Служба преподобнаго Иоасафа Каменскаго, чудотворца
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры пра́здника 3, глас 8, и свята́го 5, глас то́йже.
Подо́бен: Что вас нарече́м:
Преподо́бне о́тче Иоаса́фе,/ просвеще́нный благода́тию Святы́я и Пресла́вныя Тро́ицы Единосу́щныя,/ Све́том Безнача́льнаго Све́та,/ тем всю зе́млю просвети́/ и мно́гия на́ша грехи́ потреби́,/ о́тче преподо́бне,/ моли́ о спасе́нии душ на́ших.
Све́тлости духо́вныя ты бысть сподо́блен,/ о́тче преподо́бне Иоаса́фе,/ проти́ву труду́ твоему́ вели́кому, свя́те,/ те́мже и ны́не су́щая во гресе́х просвети́,/ дерзнове́ние име́я к Бо́гу и Спа́су всех нас поми́ловати.
Грехо́вный мрак от серде́ц на́ших отгна́в,/ облегчи́ лежа́щий грех на ра́мех на́ших,/ преподо́бне Иоаса́фе,/ да вси твою́ па́мять, соше́дшеся, воспое́м,/ очище́ния прося́ще,/ моли́ о спасе́нии душ на́ших.
Сла́ва, глас то́йже:
Равноа́нгельное житие́ пожи́в боле́зньми по́стническими,/ о́тче преподо́бне Иоаса́фе пресла́вне,/ воздержа́нием те́ло свое́ порабо́тив,/ покори́л еси́ ду́ху./ Де́латель быв за́поведи Госпо́дни,/ испе́рва подо́бную добро́ту о́браза соблю́л еси́,/ и страда́ния по́двиги от по́стных пото́в соверша́л еси́,/ и, сугу́бым венце́м украси́вся,/ приле́жно Спа́са моли́ спасти́ся нам.
И ны́не, пра́здника.
Та́же вход, проки́мен дне. И чте́ния 3 преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.
На лити́и стихи́ры, глас 8.
Подо́бен: О, пресла́внаго чудесе́:
О́тче преподо́бне,/ ты, Бо́га возлюби́в от ю́ности,/ к Нему́ прилепи́лся еси́,/ оста́вив мир с попече́ньми его́/ и от всех обнажи́вся жите́йских,/ безмо́лвно житие́ пожи́л еси́,/ не сму́тным умо́м вы́ну служа́ Бо́гови,/ во смире́нии мно́зе и умиле́нии души́./ Того́ ра́ди просла́вил тя Вели́кий Дарода́тель.
О́тче преподо́бне Иоаса́фе,/ ты, Бо́гу после́дуя,/ от всех люби́мь бысть,/ блага́го ра́ди жи́тельства и нра́ва, благопристу́пне,/ я́коже ктому́ не я́ко челове́ка тя вси име́яху,/ но я́ко Ангела,/ отню́дуже и душ попече́ние/ восприя́л еси́,/ наставля́ем к Небе́сному насле́дию.
О́тче преподобне и богоно́сне Иоаса́фе,/ боже́ственною му́дростию ум укре́пль,/ све́тло я́рость у́бо му́жеством,/ целому́дрием жела́ние,/ пра́вдою же си́лу душе́вную/ упра́вил еси́, прему́дре,/ колесни́цу красну́ доброде́телей/ соде́лал еси́, ра́дуяся,/ к высоте́, сла́вне.
О́тче богоглаго́ливе Иоаса́фе,/ воздержа́нием ум огради́в всю́ду,/ к Первови́дному востещи́ сотвори́л еси́,/ и ути́шил еси́ мирски́й мяте́ж,/ в пусты́ню всели́вся,/ та́мо вся́кия молвы́ отря́с,/ и ума́ чистото́ю возде́ржан бысть, прему́дре,/ жела́нием вои́стину кра́йним,/ богому́дре, преподо́бне, возше́л еси́ к Бо́гу.
Сла́ва, глас то́йже.
