Служба преподобнаго Мартирия Зеленецкаго, Великолукскаго, чудотворца

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Доброде́телию Боже́ственною осиява́ем,/ преблаже́нне Марти́рие,/ на Небе́сныя кру́ги сла́вно вступи́л еси́/ разве́рзшимся ти зерца́лом та́ин,/ те́мже в благода́ти Боже́ственней яви́лся еси́,/ прие́мля неизрече́нная сия́ния.

Умо́м отве́рстым прие́м благода́ть,/ весь, преподо́бне о́тче, освяти́лся еси́/ и, от земны́х преста́вився,/ в Ца́рство Христо́вы сла́вы всели́лся еси́,/ Марти́рие всеблаже́нне;/ в по́стницех же быв, свети́льник пресве́тлый яви́лся еси́/ и пи́щи при́сно пребыва́ющия ны́не насыща́ешися,/ Боже́ственною сла́вою облистава́ем.

Тро́ица Безнача́льная и Единосу́щная/ яви́ тя Себе́ селе́ние, Богоно́се Марти́рие,/ и показа́ тя пресве́тла свети́льника:/ от жите́йских бо мяте́жей уклони́лся еси́ се́рдцем и житие́м,/ те́мже с Небе́сными А́нгелы водворя́ешися во Ца́рствии Небе́снем/ и ны́не Христа́ Бо́га моли́/ о и́же ве́рою восхваля́ющих всечестну́ю па́мять твою́.

Сла́ва, глас 6:

Прииди́те, мона́шествующих мно́жество, днесь,/ Марти́рия, благоче́стия подража́теля, пе́сньми и пе́ньми восхва́лим/ и, честну́ю и многоцеле́бную ико́ну, обстоя́ще,/ любе́зно облобыза́ем, глаго́люще:/ ра́дуйся, пресла́вне Марти́рие,/ оте́честву твоему́ пресве́тлый свети́льниче;/ ра́дуйся, чи́сте чисте́йшему Све́ту совокупля́яйся;/ ра́дуйся, я́ко со А́нгелы предстои́ши Пресвяте́й Тро́ице,/ ю́же непреста́нно моли́/ дарова́ти душа́м на́шим ве́лию ми́лость.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся:/ моли́ся, Влады́чице, с преподо́бным Марти́рием/ поми́ловати ду́ши на́ша.

На стихо́вне стихи́ры, глас 2:

Подо́бен: До́ме Евфра́фов:

Дом и жили́ще Ду́ху Пресвято́му, прему́дре Марти́рие, был еси́:/ те́мже и нас дом Тому́ соде́лай,/ святу́ю твою́ па́мять почита́ющих.

Стих: Честна́ пред Го́сподем/ смерть преподо́бных Его́.

До́м Ду́ха Свята́го,/ и гра́ду, и стране́ на́шей утвержде́ние,/ преподо́бным похвало́,/ соверше́нный ве́рою Марти́рие преподо́бне,/ спаса́й нас моли́твами твои́ми ко Го́споду.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дом неоску́дныя благода́ти и град кре́пкий,/ на враги́ побе́да,/ возвы́си рог правосла́вных моли́твами твои́ми ко Го́споду.

Сла́ва, глас 2:

Я́ко фи́никс, Дави́дски процве́л еси́, преподо́бне о́тче,/ и, кре́стное ору́жие восприи́м, Марти́рие,/ бе́здны страсте́й изсуши́л еси́ воздержа́нием,/ чистото́ю же возвы́сився,/ сосу́д яви́лся еси́ Пресвято́му Ду́ху./ Христа́ непреста́нно моли́ о нас,/ и́же ве́рою и любо́вию пра́зднующих всечестну́ю па́мять твою́.

И ны́не, Богоро́дичен: Все упова́ние мое́:

Тропа́рь, глас 2 (зри день сей ни́же).

Сла́ва, и ны́не, Богороди́чен: Вся па́че смы́сла:

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, самогла́сны, глас 8:

Преподо́бен и че́стен,/ свети́льник Боже́ственный и светоно́сный/ под спу́дом никогда́же скрыва́ется,/ но на версе́ полага́ет его́ высо́ких чуде́с Челове́колюбец./ Того́ моли́твами, Христе́,/ да́руй лю́дем Твои́м ве́лию ми́лость.

