Служба преподобнаго Исаакия, затворника Печерскаго, в Ближних пещерах почивающаго

ВЕЧЕ́Р

На Го́споди, воззва́х: стихи́ры, глас 8.

Подо́бен: О, пресла́внаго чудесе́!

О́тче преподо́бне Исаа́кие,/ а́ще пе́рвее те́мный враг, я́влься во о́бразе све́та,/ неве́дением омрачи́ тя и поруга́ся тебе́ бесо́вскими ухищре́ньми,/ но ты последи́ испра́вился и стра́шен тому́ показа́лся еси́,/ прия́л бо еси́ на всю си́лу вра́жию/ от Христа́ Бо́га одоле́ние,/ Его́же непреста́й моля́щи/ изба́витися и нам от всех вра́жиих наве́тов и лю́тых обстоя́ний.

О́тче Богому́дре Исаа́кие,/ а́ще и прельсти́ тя враг, явле́йся све́том,/ но последи́ твои́м исправле́нием прельще́н паде́ся,/ бу́йством бо свои́м улови́в,/ того́ низложи́л еси́ в коне́ц кова́рства и, попра́в нога́ма,/ возопи́л еси́: стра́ха ва́шего не и́мам убоя́тися,/ я́ко со мно́ю Бог,/ кре́пость же Его́ есть мне проти́ву всех страхова́ний ва́ших утвержде́ние.

О́тче преблаже́нне Исаа́кие,/ ты, неве́дый, а́ще и поклони́лся еси́ бе́су, а́ки Лицу́ Христо́ву,/ но по сем паде́нии па́ки испра́вился,/ бесо́вския полки́ оплева́л еси́/ и испо́лнил еси́ ли́ца их безче́стия,/ и́же постыжде́нни, я́ко дым, исчеза́ют и, я́ко огне́м, прогоня́ются,/ огнь бо твое́й любве́ к Бо́гу прого́нит тех нападе́ния/ и всем помога́ет, и́мя твое́ призыва́ющим.

Сла́ва, глас 2:

О́тче Исаа́кие,/ собо́ю о́браз дал еси́ подвиза́ющимся:/ да не ве́руют привиде́ниям явля́ющимся,/ весть бо сатана́ преобража́тися во А́нгела све́тла,/ но да искуша́ют та зна́мением кре́пкаго ору́жия,/ на не́же взира́ти не мо́гут лука́вствия ду́хи,/ но, я́ко прах ве́тром от земли́, прогоня́ется,/ та́ко сего́ луча́ми опаля́еми исчеза́ют./ Того́ у́бо и мы держа́щеся,/ вра́жия кова́рства не убои́мся,/ па́че же стира́юще их ухищре́ния,/ прии́мем от Христа́ Бо́га мир в косте́х на́ших и ве́лию ми́лость.

И ны́не, Богоро́дичен или́ Крестобогоро́дичен.

НА У́ТРЕНИ

Тропа́рь, глас 2:

Све́тлости святы́х наслади́тися вожделе́в,/ в те́мную всели́лся еси́ пеще́ру, прехвальне,/ и до́бре подвиза́лся еси́, Исаа́кие,/ прельще́н же быв от врага́,/ па́ки кре́пко попра́л еси́ того́ вся кова́рства./ И ны́не, я́ко победи́тель,/ в весе́лии предстоя́ Христу́ Бо́гу,/ проси́ нам ми́ра и ве́лия ми́лости.

Сла́ва и ны́не, Богоро́дичен.

Кано́н преподо́бнаго, глас 4.

Песнь 1

Ирмо́с: Триста́ты кре́пкий,/ Рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Влады́ко Всемогу́щий, Христе́,/ во глубине́ щедро́т Твои́х, а́ки фарао́на, грехи́ моя́ потопи́, молю́ся,/ да бре́нными усты́ в па́мяти Твоего́ уго́дника Тя сла́вящи,/ побе́дное досто́йно принесу́ воспева́ние.

Настоя́ше кре́пкий мироде́ржец, и́щущий всех глубино́ю страсте́й покры́ти,/ но не возмо́же тебе́, о́тче, погрузи́ти,/ ты бо, уве́дав многоплете́нныя его́ се́ти, избе́гл еси́ ми́ра, а́ки пти́ца тенета́,/ и побе́дное Бо́гу прине́сл еси́ воспева́ние.

Хитр был еси́ купе́ц, преподо́бне:/ тле́нным бо нетле́нная стяжа́л и ги́блющим неги́блющий купи́л еси́ би́сер,/ и́мже вене́ц украси́л еси́ своего́ терпе́ния,/ и, ны́не веселя́ся, предстои́ши Христу́,/ побе́дное принося́щи воспева́ние.

Разда́л еси́, блаже́нне, име́ние свое́ ни́щим/ и са́мыя во́ли своея́ не пощаде́л,/ но вручи́л о́ную Вели́кому Анто́нию,/ от него́же прие́м во измене́ние А́нгельский о́браз,/ обогати́лся еси́ сокро́вищем Небе́сным/ и пое́ши Христу́ непреста́нное воспева́ние.

Богоро́дичен: Грехо́вным и́гом обремене́н, к Тебе́ прихожду́, Богоро́дице, моля́ся:/ изми́ стра́стное ми томле́ние,/ да поне́ отны́не покая́нием испра́влюся/ и те́плыя моли́твы принесу́ Ти, Влады́чице, мое́ умиле́нное воспева́ние.

Песнь 3

Ирмо́с: С высоты́ снизше́л еси́ во́лею на зе́млю,/ превы́ше вся́каго нача́ла,/ и смире́нное возне́сл еси́ из а́да преиспо́дняго естество́ челове́ческое./ Несть бо свят, па́че Тебе́, Человеколю́бче.

С высоты́ прие́мь зва́ние, измене́нием А́нгельскаго о́браза распя́лся еси́ ми́ру,/ сраспина́я того́ вся по́хотныя стра́сти,/ наступи́в на ты́я житие́м, преподо́бне, жесто́ким,/ иму́щи помо́щником Бо́га, Еди́наго Человеколю́бца.

С ко́злищами ча́сти да не насле́диши, о́тче, в гряду́щем ве́це,/ в сей жи́зни плоть твою́ умерщвля́я,/ обле́клся еси́ во еди́ну ми́лоть влася́ну и в ко́зию ко́жу,/ в не́йже прохожда́л еси́ и́ночества путь те́сный,/ Бо́га призыва́я в по́мощь, Еди́наго Человеколю́бца.

В горе́ всели́лся еси́, в те́сной себе́ затвори́л еси́ пеще́ре/ и, ле́ствицею доброде́телей, му́дре, к Го́рним простира́яся,/ положи́л еси́ восхожде́ние в се́рдце свое́м вы́ну песносло́вити Бо́га Человеколю́бца.

Те́сный путь смире́ния и нищеты́ проше́л еси́, му́дре,/ злохи́траго врага́, я́ко младе́нца, разби́в о ка́мень любве́ Бо́жия,/ ея́же ища́, посто́м ду́шу очи́стил/ и бде́нием всено́щным те́ло смири́л еси́,/ да не ле́ностно предстои́т Бо́гу Человеколю́бцу.

Богоро́дичен: Ле́ностию побежде́н,/ не могу́ страсте́й, ражда́ющихся во мне, а́ки младе́нцев, о ка́мень за́поведей разби́ти,/ Тебе́ призыва́ю, Богоро́дице, в по́мощь,/ помози́ ми, я́ко человеколюби́вая Бо́га Ма́ти,/ и паду́т под нога́ма мои́ма Твое́ю си́лою побежде́нни.

Седа́лен, глас 8:

Плоть твою́ воздержа́нием умерщвля́я,/ о тле́нной пи́щи нераде́л еси́,/ но еди́ною просфоро́ю чрез день удовля́яся,/ в воздержа́нии пребыва́л еси́/ и на ре́брех не почива́л еси́;/ та́ко на неви́димаго врага́ подвиза́яся, взыва́л еси́:/ Христе́ Бо́же, даждь по́мощь су́щим во бра́ни.

Сла́ва, и ны́не, Богоро́дичен:

Омраче́н сном ле́ности, ду́шу мою́ к Тебе́, Чи́стая, простира́ю,/ бо́дренною Твое́ю моли́твою и неисче́тною благосты́нею воздви́гни мя на пе́ние/ и даждь ми по́мощь, су́щему в бра́ни.

Песнь 4

Ирмо́с: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы./ Ты бо еси́, Человеколю́бче,/ кре́пость моя́ и хвале́ние.

Любве́ ра́ди Бо́жия во мно́гих труде́х и поще́ниих пребы́л еси́, преподо́бне,/ до седма́го ле́та из ке́ллии не исходя́;/ при́сно же исхо́д свой помина́я стра́шный,/ ко укрепля́ющему Тя Христу́ взыва́л еси́:/ кре́пость моя́ Ты еси́, Бо́же, и хвале́ние.

Се коль добро́ и коль красно́ жи́ти с бра́тиею вку́пе:/ брат, от бра́та помога́емь, быва́ет, а́ки град, тве́рд,/ еди́н же, боря́йся со враго́м, па́дает, е́же и на тебе́ сбы́стся, о́тче,/ да не бу́деши наде́яся на ся, но на Бо́га жи́ва,/ я́ко Той Еди́н кре́пость всем и хвале́ние.

Ум твой, свя́те, хотя́ омрачи́ти диа́вол,/ прии́де со тьмо́ю во́ев све́тлых, сам же просвети́ся, а́ки со́лнце,/ но тебе́ покры́ тьмо́ю ле́сти,/ от нея́же изба́влься, взыва́л еси́ к Бо́гу:/ кре́пость моя́ Ты еси́, Бо́же, и хвале́ние.

Богоро́дичен: Ум име́я, омраче́н страстьми́,/ содержи́мь есмь грехи́ мно́гими,/ но к Тебе́ молю́ся, па́че ума́ роди́вшей Свет всего́ ми́ра:/ приими́, Ма́ти Бо́жия, ору́жие си́лы Своея́ и предста́ни ми в по́мощь,/ да узрю́ Свет Богоразу́мия и́стиннаго.

Песнь 5

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш, к Тебе́ прибега́ю, Царю́ ми́ра.

Возсия́вшии во о́бразе све́та тьмы ве́чныя сы́нове/ клич ве́лий сотвори́ша, свои́м тя нарица́юще, о́тче Исаа́кие,/ и обыдо́ша тя, а́ки пси мно́зи, свои́ми наве́ты,/ от ни́хже изба́влься, прибе́гл еси́ к Бо́гу, Царю́ ми́ра.

И́же иногда́ пред златокова́нным те́лом мусики́йскому гла́су устро́и бы́ти на прельще́ние неве́дущих Бо́га,/ се то́йже в сопе́ли и тимпа́ны возшуме́ти повелева́ет на прельще́ние твое́,/ от него́же а́ще и прельще́н быв, изба́вился еси́ по́мощию Бо́га, Царя́ ми́ра.

Претружде́нна тя по́стническими труды́/ пляса́нием утруди́ти повеле́ диа́вол,/ его́же веле́ние исполня́юще,/ лука́вии ду́си на мног час скака́ша с тобо́ю/ и, поруга́вшеся тебе́, ели́ жи́ва оста́виша;/ но ты, последи́ испра́вився, поруга́лся ему́/ и попра́л еси́ его́ до конца́ по́мощию Бо́га, Царя́ ми́ра.

Отвсю́ду тя враго́м уя́звленна,/ безгла́сна, то́кмо ма́ло ды́шуща, изнесо́ша преподо́бнии отцы́ пред пеще́ру/ и, позна́вше, я́ко от бесо́вскаго де́йства случи́ся сие́,/ прилежа́ху, моли́твою тебе́ посо́бствующе,/ и услы́ша моли́тву их, и тя поми́лова Госпо́дь, Царь ми́ра.

Богоро́дичен: Тьмо́ю бесо́вских нападе́ний уя́звленно иму́щи се́рдце, Тебе́ молю́, Влады́чице:/ благи́й приложи́ сему́ пла́стырь ми́лости/ и ду́шу мою́ омраче́нную спаси́ от паде́ния,/ Еди́ну бо Тя има́м, ско́рое посеще́ние, Цари́цу Све́та.

Песнь 6

Ирмо́с: Бу́рею грехо́вною погружа́емь,/ я́ко во чре́ве ки́тове содержи́мь,/ с проро́ком зову́ Ти:/ возведи́ от тли живо́т мой,/ Го́споди, и спаси́ мя.

Бу́рею искуше́ний бесо́вских напа́ствован сый, блаже́нне,/ разсла́бился еси́ умо́м и те́лом и, ничто́же ве́дый о себе́,/ лежа́л еси́ на одре́ два ле́та, ни хле́ба яды́й, ни воды́ пия́й,/ но, моли́твою преподо́бнаго Феодо́сия умоля́емь,/ возведе́ Госпо́дь от тли живо́т твой и спасе́ тя.

Стра́нно чу́до:/ естеству́ челове́ческому без бра́шна бы́ти./ На тебе́ же сие́ сбы́стся, блаже́нне:/ Бог бо, иде́же хо́щет, пременя́ет естества́ уста́вы,/ я́ко в Того́ руце́ дыха́ние всей тва́ри,/ и Той, е́же хо́щет, твори́т.

Крест Твой, Христе́, ору́жие кре́пкое на враги́,/ и́мже а́ще не огради́мся, иску́шени бу́дем, я́коже Исаа́кий./ Сим у́бо огражда́ющеся, мо́лимся Тебе́:/ я́коже Исаа́кию не попусти́л еси́ искуше́нну бы́ти до конца́,/ та́ко и нам не попусти́ искуси́тися вы́ше си́лы на́шея и спаси́ нас.

Сла́ва Тебе́, Безнача́льная Тро́ице, вино́вная бла́гости, и от паде́ния всех возводя́щая,/ ще́дротами Твои́ми уще́дри ны, рабы́ Своя́, и возста́ви во тлю па́дших,/ я́коже уго́дника Твоего́ Исаа́кия спасла́ еси́,/ пода́вши тому́ на бе́сы множа́йшую кре́пость.

Богоро́дичен: Сла́ва Тебе́, Ма́ти Бо́жия, ве́рным прибе́жище:/ Тобо́ю бо па́дшии востаю́т, умерщвле́ннии оживля́ются, кре́пость на диа́вола прие́млют/ и ве́чному животу́ сподобля́ются в сла́ве Сы́на и Бо́га Твоего́.

Конда́к, глас 5:

Вра́жию пре́лесть низложи́вша и в по́стничестве све́тло просия́вша,/ прииди́те, ве́рнии, восхва́лим Исаа́кия победоно́снаго,/ и́же, я́ко зла́то, во искуше́ниих просия́/ и просвеща́ет сердца́ ве́рно к нему́ притека́ющих,/ моля́ся Го́сподеви непреста́нно о душа́х на́ших.

Песнь 7

Ирмо́с: Не преда́ждь нас до конца́ И́мене Твоего́ ра́ди,/ и не разори́ заве́та Твоего́,/ и не отста́ви ми́лости Твоея́ от нас,/ Го́споди, Бо́же оте́ц на́ших, Препе́тый во ве́ки.

Мно́гая искуше́ния проше́д, преподо́бне,/ мно́жае избы́точествовал еси́ во сла́ву Бо́жию/ и, став кре́пко проти́ву врага́, псало́мски воспе́л еси́:/ па́дшия в тесноте́ поста́вил еси́ на простра́нне но́зе мои́, Христе́ Бо́же, Прехва́льный во ве́ки.

Те́снее связа́л еси́ себе́ власяны́ми ру́бы,/ связа́в кре́пко и врага́ послуша́нием тве́рдым в пова́рне,/ и поруга́лся еси́ поруга́вшемуся тебе́, прогоня́я того́ моли́твою/ и предваря́я всех послуша́нием и по́стническими труды́.

Па́дший искуше́нии, храм души́ своея́ возставляя́,/ к хра́му Бо́жия Ма́тере пе́рвее всех прибега́л еси́/ и, в не́м нога́ми от зимы́ к ка́мени примерза́емь,/ стоя́л еси́ до кончи́ны пра́вила,/ огню́ серде́чному в любо́вь Бо́жию распаля́ющу тя си́льно.

Отбе́гшую пре́жде благода́ть за бесо́вскую пре́лесть/ па́ки пости́гл еси́, о́тче, е́же зна́меноваше пти́ца, я́тая тобо́ю,/ е́же ви́девшии позна́ша благода́ть Бо́жию, су́щую с Тобо́ю,/ и вси, уди́вльшеся, прославля́ху прославля́ющаго тя Христа́/ и тебе́ я́ко уго́дника Христо́ва почита́ху.

Богоро́дичен: Юро́дствую, омраче́н бесо́вскими ухищре́ньми,/ и, неподо́бная де́ющи, за́поведи Го́спода моего́ преступа́ю,/ но Ты, Ма́ти Чи́стая, даждь ми ра́зум,/ да разуме́ю путь пра́вый/ и, избе́г руки́ ловя́щаго мя Велиа́ра, восхвалю́ Тя во ве́ки.

Песнь 8

Ирмо́с: На Кресте́ пло́тию Пригвожде́ннаго/ и Показа́вшаго нам ору́жие во спасе́ние,/ о́троцы, превозноси́те Христа́, Бо́га на́шего, во ве́ки.

На крест терпе́ния возше́д, распя́лся еси́ ми́ру, преблаже́нне Исаа́кие,/ пригвозди́л бо еси́ у́ды своя́ отсече́нием страсте́й,/ и копие́м поруга́ния неве́дущии бу́йства твоего́ Бо́га ра́ди пробода́ху тя,/ но ты вся ра́достне претерпе́л еси́, хва́лящи Христа́ во ве́ки.

На пла́мень разгоре́вшияся пе́щи обнаже́нными нога́ми наступи́в,/ пребы́л еси́, стоя́ неподви́жим, до́ндеже угасе́,/ и сие́ зна́меноваше нападе́ний бесо́вских угаше́ние,/ я́же вско́ре устуди́л еси́ си́лою креста́ Христо́ва,/ и о сем хва́лишися во ве́ки.

Мно́жицею напа́даху на тя бе́сове, о́тче,/ свои́м тя нарица́юще, я́ко поклони́лся еси́ князю их,/ но ты си́лою Христо́вою прогоня́л еси́ их а́ки му́хи,/ и со студо́м отбега́ху тя, досажде́ния своего́ не терпя́ще,/ и бысть твоя́ побе́да на них после́дняя бо́льша пе́рвыя.

Богоро́дичен: Лю́тых страсте́й прило́ги искуша́емь,/ к Твоему́ Покро́ву, Всенепоро́чная Де́во, прибега́ю,/ преподо́бнаго ра́ди Твоего́ Исаа́кия, покры́й мя и спаси́ от сих нападе́ний,/ да превозношу́ Тя со Христо́м во ве́ки.

Песнь 9

Ирмо́с: Велича́ем вси человеколю́бие Твое́, Христе, Спа́се наш,/ Сла́во раб Твои́х и Ве́нче ве́рных,/ возвели́чивый па́мять Ро́ждшия Тя.

Велича́ем вси Человеколю́бца Бо́га,/ та́ко раба́ Своего́ укре́пльшаго,/ я́ко вся страхова́ния де́монская в бе́гство претвори́,/ и пребы́сть про́чее ники́имже ору́жием одоле́н,/ а́ки адама́нт тве́рд, цел и неруши́мый.

Ослабе́ супоста́т твой, преподо́бне,/ а́ще и мно́гажды в нощи мно́гия бе́сы приведе́ себе́ в по́мощь с моты́ками и за́ступами, и восклица́ху:/ раскопа́ем пеще́ру сию́ и сего́ зде загребе́м,/ уже́ бо нам одолева́ет,/ неодоле́нное И́мя Вы́шняго и Ро́ждшую Его́ в по́мощь призыва́я.

Нощну́ю тьму, в нощи́ приходя́щую, разуме́в, блаже́нне,/ светоно́сным зна́мением кре́стным прогоня́л еси́,/ и́мже опаля́еми, не терпя́ще, претворя́хуся в бе́гство,/ тебе́ вене́ц побе́ды оставля́юще, я́ко до́брому во́ину и подви́жнику непреобори́мому.

Змий и льстец, три ле́та боря́йся с тобо́ю, о́тче,/ преобража́шеся в четвероно́гая зве́ри, га́ды и мы́ши,/ но, не одоле́в тебе́ мечта́нии свои́ми,/ нево́лею победи́теля тя испове́да:/ низложи́л бо еси́ его́ И́менем Христо́вым,/ Его́же с Ро́ждшею велича́ем.

Богоро́дичен: Все вре́мя живота́ моего́, в разли́чныя ви́ды преобра́жся, враг побежда́ет мя,/ сему́ немоги́й проти́ву ста́ти, Тебе́, Богоро́дице, призыва́ю:/ посли́ ми си́лу, я́ко Си́льнаго Ро́ждшая, Его́же с Тобо́ю велича́ю.

Свети́лен:

Мно́гия труды́ в житии́ подъе́мь,/ с враги́ боря́ся, дости́г блаже́нныя кончи́ны,/ преста́вился еси́ к Вы́шним в поко́й преми́рный,/ но па́мять твоя́ в нас пребыва́ет, и труды́ твоя́ испове́дует Це́рковь,/ я́же помина́юще, мо́лимся тебе́:/ посети́ нас и даждь благослове́ние, в дне́шний день преста́вление твое́ почита́ющим, о́тче наш Исаа́кие.

Богоро́дичен: Ско́рая Засту́пнице христиа́ном,/ ускори́ предста́ти мно́гими напа́стьми томи́мым,/ да, на Тя наде́ющеся, не отпаде́м наде́жды,/ но, Тобо́ю изба́вльшеся от напа́стей, просла́вим, Всенепоро́чная, Честно́е Рождество́ Твое́.

На хвали́тех стихи́ры, глас 3:

Благоду́шствуя в словеси́ Госпо́дни,/ небоя́зненно взем Влады́ки своего́ яре́м,/ ра́лом те́снаго жития́ твоего́, преподо́бне,/ возде́лав ни́ву души́ своея́,/ напои́л еси́ ту пото́ком сле́зным/ посе́яв труды́, а́ки пшени́цу чи́сту,/ возрасти́в же кла́сы и́ноческих доброде́телей,/ пожа́л еси́ рукоя́ти непреста́нных моли́тв,/ я́же внесл еси́ в жи́тницу Небе́сную;/ и ны́не, с благи́ми рабы́ похвалу́ прие́мь,/ помяни́ нас, о́тче всеблаже́нне,/ любе́зно твою́ па́мять почита́ющих.

Ходи́в те́сною стезе́ю во вре́менном ве́це,/ скорбьми́, и слеза́ми, и бде́нием непреста́нным,/ стена́ньми и озлобле́нии, достосла́вне,/ уклони́лся еси́ от простра́ннаго па́губнаго пути́,/ дости́гл же еси́ широты́ Небе́сныя,/ иде́же имы́й поко́й безболе́зненный,/ не забу́ди и нас в твое́й бла́гости,/ я́ко моли́твенник о душа́х на́ших.

Нищ быв Бо́га ра́ди, презре́в вся су́етная стяжа́ния,/ обнища́вшему нас ра́ди Христу́ после́довал еси́,/ от Него́же прие́мь доброде́телей соверше́ние,/ обогати́лся еси́ сокро́вищем нетле́нным;/ нас, благи́ми дея́нии обнища́вших, не забу́ди,/ но от исполне́ния твоего́ да́руй, о́тче преподо́бне,/ в дне́шний день твое́ честно́е успе́ние почита́ющим.

Сла́ва, глас 2:

Ми́ра отве́ргся и вся́каго любостра́стия, преподо́бне,/ Ева́нгельски крест свой взем на ра́мо, Христу́ после́довал еси́;/ в те́сной пеще́ре пожи́в,/ коне́чною острото́ю и́ноческих трудо́в пе́рвее победи́вшаго тя победи́л еси́/ и по кончи́не сему́ та́ко стра́шен показа́лся еси́,/ я́ко и и́мене твоего́ трепе́щет, не терпя́ твоего́ преще́ния,/ и́бо на Небеси́ живы́й, ду́хи прогоня́еши зло́бы поднебе́сныя,/ и́хже и от нас прожени́, Исаа́кие блаже́нне,/ и испроси́ нам от Христа́ Бо́га ве́лию ми́лость.

И ны́не, Богоро́дичен:

Спаси́ от бед рабы́ Твоя́, Пресвята́я Богоро́дице,/ я́ко вси по Бо́зе к Тебе́ прибега́ем,/ я́ко к неруши́мой стене́ и предста́тельству.

Славосло́вие вели́кое и отпу́ст.