Служба преподобнаго отца нашего Авраамия, Смоленскаго чудотворца
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, пра́здника 3 и свята́го 5, глас 5.
Подо́бен: Ра́дуйся:
Яви́ся, гора́ у́мная нам ты,/ преподо́бне о́тче Авраа́мие,/ на ню́же возше́д, Богоно́се, я́ко на Не́бо, сла́вне,/ я́ко но́вый Моисе́й,/ скрижа́ли от Бо́га, свя́те, Христо́во Ева́нгелие прие́м,/ яви́ся, я́ко труба́ наро́чита,/ всем возвеща́ющи конце́м,/ утвержда́я и просвеща́я всех ду́ши к богоразу́мию, глаго́ля:/ пока́йтеся и обрати́теся,/ уже́ бо прибли́жися день Госпо́день Су́дный и гро́зный,/ Христу́ Бо́гу безпреста́ни моли́теся/ дарова́ти душа́м на́шим ве́лию ми́лость.
Яви́лся еси́, преподо́бне о́тче,/ ле́ствица высо́кая доброде́тели духо́вныя,/ благода́ти восхо́д,/ по не́йже возше́д, свя́те,/ зри́ши Боже́ственную добро́ту,/ и сла́ву Бо́жию,/ и святы́х А́нгел Небе́сных ликостоя́ния све́тлости/ и, гласо́в боголе́пных пе́ний наслажда́яся, блаже́нне,/ с ни́ми пое́ши, веселя́ся ра́достно,/ Богоно́се Авраа́мие,/ Христу́ Бо́гу моли́ся/ дарова́ти душа́м на́шим ве́лию ми́лость.
Яви́лся еси́, преподо́бне о́тче,/ вои́стинну Бо́жие возлюбле́ние,/ и освяще́н от утро́бы ма́терни,/ и святи́тель, от Бо́га по́сланный к нам,/ наставля́я на путь благода́ти Христо́ва смире́ния,/ по нему́же возше́д, свя́те,/ водворя́ешися в све́тлости блаже́ннаго рая́,/ иде́же всех святы́х ду́ши, ра́дующеся, веселя́тся./ С ни́миже нас помина́й, Богоно́се Авраа́мие,/ Христу́ Бо́гу моля́ся/ дарова́ти душа́м на́шим ве́лию ми́лость.
Ра́дуйся, по́стнических вои́стинну подвиго́в благово́нный сосу́де:/ крест на ра́му у́бо взем/ и Влады́це Христу́ себе́, преблаже́нне, возложи́в,/ пло́ти попра́л еси́ до́лу влеку́щее мудрова́ние,/ доброде́тельми же ду́шу просвети́л еси́/ и к Боже́ственному впери́лся еси́ жела́нию./ Те́мже, всесвяту́ю твою́ окружи́вше ра́ку,/ прехва́льне Авраа́мие,/ Боже́ственнаго человеколю́бия про́сим получи́ти твои́ми моли́твами/ и ми́ру дарова́ти ве́лию ми́лость.
Угль богосия́нен,/ огню́ прибли́жився, Богоно́се, Ду́ха,/ показа́лся еси́ в ми́ре, Авраа́мие,/ просвеща́я ду́ши на́ша,/ ве́рно, Богому́дре, приступа́ющих к тебе́,/ к све́ту наставля́я тех невече́рнему, преподо́бне,/ ороша́емь свы́ше Боже́ственною благода́тию./ Те́мже и побе́ды тебе́ проявле́нно дарова́ вене́ц, блаже́нне,/ пра́вды Смотри́тель Христо́с,/ Его́же моли́,/ душа́м на́шим дарова́ти ве́лию ми́лость.
Сла́ва, глас 8:
Мона́хов мно́жества/ наста́вника тя почита́ем, о́тче наш Авраа́мие,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.
