́ем тя вси́, Домни́ко господоимени́тая.

Богоро́дичен: Пощади́ мя, Го́споди, пощади́, егда́ хо́щеши ми суди́ти,/ и не осуди́ мене́ во о́гнь, ни я́ростию Твое́ю обличи́ мене́,– мо́лит Тя Дева, Тя ро́ждшая, Христе́,/ и А́нгел мно́жества, и преподо́бных чи́ни.

Свети́лен пра́здника.

Подо́бен: Посети́л ны́:

Яви́ся Спас, Благода́ть и И́стина, во струя́х Иорда́нских/ и су́щия во тьме и се́ни спя́щия просвети́л есть,/ и́бо прии́де и яви́ся Свет Непристу́пный.

Сла́ва, и ны́не, то́йже.

На стихо́вне стихи́ры, глас 2.

Подо́бен: До́ме Евфра́фов:

Ве́лие и стра́шно/ та́инство соверша́ется:/ Влады́ка бо всех челове́ков/ на очище́ние всех/ руко́ю раба́ креща́ется.

Стих: Мо́ре ви́де и побеже́,/ Иорда́н возврати́ся вспять.

Свы́ше Оте́ц вопия́ше:/ Сей есть Сын возлю́бленный Мой,/ вода́ми Иорда́нскими/ пло́тию ны́не креща́емый.

Стих: Что ти есть мо́ре, я́ко побе́гло еси́?/ и тебе́, Иорда́не, я́ко возврати́лся еси́ вспять?

Чи́ни А́нгельстии/ ви́девше Влады́ку,/ уподо́бльшася рабу́/ и вода́ми креща́ема,/ пою́ще, дивля́хуся.

Сла́ва, и ны́не, глас то́йже. Самогла́сен:

Видеша Тя во́ды, Бо́же,/ ви́деша Тя во́ды, и убоя́шася:/ к Твое́й бо сла́ве противозре́ти Херуви́ми не мо́гут,/ ниже́ взира́ти Серафи́ми,/ но со стра́хом предстоя́ще,/ о́вии у́бо но́сят,/ о́вии же сла́вят си́лу Твою́./ С ни́миже, Ще́дре, возвеща́ем хвалу́ Твою́, глаго́люще:/ явле́йся Бо́же, поми́луй нас.

НА ЛИТУРГИ́И

Блаже́нны пра́здника, песнь 1-я, обои́х кано́нов, на 6.