Служба преподобнаго Иеронима блаженнаго, Стридонскаго

НА ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 1.

Подо́бен: Небе́сных чино́в:

Небе́снаго блаже́нства/ небому́дренный сподо́бився,/ о нас мо́лится со дерзнове́нием/ еди́ному всех Царю́/ Иерони́м преподо́бный,/ благоче́стно па́мять того́ соверша́ющих.

О честне́й твое́й па́мяти крася́щеся,/ мона́шествующих ли́цы,/ Иерони́ме о́тче,/ пе́ние прино́сим тебе́,/ прося́ще твоего́ предста́тельства,/ его́же не лиша́й нас,/ любо́вию почита́ющих тя.

Богому́драго уче́ния бога́тство/ и зре́ния высо́каго сокро́вище/ тя ве́дуще, вопие́м ти:/ ра́дуйся, гра́да Бо́жия обита́телю/ и соприча́стниче в по́двизех просия́вших/ прему́дрых пропове́дник же и преподо́бных.

И́ны стихи́ры, глас 4.

Подо́бен: Дал еси́ зна́мение:

Прине́сл еси́ Зижди́телю твоему́/ ума́ пра́вость, преподо́бне,/ чистоту́, воздержа́ние,/ моли́тву неразсе́янную, излия́ние слез,/ и́хже ра́ди сподо́бился еси́ ви́дети сла́ву Бо́жию,/ ю́же зрят Того́ изря́днейшии,/ и пе́ти Трисвяту́ю песнь,/ Богому́дре Иерони́ме,/ на Небеси́ воспева́емую А́нгелы.

Крест на ра́мена восприи́м/ и ско́рби до́бле претерпе́в,/ Бо́гови благоугоди́л еси́,/ де́вствующих же мно́жество Тому́ приве́л еси́,/ я́ко удобре́ние преподо́бных,/ я́ко прия́телище Боже́ственнаго Ду́ха./ Те́мже ле́тную твою́ па́мять соверша́ем, ве́рнии,/ прося́ще твоего́ заступле́ния.

Град, в не́мже роди́ся е́же по пло́ти Госпо́дь,/ Вифлее́м сла́вный,/ той прия́т труды́ твоя́ и по́ты по́стническия,/ и в нем, о́тче Богому́дре, успе́ние твое́ бысть,/ и предста́л еси́ в весе́лии, весь све́тел, Иерони́ме,/ Подвигополо́жнику и Спа́су ми́ра/ о всех Тому́ моля́ся.

Сла́ва, глас 2:

Возжела́в и́стинно му́дрости Бо́жия,/ усе́рдный послу́шатель был еси́ Богому́дрых слове́с Григо́рия вели́каго,/ ри́тора и Богосло́ва,/ отону́дуже навы́к Боже́ственным,/ до́бре подвиза́лся еси́, преподо́бне о́тче,/ и всем че́стен яви́лся еси́ и Христу́ прия́тен,/ я́ко и́скренний Того́ служи́тель./ Ему́же не преста́й моли́тися/ о ве́рою и любо́вию соверша́ющих честну́ю па́мять твою́.

И ны́не, Богоро́дичен.

Вход. Проки́мен дне. Чте́ния три преподо́бническая

Прему́дрости Соломо́новы чте́ние (главы 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовали бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 5.

Подо́бен: Ра́дуйся:

Ра́дуйся, чи́стый у́ме,/ осия́ния Бо́жия прие́млющий/ и сия́ ве́рным подава́яй,/ чту́щим, Иерони́ме му́дре, святу́ю твою́ па́мять,/ всему́дрыми бо твои́ми, преподо́бне, писа́нии,/ смы́сленныя вся на хвалу́ Бо́га поощря́еши,/ я́ко иску́сен учи́тель христоимени́тым лю́дем/ и незы́блемое тех утвержде́ние.

Стих: Честна́ пред Го́сподем/ смерть преподо́бных Его́.