И ны́не, пра́здника, глас 1:
Богонача́льным манове́нием,/ отвсю́ду Богоно́снии апо́столи,/ о́блаки высо́це взима́еми,/ доше́дше пречи́стаго и живонача́льнаго Твоего́ те́ла,/ любе́зно лобыза́ху./ Превы́шния же Небе́сныя си́лы,/ с свои́м Влады́кою прише́дше,/ богоприя́тное и пречи́стое те́ло предсыла́юще,/ у́жасом одержи́ми,/ прекра́сно же предыдя́ху/ и неви́димо вопия́ху превы́шним чинонача́лием:/ се Всецари́ца Богоотрокови́ца прии́де./ Возьми́те врата́ и си́ю преми́рно подыми́те,/ Присносу́щнаго Ма́терь Све́та,/ Тоя́ бо ра́ди всеро́дное челове́ком спасе́ние бысть./ На Ню́же взира́ти не можем,/ и Той досто́йную честь возда́ти немо́щно:/ Тоя́ бо преизя́щное прехо́дит всяк ум./ Те́мже, Пречи́стая Богоро́дице,/ при́сно с Живоно́сным Царе́м и Рождество́м живу́щи,/ моли́ся вы́ну сохрани́ти и спасти́/ от вся́каго прило́га проти́внаго/ но́выя лю́ди Твоя́:/ Твое́ бо предста́тельство стяжа́хом,/ во ве́ки светоявле́нно блажа́ще.
Вход. Проки́мен дне. И чте́ния преподо́бническая.
Прему́дрости Соломо́ни чте́ние (главы́́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же пото́пят я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (гла́ва 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дит язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (гла́ва́ 4):
Пра́ведник, а́ще пости́гнет сконча́тися, в поко́и будет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба изме́нит ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры пра́здника.
Та́же свята́го самогла́сен, глас 1:
Стих: Честна́ пред Го́сподем/ сме́рть преподо́бных Его́.
Ле́ствица, небеси́ подо́бна,/ я́ве житие́ твое́, Богому́дре, бысть,/ е́юже на высоту́ возвы́сився днесь,/ Влады́це Христу́ бесе́довати, блаже́нне, сподо́бился еси́,/ ум просве́щ та́мо су́щими сия́ньми,/ луча́ми же Того́ просвеща́емь,/ ра́вно А́нгелом прия́л еси́ све́тлость./ Ему́же ны́не предстоя́,/ моли́ся, преподо́бне,/ творя́щим Боже́ственную и свяще́нную па́мять твою́/ с тобо́ю предста́ти/ и ми́ру да́ти ве́лию ми́лость.
Сла́ва, глас 8:
Прииди́те всеусе́рдно, вси боголюби́вии лю́дие,/ соше́дшеся, похва́лим честно́е преподо́бнаго отца́ успе́ние:/ сей бо от ю́ности возлю́блен,/ и от утро́бы ма́терни освяти́ся Бо́гу,/ и Того́ стопа́м после́довати изво́лил есть./ Те́мже мо́лим того́ Христа́ Бо́га моли́ти/ непреста́нно о ста́де свое́м,/ и умири́ти мир, и спасти́ ду́ши на́ша.
И ны́не, пра́здника.
Тропа́рь, глас 8:
Днесь возсия́ нам па́мять твоя́, сла́вне, я́ко со́лнце,/ светоза́рно луча́ми озаря́ющая мир/ и тьму но́щи злых духо́в от нас отгоня́ющая./ Днесь Небе́сныя си́лы святы́х А́нгел/ и ду́ши пра́ведных мы́сленно торжеству́ют, ра́дующеся./ Днесь и мы, гре́шнии, припа́дающе, мо́лимся:/ о́тче преподо́бне Авраа́мие,/ Христа́ Бо́га моли́ непреста́нно/ спасти́ град и лю́ди, любе́зно тебе́ почита́ющия.
Сла́ва, и ны́не, пра́здника.
НА У́ТРЕНИ
По 1-й стихоло́гии седа́лен, глас 1.
Подо́бен: Лик А́нгельский:
Житие́ на земли́ благоче́стно сконча́в,/ прия́телище чистоты́ и Ду́ха яви́лся еси́,/ просвеща́я к тебе́ ве́рою притека́ющия, блаже́нне./ Те́мже моли́ твоего́ Влады́ку Христа́ Бо́га просвети́ти ду́ши на́ша,/ воспева́ющих тя, Авраа́мие Богому́дре, о́тче наш.
