Служба преподобнаго Михея Радонежскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры глас 4:

Небе́сную добро́ту жела́я улучи́ти,/ на земли́ я́ко безпло́тен подвиза́лся еси́,/ име́я посо́бие непобеди́мо–/ си́лу Влады́ки твоего́,/ Его́же моли́, Михе́е преподо́бне,/ спасти́ся душа́м на́шим.

Бо́жиею си́лою укрепля́емь,/ мысль свою́ горе́ возвыша́я,/ над страстьми́ воцари́лся еси́/ и ны́не Ве́чному Царю́ предстои́ши,/ о всех при́сно моля́ся,/ творя́щих па́мять твою́.

Житие́ твое́ яви́ся благоче́стно,/ доброде́тельми укра́шено, простото́ю и смире́нием,/ я́ко венце́м, венча́емо,/ и ны́не лику́еши на Небесе́х со А́нгелы,/ моли́ Христа́ Бо́га о воспева́ющих тя.

Сла́ва, глас 6:

Сла́ва твоя́ пребыва́ет во век,/ я́ко во пло́ти еще́ су́щи,/ ви́дети сподо́бился еси́ Пресвяту́ю Богоро́дицу/ и послужи́ти усе́рдне преподо́бному Се́ргию,/ и ны́не на Небесе́х водворя́яся,/ моли́ся о нас ко Го́споду.

И ны́не, Богоро́дичен:

Бо́га, из Тебе́ воплоти́вшагося,/ разуме́хом, Богоро́дице Де́во,/ Того́ моли́ о спасе́нии душ на́ших.

На стихо́вне стихи́ры глас 6:

Влады́чне смире́ние восприи́м,/ во́ду возлива́я на ру́це вождя́ твоего́/ и послуша́ние творя́, стра́сти огорчава́я:/ и ны́не на Небесе́х ца́рствуеши с ним во ве́ки.

Стих: Честна́ пред Го́сподем/ смерть преподо́бных Его́.

Сле́зными пото́ки, преподо́бне,/ зе́млю се́рдца твоего́ напои́л еси́,/ предстоя́ на моли́тве непоколе́блемо,/ и всех Творцу́ взыва́л еси:/ Го́споди, поми́луй мя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Страда́нии по́двигов твои́х, преблаже́нне,/ Боже́ственный клас возрасти́л еси́/ и пита́еши благоче́стно восхваля́ющих тя,/ о́тче наш Михе́е преподо́бне.

Сла́ва, глас 8:

Мона́хов мно́жества,/ прииди́те, восхва́лим ученика́ Се́ргиева,/ преподо́бнаго отца́ на́шего Михе́я,/ его́же па́мять ны́не соверша́ем:/ сей бо посеще́ния Боже́ственнаго сподо́бися/ и слы́ша пресла́дкий глас Небе́сныя Влады́чицы,/ я́коже Прему́дрый Епифа́ний повеству́ет;/ похва́лим и весь лик учени́ческий,/ и́же на Небесе́х с ли́ки святы́х водворя́ются/ и мо́лятся о душа́х на́ших.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни. Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 4:

От ю́ности возлюби́л еси́ Христа́, блаже́нне,/ плотска́я мудрова́ния ду́ху повину́л еси́,/ за́поведи Госпо́дни усе́рдно исполня́я,/ в пусты́ню Се́ргиеву прише́д,/ люби́телю смире́ния прилепи́вся,/ подо́бный бо подо́бнаго познава́ет/ и смире́ние смире́ннаго возно́сит,/ я́коже и ви́дим в тебе́, о́тче наш Михе́е,/ и ны́не предстоя́ Престо́лу Святы́я Тро́ицы,/ моли́ о соверша́ющих па́мять твою́.

Стихи́ры хра́ма, глас 5:

В пост Рождества́ Христо́ва,/ но́щи суббо́тней преполовля́ющейся,/ ти́хия стопы́ Цари́цы Небе́сныя услы́шав,/ преподо́бный Се́ргий вели́кия ра́дости испо́лнися/ и потща́ся изыти в сре́тение./ Ты же, о́тче наш Михе́е,/ после́довал еси́ учи́телю твоему́./ Небе́снаго на земли́ с ним явле́ния/ и с пребыва́ния на Небеси́ сподобля́яся,/ Христа́ умоли́те, преподо́бнии,/ ниспосла́ти нам ве́лию ми́лость.

