Служба преподобнаго Ферапонта Можайскаго, Белоезерскаго, Лужецкаго
На Го́споди, воззва́х: стихи́ры, глас 8:
Восше́л еси́ на высоту́ доброде́телей/ моли́твами твои́ми и труда́ми на земли́,/ те́мже и на высоту́ Небе́сных ра́достей/ приведе́ тя Христо́с Госпо́дь,/ Его́же моли́, о́тче Ферапо́нте,/ дарова́ти душа́м на́шим мир и ве́лию ми́лость.
О́тче Ферапо́нте,/ моли́твами и слеза́ми очи́стил еси́ ду́шу твою́,/ те́мже ны́не чи́стым твои́м се́рдцем/ зри́ши сла́ву Триипоста́снаго Бо́га,/ Его́же моли́, преподо́бне,/ дарова́ти нам мир и вели́кия ми́лости.
Посто́м и бде́нием/ поработи́л еси́, о́тче,/ те́ло твое́ богому́дрому ду́ху твоему́,/ те́мже и Преблаги́й Бог/ дарова́ Свою́ благода́ть честно́му те́лу твоему́,/ и́мже, о́тче Ферапо́нте,/ источи́ нам мир и ве́лию ми́лость.
Сла́ва, глас то́йже:
Преподо́бне о́тче,/ ты при́сно взыва́л еси́ ко Пречи́стей Ма́тери Бо́га/ и моли́тв Ея́ ра́ди/ ны́не предстои́ши Ро́ждшемуся от Нея́,/ с Не́юже у Того́ испроси́ мир и спасе́ние душа́м на́шим.
И ны́не, Богоро́дичен гла́са или́ пра́здника.
На стихо́вне стихи́ры, глас 4:
Устраши́вся стра́шнаго суда́ Бо́жия и ве́чныя му́ки,/ всего́ себе́, преподо́бне,/ преда́л еси́ терпе́нию, труда́м, бде́нию и посту́,/ сего́ ра́ди прия́л еси́/ ве́чный поко́й и сла́ву Небе́сную.
Стих: Честна́ пред Го́сподем/ смерть преподо́бных Его́.
Многоле́тним житие́м Бо́гу рабо́тав, преподо́бне,/ ду́шу и те́ло чи́сты предста́вил еси́ Христу́ Бо́гу,/ и́же прия́т тя, Ферапо́нте,/ в жи́тницу Свою́ Небе́сную,/ я́ко зерно́ благопло́дное.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Моли́твою непреста́нною/ вопия́л еси́ Бо́гу, блаже́нне, во дни и в нощи́/ и ны́не, преподо́бне ферапо́нте,/ песносло́виши Го́спода со святы́ми А́нгелы Его́.
Сла́ва, глас 8:
О́браз был еси́ и́ноческаго жития́, преподо́бне,/ смире́нием и целому́дрием сия́ющий;/ просвети́ и укрепи́ и нас твои́ми моли́твами,/ чту́щих па́мять твою́, Ферапо́нте, о́тче наш.
И ны́не, Богоро́дичен дне или́ пра́здника.
Тропа́рь пи́сан на вели́цей вече́рни. Сла́ва, и ны́не, Богоро́дичен или́ пра́здника.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 5:
Прииди́те, ве́рнии,/ и лик соста́вим в наро́читый сей день уго́дника Бо́жия,/ преподо́бнаго отца́ на́шего Ферапо́нта,/ днесь бо чи́стая его́ душа́,/ до́брым на земли́ трудолю́бием усугуби́вшая тала́нты своя́,/ принесе́ я Влады́це Да́телю/ и с ни́ми вни́де на Небеси́ в ра́дость Го́спода своего́,/ Его́же непреста́нно мо́лит спасти́ся душа́м на́шим.
Да неосужде́нно предста́неши на суди́щи Христо́ве,/ оста́вль вся, су́щая в ми́ре,/ на те́сный путь покая́ния возше́л еси́/ и до́бре по́двигом и́ночества подвиза́лся еси́,/ но и сим не довле́яся,/ в безмо́лвие пусты́ни прите́кл еси́,/ да мо́лишися Бо́гу вта́йне,/ но Бог, ви́дяй тя вта́йне,/ воздаде́ тебе́ я́ве,/ пресели́в непоро́чную твою́ ду́шу/ к ли́ком Небе́сных А́нгелов и всех святы́х Свои́х,/ с ни́ми же, о́тче наш Ферапо́нте,/ моли́ спасти́ся душа́м на́шим.