Ра́дуйся, стра́хом утверди́выйся Бо́жиим,/ я́ко тем позна́л еси́ прему́дрость Боже́ственную,/ любо́вию же и милосе́рдием свой был еси́ Созда́телю твоему́, Иерони́ме,/ я́ко богоразу́мен, доброде́телен же и ре́вностен./ Те́мже, преблаже́нне,/ вся́кия ну́жды и ско́рби свобожда́й воспева́ющия тя/ моли́твами твои́ми ко Го́споду.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, Далмати́и до́брое прозябе́ние/ и воспита́ние свя́то Земли́ Святы́я,/ мно́жайшая ле́та пожи́вый в по́стничестве,/ Бо́га просла́вив во у́дех свои́х и в по́двизех,/ и́хже подъя́л еси́, себе́ удруча́я./ Сего́ ра́ди пра́ведно водворя́ешися ны́не на Небеси́,/ сла́вы исполня́емь, я́ко Боже́ственный таи́нник,/ я́ко Христо́ва Ца́рствия насле́дник.

Сла́ва, глас 6:

Вне́шния прему́дрости рачи́тель быв,/ бо́льшия сия́ сподо́бился еси́ и лу́чшия,/ Иерони́ме благосла́вне./ Тем, обою́ду изря́дну ти су́щу,/ все́ми позна́но бысть богоприя́тное житие́ твое́,/ на супоста́та бо твоя́ побе́ды/ возвеща́ют тя сы́на све́та и уго́дника Христа́ Светода́вца,/ подаю́щаго моли́твами твои́ми душа́м на́шим просвеще́ние,/ мир и ве́лию ми́лость.

И ны́не, Богоро́дичен: Богоро́дице, Ты еси́ лоза́ и́стинная:

Тропа́рь, глас 3:

Вели́ка име́ет тя предста́теля, Богому́дре,/ правосла́вных собра́ние,/ я́коже у́бо преподо́бных еси́ собесе́дник/ и Боже́ственныя прему́дрости соприча́стник,/ та́ко, пречу́дне Иерони́ме,/ Христу́ Бо́гу моли́ся/ дарова́ти нам ве́лию ми́лость.

НА У́ТРЕНИ

По 1-м стихосло́вии седа́лен, глас 1.

Подо́бен: Гроб Твой, Спа́се:

До́бре поучи́вся от Богому́драго Григо́рия,/ преподо́бно устреми́ся от за́пада к восто́ку всеизя́щный Иерони́м,/ подвиза́вся же богоуго́дно, мо́лится ны́не о нас ко Спа́су,/ сла́вную того́ соверша́ющих па́мять,/ его́же ве́рою почита́ем.

Сла́ва, и ны́не, Богоро́дичен:

Ма́терь Тя Бо́жию све́мы вси,/ Де́ву вои́стинну и по рождестве́ я́вльшуюся,/ любо́вию прибега́юще к Твое́й бла́гости:/ Тебе́ бо и́мамы, гре́шнии, Предста́тельницу/ и Тебе́ стяжа́хом в напа́стех спасе́ние, еди́ну Всенепоро́чную.

По 2-м стихосло́вии седа́лен, глас 4.

Подо́бен: Яви́лся еси́:

Яви́ся днесь, преподо́бне о́тче, ве́рным па́мять твоя́ свяще́нная и светоза́рная/ и ду́ши просвеща́ет тебе́ почита́ющих,/ му́дре Иерони́ме.

Сла́ва, и ны́не, Богоро́дичен:

Наше́ствием Ду́ха Всесвята́го/ Отцу́ Сопресто́льнаго и Единосу́щнаго/ гла́сом Арха́нгеловым зачала́ еси́, Благослове́нная, челове́ков воззва́ние.

По полиеле́и седа́лен, глас 4.