Сла́ва, и ны́не, Богоро́дичен:
Всех Творца́, и Го́спода, и Зижди́теля, Всенепоро́чная, Чи́стая,/ Ду́хом Боже́ственным в ложесна́х заче́нши, без истле́ния родила́ еси́;/ Его́же сла́вяще, Тя воспева́ем, Де́во,/ я́ко пала́ту всех Царя́ и ми́рови спасе́ние.
По 2-й стихоло́гии седа́лен, глас 4.
Подо́бен: Яви́лся еси́ днесь:
Возсия́в, я́ко со́лнце,/ зари́ облиста́еши, преподо́бне, всему́ ми́ру издале́ча уче́ний твои́х,/ чу́дный Авраа́мие светоно́сче, преподо́бных похвало́.
Сла́ва, и ны́не, Богоро́дичен:
В кров Твой, Пречи́стая Де́во, прибега́ющих нас мольбу́ прие́мши,/ не преста́й моля́щи Человеколю́бца спасти́ рабы Твоя́.
По полиеле́и седа́лен, глас 8.
Подо́бен: Прему́дрости:
От утро́бы освяти́лся еси́, я́ко вои́стинну, свяще́нне Авраа́мие,/ и на земли́, я́ко А́нгел, пожи́л еси́:/ плоть бо умертви́в воздержа́нием, Тро́ицы уго́дник показа́лся еси́, блаже́нне./ Те́мже и к ре́вности Боже́ственнаго твоего́ жити́я/ ли́ки совокупи́л еси́ мона́шествующих, сла́вне, Богоно́се о́тче наш,/ моли́ Христа́ Бо́га согреше́ний оставле́ние пода́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Небе́сную дверь и киво́т, пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что воздам Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.
Кано́н пра́здника со ирмосо́м на 6 и преподо́бнаго на 8, глас 6.
Песнь 1
Ирмо́с: Я́ко по суху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.
Я́ко возсия́в всем конце́м, Христе́, Пра́ведное Со́лнце,/ Пречи́стыя Твоея́ Ма́тере мольба́ми покая́ние, и умилени́е, и сле́зы даждь ми, Бо́же,/ и моле́нием преподо́бнаго спаси́ мя.
А́нгельския безпло́тныя чи́ны приво́дим Ти, Христе́, на моле́ние,/ сих мольба́ми изба́ви и сохрани́ стадо Твое́, Бла́же, от всех бед/ и моли́твами преподо́бнаго спаси́ мя.
С ли́ки проро́к, и апо́стол, и му́ченик, святи́телей и преподо́бных/ и со все́ми святы́ми моли́, свя́те, о́тче,/ моля́щимся тебе́ приле́жно изба́витися от вся́кия беды́ и спасти́ ны.
Богоро́дичен: Вси мо́лим Тя приле́жно, Госпоже́ Де́во Ма́ти Свята́я:/ избавле́ние от всех бед пода́ждь нам,/ моля́щися приле́жно Сы́ну и Бо́гу поми́ловати же и спасти́ ны.
Песнь 3
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Молени́я послу́шав, Го́споди, иногда́ А́нны,/ пода́л еси́ проро́ка, и Тебе́ отдаде́ служи́теля,/ та́ко и на́ше услы́ши моле́ние, моли́твами преподо́бнаго, и спаси́ ны.
Приими́ от души́ моля́щияся Тебе́, Христе́, и даждь нам по́мощь Твою́ свы́ше,/ я́ко иногда́ ученико́м Твои́м, Христе́, на мо́ри,/ и от бед изба́ви нас моле́нием преподо́бнаго.
Моли́ся приле́жно за ны,/ избавле́ние пода́ти, о́тче Авраа́мие, от всех бед, я́же на ны прихо́дят,/ ускори́, свя́те, на по́мощь на́шу.
Богоро́дичен: Бо́жия рождества́ Твоего́, Чи́стая, вся́ка су́щества чин преходи́т чудесы́:/ Бо́га бо па́че естества́ зачала́ еси́ во чре́ве/ и, ро́ждши, пребыва́еши Присноде́ва.