На ра́ло возложи́л еси́, всече́стне,/ де́лание рук твои́х,/ де́лая всегда́ Боже́ственная,/ и не возврати́лся еси́ зря вспять,/ но был еси́ упра́влен во Ца́рствие Христа́, вопло́щшагося Бо́га,/ во спасе́ние душ на́ших.

В лодии́ теле́сней вози́м,/ кро́ткими дыха́нии кро́ткаго ду́ха/ легко́ преше́л еси́ жите́йскую пучи́ну, му́дре,/ и, на би́сере многоце́ннем твои́ име́ния прода́в/ и обре́т его́, в себе́ удержа́л еси́,/ блаже́н быв Боже́ственными добро́тами его́.

Сла́ва, глас то́йже:

Преподо́бне и Богоно́сне о́тче Марти́рие преблаже́нне,/ Боже́ственным жела́нием распаля́ем,/ вся земна́я и жите́йская мудрова́ния ни во что́ же вмени́в,/ Христа́ Еди́наго возлюби́л еси́,/ и, в приста́нище пусты́нное доше́д,/ благоду́шно Бо́гу рабо́тал еси́,/ и, це́рковь прекра́сну Святы́я Тро́ицы воздви́г,/ оби́тель че́стну соста́вил еси́,/ и в ней трудолю́бно подвиза́лся еси́, Марти́рие о́тче,/ исцеле́ние неоску́дно подава́я притека́ющим с ве́рою/ и душетле́нныя стра́сти исцеля́я,/ мно́жество же бесо́в отрева́я,/ тем и ста́до ученико́в твои́х чудесы́ удивля́еши,/ ра́достно от души́ вопию́щих:/ Богоблаже́нне и преподо́бне о́тче наш Марти́рие,/ моли́ Христа́ Бо́га/ умири́ти мир и спасти́ ду́ши на́ша.

И ны́не, Богоро́дичен: Царь Небе́сный:

Вход. Проки́мен дне и чте́ния 3, преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие, сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда́ их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, суди́и, конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры хра́ма и свята́го, глас 3:

Наста́, Богоно́се, со́лнца светле́йший твой пра́здник,/ озаря́я приходя́щия к тебе́ ве́рою./ Безсме́ртием бо облагоуха́еши ду́ши на́ша,/ источа́я исцеле́ние от святы́я благо́дати твоея́,/ Марти́рие преподо́бне,/ моли́твенниче о душа́х на́ших.

Чу́вственныя стра́сти победи́в воздержа́ния брозда́ми,/ преподо́бне Марти́рие,/ ре́вность на земли́ к Небе́сным показа́л еси́,/ вся́кое плотско́е жела́ние ду́хови повину́вши./ Тем ны́не в Небе́сных селе́ниих водворя́ешися,/ моля́ о душа́х на́ших.

Све́тлая твоя́ па́мять, преподо́бне Марти́рие,/ на́ша сердца́ просвеща́ет/ заре́ю нетле́нныя и блаже́нныя жи́зни./ Зря́ще бо честну́ю твою́ ико́ну,/ я́ко от нея́ врачевство́ от вся́ких неду́гов/ боля́щим неоску́дно подава́емо быва́ет,/ хва́лим просла́вившаго тя Го́спода,/ Его́же моли́ спасти́ ду́ши на́ша.

Глас 8:

Преподо́бне о́тче всече́стне Марти́рие,/ доброде́тельми возше́д душе́ю на Не́бо, я́ко на колесни́це,/ побе́дныя по́чести прие́млеши,/ те́ло же твое́ трудолю́бное,/ я́ко ма́сти, во гро́бе оста́вил еси́, о́тче,/ источа́еши бо исцеле́ния и прогоня́еши ду́хи лука́выя./ Те́мже тя ублажа́ем, всече́стне.