Кто не диви́тся или́ кто не воспое́т/ преподо́бнаго Иоаса́фа чудеса́,/ я́ко и по святе́м его́ преставле́нии/ всем подае́т притека́ющим с ве́рою бога́тно исцеле́ние./ Честна́я же его́ и свята́я благода́ть источа́ет исцеле́ния неоску́дно./ О, прему́дрости Сло́ва Бо́жия и боже́ственныя благода́ти, да́нныя ти!/ Те́мже пе́сньми зове́м Благоде́телю Бо́гу,/ показа́вшему нам сего́ преподо́бнаго/ на исцеле́ние душа́м и телесе́м на́шим.
И ны́не, пра́здника.
На стихо́вне стихи́ры, глас 5.
Подо́бен: Ра́дуйся:
Ра́дуйся, по́стных вои́стину подвиза́ние,/ благоуха́нный сосу́де,/ крест бо на ра́мо взем,/ Влады́це Христу́, всеблаже́нне, возложи́ся,/ плотски́й покори́л еси́ долере́тный смысл,/ доброде́тельми ду́шу преосия́в и боже́ственному воскреси́л еси́ раче́нию./ Тем, всесвяту́ю твою́ па́мять пра́зднующе, всехва́льне,/ Боже́ственнаго человеколю́бия про́сим получи́ти твои́ми моли́твами ми́рови/ и дарова́ти нам ве́лию ми́лость.
Стих: Честна́ пред Го́сподем/ смерть преподо́бных Его́.
Угль богосве́тлый, Огне́ви пребесе́довав, богоно́се,/ Ду́хом показа́лся еси́ в ми́ре, Иоаса́фе, преосия́нная душа́;/ сего́ ра́ди, ве́рно богомы́сленне приступа́ющия ти к Све́ту водя́,/ возсия́л еси́, озаря́емь Безвече́рним, преподо́бне,/ пусты́нныя же, ороша́я свы́ше Боже́ственною благода́тию, увяди́л еси́ у́глие./ Тем побе́дный преесте́ственно дарова́ ти вене́ц, блаже́нне о́тче Иоаса́фе,/ Боже́ственныя пра́вды Строи́тель, Христо́с,/ Его́же моли́ дарова́ти душа́м на́шим ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ле́ствица небоме́рная я́сно житие́ твое́, богомы́сленне, бысть,/ е́юже к высоте́ взя́тися/ и Влады́це Христу́ бесе́довати, блаже́нне Иоаса́фе, сподо́бился еси́,/ ум просвеща́я, сия́ния луча́ми Его́ освяща́емь,/ равноа́нгельскую све́тлость прия́л еси́./ Ему́же ны́не предстоя́,/ моли́, блаже́нне Иоаса́фе,/ о соверша́ющих боже́ственную и всесвяту́ю па́мять твоего́ преставле́ния/ и о е́же ми́рови дарова́ти ве́лию ми́лость.
Сла́ва, глас 6:
Преподо́бне Иоаса́фе,/ не дал еси́ сна свои́ма очи́ма,/ ни ве́кома свои́ма дрема́ния,/ до́ндеже ду́шу и те́ло от страсте́й свободи́л еси́,/ духо́вное жили́ще бо Христо́с со Отце́м оби́тель в тебе́ сотвори́;/ и, Единосу́щныя Тро́ицы благода́ть прие́м,/ великопропове́дниче Иоаса́фе блаже́нне,/ моли́ за ны, спасти́ся душа́м на́шим.
И ны́не, пра́здника.
Тропа́рь, глас 2:
Я́ко дре́во насажде́нно при вода́х воздержа́ния,/ струя́ми слез твои́х напая́емь,/ преподобне о́тче Иоаса́фе,/ се́яв бо слеза́ми,/ в ра́дости жне́ши доброде́тельныя рукоя́ти./ Тем Вели́кий Мздовоздая́тель в жи́тницах Небе́сных тя сокро́вище положи́,/ но помина́й чту́щих любо́вию пресве́тлую па́мять твою́,/ моли́ Святу́ю Тро́ицу, преподо́бне Иоаса́фе,/ спасти́ся душа́м на́шим.