Подо́бен: Удиви́ся Ио́сиф:

Испо́лнен удивле́ния был еси́,/ егда́ град Бо́жий сподо́бился еси́ ви́дети, изше́д из те́ла,/ и, Августи́ну, дру́гу твоему́, я́влься, пове́дал еси́ сия́./ Он же, улучи́в жела́ние, ра́дуйся, глаго́лаше тебе́, Богому́дрому,/ предстоя́щему Престо́лу всех Влады́ки/ и моля́щемуся о притека́ющих к тебе́ с ве́рою.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря и внима́ше мы́слию,/ и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие преподо́бническое.

По 50-м псалме́ стихи́ра, глас 6:

Преподо́бне о́тче,/ Богоно́се Иерони́ме,/ таи́нниче Христо́в,/ ве́дателю неизрече́нных/ и правосла́вных наста́вниче иску́снейший,/ не преста́й моли́тися о нас,/ любо́вию соверша́ющих па́мять твою́.

Кано́н, глас 8, его́же краегране́сие, без Богоро́дичных: Тебе́, Иерони́ме, песнь пою́.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Тебе́, Богопропове́днику, приношу́ похвалу́/ и молю́ся сло́ву да́тися ми твои́ми к Бо́гу моли́твами,/ я́ко да возглашу́ вели́чия, Богому́дре, честна́го жи́тельства твоего́.

От Далма́тския земли́ бога́тый благода́тию израсте́/ и украси́ся доброде́тельми сла́вный Иерони́м,/ му́дростию же и разуме́нием веща́ний Ду́ха, я́ко преи́скренен Бо́гу бысть.

Глаго́лы Боже́ственнаго Григо́рия носи́л еси́ в храни́лищи свое́м,/ я́ко того́ таи́нник, богатносве́тле,/ и я́ко после́дователь Христа́ и апо́столов Его́,/ я́ко прича́стник Богосло́вия, блаже́нне.

Богоро́дичен: Неудержи́мыми на ны смерть устремле́нии напада́ше,/ но, Твоему́ рождеству́ прибли́жившися, поги́бе/ и, прирази́вшися, упраздни́ся, Богоро́дице Де́во:/ жизнь бо, вои́стинну присносу́щную, воплоще́нну родила́ еси́.

Катава́сия (а́ще пост): Отве́рзу уста́ моя́:

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́:/ я́ко несть Свят, па́че Тебе́, Еди́не Человеколю́бче.

Украша́яся добро́тою нра́ва, многолюбе́зен был еси́ всем,/ и уго́дник Бо́жий преподо́бен,/ и во отце́х сла́вен, преблаже́нне.

Умо́м чи́стым обогати́вся,/ е́ллинскую му́дрость, иуде́йскую и лати́нскую уве́дел еси́, халде́ев же и пе́рсов,/ но преда́л еси́ себе́ Самопрему́дрости Христу́, сла́вне.

За любо́вь Христо́ву посту́ прилежа́л еси́ и вся́ческим воздержа́ния трудо́м,/ и́хже ра́ди был еси́ Богому́др,/ Бо́гови благоуха́ние и челове́ком утеше́ние.

Богоро́дичен: Поро́ка в Тебе́ и скве́рны несть отню́д, Де́во,/ пребыва́лище же па́че яви́лася еси́ Небе́сных доброде́телей:/ в Тебе́ бо всели́ся вся́кая святы́ня, Влады́чице.

Седа́лен, глас 5.

Подо́бен: Собезнача́льное Сло́во:

Иерони́ма пе́сньми, ве́рнии, почти́м,/ поче́тшаго де́лы Христа́ Го́спода/ и научи́вша нас спаси́тельным стезя́м и е́же в Бо́га и́стиннаго ве́ровати благоче́стно:/ те́плый бо сый наш предста́тель мо́лится о ми́ре и спасе́нии душ на́ших.