Сла́ва, глас 6:

Ра́дуйся и весели́ся,/ Росси́йская всеосвяще́нная Це́рковь,/ со архиере́и и свяще́нники благочести́выми,/ мона́хи же и просты́ми,/ блаже́ннаго Марти́рия па́мять днесь почита́юще,/ духо́вне соше́дшеся, пра́зднуем/ и, честну́ю его́ ико́ну обстоя́ще/ и любе́зно покланя́ющеся,/ мо́лимся, глаго́люще:/ ра́дуйся, преблаже́нне Марти́рие,/ свети́льниче пресве́тлый, врачу́ боля́щим,/ моли́твенниче ко Спа́су Христу́ Бо́гу на́шему/ о и́же ве́рою и любо́вию притека́ющих к тебе́,/ моли́ во е́же спасти́ся душа́м на́шим.

И ны́не, Богоро́дичен: Творе́ц и Изба́витель:

На стихо́вне стихи́ры, глас 6.

С ве́рою и любо́вию, празднолю́бцы, соше́дшеся,/ псалмы́ и пе́сньми восхва́лим днесь/ Небе́снаго челове́ка и земна́го А́нгела./ О всеблаже́нне и преподо́бне,/ по́стников похвало́,/ о нас моли́ся ко Го́споду, Марти́рие о́тче наш,/ поми́ловатися душа́м на́шим.

Стих: Честна́ пред Го́сподем/ смерть преподо́бных Его́.

Честны́й и светоно́сный, преподо́бне, твой пра́здник/ испо́лни ра́дости и весе́лия духо́внаго,/ те́мже, соше́дшеся, мона́хов мно́жество/ и христоимени́тии лю́дие,/ любо́вию восхваля́юще,/ блажи́м пресла́вная благодея́ния Твоя́:/ я́ко бо крин во юдо́ле, процве́л еси́,/ благоуха́еши ду́ши на́ша и чу́вства./ Марти́рие о́тче наш,/ моли́ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко уязви́выйся жела́нием Боже́ственным,/ преподо́бне о́тче Марти́рие,/ взем крест свой, после́довал еси́ Христу́,/ вся же плотска́я мудрова́ния умертви́л еси́/ и насле́довал еси́ вои́стинну кро́тких зе́млю,/ прича́стием обожа́ем,/ и неизрече́ннаго о́наго весе́лия наслажда́яся,/ помина́й нас, творя́щих всечестну́ю па́мять твою́.

Сла́ва, глас 8:

Мона́хов мно́жества,/ наста́вника тя почита́ем, о́тче наш Марти́рие,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

На благослове́ние хлебо́в тропа́рь свята́го два́жды и Богоро́дице Де́во: еди́ножды.

Тропа́рь, глас 2:

От ю́ности, Богоблаже́нне, Христа́ возлюби́в,/ оте́чество оста́вил еси́/ и, всех мирски́х мяте́жей уклони́вся,/ в ти́хое приста́нище пречестны́я оби́тели Богома́терни дости́гл еси́;/ отню́дуже уве́дев непрохо́дную пусты́ню,/ крестови́дною заре́ю пока́занную,/ жела́тельне ю́ обре́л еси́,/ и, в ней всели́вся,/ и́ночествующих собра́л еси́,/ и сих уче́ньми свои́ми, я́ко ле́ствицею восхо́дною на Не́бо,/ трудолю́бно тща́лся еси́ возводи́ти к Бо́гу,/ Ему́же моли́ся, Богому́дре Марти́рие,/ дарова́ти душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь два́жды. Сла́ва и ны́не, Богоро́дичен: Вся па́че смы́сла:

По 1-й кафи́зме седа́лен, глас 4:

Зва́нию Го́спода твоего́ после́довал еси́,/ мир оста́вив и вся кра́сная, преблаже́нне Марти́рие,/ претерпе́л еси́ теле́сное озлобле́ние усе́рдно,/ полки́ же отрази́л еси́ де́монов му́жественне./ Те́мже твою́ па́мять при́сно пе́сньми восхвали́ем ве́рно.

Сла́ва, и ны́не, Богоро́дичен:

Обнови́ла еси́, Чи́стая,/ Боже́ственным Рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния:/ те́мже Тя по до́лгу блажи́м вси, Де́во Препросла́вленна,/ я́коже прорекла́ еси́.

По 2-й кафи́зме, седа́лен, глас 5:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием/ и тве́рдым терпе́нием вои́стинну,/ и посрами́вша зело́ противобо́рца врага́ и всю его́ горды́ню,/ и ны́не моля́щася Го́сподеви/ поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз рождества́/ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние;/ сла́ва Твоя́, Богоро́дице, во всех простре́ся/ ко спасе́нию душ на́ших.

