Служба преподобнаго Феоктиста (XIV в.), бывшаго Драгутина, краля Сербскаго
ВЕ́ЧЕР
На Го́споди, воззва́х: предваря́ет самогла́сен дне, два́жды, и му́ченичен, и подо́бны Трио́ди 3, та́же преподо́бнаго на 4, стихи́ры самогла́сны, глас 5:
Покая́ния огне́м попали́л еси́ греха́ ве́щь, преподо́бне,/ возненави́дев жите́йския молвы́ и тя́жесть бога́тства,/ сла́дость же теле́сную измени́л еси́/ кро́тким а́нгельским подо́бием/ и со сожи́тельницею свое́ю два́десят и три лет/ чи́сто и свя́то, я́ко со сестро́ю, пожи́л еси́,/ тем тя пое́м и ублажа́ем.
Возложи́в Бо́гу себе́ сама́го,/ послужи́л еси́ Ему́ де́лы милосе́рдия,/ раздава́я тре́бующим мно́гая дарова́ния,/ благода́тию же Ду́ха Свята́го/ стяжа́л еси́ смире́нную му́дрость/ и ли́ку преподо́бных причта́лся еси́,/ тем тя мо́лим, о́тче Феокти́сте,/ с ни́миже помина́й нас,/ на земли́ тебе́ помина́ющих.
На земли́ до́бре пожи́л еси́,/ мирска́го пристра́стия отбе́гл еси́,/ житие́ же свое́ удобри́в доброде́тельми,/ отгна́л еси́ тьму́ ересе́й, му́дре,/ терпе́ние же стяжа́в мно́гое,/ ве́ру, воздержа́ние и и́стинну любо́вь,/ показа́лся еси́ оте́ц сиро́т,/ вдови́ц предста́тель сострада́телен и смире́н,/ сего́ ра́ди ве́рно тя вси восхваля́ем.
Кро́ток, непоро́чен, незло́бив/ и преподо́бен был еси́,/ благоуми́лен и тих ду́хом,/ себе́ самому́ наложил еси́ мно́жайша терпе́ния та́йная/ и был еси́ му́ченик без кро́ве,/ те́мже мо́лим тя,/ не забу́ди нас, ве́рныя лю́ди твоя́,/ и́же тя благоче́стно почита́ем.
Сла́ва, глас 2:
А́ще и владе́тель на земли́ был еси́,/ но, после́дуя стопа́м преподо́бно пожи́вших на земли́,/ яви́лся еси́ сострада́телен и смире́н/ и Боже́ственныя любве́ испо́лнен,/ тем и сочета́лся еси́ преподо́бным и всем избра́нным,/ с ни́миже тя мы почита́ем и сла́вим.
И ны́не, Богоро́дичен, глас то́йже: Пре́йде се́нь зако́нная:
Вход. Проки́мен. И чте́ния дне и преподо́бнаго 3.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (гла́вы 5 и 6):
Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
И про́чее после́дование преждесвяще́нныя. А́ще же не соверша́ется Литурги́я преждеосвяще́нная, пое́м на стихо́вне Трио́ди самогла́сен дне, два́жды, и му́ченичен.
Сла́ва, преподо́бнаго, глас 6:
Жи́знь твою́ на земли́ целому́дренно соверши́л еси́,/ преподо́бне о́тче Феокти́сте,/ с му́дростию, ю́же име́л еси́,/ бога́тство всеразли́чно богому́дренне раздава́л еси́,/ помога́я сооруже́нию и обновле́нию мно́гих оби́телей и хра́мов,/ после́дуя же преподо́бно живу́щим,/ поко́й обре́л еси́ души́ твое́й.