Свет возсия́ Небе́сный в хра́мине твое́й,/ преподо́бне о́тче Се́ргие,/ и послы́шася глас неве́домый:/ се, Пречи́стая гряде́т!/ и по ма́ле зри́ши Влады́чицу ми́ра со двема́ апо́столома,/ и, припа́д к нога́м Ея́,/ моля́ся о заступле́нии ме́ста сего́/ и о всех во Христе́ ча́дех твои́х,/ сего́ ра́ди и мы, ча́да твоя́, мо́лимся:/ моля́ся не преста́й,/ получи́ти нам у Христа́ ве́лию ми́лость.

Петр, верхо́вный апо́стол,/ и де́вства храни́тель Иоа́нн Богосло́в,/ учени́к Христо́в, друг и напе́рсник,/ после́доваху Пречи́стей Де́ве Мари́и,/ посеща́юще отца́ на́шего Се́ргия,/ вку́пе же и смире́ннаго Михе́я,/ сподобля́юще ра́дости Небе́сныя/ и ме́сто сие́ све́та исполня́юще,/ благи́ми обетова́нии утеша́юще/ и моли́тву прие́млюще о спасе́нии душ на́ших.

Пе́ние хва́льное ака́фистово/ уго́дно есть Влады́чице ми́ра,/ вы бо, отцы́ блаже́ннии,/ соверша́юще сие́ бо́дренно,/ посеще́ния от Нея́ сподо́бистеся,/ ди́внаго зре́ния, бесе́ды и чу́днаго виде́ния/ и предвкуше́ния Ца́рствия Небе́снаго,/ его́же получи́ти Христа́ умоли́те/ и нам, ублажа́ющим по́двиги ва́ша.

Глас 8:

Егда́ в нощи́ соверша́л еси́ бдение,/ преподо́бне о́тче Се́ргие,/ пред о́бразом Чи́стыя Богома́тери,/ взира́я ча́сто, к Ней глаго́лал еси́:/ О Пречи́стая Ма́ти Христа́ моего́!/ Кре́пкая Помо́щнице ро́ду челове́ческому,/ бу́ди нам, недосто́йным, Хода́таица,/ при́сно моля́щися к Сы́ну Твоему́ и Бо́гу на́шему,/ да при́зрит на ме́сто сие́ ми́лостиво,/ Еди́ному в Тро́ице Бо́гу возлага́емое,/ и спасе́т ду́ши зде иму́щих жи́тельствовати/ Ца́рствия ра́ди Небе́снаго.

О, пресла́внаго чудесе́!/ О, неизрече́ннаго снисхожде́ния!/ Рука́ми бо Пречи́стая косну́ся Се́ргия, веща́ющи:/ Не ужаса́йся, избра́нниче Мой,/ приидо́х бо посети́ти тебе́:/ моли́тва бо твоя́ о ученице́х услы́шана есть,/ и да не скорби́ши про́чее,/ неотсту́пна бу́ду при́сно ме́ста сего́/ и по твое́м е́же ко Го́споду отхожде́нии,/ потре́бная изоби́льно подава́ющи,/ сохраня́ющи оби́тель твою́ и покрыва́ющи./ И си́ми благи́ми обетова́нии уте́шивши, неви́дима бысть.

О́тче преподо́бне Михе́е,/ ужасе́ся дух твой в ди́вном посеще́нии,/ и по отше́ствии в Го́рняя Цари́цы со апо́столы/ ко учи́телю твоему́ взыва́л еси́:/ извести́ ми, о́тче, Го́спода ра́ди,/ что сие́ бысть чу́дное виде́ние?/ поне́же дух мой вма́ле не разлучи́ся от мене́,/ блиста́ния ра́ди, его́же не мого́х зре́ти,/ покры́х оде́ждою лице́ мое́./ Он же отвеща́ тебе́:/ ма́ло потерпи́, ча́до мое́,/ и́бо и во мне дух мой трепе́щет,/ призови́ ско́ро Исаа́кия и Си́мона,/ с ни́ми же просла́вим Ма́терь всех Бо́га,/ подаю́щую нам ве́лию ми́лость.