По полиеле́и седа́лен, глас 1:

Погре́бл еси́ страсте́й вся воста́ния/ умерщвле́нием пло́ти, свяще́нный о́тче,/ жизнь безконе́чную по сме́рти прия́л еси́;/ те́мже днесь Христо́ва Це́рковь/ пра́зднует твою́ па́мять досточу́дную, преподо́бных украше́ние.

Сла́ва, и ны́не, Богоро́дичен:

Наста́ви ны на путь покая́ния,/ уклоня́ющияся при́сно к злым безпу́тием/ и Преблага́го прогневля́ющия Го́спода,/ Неискусобра́чная Благослове́нная Мари́е,/ прибе́жище отча́янных челове́ков,/ Бо́жие обита́лище.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех,/ я́же воздаде́ ми. Вся́кое дыха́ние да хва́лит Го́спода. Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монския разори́л еси́ по́лчища/ и А́нгельския дости́гл еси́ чи́ны,/ и́хже житию́ непоро́чно поревнова́л еси́;/ дерзнове́ние име́яй ко Христу́ Бо́гу,/ мир испроси́ душа́м на́шим.

Кано́н преподо́бнаго на 8, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Благи́ми нра́вы укра́сився,/ Христу́ прилепи́лся еси́ от ю́ности,/ плотски́я стра́сти умертви́в воздержа́нием,/ и к Животу́, преподо́бне, преста́вился еси́.

Глаго́лов и зако́нов Бо́жиих исполни́тель быв,/ испо́лнился еси́, о́тче прему́дре, Боже́ственных даро́в/ и чуде́с всем лучи́ бога́тно испусти́л еси́.

Кре́постию Христа́ возмо́г,/ держа́ву же и си́лу вра́жию низложи́л еси́/ и похвалу́ побе́дныя по́чести, преподо́бне, чуде́сными сия́нии улучи́л еси́.

Со́весть име́л еси́ бла́гу,/ о́ко серде́чное, взира́ющее к Бо́гу,/ те́мже внят моли́тве твое́й, прему́дре,/ и с преподо́бными сочета́ тя, Богоблаже́нне.

Богоро́дичен: Стра́сти пло́ти моея́/ и ума́ моего́ двиза́ния неподо́бная утоли́,/ молю́ Тя, Пречи́стая Де́во,/ и испра́ви мя, заблу́ждшаго умо́м.

Катава́сия: Отве́рзу уста́ моя́:

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Весь прилежа́ Вседержи́телю, преподо́бне о́тче прему́дре,/ всея́ бесо́вския зло́бы избе́гл еси́/ досточу́дным водворе́нием в непроходи́мая.

Высото́ю смире́ния украша́ем,/ свергл еси́ на зе́млю велехва́льнаго гордели́вца пло́ти своея́/ Боже́ственными веле́ньми и до́брыми де́лы твои́ми.

Пло́тию обложе́н, о́тче прему́дре,/ смири́л еси́ надме́нную вы́ю нечести́ваго/ благи́ми к Бо́гу воздыха́ньми, непоро́чне.

Име́я поспешеству́ющую тебе́ Бо́жию си́лу, прему́дре,/ я́ко чу́ден во пло́ти сый быв,/ чудеса́ источи́л еси́ воскресе́нием ме́ртваго/ и ны́не отго́ниши неду́ги.

Богоро́дичен: В ложесна́ Твоя́ воплоща́ем, Всенепоро́чная, всели́ся Зижди́тель/ на благодея́ние ве́рно пою́щим Тя.

Седа́лен, глас 4:

Стра́стное порабо́тил еси́ пло́ти своея́ мудрова́ние/ и ни́зшее свое́ покори́л еси́ вы́сшему, о́тче пресла́вне,/ сокруши́л бо вы́и бесо́в смире́нием и посто́м,/ во всечестны́х дея́ниих су́щи, возсия́л еси́ в ми́ре;/ те́мже я́ко луча́ светоли́тнаго сия́ния Христо́ва возсия́ нам,/ днесь воспева́ющим тя, Марти́рие преподо́бне.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще Рождество́ Твое́ непостижи́мое,/ и́мже изба́ви ны ле́сти и кова́рствия вра́жия/ и от вся́ких бед, Влады́чице Богоро́дице,/ и ве́рно Тебе́ вопие́м:/ поми́луй ста́до Твое́, Еди́на Пречи́стая.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Соде́яв, пресла́вне, ду́шу твою́ храм Свято́му Ду́ху,/ был еси́ насле́дник Го́рняго Ца́рствия,/ с Вы́шними чи́нами водворя́яся, всече́стне о́тче.