Конда́к и и́кос пра́здника.
Седа́лен свята́го, глас 4.
Подо́бен: Удиви́ся Иосиф:
Удиви́ся, преподо́бне и Богоно́се Авраа́мие, во всем ми́ре житие́ твое́,/ я́ко от утро́бы ма́терни воззва́н был еси́, свя́те, я́ко Саму́ил, сла́вне./ Веселя́тся Це́ркви Христо́вы, и ра́дуются мона́хов стада́,/ и весь мир пра́зднует, Христу́ Бо́гу моля́щеся приле́жно:/ Го́споди, спаси́ град и лю́ди, моли́твами Влады́чицы,/ и преподо́бнаго ра́ди поми́луй нас.
Сла́ва, и ны́не, пра́здника.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь,/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Христо́в слуга́ вои́стинну яви́лся еси́, свя́те,/ я́ко от утро́бы ма́терни освяти́вся Бо́гу,/ я́ко же́ртва прине́слся еси́ честна́ Го́сподеви,/ от со́вести чи́сты моли́ся Ему́.
Вои́стинну Христо́в слуга́ был еси́, о́тче Авраа́мие,/ я́ко проро́к и апо́стол, святи́телей и преподо́бных всех подража́тель быв,/ напоя́я благода́ти умиле́ния сердца́ на́ша.
Вои́стинну Христо́с Бог наш показа́ тя/ в напа́стех ти́хое приста́нище, свя́те, и забра́ло,/ сирота́м же всем утеше́ние.
Богоро́дичен: Неизглаго́ланно и непостижи́мо есть/ Твоего́, Богоро́дице, боголе́пнаго вои́стинну рождества́ та́инство Небе́сным и земны́м,/ и́мже, вси ве́рнии, спа́сшеся, Тя хва́лим.
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
У́треневал еси́ к Бо́гу от ю́ности, блаже́нне о́тче Авраа́мие,/ я́ко слави́й, му́дре, сладкоглаго́лив,/ я́ко ла́стовица многогла́сна, свя́те, принося́ моли́тву Бо́гу.
Украси́лся еси́ священноле́пно, Богоно́се о́тче Авраа́мие, иере́йскою ле́потою,/ я́ко и Ааро́н и Саму́ил,/ боголе́пно по вся дни служа́ Бо́гу и моля́ся Ему́.
Вои́стинну от утро́бы позна́н был еси́, о́тче, от Бо́га ве́рен служи́тель,/ при́зван же быв, я́ко други́й проро́к, свя́те, Ду́хом Бо́жиим,/ учи́л еси́ лю́ди богоразу́мию.
Богоро́дичен: Богоро́дицу Тя от души́, Влады́чице ми́ру Блага́я, испове́дающия спаса́й:/ Тя бо заступле́ние и́мамы вои́стинну, Всечи́стая.
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.
Жите́йскаго, блаже́нне, убежа́в зла́го волне́ния,/ в тишину́ доше́д Бо́жия поко́я и наслажде́ния,/ моли́ся пода́ти и нам о Христе́ того́ наслажде́ния.
Бу́рно приста́нище потопля́ет мя,/ пода́ждь ми ру́ку Твою́, Влады́ко Го́споди, я́ко иногда́ Петру́ утопа́ющу,/ и спаси́ мя во оти́шие Твое́ преподо́бнаго Авраа́мия моле́нием.
Помоли́ся приле́жно за ны, о́тче преподо́бне Авраа́мие, к Бо́гу,/ изба́витися вско́ре от всех бед же и скорбе́й/ и пода́ти мир и спасе́ние.
Богоро́дичен: Пречи́стая Влады́чице, ро́ждши земны́м Прави́теля и Го́спода,/ похоте́й ми злолю́тое укроти́ смуще́ние/ и тишину́ пода́ждь се́рдцу моему.
Конда́к, глас 3.