И ны́не, Богоро́дичен, глас то́йже: Богоро́дице, Ты еси́ лоза́ и́стинная:
Тропа́рь, глас 4:
Боже́ственнаго стра́ха огне́м ду́шу свою́ распали́л еси́,/ очи́стився покая́нием и украси́вся кро́тостию и смире́нием,/ восте́кл еси́ к невече́рнему Све́ту – Христу́,/ преподо́бне о́тче Феокти́сте,/ и ны́не, трисо́лнечным све́том озаря́емь,/ на Небеси́ лику́еши,/ моли́ о нас, ве́рою почита́ющих честну́ю па́мять твою́.
Сла́ва, и ны́не, Богоро́дичен.
НА У́ТРЕНИ
По шестопса́лмии ектения́ и посе́м Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен воскре́сен и обы́чныя кафизмы.
По 1-й и но 2-й кафизме седа́льны Трио́ди. Ектени́й же не глаго́лем. По 3-й же кафизме глаго́лет иере́й ектению́ ма́лую.
Та́же седа́лен, глас 4:
Укрепля́емь си́лою свы́ше,/ победи́л еси́ вся неви́димых враг ополче́ния,/ те́мже, возше́д на высоту́ доброде́телей,/ возведи́ и нас на го́ру Боже́ственнаго ра́зума.
Сла́ва, глас то́йже:
Ми́лостынею на земли́ стяжа́л еси́ Небе́сная,/ терпе́нием же и смире́нием дости́гл еси́ высо́кая,/ ны́не же неизрече́нным све́том сия́я,/ просвети́ и на́ша помышле́ния.
И ны́не, Богоро́дичен, глас то́йже:
Пречи́стеи ру́це Твои́, Де́во Ма́ти, просте́рши,/ покры́й ны, на Тя упова́ющия и Сы́ну Твоему́ зову́щия:/ всем пода́ждь, Христе́, ми́лости Твоя́.
А́ще ли суббо́та, кроме́ пе́рвыя неде́ли поста́, по 1-й кафизме седа́лен: Укрепля́ем си́лою свы́ше: два́жды.
Сла́ва, и ны́не, Богоро́дичен, глас 4:
Прему́дрость и Сло́во О́тчее несказа́нно ро́ждшая,/ души́ моея́ лю́тую уврачу́й я́зву/ и се́рдца боле́знь укроти́.
По 2-й кафи́зме седа́лен: Ми́лостынею на земли́: два́жды. Сла́ва, и ны́не, Богоро́дичен, глас то́йже: Пречи́стеи ру́це Твои́:
По полиеле́и седа́лен, глас 5:
Нескве́рнен храм Тро́ицы соде́лал еси́ се́рдце и ду́шу свою́,/ хра́мы же свяще́нныя Го́споду в хвалу́ созда́л еси́/ си́лою же Боже́ственною истреби́л еси́ собо́рище ересе́й,/ упраздня́я сих губи́тельное зломы́слие.
Сла́ва, и ны́не, Богоро́дичен, глас то́йже:
Храм яви́лася еси́ Емману́ила и две́рь,/ е́юже Еди́н вни́де и изы́де, я́коже Сам ве́сть,/ Того́ моли́, Богора́дованная, от рабо́ты грехо́вныя изба́вити вся,/ при́сно блажа́щия Тя ве́рно.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Высо́к благоро́дием, изя́щен благоду́шием,/ ра́зума му́дростию и чистото́ю сия́я,/ све́тлым смире́нием и благоче́стием себе́ украси́л еси́/ и всех удиви́л еси́,/ Феокти́сте Богоблаже́нне.
Кано́н, его́же краегране́сие: Преподо́бнаго пою́ Феокти́ста. В Богоро́дичнах же и в седа́льне: про́та Ми́рко. Глас 7.
Песнь 1
Ирмо́с: От струй Чермна́го/ сте́ну сотво́ршему лю́дем/ и покры́вшему глубино́ю фарао́на со всево́инством,/ пои́м Го́сподеви, сла́вно бо просла́вися.
Преподо́бнаго Феокти́ста, уго́дника Твоего́,/ пе́ти отве́рзи ми, Христе́, устне́/ и разори́ о́блак неве́дения моего́.
Разу́мно в коне́ц уклони́вся бесо́вския тьмы́ и мглы страсте́й,/ сочета́лся еси́ ли́ку мона́шествующих,/ соверши́в тече́ние твоего́ му́жества.
Ему́же служи́л еси́, Христу́, моли́ся вы́ну,/ да изба́вит от зла и просвети́т вся, пою́щия тя.
Богоро́дичен: Превы́шшую Херуви́м, высоча́йшу Небе́с,/ лу́чшую тва́ри, му́дрых му́чеников огражде́ние,/ еди́ну Богоро́дицу пе́сньми почти́м.
Песнь 3
Ирмо́с: На вода́х зе́млю основа́вый,/ Сло́ве, Христе́ Бо́же,/ и на́ша сердца́ сла́вити Тя утверди́.
Пронза́емь жела́нием чистоты́,/ ца́рское владе́ние премени́л еси́,/ возлюби́в па́че сладча́йшее А́нгельское подо́бие.
Оте́честву своему́ ве́рен блюсти́тель был еси́,/ отгоня́я от него́ вся ересе́й па́губная уче́ния.
Достохва́льне Феокти́сте блаже́нне,/ моли́ Христа́ Бо́га исцеле́ние и спасе́ние да́ти всем,/ с ве́рою к тебе́ притека́ющим и в по́мощь тя призыва́ющим.
Богоро́дичен: Родила́ еси́ без се́мене Бо́га Спа́са/ и пребыла́ еси́ па́ки Де́ва, стра́нно чу́до./ Тем Тя, Ма́терь Емману́илеву, благоче́стно испове́дуем.
Седа́лен, глас 2:
О́браз быв и́стиннаго покая́ния и смире́ния,/ совокупи́лся еси́ ли́ку преподо́бных оте́ц,/ с ни́миже помина́й, мо́лим тя, и нас,/ и вся пою́щия и хва́лящия тя.
Сла́ва, и ны́не, Богоро́дичен, глас то́йже:
Ты же́нское поползнове́ние испра́вила еси́,/ ро́ждши Сло́ва Христа́, исправля́юща низве́рженныя,/ и ве́рных утвержде́ние Ты еси́,/ мы же наде́ждею Твое́ю крепи́мся и любо́вию Тя непреста́нно сла́вим.
Песнь 4
Ирмо́с: Услы́шах слух Твой, Го́споди,/ я́ко яви́лся еси́ на земли́,/ за е́же спасти́ ны,/ тем вопие́м: сла́ва си́ле Твое́й, Го́споди.
О́тче Феокти́сте приснопа́мятне,/ не преста́й приле́жно моли́ти о нас,/ да изба́вимся от вся́кия ско́рби твои́ми моли́твами.
Боголе́пно сконча́в житие́ твое́ на земли́, восприи́м а́нгельское подо́бие,/ жене́ же и сы́ну своему́ Владисла́ву сове́товал еси́/ разу́мно жи́ти и оте́чество блюсти́.
Неподви́жима и кре́пка тя столпа́ ве́дуще,/ се дне́сь, вси лю́дие, му́жи и же́ны, ста́рцы со младе́нцы,/ всяк во́зраст и вся́ко состоя́ние,/ све́тло тя пра́зднуем.
Богоро́дичен: Апо́столов ра́дость, преподо́бных же удобре́ние/ Тя, Богоро́дице, мо́лим ве́рно:/ ра́дости ве́чныя сподо́би ны, пою́щия Тя непреста́нно.
Песнь 5
Ирмо́с: У́тренюет дух мой к Тебе́, Бо́же,/ зане́ Свет еси́/ и Твоя́ повеле́ния бы́ша исцеле́ния рабо́м Твои́м,/ Человеколю́бче.
А́ще и во бра́ке был еси́,/ но благослове́нное целому́дрие соблю́л еси́,/ отбега́в сла́дости привре́менныя.
Глаго́л Бо́жий нося́ в се́рдцы свое́м,/ и́мже жил еси́,/ и́мже и благосла́вно тече́ние преподо́бно сконча́л еси́.
