Служба преподобнаго Корнилия Комельскаго
НА МА́ЛОЙ ВЕЧЕ́РНИ
Стихи́ры, глас 8.
Подо́бен: О, пресла́внаго чудесе́:
Преподо́бне о́тче Корни́лие,/ ты, и́го Христо́во на ра́мо взем,/ до́блественне наше́ствие ва́рвар попра́л еси́/ и пусты́ню град показа́л еси́./ Сего́ ра́ди тя вси,/ ве́рою почита́юще, про́сим:/ о преблаже́нне, мона́шествующих похвало́,/ Христа́ непреста́нно моли́/ спасти́ся душа́м на́шим.
Ве́рою соше́дшеся вси,/ я́ко по́стника Христо́ва тя почита́ем, Корни́лие:/ ра́дуяся бо, ше́ствовав в пусты́ни непроходи́мей, му́дре,/ наста́вник еси́ был че́стен./ Те́мже тебе́ мы ве́рою взыва́ем:/ о всеблаже́нне,/ по́стников похвало́,/ о нас моли́ся ко Го́споду/ поми́ловатися душа́м на́шим.
Преподо́бне о́тче Корни́лие,/ бу́дущия ра́ди жи́зни/ в верте́п разбо́йнич всели́лся еси́,/ ника́коже боя́ся неви́димых враг,/ а́ще и мно́ги ско́рби творя́ху, приходя́ще к тебе́,/ ты же моли́твами твои́ми/ сих без ве́сти твори́л еси́,/ о терпели́вый душе́ю/ пусты́нный жи́телю!/ Те́мже тя ве́рою вси почита́ем и ублажа́ем.
Сла́ва, глас 8:
Спасе́ния ища́ отвсю́ду, блаже́нне Корни́лие,/ во́льное стра́нство Го́спода ра́ди прия́л еси́,/ труды́ мно́гия, и жа́жду, и глад,/ сту́день же и зной Христа́ ра́ди претерпе́л еси́./ Те́мже и слы́шиши:/ благи́й ра́бе ве́рный,/ вни́ди в ра́дость Го́спода твоего́!/ Сего́ же гла́са и нам услы́шати мо́лимся,/ да всегда́ па́мять твою́ любо́вию ублажа́ем.
И ны́не, Богоро́дичен.
На стихо́вне стихи́ры, глас 2.
Подо́бен: До́ме Евфра́фов:
Ле́сти лука́вых бесо́в/ изобличи́в кре́стною си́лою,/ уясни́л еси́/ сла́ву Христо́ву,/ о́тче Корни́лие.
Стих: Честна́ пред Го́сподем/ смерть преподо́бных Его́.
Взя́тся, я́коже Илия́,/ на колесни́це о́гненней,/ смеси́лся еси́, блаже́нне,/ нехода́тайственне Тро́ице,/ Корни́лие прекра́сне.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Нося́ на руку́ твое́ю, о́тче,/ Крест Госпо́день,/ бесо́вская мечта́ния/ до конца́, Корни́лие,/ потреби́л еси́.
Сла́ва, и ны́не, Богоро́дичен:
Вы́шнии Тя ли́цы,/ Богоро́дице Де́во,/ пою́т с ни́жними,/ сла́вяще непреста́нно/ рождество́ Твое́ пречи́стое.
Тропа́рь пи́сан на вели́цей вече́рчи
НА ВЕЛИ́ЦЕЙ ВЕЧЕ́РНИ
Блаже́н муж: На Го́споди, воззва́х: поста́вим стихо́в 8, пра́здника 4 и преподо́бнаго на 4.
Стихи́ры преподо́бнаго Корни́лия, глас 8.
Подо́бен: О, пресла́внаго чудесе́:
О́тче Корни́лие преподо́бне,/ впери́в ум к Бо́гу ве́рою,/ мирска́го смеше́ния/ возгнуша́вся неуста́внаго/ и крест твой восприе́м,/ Всеви́дцу после́довал еси́,/ те́ло, непокори́вое по́двиги воздержа́ния,/ по́мысла си́лою порабо́тив Боже́ственному Ду́ху.
О́тче преподо́бне Корни́лие,/ сле́зными исто́чники ду́шу твою́ очища́я/ и всено́щными стоя́нии Бо́га моля́,/ впери́лся еси́ к любви́ Сего́ блаже́нныя красоты́,/ ея́же досто́йно ны́не наслажда́ешися,/ непреста́нно и ра́достно/ с пострада́вшими с тобо́ю,/ Богому́дре и преподо́бне.
Преподо́бне о́тче прему́дре Корни́лие,/ боля́щим ты яви́лся еси́ исцеле́ние,/ и хромы́м хожде́ние ми́лостивно сотворя́еши,/ и всем, притека́ющим с ве́рою/ к цельбоно́сному твоему́ гро́бу,/ прося́щим по́мощи и заступле́ния,/ моли́твами твои́ми исцеле́ние неду́гов/ неоску́дно подае́ши.
Сла́ва, глас 6:
Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Корни́лие,/ чи́сте зри́ши Святу́ю Тро́ицу,/ моля́ся несре́дственне/ о и́же ве́рою и любо́вию чту́щих тя.
И ны́не, пра́здника.
Вход. Проки́мен дне. Чте́ния три преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 2, самогла́сны:
Преподо́бне о́тче,/ из мла́да в доброде́тели приле́жно обучи́вся,/ орга́н был еси́ Свята́го Ду́ха/ и, от Него́ прие́м чуде́с де́йство,/ научи́л еси́ челове́ки преоби́дети сла́дкая;/ ны́не же Боже́ственным све́том чисте́йше осиява́емь,/ просвети́ и на́ша мы́сли, Корни́лие, о́тче наш.
На земли́ А́нгела и на Небесе́х челове́ка Бо́жия,/ ми́рови благоукраше́ние,/ наслажде́ние благи́х доброде́телей,/ по́стников похвалу́, Корни́лия почти́м:/ насажде́н бо в дому́ Бо́жии, я́ко крин,/ и процвете́ пра́ведно, я́ко кедр, в пусты́ни,/ умно́жи ста́до Христо́во слове́сных ове́ц/ преподо́бием и пра́вдою.
Сла́ва, глас 2:
Пусты́ня, я́же пре́жде разбо́йническая жили́ща имя́ше,/ ны́не, Корни́лие, учени́к твои́х мно́жеством испо́лнена, украша́ется:/ храм бо прече́стен Бо́жия Ма́тере воздви́гл еси́,/ разли́чными добро́тами укра́шен./ Те́мже в нем днесь соше́дшеся/ и честны́й гроб твой обстоя́ще любе́зно,/ покланя́ющеся и глаго́люще, мо́лимся:/ Це́рквам единомышле́ние да́руй,/ правосла́вному наро́ду на́шему на враги́ спосо́бствуй моли́твами твои́ми,/ и нам испроси́ мир,/ и душа́м на́шим ве́лию ми́лость.
И ны́не, пра́здника.
На стихо́вне стихи́ры, глас 4.
Подо́бен: Зва́нный свы́ше:
Егда́ Боже́ственное тя жела́ние распали́, преподо́бне,/ тогда́ все плотско́е мудрова́ние ду́ху повину́л еси́,/ поще́ния страда́ньми утверди́вся/ и, я́ко зла́то, в горни́ле искуше́но сие́, яви́вся,/ прия́телище был еси́ Пресвята́го Ду́ха,/ собра́в мона́шествующих мно́жества,/ уче́ньми твои́ми тех, я́ко не́коею восхо́дною ле́ствицею,/ на высоту́ доброде́телей возводи́л еси́,/ те́мже Христа́ моли́/ спасти́ и просвети́ти ду́ши на́ша.
Стих: Честна́ пред Го́сподем/ смерть преподо́бных Его́.
Возсия́ днесь пресве́тлая и всепра́зднственная па́мять твоя́,/ пресла́вне Корни́лие,/ созыва́ющи многочи́сленное по́стник сосло́вие/ и преподо́бных ликостоя́ние,/ А́нгелы же с челове́ки я́ко вои́стинну к похвале́нию/ в Тро́ице пева́емаго Христа́ Бо́га на́шего,/ Его́же моли́ спасти́ и просвети́ти ду́ши на́ша.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Богоно́се и преблаже́нне о́тче Корни́лие,/ ты, проро́чески слеза́ми зе́млю омака́в,/ не дал еси́ сна твои́ма очи́ма,/ ни ве́ждома дрема́ния,/ серде́чное жела́ние ко Христу́ явля́я,/ Его́же измла́да возлюби́л еси́,/ вся́кия доброде́тели вид испра́вль./ Те́мже тя ублажа́ем,/ Христа́ велича́юще, тебе́ просла́вльшаго,/ Его́же моли́ спасти́ и просвети́ти ду́ши на́ша.
Сла́ва, глас 8:
Мона́хов мно́жества/ наста́вника тя почита́ем, о́тче наш Корни́лие:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.
И ны́не, пра́здника.
Тропа́рь, глас 4:
От ю́ности горя́щим жела́нием Боже́ственныя любве́ разжига́емь,/ жите́йския молвы́ оста́вил еси́, преподо́бне,/ ревни́тель Анто́нию Вели́кому быв,/ безмо́лвием и жесто́ким пребыва́нием после́дуя Христу́,/ бде́нием, и моли́твами, и посто́м о́браз был еси́ твои́м ученико́м./ Те́мже моли́ся Го́сподеви, Корни́лие блаже́нне,/ спасти́ся душа́м на́шим.
Ин тропа́рь, глас 8:
По́стническими труды́ нетру́дную жизнь стяжа́, преподо́бне,/ слеза́ми же мы́сленнаго фарао́на потопи́л еси́/ и вме́сто ско́рби ра́дость обре́л еси́,/ предстоя́ Христо́ви в ли́це святы́х,/ помина́й моля́щихся чад твои́х, Корни́лие, о́тче наш.
НА У́ТРЕНИ
По 1-й и по 2-й кафи́змах седа́льны пра́здника.
По полиеле́и седа́лен преподо́бнаго, глас 8.
Подо́бен: Прему́дрости:
В пусты́ню, блаже́нне, всели́вся,/ и в ней пречи́стый храм Бо́жии Ма́тери воздви́г,/ мно́жество мона́шествующих та́мо собра́л еси́,/ Бо́гу с тобо́ю рабо́тающих,/ и́хже сохраня́й от вся́каго вре́да лука́ваго,/ да всегда́ благода́рственно вопие́м ти:/ преблаже́нне Корни́лие,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род,/ досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я́, зача́ло 43.
По 50-м псалме́ стихи́ра, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.
Кано́н пра́здника на 6, и свята́го на 8, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Сло́во ми даждь, Сло́ве Бо́жий, Светода́вче Христе́,/ воспе́ти све́тлое и светоно́сное житие́ Твоего́ уго́дника, преподо́бнаго Корни́лия./ Моли́твами его́ разори́ мрак се́рдца моего́/ и Твои́м све́том души́ озари́тися, молю́ся.
Влады́чнему любостра́нству, преподо́бне, подо́бяся,/ сам стра́нствовати изво́лил еси́./ Те́мже и Всеви́дящее О́ко, ви́дев твое́ благо́е изволе́ние,/ да́ром чуде́с обогати́ тя, Корни́лие, я́ко пресла́вно.
Трисо́лнечным сия́нием, Богому́дре, озаря́ем,/ зло́е, блаже́нне, бесо́в шата́ние и вра́жия преще́ния/ ра́нами боле́зней, я́коже паучи́ну, разори́л еси́,/ Бо́жиим Ду́хом разжига́емь, Корни́лие блаже́нне.
Богоро́дичен: Я́ко Бо́жия Ма́ти, дерзнове́ние иму́щи/ к ро́ждшемуся из Тебе́ Единоро́дному Сло́ву,/ и Отцу́ Собезнача́льному, и Соесте́ственному Ду́ху Свято́му,/ моля́щися не преста́й от бед спасти́, Всенепоро́чная,/ Тя, Богоро́дицу, сла́вящия.
Катава́сия пра́здника.
Песнь 3
Ирмо́с: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.
Кто изрещи́ мо́жет зе́млен твоя́ боле́зни, о́тче, и по́двиги,/ и́хже ра́ди досто́йну мзду стяжа́л еси́ от Бо́га?/ и был еси́ прия́телище Боже́ственнаго Ду́ха,/ преподо́бен и и́стинен, пра́веден и непоро́чен.
Укре́пль ум ра́зумом Боже́ственным, о́тче Корни́лие,/ и прему́дростию духо́вною и сло́вом укра́шен,/ тем привле́кл еси́ мно́гих ду́ши во спасе́ние,/ яви́в мона́хом изве́стно жития́ прописа́ние.
Зло́бы нача́льник враг, хотя́ тебе́ па́кость сотвори́ти, преподо́бне Корни́лие,/ лука́вых челове́к на тя вооружа́ет:/ тебе́ прирази́вся, постыде́ся, Христу́ бо тя соблюда́ющу.
Богоро́дичен: Херуви́м и Серафи́м превы́шши яви́лася еси́, Богоро́дице:/ Ты бо прия́ла еси́ невмести́маго Бо́га во Твое́м чре́ве, Нескве́рная./ Те́мже Тя, вси ве́рнии, пе́сньми, Чи́стая, ублажа́ем.
Седа́лен, глас 8
Подо́бен: Прему́дрости:
Христо́вою любо́вию связа́в твою́ ду́шу/ и поще́ния страда́ньми утверди́вся,/ зла́та светле́йши, благоче́стием облиста́л еси́/ и, чи́стое прия́телище быв Ду́ху, лука́вых духо́в тьму разгна́л еси́;/ тем собра́в и́ночествующих мно́жества,/ па́стырь им был еси́ и свети́льник све́тел, Корни́лие преподо́бне./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, пра́здника или́ Богоро́дичен:
Я́ко Всенепоро́чная Неве́сто Творцу́,/ я́ко Неискусому́жная Ма́ти Изба́вителю,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище, в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Све́тлое твое́ житие́ я́ко пра́вило изве́стно вся́кия, о́тче, доброде́тели показа́ся/ в моли́твах и поще́ниих, бде́ниих же и мольба́х,/ я́же ко Христу́ Человеколю́бцу.
Сна твои́ма очи́ма не дал еси́, блаже́нне Корни́лие,/ ни ве́ждома дрема́ния, до́ндеже сподо́бился еси́ пра́ведных селе́ния,/ е́же угото́ва Бог, преподо́бне, лю́бящим Его́.
Стеня́, и пла́ча, и се́туя, умиле́нием и слеза́ми кропя́ зе́млю,/ при́сно, о́тче Богому́дре, моли́тву соверша́л еси́,/ до́ндеже обре́л еси́ Боже́ственное утеше́ние во гра́де Бо́жии/ и со все́ми святы́ми, преподо́бне, всели́лся еси́.
Богоро́дичен: Бога, из Тебе́ воплоще́ннаго непрело́жно, единосу́щна Отцу́,/ и Тебе́, ро́ждшей, ра́вна по челове́честву, моли́/ проще́ние согреше́ний и душа́м спасе́ние/ пою́щим Тя ве́рою дарова́ти.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Погаси́в стра́сти росо́ю подвиго́в твои́х, о́тче блаже́нне,/ бога́тно возже́гл еси́ огне́м любве́ и ве́ры воздержа́ния свети́льник,/ и просвеще́ние безстра́стия, и дне сын яви́лся еси́.
Исцеле́ний тебе́ благода́ть Христо́с в неду́зех разли́чных дарова́/ и на ду́хи нечи́стыя власть, му́дре:/ естество́ бо, о́тче, победи́в, па́че естества́/ дарова́ний сподо́бился еси́ Ду́ха.
Ра́йския добро́ты жела́я, преподо́бне Корни́лие,/ в слеза́х, и воздыха́ниих, и бде́ниих и моли́твах твою́ жизнь препроводи́л еси́/ и сего́ ра́ди по сме́рти от Христа́ чудесы́ просла́вился еси́.
Богоро́дичен: Тя сте́ну иму́щии и заступле́нием Твои́м соблюда́емии,/ Твое́ю Боже́ственною сла́вою хва́лящеся, Тя ублажа́ем:/ Ты бо, Пречи́стая, душа́м на́шим источа́еши весе́лие и ра́дование.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Главы́ враго́в мы́сленных сокруши́ти мо́лимся/ и ви́димыя под но́зе на́ша покори́ти, моли́ся, преподо́бне,/ чту́щим любо́вию святу́ю па́мять твою́.
Жития́ твоего́ исправле́ния и веща́ния, о́тче,/ всю обтеко́ша отню́д вселе́нную,/ и́бо в пресла́вную дости́гл еси́ высоту́:/ Бог бо тя просла́ви и сла́вна всем сотвори́.
Ни́щих строи́тель, вдов предста́тель, промы́сленник си́рых,/ печа́льных утеше́ние, па́дших исправле́ние,/ оби́димых засту́пник скор был еси́,/ твоему́, о́тче, подо́бяся учи́телю.
Богоро́дичен: Вознесла́ еси́ вои́стинну па́дшее челове́ческое существо́,/ о́браз Боже́ственный и Отцу́ ра́венство иму́ща,/ ви́димаго Сы́на неизме́нна, Богома́ти, без се́мене во чре́ве поноси́вши.
Конда́к, глас 8:
Го́сподеви, от Святы́я Де́вы возсия́вшу ми́рови,/ и Тому́ измла́да, я́ко А́нгел, послужи́л еси́, блаже́нне,/ и си́лою Его́ пусты́ню, я́ко град, сотвори́л еси́,/ мно́жество же учени́к в ней собра́л еси́,/ и́хже Богодохнове́нными уче́ньми просвети́л еси́./ Тем вопие́м ти:/ ра́дуйся, о́тче наш Корни́лие, и́ноком Боже́ственное удобре́ние.
И́кос:
Зва́нию Го́спода твоего́ после́довал еси́ приле́жно, блаже́нне,/ вся, я́же в ми́ре кра́сная, Его́ ра́ди преоби́дев./ Те́мже вопие́м ти:/ ра́дуйся, я́ко, измла́да Христа́ возлюби́в,/ си́лою Его́ претерпе́л еси́ пусты́нное озлобле́ние усе́рдно;/ ра́дуйся, я́ко Вы́шняго по́мощию бесо́вскую пре́лесть попра́л еси́./ Ра́дуйся, я́ко прече́стен храм Бо́жия Ма́тере воздви́гл еси́;/ ра́дуйся, я́ко в нем тобо́ю Бог прославля́ется./ Ра́дуйся, я́ко собра́л еси́ учени́к мно́жество;/ ра́дуйся, я́ко с те́ми приле́жно Го́сподеви рабо́тал еси́./ Ра́дуйся, я́ко удиви́л еси́ А́нгелы житие́м твои́м;/ ра́дуйся, я́ко тобо́ю челове́цы по́льзовашася./ Ра́дуйся, правосла́вному наро́ду похвала́;/ ра́дуйся, христолюби́вому во́инству утвержде́ние./ Ра́дуйся, я́ко моли́твами твои́ми сопроти́внии побежда́ются;/ ра́дуйся, о́тче наш Корни́лие, и́ноком Боже́ственное удобре́ние.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Истощи́в тул стрел, враг вселука́вый устраши́ти тя не возмо́же,/ си́лою бо Вы́шняго укрепля́емь и Того́ по́мощию вооружа́емь, преподо́бне, пел еси́:/ благослове́н еси́, Бо́же оте́ц на́ших.
Бу́дущия жи́зни взыска́в, сла́ву маловре́менную небре́гл еси́/ и, в пусты́ню всели́вся, блаже́нне, со зверьми́ жи́ти изво́лил еси́, поя́:/ благослове́н еси́, Бо́же оте́ц на́ших.
Враг, прирази́вся тебе́, преподо́бне, разбо́йники на тя посыла́ет,/ постыде́в же ся, душе́внаго твоего́ хра́ма не поколеба́,/ утвержде́н бо бе на ка́мени.
Богоро́дичен: Го́ру Тя проро́к Дании́л Боже́ственным Ду́хом нарече́, Де́во,/ из нея́же ка́мень без рук отсече́ся/ и сокруше́ние соде́я истука́нней пре́лести.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Царю́ всех и Бо́гу со святы́ми предстоя́,/ с ни́миже, Корни́лие, моли́ся вои́нству на́шему побе́ды на ва́рвары дарова́ти/ и грехо́в оставле́ние твою́ па́мять почита́ющим и пою́щим вы́ну:/ свяще́нницы, воспо́йте, лю́дие, превозноси́те во вся ве́ки.
Госпо́дних за́поведей изве́стен храни́тель был еси́,/ раздробля́я а́лчущим хлеб тво́й, преподо́бне,/ та́ющую гла́дом доброде́телей ду́шу мою́ насы́ти, блаже́нне, пою́ща любо́вию:/ свяще́нницы, воспо́йте, лю́дие, превозноси́те во вся ве́ки.
Ва́рвар иногда́ наше́ствие, и ко оби́тели твое́й устреми́вшихся, Боже́ственною си́лою устраши́л еси́./ И ны́не на нас мы́сленных враг устремле́ние моли́твами твои́ми разори́, пою́щих:/ свяще́нницы, воспо́йте, лю́дие, превозноси́те во вся ве́ки.
Богоро́дичен: К Богоро́дице все твое́ упова́ние име́л еси́, Корни́лие,/ и Тоя́ призыва́нием вра́жия се́ти вся расто́ргл еси́ и лю́тых воста́ние,/ с Не́юже, преподо́бне, моли́ся о и́же любо́вию честну́ю твою́ па́мять чту́щих и вопию́щих:/ свяще́нницы, воспо́йте, лю́дие, превозноси́те во вся ве́ки.
Песнь 9
Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Бе́гая сла́вы от челове́к, в пусты́ню всели́лся еси́,/ вся уме́ты вмени́в, да Христа́ еди́наго приобря́щеши,/ Его́же ра́ди пусты́нная озлобле́ния претерпе́л еси́,/ да тле́нными нетле́нная измени́ши, Корни́лие.
От ме́ста отгони́ти тя враг покуша́вся,/ мона́хи на убие́ние твое́ поощря́ше, Корни́лие преподо́бне,/ я́же до́бре уче́нием твои́м наказа́л еси́/ и, я́коже твоя́ ча́да, при́сно тех возлюби́л еси́.
Не забу́ди, посеща́я чад твои́х, Корни́лие преподо́бне,/ к ра́це моще́й твои́х притека́ющих и любо́вию па́мять твою́ торжеству́ющих,/ от вся́ких искуше́ний вра́жиих изба́витися,/ всех Влады́це моли́ся, блаже́нне.
Богоро́дичен: Зачала́ еси́, Де́во, без се́мене, вся́ческая созда́вшаго Сло́во Бо́жие,/ кроме́ хоте́ния пло́ти,/ и без истле́ния родила́ еси́, без боле́зней ма́терских./ Тем Тя, Богоро́дице, язы́ком и се́рдцем испове́дающе, велича́ем.
Свети́лен:
Страстна́го омраче́ния ду́шу очи́стив, преподо́бне,/ честны́м поще́нием и моли́твами непреста́нными,/ зерца́ло был еси́ Боже́ственных сия́ний,/ свети́льниче мона́хов, Корни́лие Богому́дре.
Сла́ва, и ны́не, пра́здника.
На хвали́тех стихи́ры на 4, глас 8.
Подо́бен: О, пресла́внаго чудесе́:
О, пресла́внаго чудесе́!/ В после́дних роде́х,/ просия́ в доброде́телех/ посты́ и моли́твами,/ и труды́ теле́сными,/ и ины́ми мно́гими страда́нии,/ по всему́ вре́мени твоего́ жития́,/ ум вперя́я к Бо́гу,/ подвиза́лся еси́ неосла́бно,/ о́тче Корни́лие.
О, пресла́внаго чудесе́!/ Нигде́же яви́лся еси́,/ по́честь уловля́я/ и ласка́ньми услажда́яся,/ па́че же смире́ние Христо́во нося́/ в согбе́нне мудрова́нии,/ е́же вообража́л еси́ твои́м ученико́м,/ и́хже собра́л еси́ мно́гими по́двиги и труды́,/ о́тче Корни́лие.
О, пресла́внаго чудесе́!/ Пусты́ню град сотвори́,/ ю́же ви́девше, ра́тнии/ убоя́шася наступи́ти на ню:/ мня́ху бо и ви́дяху/ мно́жество вооруже́нных во́инов;/ се же́ де́ло моли́тв ра́ди свята́го бы́сть,/ и́же твори́т всегда́,/ помога́я нам, свои́м ученико́м.
Сла́ва, глас 7:
Мно́жив доброде́тель, просвети́л еси́ мир;/ ужаси́в де́моны, возвесели́л еси́ А́нгелы;/ собра́в ста́до мона́хов,/ научи́л еси́ их ходи́ти в за́поведех Госпо́дних/ и, прие́м благода́ть исцеле́ния,/ с ве́рою приходя́щим да́руеши безме́здно./ Преподо́бне о́тче наш, моли́ся о душа́х на́ших.
И ны́не, пра́здника.
На Литурги́и слу́жба вся преподо́бническая.
Моли́тва
О свяще́нная главо́, земны́й А́нгеле, Небе́сный челове́че, вели́кий чудотво́рче, преподо́бне о́тче Корни́лие! К тебе́ с ве́рою и любо́вию усе́рдно прибега́юще, умиле́нно про́сим тя, Небе́снаго предста́теля на́шего: яви́ нам, смире́нным и гре́шным, любо́вь твою́ оте́ческую и многомо́щное твое́ заступле́ние, се бо грех ра́ди на́ших не дерза́ем, с свобо́дою чад Бо́жиих, проси́ти Го́спода и Влады́ку на́шего о ну́жных нам на потре́бу, но тебе́, моли́твенника к Нему́ благоприя́тнаго, предлага́ем, ве́рующе несомне́нно, я́ко вся блага́я мо́жеши нам испроси́ти у бла́гости Его́, а́ще то́кмо восхо́щеши. Испроси́ у́бо нам, уго́дниче Бо́жий, у Всеще́драго и Человеколю́бца Бо́га, ве́ру пра́ву, благоче́стие непоколеби́мое, покая́ние соверше́нное, жития́ исправле́ние реши́тельное, да про́чее не прогневля́ем Го́спода наруше́нием святы́х Его́ за́поведей и сподо́бимся проще́ние грехо́в на́ших от Него́ получи́ти. Умоли́, чудотво́рче святы́й, Царя́ ца́рствующих и Го́спода госпо́дствующих дарова́ти мир и благострое́ние стране́ на́шей, я́ко да позна́ют вси противля́ющиися ей, я́ко с на́ми Бог и святи́и уго́дницы Его́. Сохрани́, свя́тче Бо́жий, моли́твами твои́ми Це́рковь Христо́ву от ересе́й и раско́лов, суеве́рия и неве́рия челове́ческаго, да цвете́т в ней свято́е Правосла́вие во всей си́ле и прино́сит плоды́ спаси́тельныя душа́м. Соблюди́ от вся́каго зла и оби́тель, тобо́ю со́зданную, и вся живу́щия и подвиза́ющияся в ней по твои́м уста́вом, да це́лы и невреди́мы пребу́дут от искуше́ний врага́ спасе́ния челове́ческаго. При́зри ми́лостивно и на предстоя́щия тебе́ и моля́щияся лю́ди, и́же в оби́тель твою́ прихо́дят на поклоне́ние, и вся проше́ния их во бла́го испо́лни: боля́щим исцеле́ние, скорбя́щим утеше́ние, бе́дствующим вспоможе́ние ско́ро пода́ждь. Всем же нам здра́вие душе́вное и теле́сное, земли́ плодоно́сие, ти́хое и богоуго́дное житие́, благу́ю христиа́нскую кончи́ну и до́брый отве́т на Стра́шнем Суде́ Христо́вом у Всеми́лостиваго Бо́га исхода́тайствуй, я́ко вои́стинну име́яй ве́лие к Нему́ дерзнове́ние. Ей, о́тче! ве́мы, я́ко мно́го мо́жет моли́тва твоя́ пред лице́м Вседержи́теля Го́спода, сего́ ра́ди кре́пко на тя упова́ем и на твоя́ святы́я моли́твы зело́ наде́емся, я́ко ты приведе́ши нас предста́тельством твои́м в небу́рное приста́нище спасе́ния и насле́дники пока́жеши нас всесве́тлаго Ца́рствия Христо́ва. Не посрами́ же, свя́тче о́тче наш, упова́ния на́шего и сподо́би нас вку́пе с тобо́ю блаже́нства ра́йскаго наслажда́тися, да сла́вим, хва́лим и велича́ем вели́кую ми́лость к нам Человеколю́бца Бо́га, Отца́, и Сы́на, и Свята́го Ду́ха, и твое́ благо́е оте́ческое заступле́ние, во ве́ки веко́в. Ами́нь.