Подо́бен: Де́ва днесь:
Возсия́, Го́споди, гра́ду Твоему́/ па́мять Твоего́ уго́дника,/ я́ко све́тлое со́лнце,/ ра́достно всех, я́ко луча́ми, озаря́ющи,/ па́че же моли́твы Пречи́стыя Твоея́ Ма́тере/ от всех бед избавля́ют нас/ и упраждня́ют ва́рварская шата́ния./ Тем мы, лю́дие Твои́ и град наш, вельми́ хва́лимся/ и спаса́емся моли́твами/ Твоего́ уго́дника Авраа́мия, преподо́бнаго отца́.
И́кос:
Уясни́ ми язы́к и укрепи́ ми ум, Христе́ Бо́же,/ моли́твами Пречи́стыя Твоея́ Ма́тере./ Язы́к ми благ глаго́лати пода́ждь на похвалу́ и на умоле́ние Твоего́ уго́дника./ Свещу́ души́ моея́ уны́лую, ю́же, воздрема́вся, угаси́х,/ моли́твами преподо́бнаго Авраа́мия возжзи́/ и не отлучи́ мене́, Христе́, многосогре́шша, ли́ка преподо́бных Твои́х./ Все у́бо упова́ние к Тебе́ возлага́ю:/ Ты бо и град сохраня́еши моли́твами преподо́бнаго.
Песнь 7
Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
Халде́йскую ороси́в отроко́в пещь и прело́ж на хлад,/ на ны иноплеме́нник нападе́ние, Христе́, погуби́ моле́нием преподо́бнаго Авраа́мия, пою́ща:/ благослове́н Бог оте́ц на́ших.
Проро́ку Дании́лу, Влады́ко Христе́, иногда́ ди́вия зве́ри укроти́л еси́, обузда́в;/ та́кожде и ны́не всех проти́вных на ны стремле́ния укроти́/ и обузда́й моле́нием, Бо́же, преподо́бнаго Авраа́мия.
Егда прии́деши, Бо́же, суди́ти на зе́млю, Христе́ Царю́, со а́нгельскими си́лами,/ тогда́, Ми́лостиве, пощади́ ны, пою́щия, моли́твами преподо́бнаго Авраа́мия:/ благослове́н Бог оте́ц на́ших.
Богоро́дичен: Тобо́ю нам, Де́во, свет возсия́, те́мным, и отпуще́ние,/ Ты бо родила́ еси́ Зижди́теля всех Бо́га,/ Его́же моли́, Пречи́стая Присноде́во, посла́ти ве́рным ве́лию ми́лость.
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Яви́ся, я́ко река́ у́мная,/ от уст Боже́ственнаго рая́ исходя́щи, преподо́бне о́тче Авраа́мие,/ и всех ве́рных напая́я ду́ши умиле́ния и омыва́я всех скве́рну,/ превознося́щих Христа́ во ве́ки.
Я́ко небеса́ у́мная, яви́шася уста́ твоя́, свя́те,/ язы́к же твой, о́тче, я́ко сот ме́двеный, сладя́ и всех науча́я вопи́ти:/ Го́спода по́йте и превозноси́те Его́ во ве́ки.
Воздежи́ ру́це твои́ ко Влады́це Бо́гу, свя́те, моли́ за ны приле́жно,/ поми́ловати град и лю́ди, изба́витися гла́да же, и тру́са, и на́шествия иноплеме́нных,/ Его́же превозно́сим во ве́ки.
Богоро́дичен: Арха́нгела гла́сом зове́м Ти, Пречи́стая Де́во Ма́ти:/ ра́дуйся, Обра́дованная, Госпо́дь с Тобо́ю,/ А́нгелом и челове́ком заче́нши и ро́ждши Го́спода,/ Его́же превозно́сим во вся ве́ки.
Песнь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Ны́не, блаже́нне, водворя́ешися и весели́шися со а́нгельскими си́лами,/ прие́мля поко́й проти́ву трудо́в, о́тче свя́те Авраа́мие,/ и нас, моля́щихся, помяни́, Богоно́се,/ че́стно пра́зднующих па́мять твою́ и Христа́ велича́ющих.