Сла́ва, глас 6:

Храм, и́же сокрыва́ет святы́я мо́щи твоя́,/ мал есть и показу́ет смире́ние,/ е́же име́л еси́ в животе́ твое́м,/ о́тче наш Михе́е,/ от слове́с бо Ева́нгельских научи́лся еси́/ кро́тости, смире́нию, послуша́нию,/ подража́я Христу́ Бо́гу на́шему,/ сего́ ра́ди и возлю́блен учени́к/ Се́ргия вели́каго был еси́,/ сподобля́яся Небе́снаго виде́ния,/ сожи́тельства и от рук его́ погребе́ния,/ и напу́тия в Го́рния оби́тели,/ с ним же и ны́не предстоя́ Престо́лу всех Царя́,/ моли́ся о соверша́ющих па́мять твою́ ве́рно.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния.

Проро́чества Иса́иина чте́ние (глава́ 35):

Ра́дуйся пусты́ня жа́ждущая,/ да весели́тся пусты́ня/ и да цвете́т я́ко крин./ И процвете́т, и возвесели́тся пусты́ня Иорда́нова,/ и сла́ва Лива́нова даде́ся ей,/ и честь Карми́лова,/ и у́зрят лю́дие Мои́ сла́ву Госпо́дню и высоту́ Бо́жию./ Укрепи́теся ру́це осла́бленныя и коле́на разсла́бленныя;/ уте́шитеся малоду́шнии умо́м,/ укрепи́теся, не бо́йтеся,/ Се Бог наш суд воздае́т и возда́ст,/ Той прии́дет и спасе́т нас./ Тогда́ отве́рзутся о́чи слепы́х/ и у́ши глухи́х услы́шат./ Тогда́ ско́чит хромы́й, я́ко еле́нь,/ и я́сен бу́дет язы́к гугни́вых;/ я́ко прото́ржеся вода́ в пусты́ни/ и дебрь в земли́ жа́ждущей./ И безво́дная бу́дет во езе́ра/ и на жа́ждущей земли́ исто́чник во́дный бу́дет:/ та́мо бу́дет весе́лие пти́цам,/ и сели́тва тро́сти и лу́зи./ И та́мо бу́дет путь чист и путь свят нарече́тся;/ и не пре́йдет та́мо нечи́стый,/ ниже́ бу́дет та́мо путь нечи́ст,/ разсе́яннии же по́йдут по нему́ и не заблу́дят./ И не бу́дет та́мо льва,/ ни от звере́й злых не взы́дет нань,/ ниже́ обря́щется та́мо,/ но по́йдут по нему́ изба́влении./ И со́брании Го́сподем обратя́тся, и прии́дут в Сио́н с ра́достию,/ и ра́дость ве́чная над главо́ю их./ Над главо́ю бо их хвала́ и весе́лие,/ и ра́дость прии́мет я;/ отбе́же боле́знь, печа́ль и возды́хание.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́заны бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жите в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ра хра́ма, глас 5: В пост Рождества́ Христо́ва: зри на Го́споди, воззва́х:

Сла́ва: преподо́бному, глас 1:

Влады́це Христу́ стопа́м после́дуя,/ чистоты́ жили́ще показа́лся еси́,/ све́том озари́вся Ду́ха Свята́го,/ Небе́снаго виде́ния прича́стник был еси́,/ те́мже и насле́дника тя Христо́с показа./ Ца́рствия Своего́ Небе́снаго,/ его́же получи́ти и нам, о́тче Михе́е, моли́,/ соверша́ющим па́мять твою́,/ во спасе́ние душ на́ших.

И ны́не, Богоро́дичен:

Ра́дуйся, ра́досте пра́отцев,/ и преподо́бных оте́ц весе́лие,/ и покро́в нас, Де́во, рабо́в Твои́х.

На стихо́вне стихи́ры глас 5:

Прииди́те, вси ве́рнии,/ восхва́лим пе́рвыя ученики́ вели́каго Се́ргия:/ Михе́я, ближа́йшаго сожи́теля,/ Ни́кона, стопа́м отца́ после́дующаго,/ Васи́лия Суха́го и послушли́ваго Иа́кова,/ Они́сима диа́кона и привра́тника,/ Елиссе́я, в доброде́тели состаре́вшагося,/ Митрофа́на, са́ном игу́мена почте́ннаго,/ постри́гшаго преподо́бнаго Се́ргия,/ и пе́рваго пресе́льника в ве́чныя оби́тели.

