Служба преподобнаго Иакова, игумена Железноборовскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 8.
Подо́бен: Му́ченицы Твои́, Го́споди:
Преподо́бне о́тче Иа́кове,/ разгоре́ся се́рдце твое́ Ду́хом Бо́жиим,/ любве́ бо ра́ди Христо́вы/ возлюби́л еси́ чин и́ноческий/ и вся земна́я возненави́дел еси́,/ кроме́ славосло́вия Бо́жия и церко́внаго украше́ния,/ те́мже воспали́ любы́ Бо́жия ду́шу твою́,/ е́же ты всегда́ зре́ти лице́ Бо́жие./ Ему́же вы́ну предстоя́, преподо́бне,/ моли́ся о душа́х на́ших.
Преподо́бне о́тче Иа́кове,/ посто́м и моли́твами Бо́гу угоди́л еси́/ и ми́лостынями Ми́лостиваго Бо́га умили́л еси́,/ сего́ ра́ди Ца́рствие Небе́сное насле́довал еси́,/ лука́выя же ду́хи низве́ргл еси́ посо́бием Бо́жиим/ и тьмы кня́зя посрами́л еси́./ Моли́ся у́бо Христу́ Бо́гу/ дарова́ти нам ве́лию ми́лость.
Преподо́бне о́тче Иа́кове,/ люби́телю пусты́ни, смире́ния рачи́телю,/ це́рквам строи́телю, наста́вниче и́ноком,/ и́же вождь до́брый всем лю́дем/ на пути́ ко спасе́нию был еси́/ и яви́лся еси́ стори́цею прине́сший плод доброде́тели./ Моли́ Христа́ Бо́га/ дарова́ти нам ве́лию ми́лость.
Святи́телю Ио́не Всеросси́йскому/ собесе́дник был еси́, преподо́бне,/ и от него́ наставля́емь и учи́м Сло́ву Бо́жию,/ сего́ ра́ди моли́ ку́пно с ним Го́спода,/ да пода́ст правосла́вным лю́дем/ на сопроти́вныя свы́ше побе́ду и одоле́ние/ и на вся враги́ устраше́ние,/ и умири́т мир ми́лостию Свое́ю,/ и пода́ст нам вся блага́я Своя́,/ моли́тв ра́ди святы́х ва́ших.
Сла́ва, глас 6:
Преподо́бне о́тче и свя́те Иа́кове,/ на земли́ преходя́щее вре́мя прежи́л еси́,/ посто́м и моли́твами Бо́гу угожда́я,/ сего́ ра́ди ны́не на Небеси́ лику́еши/ и со А́нгелы пребыва́еши,/ дерзнове́ние име́я ко Христу́ Бо́гу,/ мир испроси́ душа́м на́шим.
И ны́не, пра́здника.
На стихо́вне стихи́ры, глас 5.
Подо́бен: Ра́дуйся:
Ра́дуйся, преподо́бне о́тче Иа́кове,/ устро́ивый в пусты́ни оби́тель/ и именова́вый ю во имя Спа́сова Предте́чи Иоа́нна,/ иде́же положены́ бы́ша святы́я мо́щи твоя́,/ на ни́хже почива́яй Дух Святы́й/ то́чит цельбы́ мно́ги/ приходя́щим челове́ком с ве́рою,/ вся́кими неду́ги стра́ждущим,/ и́же исцеле́ние прие́млют/ святы́х ра́ди моли́тв твои́х.
Стих: Честна́ пред Го́сподем/ сме́рть преподо́бных Его́.
Ра́дуйся, преподо́бне о́тче Иа́кове,/ собра́вый в пусты́ню и́нок мно́жество/ и, с ни́ми всено́щным стоя́нием Бо́га моля́,/ воздержа́нием поста́ ду́шу удобри́л еси,/ и чи́сту Бо́гу предста́вил еси́ ю,/ и прия́л еси́ дар мздовоздая́ния–/ Небе́сный вене́ц на главе́ свое́й со ученики́ свои́ми,/ и́же после́доваша житию́ твоему́ свято́му;/ и ны́не моли́ся Го́сподеви о созда́нней тобо́ю оби́тели,/ и о христиа́нех всех, призыва́ющих и́мя твое́ свято́е,/ е́же спасти́ся душа́м на́шим.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ра́дуйся, о́тче Иа́кове преподо́бне,/ я́ко утоли́л еси́ пло́ти возста́ния/ мно́гим терпе́нием и до́лгим алка́нием,/ от чресл бо ма́терних соблюда́емый Бо́гом,/ имел еси́ бде́ние неусы́пное;/ того́ ра́ди отве́рзеся тебе́, о́тче, Ца́рство Небе́сное,/ и Боже́ственнаго Ду́ха благода́ть/ всели́ся в се́рдце твое́м,/ и сла́вна тя показа́ Госпо́дь во мно́зех стране́х./ Моли́ся у́бо, преподо́бне,/ о творя́щих честну́ю па́мять твою́,/ яко да получи́м от Го́спода благода́ть/ и душа́м на́шим мир и ве́лию ми́лость.
Сла́ва, глас 6:
Е́же по о́бразу Бо́жию соблю́д невреди́мо,/ ум влады́ку на стра́сти па́губныя по́стнически поста́вив,/ и во е́же по подо́бию, я́коже мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху,/ те́мже и и́ноком яви́лся еси руководи́тель,/ благотеку́щим утеше́ние,/ пра́вило доброде́телей изве́стнейшее./ И ны́не на Небесе́х зре́ти Святу́ю Тро́ицу сподо́бивыйся,/ о́тче наш Иа́кове,/ моли́ся непреста́нно о нас,/ ве́рою и любо́вию чту́щих тя.
Тропа́рь зри на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры. Глас 1.
Подо́бен: Небе́сных чино́в:
О́тче Иа́кове преподо́бне,/ твоя́ пресве́тлая па́мять/ свяще́нная собра́ния весели́т до́бре,/ твое́ же житие́, чуде́с оби́льное,/ я́ко заря́ сия́ет све́тлая,/ и ны́не мо́лим тя:/ Христо́ви моли́ся/ дарова́ти душа́м на́шим/ мир и ве́лию ми́лость.
О́тче святы́й Иа́кове,/ вре́менных и плотски́х мудрова́ний чужда́яся,/ духо́вная и пребыва́ющая возлюби́л еси́,/ сме́ртную же па́мять в се́рдцы стяжа́л еси́,/ и ны́не Христу́ моли́ся/ дарова́ти душа́м на́шим/ мир и ве́лию ми́лость.
О́тче Иа́кове преподо́бне,/ до́блестей испо́лненный,/ на Небеса́ восте́кл еси́/ и побе́дныя по́чести прия́л еси́/ от Христа́ Бо́га на́шего,/ те́ло же твое́, положено́ во гро́бе, о́тче,/ оста́вил еси́ источа́ти нам исцеле́ние,/ и ны́не Христо́ви моли́ся/ дарова́ти душа́м на́шим/ мир и ве́лию ми́лость.
Сла́ва, глас 6:
Днесь созыва́ет нас преподо́бнаго све́тлое торжество́./ Прииди́те у́бо, празднолю́бцы,/ да пра́зднуим па́мять его́, глаго́люще:/ ра́дуйся, Иа́кове, свети́льниче све́тлый,/ приводя́й ко Христу́ и́ноков мно́жество./ Ра́дуйся, по́стником похвало́ и удобре́ние,/ и всем ве́рным благоути́шное приста́нище,/ и от неду́г избавле́ние./ Ра́дуйся, Небе́сных чино́в восприя́тия сподо́бивыйся,/ с ни́миже ны́не ра́дуешися во сла́ве,/ предстоя́ Христу́ Бо́гу,/ Его́же моли́ изба́вити нас ви́димых и неви́димых враг/ и спасти́ ду́ши на́ша.
И ны́не, пра́здника.
Вход. Проки́мен дне и чте́ния три преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (гла́вы 5, 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, суди́и конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шник преста́влен бы́сть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры самогла́сны.
Глас 5:
Преподо́бне о́тче,/ не дал еси́ сна твои́ма очи́ма,/ ни ве́ждома твои́ма дрема́ния,/ до́ндеже ду́шу и те́ло от страсте́й свободи́л еси́,/ те́мже и Христо́с, прише́д со Отце́м,/ оби́тель у тебе́ сотвори́./ И от Того́ благода́ть прии́м, преподо́бне Иа́кове,/ моли́ Единосу́щную Тро́ицу/ спасти́ся душа́м на́шим.
Богому́дре о́тче Иа́кове,/ по́стником был еси́ похвала́ и утвержде́ние,/ мир отню́д возненави́дев от ю́ности,/ Бо́га возлюби́л еси́,/ и те́сным путе́м ше́ствовал еси́,/ и и́ноческое житие́ возлюби́л еси́./ Пресве́тлый свети́льниче и ве́рным всем те́плый засту́пниче,/ моли́ся Го́сподеви/ спасти́ся душа́м на́шим.
Богому́дре о́тче,/ ду́шу с те́лом очи́стив,/ Свято́му Ду́ху себе́ оби́тель яви́,/ те́мже сла́вна тя Госпо́дь, Иа́кове, соде́ла,/ в чудесе́х же вели́каго свети́льника,/ просвети́вша во мра́це су́щая,/ я́ко наста́вника и́ноком, соше́дшеся,/ велегла́сно ублажа́ем.
Преподо́бне о́тче Иа́кове,/ от Го́спода просвеще́ние прии́м/ и душетле́нныя стра́сти победи́в,/ в до́брых по́двизех подвиза́лся еси́ на неви́димаго врага́,/ и, того́ ко́зней, блаже́нне, избежа́в, всели́лся еси́ в преми́рная селе́ния,/ и та́мо с ли́ки пра́ведных сочета́лся еси́;/ с ни́миже дерзнове́ние име́я ко Го́споду,/ мир испроси́ душа́м на́шим/ и ве́лию ми́лость.
Сла́ва, глас 6:
Преподо́бне о́тче,/ ми́ра красоты́ и сла́сти вре́менныя отню́д возненави́дев,/ и́ноческое житие́ па́че возлюби́л еси́/ и А́нгелом собесе́дник бы́ти сподо́бился еси́/ и, я́ко свети́льник многосве́тлый Ру́сския земли́,/ чудеса́ми свои́ми сия́еши,/ те́мже усе́рдно мо́лимся тебе́:/ помина́й всех нас, соверша́ющих свяще́нную па́мять твою́,/ мы бо ча́да твоя́/ и о́вцы слове́сныя твои́х уче́ний/ и тя на по́мощь призыва́ем,/ прося́ще тобо́ю прия́ти/ мир и ве́лию ми́лость.
И ны́не, пра́здника.
На стихо́вне стихи́ры, глас 4.
Подо́бен: Дал еси́ зна́мение:
Житие́ нескве́рно,/ терпе́ние, и кро́тость, и любо́вь нелицеме́рну,/ и воздержа́ние приме́рно,/ всено́щное стоя́ние/ и умиле́ние Боже́ственное,/ ве́ру, и наде́жду, и ми́лование, о́тче, стяжа́л еси́/ и, а́ки А́нгел, пожи́л еси́ с пло́тию на земли́,/ блаже́нне Иа́кове,/ моли́твенниче о душа́х на́ших.
Стих: Честна́ пред Го́сподем/ смерть преподо́бных Его́.
Земны́й А́нгел и Небе́сный челове́к был еси́, преподо́бне,/ учи́тель умиле́ния, ми́лования струя́,/ чуде́с мно́жество, гре́шником засту́пниче,/ ма́слина вои́стинну плодови́та Бо́жия,/ еле́ем трудо́в умаща́я сердца́ всех ве́рных,/ восхваля́ющих па́мять твою́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ум твой просвеща́я Боже́ственными словесы́/ и теле́сных страсте́й удаля́яся,/ о́браз земны́м себе́ яви́л еси́,/ укра́шен же быв Боже́ственными доброде́тели,/ и, руководи́мый Всесвята́го Ду́ха де́йством,/ Бо́гови уго́ден был еси́,/ о́тче наш Иа́кове,/ и́ноком украше́ние.
Слава, глас 6:
Преподо́бне о́тче,/ во мно́гия страны́ изы́де веща́ние твои́х наставле́ний,/ и́миже на Небесе́х обре́л еси́ мзду трудо́в твои́х,/ бесо́вския полки́ победи́л еси́/ и А́нгельским чино́м причте́н был еси́,/ и́хже житию́ поревнова́л еси́,/ дерзнове́ние имы́й ко Го́споду,/ мир испроси́ душа́м на́шим и ве́лию ми́лость.
И ны́не, пра́здника.
Тропа́рь, глас 4:
Небе́снаго жела́я,/ земна́я возненави́дел еси́/ и, взем крест свой, после́довал еси́ Христу́/ и от Него́ прие́м дарова́ния чуде́с,/ исцеля́ти неду́жныя;/ но, я́ко име́я дерзнове́ние ко Святе́й Тро́ице,/ испроси́ правосла́вным христиа́ном здра́вие и спасе́ние,/ на враги́ же побе́ду/ и не забу́ди, посеща́я чад свои́х,/ припа́дающих к цельбоно́сному гро́бу твоему́,/ Иа́кове, преподо́бне о́тче наш.
НА У́ТРЕНИ
По 1-м стихосло́вии седа́лен, глас 1.
Подо́бен: Лик а́нгельский:
Житие́ земно́е благоче́стно преше́л еси́/ и к ве́чным оби́телем преста́вился еси́,/ честно́е же те́ло твое́ во гро́бе сокрове́нно и в созда́нней оби́тели твое́й положено́ бысть,/ и яви́ е Госпо́дь нетле́нно и по преставле́нии твое́м всем явле́но,/ те́мже моли́ Христа́ Бо́га о пра́зднующих всечестну́ю па́мять твою́,/ Иа́кове Богому́дре, о́тче наш.
Сла́ва, и ны́не, Богоро́дичен:
Ра́дуйся, Пречи́стая, душа́м снабде́ние,/ обурева́емым приста́нище невла́емое11,/ согреша́ющим исправле́ние изве́стное./ Ра́дуйся, утеше́ние ско́рбным душа́м и Помо́щнице непобеди́мая./ Ра́дуйся, преми́рная ко Го́споду Хода́таица о всех христиа́нех.
По 2-м стихосло́вии седа́лен, глас 5:
Пусты́ннаго жи́теля почти́м,/ вся прило́ги страсте́й плотски́х попра́вшаго тве́рдым воздержа́нием,/ и притеце́м к честно́му гро́бу его́, иде́же лежа́т честны́я и многоцеле́бныя мо́щи его́, и глаго́лем:/ о преблаже́нне Иа́кове, моли́ся Го́сподеви со Предте́чею Христо́вым Иоа́нном/ поми́ловатися душа́м на́шим.
Сла́ва, и ны́не, Богоро́дичен:
Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́/ и носи́ла еси́ на Пречи́стую руку́ воплоти́вшееся Сло́во, непрело́жно и неизме́нно,/ те́мже со А́нгелом Тебе́ вопие́м:/ ра́дуйся, Благода́тная, Госпо́дь с Тобо́ю.
По полиеле́и седа́лен, глас 8:
Егда́ Боже́ственная любо́вь воспали́ ду́шу твою́, свя́те,/ тогда́ вся сро́дники своя́ оста́ви, и плотски́я стра́сти укроти́,/ и, и́ночество восприя́в, в пусты́ню вни́де,/ и вся страши́лища бесо́вская претерпе́ Бо́жиим хране́нием,/ иде́же, я́ко кедр, умно́жися и проро́чествия дар прии́м,/ те́мже неотъе́млемо бога́тство на Небеси́ дарова́ тебе́ Бог, Иа́кове преподо́бне,/ моли́ Христа́ Бо́га согреше́нием оставле́ние пода́ти/ любо́вию чту́щим святу́ю па́мять твою́.
Сла́ва, и ны́не, Богоро́дичен:
Вопло́щшееся Сло́во от утро́бы Твоея́ ро́ждши, Пречи́стая,/ мене́, растле́ннаго грехи́, от прило́г вра́жиих сохрани́, Ма́ти Бо́жия,/ и се́рдце мое́ очи́сти, Богоблагода́тная, Ма́терними Твои́ми моли́твами,/ да и аз благода́рно воззову́ Ти:/ Мари́е Богоро́дице, моли́ Сы́на Твоего́ и Бо́га на́шего/ поми́ловати ста́до Твое́, е́же стяжа́, Всенепоро́чная.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Пресла́внаго строи́теля,/ и до́му Предте́чева украси́теля,/ и первоугоди́вшим Бо́гу отце́м ревни́теля,/ по́стником похвалу́, и немощны́м цели́теля,/ и бесо́м прогони́теля, Иа́кова почти́м,/ процвете́ у́бо, я́ко крин,/ и умно́жи ста́до Христо́во слове́сных ове́ц,/ сохраня́я их моли́твами свои́ми в преподо́бии и пра́вде.
Кано́н преподо́бному, глас 8.
Песнь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е море,/ я́ко Еди́н сла́вно просла́вися.
Я́ко Безпло́тен, блаже́нне Иа́кове, на земли́ поживе́/ и ны́не с ли́ки преподо́бных сочета́лся еси́,/ с ни́миже ра́дуяся, нас, чту́щих тя, помина́й, приснопа́мятне.
Греха́ми мно́гими помраче́нное мое́ се́рдце просвети́, блаже́нне Иа́кове,/ те́плыми моли́твами твои́ми.
Умо́м очище́нным Бо́гови порабо́тился еси́,/ целому́дрием теле́сным и чистото́ю/ ду́шу и те́ло свое́ просвети́л еси́, блаже́нне Иа́кове.
Богоро́дичен: Прему́дрость и Сло́во О́тчее несказа́нно ро́ждшая,/ души́ моея́ лю́тую исцели́ я́зву/ и серде́чную укроти́ боле́знь.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Ду́хом разжже́н быв, Иа́кове о́тче, труды́ подъя́л еси́,/ возвы́сився смире́нием, горды́ню бесо́вскую смири́л еси́, преподо́бне,/ сла́ва и́ноком и утвержде́ние.
По у́зкому пути́ ходи́л еси́ в житии́ свое́м,/ простра́ннаго пути́ удаля́яся, о́тче,/ неви́димаго зми́я посрами́л еси́, смире́нием огражда́яся.
Моле́бный глас мой услы́ши, о́тче Иа́кове преблаже́нне,/ не забу́ди раба́ твоего́,/ воспева́ющаго честны́я твоя́ по́двиги.
Богоро́дичен: Уста́ви неуста́вное се́рдце мое́, Чи́стая Ма́ти Бо́жия,/ Сы́ну Твоему́ моля́щися при́сно о рабе́ Твое́м.
Седа́лен, глас 8:
Ра́зума тве́рдостию украша́яся, плотски́я тя́гости отве́рг,/ зми́еву горды́ню попра́л еси́/ и, оби́тель быв избра́нная Свято́му Ду́ху,/ неукло́нным ра́зумом порабо́тился еси́ Христу́, всеблаже́нне Иа́кове./ Того́ моли́ грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко еди́ну в жена́х Де́ву Тя обре́тше, без се́мени ро́ждшую Бо́га пло́тию,/ вся блажи́м Тя, ро́ди челове́честии:/ Сло́во бо всели́ся в Тя Боже́ственное,/ Его́же, я́ко Младе́нца, пита́ла еси́, Зижди́теля и Го́спода;/ те́мже А́нгельский собо́р и челове́ческий род досто́йно сла́вим пречи́стое рождество́ Твое́,/ и мы вси согла́сно вопие́м Ти:/ моли́ Христа́ Бо́га согреше́нием на́шим оставле́ние дарова́ти восхваля́ющим Тя.
Песнь 4
Ирмо́с: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́/ ве́рно пою́щим:/ сла́ва си́ле Твое́й, Го́споди.
Ходи́л еси́ в путя́х пра́вых,/ и, та́ко неукло́нно ше́ствуя, дости́гл еси́, блаже́нне, широты́ ра́йския,/ и А́нгельским лико́м сочета́лся еси́.
В пусты́ню жела́нием, преподо́бне, всели́вся,/ подвиза́лся еси́ кре́пкими по́двиги, поще́нием/ и моли́твами день и нощь ко Го́споду,/ научи́ ны вопи́ти:/ сла́ва си́ле Твое́й, Го́споди.
Храм Бо́гови боголе́пен воздви́гл еси́/ и той во и́мя рождества́ Предте́чи именова́л еси́,/ в не́мже сла́вится при́сно честно́е и́мя твое́, Иа́кове преподо́бне.
Богоро́дичен: Ра́дуйся, Влады́чице Де́во,/ це́рквам еси́ красота́ и ве́рным похвала́ и держа́ва,/ непреста́нно моли́ся, Богоро́дице, Сы́ну Своему́/ сохрани́ти правосла́вныя лю́ди от вся́каго зла́го обстоя́ния.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Просвеща́я ум свой Боже́ственными словесы́,/ теле́сных страсте́й устрани́лся еси́/ и, превы́ше быв земны́х,/ соблю́л еси́ о́браз в себе́ Боже́ственный не омраче́н.
Не забу́ди, блаже́нне Иа́кове, посеща́ти чад твои́х,/ соверша́ющих свяще́нную па́мять твою́,/ я́ко да твои́ми моли́твами изба́вимся вся́кия ну́жды и печа́ли.
Нощь грехо́вная покры́ла мя есть,/ но озари́ мя покая́нием, преподо́бне,/ да омы́ю скве́рну грехо́вную окая́нныя моея́ души́.
Богоро́дичен: Всесве́тлым озарена́ еси́ све́том, Богора́дованная Ма́ти:/ Ты бо честне́йши родила́ еси́ Христа́ всех Бо́га,/ Его́же моли́, да изба́вит ны от вся́ких напа́стей.
Песнь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Ма́слина вои́стинну Бо́жия плодови́та быв труды́ твои́ми,/ моли́ся, Иа́кове преподо́бне,/ за ве́рно на по́мощь призыва́ющих тя.
Земны́й А́нгел и Небе́сный челове́к был еси́, преподо́бне,/ и учи́тель умиле́ния, ми́лования струя́, и исто́чник чудесе́м.
Сле́зными пото́ки и тру́дными по́ты у́глия сла́дости грехо́вныя погаси́л еси́./ Те́мже в чудесе́х сла́вна тя показа́ Госпо́дь, Иа́кове блаже́нне,/ и украси́ вы́шними дарова́нии.
Богоро́дичен: Умертви́ся смерть Тобо́ю/ и а́дово жа́ло притупи́ся, Ма́ти Чи́стая:/ Ты бо Безсме́ртнаго Влады́ку Христа́ пло́тию ми́рови родила́ еси́.
Конда́к, глас 8.
Подо́бен: Взбра́нной:
Серде́чная о́чи, досточу́дне, ко Го́споду впери́в/ и теле́сныя стра́сти из ко́рене исторга́я,/ неболе́зненную жизнь в боле́знех восприя́л еси́, преподо́бне,/ боле́знем же лю́тым дае́ши исцеле́ние прося́щим с ве́рою у тебе́,/ те́мже мо́лим тя, досточу́дне,/ исцели́ на́ша боле́зни душе́вныя и теле́сныя, да зове́м ти:/ ра́дуйся, Иа́кове Богому́дре, о́тче наш.
И́кос:
Покая́ния две́ри отве́рзи ми, всеблаже́нне,/ да омы́ю скве́рну окая́нныя моея́ души́/ и те́ла моего́ вся чу́вства очи́сти, да зову́ ти благода́рственная:/ ра́дуйся, по́стником вои́стинну преди́вное удобре́ние;/ ра́дуйся, исто́чниче пресла́дкий, напая́ющий ве́рных сердца́ уче́ньми./ Ра́дуйся, нощь на́шего неразу́мия отгна́вый смиренному́дрием;/ ра́дуйся, прелюби́мая весно́, израсти́вшая нам нелицеме́рную любо́вь./ Ра́дуйся, прекра́сный кри́не, любвеоби́льным взо́ром ко Господу влеки́й;/ ра́дуйся, чудесы́ свои́ми мно́гих удивля́яй./ Ра́дуйся, возжеле́нная соверши́вый;/ ра́дуйся, ве́рным по Бо́зе кре́пкая наде́ждо./ Ра́дуйся, се́рдцем свои́м прилепля́яйся ко Христу́ день и нощь;/ ра́дуйся, оби́тели своея́ храни́телю./ Ра́дуйся, па́стырю и нача́льниче слове́сных ове́ц./ Ра́дуйся, Иа́кове Богому́дре о́тче наш.
Песнь 7
Ирмо́с: А́нгелом о́троки из огня́ спасы́й/ и гремя́щую пещь преложи́вый на ро́су,/ благослове́н еси́, Бо́же оте́ц на́ших.
А́нгельским житие́м, блаже́нне Иа́кове, пожи́л еси́,/ труды́ подвиго́в твои́х умно́жил еси́/ и процве́л еси́, я́ко фи́никс, воспева́я:/ благослове́н еси́, Го́споди, Бо́же оте́ц на́ших.
Восхваля́я тя, о́тче Иа́кове преподо́бне, взыва́ем ти:/ моли́ Христа́ Бо́га лука́вства диа́воля изба́вити нас, воспева́ющих:/ благослове́н еси́, Го́споди, Бо́же оте́ц на́ших.
В путе́х жития́ заблу́ждшаго и зимо́ю грехо́вною олядене́вшаго,/ согре́й мя, Иа́кове преподо́бне, и научи́ вопи́ти:/ благослове́н еси́, Бо́же оте́ц на́ших.
Богоро́дичен: Прия́ла еси́ вои́стинну Боже́ственное Сло́во во чре́во Свое́/ и Сие́ па́че естества́, Пречи́стая, родила́ еси́./ Его́же моли́ изба́вити от бед раб Твои́х, вопию́щих:/ благослове́н Бог оте́ц на́ших.
Песнь 8
Ирмо́с: От Отца́ пре́жде век Рожде́ннаго/ и от Ма́тере в после́дняя Воплоще́ннаго,/ свяще́нницы, благослови́те,/ лю́дие, превозноси́те во вся ве́ки.
И́нок и́стинен был еси́,/ простра́ннаго пути́ удаля́яся, широты́ ра́йския дости́гл еси́/ и та́мо дре́ву живо́тному причаща́ешися во ве́ки.
Дом духо́вный доброде́тели был еси́,/ и правоты́ пра́вило испра́вил еси́, Иа́кове пречу́дне,/ и бу́дущих благ сподо́бился,/ дре́ву живо́тному причаща́ешися во ве́ки.
Лико́м преподо́бных сочета́лся еси́,/ и по́стническим житие́м украси́лся еси́, Иа́кове преподо́бне,/ и ны́не в ра́йских оби́телех дре́ву живо́тному причаща́ешися во ве́ки.
Богоро́дичен: В ле́тех бы́вша, от Отца́ же безле́тно возсия́вшаго,/ Богома́ти, нам родила́ еси́./ Его́же моли́ спасти́ пою́щия Тя во ве́ки.
Песнь 9
Ирмо́с: Чи́стую сла́вно почти́м, лю́дие, Богоро́дицу,/ огнь Божества́ прии́мшую во чре́ве неопа́льно,/ пе́сньми велича́ем.
Чи́стое и кра́сное храни́лище доброде́телей был еси́, Иа́кове блаже́нне,/ те́мже тя непреста́нно велича́ем.
От се́рдца боле́знь, от о́чию сле́зы,/ от души́ покая́ние приими́, преподо́бне,/ и ко Го́споду те́пле принеси́,/ я́ко да непреста́нно тя велича́ем.
Всече́стне о́тче Иа́кове,/ сохрани́ певца́ своего́ неви́димою си́лою от находя́щих бед и скорбе́й,/ изба́ви же и всех, почита́ющих свяще́нную па́мять твою́,/ и наста́ви на путь покая́ния,/ я́ко да получи́м у Го́спода ве́лию ми́лость/ и тя непреста́нно велича́ем.
Богоро́дичен: А́нгели и Арха́нгели, проро́цы и апо́столи/ и весь лик преподо́бных с блаже́нным Иа́ковом/ ко Христу́ приле́жно и с Пречи́стою Его Ма́терию, за весь мир моли́теся,/ да вас при́сно велича́ем.
Свети́лен.
Подо́бен: Жены́, услы́шите:
Дух Святы́й тя, преподо́бне Иа́кове, оби́тель Себе́ сотвори́,/ и, на тебе́ почива́яй, насле́дника тя Ца́рствию учини́ Небе́сному/ и ли́ку преподо́бническому причте́,/ и по успе́нии твое́м сла́вна тя показа́, преподо́бне,/ моли́ся о спасе́нии душ на́ших.
Сла́ва, и ны́не, Богоро́дичен:
Еди́н Чи́стый, Еди́н Госпо́дь, Тя еди́ну избра́,/ честне́йшу всея́ тва́ри, Пренепоро́чная,/ от чи́стых крове́й Твои́х воплоти́тися.
На хвали́тех стихи́ры, глас 4.
Подо́бен: Зва́нный свы́ше:
От вели́каго святи́теля Ио́ны благослове́ние восприя́,/ и того́ уче́ние положи́ в се́рдце свое́м,/ и нра́ву того́ после́довал еси́,/ поще́нием и ну́ждами утверди́ вся/ и духо́вныя ра́дости испо́лнився./ Прия́телище был еси́ Пресвято́му Ду́ху,/ и уче́нии свои́ми всех учени́к свои́х научи́л еси́/ ходи́ти по и́стинному спаси́тельному пути́,/ и, на высоту́ доброде́телей возводя́/ и Христа́ непреста́нно славосло́вя,/ слез твои́х проли́тием/ огнь грехо́вный угаси́л еси́/ и Бо́гу угоди́л еси́,/ те́мже мо́лим тя:/ помина́й нас, о́тче Иа́кове,/ чту́щих па́мять твою́,/ и моли́ спасти́ся душа́м на́шим.
Пре́жде бы́вшая пусты́ня,/ ны́не же нарече́ся Предте́чева оби́тель,/ строе́ние по́тов и трудо́в твои́х,/ в не́йже многоле́тне потруди́вся честны́ма твои́ма рука́ма,/ пресла́вне Иа́кове,/ оте́честву пресве́тлый свети́льниче,/ у́зкий путь преше́л еси́/ и широты́ ра́йския дости́гл еси́,/ те́мже вси ве́си и гра́дове Росси́йстии ублажа́ют тя,/ со дерзнове́нием зову́ще:/ име́ем тя, о́тче Иа́кове, те́плаго к Бо́гу моли́твенника,/ псалмы́ тя воспева́ем/ и притека́юще к честны́м моще́м твои́м,/ исцеле́ния да́ры прие́млем,/ и ны́не Христу́ моли́ся/ спасти́ся душа́м на́шим.
Пречестна́я оби́тель,/ строе́ние трудо́в твои́х,/ име́ет в себе́ ча́да мно́га,/ па́че же всего́ сокро́вище неоскудева́емое,/ честны́я и многоцеле́бныя мо́щи твоя́,/ преподо́бне Иа́кове,/ от ни́хже с ве́рою приходя́щии челове́цы прие́млют исцеле́ния./ Те́мже вси зове́м тебе́, я́ко предста́телю:/ преподо́бне о́тче наш,/ бу́ди те́плый моли́твенник ко Го́споду/ о душа́х на́ших.
Сла́ва, глас 2:
Преподо́бне о́тче Иа́кове,/ с ю́ных лет Бо́гом храни́м был еси́/ от вся́каго лука́вства и злонра́вия,/ Той бо, руководя́й тя, я́ко Авраа́ма, до исхо́да души́ твоея́,/ дарова́ тебе́ чудеса́ мно́гая в жи́зни сей,/ та́кожде и по преставле́нии/ просла́ви тя во мно́гия страны́,/ и сла́вна тя показа́ повсю́ду,/ и на Небесе́х с ли́ки преподо́бных причте́ тя,/ и ны́не све́тло неизрече́нным све́том сия́еши,/ Богому́дре Иа́кове.
И ны́не, пра́здника.
НА ЛИТУРГИ́И
Блаже́нны от кано́на пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник:
Моли́тва
О преподо́бне и Богому́дре о́тче наш Иа́кове! Ве́мы, я́ко с ли́ки А́нгельскими и все́ми святы́ми предстои́ши при́сно Престо́лу Го́спода Вседержи́теля и ве́лие и́маши к Нему́ дерзнове́ние моли́тися о всех, с ве́рою и умиле́нными слеза́ми в по́мощь тя призыва́ющих. Не премолчи́ у́бо, вопия́ за ны, недосто́йныя, ко Го́споду Бо́гу, да отврати́т гнев Свой, пра́ведно за беззако́ния на́ша на ны дви́жимый, и да изба́вимся вся́ких скорбе́й, бед же и напа́стей и злых обстоя́ний и благоче́стно поживе́м в ны́нешнем ве́це, ходя́ще в за́поведех и оправда́ниих Госпо́дних непоро́чно. О преблаже́нне и Боголюбе́зне о́тче наш Иа́кове! Умоли́ Го́спода, да не оскуде́ют в стране́ на́шей и́стинные ревни́тели и́ноческаго жития́ и подража́тели свято́му и Богоуго́дному житию́ твоему́; сохрани́ предста́тельством твои́м к Бо́гу страну́ на́шу от огня́, гла́да, меча́, наше́ствия иноплеме́нных и от вся́каго зла и всем, с ве́рою и любо́вию притека́ющим к тебе́ испроси́ у Го́спода Бо́га грехо́в проще́ние, телесе́м здра́вие, исправле́ние грехо́внаго жития́ и ве́чное спасе́ние, да с тобо́ю и все́ми святы́ми сподо́бимся прославля́ти в Тро́ице сла́вимаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.