Сла́ва, и ны́не, Богоро́дичен:

Ра́дуйся, свята́я горо́ и Богопрохо́дная,/ ра́дуйся, одушевле́нная купино́ и неопали́мая,/ ра́дуйся, еди́на к Бо́гу ми́рови мо́сте, преводя́й ме́ртвыя к ве́чному животу́./ Ра́дуйся, нетле́нная Отрокови́це, неискусому́жно ро́ждшая Спа́са душ на́ших.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

В Вифлее́м прише́л еси́, Богоно́сне,/ и та́мо подвиза́лся еси́ до конца́ ева́нгельски,/ вселе́н быв с преподо́бными, я́ко преподо́бный, на Небеси́,/ иде́же и мо́лишися о ве́рою пою́щих тя.

Я́ко избра́нник, я́ко святы́х оте́ц собесе́дник, в Святе́й Земли́ пожи́л еси́,/ в не́йже Христо́с я́ко челове́к поживе́ и я́ко Бог спасе́ нас/ Тем, достоблаже́нне, почита́ем па́мять твою́.

Бо́жия уго́дника пе́сньми ублажа́ю, Иерони́ма терпеливому́драго,/ у́зкий путь возлю́бльша и изгна́ние прие́мша,/ его́же, Го́споди, моли́твами грехо́в разреше́ние, я́ко Бог ми́лостив, пода́ждь нам.

Богоро́дичен: Неве́сту Бо́жию Тя и Ма́терь ве́мы, Богоро́дице,/ Тебе́ бо, я́ко мирово́нный шипо́к, обре́т Сло́во Бо́жие,/ цвету́щ во удо́лии смире́ннаго челове́чества,/ возжеле́ Твоея́ добро́ты, и, от Тебе́ Плотоно́сец произше́д,/ ве́рныя облагоуха́.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Новососта́вленна есть твоя́ всечестна́я па́мять, преподо́бне,/ а́ще и дре́вня сия́ ле́ты./ Те́мже, прехва́льне, я́коже от дре́вних был еси́,/ и от но́вых бу́ди достохва́лен.

Превосхо́диши мно́жайших, всеизря́дне, Богому́дрием,/ и исполня́еши весе́лия и сла́дости ве́рныя,/ и к высоте́ Боже́ственней возво́диши, я́ко благода́ти Бо́жией обита́лище.

Блаже́нства удосто́ился еси́, достоблаже́нне,/ сострада́телен и ми́лостив быв,/ стра́нныя и безпокро́вныя упокоева́я,/ нищи́м помога́я и наги́я одева́я.

Богоро́дичен: Укра́силася еси́, Де́во, я́ко красне́йшее Сло́во ро́ждшая,/ Его́же при́сно моли́ уще́дрити притека́ющия к Тебе́/ и соблюсти́44 от вся́каго де́монскаго вре́да на Тя упова́ющия.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

На земли́ просла́ви тя Госпо́дь, свя́те,/ богому́дрыми бо писа́нии твои́ми све́тиши конце́м,/ я́ко со́лнце, Иерони́ме светоза́рне.

Умертви́в плотски́я стра́сти воздержа́нием,/ написа́л еси́, благоу́мне, кни́ги же и сви́тки,/ учи́тельныя и изъясня́юща сло́во Бо́жие.

Све́тлый в по́стниках и вели́кий в му́дрости быв,/ ти́тло наста́вника ве́рных прия́л еси́,/ ны́не благохвали́мый на́ми, Богоглаго́ливе.

Богоро́дичен: Зачала́ еси́ вои́стинну Бо́га Сло́ва во утро́бе Твое́й,/ и Сего́ па́че естества́, Пречи́стая, родила́ еси́,/ Его́же ми́лостива сотвори́ нам в День Су́дный.

Конда́к, глас 8.

Подо́бен: Взбра́нной Воево́де:

В преподо́бных преподо́бнейшаго и в блаже́нных блаже́ннейшаго учи́теля,/ пе́сньми восхва́лим Иерони́ма достохва́льнаго,/ ве́рных наста́вника и засту́пника, любо́вию тому́ зову́ще:/ ра́дуйся, о́тче Богому́дре.

И́кос:

Я́коже други́й А́нгел, Иерони́ме о́тче, ви́ден был еси́, на земли́ живя́,/ и неве́рнии у́бо и злосла́внии лю́те вопия́ху на тя,/ правосла́внии же, ра́дующеся, взыва́ху тебе́ такова́я:/ ра́дуйся, отра́сле Далмати́и Боже́ственная;/ ра́дуйся, благи́й плод ея́ и сын./ Ра́дуйся, Земли́ Святы́я воспита́ние свято́е;/ ра́дуйся, благоче́ствующих похвало́./ Ра́дуйся, я́ко списа́ния твоя́ све́тят, я́ко свет;/ ра́дуйся, я́ко по́стничество твое́ похваля́ется, я́коже ле́по./ Ра́дуйся, кра́йний дру́же му́драго Августи́на;/ ра́дуйся, проше́ния испо́лнивый сего́./ Ра́дуйся, ве́рных учи́телю;/ ра́дуйся, враго́в неве́рных сопротивобо́рче./ Ра́дуйся, узре́вый Небе́сный град;/ ра́дуйся, воспева́яй в нем Бо́гу Боже́ственную песнь./ Ра́дуйся, о́тче Богому́дре.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Ума́ чистото́ю прия́л еси́ благода́ть бога́тную от Бо́га,/ твори́ти же и глаго́лати вся к по́льзе души́, Богопропове́дниче,/ благословля́я Бо́га оте́ц на́ших.

Пчеле́ трудолю́бней поревнова́в,/ пи́сьменныя собра́л еси́ цве́ты,/ я́коже в со́те, се́рдцем и умо́м сие́ состроя́я/ и тем услажда́я ве́рных.

Испо́лненный благода́ти Госпо́дней, я́ко вои́стинну избра́нник,/ бу́ди хода́тай о нас, вопию́щих и пою́щих:/ благослове́н еси́, Бо́же оте́ц на́ших.

Богоро́дичен: Неве́стник пречи́ст, е́же па́че сло́ва Сло́ва воплоще́ния,/ и черто́г, и престо́л, правому́дрствующе, Тя Богороди́тельнице, имену́ем,/ сла́вяще рождество́ Твое́.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Свяще́нно плещи́ днесь, гра́де Дави́дов, пе́сньми Спа́су твоему́,/ и́бо со ины́ми твои́ми Иерони́ма Богому́драго и́маши в гра́жданех свои́х, вопия́:/ лю́дие, превозноси́те Го́спода во вся ве́ки.

В се́рдце положи́в восхожде́ние, Богому́дре,/ и Творцу́ вы́ну соединя́яся,/ возше́л еси́ от дея́ния в зре́ние духо́вне/ и, кра́ю жела́ний предстоя́, пое́ши:/ лю́дие, превозноси́те Го́спода во вся ве́ки.

Стра́нна, тобою́ соверше́нная, преподо́бне,/ от за́пада бо устремля́ешися к восто́ку, подвиза́яся те́плейше в Вифлее́ме,/ иде́же двум оби́телем вождь быва́еши/ и по кончи́не сказу́еши Небе́сная.

Богоро́дичен: Свет пе́рвый ро́ждшая, А́нгелы, вторы́я све́ты, составле́й/ и свет первонача́льный и свети́ла два произведы́й,/ ко всем же ду́шу, я́ко свет, вдохну́вый,/ просвети́ ума́ моего́ мрак, Богоро́дице.

Песнь 9

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть пространне́йшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Весели́тся А́нгелов Боже́ственный лик, прие́м тя, всеизя́щне:/ а́нгельски бо ты пожи́л еси́ на земли́, блаже́нне,/ свяще́нных учи́телей добро́то и по́стников похвало́.

Прославля́ется па́мять твоя́ благоче́стно на земли́,/ и ны́не обита́еши со Августи́ном на Небеси́,/ о нас моля́ся и о соиме́нных тебе́,/ почита́ющих тя, Богоно́се, и о́браз твой лобыза́ющих.

Я́ко у́тро, возсия́л еси́ и, я́ко со́лнце, заше́л еси́ к Небе́сным,/ иде́же возжеле́л еси́ бы́ти, оста́вив писа́ния твоя́, чу́дне, я́ко сокро́вище,/ от ни́хже источа́ются благода́ть и весе́лие Небе́сное.

Богоро́дичен: Сохрани́в Тя Де́ву,/ от Твои́х возсия́вшее ложе́сн Невече́рнее Со́лнце/ ве́рнаго служи́теля Своего́/ прича́стника Своего́ све́та и ра́дости неизрече́нныя сотвори́,/ с ни́мже моли́ся уще́дрити Тя велича́ющия.

Свети́лен:

Плоть покори́в ду́ху,/ подвиза́лся еси́ во пло́ти, а́ки безпло́тен,/ те́мже и вы́шший быв,/ сподо́бился еси́, Иерони́ме, хвали́ти всех Влады́ку со А́нгелы.

Сла́ва: Труда́ми твои́ми и по́ты Вифлее́м умасти́вся, вопие́т ти, Богоно́сному:/ о Иерони́ме Богому́дре,/ ты моя́ похвала́ и мона́шествующих удобре́ние.

И ны́не, Богоро́дичен:

Сла́дость А́нгелов, скорбя́щих ра́дость,/ христиа́н Предста́тельница, Де́во Ма́ти Госпо́дня,/ заступи́ нас и изба́ви ве́чных мук моли́твами Твои́ми.

На хвали́тех стихи́ры, глас 8.

Подо́бен: О, пресла́внаго чудесе́:

О́тче му́дре Иерони́ме!/ Очи́стив ум, пло́ти вне был еси́/ и прему́дрость к себе́ привле́кл еси́,/ е́юже позна́л еси́ прему́дрости Ве́дца и Пода́теля,/ Христа́ Бо́га на́шего./ О, Богому́дрых твои́х подвиго́в,/ и́миже возвели́чил еси́, я́же Бо́жия,/ и посрами́л еси́, я́же вра́жия.

О́тче му́дре Иерони́ме!/ Пятиязы́чныя му́дрости разуме́нием/ и Боже́ственным поще́нием твои́м/ вели́к яви́лся еси́ побо́рник/ святы́я Правосла́вныя ве́ры,/ сего́ ра́ди и ра́дуется воспита́вый тя град святы́й,/ в не́мже просла́вил еси́ словесы́ и де́лы твои́ми/ укре́пльшаго тя Спа́са и Го́спода.

О́тче му́дре Иерони́ме!/ Наста́вниче ве́рных,/ Августи́на и́скренний дру́же/ и Григо́рия послу́шателю усе́рднейший,/ писа́ния твоя́ изблиста́ют/ лучи́ Богому́драго учи́тельства,/ ему́же поуча́ющеся,/ благоче́стно восхваля́ем тя.

О́тче му́дре Иерони́ме!/ Ле́та мно́га на земли́ подвиза́вся,/ восте́кл еси́ к Небе́сному гра́ду Бо́жию,/ о не́мже возвести́л еси́/ во сне дру́гу твоему́,/ но моли́ся сподо́битися/ и нам бы́ти та́мо,/ чту́щим честну́ю па́мять твою́.

Сла́ва, глас то́йже:

Прииди́те, благоче́стия пропове́дника,/ Богому́драго вси Иерони́ма пе́сньми восхва́лим,/ сей бо вне́шней прему́дрости предобучи́вся,/ и богоуго́дными по́двиги предочище́н,/ орга́н бысть Свята́го Ду́ха/ и Пребоже́ственныя Тро́ицы жили́ще,/ того́ у́бо моли́твенника предлага́ем/ Тебе́, Триипоста́сному Бо́гу,/ дарова́ти нам ве́лию ми́лость.

И ны́не, Богоро́дичен: Безневе́стная Де́во:

НА ЛИТУРГИ́И

Слу́жба вся преподо́бническая.