Стих: Честна́ пред Го́сподем/ смерть преподо́бных Его́.

Ра́дуйся, пусты́не Ра́донежская,/ прорасти́вшая кри́ны духо́вныя/ в вертогра́де преподо́бнаго Се́ргия:/ Си́мона, архимандри́та Смоле́нскаго,/ позна́вшаго све́тлость послуша́ния/ и ди́внаго птиц виде́ния сподо́бившагося,/ Исаа́кия, молчали́ваго и сле́зы точа́щаго,/ о́гненное благослове́ние от а́ввы прия́вшаго,/ с ни́мже и чу́днаго Мака́рия,/ А́нгела во святи́лище узре́вшаго,/ сих воспомяну́вше, Бо́га прославля́ем.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, сла́вная оби́тель Се́ргиева,/ па́мять творя́щи учени́к его́:/ Илии́ пречу́днаго и Иоанни́кия,/ Си́мона екклисиа́рха, видевшаго огнь Боже́ственный,/ окружа́ющ преподо́бнаго,/ Игна́тия, по сме́рти Се́ргия узре́вшаго,/ Михе́я, Варфоломе́я и Нау́ма,/ явле́нных врага́м осажда́ющим,/ Алекса́ндра, в схи́ме во́ина, ду́шу преда́вшаго за Русь правосла́вную,/ Андре́я же сподви́жника его́,/ Епифа́ния Прему́драго, написа́вшаго сия́,/ и весь лик учени́ческий,/ в конце́х земли́ на́шея Бо́гу угоди́вших.

Сла́ва, глас 8:

Мона́хов мно́жества,/ наста́вники ны́не чтим отцы́ преподо́бнии,/ пожи́вшии во оби́тели преподо́бнаго Се́ргия:/ блаже́ни вы есте́, Христу́ рабо́тавшии/ и вра́жию низложи́вшии си́лу,/ А́нгелов собесе́дницы, пра́ведных сожи́телие и святы́х,/ с ни́миже моли́теся Го́сподеви,/ поми́ловатися душа́м на́шим.

И ны́не, Богоро́дичен:

Храм воздви́жен во оби́тели сей/ в сла́ву и па́мять посеще́ния Богома́тери,/ Ю́же моли́те, отцы́ блаже́ннии,/ пода́ти нам оставле́ние грехо́в,/ и душа́м на́шим ве́лию ми́лость.

Тропа́рь, глас 4:

И́го Госпо́дне на ра́мо взем,/ после́довал еси́ Христо́ви со учи́телем свои́м преподо́бным Се́ргием,/ с ни́мже и сподо́бился еси́ ви́дети Пресвяту́ю Богоро́дицу./ И слы́шал еси́ пресла́дкий глас Ея́,/ я́ко обеща́ся неотсту́пна бы́ти ме́ста сего́,/ но, о преподо́бне Михе́е,/ моли́ся о чту́щих святу́ю па́мять твою́.

Сла́ва, и ны́не, Богоро́дичен воскре́сен.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен воскре́сен или́ пра́здника.

По 1-м стихосло́вии седа́лен, глас 1:

Благоче́стно на земли́ житие́ сконча́в,/ прия́телище Ду́ха ты яви́лся еси́,/ просвеща́я ве́рою к тебе́ притека́ющия;/ те́мже моли́ся твоему́ Влады́це просвети́ти ду́ши на́ша,/ восхваля́ющих тя, Михе́е, о́тче наш.

Сла́ва, и ны́не, Богоро́дичен:

Ра́дуйся, Богоро́дице Де́во;/ ра́дуйся, похвало́ всея́ вселе́нныя;/ ра́дуйся, Пречи́стая Ма́ти Бо́жия Благослове́нная.

По 2-м стихосло́вии седа́лен, глас 5:

По́стника Госпо́дня пе́сньми почти́м,/ прило́ги страсте́й умертви́вшаго воздержа́нием и кре́пким терпе́нием,/ и посрами́вшаго горды́ню сопроти́внаго,/ и ны́не моля́щагося Го́сподеви о спасе́нии душ на́ших.

Сла́ва, и ны́не, Богоро́дичен:

Тебе́ мо́лимся я́ко Бо́жией Ма́тери:/ Благослове́нная, моли́ о спасе́нии душ на́ших.

По полиеле́и седа́лен, глас 1:

Страсте́й воста́ние погре́бл еси́/ умерщвле́нием пло́ти, о́тче Михе́е,/ жизнь безконе́чную по сме́рти прия́л еси́;/ те́мже днесь Христо́ва Це́рковь пра́зднует твою́ досточу́дную па́мять,/ преподо́бных украше́ние.

Сла́ва, и ны́не, Богоро́дичен:

В жена́х Свята́я Богоро́дице, Ма́ти Безневе́стная,/ моли́, Его́же родила́, Царя́ и Бо́га,/ да спасе́т нас, я́ко Человеколю́бец.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ непоро́чно поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.

Кано́н пра́здника со ирмосо́м на 6, ирмосы́ по два́жды. И преподо́бнаго кано́н на 6, глас 2, его́же краегране́сие: Преподо́бному Михе́ю пою́ хвалу́ от се́рдца.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Похва́льное тебе́ привнести́ пе́ние, Богоно́се Михе́е, тща́щуся,/ пода́ждь ми благода́ть моли́твами твои́ми,/ я́ко да по́двиги твоя́ честны́я пропове́м.

Ра́достно яре́м Госпо́день от ю́ности, Богому́дре, восприи́м,/ вда́лся еси́ учи́телю твоему́, преподо́бному Се́ргию,/ и сему́ неотлу́чно сожи́тельствовал еси́, сла́вя Бо́га.

Е́же па́че всего́ бы́ти в послуша́нии позна́л еси́, о́тче,/ мно́жайшими по́ты восприи́м Вы́шнее Ца́рство, а́нгельски на земли́ пожи́в,/ и ны́не предстоя́ Святе́й Тро́ице, нас помина́й.

Богоро́дичен: Прииди́те, лю́дие, ублажи́м Ма́терь Бо́жию,/ посети́вшую ме́сто свято́е сие́ и обеща́вшуюся неотсту́пна бы́ти,/ Ея́же словеса́ и Михе́й слы́шати сподо́бися.

Катава́сия по уста́ву.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

О, твоего́ му́жества, о, душе́вныя до́блести, сла́вне!/ Ты бо, неви́димыя враги́ сокруши́ти жела́я,/ своея́ во́ли отре́клся еси́, де́лом на вся́кое повеле́ние отвещава́я.

Досто́йно по́двиги твоя́ похвали́ти кто возмо́жет?/ Ты бо в пусты́ни, на Ма́ковице жи́тельствуя,/ глад и жа́жду со учи́телем твои́м претерпева́л еси́.

Огню́ я́вльшуся во святи́лищи, и окружа́ющу преподо́бнаго Се́ргия, и неопаля́ющу,/ я́коже дре́вле купина́, ю́же Моисе́й ви́дев та́инственно,/ слы́шав ты о чудеси́ сем, ве́рою утверди́лся еси́.

Богоро́дичен: Богоро́дице, всех Цари́це,/ умоли́ над все́ми ца́рствующаго Сы́на Твоего́ Христа́ Бо́га на́шего,/ да изба́вит оби́тель сию́ от бед и напа́стей, я́коже предрекла́ еси́.

Седа́лен, глас 4:

Блаже́н ты, о́тче Михе́е, вои́стинну и треблаже́н был еси́,/ прилепля́яся бо к смиренному́дру ста́рцу,/ смире́нием ду́шу твою́ напои́л еси́,/ послуша́ния же до́блесть усво́ив та́ко,/ я́ко и по сме́рти де́лом сие́ явля́еши,/ ше́ствие творя́ ско́ро к Москве́ на ко́нех,/ я́коже ви́ден был еси́ со ине́ми двема́, Варфоломе́ем и Нау́мом,/ призыва́я ра́тныя лю́ди на по́мощь осажде́нным,/ те́мже, ублажа́юще, мо́лим тя:/ прииди́ и ны́не к нам на по́мощь, осажде́нным грехи́ мно́гими,/ кре́пкою твое́ю моли́твою низложи́ враги́, борю́щия ны.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во:/ к Тебе́ бо прибега́юще, невреди́ми пребыва́ем./ И па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Ни лю́тость враго́в духо́вных, ни ску́дость пусты́ни/ разсла́биша терпе́ния твоего́, преподо́бне,/ но я́ко адама́нт тверд, пребы́л еси́,/ ре́вностию Боже́ственною распаля́емь.

Осо́бь бесе́дуя Бо́гу и Сему́ приближа́яся душе́ю, Михе́е, о́тче наш,/ никогда́же победи́лся еси́ ле́ностию,/ но бодр при́сно пребыва́я, на вся́кое де́ло угото́ван.

Миро благово́нное – Христа́ прии́м в се́рдцы твое́м,/ подо́бяся Ему́, е́же послушли́ву бы́ти до сме́рти,/ те́мже к черто́гу Небе́сному ра́достно поте́кл еси́ по стопа́м Влады́ки.

Богоро́дичен: Удивля́ется всяк я́зык и страна́,/ зря́ще, Влады́чице, сбытие́ слове́с Твои́х,/ и́бо да́же и до днесь неоску́дно пребыва́ет вели́кая Ла́вра, оби́тель Се́ргиева.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения/ преведе́ние и́мамы.

Му́дрость су́щую, Христа́ Бо́га, обита́ющую в души́ твое́й,/ стяжа́в изоби́льно, Богому́дре Михе́е,/ вся́кия се́ти зло́бы а́дскаго хитреца́ растерза́л еси́,/ самаго́ себе́ вдав в послуша́ние.

И́стинно росо́ю по́двиг твои́х, о́тче преблаже́нне, погаси́в вся стра́сти,/ возже́гл еси́ огнь любве́ и ве́ры к твоему́ учи́телю,/ воздержа́ние во всем име́я, свети́льниче безстра́стия.

Хотя́ Тро́ице жили́ще ду́шу твою́ сотвори́ти,/ потща́лся еси́ те́сным и приско́рбным путе́м, подража́я ста́рцу, ше́ствовати,/ при хра́ме Святы́я Тро́ицы живя́ и непреста́нно моля́ся.

Богоро́дичен: Е́же от усе́рдия, приими́, Влады́чице,/ приноси́мое Тебе́ благодаре́ние и хвалу́ и просвети́ ду́ши на́ша,/ вси бо челове́цы есмы́, лише́ны сла́вы Бо́жией.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Ю́же прия́л еси́ благода́ть твори́ти плоды́ ду́ха:/ любы́, ра́дость, мир, долготерпе́ние,/ бла́гость, милосе́рдие, ве́ру, кро́тость, воздержа́ние,/ пода́ждь и нам моли́твами твои́ми.

По́стническими по́двиги у́глие страсте́й угаси́в вои́стинну/ и огне́м любве́ к Бо́гу попали́л еси́ неве́рие, и хулу́,/ и вся́кое возноше́ние, взима́ющееся на ра́зум Бо́жий, преподо́бне.

Оте́чество и род ты, о́тче, оста́вив,/ в пусты́ню прише́л еси́ к вели́кому Се́ргию,/ с ни́мже подвиза́яся при хра́ме Живонача́льныя Тро́ицы,/ дом Ду́ху Свято́му себе́ сотвори́л еси́.

Богоро́дичен: Ю́ноши, и ста́рцы, и всяк во́зраст,/ прииди́те, ны́не восхва́лим Преблагослове́нную в жена́х Ма́терь Де́ву Отрокови́цу,/ я́вльшуюся со апо́столы преподо́бным отце́м Се́ргию и Михе́ю.

Конда́к, глас 8:

Прииди́те, мона́шествующих собо́ри и по́стников ли́цы,/ соше́дшеся, похва́лим блаже́ннаго Михе́я,/ спо́стника преподо́бнаго Се́ргия,/ с ни́мже предстои́т Святе́й Тро́ице/ и мо́лится спасти́ся душа́м на́шим.

И́кос:

Ева́нгельский глас, о́тче, услы́шав:/ а́ще не бу́дете, я́ко де́ти, не вни́дите в Ца́рствие Небе́сное,/ и а́ще кто хо́щет по Мне ити́, да отве́ржется себе́,–/ вся у́бо оста́вил еси́ мирска́я пристра́стия,/ бога́тство и сла́ву, я́ко прах, вмени́в,/ де́тски вда́лся еси́ преподо́бному Се́ргию, повину́яся во всем./ Мы же, па́мять твою́ соверша́юще, вопие́м ти си́це:/ ра́дуйся, о́тче, за́поведей Госпо́дних исполни́телю;/ ра́дуйся, послуша́ния и смире́ния до́брый рачи́телю./ Ра́дуйся, храни́телю ста́рческих повеле́ний;/ ра́дуйся, соприча́стниче та́йных открове́ний./ Ра́дуйся, сподви́жниче живу́щим во И́мя Святы́я Тро́ицы;/ ра́дуйся, досто́йный зри́телю явле́ния Пресвяты́я Богоро́дицы./ Ра́дуйся, Михе́е, де́лателю смиренному́дрый.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Христу́ себе́ сочета́в, кро́тостию, терпе́нием и повинове́нием/ ум прего́рдый Боже́ственным смире́нием смири́л еси́, поя́ при́сно:/ благослове́н Бог оте́ц на́ших.

В пусты́ни тружда́яся,/ я́ко крин, прозя́бл еси́, доброде́тельми укра́шен,/ красне́йшее прозябе́ние, о́тче Михе́е, поя́ Бо́гу в души́ твое́й:/ благослове́н еси́, Го́споди, во ве́ки.

А́нгелом земны́м в дому́ Живонача́льныя Тро́ицы подража́я, жи́тельствовав,/ Небе́сный челове́к сотвори́лся еси́,/ и ны́не на Небесе́х лику́еши со А́нгелы во ве́ки.

Богоро́дичен: Лю́бящая ме́сто сие́, Ма́ти Бо́жия, Препросла́вленная,/ угаси́ пещь страсте́й на́ших милосе́рдием Твои́м,/ да воспева́ем Тя во ве́ки со избра́нники Твои́ми.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Уклони́лся еси́, о́тче досточу́дне, от зле веду́щих к поги́бели,/ к стезя́м же Боже́ственным прилепи́лся еси́/ и ду́шу твою́ Христу́ пре́дал еси́,/ да ца́рствуеши с Ним во ве́ки.

От земли́ на Не́бо ду́хом пресели́лся еси́, о́тче,/ те́ло же твое́ рука́ми учи́теля в земли́ погребе́ся./ Ны́не же со святы́ми лику́ет дух твой, взыва́я:/ благослове́н еси́, Го́споди Бо́же, во ве́ки.

Святу́ю Тро́ицу чествова́ти научи́лся еси́ от учи́теля твоего́ Се́ргия преподо́бнаго,/ те́мже и Бог вас превознесе́ и дарова́ честь,/ е́же со А́нгелы и все́ми святы́ми сла́вити Его́ во ве́ки.

Богоро́дичен: Есть вои́стинну сей святы́й день,/ в о́ньже собра́ нас Ма́терь Бо́жия просла́вити по́двиги преподо́бных оте́ц, зде просия́вших,/ и́хже па́мять пребыва́ет во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Рече́ Госпо́дь:/ прославля́ющаго Мя просла́влю./ Вои́стинну сбы́шася словеса́ сия́,/ та́ко бо просла́ви Госпо́дь преподо́бнаго Се́ргия/ и учени́к его́ мно́жество в земли́ Росси́йстей,/ я́ко и до днесь сла́ва их зри́тся.

Добр учи́тель, и добри́ суть ученицы́ его́:/ приснопа́мятный Ни́кон, прия́вший бре́мя оте́ческое, и Михе́й смире́нный,/ Иа́ков Яку́та и Васи́лий, пре́жде всех прише́дый,/ Они́сим диа́кон и Елиссе́й, до́бре подвиза́вшияся.

Ца́рствовати и́мут с ни́ми и Митрофа́н игу́мен,/ Си́мон же архимандри́т, и друго́й Си́мон,/ Исаа́кий и Мака́рий, зри́тели А́нгела,/ Илия́, Игна́тий и Иоанни́кий пресла́внии,/ Алекса́ндр и Андре́й во́ини и Епифа́ний Прему́дрый.

Богоро́дичен: А́нгелов Цари́цу и мона́шескаго чи́на а́нгельскаго Влады́чицу,/ прииди́те вси, восхва́лим и поклони́мся Ей,/ Та бо нело́жно обеща́ся бы́ти неотсту́пна ме́ста сего́ до сконча́ния ве́ка.

Свети́лен:

Свет Христо́в всели́ся в тя, Михе́е преподо́бне,/ да, предугото́вав чистото́ю жи́зни ду́шу твою́,/ у́зриши свет Небе́сный в посеще́нии Богома́тери и не у́мреши.

Сла́ва, и ны́не, Богоро́дичен:

Сла́дость А́нгелов, преподо́бных ра́дование,/ христиа́н всех Предста́тельнице, Де́во Ма́ти Госпо́дня,/ заступи́ нас и изба́ви ве́чных мук.

На хвали́тех стихи́ры глас 3:

Сла́ва Тебе́, Христе́ Бо́же,/ преподо́бных похвало́ и по́стников весе́лие,/ подвиза́вшихся в посте́ и моли́твах,/ и́хже упова́ние – ве́чное блаже́нство,/ е́же сла́вити Тро́ицу Единосу́щную.

Возсия́ днесь пресве́тлая па́мять/ отца́ на́шего Михе́я,/ кро́ткаго ученика́ кро́ткаго учи́теля,/ созыва́ющи мона́хов ликостоя́ния/ похвали́ти по́двиги послужи́вша Се́ргию ве́рно,/ и по сме́рти осажда́ющими ви́деннаго,/ и получи́вшаго у Христа́ ве́лию ми́лость.

Боже́ственною си́лою, о́тче, оде́явся,/ умертви́л еси́ себе́ ми́рови:/ житие́ непоро́чно пожи́в, пресла́вне,/ купножи́тель Се́ргия Богоно́снаго быв,/ с ни́мже моли́ся Христу́ Бо́гу/ спасти́ ду́ши на́ша.

Чистоты́ сосу́д показа́лся еси́,/ озаря́емь Боже́ственною све́тлостию,/ и ны́не на Небесе́х Христа́ зри́ши лице́м к лицу́,/ моли́ Его́, о́тче Михе́е,/ о соверша́ющих па́мять твою́ ве́рно.

Сла́ва, глас 2:

Смире́н, незло́бив, прост и кро́ток,/ па́че ине́х вои́стинну,/ и чист се́рдцем показа́лся еси́,/ Боже́ственных виде́ний сподобля́емь,/ чи́стии бо се́рдцем Бо́га у́зрят,/ я́коже рече́ Госпо́дь./ И ны́не предстоя́й Святе́й Тро́ице,/ моли́ся, о́тче Михе́е,/ во е́же спасти́ся нам.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Славосло́вие вели́кое и про́чее.

НА ЛИТУРГИ́И

Блаже́нны от кано́на свята́го на 4, песнь 3. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О преблаже́нне и Богому́дре о́тче Михе́е! Ты и́стинного Па́стыря Христа́ за́поведи исполня́я, вся́ко весе́лие, е́же в ми́ре, возненави́дел еси́ и житие́ твое́ в слеза́х препровожда́л еси́, теле́сныя стра́сти до конца́ умерщвля́я и во всем после́дуя житию́ учи́теля твоего́ преподо́бнаго Се́ргия, с ни́мже и сподо́бился еси́ ви́дети Небе́сную Цари́цу, Пресвяту́ю Богоро́дицу, посеща́ющую вас и благода́тне обещава́ющую, я́ко неотсту́пна бу́дет от ме́ста се́го. О такове́й, данней тебе́ благода́ти, ве́дуще мы, я́ко и ны́не ку́пно с Богоно́сным а́ввою твои́м во оби́телях све́та обита́еши и Го́споду предстои́ши, смире́нно мо́лим тя, к честне́й ра́це твое́й припа́дающе: не преста́ни вку́пе с ним моля́ся о нас ко Го́споду на́шему Иису́су Христу́ и Пречи́стей Его́ Ма́тери, о е́же сохрани́ти страну́ на́шу в ми́ре и благопребыва́нии, побе́ду на враги́ дарова́ти, всем же нам во благоче́стии и чистоте́ и взаи́мной любви́ ти́хое и безмо́лвное житие́ устро́ити, от гла́да, губи́тельства, огня́, меча́, междоусо́бныя бра́ни и от вся́кия беды́ и ну́жды нас изба́вити, да, спасе́ни душе́ю же и те́лом, единоду́шно сла́вим в Тро́ице сла́вимого Бо́га, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.