Лю́дная места́ оста́вль,/ в дебрь пусты́нную всели́лся еси́,/ но, слеза́ми свои́ми ороси́вся,/ возра́сл еси́ в высоту́ вся́ких доброде́телей,/ те́мже и умно́жи тя Всеблаги́й Вертогра́дарь, Христо́с,/ при ко́рени бо смире́ния твоего́/ насади́ ча́да твоя́, и́ноки,/ и́мже наста́вник был еси́ и́стинный/ и храни́тель неусы́пный,/ та́кожде и ны́не, преподо́бне,/ огради́ моли́твами твои́ми и нас,/ чту́щих па́мять твою́ ве́рно.
О́тче Ферапо́нте,/ ты стяжа́л еси́ себе́ дру́га,/ спо́стника и сомоли́твенника, блаже́ннаго Кири́лла,/ с ни́мже ра́достно Бо́гу рабо́тал еси́,/ внима́я же сло́ву и приме́ру его́,/ восте́кл еси́ по нем в пусты́ню/ и та́мо яви́лся еси́ с ним насади́тель и́ноческаго жития́,/ и ны́не с ним веселя́ся в Небе́сных оби́телех,/ моли́ся, блаже́нне,/ дарова́ти душа́м на́шим мир и ве́лию ми́лость.
Егда́ благове́рный князь Андре́й умоли́ тя, преподо́бне,/ созда́ти близ гра́да Можа́йска оби́тель и́ноческую,/ тогда́ собра́л еси́ но́вое ста́до твое́,/ ему́же наста́вник был еси́ да́же до преставле́ния твоего́,/ но и по преставле́нии вдал еси́ сему́ ста́ду твоему́/ облагода́тствованное те́ло твое́,/ я́ко ору́жие благохрани́тельное/ и всех земны́х сокро́вищ многоце́ннейшее,/ точа́щее исцеле́ния неисче́тная;/ те́мже, о́тче Ферапо́нте,/ всех нас, припада́ющих к тебе́ в хра́ме твое́м святе́м,/ покры́й моли́твами твои́ми/ и соблюди́ от неду́гов и напа́стей/ и от вся́каго нестрое́ния.
Сла́ва, глас 6:
Прииди́те, окре́стнии лю́дие,/ воспои́м храни́теля страны́ ва́шея,/ Богоно́снаго отца́ на́шего Ферапо́нта,/ его́ бо святы́ми моли́твами Христо́с Госпо́дь/ мно́гажды разсы́па тьмочи́сленная вра́жеская по́лчища,/ попра́ти Правосла́вную ве́ру на́шу тщи́вшияся,/ а́ще бо иногда́ христоненави́стнии и неве́рнии/ прихожда́ху внутрь страны́ сея́,/ но гнев Бо́жий вско́ре постига́ше их,/ и, разсла́бившеся ра́зумом,/ посра́млени, вспять бежа́ху./ Мы же, иму́ще такова́го засту́пника и учи́теля,/ укрепи́м сердца́ на́ша в любви́ Христо́вой/ и в ве́ре и́стинней.
И ны́не, Богоро́дичен: Кто Тебе́ не ублажи́т:
А́ще же Пятидеся́тница, И ны́не, пра́здника.
Вход. Проки́мен дне. И чте́ния 3.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (главы́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 6:
Ра́дуйся, о́тче,/ в ско́рбех уте́шителю,/ в напа́стех помо́щниче,/ прибе́жище стра́нным,/ приими́ моле́ние на́ше/ и не оста́ви нас, си́рых,/ но испроси́ нам от Христа́ Бо́га спасе́ние ве́чное,/ преподо́бне Ферапо́нте.
Преподо́бне о́тче,/ прии́м крест Христо́в,/ оста́вил еси́ вся блага́я ми́ра/ и в пусты́ню всели́лся еси́, рабо́тати Бо́гу вта́йне,/ но Бог, ви́дяй та́йныя по́двиги твоя́,/ мздовоздаде́ тебе́, Ферапо́нте, я́ве/ во Ца́рствии Небе́снем.
Сла́ва, глас 8:
По и́мени твоему́, Ферапо́нте,/ та́ко и житие́ твое́ соверши́л еси́:/ был бо еси́ ве́рный раб Го́спода Христа́/ и му́дрый приста́вник в дому́ Его́,/ нача́льствующий, я́ко служа́й,/ и всем в боле́знех и в ну́ждах помога́яй;/ преподо́бне о́тче,/ А́нгелов собесе́дниче,/ сожи́телю пра́ведных,/ и́стинный подви́жниче,/ не преста́й моли́тися о нас,/ чту́щих с любо́вию па́мять твою́.
И ны́не, Богоро́дичен гла́са или́ пра́здника.
