Служба преподобнаго Григория Чудотворца, в Ближних пещерах почивающаго
ВЕ́ЧЕР
Блаже́н муж: 1-й антифо́н. На Го́споди, воззва́х: стихи́ры на 6, глас 1.
Подо́бен: Прехва́льнии му́ченицы:
Отче Григо́рие,/ ты, огне́м любве́ к Бо́гу распаля́емь,/ востаю́щия на дух стра́сти попали́л еси́,/ отню́дуже, в немощне́й живы́й пло́ти,/ А́нгельстей жи́зни примеси́лся еси́,/ с ни́миже ны́не водворя́яся,/ моли́ся Христу́ Бо́гу/ дарова́ти душа́м на́шим мир и ве́лию ми́лость.
О́тче Григо́рие,/ ты, Дави́дским глаго́лом внима́я,/ не дал еси те́лу своему́ упокое́ния,/ ни ве́ждома дрема́ния,/ до́ндеже от страсте́й очи́стився/ и ле́ствицу Богови́дения прие́м,/ к чисте́йшему Све́ту возше́л еси́,/ иде́же ны́не живы́й,/ моли́ся дарова́ти душа́м на́шим мир и ве́лию ми́лость.
О́тче Григо́рие,/ твои́х чуде́с творе́ние протече́ всю Росси́йскую зе́млю,/ а́ки труба́ велегла́сна, вопию́щи/ и созыва́ющи празднолю́бныя лю́ди/ честну́ю твою́ па́мять восхвали́ти,/ с ни́миже и мы хвалу́ прино́сим/ и кла́няемся ра́це моще́й твои́х, моля́щеся/ тобо́ю улучи́ти мир и ве́лию ми́лость.
Сла́ва, глас 8:
Мона́хов мно́жества,/ святоле́пное твое́ житие́ чту́ще,/ удивля́емся и прославля́ем Просла́вльшаго тя Бо́га,/ я́ко дарова́ тебе́ мно́го чудотворе́ние,/ и́мже бе́сы от челове́к прогна́л еси/ и согреша́ющих во исправле́ние приводи́л еси́./ Его́же и нам, день честна́го успе́ния твоего́ почита́ющим,/ умоли́ дарова́ти ми́лость в День су́дный.
И ны́не, пра́здника, глас 4:
Трепета́ше рука́ Крести́телева,/ егда́ Пречи́стому Твоему́ верху́ косну́ся,/ возврати́ся Иорда́н река́ вспять,/ не дерза́я служи́ти Тебе́:/ я́же бо устыде́ся Иису́са Нави́на,/ ка́ко Творца́ своего́ устраши́тися не имя́ше?/ Но все испо́лнил еси смотре́ние, Спа́се наш,/ да спасе́ши мир явле́нием Твои́м,/Еди́не Человеколю́бче.
Вход. Проки́мен дне, и чте́ния три преподо́бническая.
Прему́дрости Соломо́новы чте́ние (гла́вы 5, 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На стихо́вне стихи́ры, глас 6.
Подо́бен: Тридне́вно:
Истле́вшее страстьми́ естество́ на́ше/ Влады́ка, сшед на во́ды, обновля́ет,/ и тебе́, свя́те, к водны́м струя́м прише́дша, обнови́ человеколю́бне,/ препосла́в в живо́т ве́чный.
Стих: Восхва́лятся преподо́бнии во сла́ве/ и возра́дуются на ло́жах свои́х.
Водо́ю и Ду́хом обнови́вшему челове́ческое естество́/ Христу́ поревнова́л еси, преподо́бне,/ те́мже и́стины ра́ди в воде́ потопле́н был еси,/ е́юже тече́ние соверши́в,/ ны́не ра́дуешися со Христо́м на воде́ поко́йне.
Стих: Возвесели́тся пра́ведник о Го́споде/ и упова́ет на Него́.
Наг стоя́й в струя́х Иорда́нских Влады́ка/ разреша́ет род челове́ческий от уз а́дских,/ и́же и тебе́, блаже́нне, водо́ю разреши́,/ внегда́ изведе́ из темни́цы плотски́я дух твой.
Сла́ва, глас 5:
Житие́ твое́, све́тлостию Боже́ственных доброде́телей украше́нно,/ облиста́ет Росси́йскую зе́млю,/ ра́ка же святы́х моще́й твои́х/ всем, с ве́рою приходя́щим,/ лучи́ чуде́с испуща́ет./ Даждь сия́ и нам в зна́мение любве́ твое́й,/ а́ще бо и отше́л еси́,/ но духо́вне при́сно призира́еши/ и, ви́дя всех те́плое проше́ние,/ подае́ши от Христа́ Бо́га/ благода́ть и ве́лию ми́лость моли́твами твои́ми.
И ны́не, пра́здника, глас 4:
Тебе́, в Ду́се и огни́ очища́юща грех ми́ра,/ зря Крести́тель гряду́ща к себе́,/ ужаса́яся и трепеща́, вопи́яше, глаго́ля:/ не сме́ю держа́ти верх Твой Пречи́стый,/ Ты мя освяти́, Влады́ко,/ Боже́ственным явле́нием Твои́м, Еди́не Человеколю́бче.
Тропа́рь, глас 3:
Вели́ких дарова́ний прие́мниче/ и вели́ких чуде́с си́лою Бо́жиею твори́телю,/ пречу́дне о́тче Григо́рие,/ я́ко ве́лие дерзнове́ние име́я ко Христу́ Бо́гу,/ непреста́нно о нас моли́ся Ему́,/ да грехо́в оставле́ние/ пода́ст душа́м на́шим.
Сла́ва, и ны́не, пра́здника.
НА У́ТРЕНИ
На Бог Госпо́дь: тропа́рь пра́здника два́жды. Сла́ва, свята́го. И ны́не, пра́здника.
По 1-м стихосло́вии седа́лен, глас 4.
Подо́бен: Ско́ро предвари́:
Блаже́нство боя́щихся Го́спода хотя́ насле́дити,/ де́лом за́поведи Бо́жия испо́лнил еси́,/ все свое́ име́ние, е́же име́л еси́, во сла́ву Божию расточи́л еси,/ а́ще и лука́вне тре́бующим, Богому́дре Григо́рие пребога́те./ Те́мже твоя́ па́мять и пра́вда пребыва́ет во ве́ки.
Сла́ва, и ны́не, пра́здника.
По 2-м стихосло́вии седа́лен, глас 3.
Подо́бен: Красоте́ де́вства:
Тебе́, Влады́ко Христе́, на Иорда́н прише́дшу,/ раб, и́же ве́рно Тебе́ преподо́бием и пра́вдою послужи́л,/ повеле́нием кня́зя уто́плен, к нестаре́ющейся жи́зни оты́де./ Его́же ско́раго моли́твенника к вели́честву Твоему́ иму́ще,/ Тебе́, Бо́га на́шего, в па́мяти его́ прославля́ем.
Сла́ва, и ны́не, пра́здника.
По полиеле́и седа́лен, глас 8.
Подо́бен: Прему́дрости:
Пра́ведных блаже́нства и со А́нгельскими чи́нми ликостоя́ния жела́я,/ вся, яже в ми́ре, презре́в,/ и о само́м животе́ неради́л еси,/ те́мже ни нося́щаго диади́му устыде́лся еси́,/ но оте́чески нака́зовал, к покая́нию того́ приводя́,/ от него́же непови́нне в воде́ уто́плен,/ к во́дами Одева́ющемуся отше́л еси́, псало́мски поя́:/ проидо́х скво́зе огнь и во́ду, и изве́л еси, Бо́же, в поко́й Твой./ Иде́же ны́не живы́й, моли́ не лиши́тися того́ и нам,/ любо́вию чту́щим святу́ю па́мять твою́, Григо́рие досточу́дне.
Сла́ва, и ны́не, пра́здника
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 24.
По 50-м псалме́ стихи́ра, глас 8:
Мона́хов мно́жества,/ святоле́пное твое́ житие́ чту́ще,/ удивля́емся и прославля́ем Просла́вльшаго тя Бо́га,/ я́ко дарова́ тебе́ мно́го чудотворе́ние,/ и́мже бе́сы от челове́к прогна́л еси/ и согреша́ющих во исправле́ние приводи́л еси́./ Его́же и нам, день честна́го успе́ния твоего́ почита́ющим,/ умоли́ дарова́ти ми́лость в День су́дный.
Кано́н пра́здника, со ирмосо́м на 6, и преподо́бному на 6, глас 2.
Песнь 1
Ирмо́с: Глубины́ откры́л есть дно/ и су́шею Своя́ влече́т,/ в ней покры́в проти́вныя,/ кре́пкий во бране́х Госпо́дь,/ я́ко просла́вися.
Све́том благода́ти Твое́й, Христе́, пра́ведники Своя́ просвети́вый/ и дея́ний их луча́ми ми́ра концы́ озари́вый,/ омраче́нный мой ум неве́дением просвети́,/ да чи́сте в па́мяти уго́дника Твоего́ воспою́ Ти песнь:/ я́ко просла́вися.
Огне́м любве́ воспали́л еси преподо́бнаго Твоего́ се́рдце,/ е́же во след Тебе́ тещи́,/ и, обрет, Его́же жела́ше, ны́не ра́достно пое́т:/ я́ко просла́вися.
Вели́ких оте́ц житию́ подража́ти хотя́,/ прише́л еси, Григо́рие, во оби́тель Бо́жия Ма́тере,/ иде́же А́нгельский о́браз на ся восприе́м,/ вообрази́л еси в себе́ доброде́тельныя ви́ды,/ и бысть твоя́ душа́ кра́сная неве́ста Безсме́ртному Жениху́,/ я́вльшемуся ны́не на Иорда́не.
Мно́гих ра́ди по́двигов и трудо́в, тобо́ю сотворе́нных,/ а́ще не число́м вре́мени исчита́емых,/ прия́л еси власть от Бо́га на бе́сы, преподо́бне, я́коже и вопия́ху:/ непристу́пен еси нам, Григо́рие,/ огражде́н моли́твою и ору́жием кре́стным.
Богоро́дичен: Моли́тв ра́ди уго́дника Твоего́,/ огради́ мя си́лою Твое́ю, Чи́стая Де́во,/ и непристу́пна враго́м покажи́, я́ко Непристу́пнаго Бо́га родила́ еси,/ И́же во челове́честем естестве́ мене́ ра́ди ны́не наг стои́т на Иорда́не.
Песнь 3
Ирмо́с: Кре́пость дая́й царе́м на́шим Госпо́дь/ и рог пома́занных Свои́х вознося́й/ от Де́вы ражда́ется, гряде́т же ко Креще́нию./ Тому́, ве́рнии, возопие́м:/ несть свят, я́ко Бог наш.
Кре́пость моли́твы твоея́ ви́дяще, ду́хове зло́бы поднебе́снии/ го́рце вопия́ху на тя/ и помышля́ху, ка́ко бы тебе́ па́кость сотвори́ти;/ ты же, о́тче, стра́ха их не убоя́лся еси,/ но ко Укрепля́ющему тя взыва́л еси:/ кре́пость моя́ – Госпо́дь есть мне во спасе́ние.
Тьмы нача́льницы и гее́нны сы́нове/ на тя, све́том Боже́ственным озаря́емаго, зубы́ скрежета́ху/ и разли́чныя нога́м твои́м препина́ху се́ти,/ во е́же бы поне́ ма́ло оскорби́ти тя, но не возмого́ша,/ непреста́нно бо взыва́л еси:/ несть свят, я́коже Бог наш.
Та́тским о́бразом напа́дающии на рабы́ Бо́жия лю́тии бе́сове/ наусти́ша злы́я челове́ки, во е́же окра́сти тя, блаже́нне,/ но что име́яху взя́ти в тебе́, ничто́же иму́ща,/ ра́зве книг, к похвале́нию Бо́жию храни́мых.
Тьмо́ю злодея́ния омраче́ннии та́тие,/ в нощи́ прише́дше к ке́ллии твое́й, свя́те,/ жда́ху, до́ндеже изы́деши ты на у́треннее пе́ние в це́рковь,/ да тогда́ твоя́ во́зьмут,/ и́хже ты прихо́д ощути́в, помоли́лся еси,/ и бы́ша сном отягоще́нни пять дней и пять ноще́й.
Богоро́дичен: Мрак души́ моея́, и́мже мя бе́сове омрача́ют, отжени́, Богоро́дице:/ родила́ бо еси Светода́вца,/ И́же вся́каго челове́ка, гряду́ща в мир, све́тлостию Лица́ Своего́ просвеща́ет.
Конда́к и и́кос пра́здника.
Седа́лен преподо́бному, глас 1:
Свет Боже́ственный, вы́ну тебе́ облиста́ющ, простира́ше лучи́ своя́/ и прогоня́ше во мра́це ходя́щих, не дая́ к тебе́ приступи́ти:/ всяк бо иму́щий дела́ зла́я, не приступа́ет к све́ту, да не обличе́н бу́дет./ Но, бе́гая сего́, враг паде́ся и бысть в попра́ние вы́ну,/ от него́же нам сохрани́тися Христа́ Бо́га моли́, отче преподо́бне.
Сла́ва, и ны́не, пра́здника:
Иису́су, ро́ждшуся от Де́вы Мари́и/ и во Иорда́не кре́щшуся от Иоа́нна,/ Дух Святы́й сни́де Нань в ви́де голуби́не,/ сего́ ра́ди проро́к со А́нгелы взыва́ше:/ сла́ва прише́ствию Твоему́, Христе́,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.
Песнь 4
Ирмо́с: Услы́шах, Го́споди, глас Твой, его́же рекл еси́,/ глас вопию́щаго в пусты́ни,/ я́ко возгреме́л еси́ над во́дами мно́гими,/ Твоему́ свидете́льствуяй Сы́ну,/ весь быв соше́дшаго Ду́ха, возопи́:/ Ты еси́ Христо́с, Бо́жия му́дрость и си́ла.
Услы́шан был еси́, о́тче, от Бо́га,/ я́ко моли́тва твоего́ смире́ния о́блаки про́йде./ Те́мже моли́твы твоя́ Вы́шний прие́мля, сохрани́л тебе́ от вся́каго зла:/ испове́дал бо еси́ еди́ну бы́ти Бо́жию Си́лу и Му́дрость.
Усну́ша сном свои́м/ и не возмого́ша ничто́же пе́рвии та́тие восхи́тити от запреще́ния твоего́, блаже́нне,/ и́хже ты по пяти́ днех и пяти́ но́щех возбуди́л еси́, глаго́ля:/ доко́ле стра́ждете, отыди́те,/ но не возмого́ша, держи́ми Бо́жиею си́лою неви́димою.
Тате́й, гла́дом погиба́ющих душе́вным и теле́сным, ви́дев, святе,/ не возда́л еси́ зла за зло,/ но, пи́санное исполня́я, ухлеби́л еси́ враги́ а́лчущия и отпусти́л я в до́мы своя́,/ да поне́ та́ко уцелому́дрятся и испове́дят я́сно,/ я́ко вои́стинну в тебе́ де́йствует Бо́жия Му́дрость и Си́ла.
На Бо́га положи́л еси суд оскорби́вших тя,/ Его́же отмще́ние не прости́ та́тей, но подаде́ властели́ну в слух,/ и́же емь их25, му́кам преда́ти име́яше,/ ты же, не́мощное челове́ческое разсужда́я,/ кни́ги твоя́ во искупле́ние дал еси судии́/ и свободи́л я от мук го́рьких.
Богоро́дичен: Лют сопе́рник – тя́жущаяся со мно́ю о гресех со́весть,/ с не́юже не увеща́хся исправле́нием, егда́ бех на пути́ жития́,/ ны́не привлече́ мя к Судии́,/ да прииму́ суд по дело́м и да не изы́ду от уз,/ до́ндеже с после́дним разочту́ся./ Увы́ мне, кто мя от сего́ зла изба́вит,/ а́ще не Ты, Чи́стая, пода́си ми по́мощь.
Песнь 5
Ирмо́с: Иису́с, живота́ Нача́льник,/ разреши́ти осужде́ние гряде́т Ада́ма первозда́ннаго,/ очище́ний же я́ко Бог не тре́буя,/ па́дшаго очища́ет во Иорда́не,/ в не́мже вражду́ уби́в,/ преиму́щ всяк ум мир да́рует.
Иису́с, живота́ Нача́льник,/ наставля́я гре́шныя на путь пра́вый, даде́ тате́м дух прав,/ и́мже умили́вшеся, в покая́ние приидо́ша/ и, вда́вшеся на рабо́ту оби́тели Бо́жия Ма́тере, примири́шася Бо́гу,/ И́же лю́бящим Его́ зако́н мир да́рует.
Иису́са Еди́наго, живота́ Нача́льника, возлюби́в,/ сло́во Его́ де́лом испо́лнил еси́, о́тче,/ и́бо вся, я́же имел, прода́л еси́,/ да не па́ки сих ра́ди, кто в беду́ впаде́т,/ це́ну же ту разда́л еси ни́щим/ и тех рука́ми внесл еси в сокро́вище,/ иде́же тать не приближа́ется, но це́ло пребыва́ет.
Па́ки враг па́коствует тебе́, преподо́бне, татьми́ други́ми,/ и́же, вше́дше в вертогра́д твой, о́вощием влага́лища напо́лниша,/ но хотя́ху ити́ и не возмого́ша, неви́димою держи́ми ве́рвию,/ бре́мены же угнета́еми, пребы́ша, сто́яще два дни и две но́щи.
И́же ча́яху злодея́ние свое́ утаи́ти,/ се сии́, иму́ще коры́сть непра́вды во обличе́ние на плеща́х свои́х,/ возопи́ша, проще́ния прося́ще у тебе́, о́тче,/ обеща́ющеся про́чая ле́та в покая́нии провожда́ти.
Богоро́дичен: Хоте́х утаи́тися Всеви́дца Бо́га злы́ми дея́нии мои́ми,/ но су́щее обличе́ние во вну́тренних,/ а́ки ве́лие бре́мя, студ мой открыва́ет./ Неве́дый у́бо, что про́чее сотвори́ти, к Тебе́ вопию́:/ поми́луй мя, Благоутро́бная Ма́ти,/ а́ще и покры́ срамота́ лице́ мое́.
Песнь 6
Ирмо́с: Глас Словесе́, свети́льник Све́та,/ денни́ца Со́лнца, Предте́ча в пусты́ни,/ – пока́йтеся,– всем вопиет люде́м,– и предочи́ститеся:/ се бо предстои́т Христо́с,/ от тли мир избавля́яй.
Глас слове́с твои́х, о́тче, смяте́ ко́сти кра́дущих,/ и исчеза́ше душа́ их от стра́ха:/ зане́ бы́ти им, а́ки ме́ху на сла́не, неподви́жимым на еди́ном ме́сте,/ и не бе, кто от толи́каго зла их избавля́яй.
Глас пропове́давша, к покая́нию призыва́ющ,/ та́тие я́ко услы́шаша, припа́даху к тебе́, блаже́нне,/ со слеза́ми отпуще́ние прося́ще,/ ты же, свя́те, умили́вся, кро́тким гла́сом рекл еси́:/ благослове́н Бог, укрепля́яй вас на де́ло бла́го,/ и Той да свободи́т вас, от тли всех избавля́яй.
Христу́ я́вльшуся на Иорда́не, мытари́ и вси гре́шницы гряду́т к Нему́/ и прие́млют живота́ своего́ обновле́ние;/ и́мже и та́тие, твои́м, о́тче, наказа́нием поревнова́вше,/ в но́вости жи́зни покая́ние нача́ша и рабо́тою наверши́ша.
О́браз дал еси́ Собо́ю, Христе́, рабо́м Твои́м,/ е́же не искуси́тися сатано́ю:/ те́мже уго́дник Твой, трети́цею искуша́емь злы́ми челове́ки, не искуси́ся,/ но, незло́бив сый, даде́, его́же тре́боваху,/ предви́дя па́губу еди́наго, от нея́же не бе избавля́ющаго.
Богоро́дичен: Во́лею свое́ю привлече́н, падо́хся в ров поги́бели,/ и несть мне возведе́ния наде́жды./ К Тебе́ простира́ю глас мой, Госпоже́,/ моли́ за мя Сы́на Твоего́,/ И́же днесь яви́ся на Иорда́не,/ не то́кмо мене́, но и весь мир от тли избавля́я.
Конда́к, глас 7:
Запреща́я беззако́ннующим беззако́нновати,/ вве́ржен был еси́ те́ми в струи́ ре́чныя, досточу́дне Григо́рие,/ иде́же блаже́нную восприе́м кончи́ну./ Ны́не со А́нгелы предстоя́ Престо́лу Влады́чню,/ моли́ся о душа́х на́ших.
Песнь 7
Ирмо́с: Ю́ноши благочести́выя, пе́щи о́гненней приобщи́вшияся,/ щумя́щ дух ро́сный невреди́мы сохрани́/ и Бо́жия А́нгела снизхожде́ние./ Те́мже, в пла́мени ороша́еми, благода́рственно воспева́ху:/ трепе́тый оте́ц Го́споди и Бо́же, благослове́н еси́.
Ю́ношам, иногда́ су́щим в пещи́, не поревнова́вше окая́ннии,/ и́же пла́мень му́жественно попра́ша/ и мучи́телю сопроти́вишася кре́пко,/ но врагу́ сове́тующу, пла́мени стра́стному себе́ вда́вше,/ мня́ху пред тобо́ю, о́тче, лжу свою́ утаи́ти,/ ему́же откры́л есть Бог Благослове́нный.
Ду́хом зря проро́чески внутрь, су́щее в сердца́х та́тей,/ я́ко и́мать сбы́тися в пра́вду, прослези́лся еси́, блаже́нне,/ прови́дя окая́нство того́, его́же приспе́ день поги́бели,/ и лжу́щему всу́е не да́де ми́лости Бог Благослове́нный.
Весть Дух Святы́й отве́рзти и нечи́стая уста́,/ да глаго́лют пра́вду на исправле́ние и́нем./ Те́мже тебе́ вопроси́вшу, преподо́бне, ко́ею сме́ртию умре́т сын поги́бельный,/ и неве́дуще та́тие прореко́ша, я́ко на дре́ве обве́шен и́мать бы́ти,/ е́же и сбы́тся во вре́мя свое́.
Сме́рти жа́ло – грех, и́же убива́ет челове́ка,/ и несть сему́ искупле́ния, до́ндеже покая́нием живо́т снабди́тся:/ а́ще бо и дал еси́, о́тче, во иску́п тате́м кни́ги своя́,/ но не искупи́ся поги́бели пови́нный,/ па́че же потреби́ся па́мять его́ от книг живо́тных.
Богоро́дичен: Разу́мная су́щи кни́га, Мари́е Богоневе́сто,/ в не́йже пе́рстом Ду́ха Всесвята́го написа́ся Сло́во О́тчее,/ в кни́ги живо́тныя написа́тися, о Благослове́нная, всех нас сподо́би.
Песнь 8
Ирмо́с: Та́йну пресла́вную вавило́нская показа́ пещь,/ источи́вшая ро́су,/ я́ко струя́ми имя́ше невеще́ственный Огнь восприя́ти Иорда́н/ и объя́ти пло́тию креща́ема Зижди́теля,/ Его́же благословя́т лю́дие/ и превозно́сят во вся ве́ки.
Та́йну се́рдца лука́ва прови́дяща тя, о́тче,/ загради́ша та́тие в пеще́ре/ и отверзо́ша к злодея́нию мысль свою́, наче́ншим же им собира́ти чу́ждых трудо́в плоды́,/ пости́же о́наго, о не́мже проре́кл еси́, суд Бо́жий:/ да не бу́дет благослови́ти с живы́ми Го́спода во ве́ки.
Хотя́ твоя́, о́тче, труды́, а́ки вепрь ди́вий, тать озоба́ти,/ простре́ ру́ку, вступи́в на дре́во, но не удержа́ся:/ ветвь бо отломи́ся, и а́бие обве́шением изсуши́ живота́ своего́ дре́во,/ я́ко не ктому́ да́ти ему́ плод покая́ния во ве́ки.
Да не су́дит никто́же суд непра́веден,/ ни да глаго́лет лжу:/ Бог бо поруга́ем не быва́ет./ Руга́ющеся, та́тие еди́наго, досто́йна пове́шения на дре́ве, осуди́ша, и рече́нное сбы́стся,/ ты же, преблаже́нне, превозне́сший Го́спода во ве́ки.
Ничто́же сокрове́нное от Тебе́, о́тче, ви́девше, припа́дающе, проще́ния прося́ху,/ я́ко да не на́йдет и на их подо́бна поги́бель,/ ты же, свя́те, кра́дущих наказа́л еси́ не ктому́, кра́сти,/ но па́че рабо́тати на бра́тию и благослове́нный плод снеда́ти,/ а́ще хо́щут превозноси́ти Го́спода во ве́ки.
Богоро́дичен: Косну́хся не благослове́ннаго ми плода́ и се умира́ю сме́ртию душе́вною,/ Ви́дя убо Тя, Ма́терь Живота́, простира́ю глас мой:/ приложи́ мне пла́стырь живо́тный покая́ния,/ да, поне́ ма́ло прише́д в себе́, обря́щу живо́т/ и превозношу́ Тя, Богоро́дице, во ве́ки.
Песнь 9
Ирмо́с: Недоуме́ет всяк язы́к благохвали́ти по достоя́нию,/ изумева́ет же ум и преми́рный пе́ти Тя, Богоро́дице:/ оба́че Блага́я су́щи, ве́ру приими́,/ и́бо любо́вь ве́си Боже́ственную на́шу,/ Ты бо христиа́н еси Предста́тельница, Тя велича́ем.
Недоумева́яся враг, како, о́тче, тя озло́бити,/ наведе́ безу́мныя рабы́ князя,/ и́же тебе́, в реце́ во́ду че́рплющу, поруга́хуся, сра́мная глаго́люще,/ но ты, преподо́бне, ду́хом предзря́ сих поги́бель,/ нака́зовал еси́, да не глаго́лют скве́рная,/ па́че же язы́ком Бо́га да велича́ют.
Му́жие велере́чивии не испра́вишася твои́м наказа́нием, свя́те,/ но па́че тебе́ руга́хуся, досажда́юще,/ те́мже па́ки благоутро́бне нака́зовал еси́ их, да па́че моли́твы тре́буют,/ я́ко ско́ро пото́плени бу́дут с кня́зем свои́м Ростисла́вом.
Не облича́й безу́мна, да не возненави́дит тебе́,– глаго́лет Писа́ние,/ е́же и сбы́стся на тебе́, преблаже́нне,/ и́бо князь, от Тебе́ прорече́нную себе́ смерть слы́шав,/ во укори́зну вменя́я, разгне́вася на тя/ и, безстра́шием одержи́м, повеле́ тя в воде́ утопи́ти.
Ко Христу́, вода́ми ны́не облага́ющемуся, водо́ю преше́л еси́, о́тче,/ и посече́ смерть вре́менныя твоея́ жи́зни дре́во,/ е́же ны́не доброзра́чнее при исхо́дищих вод живо́тных процвета́ет,/ и ли́ствие моли́тв твои́х Це́рковь увеселя́ет,/ тем тя, свя́те, велича́ем.
Богоро́дичен: В хра́ме сла́вы Твоея́, глас Гаврии́лов Тебе́ принося́щих, Чи́стая Де́во, в ми́ре соблюди́/ и всех ве́рных утверди́,/ подая́ тем си́лу благода́ти Твоея́/ во отгна́ние вся́ких тлетво́рных страсте́й,/ да Тя вси велича́ем.
Свети́лен:
И́же А́нгелом в жи́зни сей житие́м непоро́чным уподо́бивыйся, блаже́нне,/ тех и по кончи́не не отлучи́лся еси́:/ повеле́ бо Вы́шний Царь А́нгелом Свои́м многострада́льное твое́ те́ло по трие́х днех из воды́ в ке́ллию принести́,/ ду́шу же твою́ святу́ю в ски́ниях святы́х всели́ти,/ иде́же ны́не живы́й, помяни́ нас,/ чту́щих твою́ па́мять, о́тче свяще́ннейший.
Сла́ва, и ны́не, пра́здника:
Яви́ся Спас, благода́ть и и́стина, во стру́ях Иорда́нских/ и су́щия во тьме и се́ни спя́щия просвети́л есть,/ и́бо прии́де и яви́ся Свет Непристу́пный.
На хвали́тех стихи́ры на 4, глас 1.
Подо́бен: Небе́сных чино́в:
Водо́ю и ка́менем, к вы́и привя́занным,/ сконча́в жизнь свою́, блаже́нне,/ отше́л еси́ к стоя́щему на вода́х Христу́,/ су́щу Тому́ ка́мени краеуго́льну,/ на не́мже основа́н Вы́шний Иерусали́м,/ тамо́ ны́не селе́ние твое́ со А́нгелы име́я,/ помина́й любо́вию почита́ющих всечестну́ю па́мять твою́.
Зако́ну Бо́жию в жи́зни сей поучи́вся, преподо́бне,/ зако́нно, я́коже бе досто́йно, пожи́л еси́/ и, жизнь настоя́щаго ве́ка му́ченически сконча́в,/ преше́л еси к Законополо́жнику Христу́ и Венцеда́вцу,/ от Него́же вене́ц нетле́нный прие́м,/ ра́дуешися ны́не со А́нгельскими ли́ки,/ вселе́ния у́бо с ни́ми и весе́лия прича́стники/ и нас бы́ти сподо́би моли́твами твои́ми.
Свя́зан сый по ру́ку и но́гу,/ и в во́дныя струи́ вве́ржен,/ разреши́лся еси́ от уз плотски́х,/ Госпо́дь у́бо, из темни́цы сея́ ду́шу твою́ изве́д,/ в неизрече́нном све́те, иде́же пра́ведных ду́си зре́ния Бо́жия наслажда́ются,/ ны́не упокоя́ет,/ е́же и мы улучи́ти мо́лимся твои́м хода́тайством,/ о́тче блаже́ннейший.
Сла́ва, глас 8:
Дар нело́жный проро́чествия име́я, преподо́бне,/ прови́дел еси па́губу твоего́ уби́йцы,/ и́же твои́ми словесы́ наказу́емь не испра́вися,/ ни восхоте́ благослове́ния твоего́ и моли́твы, во бра́нех посо́бствующия./ Те́мже, я́ко фарао́н, погрязе́ в воде́ с во́и/ и обоего́ живота́ лиши́ся,/ прие́м поноше́ние седмери́цею в не́дра своя́,/ и па́мять его́ поги́бе./ Но ты, о́тче, предстоя́ Бо́жию Престо́лу,/ пода́ждь благослове́ние рабо́м твои́м и моли́тву,/ покланя́ющимся чудотво́рным моще́м твои́м/ и па́мять твою́ хвала́ми почита́ющим.
И ны́не, пра́здника, глас то́йже:
Го́споди, испо́лните хотя́,/ я́же уста́вил еси́ от ве́ка,/ от всея́ тва́ри служи́тели та́йны Твоея́ прия́л еси́:/ от А́нгел – Гаврии́ла,/ от челове́к – Де́ву,/ от небе́с – звезду́ и от вод – Иорда́н,/ в не́мже беззако́ние мирско́е потреби́л еси́./ Спа́се наш, сла́ва Тебе́.
Славосло́вие вели́кое и отпу́ст.
На Литурги́и слу́жба о́бща преподо́бному.