Огня́, и му́ки, и вся́каго искуше́ния/ изба́ви мольба́ми твои́ми вся,/ светоно́сную па́мять твою́ соверша́ющия и благоче́стно тя блажа́щия.
Богоро́дичен: Мно́гими беда́ми содержи́маго и молво́ю греха́ бе́дствуемаго,/ наста́ви мя к безво́лненному стремле́нию тишины́ Ду́ха,/ Ты бо еси́ приста́нище христиа́н,/ тем Тя пое́м во вся ве́ки.
Песнь 6
Ирмо́с: Возопи́х, Го́споди,/ внегда́ скорбе́ти ми к Тебе́,/ углебо́х бо в тиме́нии глубины́ прегреше́ний мно́гих,/ и, я́влься, возведи́ мя от тли.
Па́мять твоя́ возсия́ нам дне́сь,/ све́том невеще́ственным просвеща́ющая сердца́ на́ша,/ моле́бно тя ве́рою восхваля́ющих.
Отце́в преподо́бных ли́ку сопричасти́вся,/ сконча́л еси́ ми́рно житие́ свое́,/ тем ны́не с ни́ми на Небесе́х сликовству́еши.
Ю́ностныя преступле́ния и́стинным покая́нием упраздни́л еси́,/ слеза́ми же ду́шу очи́стив,/ преподо́бно усну́л еси́.
Богоро́дичен: Изба́ви мя вся́каго сопроти́внаго прило́га змии́на,/ Ма́ти Де́во Чи́стая,/ и се́рдце мое́ просвети́ ве́рою Тя сла́вящаго, Всенепоро́чную.
Конда́к, глас 7:
Ве́рою и́стинною укра́шен быв,/ просия́л еси́ доброде́тельми,/ хра́мы и оби́тели ще́дро помога́л еси́,/ богоми́лов же душетли́тельную е́ресь искорени́л еси́,/ сего́ ра́ди вопие́м ти:/ преподо́бне Феокти́сте, блаже́нне,/ со все́ми преподо́бными предстоя́ Христу́,/ моли́ся о всех нас.
И́кос:
Зако́н Бо́жий от души́ возлюби́в,/ зрел еси́ к жи́зни гряду́щей,/ сосу́д был еси́ доброде́тели,/ о че́сти земне́й и сла́сти небре́г,/ пло́ть же свою́, я́коже рабы́ню, ду́ху покори́л еси́,/ отста́вив тле́ную и мимотеку́щую сла́ву,/ восприя́л еси́ ца́рство нетле́нное,/ сего́ ра́ди вопие́м ти:/ преподо́бне Феокти́сте, блаже́нне,/ со все́ми преподо́бными предстоя́ Христу́,/ моли́ся о всех нас.
Песнь 7
Ирмо́с: А́нгелом о́троки в пещи́ спасы́й/ и пла́мень в ро́су им преложи́вый,/ благослове́н еси́, Го́споди,/ Бо́же оте́ц на́ших.
Фимиа́м благоуха́нен ты еси́,/ отгоня́яй злосмра́дие е́реси богоми́льския,/ тя велича́ем и приле́жно мо́лим:/ при́зри и ны́не на лю́ди вопию́щия:/ благослове́н еси́, Го́споди, Бо́же оте́ц на́ших.
Единонра́вен преподо́бным яви́лся еси́,/ не пощаде́в пло́ти своея́ любве́ ра́ди Боже́ственныя,/ ны́не же моли́ся за ны песнопою́щия:/ благослове́н еси́, Го́споди, Бо́же оте́ц на́ших.
Одр име́л еси́ гроб, ка́мением и те́рнием постла́ный,/ изнуря́я пло́ть свою́ любве́ ра́ди Бо́жия,/ душе́ю же всегда́ взыва́л еси́:/ благослове́н еси́, Го́споди, Бо́же оте́ц на́ших.
Богоро́дичен: Ро́ждшая Жи́знь, умертви́вшую смерть,/ живу́щий мой грех умертви́, Де́во Ма́ти Пречи́стая,/ да вы́ну Тя вси велича́ем.
Песнь 8
Ирмо́с: Пе́щь, дре́вле огне́м опаля́емую,/ Богочести́вии попра́ша о́троцы,/ не бо стра́ху мучи́телеву покори́шася,/ но, любо́вию же па́че Богоче́стия пали́ми, глаго́лаху:/ благослови́те, вся дела́ Госпо́дня, Го́спода.
Ко́ль вели́ко отечестволю́бие твое́, ве́ми вси,/ и́бо пре́жде сме́рти свое́й жене́ и сы́ну Владисла́ву глаго́лал еси́:/ разу́мно жи́ти и оте́чество блюсти́,/ сла́ву же Бо́гу возноси́ти, вопию́ще:/ благослови́те, вся дела́ Госпо́дня, Го́спода.
Ты еси́ вели́чие на́ше и похвала́, Богому́дре Феокти́сте,/ от скве́рны богоми́льския тобо́ю свободи́хомся и научи́хомся пе́ти:/ благослови́те, вся дела́ Госпо́дня, Го́спода.
Иа́спис ду́хом был еси́, просиява́ющий мно́гими доброде́тельми,/ ны́не же на Небесе́х непреста́нно вопие́ши:/ благослови́те, вся дела́ Госпо́дня, Го́спода.
Богоро́дичен: Кра́сну и избра́нну всечи́стую разуме́в Тя Сын Бо́жий, Всенепоро́чная,/ Сын Твой бы́сть,/ сы́ны сотвори́ благода́тию, Богоро́дицу Тя чту́щия.
Песнь 9
Ирмо́с: Воплоще́ннаго Сло́ва безсе́менно от Тебе́/ боголе́пно родила́ еси́,/ Де́во Богоро́дице,/ и Тя велича́ем.
Столп доброде́телей яви́лся еси́,/ та́йно подвиза́яся и ко всем милосе́рдствуя,/ помина́й нас, твоя́ певцы́,/ да тя непреста́нно велича́ем.
Твой све́тлый пра́здник соверша́юще, мо́лим тя, преподо́бне:/ моли́ся Христу́ Бо́гу, оте́чество твое́ сохрани́ти/ и мир дарова́ти ро́ду се́рбскому,/ да тя всегда́ велича́ем.
А́нгели дне́сь сликовству́ют с на́ми, в песнопе́нии па́мяти твое́й,/ ты же не забу́ди нас,/ но твои́ми моле́нии от напа́стей, бед и скорбе́й спаси́ нас,/ да тя вси велича́ем.
Богоро́дичен: Ору́жие на́ше и стена́ Ты еси́, Богоро́дице,/ и заступле́ние к Тебе́ прибега́ющим,/ Тебе́ и ны́не на моли́тву подвиза́ем,/ изба́ви нас от враг на́ших,/ да Тя вси велича́ем.
Свети́лен:
Свы́ше озаря́ем Боже́ственным све́том,/ просия́л еси́ доброде́тельми, еще́ в ми́ре быв,/ мона́шески подвиза́лся еси́,/ напосле́док восприи́м а́нгельский о́браз,/ к Све́ту невече́рнему преше́л еси́.
Сла́ва, и ны́не, Богоро́дичен:
Свет ро́ждшая, Чи́стая,/ просвети́ о́чи души́ моея́,/ да не пости́гнет мя глубоча́йшая тьма́ грехо́вная,/ ниже́ глубина́ отча́яния да покры́ет мя,/ но спаси́ мя и окорми́ ко приста́нищу Боже́ственнаго хоте́ния.
На хвали́тех стихи́ры на 4, глас 4:
А́ще и владе́тель был еси́,/ но покая́ние па́че всех возлюби́л еси́,/ и́мже и безстра́стием житие́ свое́ украша́л еси́,/ доброде́тельми же просия́в, Богоблаже́нне Феокти́сте,/ благоче́стно черто́г измени́л еси́./ Те́мже у Престо́ла Всецаря́ предстоя́,/ не преста́й моля́ся за ве́сь род свой.
А́ще и владе́тель был еси́,/ но те́сным путе́м ходи́ти возжеле́л еси́,/ во́лею черто́г гро́бом измени́л еси́,/ ктому́ же о́стрым ка́мением и те́рнием постла́ным,/ и, та́ко та́йно подвиза́яся, Богому́дре Феокти́сте,/ в нетле́ния приста́нище я́ве дости́гл еси́.
Прииди́те, лю́дие,/ ублажи́м Феокти́ста Богоизбра́ннаго,/ покая́нием себе́ очи́стившаго/ и сама́го себе́ Бо́гу возложи́вшаго,/ черто́г, и́же на земли́, Небе́сным премени́вшаго,/ и́бо со сожи́тельницею свое́ю вя́щше не́жели два́десят лет,/ чи́сто и свя́то пожи́вшаго, я́коже со сестро́ю,/ и возопии́м ему́:/ не преста́й моля́ся за ны, о́тче преподо́бне.
Воспои́м дне́сь Феокти́ста блаже́ннаго,/ и́стинным покая́нием ю́ностныя преступле́ния упраздни́вшаго/ и слеза́ми ду́шу очи́стившаго,/ доброде́тельми просия́вшаго,/ богоми́лов же душетле́нную е́ресь искорени́вшаго,/ и помо́лимся ему́:/ Богоблаже́нне о́тче,/ моли́ся со все́ми преподо́бными/ о спасе́нии душ на́ших.
Сла́ва, глас 6:
Торжеству́й дне́сь ве́село, вся земле́ Се́рбская,/ лику́й и весели́ся, Це́рковь Бо́жия,/ пра́зднующи па́мять Феокти́ста Богому́драго,/ пе́ньми и пе́сньми духо́вными восхваля́ющи его́ и вопию́щи:/ не забу́ди род свой на земли́, о́тче преподо́бне,/ но при́сно моли́ Христа́ Бо́га,/ во е́же спасти́ всех нас.
И ны́не, Богоро́дичен, глас то́йже:
Испроси́ нам долго́в разреше́ние/ и жития́ исправле́ние,/ славосло́вящим вели́чия Твоя́,/ Благослове́нная Ма́ти Бо́жия,/ и благочести́вым ра́зумом Тя сла́вящим.
На стихо́вне в Трио́ди, самогла́сен, два́жды, и му́ченичен. Сла́ва, свята́го, глас 5, самогла́сен:
Соверши́в до́бре тече́ние,/ получи́л еси́ ко Христу́ восхожде́ние,/ и́бо, зако́н Бо́жий от души́ возлюби́в,/ зрел еси́ вы́ну к жи́зни гряду́щей,/ те́мже, соше́дшеся в па́мять твою́,/ велича́ем Христа́ Бо́га на́шего,/ прославля́ющаго уго́дники Своя́.
И ны́не, Богоро́дичен, глас то́йже:
Еди́на, украси́вшая челове́чество рождество́м Твои́м, Прекра́снейшая,/ еди́на бо родила́ еси́ Творца́ всех,/ изба́ви нас от се́ти льсти́ваго врага́/ и поста́ви нас на ка́мени Христо́вых хоте́ний,/ Того́ моля́щи приле́жно/ мир да́ти нам, и спасе́ние, и ве́лию ми́лость.
Та́же Трисвято́е, тропа́рь, ектения́ и три покло́ны вели́кия, час 1-й с кафизмою и отпу́ст. А́ще ли суббо́та, на стихо́вне не пое́м, но пое́м славосло́вие вели́кое.
НА ЛИТУРГИ́И
А́ще суббо́та, Блаже́нны преподо́бнаго, пе́сни 3-я и 6-я, и про́чая слу́жба преподо́бническая.