Ны́не собо́р святы́х А́нгел и ли́ки святы́х апо́стол,/ проро́к и му́ченик, святи́телей и преподо́бных све́тло торжеству́ют, ра́дующеся,/ в па́мяти твое́й, свя́те о́тче Авраа́мие./ С ни́миже моли́ся, Богоно́се, Христу́ Бо́гу,/ всех изба́вити бед, ве́рою тя блажа́щих.
Приими́, Влады́ко Христе́ Царю́, моле́ние раб Твои́х/ и обрати́ на ра́дость воздыха́ние на́ше,/ мо́лит Тя собо́р Арха́нгел, проро́к и му́ченик,/ апо́стол и святи́тель и преподо́бный Авраа́мий:/ егда́ прии́деши суди́ти всему́ ми́ру,/ тогда́ спаси́ и поми́луй велича́ющия Тя.
Богоро́дичен: Досто́йно Тя ублажа́ем вои́стинну/ и велича́ем, Пречи́стая Де́во Ма́ти Христа́ Бо́га:/ Ты бо еси́ Небе́сных сил ра́дость и всех святы́х добро́та и украше́ние,/ христиа́н прибе́жище и стена́,/ гре́шных путь и Пору́чница Тебе́ велича́ющих.
Свети́лен.
Подо́бен: Жены́, услы́шите:
Мирско́е пристра́стие оста́вль и бога́тство мимотеку́щее/ и Крест твой взем, о́тче, Христо́ви, Авраа́мие, усе́рдно после́довал еси́,/ по́стнически же умертви́л еси́ стра́сти, и к безстра́стию прите́кл еси́,/ и мо́лишися о нас, Богоно́се.
Сла́ва, и ны́не, пра́здника.
На хвали́тех стихи́ры на 6, пра́здника 3 и свята́го 3, глас 6.
Подо́бен: Всю отложи́вше:
Все упова́ние ко Го́споду возло́ж,/ всем серде́чным жела́нием горя́ к Бо́гу, преподо́бне,/ я́ко звезда́ све́тлая на восто́це,/ всем возсия́л еси́, свя́те./ Возра́дуйтеся и возвесели́теся, мона́хов со́нмы,/ торжеству́юще, воспое́м све́тло в па́мять его́:/ Христу́, еди́ному Бо́гу,/ со дерзнове́нием моли́ся о душа́х на́ших.
Весь от ю́ности прибли́жился еси́ Го́сподеви,/ преподо́бне о́тче Авраа́мие,/ все́ю душе́ю Го́рних сил,/ ви́димых и земны́х, свя́те, возненави́дев,/ Христа́ еди́наго возлюби́л еси́, прехва́льне,/ и Того́ Крест усе́рдно тща́ся восприя́ти,/ возсле́довал еси́ Ему́,/ не убоя́вся вра́жиих стреля́ний,/ я́ко всех по́мощь име́я Бо́га./ Ему́же со дерзнове́нием моли́ся о душа́х на́ших.
Сла́ва, глас 5:
Преподо́бне о́тче,/ глас Ева́нгелия Госпо́дня услы́шав,/ мир оста́вил еси́,/ бога́тство и сла́ву ни во что́же вмени́в./ Тем всем возопи́л еси́:/ возлюби́те Бо́га, и обря́щете благода́ть ве́чную;/ ничто́же предпочти́те па́че любве́ Его́,/ да, егда́ прии́дет в сла́ве Свое́й,/ обря́щете поко́й со все́ми святы́ми./ Его́же моли́твами, Христе́,/ сохрани́ и спаси́ ду́ши на́ша.
И ны́не, пра́здника.
Славосло́вие вели́кое, и отпу́ст, и час 1-й. На 1-м часе́ тропа́рь пра́здника. Сла́ва, свята́го. И ны́не, Богоро́дичен часов. По трисвято́м конда́к пра́здника и свята́го, пременя́юще, глаго́лем.
НА ЛИТУРГИ́И
Бла́женны пра́здника песнь 7-я на 4 и свята́го, песнь 6-я на 4. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех,/ я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ будет се́мя его́. Ева́нгелие от Луки́, зача́ло 24. Прича́стен: в па́мять ве́чную будет пра́ведник:
