Служба преподобнаго Лонгина, игумена Коряжемскаго, чудотворца
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 5:
Любо́вию Боже́ственною разжига́емь,/ преподо́бне о́тче Ло́нгине,/ от ю́ных лет во и́ночестве подвиза́лся еси́,/ во́зраста же соверше́ннаго дости́г,/ в пусты́ню да́льную пресели́лся еси́/ и, та́мо оби́тель созда́в,/ в ней ста́до твое́ до́бре упа́сл еси́,/ по преставле́нии же твое́м благода́ть чуде́с от Го́спода прия́л еси́./ Того́ моли́ спасти́ся тя почита́ющим.
Преподо́бне о́тче Ло́нгине,/ любве́ ра́ди ко Христу́, Учи́телю твоему́,/ вся земна́я презре́л еси́,/ и, в пусты́ню всели́вся, пло́ти мудрова́ния умертви́л еси́,/ и по́стническими труды́ житие́ твое́ украси́л еси́,/ те́мже и ученики́ собра́л еси́,/ ревну́ющия твоему́ житию,/ сия́ ко Христу́ приве́л еси́./ Того́ моли́ спасти́ся всем, пою́щим тя.
По́стника Госпо́дня пе́сньми почти́м,/ вся прило́ги страсте́й воздержа́нием тве́рдым/ и терпе́нием кре́пким умертви́вша,/ и сопроти́внаго всю горды́ню зело́ посрами́вша,/ и ны́не моля́щася Го́сподеви/ поми́ловатися душа́м на́шим.
Сла́ва, глас 6:
Во страну́ да́льную пресели́вся, преподо́бне,/ и в пусты́ню безмо́лвия вшед,/ та́мо оби́тель созда́л еси́/ и в ней Небе́сное бога́тство стяжа́л еси́,/ моли́твою бо и поще́нием се́ял еси́,/ в ра́дости же пожина́еши плоды́ трудо́в твои́х./ Не оста́ви у́бо оби́тель твою́,/ но ми́лостивно сию́ посеща́й/ и Христу́, о́тче Ло́нгине, моли́ся/ спасти́ся душа́м на́шим.
И ны́не, Богоро́дичен: Богоро́дице, Ты еси́ лоза́ и́стинная:
На стихо́вне стихи́ры, глас 2:
Жизнь земну́ю я́ко преходя́щую/ презре́л еси́, блаже́нне,/ и сподо́бился еси́ улучи́ти жизнь блаже́нную,/ и Бо́жия сла́вы прича́стник яви́лся еси́,/ о́тче Богоно́сне.
Стих: Честна́ пред Го́сподем/ смерть преподо́бных Его́.
Любве́ ра́ди ко Го́споду,/ преподо́бне Ло́нгине,/ о пло́ти раче́ния отве́ргл еси́/ и ду́шу, от страсте́й свобо́дну,/ Бо́гови предста́вил еси́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Бо́дренными моли́твами/ и трудолю́бными по́двиги оби́тель твою́ украси́л еси́/ и це́рковь ве́рных обогати́л еси́,/ о́тче преблаже́нне.
Сла́ва, глас то́йже:
В пусты́ню вшел еси́,/ нося́ о́браз Креста́ Христо́ва,/ и отту́ду доброде́тели ра́ди/ к Небе́сному гра́ду преше́д еси́,/ дости́г пра́ведных поко́я/ и святы́х ра́дования./ Те́мже с ни́ми, Ло́нгине,/ приле́жно Го́сподеви моли́ся,/ да изба́вимся от вся́каго сопроти́внаго обстоя́ния вси мы,/ ве́рою жизнь твою́ почита́ющии/ и честно́е твое́ успе́ние сла́вящии.
И ны́не, Богоро́дичен: Все упова́ние мое́:
Тропа́рь, ектения́ и отпу́ст.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: поста́вим стихо́в 8 и пое́м настоя́щия стихи́ры, глас 8.
Подо́бен: Му́ченицы Госпо́дни:
Преподо́бный и честны́й муж,/ я́коже свети́льник Боже́ственный и многосве́тлый,/ под спу́дом жите́йския суеты́ никогда́же сокрыва́ется,/ но на версе́ горы́ поставля́ется./ Моли́твами светоно́снаго уго́дника Твоего́ Ло́нгина, Христе́ Бо́же,/ да́руй лю́дем Твои́м ве́лию ми́лость.
На ра́ло ру́це твои́ возложи́л еси́, всече́стне,/ де́лая всегда́ Боже́ственная,/ и не возврати́лся еси́ зря вспять,/ но был еси́ упра́влен во Ца́рствие Христа́, вопло́щшагося Бо́га./ Того́ моли́ о спасе́нии душ на́ших.
В ладии́ теле́сней ле́гце/ преплы́л еси́ жите́йскую пучи́ну, му́дре,/ кро́ткими дыха́нии Ду́ха Бо́жия направля́емь,/ вся же бла́га тле́нная ни во что́же вмени́в,/ обре́л еси́ би́сер многоце́нный, Христа́,/ и обогати́лся еси́ Боже́ственными Того́ добро́тами.
И́ны стихи́ры, глас 6:
Богоно́сне преблаже́нне Ло́нгине,/ вся плотска́я мудрова́ния ду́хови покори́л еси́,/ поще́ньми же и страда́ньми утверди́вся,/ я́ко зла́то, в горни́ле искуше́но, возсия́л еси́/ и оби́тель Ду́ха Пресвята́го соде́лался еси́;/ собра́в же мона́шествующих мно́жества,/ уче́ньми твои́ми на высоту́ добро́детелей сия́ возве́л еси́./ Помина́й ны, чту́щия па́мять твою́ свяще́нную,/ и моли́ спасти́ся душа́м на́шим.
Возсия́ днесь пресве́тлая и всепра́зднственная па́мять твоя́,/ пресла́вне о́тче Ло́нгине,/ созыва́ющи многочи́сленное по́стник сосло́вие/ и преподо́бных ликостоя́ния,/ А́нгелы же и челове́ки/ к похвале́нию во святы́х Свои́х сла́вимаго Христа́ Бо́га на́шего./ Те́мже и мы, притека́юще к тебе́/ и исцеле́ний да́ры оби́льно прие́млюще ,/ венча́вшего тя Христа́ прославля́ем,/ Спа́са душ на́ших.
Богоно́сне преблаже́нне о́тче Ло́нгине,/ ты псало́мски слеза́ми твои́ми зе́млю ороси́л еси́/ и не дал еси́ сна твои́ма очи́ма,/ ни ве́ждом твои́м дре́мания,/ серде́чным жела́нием ко Христу́ устремля́яся,/ Его́же возлюби́л еси́,/ сего́ ра́ди мона́хом о́браз яви́лся еси́/ и доброде́тельми просия́л еси́./ Те́мже тя ублажа́ем,/ велича́юще тебе́ Просла́вльшаго.
Сла́ва, глас то́йже:
Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию я́ко мо́щно возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ наста́вник,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х зерца́лом разре́шшимся,/ о́тче наш Ло́нгине,/ чи́сте зри́ши Святу́ю Тро́ицу,/ моля́ся несре́дственне о ве́рою и любо́вию чту́щих тя.
И ны́не, Богоро́дичен: Кто Тебе́ не ублажи́т:
Вход. Проки́мен дне и чте́ния преподо́бническая три.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всеплодие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися на Него разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть,/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Господеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (гла́вы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И, от каменоме́тныя я́рости испо́лнь, паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.
На лити́и стихи́ра хра́ма и преподо́бному стихи́ры, глас 8:
Преподо́бне о́тче Богому́дре,/ слепы́м подае́ши свет,/ хромы́м хожде́ние и боля́щим исцеле́ние,/ ми́лостивно приклоня́яся ко приходя́щим с ве́рою ко гро́бу твоему́/ и прося́щим твоея́ по́мощи:/ засту́пника бо и предста́теля,/ вси ве́рнии, тя обрето́хом.
Преподо́бне о́тче всече́стне Ло́нгине,/ возше́д на колесни́цу доброде́телей,/ к Бо́гу прибли́жился еси́/ и, я́коже ми́лоть, нам те́ло твое́,/ положе́но во гро́бе, оста́вил еси́/ источа́ти исцеле́ния,/ прогоня́ти ду́хи лука́выя./ Те́мже ублажа́ем тя, о́тче прехва́льне.
Лико́м преподо́бных сочета́лся еси́,/ по́стническим житие́м украси́вся, блаже́нне,/ и, ны́не веселя́ся в Небе́сных оби́телех,/ иде́же лику́ют Ангели,/ и све́том Боже́ственным вои́стину озаря́емь,/ помина́й су́щия на земли́ лю́ди твоя́,/ любо́вию тя ублажа́ющия/ и святу́ю твою́ па́мять творя́щия.
Сла́ва, глас то́йже:
По́двигом до́брым подвиза́вся,/ яви́лся еси́ о́браз воздержа́ния, чу́дне,/ в пусты́ню же всели́лся еси́,/ смотря́я Вы́шняго Иерусали́ма красоту́;/ и ны́не на Небесе́х досто́йно прие́млеши по́чести трудо́в твои́х/ и с Небе́сными чинонача́лии ра́дуешися, преблаже́нне,/ ве́чных благ насле́дник и Ца́рствия жи́тель быв./ Моли́ся у́бо, преподо́бне Ло́нгине, Спа́су всех/ умири́ти мир и спасти́ души на́ша.
И ны́не, Богоро́дичен:
Аз, Де́во Свята́я Богоро́дице,/ к покро́ву Твоему́ прибега́ю,/ вем, я́ко обря́щу Тобо́ю спасе́ние:/ мо́жеши бо, Чи́стая, помощи́ мне.
На стихо́вне стихи́ры, глас 1.
Подо́бен: Небе́сных чино́в:
Наста́, Богоно́сне о́тче,/ со́лнца светле́йший твой пра́здник,/ в не́мже ра́достию озаря́ются приходя́щии к тебе́ с ве́рою/ и благода́тию облагоуха́ются,/ здра́вие душ и теле́с прие́млюще,/ Ло́нгине преподо́бне,/ моли́твенниче о душа́х на́ших.
Стих: Честна́ пред Го́сподем/ смерть преподо́бных Его́.
Чу́вственныя стра́сти теле́сныя укроти́в брозда́ми воздержа́ния,/ чудоде́йственниче Ло́нгине,/ и равноа́нгельное житие́ на земли́ показа́в,/ вся плотска́я жела́ния ду́хови покори́л еси́;/ сего́ ра́ди ны́не в Небе́сных селе́ниих водворя́яся,/ моли́ся о душа́х на́ших.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Блаже́нне о́тче Ло́нгине,/ спасе́ния души́ твоея́ от ю́ности возжеле́в,/ дре́вняго челове́ка с похотьми́ его́ совле́клся еси́/ и во Христа́ обле́клся еси́ вои́стину,/ те́мже и мона́хов наста́вник был еси́, преподо́бне,/ и мно́гая вра́жия ополче́ния низложи́л еси́./ Моли́ спасти́ся душа́м на́шим.
Сла́ва, глас 8:
Мона́хов мно́жества/ наста́вника тя почита́ем, о́тче наш Ло́нгине,/ твое́ю бо стезе́ю вои́стину пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных./ С ни́миже моли́ся Го́сподеви/ поми́ловатися душа́м на́шим.
И ны́не, Богоро́дичен: Безневе́стная Де́во:
Тропа́рь, глас 1:
От мяте́жа мирска́го удали́вся,/ к немерца́ющему Све́ту прите́кл еси́,/ преподо́бне о́тче Ло́нгине,/ и ны́не чи́сте зри́ши Святу́ю Тро́ицу,/ Ю́же моли́ за ны недосто́йныя,/ да спасе́т ду́ши на́ша.
НА У́ТРЕНИ
На Бог Госпо́дь: тропа́рь, два́жды.
Сла́ва, и ны́не, Богоро́дичен.
По 1-м стихосло́вии седа́лен, глас 4:
Зва́нию Го́спода твоего́ после́довал еси́,/ мир отве́рг и вся того́ кра́сная, преблаже́нне о́тче Ло́нгине,/ претерпе́л же еси́ пусты́нное озлобле́ние усе́рдно/ и полки́ де́монов му́жественне отрази́л еси́./ Те́мже твою́ па́мять при́сно пе́сньми восхваля́ем.
Сла́ва, и ны́не, Богоро́дичен:
Обнови́ла еси́, Чи́стая, Боже́ственным рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к Жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.
По 2-м стихосло́вии седа́лен, глас 1:
Пра́ведно на земли́ пожи́л еси́, о́тче Богоно́сне,/ те́мже ны́не со А́нгелы лику́еши на Небесе́х;/ помина́й ны, творя́щия па́мять твою́, Ло́нгине преподо́бне.
Сла́ва, и ны́не, Богоро́дичен:
Ужа́сно чу́до зача́тия/ и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние;/ сла́ва Твоя́, Богоро́дице, всем простре́ся, во спасе́ние душ на́ших.
По полиеле́и седа́лен, глас 1:
Угаси́л еси́ страсте́й все́ воста́ние умерщвле́нием пло́ти, свяще́нный о́тче,/ и жизнь безконе́чную по сме́рти прия́л еси́;/ те́мже днесь Христо́ва Це́рковь пра́зднует твою́ досточу́дную па́мять,/ преподо́бных украше́ние.
Сла́ва, и ны́не, Богоро́дичен:
Наста́ви ны на путь покая́ния,/ уклоня́ющияся при́сно к злым обы́чаем и Преблага́го прогневля́ющия Го́спода/ Неискусобра́чная, Благослове́нная Мари́е,/ прибе́жище отча́янных челове́ков, Бо́жие обита́лище.
Степе́нна, 1-й антифо́н 4-го гла́са. Проки́мен: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же возда́де ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х./ Де́монская разори́л еси́ по́лчища/ и дости́гл еси́ чино́в А́нгельских,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.
Кано́н Богоро́дице со ирмосо́м на 6 и преподо́бнаго Ло́нгина, на 8, глас 4.
Песнь 1
Ирмо́с: Триста́ты кре́пкия,/ рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.
Сло́ве Бо́жий, Еди́н Сый Святы́я Тро́ицы,/ пре́жде век от Отца́ рожде́нный,/ напосле́док же от Де́вы воплоти́выйся,/ души́ трича́стное во глубине́ безстра́стия потопи́, молю́ся,/ да преподо́бному, я́ко в тимпа́не, во умерщвле́нии телесе́ воспою́ пе́ние.
Врага́ победи́в посто́м и моли́твою/ и крест на ра́мо взем,/ Еди́ному в Тро́ице Бо́гу послужи́л еси́,/ твои́ми к Нему́ моли́твами/ помози́ мне воспе́ти по достоя́нию по́двиги и чудеса́ твоя́, Ло́нгине преподо́бне.
Оста́вил еси́ мирски́й мяте́ж и всели́лся еси́ в пусты́ню,/ име́я непобеди́мое ору́жие, Крест Христо́в,/ и́мже мы́сленныя враги́ победи́л еси́.
Богоро́дичен: Пло́тию Безпло́тнаго ро́ждшая, Богороди́тельнице Пресвята́я,/ от теле́сных и душе́вных скверн нас омы́й/ окропле́нием Ма́терния Твоея́ моли́твы.
Песнь 3
Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́, Человеколю́бче.
Ни му́дростию, ни си́лою, ни бога́тством хваля́ся,/ но О́тчую Ипоста́сную си́лу прославля́я, преподо́бне,/ жили́ще Ду́ху Свято́му себе́ соде́лал еси́, Ло́нгине.
Небре́гл еси́ о земне́м жили́щи/ и стяжа́л еси́ себе́ сокро́вище в Небе́сных селе́ниих./ Моли́твами твои́ми сохрани́ оби́тель твою́ от враг необори́му.
Жите́йская бла́га отри́нув,/ сла́вен дом Божеству́ себе́ созда́л еси́/ и, о́браз Бо́жий неврежде́н в себе́ соблюда́я,/ никогда́же прогне́вался еси́,/ но благ и кро́ток был еси́, Ло́нгине преподо́бне.
Богоро́дичен: Из ложе́сн Твои́х, Богома́ти Пречи́стая,/ возсия́ пресла́вно вели́кое Со́лнце, Христо́с./ И́мже, земни́и вси, просвети́хомся и Небеса́ насле́довахом.
Седа́лен, глас 4:
Жизнь твою́ в пусты́ни, преподо́бне, воздержа́нию и моли́тве пре́дал еси́,/ стра́сти же теле́сныя, я́ко пле́нника, связа́в, ду́хови покори́л еси́;/ сего́ ра́ди, о́тче Ло́нгине, Христо́с чудесы́ пресла́вно тя венча́ет,/ Еди́н прославля́яй святы́я Своя́.
Сла́ва, и ны́не, Богоро́дичен:
Умертви́ся вся кре́пость моя́ от мно́жества безме́рных мои́х зол,/ и, мно́гими скорбьми́ содержи́м, уже́ во отча́яние впадо́х,/ но помози́ ми, Влады́чице, Ло́нгина блаже́ннаго предста́тельством,/ я́ко ро́ждшая пла́чущим ра́дость и утеше́ние.
Песнь 4
Ирмо́с: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.
Любо́вию ко Го́споду разже́гся,/ оста́вил еси́ дом и вся стяжа́ния твоя́/ и в пусты́ню всели́лся еси́,/ спу́тника себе́ име́я победоно́сное ору́жие, Крест Христо́в,/ непобеди́мую побе́ду.
Всели́лся еси́ в пусты́ню,/ в не́йже приве́л еси́ мно́гих ду́ши ко спасе́нию,/ те́мже с ли́ки святы́х пое́м па́мять твою́, преподо́бне.
Ева́нгельский глас услы́шав,/ небре́гл еси́ о земны́х,/ и в непроходи́мем ме́сте оби́тель созда́л еси́,/ и, в ней мно́жество и́нок собра́в, Бо́гови воспева́л еси́:/ Ты еси́, Человеколю́бче, кре́пость моя́ и пе́ние.
Богоро́дичен: Ублажа́ют Тя, Пречи́стая Богоро́дице,/ всяк во́зраст и вся́ка душа́ ве́рных:/ Бо́жие бо Сло́во па́че ума́ и сло́ва родила́ еси́, Пренепоро́чная.
Песнь 5
Ирмо́с: Из но́щи у́тренююще,/ просвети́ нас, Животво́рче Кре́сте Христо́в,/ со стра́хом покланя́ющияся тебе́,/ и день спаси́тельный при́сно возсия́й нам.
От но́щи греха́ ко све́ту покая́ния возве́л еси́ ученики́ твоя́/ и просвеще́ние святе́й оби́тели твое́й дарова́л еси́ святы́й Крест,/ его́же из да́льных стран с вели́ким трудо́м прине́сл еси́, преподо́бне.
Име́л еси́ наста́вника принесе́нный тобо́ю победоно́сный Крест,/ его́же си́лою оби́тель созда́л еси́/ и по преставле́нии твое́м ста́до твое́ в ве́ре и единомы́слии сохраня́еши.
Поне́сл еси́ на ра́ме твое́м, по словеси́ Госпо́дню, крест неви́димый,/ ви́димый же о́браз креста́ прине́сл еси́ во оби́тель твою́,/ и́же и доны́не на гро́бе твое́м зри́тся.
Богоро́дичен: Воспо́йте Бо́гови, вся земля́,/ и по́йте вси́ Ро́ждшемуся неизрече́нно от Де́вы Неискусобра́чныя/ и Сию́ ве́рным показа́вшему тве́рду наде́жду и похвалу́.
Песнь 6
Ирмо́с: Бу́ря мя помышле́ний пости́гши,/ во глубину́ низвлачи́т мя безме́рных грехо́в:/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя.
Бу́рю помышле́ний су́етных отри́нул еси́ от себе́/ и еди́ну мысль ко Влады́це име́л еси́,/ я́ко да си́лою Креста́ управля́емь,/ дости́гнеши Небе́сных оби́телей.
Глубину́ безме́рных согреше́ний чи́стым житие́м преше́л еси́,/ ше́ствуя по Христо́вым стопа́м,/ и от потопле́ния изба́влен был еси́, преподо́бне.
Любве́ ра́ди ко Христу́/ по жите́йскому мо́рю немо́крыми нога́ми ходи́л еси́,/ Упра́вителя име́я Блага́го,/ упра́вивша тя, я́ко проро́ка, и спа́сша.
Богоро́дичен: От душе́вных страсте́й исцели́ мя, Пресвята́я Де́во,/ Исто́чник исцеле́ний ро́ждшая, Ма́ти неизрече́ннаго Све́та, просвети́ мя Рождество́м Твои́м.
Конда́к, глас 8:
По словеси́ Учи́теля Христа́,/ крест на ра́мо твое́ прия́л еси́,/ вся жите́йская отри́нув,/ и о́браз Животворя́щаго Дре́ва в пусты́ню прине́сл еси́,/ иде́же доны́не исцеле́ния неоску́дно источа́ются/ с ве́рою приходя́щим к тебе́.
И́кос:
Те́сным путе́м на земли́ ше́ствовал еси́/ и Небе́сных селе́ний ра́достне дости́гл еси́,/ иде́же предстои́ши Престо́лу Пресвяты́я Тро́ицы,/ дарова́ньми чуде́с обогаща́емь./ Мы же, по́двигом твои́м дивя́щеся, си́це вопие́м ти:/ ра́дуйся, Христа́ Бо́га всем се́рдцем возлюби́вый/ и невозвра́тным жела́нием Тому́ после́довавый;/ ра́дуйся, наде́жды ра́ди бу́дущих благ вся тле́нная и мимотеку́щая презре́вый;/ ра́дуйся, пречу́дный храм во и́мя святи́теля Никола́я, чудотво́рца Мирлики́йскаго,/ и во сла́ву Животворя́щия Тро́ицы воздви́гнувый;/ ра́дуйся, оби́тель согради́вый и лик и́ноческий в ней совокупи́вый;/ ра́дуйся, те́ло твое́ при вхо́де во храм на попра́ние лю́дем погребсти́ запове́давый;/ ра́дуйся, на земли́ те́лом потруди́выйся,/ ны́не же на Небеси́ веселя́йся;/ ра́дуйся, я́ко с ли́ки преподо́бных ны́не водворя́ешися/ и зри́ши Пресвяту́ю Тро́ицу;/ ра́дуйся, я́ко от гро́ба твоего́ источа́ются исцеле́ния/ приходя́щим с ве́рою и моля́щимся тебе́;/ ра́дуйся, су́щим в беда́х и во искуше́ниих гото́вый предста́телю и засту́пниче;/ ра́дуйся, преподо́бне Ло́нгине, о́тче наш.
Песнь 7
Ирмо́с: В нача́ле Безнача́льное Сло́во/ со Отце́м и Ду́хом, Сын Единоро́дный, благослове́н еси́/ и превозноси́мый Бо́же оте́ц на́ших.
В нача́ле, Безнача́льное Сло́во, на земли́ яви́лся еси́ на́шего ра́ди спасе́ния,/ Ду́хом же освяти́л еси́ позна́вшия Тя/ и сотво́ршия по словесе́м Твои́м/ и преподо́бнаго Ло́нгина научи́л еси́ пе́ти:/ благослове́н еси́, Го́споди Бо́же оте́ц на́ших.
Единоро́дный Сын со Отце́м и Святы́м Ду́хом/ просла́ви тя, преподо́бне о́тче наш Ло́нгине, во оби́тели твое́й,/ и вся притека́ющая к тебе́ пе́ти научи́л есть:/ благослове́н еси́, препе́тый и превозноси́мый Бо́же оте́ц на́ших.
Христоподража́тельному житию́ общежи́тия нача́льников,/ преподо́бных Анто́ния и Феодо́сия, поревнова́л еси́/ и оби́тель созда́л еси́,/ в не́йже И́мя Госпо́дне непреста́нно сла́вится, Ло́нгине преподо́бне.
Богоро́дичен: Ору́жие пла́менное ны́не не храни́т врат еде́мских,/ зане́ Крест Сы́на Твоего́, Пренепоро́чная, низложи́ врага́ губи́теля./ Те́мже и мы, спасе́ние улучи́вше, благода́рно взыва́ем:/ благослове́н Плод чре́ва Твоего́, Де́во Чи́стая.
Песнь 8
Ирмо́с: Во огни́ пла́меннем предстоя́т Тебе́/ Херуви́ми, Серафи́ми, Го́споди,/ и вся тварь песнь Тебе́ пое́т кра́сную:/ по́йте, благослови́те, лю́дие, превозноси́те Христа́,/ Еди́наго Соде́теля, во вся ве́ки.
Во огни́ пла́меннем, предстоя́ще, Херуви́ми и Серафи́ми, Го́споди,/ песнь Тебе́ пою́т,/ с ни́миже и преподо́бный Ло́нгин взыва́ет:/ хвали́те, по́йте и превозноси́те Христа́,/ Еди́наго Соде́теля, во вся ве́ки.
Вся тварь пое́т Бо́гу песнь кра́сную,/ с не́юже и оби́тель, тобо́ю созда́нная, Ло́нгине,/ прино́сит сла́ву Христу́, пою́щи:/ благослови́те, лю́дие, Христа, Еди́наго Соде́теля, во вся ве́ки.
Прииди́те, лю́дие, воспои́м преподо́бнаго Ло́нгина пресла́вную па́мять,/ да моли́твами уго́дника Своего́ дода́ст Госпо́дь цельбу́/ с ве́рою приходя́щим ко гро́бу пра́ведника и пою́щим Христа́,/ Еди́наго Соде́теля, во вся ве́ки.
Богоро́дичен: Спаси́ мя, Ма́ти Бо́жия,/ Вино́вника спасе́ния ми́рови ро́ждшая,/ и изба́ви мя от бу́ри нечи́стых страсте́й/ и вся́кия ско́рби и напа́сти,/ да сла́влю Тя, Богоро́дицу.
Песнь 9
Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́/ и напра́вил ны есть на путь ми́ра.
Низложи́ си́льныя Госпо́дь,/ и вознесе́ тя, Ло́нгине, в ра́йская селе́ния,/ и водвори́ тя со святы́ми, угоди́вшими Ему́,/ во Све́те немерца́ющем.
Напра́вил тя есть Бог на путь спасе́ния,/ и́мже ше́ствуя, возше́л еси́ ко Све́ту непристу́пному,/ да принесе́ши моли́твы за гра́ды же и лю́ди,/ досто́йно творя́щия па́мять твою́, Ло́нгине преподо́бне, о́тче наш.
Моли́ся, свя́те Ло́нгине,/ да ми́ром огради́т Госпо́дь оби́тель на́шу/ и невреди́му сохрани́т ю от всех наве́т вра́жиих,/ и да полу́чат ми́лость и прегреше́ний оставле́ние в день Су́дный вси́,/ притека́ющии с ве́рою и моли́твою к тебе́, Ло́нгине, о́тче преподо́бне.
Богоро́дичен: Богоро́дице Де́во,/ Его́же родила́ еси́, Человеколю́бца Бо́га,/ моли́ со преподо́бным Ло́нгином,/ да спасе́т ду́ши на́ша.
Свети́лен:
Процве́л еси́, я́ко фи́никс, о́тче,/ и оби́тель яви́лся еси́ Ду́ха Пресвята́го,/ И́же сла́вна тя вселе́нней показа́;/ непреста́нно моли́ся о нас, почита́ющих ве́рою пречестну́ю па́мять твою́,/ преподо́бне Ло́нгине.
Сла́ва, и ны́не, Богоро́дичен:
Тя пе́сньми немо́лчными ублажа́ем, Де́во,/ зане́ от Тро́ицы Еди́наго родила́ еси́, Богоро́дице,/ и но́сиши на руку́ Твое́ю Боже́ственное Сло́во, Ма́ти Пречи́стая.
На хвали́тех стихи́ры на 4, глас 8:
Преподо́бне о́тче Ло́нгине,/ ты, и́го Христо́во на ра́мо взем,/ вся прило́ги вра́жия до́блественне отрази́л еси́/ и Ца́рствия Небе́снаго дости́гл еси́./ Те́мже тя ве́рою вси́ почита́юще,/ о́тче преблаже́нне, мона́шествующих похвало́,/ усе́рдно мо́лимся тебе́:/ Христа́ непреста́нно моли́/ спасти́ ду́ши на́ша.
Ве́рою соше́дшеся вси́,/ я́ко подви́жника Христо́ва почита́ем тя, Ло́нгине:/ ра́дуяся бо, ше́ствовал еси́ в пусты́ни непрохо́дней/ и та́мо оби́тель и́ночествующих воздви́гл еси́./ Те́мже тебе́ ве́рою взыва́ем, блаже́нне:/ по́стников похвало́, моли́ся о нас ко Го́споду,/ поми́ловатися душа́м на́шим.
Богому́дре о́тче Ло́нгине,/ Ца́рствия Бо́жия иски́й,/ при реце́ в пусты́ни всели́лся еси́,/ ника́коже боя́ся неви́димых и ви́димых враго́в,/ и́хже моли́твами твои́ми до конца́ низложи́л еси́,/ и му́дрый наста́вник притека́ющим к тебе́ был еси́./ Те́мже тя ве́рою вси́ чти́м и ублажа́ем.
Сла́ва, глас 6: Во страну́ да́льную: (зри на ма́лой вече́рни, на Го́споди, воззва́х.)
И ны́не, Богоро́дичен: Никто́же, притека́яй к Тебе́:
Славосло́вие вели́кое и отпу́ст.
НА ЛИТУРГИ́И:
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 231. Аллилу́ия, глас 6. Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О вели́кий уго́дниче, пресла́вный чудотво́рче и оби́тели на́шея Богодохнове́нный наста́вниче, Ло́нгине преблаже́нне, душе́ю на Небеси́ Пре́столу всех Царя́ предстоя́й, те́лом же во святе́й оби́тели сей почива́яй и разли́чная чудеса́ повсю́ду моли́твами твои́ми соверша́яй! Призри́ ми́лостивно на лю́ди предстоя́щия и твоего́ ко Го́споду Бо́гу хода́тайства во обдержа́щих ну́ждах прося́щия, вси бо мы по мно́жеству грехо́в на́ших не сме́ем ниже́ возвести́ оче́с на́ших на Не́бо. Ты же, я́ко стяжа́вый дерзнове́ние, принеси́ за всех, к тебе́ притека́ющих, те́плыя моли́твы ко Го́споду, е́же изба́витися нам от гла́да, пото́па, тру́са, огня́, меча́ и бра́ни, от люде́й и от диа́вола быва́ющия, и от вся́кия душе́вныя и теле́сныя боле́зни, да сих избежа́вше и Го́споду, Ему́же предстои́ши, рабо́тающе, вни́дем в неконча́емый поко́й и просла́вим та́мо с тобо́ю всех благи́х Пода́теля Бо́га, всегда́, ны́не, и при́сно, и во ве́ки веко́в. Ами́нь.
Тропа́рь, глас 1:
От мяте́жа мирска́го удали́вся,/ к немерца́ющему Све́ту притекл еси́, преподо́бне о́тче Ло́нгине,/ и ны́не чи́сте зриши Святу́ю Тро́ицу,/ Ю́же моли́ за ны недостойныя,/ да спасет души на́ша.
Конда́к, глас 8:
По словеси́ Учителя Христа́, крест на рамо твое́ приял еси́,/ вся жите́йская отри́нув,/ и образ Животворящаго Древа в пусты́ню принесл еси́,/ идеже доны́не изцеле́ния неоскудно источа́ются/ с верою приходящим к тебе́.