Многоболе́зненныя стра́сти всегда́ врачу́еши приступа́ющих к тебе́ те́пле:/ благода́ть бо, преподо́бне, и́маши от Го́спода/ содева́ти зна́мения и чудеса́, пребога́те.

Красне́йшим прозябе́нием, о́тче, в дому́ Бо́жии прозя́бл еси́,/ доброде́тельми укра́шен и плоды́ чуде́сными облагоуха́ем.

Богоро́дичен: Ни́ва духо́вная, я́коже из бразды́ Клас изнесла́ еси́,/ всю тварь пита́ющаго вся́ческих Бо́га, Присноде́во.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе́ ино́го не зна́ем.

Умо́м очи́щенным пресла́вне зри́ши, преподо́бне,/ добро́ту неизрече́нную – Христа́,/ вся́ческих Бо́га на́шего.

Я́коже Илия́ на колесни́це, о́тче,/ доброде́тельми твои́ми возше́л еси́ на Не́бо/ и та́мо чи́сте зри́ши Святу́ю Тро́ицу,/ к Ней же ду́хом горя́ и возлета́я.

Стягну́в123 те́ло твое́, чистото́ю опелена́я/ и воздержа́нием покоря́ его́ ду́ху,/ стро́потная вся124 оста́вил еси́/ любве́ ра́ди Христа́ своего́ и Небе́снаго приобре́тения.

Богоро́дичен: Исцели́, Милосе́рдная Ма́ти, неду́гующаго ума́ моего́ душевре́дное омраче́ние/ и озари́ све́том ра́зума Христа́ Твоего́, Всенепоро́чная.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Лука́вый умертви́ся змий свяще́нными по́двиги твои́ми, преподо́бне Марти́рие,/ те́мже и моля́щимся тебе́ вспомоществу́еши/ разреши́тися от его зло́бы, блаже́нне.

Отсе́кл еси́ приле́жно серпо́м,/ его́же ви́де Заха́рий серпови́дный,/ стра́сти от души́ твоея́,/ те́мже, приобре́т прему́дрости семена́,/ пожа́л еси́ мно́гих исцеле́ний бога́тныя кла́сы.

Кре́постию ду́ха, о́тче,/ и тве́рдостию постоя́ннаго ума́ твоего́/ возмо́гл держа́ву вра́жию и си́лу его́ низложи́ти от себе́/ и тем похвалу́ побе́дныя по́чести прия́л еси́, преподо́бне,/ ве́рных осиява́я умы́.

Богоро́дичен: Пресвята́я Чи́стая,/ Творе́ц устро́и Тя в жили́ще Себе́, Христо́с Бог наш,/ те́мже хода́тайствы Твои́ми изба́ви нас от о́бласти льсти́ваго,/ я́ко да по до́лгу Тя чтим и ублажа́ем.

Конда́к, глас 8:

Оте́чества, преподо́бне, и всего́ мирска́го мяте́жа/ уклони́тися возжеле́л еси́,/ и, в пусты́ню всели́вся,/ та́мо во блаже́ннем безмо́лвии жесто́кое житие́ показа́л еси́,/ и ча́да послуша́ния и смире́ния в нем возрасти́л еси́./ Сего́ ра́ди, дерзнове́ние стяжа́в ко Святе́й Тро́ице,/ е́же моли́тися, Богоблаже́нне, о нас, ча́дех свои́х, и́хже собра́л еси́,/ и о всех правове́рных, да зове́м ти:/ ра́дуйся, о́тче Марти́рие,/ безмо́лвия пусты́ннаго любителю.