Ин тропа́рь, глас 2:
Насажде́нный при вода́х воздержа́ния,/ струя́ми слез твои́х напая́емь,/ я́ко ле́торасль живоно́сная в вертогра́де Це́ркве Бо́жия процве́л еси́,/ блаже́нне Иоаса́фе,/ плоды́ доброде́телей возраща́я и ду́ши ве́рующих пита́я./ Те́мже и Христо́с в Небе́сныя страны́ тя пресели́./ Но помина́й нас, любо́вию святу́ю твою́ па́мять чту́щих, благове́рне кня́же,/ и моли́ Пресвяту́ю Тро́ицу, во е́же спасти́ся душа́м на́шим.
НА У́ТРЕНИ
На Бог Госпо́дь: тропа́рь пра́здника два́жды. Сла́ва, свята́го. И ны́не, пра́здника.
По 1-м стихосло́вии седа́лен, глас 4:
От ю́ности, я́ко свети́льник, посреде́ и́нок возсия́л еси́, блаже́нне,/ зо́льным воздержа́нием умертви́л еси́ плотска́я взыгра́ния./ Тем и на высоту́ восте́кл еси́ богоразу́мия, пресла́вне, пожи́в в ми́ре богоуго́дно,/ и посрами́л еси́ бесо́вская ополче́ния, Иоаса́фе блаже́нне./ Сего́ ра́ди вопие́м ти:/ моли́ Христа́ Бо́га согреше́ний оставле́ние дарова́ти/ чту́щим с любо́вию святу́ю па́мять твою́.
Сла́ва, и ны́не, пра́здника.
По 2-м стихосло́вии седа́лен, глас 4:
Я́ко в дому́, вои́стину на ме́сте богосажде́нне всели́лся еси́, богому́дре Иоаса́фе,/ вся́ко озлобле́ние претерпева́я,/ до́брыя де́тели, я́коже фимиа́м благово́нен, же́ртву благоприя́тну Бо́гови прине́сл еси́./ Те́мже, дерзнове́ние стяжа́в к Нему́,/ моли́ дарова́ти очище́ние согреше́нием/ и́же ве́рою хва́лящим па́мять твою́.
Сла́ва, и ны́не, пра́здника.
По полиеле́и седа́лен, глас 8.
Подо́бен: Прему́дрости:
Я́ко врача́ прему́дра и уго́дника Госпо́дня благоприя́тна, богому́дре,/ соше́дшеся, ве́рою и любо́вию во псалме́х и пе́ниих восхва́лим, Христа́ сла́вяще,/ И́же такову́ю благода́ть тебе́ дарова́вшаго исцеле́ний, Иоаса́фе преблаже́нне,/ моли́ Христа́ Бо́га согреше́нием оставле́ние дарова́ти/ и́же ве́рою и любо́вию пра́зднующим всечестну́ю па́мять твою́.
Сла́ва, и ны́не, Богоро́дичен:
Я́ко Де́ву еди́ну в жена́х Тя, без се́мене Ро́ждшую Бо́га пло́тию,/ вси блажи́м, ро́дове челове́честии,/ Огнь бо всели́ся в Тя Божества́,/ и, я́ко Младе́нца, дои́ши Зижди́теля и Го́спода./ Те́мже а́нгельский собо́р и челове́ческий род/ досто́йно весели́тся и сла́вит пресвято́е рождество́ Твое́,/ и согла́сно вопие́м Ти:/ моли́ Христа́ Бо́га согреше́нием оставле́ние дарова́ти воспева́ющим сла́ву Твою́.
Посе́м степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 8:
Исцеле́ние оби́льно ты всегда́ источа́еши/ ве́рою приходя́щим,/ богоно́се Иоаса́фе,/ благоуха́ния всех исполня́я/ и тьму бесо́вскую дале́че отгоня́я,/ све́том благоче́стия просвеща́я ве́рных./ Те́мже мо́лим тя, раби́ твои́,/ вся́каго наве́та вра́жия нас изба́вити,/ я́ко да твой пресве́тлый пра́здник благоче́стно воспева́ем пе́сньми,/ сла́вное твое́ успе́ние днесь торжеству́юще,/ и прославля́ем И́же тебе́ Просла́вльшаго,/ Еди́наго во святы́х Бо́га на́шего.