На стихо́вне стихи́ры, глас 1:
Ки́ими похва́льными пе́сньми/ возмо́жем досто́йно воспе́ти/ душе́вную добро́ту твою́, преподо́бне,/ нестяжа́ние и ще́дрость,/ страннолю́бие и ми́лостыни,/ кро́тость и незло́бие,/ послуша́ние и братолю́бие,/ согреша́ющим исправле́ние те́плое,/ ка́ющимся утеше́ние сла́дкое,/ боля́щим врачева́ние ско́рое,/ немощны́м по́мощь и укрепле́ние,/ оскудева́ющим снабде́ние,/ в напа́стех избавле́ние/ и всем, призыва́ющим тя, ве́рное у слы́шание,/ блаже́нне о́тче наш Ферапо́нте,/ не пре́зри нас за грехи́ на́ша безчи́сленныя,/ но моли́твами твои́ми испроси́ нам у Христа́ Бо́га/ очище́ние грехо́в и ве́лию ми́лость.
Стих: Честна́ пред Го́сподем/ смерть преподо́бных Его́.
Егда́ наста́ вре́мя кончи́ны/ твоея́ многоле́тныя и многопло́дныя богоуго́дныя жи́зни,/ преподо́бне о́тче,/ ско́рбию вели́кою испо́лнил еси́ сердца́ лю́бящих тя:/ благове́рнаго кня́зя Андре́я/ и всех и́ночествующих чад твои́х:/ но Всеблаги́й Госпо́дь/ скорбь их вско́ре премени́л есть на ра́дость несказа́нную,/ дарова́в те́лу твоему́ чудоде́йственную си́лу:/ бе́сы прогоня́ти, неду́ги исцеля́ти/ и от бед огражда́ти всех,/ с ве́рою и любо́вию притека́ющих к тебе́/ и припа́дающих к ра́це святы́х моще́й твои́х./ О́тче наш Ферапо́нте,/ моли́твами твои́ми при́сно невреди́мы сохрани́ нас,/ и страну́ твою́, и вся христоимени́тыя лю́ди.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Преподо́бне о́тче,/ ты теле́сная мудрова́ния/ поще́нием кре́пким ду́ху покори́л еси́/ и непреста́нными моли́твами прибли́зился еси́ к Бо́гу,/ благопослуша́нием же соверше́нным/ и нището́ю ду́ха преди́вною,/ незло́бием и кро́тостию,/ слеза́ми твои́ми и посто́м,/ бде́нием же и труда́ми неусы́пными/ о́браз был еси́ ста́ду твоему́/ и предте́ча к Небе́сному житию́,/ иде́же весели́шися со всеми́, угоди́вшими Бо́гу,/ Его́же с ни́ми моли́, о́тче Ферапо́нте,/ дарова́ти нам зде благоче́стное житие́/ и та́мо с тобо́ю Ца́рство Небе́сное.
Сла́ва, глас 6:
Преподо́бне о́тче,/ ты всего́ себе́ и всю жизнь твою́/ вве́рил еси́ предста́тельству и заступле́нию Пречи́стыя Богоро́дицы,/ те́мже и созда́нныя тобо́ю святы́я хра́мы и оби́тели и́ноков/ Ея́ сла́ве и покро́ву преда́л еси́,/ и ны́не, озаря́емь све́том сла́вы Влады́чицы Пречи́стыя,/ с Не́ю, блаже́нне Ферапо́нте, моли́ся Христу́ Бо́гу,/ спасти́ся нам от вражды́ и мяте́жа/ и от всех враг, ви́димых и неви́димых,/ от бед и боле́зней и от ве́чныя му́ки.
И ны́не, Богоро́дичен гла́са. А́ще Пятидеся́тница, И ны́не, пра́здника.
Тропа́рь, глас 4:
Житие́м чи́стым просвети́вся,/ в моли́твах и посте́х пусты́ни яви́лся еси́ до́брое прозябе́ние/ и, духо́вному твоему́ учи́телю после́дствуя,/ ум свой к Небе́сным упра́вль,/ ста́ду твоему́ наста́вник был еси́,/ тем тя мо́лим, о́тче Ферапо́нте:/ моли́ Христа́ Бо́га спасти́ся душа́м на́шим.
НА У́ТРЕНИ
На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 5:
А́ще и зело́ почте́н бысть от благове́рнаго кня́зя Андре́я преподо́бный Ферапо́нт,/ но не предаде́ся горды́ни, и, смире́нием обле́кся,/ недосто́йна себе́ вменя́ше мирски́я че́сти,/ о́браз да́вый, да после́дуем смире́нию его́.
Сла́ва, и ны́не, Богоро́дичен или́ пра́здника.