И́кос:

Возлюби́в, преподо́бне, Христо́вы Боже́ственныя за́поведи/ и возненави́дев плоть и я́же по ней земна́я мудрова́ния,/ прише́л еси́ усе́рднейше в непроходи́мую пусты́ню бла́тную,125/ и, та́мо всели́вся любве́ ра́ди Христо́вы и душе́внаго обогаще́ния,/ я́ко свети́льник, просия́л еси́ чуде́с дарова́нии:/ ца́рскаго бо сы́на я́ко от сна возста́вил еси́/ и тем царя́ Симео́на126 удиви́л еси́./ Сия́ облобыза́я, ве́рнии, припа́дая, мо́лимся:/ просвети́ о́чи на́ша душе́вныя воспева́ти досто́йно по́двиги твоя́:/ поще́ния, бде́ния, сле́зы и боле́зни,/ изможде́ние те́ла блаже́нныя ра́ди бу́дущия жи́зни,/ ея́же наслажда́яся, моли́ непреста́нно о всех нас.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси.

Проше́д по́двиги по́стныя, о́тче,/ умо́м кре́пким го́рдую вы́ю смири́л еси́,/ Боже́ственным вдохнове́нием и спаси́тельным Богообра́зным подви́жничеством ду́шу твою́ укра́сил еси́, поя́:/ благослове́н Бог оте́ц на́ших.

Красне́йшее прозябе́ние, о́тче,/ в дому́ Бо́жии произра́сл еси́ ве́рою,/ сугу́бейший плод прине́сл еси́ доброде́тельми,/ те́ми укра́шен, чудесы́ облагоуха́л еси́.

Просвети́в твое́ се́рдце умиле́нием,/ нача́льник был еси́ свяще́ннейшаго собо́ра, о́тче,/ наказу́я, и уча́, и вся к Бо́жией во́ли приводя́, пою́ще:/ оте́ц на́ших Бо́же, благослове́н еси́.

Богоро́дичен: Но́во Отроча́ ро́ждшая, Пребезнача́льнаго Сло́ва,/ обетша́вшия ны зело́ грехо́м,/ ве́рныя обнови́ла еси́, Де́во,/ и воспева́ти научи́ла еси́:/ оте́ц на́ших Бо́же, благослове́н еси́.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Насле́дниче Боже́ственных селе́ний, А́нгельски, о́тче, пожи́л еси́;/ тем, со А́нгелы водворя́яся,/ лику́ет в черто́гах Небе́сных со святы́ми дух твой.

Невозвра́тным умо́м и невозвра́тными стопа́ми, Богому́дре о́тче,/ ше́ствовал еси́, досточу́дне, к Небе́сным селе́нием,/ Ева́нгельскою стезе́ю направля́емь,/ от стро́потных путе́й до конца́ уклони́лся еси́.

Все́льшеюся в тя благода́тию Свята́го Ду́ха, о́тче Марти́рие,/ благоустроя́еши ду́ши притека́ющих к тебе́:/ лука́вно бо страстьми́ в челове́цех де́йствующии/ нечи́стии ду́си отгоня́еми быва́ют.

Богоро́дичен: Вода́ еси́ неисчерпа́емая, Деви́це,/ Дщерь Царя́ Небе́снаго,/ от Нея́же вси ве́рнии, пию́ще,/ благода́ти исполня́емся, душе́ю и те́лом освяща́еми.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к:/ те́мже Пречи́стую Богоро́дицу, ве́рнии, велича́ем.

Исцеле́ние источа́ет бога́тно честна́я твоя́ ико́на Бо́жиим Ду́хом,/ и стра́сти многовре́менныя исцеля́ет, о́тче, приходя́щих к тебе́,/ и прогоня́ет лука́выя ду́хи лю́тыя,/ и воздвиза́ет ве́рныя восхваля́ти твоя́ све́тлыя по́двиги.

Я́ко вели́кое со́лнце,/ нам вели́чием по́двиг твои́х возсия́л еси́ в преде́лах страны́ сея́:/ уме́рый бо, преше́л еси́ от све́та к Све́ту, от гро́ба возсия́вшему./ Тем вопие́м ти:/ просвети́ и на́ша помышле́ния, о́тче преподо́бне Марти́рие.