Кано́н пра́здника, глас 8, со ирмосо́м на 6, и кано́н преподо́бнаго, глас 4, на 8.
Песнь 1
Ирмо́с: Отве́рзу уста́ моя́:
Весь освяще́н ты Творцу́ возложи́в себе́,/ все душе́вное жела́ние излия́в к Нему́,/ сего́ ра́ди духо́вную благода́ть восприя́л еси́;/ све́том благода́ти озаря́яся, блаже́нне Иоаса́фе пресла́вне,/ ве́рою па́мять твою́ торжеству́ющия/ просвети́ и от тьмы грехо́вныя моли́твами свои́ми изба́ви.
Измла́да Христа́ возлюби́л еси́, всеблаже́нне Иоаса́фе, я́вленне чудотво́рче,/ и Пречи́стую Его́ Ма́терь;/ ны́не же просвеща́еши чудесы́, я́ко мо́лния, всю вселе́нную.
Ны́не, преблаже́нне Иоаса́фе,/ душа́ твоя́ почива́ет на Небесе́х со Христо́м во Ца́рствии Небе́снем,/ зде же честна́я благода́ть твоя́ да́рует исцеле́ние приходя́щим с ве́рою.
Богоро́дичен: Ра́дуйся, Пречи́стая Богоро́дице,/ А́нгельское удивле́ние, проро́ческая про́поведь, апо́столов немо́лчная уста́,/ моли́ся Сы́ну Твоему́ и Бо́гу на́шему,/ да сохрани́т ме́сто сие́ и люде́й правосла́вных/ блаже́ннаго Иоаса́фа моле́нием.
Катава́сия: Крест начерта́в:
Песнь 3
Ирмо́с: Твоя́ песносло́вцы, Богоро́дице:
Я́ко златоза́рное со́лнце яви́лся еси́ Ипоста́снаго Божества́, Иоаса́фе блаже́нне,/ и омраче́нных ду́ши просвеща́еши моли́твами твои́ми.
Из мла́да во́зраста Бо́га возлюби́л еси́, преподо́бне блаже́нне,/ и ничто́же предпоче́л еси́ па́че любве́ Его́,/ и ны́не сия́вши, я́ко со́лнце Триипоста́снаго Божества́, преблаже́нне Иоаса́фе.
Креста́ Госпо́дня си́лою укрепля́емь, блаже́нне Иоаса́фе,/ поще́нием и моли́твою/ стремле́ния бесо́вская на земли́ победи́л еси́ Бо́жиею си́лою.
Богоро́дичен: Ра́дуйся, Влады́чице Де́во,/ це́рквам бо еси́ красота́, святи́телем утвержде́ние, всем лю́дем похвала́./ Непреста́нно моли́ся Христу́ Бо́гу/ сохрани́ти ме́сто сие́ и лю́ди моли́твами всеблаже́ннаго Иоаса́фа.
Конда́к и и́кос пра́здника.
Седа́лен, глас 4:
Тве́рдостию ра́зума украша́яся и плотски́я тяготы́ отве́рг,/ горды́ню попра́л еси́, оби́телище быв избра́нно Пресвято́му Ду́ху,/ неукло́нным ра́зумом простира́яся Христу́ Бо́гу,/ многоко́зненнаго стре́лы притупи́л еси́ и лук сокруши́л еси́,/ всеблаже́нне Иоаса́фе, моли́ Христа́ Бо́га оставле́ние пода́ти грехо́в/ чту́щим любо́вию святу́ю па́мять твою́.
Сла́ва, и ны́не, пра́здника.
Песнь 4
Ирмо́с: Седя́й в сла́ве:
На земли́ сте́пень8 име́л еси́, всеблаже́нне Иоаса́фе,/ но свои́ми моли́твами Го́рнее Ца́рство восприя́л еси́,/ и ны́не на Небесе́х со Христо́м ца́рствуеши.
Исцеле́ние соде́лывает боже́ственная благода́ть твоя́, Иоаса́фе блаже́нне,/ отгоня́еши бо ду́хи лука́выя от челове́к, и укрепля́еши,/ и премудря́еши мудрова́ния их,/ я́ко да восхва́лим труды́ твоя́, всече́стне.
Со враго́м кре́пко бра́вшися воздержа́нием,/ ны́не кре́постию одержа́л еси́ побе́ду,/ блаже́нне Иоаса́фе, пресла́вне новоя́вленне чудотво́рче,/ му́жески брань претерпе́л еси́ и низложи́л еси́ бесо́вская ополче́ния.
Богоро́дичен: Христа́ нам родила́ еси́, Пречи́стая Богора́дованная Де́во,/ спаси́ ме́сто сие́ и лю́ди, и́же на Тя упова́ющия,/ Богоро́дице Пренепоро́чная.
Песнь 5
Ирмо́с: Ужасо́шася вся́ческая:
Зако́нными моли́твами и посто́м подвиза́лся еси́, блаже́нне Иоаса́фе,/ и в безсме́ртие оде́ялся еси́,/ плотски́й ра́зум смири́в кре́постию Боже́ственнаго Ду́ха.
От ю́ности возжада́л еси́ мона́шескаго о́браза/ и от Христа́ восприя́л еси́ вене́ц златы́й и ри́зу нетле́нную,/ и ны́не, блаже́нне Иоаса́фе,/ со А́нгелы ра́дуется, преподо́бне, дух твой.
О́тче богому́дре Иоаса́фе,/ дае́ши ве́рным лю́дем душа́м очище́ние и просвеще́ние,/ и телесе́м исцеле́ние и от страсте́й избавле́ние/ от твоея́ благода́ти почерпа́ем.
Богоро́дичен: Всесве́тлым укра́шена еси́ Све́том, Богора́дованная,/ Ты бо породи́, Честне́йшая всех, Христа́ Бо́га на́шего,/ Его́же моли́, да изба́вит ны от всех напа́стей.
Песнь 6
Ирмо́с: Боже́ственное сие́ и всечестно́е:
Удиви́ся, боже́ственный Иоаса́фе, чудеса́м твои́м весь мир,/ и восприя́л еси́ от Христа́ вене́ц Небе́сный,/ его́же моли́ сподо́бити нас причасти́тися/ твои́ми моли́твами, всече́стне.
Лук си́льных сокруши́л еси́/ и брань всю неприя́зненну потреби́л еси́, всеблаже́нне Иоаса́фе,/ веща́ния испусти́л еси́ во всю вселе́нную чуде́с твои́х.
Всеблаже́нне Иоаса́фе, уго́дниче Христо́в,/ на Небесе́х предста́л еси́, Христу́ моля́ся,/ зде же честна́я твоя́ благода́ть/ боля́щих исцеля́ет и греха́ изыма́ет.
Богоро́дичен: Изсуши́ла еси́ сады́ безбо́жных люде́й,/ Пренепоро́чная Де́во, Свои́м Прозябе́нием,/ прозя́бшу во мне зло́бу вся́кую искорени́, Богоневе́сто.
Конда́к преподо́бнаго, глас 4:
Яви́лся еси́ ве́лие со́лнце Христо́ве Це́ркви,/ просвеща́я всех житие́м свои́м, всече́стне,/ я́ко черпа́лом златы́м от кла́дезя неиско́паннаго,/ чуде́с мно́жество поче́рпл еси́ от исто́чника неистощи́маго,/ на успе́ние свое́ прише́л еси́ ми́рно,/ всеблаже́нне Иоаса́фе,/ и ны́не всем дае́ши грехо́м проще́ние.
И́кос:
На высоте́ Госпо́дь воздержа́нием и́стинным тя положи́,/ я́ко звезду́ небла́зненну,/ просвеща́ющу страны́, чудотво́рче, быстрина́ми слове́с твои́х./ Источи́в боже́ственная чудеса́ ми́рови, ду́ши ве́рных напита́л еси́,/ ерети́ческия полки́ победи́л еси́, я́ко други́я еги́птяны,/ поклоне́ние Тро́ическое во Еди́ном Божестве́ чтил еси́./ Темже соблюди́ ны от враг ви́димых и неви́димых, всеблаже́нне Иоаса́фе,/ я́ко ны́не всем дае́ши грехо́м проще́ние.
Песнь 7
Ирмо́с: Не послужи́ша тва́ри:
Блаже́нно житие́ твое́ и кончи́на безсме́ртна, блаже́нне Иоаса́фе,/ сего́ ра́ди тя Христо́с свы́ше венце́м украси́,/ и просвеща́еши весь мир чудесы́ свои́ми, всече́стне.
Яви́лся еси́ ны́не, Иоаса́фе богоблаже́нне,/ столп непоколеби́м, стена́ неруши́мая, вели́кое прибе́жище/ от Тебе́ прие́млющим исцеле́ний благода́ть неоску́дну./ Бо́же, благослове́н еси́!
Восхоте́л еси́, от мирски́х сла́достей отлучи́вся,/ стра́нно челове́ком Я́вльшемуся Пло́тию присво́итися,/ бу́дущая и нетле́нная тем стяжа́в, воспева́я:/ благослове́н еси́, Го́споди, Бо́же оте́ц на́ших.
Богоро́дичен: Без се́мене заче́нши Творца́ всех, Христа́ Бо́га,/ неизрече́нно родила́ еси́,/ Его́же моли́, дерзнове́ние иму́щи к Нему́,/ да ны спасе́т, пою́щих:/ Бо́же, благослове́н еси́.
Песнь 8
Ирмо́с: О́троки благочести́выя в пещи́:
Лику́ют на Небесе́х чи́нове а́нгельстии, всеблаже́нне Иоаса́фе,/ ви́дяще чуде́с твои́х мно́жество,/ ве́рных же собо́ри на земли́, твою́ па́мять похваля́юще,/ Христа́ пое́м и превозно́сим во ве́ки.
Помоли́ся, всеблаже́нне Иоаса́фе,/ Христу́ Бо́гу о приходя́щих ти с ве́рою,/ хотя́щих от Тебе́ почерпсти́ исцеле́ния неоску́дную благода́ть./ Го́спода же пое́м и превозно́сим во ве́ки.
Всемо́щными, свя́те, твои́ми моли́твами/ душе́вныя ми боле́зни исцели́, Иоаса́фе сла́вне, прося́ отпу́ста зол мои́х,/ со безплотными бо Си́лами Христо́ви предстои́ши, с ни́миже пое́ши непреста́нно:/ Го́спода по́йте и превозноси́те Его́ во ве́ки.
Богоро́дичен: Из пречи́стаго Ти чре́ва, Богома́ти,/ Небе́снаго Дождя́ ка́пля нам ука́ну/ на умове́ние скве́рнам, на здра́вие телеси́, на прогна́ние лука́ваго./ Те́мже Тя блажи́м, Чи́стую, во ве́ки.
Песнь 9
Ирмо́с: Всяк земноро́дный:
Удиви́ся во всем ми́ре, Иоаса́фе, твоя́ па́мять,/ чудесы́ сия́ющи, я́ко со́лнце, злы́я боле́зни исцеля́ющи всем./ Те́мже моя́ стра́сти разжени́, молю́тися,/ прося́ ны́не отпу́ста, чудотво́рче Христо́в Иоаса́фе,/ просвети́ нас твои́ми моли́твами, тебе́ вси велича́ем.
Ны́не моли́ся Го́сподеви, всечу́дне Иоаса́фе блаже́нне,/ твоя́ бо честна́я благода́ть подае́т всегда́/ слепы́м прозре́ние и хромы́м хожде́ние,/ больны́м всем здра́вие и исцеле́ние,/ те́мже тя вси велича́ем.
Да вхо́дят ны́не во святы́й храм твой, блаже́нне Иоаса́фе,/ вси лю́дие правове́рнии и, припа́дающе,/ про́сят от Тебе́ почерпсти́ исцеле́ние, здра́вие и спасе́ние,/ те́мже тя вси велича́ем.
Богоро́дичен: А́нгели, Арха́нгели, проро́цы и апо́столи/ и весь лик преподо́бных оте́ц и свяще́нных му́ченик,/ с преблаже́нным Иоаса́фом ко Христу́ приле́жно моли́теся,/ и с Пречи́стою Ма́терию помоли́теся,/ да изба́вит ны от всех бед, Его́же велича́ем вси.
Свети́лен:
Госпо́дь тя просла́ви в чудесе́х твои́х, блаже́нне Иоаса́фе,/ я́ко Своего́ уго́дника, преста́вльшагося от сме́рти в живо́т,/ сего́ ра́ди чуде́с твои́х па́мять восхваля́ем.
Сла́ва, и ны́не, пра́здника, или́ Богоро́дичен:
Из чре́ва Ти пречи́стаго, Богома́ти,/ Небе́снаго Дождя́ ка́пля нам ука́ну,/ на омове́ние скве́рнам, на здра́вие телеси́, на прогна́ние лука́ваго./ Те́мже Тя ублажа́ем, Чи́стая.
На хвали́тех стихи́ры, глас 8. Самогла́сен:
Преподо́бне о́тче, досточу́дне Иоаса́фе,/ обре́т ду́шу твою́ от скве́рны вся́кия чи́сту,/ Ду́ха благода́ть Всесвята́го в тя всели́ся, я́ко незаходи́мый Свет,/ Его́же де́телию ду́хи бла́зненныя отго́ниши вы́ну,/ исцеля́еши неду́ги и боле́зни/ приступа́ющим ти с про́стым се́рдцем/ и соверша́ющим твою́ святу́ю па́мять, и кла́няющимся тебе́,/ богоно́се Христо́в и уго́дниче,/ подая́й ми́рови мир и ве́лию ми́лость.
Чу́вства вся наста́вль и наказа́в зако́нно, прему́дре,/ боже́ственнаго ра́зума исто́чник, яви́лся еси́, сла́вне,/ от си́лы в си́лу, от сла́вы в сла́ву прише́л еси́,/ Ду́ха Свята́го си́лою чудеса́ ди́вная де́я,/ блаже́нне о́тче Иоаса́фе,/ дея́ния сла́ву прие́м,/ преподо́бным ра́вен быв.
Вы́шняго по́мощию и щито́м и́стинным огра́ждься,/ си́лою Креста́ укре́плься,/ вся полки́ проти́вных победи́л еси́/ и челове́ческия умы́ просвеща́еши,/ чудесы́ мно́гими удивля́я вся,/ дея́нии твои́х по́двиг, Иоаса́фе блаже́нне./ Вся чту́щия ве́рою па́мять твою́ све́тло/ сподо́би твои́ми моли́твами/ лю́тых напа́стей и стра́шных бурь всех изба́витися при́сно,/ и грехо́в проще́ние прия́ти,/ и улучи́ти ми́лости и ра́дости ве́чныя,/ преблаже́нне Иоаса́фе.
Сла́ва, глас 8:
Прииди́те, вси ве́рнии,/ согла́сно воспое́м преблаже́ннаго Иоаса́фа,/ благоче́стия све́тлость, воздержа́ния пра́вило,/ терпе́ния столп, простоты́ сокро́вище,/ смире́ния реку́ незави́стную, ни́щим уте́ху,/ стра́нным странноприе́мника, и́стинныя любве́ Христо́вы де́лателя,/ вои́стину блаже́ннаго./ И се у́бо, жив пред челове́ки,/ засту́пник и спаси́тель показа́вся,/ боле́знем и страсте́м неисце́льным,/ вся́ческим страсте́м исцели́тель,/ Христа́ моли́ спасти́ся душа́м на́шим.
И ны́не, пра́здника, глас 6.