По 2-м стихосло́вии седа́лен, глас 6:
Ни зной, ни мраз, ни страх звере́й,/ ни преще́ние люде́й развраще́нных,/ ни благохвале́ния от и́ноков, ни по́чести князе́й мирски́х,/ ничто́ от таковы́х возмо́же уклони́ти преподо́бнаго Ферапо́нта от любве́, я́же к Бо́гу,/ те́мже вои́стинну ве́рный раб Го́спода нарече́ся.
Сла́ва, и ны́не, Богоро́дичен или́ пра́здника.
Седа́лен по полиеле́и зри по 3-й пе́сни.
Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Днесь светоно́сное торжество́:/ возсия́ бо нам па́мять пречестна́го отца́ на́шего Ферапо́нта,/ на́шего засту́пника и храни́теля,/ и́же припа́дает ко Престо́лу Вседержи́теля/ и к стопа́м Пречи́стыя Богоро́дицы,/ усе́рдно о нас моля́ся.
Кано́н, глас 5, его́же краегране́сие: Воспои́м преподо́бному отцу́ Ферапо́нту.
Песнь 1
Ирмо́с: Пои́м, Го́сподеви,/ сотво́ршему ди́вная чудеса́ в Чермне́м мо́ри,/ песнь побе́дную,/ я́ко просла́вися.
Воспева́еши ны́не, преподо́бне,/ изба́вившему тя от истле́ния/ и просла́вившему тя Бо́гу.
О́тче Ферапо́нте,/ даждь нам сло́во воспе́ти Го́спода,/ и́же в тебе́ сла́вно просла́вися.
Стена́л еси́ в ми́ре от рабо́ты суете́,/ но изведе́ тя Госпо́дь Бог в свобо́ду и́ноческаго чи́стаго жития́.
Богоро́дичен: Пречи́стая Ма́ти Христа́ Бо́га,/ исцели́ неду́ги на́ша благода́тию Сы́на Твоего́.
Ин кано́н, глас 1,
егоже краегране́сие: Моли́тву на́шу к тебе́ сию́ приими́, о́тче наш.
Песнь 1
Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.
Моли́ся, преподо́бне, спа́сшему тя Го́споду/ изба́вити нас от скорбе́й и напа́стей, облежа́щих нас.
От многотру́дныя жи́зни сея́,/ я́ко А́нгел Бо́жий Изра́иля иногда́, преподо́бне,/ моли́твами твои́ми приведи́ нас в обетова́нное Ца́рство.
Лю́те нас и смертоно́сно терза́ют стра́сти на́ша:/ умоли́ нам от язв на́ших исцели́тися/ Кресто́м Го́спода.
Богоро́дичен: Изми́ нас, Ма́ти Бо́жия, от бре́мени бед и скорбе́й,/ да, изба́вленнии Тобо́ю, зове́м Бо́гу на́шему:/ я́ко просла́вися.
Песнь 3
Ирмо́с: На ка́мени за́поведей Твои́х коле́блющагося мя утверди́,/ вознеси́ рог мой в ра́зуме повеле́ний Твои́х,/ да, хваля́ся, вопию́ Тебе́:/ несть свят, па́че Тебе́, Го́споди Сил.
О Го́споде Бо́зе укрепля́л еси́ зде вы́ну се́рдце твое́;/ сего́ ра́ди ны́не вознесе́ся рог твой в Бо́зе твое́м,/ мы же весели́мся о спасе́нии твое́м.
Изнемо́же кре́пость пло́ти твоея́ от поста́ и трудо́в твои́х,/ но дух твой препоя́сася си́лою Бо́жиею/ и сра́дуется ны́не со А́нгелы.
Ми́лостынями и благотворе́нии ижди́л еси́ вся име́ния твоя́ Го́спода ра́ди,/ те́мже и Госпо́дь обогати́ тя во Ца́рствии Свое́м.
Богоро́дичен: Пречи́стая Де́во,/ де́вственников ли́ки Тобо́ю хва́лятся,/ и нас сопричти́ к ли́ку му́дрых дев.
Ин
Ирмо́с: Утвержде́й сло́вом Небеса́ и зе́млю основа́вый, Бо́же,/ и мене́ утверди́, вопию́ща Тебе́ песнь:/ Свят еси́, Го́споди.
Твоя́ моли́твы вознеси́ о нас к Бо́гу, преподо́бне,/ и разруши́ ко́вы72 враго́в на́ших на нас.
Вы́ну пода́вый нам благопотре́бная, преподо́бне,/ да не изнемо́жем, а́лчуще,/ но да пое́м тя все́ю кре́постию на́шею.
Умерщвле́ннии грехи́ на́шими, ны́не мо́лим тя, преподо́бне:/ изба́ви нас а́да моли́твами твои́ми/ и приведи́ с тобо́ю к Престо́лу Сла́вы.
Богоро́дичен: На́шего ра́ди спасе́ния ро́ждшая Бо́га, Пречи́стая,/ отжени́ от нас вся́каго врага́.
Ин конда́к, глас 8:
Христо́вым жела́нием распали́вся,/ стра́сти плотски́я воздержа́нием оттря́с,/ по́стническое стяжа́в жи́тельство, преподо́бне,/ сего́ ра́ди Госпо́дь труды́ твоя́ ви́дев,/ да́ром чуде́с обогати́ тя,/ источа́еши бо исцеле́ния и мо́лишися о нас к Бо́гу,/ мы же, ра́дующеся, вопие́м ти:/ ра́дуйся, Ферапо́нте, о́тче наш.
Седа́лен, глас 4:
А́нгельски пожи́в на земли́,/ днесь со А́нгелы лику́ет Богоно́сный Ферапо́нт/ и с ни́ми о нас мо́лится ко Спа́су всех,/ те́мже взыгра́ем, бра́тие,/ и превознесе́м чадолю́бнейшаго сего́ отца́ на́шего Ферапо́нта.
Песнь 4
Ирмо́с: Услы́шах, Го́споди,/ слух Твой и убоя́хся,/ разуме́х смотре́ние Твое́/ и просла́вих Тя, Еди́не Человеколю́бче.
Ра́зумом внял еси́ гла́су Го́спода Судии́ и, ужа́сся,/ скры́лся еси́ в пусты́ню,/ но ны́не со святы́ми весели́шися о Бо́зе, Спа́се твое́м.
Егда́ вни́де в се́рдце твое́ тре́пет стра́шнаго Суда́ Бо́жия,/ тогда́ отгна́л еси́, преподо́бне,/ слеза́ми и посто́м вся стра́сти твоя́.
Преподо́бный глас моли́твы усте́н твои́х слы́шашеся в де́брех пусты́нных,/ и услы́ша его́ Госпо́дь с высоты́/ и даде́ тебе́ побе́ду за пе́сни Ему́.
Богоро́дичен: Отжени́ от нас скорбь, глад и вся́кую ну́жду,/ Ма́ти Бо́га Пречи́стая,/ всеси́льным хода́тайством Твои́м.
Ин
Ирмо́с: Слух Твой, Го́споди, услы́шах и убоя́хся,/ дела́ Твоя́ разуме́х и ужасо́хся,/ я́ко Бог, пре́жде век Сый, от Де́вы рожде́йся, бысть Челове́к.
А́нгел храни́тель нам бу́ди/ и даждь отра́ду нам в день ско́рби на́шея, о́тче Ферапо́нте.
Ше́ствуй с на́ми сия́нием све́та твоего́, преподо́бне,/ и украси́ нас цвета́ми до́брых дел.
Уми́льно к тебе́ припа́даем:/ огради́ нас, о́тче,/ да не сожже́т нас со́лнце, ниже́ ветр губи́тельный.
Богоро́дичен: К Тебе́ прибега́ем, Ма́ти Де́во Пречи́стая:/ бу́ди нам тве́рдое и изве́стное заступле́ние.
Песнь 5
Ирмо́с: От но́щи покланя́ющияся Тебе́, Христе́,/ поми́луй и мир да́руй:/ зане́, свет, повеле́ния Твоя́/ бы́ша исцеле́ния рабо́м Твои́м, Человеколю́бче.
До но́щи от у́тра/ и от но́щи да́же до у́тра воспева́л еси́ Богу,/ и повеле́ния Его́ бы́ша тебе́ све́том на земли́, преподо́бне.
О и́стине и пра́вде ревнова́л еси́ зде/ и со пра́ведными причте́н еси́ ны́не на Небеси́.
Бе́гал еси́ лжи, я́ко я́да,/ и нас от путе́й лжи́вых отво́диши ко Христу́,/ И́стине и Животу́.
Богоро́дичен: Не и́мамы ина́го заступле́ния и по́мощи, ра́зве Тебе́, Влады́чице,/ помози́ нам и спаси́ нас.
Ин
Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́.
Тя мо́лим, о́тче:/ даждь мир Це́ркви, гра́ду и всем лю́дем твои́м.
Ели́ко роса́ зла́ку,/ толи́ко и ты нам исцеле́ние бу́ди моли́твами твои́ми.
Бе́дне боле́знями сме́ртными стра́ждем,/ возве́й на нас дух спасе́ния, о́тче.
Богоро́дичен: Седя́й на Херуви́мех вочелове́чися Тобо́ю, Де́во,/ Его́же моли́ за стра́ждущия челове́ки.
Песнь 6
Ирмо́с: От ки́та проро́ка изба́вил еси́,/ мене́ же из глубины́ грехо́в/ возведи́, Го́споди,/ и спаси́ мя.
От всего́ се́рдца вопия́л еси́ ко Го́споду,/ и услы́шан еси́ от Него́,/ и ра́дуешися во све́те лица́ Его́.
Мы́слию зрел еси́ Бо́га, в хра́ме Бо́жием стоя́,/ и се ны́не Бо́га зри́ши лице́м к лицу́ в селе́нии Небе́снем.
Устрани́л есть истле́ние от те́ла твоего́ Госпо́дь Бог твой,/ Ему́же ты пел еси́ со гла́сом хвале́ния и испове́дания.
Богоро́дичен: Отве́рзи щедро́ты Твоя́, Богоро́дице,/ и приведи́ нас в селе́ния Го́спода Сла́вы,/ я́же Он обеща́ ве́рным Свои́м.
Ин
Ирмо́с: Со Ио́ною вопие́м Ти, Го́споди,/ со гла́сом хвале́ния моля́щеся:/ возведи́ от тли живо́т наш.
Се бе́здна грехо́в потопля́ет нас,/ ускори́, преподо́бне, изъя́ти нас от них.
Ио́не спасе́ние да́вшаго Бо́га умоли́, преподо́бне,/ дарова́ти нам спасе́ние от бед, обыше́дших нас.
Ю́же в ско́рбех, и слеза́х, и в беззако́ниих иждива́емую жизнь на́шу/ изведи́, преподо́бне, от истле́ния.
Богоро́дичен: Помози́ нам, Пречи́стая,/ греси́ бо и беды́ одолева́ют нас и умерщвля́ют.
Конда́к, глас 4:
Преблаги́й Спас наш Христо́с/ умно́жил есть ми́лость Свою́ к нам,/ дарова́в нам в засту́пника и цели́теля/ преподо́бнаго отца́ на́шего Ферапо́нта,/ и́же просвеща́ет нас о́бразом свята́го жития́ своего́/ и ны́не моли́твами свои́ми огражда́ет храм свой от враго́в и от разруше́ния,/ страну́ сию́ от гла́да и напра́сныя сме́рти,/ чту́щих же па́мять его́ всех/ от боле́зней и от лю́тых страсте́й.
И́кос:
От младе́нчества твоего́ и да́же до престаре́ния/ те́лом и душе́ю рабо́тал еси́ Го́споду Иису́су Христу́ и Пречи́стей Его́ Ма́тери,/ и се ны́не душа́ твоя́ ликовству́ет в Его́ Небе́сных оби́телех,/ те́ло же твое́, зде почива́я, сия́ет чудесы́,/ сего́ ра́ди вопие́м ти ра́достно:/ ра́дуйся, во след Христа́ неукло́нно ше́дый;/ ра́дуйся, Сло́во Его́ соблюда́вый тве́рдо./ Ра́дуйся, во сла́ву Христа́ Бо́га подвиза́выйся;/ ра́дуйся, Пречи́стую Христа́ Ма́терь неумо́лчно сла́вивый./ Ра́дуйся, от Христа́ и от Ма́тере Его́ просла́вленный;/ ра́дуйся, имы́й дерзнове́ние ве́лие ко Христу́./ Ра́дуйся, защи́тниче оби́тели Луже́цкия;/ ра́дуйся, храни́телю страны́ Можа́йския./ Ра́дуйся, побо́рниче кре́пкий за держа́ву росси́йскую;/ ра́дуйся, добропобе́дный во́ин Правосла́вныя Це́ркве./ Ра́дуйся, всем призыва́ющим тя подаю́щий ско́рую по́мощь от Христа́ Бо́га;/ ра́дуйся, Ферапо́нте, уго́дниче Христо́в и чудотво́рче.
Песнь 7
Ирмо́с: Огня́ гаси́лище – отроко́в моли́твы,/ ороша́ющая пещь, пропове́дница чудесе́,/ не опаля́ющи, ниже́ сожига́ющи песносло́вцы Бо́га оте́ц на́ших.
Ты слеза́ми мно́гими угаси́л еси́ пла́мень страсте́й твои́х/ и ны́не ро́сным ду́хом прохлажда́ешися в раи́, вопия́:/ Бо́же, благослове́н еси́.
Царю́ царе́й, преподо́бне,/ с духо́вными ча́ды твои́ми на земли́ воспева́л еси́ вы́ну:/ Бо́же, благослове́н еси́.
Усрами́шася и́щущии тебе́ зла́я,/ ты же, изба́влься от бед, пое́ши Бо́гу:/ Бо́же, благослове́н еси́.
Богоро́дичен: Фимиа́м благоуха́нный Го́сподеви моли́твы Твоя́, Богороди́тельнице,/ и́миже и нас сподо́би пе́ти Бо́гу:/ благослове́н еси́.
Ин
Ирмо́с: По мно́жеству ми́лости Твоея́,/ Человеколю́бче, сотвори́ с на́ми,/ да Тебе́ ве́рно вси воспева́юще, пои́м,/ я́коже о́троцы:/ благослове́н еси́, Бо́же оте́ц на́ших.
Разжже́ние страсте́й на́ших угаси́, преподо́бне,/ дожде́м моли́тв твои́х о нас к Бо́гу, да зове́м:/ Бо́же, благослове́н еси́.
Иису́са Го́спода умоли́, преподо́бне,/ я́ко да посра́мятся вси, де́лающии зла́я нам, рабо́м твои́м,/ мы же да зове́м Ему́:/ Бо́же, благослове́н еси́.
И́стинно благослове́нный ны́не от Отца́ Небе́снаго,/ помози́ и нам бы́ти благослове́нными от Него́ и воспева́ти:/ Бо́же, благослове́н еси́.
Богоро́дичен: Милосе́рдая Влады́чице на́ша,/ соде́лай Влады́ку Го́спода ми́лостива к нам, гре́шным, да зове́м вы́ну:/ Бо́же, благослове́н еси́.
Песнь 8
Ирмо́с: Творца́ тва́ри,/ Его́же ужаса́ются А́нгели,/ по́йте, лю́дие,/ и превозноси́те во вся ве́ки.
Естество́м теле́сным зной и мраз, снег и дождь,/ огнь и бу́рю претерпе́л еси́ Го́спода ра́ди,/ ду́хом поя́ и превознося́ Его́ во ве́ки.
Рыка́ние звере́й ди́виих/ и во́пли птиц нощны́х не заглуши́ша гла́са твоего́, немо́лчно воспева́вша Бо́гу/ и превозноси́вша Его́ во ве́ки.
Ангелоподо́бно был еси́ смире́н се́рдцем, преподо́бен и пра́веден,/ все́ю душе́ю поя́ Го́спода/ и превознося́ Его́ во ве́ки.
Богоро́дичен: Пречи́стая Де́во,/ сподо́би нас с проро́ки и с му́ченики сла́вити Го́спода,/ пою́ще и превознося́ще Его́ во ве́ки.
Ин
Ирмо́с: Песнь Тебе́ прино́сим Безпло́тных,/ я́коже о́троцы в пещи́, и, пою́ще, глаго́лем:/ благослови́те, вся дела́ Госпо́дня, Го́спода.
Исцели́ на́ша неду́ги,/ препита́й си́рых и вдови́ц,/ да вси ра́достно Го́спода пое́м и превозно́сим во ве́ки.
Опали́, я́ко мо́лния, вся вражды́ и нестрое́ния о́крест нас,/ да единомы́сленно пое́м Го́спода и превозно́сим во ве́ки.
Твои́м хода́тайством да́руй плодоро́дие земли́ на́шей/ и цельбу́ исто́чником вод,/ да благослови́м Го́спода и превозно́сим во ве́ки.
Богоро́дичен: Чи́ни а́нгельстии Тя сла́вят, Пречи́стая,/ не пре́зри гла́сы и нас, гре́шных,/ пою́щих Тя и превознося́щих во ве́ки.
Песнь 9
Ирмо́с: Я́ко сотвори́ Тебе́ вели́чия Си́льный,/ Де́ву явль Тя чи́сту по рождестве́,/ я́ко ро́ждшую без се́мене Своего́ Творца́,/ тем Тя, Богоро́дице, велича́ем.
О́тче Ферапо́нте!/ Благослове́н Бог, воздви́гнувый нам тя, о́трока Своего́,/ во огражде́ние на́ше твои́м заступле́нием.
Ны́не сотвори́ тебе́ Бог ми́лость,/ всели́в тя в Небе́сныя оби́тели,/ да привлече́ши в них и нас, ве́рно чту́щих тя.
Ты служи́л еси́ Христу́ и Пречи́стей Ма́тери Его́/ вся дни живота́ твоего́ на земли́, преподо́бне,/ укрепи́ и нас служи́ти Им всегда́.
Богоро́дичен: Умоли́ Небе́снаго Домовлады́ку, Пречи́стая,/ умудри́ти и спасти́ ду́ши на́ша/ моли́твами уго́дника Его́ Ферапо́нта, отца́ на́шего.
Ин
Ирмо́с: Светоно́сный о́блак, в о́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси, я́ко Ма́терь Бо́га на́шего Чи́стую.
Еди́не Ще́дре Го́споди,/ посети́ нас ми́лостями Твои́ми/ ра́ди уго́дника Твоего́, преподо́бнаго Ферапо́нта.
Не отступа́й от нас, о́тче,/ во вся дни вре́меннаго сего́ жития́ на́шего,/ но огражда́й нас ми́ром и ве́лиею ми́лостию.
А́да и ве́чныя му́ки изба́витися нам моли́, о́тче,/ и да взы́дут ду́ши на́ша от земли́ в Небе́сная селе́ния.
Богоро́дичен: Шата́ния враго́в на́ших низложи́, Всепе́тая,/ и ниспосли́ нам проще́ние грехо́в и спасе́ние ве́чное.
Свети́лен.
Подо́бен: Жены́, услы́шите:
Процве́л еси́, я́ко фи́никc, дави́дски, о́тче,/ и оби́тель яви́лся еси́ Ду́ха Пресвята́го,/ и сла́вна тя вселе́нней показа́./ О нас непреста́нно моли́, почита́ющих ве́рою пречестну́ю па́мять твою́, преподо́бне Ферапо́нте.
На хвали́тех стихи́ры на 4, глас 5:
Разбо́йники, тебе́ неи́стово преща́вшия,/ незло́бием победи́л еси́/ и на путь до́брый напра́вил еси́,/ о́тче наш Ферапо́нте,/ и́ночествующих похвало́, и́стинный учи́телю/ и храни́телю неизме́нный.
Рука́ма твои́ма чи́стыма/ созда́л еси́ храм Пречи́стыя Богоро́дицы Влады́чицы,/ и в нем со твои́ми спо́стники сла́дко воспева́л еси́ Христу́ Бо́гу,/ о́тче наш Ферапо́нте,/ о́браз быв воздержа́ния, и смире́ния,/ и душе́вныя чистоты́.
Преподо́бне о́тче!/ К тебе́ ны́не припа́даем и тя усе́рдно мо́лим:/ помоли́ся о нас Спа́су всех,/ изба́витися нам от огня́ и гла́да,/ от вражды́ и нестрое́ния,/ от лю́тых на́ших грехо́в/ и от всех смертоно́сных на́ших страсте́й.
Сла́ва, глас 8:
Мно́гим посто́м и моле́нием неусы́пным/ очи́стив свой ум от вся́кия стра́сти/ и, сла́дость душе́вныя чистоты́ вкуси́в,/ всех нас, чад свои́х, о́тче, зове́ши к чистоте́,/ глаго́ля нам словесы́ апо́стольскими:/ отложи́м, ча́да, дела́ те́мная,/ я́ко во дни благообра́зно да хо́дим,/ не козлогласова́нии и пия́нствы,/ не рве́нием и за́вистию,/ но облецы́теся Го́сподем на́шим Иису́сом Христо́м/ и пло́ти уго́дия не твори́те в по́хоти.
И ны́не, пра́здника или́ Богоро́дичен.
Моли́тва
О всечестны́й и преблаже́нный о́тче наш Ферапо́нте! Тебе́ даде́ся благода́ть моли́тися о нас, и ве́мы, я́ко, предстоя́ Престо́лу Го́спода, при́сно явля́еши любо́вь твою́ к нам непреста́нными о нас твои́ми хода́тайствы. Но поне́же мы ежеча́сно умножа́юще грехи́ на́ша, кра́йняго твоего́ отвраще́ния досто́йни сотвори́хомся, сего́ ра́ди в покая́нии, со слеза́ми припа́дающе, мо́лим тя: не премени́ твоея́ ми́лости к нам на гнев за нече́стия и скве́рны на́ша, яви́ у́бо нам ми́лость твою́ до конца́ и согреша́ющих нас очи́сти твои́ми моли́твами, возведи́ к покая́нию, укрепи́ на дела́ блага́я, сохрани́ в Правосла́вии и во вся́кой святы́ни. Да́руй нам пребыва́ти в ми́ре, тишине́ и братолю́бии, испроси́ нам времена́ безмяте́жна и изоби́лие плодо́в земны́х, изба́ви от огня́, и от потопле́ния, и от лю́тых боле́зней, и от смерто́носныя я́звы. Посли́ тружда́ющимся благи́й успе́х, путеше́ствующим путь безпреткнове́нный, в мо́ри пла́вающим приста́нище ти́хое, плене́нным осла́бу и освобожде́ние, си́рым по́мощь и заступле́ние, во́инству на́шему ве́рность, му́жество и побе́ду и всем нам вся поле́зная ко вре́менней и ве́чней жи́зни. Да, любо́вию твое́ю огражде́ннии, благода́рственная всегда́ пое́м просла́вившему тя Го́споду Иису́су Христу́, Ему́же подоба́ет вся́кая сла́ва и честь со Безнача́льным Его́ Отце́м и с Пресвяты́м и Животворя́щим Его́ Ду́хом во ве́ки веко́в. Ами́нь.