Те́ло твое́, блаже́нне, терпели́вое, вяза́вшееся вери́гами,/ стра́сти неисце́льныя прикоснове́нием исцеля́ет,/ Бо́гу и Спа́су, тя вельми́ просла́вльшу, о́тче прему́дре и досточу́дне Марти́рие,/ я́ко де́лы твои́ми до́брыми просла́вльшуся, преподо́бне.

Процве́л еси́ в по́стнических удо́лиях, прехва́льне о́тче наш, я́ко ши́пок многоцве́тен,/ и, я́ко крин, облагоуха́л еси́ со́вести ве́рных доброде́тельми и чудесы́:/ те́мже, преподо́бне, отжени́ от нас стра́сти смердя́щия.

Богоро́дичен: Просвети́, Чи́стая Де́во,/ се́тующее се́рдце мое́ при́сно преступле́ньми и жите́йскими молва́ми,/ не оста́ви мене́ враго́м бы́ти в ра́дость,/ я́ко да сла́влю Тя и любо́вию пою́, Препе́тая.

Свети́лен:

Мирска́го пристра́стия, я́ко от скве́рны уклони́лся еси́,/ и хвра́стие страсте́й веле́нием Бо́жиим я́ко огне́м попали́л еси́,/ и а́лчбою плоть свою́ увяди́л еси́, о́тче,/ и Небе́сною сла́вою со А́нгелы обогати́лся еси́:/ те́мже непреста́нно моли́ о нас Христа́ Бо́га, преподо́бне Марти́рие.

Сла́ва, и ны́не, Богоро́дичен:

Тя Предста́тельницу и́мамы, вси гре́шнии, о Пресвята́я Де́во,/ ты благопреме́нна сотвори́ Сы́на Твоего́/ ма́терними Твои́ми к Нему́ моли́твами.

На хвали́тех стихи́ры на 4, глас 5:

Преподо́бне о́тче и Богоно́се Марти́рие,/ в жи́зни вре́менней подвиза́вся,/ моли́твою, посто́м и воздержа́нием/ ду́шу свою́ с те́лом очи́стив,/ Ду́ху Пресвято́му прекра́сная оби́тель яви́лся еси́,/ И́же и сла́вна тя, преблаже́нне, соде́ла,/ в чудесе́х же вели́каго свети́льника,/ просвети́вшаго су́щих во мра́це неве́жествия:/ тя я́ко наста́вника мона́хов велему́дренно ублажа́ем.

Преподо́бне о́тче и Богоно́се Марти́рие,/ ты на Бо́га упова́ние о всем возложи́в,/ це́рковь прекра́сну Святы́я Тро́ицы воздви́гл еси́,/ Бо́гу ти помога́ющу,/ и к сему́ оби́тель че́стну поста́вил еси́ хотя́щим спасти́ся/ и е́же о всех моле́ние приноси́ти ко Влады́це Христу́./ Ему́же моли́ся, преподо́бне,/ пода́ти душа́м на́шим мир и ве́лию ми́лость.

Преподо́бне о́тче и Богоно́се Марти́рие,/ свети́льника тя стяжа́вше,/ свяще́нную твою́ па́мять восхваля́ем/ и свяще́нными пе́сньми ублажа́ем,/ я́ко нас при́сно назира́еши,/ и от бед и зол огражда́еши,/ и к покая́нию воздвиза́еши./ И ны́не, любо́вию припа́дающе, преподо́бне, мо́лимся/ тобо́ю прия́ти ве́лию ми́лость.

Слава, глас 6:

Преподо́бне о́тче Марти́рие,/ не дал еси́ сна твои́ма очи́ма,/ ни ве́ждома дрема́ния,/ до́ндеже ду́шу и те́ло от страсте́й свободи́л еси́/ и себе́ Ду́ху Пресвято́му жили́ще угото́вал еси́;/ те́мже Единосу́щныя Тро́ицы уго́дник быв,/ оби́льно благода́ть прия́л еси́,/ избра́нниче Христо́в, преподо́бне Марти́рие,/ моли́ся спасти́ ду́ши на́ша.

И ны́не, Богоро́дичен: Богоро́дице, Ты еси́ лоза́ истинная:

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Апо́стол к Гала́том, зача́ло 213. Ева́нгелие от Луки́, зача́ло 24. Прича́стен: В па́мять ве́чную: