Служба преподобнаго Феодосия Терновскаго, иже на Кефаларстей горе постившегося

НА МАЛОЙ ВЕЧЕ́РНИ

На Го́споди, воззва́х : поста́вим стихо́в 4 и пое́м стихи́ры, глас 1.

Подо́бен: Небе́сных чино́в

Житию́ А́нгельскому поревнова́в, преблаже́нне,/ и ми́ра сего́ су́етную красоту́ ни во что́же вмени́в,/ Небе́сное бога́тство усе́рдно взыска́л еси́/ и обогати́лся еси́ Боже́ственными доброде́тельми./ Те́мже мо́лим тя:/ обнища́вших ны Боже́ственнаго ра́зума обогати́ благода́тию,/ о́тче Феодо́сие.

В чистоте́ и целому́дрии пожи́ти изво́лив,/ плоть твою́ в посте́х и моли́твах истни́л еси́,/ всего́ же себе́ воздержа́нием очи́стив,/ ум и ду́шу просвети́л еси́./ Те́мже мо́лим тя:/ просвети́ очеса́ душ на́ших,/ я́ко да воспое́м по достоя́нию по́двиги и труды́ твоя́,/ о́тче Феодо́сие.

Пе́рвый насе́льник пусты́ни Кефала́рския быв,/ мно́жество и́ноков в ней собра́л еси́ к славосло́вию Бо́жию,/ наставля́я их презира́ти/ су́етнаго ми́ра красоту́/ и иска́ти Небе́снаго жи́тельства./ Те́мже А́нгелом единовсе́льники сотвори́л еси́ я,/ о́тче Фео́досие.

Го́рькое и му́тное ерети́ческое уче́ние/ из Це́ркве Христо́вы му́жественно отве́рг/ и Правосла́вия догма́ты ре́вностию в ней утверди́в,/ в благоче́стии соблю́л еси́ лю́ди твоя́./ Те́мже и мы, ча́да твоя́,/ благода́рственно почита́ем всечестну́ю па́мять твою́,/ о́тче Феодо́сие.

Сла́ва, глас 2:

Отве́ргся ми́ра и су́щих в ми́ре всех,/ Ева́нгельски неукло́нно Христу́ после́довал еси́,/ с Ним непреста́нно пребыва́ти изволя́я;/ по́стническим же житие́м плоть твою́ коне́чне изнури́л еси́/ и человекоуби́йцу зми́я удави́л еси́./ Ны́не же на Небесе́х со А́нгелы водворя́яся,/ преподо́бне о́тче Феодо́сие,/ моли́ о нас, почита́ющих честну́ю па́мять твою́.

И ны́не, Богоро́дичен: Все упова́ние мое́:

На стихо́вне стихи́ры глас 2.

Подо́бен: До́ме Евфра́фов:

Звезду́, из Те́рнова возсия́вшую/ и всех Болга́р просвети́вшую,/ пе́сньми восхва́лим,/ я́ко вся в нощи́ неве́дения наставля́ющую/ и к све́ту Богоразу́мия приводя́щую.

Стих: Честна́ пред Го́сподем/ смерть преподо́бных Его́.

Дом Ду́ха Свята́го был еси́, Феодо́сие,/ внутрь себе́ име́я сло́во прему́дрости,/ и́мже ерети́ческия победи́л еси́ полки́,/ утверди́л еси́ в ве́ре/ царя́ и лю́ди.

Стих: Блаже́н муж, боя́йся Го́спода,/ в за́поведех Его восхо́щет зело́.

Сый в дому́ Отца́ Небе́снаго/ и наслажда́яся зре́нием Неви́димаго,/ Феодо́сие блаже́нне,/ не преста́й моля́ся/ спасти́ся душа́м на́шим.

Сла́ва, и ны́не, Богоро́дичен, глас и подо́бен то́йже:

Ра́дуйся, Мари́е Богоро́дице,/ хра́ме неразруши́мый,/ па́че же святы́й,/ я́коже вопие́т проро́к:/ свят храм Твой, ди́вный в пра́вде.

Тропа́рь, глас 3: В блаже́ннем безмо́лвии: (зри день сей ни́же).

Сла́ва, и ны́не, Богоро́дичен: Тя, хода́тайствовавшую спасе́ние ро́да на́шего:

НА ВЕЛИ́ЦЕЙ ВЕЧЕ́РНИ

Пое́м Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры самогла́сны, глас 1:

Мир возненави́дев, Христа́ возлюби́л еси́/ и Сио́на мы́сленнаго жи́тель бы́ти поревнова́л еси́,/ блаже́нне Феодо́сие,/ наказа́нием же учи́теля твоего́/ послуша́ния соверше́ннаго дости́гл еси́/ и искуше́ний мно́жество побе́дне претерпе́л еси́./ Те́мже, Боже́ственным себе́ вооружи́в,/ к боре́нию льсти́ваго, ра́дуяся, изше́л еси́/ и сего́ победи́л еси́/ си́лою из Де́вы Возсия́вшаго.

От ю́ности целому́дренне/ плотска́я мудрова́ния покори́в ду́ху/ и в живоно́сную ме́ртвость оде́явся,/ свети́льник яви́лся еси́ пресве́тлый,/ блаже́нне Феодо́сие;/ благода́ти же испо́лнен Боже́ственнаго Ду́ха,/ и́стинный па́стырь показа́лся еси́,/ и слове́сною цевни́цею/ собра́нное о Христе́ ста́до до́бре упа́сл еси́,/ и на па́жить ра́йскую возве́л еси́.

Зре́ти жела́я мы́сленную све́тлость/ Боже́ственнаго светоли́тия/ и жития́ вожделе́в невеще́ственнаго,/ мирска́я вся презре́л еси́,/ пусты́ню душе́вную возде́лал еси́/ и сию́ слеза́ми напои́л еси́./ Жела́ние же улучи́в Влады́це твоему́ предстоя́ния,/ ны́не со А́нгелы на Небеси́/ священноле́пно ликовству́еши и мо́лиши/ спасти́ся душа́м на́шим.

И́ны стихи́ры, глас 4.

Подо́бен: Свы́ше зва́нный:

Усе́рдно к и́ноческому житию́ прите́к,/ наста́ви тя Бог к равноа́нгельному Григо́рию,/ я́ко да иску́с прии́м,/ дея́нию и виде́нию от него́ научи́шися/ и бу́деши избра́нный сосу́д благода́ти, о́тче Феодо́сие./ Те́мже, творя́ще честну́ю па́мять твою́, мо́лим:/ не забу́ди о нас сро́днаго промышле́ния,/ но моли́ спасти́ся душа́м на́шим.

Богоме́рзское хуле́ние иуде́йское не стерпе́в,/ дерзнове́нно царя́ и цари́цу,/ вку́пе же и патриа́рха к ре́вности возста́вил еси́/ и собо́ру бы́ти тех упроси́л еси́, о́тче Феодо́сие,/ иде́же му́жественно на богохули́телей стал еси́/ и злове́рие их обличи́л еси́./ Те́мже, почита́юще честну́ю па́мять твою́, мо́лим:/ моли́ся о душа́х на́ших.

Неукло́нно ца́рским путе́м ше́ствуя/ и вся ко́зни вра́жия я́сно зря,/ дея́нием те́ло очи́стил еси́/ и виде́нием ду́шу просвети́л еси́,/ безпрепя́тно во́лны ми́ра сего́ преплы́л еси́/ и к го́рнему235 приста́нищу дости́гл еси́, о́тче Феодо́сие,/ иде́же ны́не несы́тно зри́ши Христа́./ Те́мже, почита́юще честну́ю па́мять твою́, мо́лим:/ моли́ся о душа́х на́ших.

Сла́ва, глас 8:

Ца́рскаго лица́ и патриа́ршаго не устыде́вся,/ ниже́ хитросплете́нных слове́с ересе́й убоя́вся,/ дерзнове́нно на собо́ре пропове́дал еси́/ в Трие́х Ли́цех Еди́наго Бо́га/ и Еди́наго Христа́, Бо́га же и Челове́ка;/ иуде́йское у́бо единоли́чие, и Саве́лиево слия́ние,/ и про́чих всех злоче́стие посрами́в,/ ве́рныя просвети́л еси́/ и в благоче́стии утверди́л еси́./ Ны́не же я́ко побо́рника Це́ркве Правосла́вныя/ тя почита́юще, Феодо́сие, мо́лим:/ моли́ся о душа́х на́ших.

И ны́не, Богоро́дичен: Царь Небе́сный:

Вход. Проки́мен дне. Чте́ния 3, преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры самогла́сны. Глас 2:

Уподо́бился еси́ пчеле́ трудолю́бней,/ обходя́ оби́тели и взыску́я духо́внаго ме́да,/ до́ндеже по се́рдцу обре́л еси́ духо́вный у́лей, Григо́рия,/ и́мже и наста́влен быв на по́двиги,/ многоле́тне потруди́лся еси́ в посте́ и безмо́лвии/ и просия́л еси́ благода́тию./ Ны́не же во све́тлостех Святы́я Тро́ицы водворя́яся,/ помина́й ны, творя́щия честну́ю па́мять твою́.

Глас 6:

Удиви́ся наста́вник твой,/ вели́кий Григо́рий,/ в тебе́ зря воздержа́ние чрезме́рное,/ и внима́ше мы́слию,/ хотя́щая ти напосле́док бы́ти, Феодо́сие;/ ви́дев бо твое́ по Бо́зе житие́,/ вра́жиими прило́ги ника́коже коле́блемое,/ свиде́тельствоваше оте́ц к бра́тии, вопия́:/ се ме́ньший в нас последи́ в пу́стыни/ вели́кий свети́льник и́мат бы́ши Бо́га на́шего.

Глас 8:

Житие́ по Бо́зе испра́вив/ наказа́нием отца́ твоего́,/ дея́нию и виде́нию от него́ научи́лся еси́,/ Богоявле́нне Феодо́сие;/ жела́нием бо Боже́ственным му́дрость возлюби́в,/ Ду́ха благода́тию обогати́лся еси́/ и, я́ко сот ме́да, сла́дость слове́с твои́х иска́пая,/ при́сно весели́ши ра́зумы Боже́ственными Це́рковь Бо́жию./ Те́мже на Небесе́х ны́не водворя́яся,/ о нас непреста́нно моли́,/ соверша́ющих честну́ю па́мять твою́.

Глас 4:

Бо́жиим изволе́нием/ в пусты́ни Кефала́рстей всели́лся еси́/ и исто́чник медото́чных слове́с яви́лся еси́,/ источа́яй Боже́ственныя догма́ты благоче́стия./ Те́мже по вселе́нней про́йде слух твой,/ Бо́гу прославля́ющу тя, о́тче,/ и стеко́шася к тебе́ мно́жества,/ я́коже еле́ни, жа́ждущии воды́ живо́тныя,/ и́щуще напое́ния благода́ти./ Но и ны́не не преста́й моля́ся о восхваля́ющих тя,/ прося́ нам оставле́ния грехо́в и спасе́ния душ на́ших.

Сла́ва, глас 5:

Де́ланием доброде́телей/ Це́ркви вели́кое возсия́л еси́ со́лнце/ и сия́нием слове́с твои́х просвети́л еси́/ ве́рных люде́й собо́ры;/ столп и утвержде́ние Це́ркве Христо́вы быв,/ сию́ непоколеби́му/ от искуше́ний лука́ваго соблю́л еси́,/ вся бо ересе́й разори́л еси́ злоде́йства,/ и лю́ди твоя́ научи́л еси́/ Тро́ице покланя́тися Единосу́щней,/ и просвети́л еси́ Це́рковь Бо́лгарскую/ па́че со́лнечных луч сия́ти чистото́ю,/ я́же, моли́твами твои́ми неруши́ма,/ краси́тся да́же доны́не./ Те́мже, соше́дшеся и благодаря́ще Бо́га,/ да́вшаго ти благода́ть такову́ю,/ вку́пе и тя почита́ем,/ Феодо́сие, Богому́дре о́тче.

И ны́не, Богоро́дичен:

Ра́дуйся, две́ре Госпо́дня непроходи́мая;/ ра́дуйся, стено́ и покро́ве притека́ющих к Тебе́;/ ра́дуйся, необурева́емое приста́нище и Неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й/ о воспева́ющих и кла́няющихся Рождеству́ Твоему́.

На стихо́вне стихи́ры, глас 8.

Подо́бен: О, пресла́внаго чудесе́:

Преподо́бне Феодо́сие, о́тче наш,/ ты столп непоколеби́м Христо́вы Це́ркве был еси́,/ Боже́ственною бо ре́вностию разже́гся,/ ерети́ческия ба́сни дерзно́венно разори́л еси́,/ царя́ и лю́ди утвержда́я/ в догма́тех благоче́стия;/ те́мже я́ко па́стырь до́брый/ послужи́л еси́ лю́дем твои́м/ во сла́ву Христа́ Бо́га на́шего,/ Его́же моли́ спасти́/ любо́вию почита́ющих честну́ю па́мять твою́.

Стих: Честна́ пред Го́сподем/ смерть преподо́бных Его́.

Преподо́бне Феодо́сие, о́тче наш,/ ты свети́льник яви́лся еси́ слове́сный/ и язы́к Богоглаго́ливый,/ Боговеща́нным бо гла́сом весьма́ подвиза́вся/ во сла́ву Бо́жию, Богому́дре,/ апо́столов был еси́ подража́тель./ Те́мже ре́вностию всех посрами́в,/ насле́дник показа́лся еси́ Ца́рствия Христа́ Бо́га на́шего,/ Его́же моли́ спасти́/ любо́вию почита́ющих честну́ю па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Преподо́бне Феодо́сие, о́тче наш,/ се приидо́ша Бо́лгарская мно́жества/ днесь честно́е твое́ торжество́/ благоче́стно пе́сньми восхвали́ти,/ ты бо вои́стину воздержа́нием те́ло удручи́в/ и моли́твою ду́шу просвети́в,/ чистото́ю просия́л еси́,/ я́коже заря́ Све́та Трисо́лнечнаго,/ и ны́не на Небеси́, наслажда́яся ве́чнаго блаже́нства,/ непреста́нно мо́лиши Христа́ Бо́га на́шего/ спасти́ любо́вию почита́ющих честну́ю па́мять твою́.

Сла́ва, глас 6:

Звезда́ светоза́рная,/ во гра́де Те́рновстем возсия́л еси́/ уче́ньми слове́с твои́х,/ всеблаже́нне Феодо́сие приснопа́мятне./ Яви́л бо ся еси́ му́дрый пропове́датель/ и благоче́стия побо́рник,/ царя́ и лю́ди утвержда́я Правосла́вием./ Те́мже восхваля́ем тя, глаго́люще:/ ра́дуйся, от утро́бы ма́терни Бо́гом избра́нный/ оте́честву твоему́ в наста́вника;/ ра́дуйся, я́ко меч обоюдуо́стрый,/ посеца́яй ерети́ческая злоче́стия;/ ра́дуйся, мери́ло изве́стное,/ всех наставля́ющее ко стези́ спасе́ния./ Христа́ Бо́га на́шего моля́ не преста́й/ спасти́ род наш.

И ны́не, Богоро́дичен, глас то́йже: Творе́ц и Изба́витель мой:

На благослове́нии хле́бов тропа́рь преподо́бнаго два́жды и Богоро́дице Де́во: еди́ножды.

Тропа́рь преподо́бнаго, глас 3.

Подо́бен: Боже́ственныя ве́ры:

В блаже́ннем безмо́лвии пусты́ннем/ и на собо́рех, любо́вию к Бо́гу горя́,/ посрами́л еси́ лука́вых бесо́в и ерети́к злочести́вых./ На моли́тве же стоя́, огня́ све́тлостию просия́л еси́/ и преставле́нием твои́м А́нгелов пою́щих обвесели́л еси́,/ Феодо́сие, о́тче наш,/ се́го ра́ди мо́лим тя:/ моли́ся о душа́х на́ших.

НА У́ТРЕНИ

На Бог Госпо́дь: тропа́рь преподо́бнаго два́жды. Сла́ва, и ны́не, Богоро́дичен: Тя, хода́тайствовавшую:

По 1-м стихосло́вии седа́лен, глас 8.

Подо́бен: Прему́дрость и Сло́во:

К прему́дрости сло́ва доброде́тель приложи́в, Феодо́сие,/ Боговеща́нным твои́м гла́сом обвесели́л еси́ лю́ди твоя́ разу́мно,/ Тро́ицы Единобо́жное пропове́дуя и злочести́выя е́реси низлага́я,/ концы́ держа́вы Бо́лгарския в ве́ре Правосла́вней утверди́л еси́./ Те́мже ны́не Христу́ предстоя́ с невеще́ственными ли́ки,/ проси́ душа́м спасти́ся/ любо́вию почита́ющих честну́ю па́мять твою́.

Сла́ва, и ны́не, Богоро́дичен, глас и подо́бен то́йже:

Благода́рственное похвале́ние до́лжне, я́коже вдова́ о́ная две ле́пте,/ приношу́ Тебе́, Влады́чице, о всех Твои́х дарова́ниих./ Ты бо еси́ покро́в мой ку́пно и по́мощь,/ напа́стей мя и скорбе́й при́сно изъима́ющи./ Те́мже, я́ко от среды́ пещи́ горя́щия, изба́вився оскорбля́ющих,/ от се́рдца взыва́ю:/ Богоро́дице, помози́,/ моля́щи Сы́на Твоего́, Христа́ Бо́га на́шего,/ прегреше́ний оставле́ние мне дарова́ти,/ Тя бо име́ю наде́жду, раб Твой.

По 2-м стихосло́вии седа́лен, глас 3.

Подо́бен: Красоте́ де́вства Твоего́:

Ересе́й лесть обличи́л еси́/ и Правосла́вную ве́ру уясни́л еси́,/ я́ко благоче́стия побо́рник Богоглаго́ливый/ пропове́дал еси́ Еди́наго в Тро́ице Бо́га,/ Естество́м Единосу́щнаго и Ли́цы Неслия́ннаго –/ Оте́ц, и Сло́во, и Дух Святы́й./ Те́мже тя по до́лгу воспева́юще,/ почита́ем честну́ю па́мять твою́.

Сла́ва, и ны́не, Богоро́дичен, глас и подо́бен то́йже:

Недомы́сленно и непостижи́мо есть, Влады́чице Богора́дованная,/ соде́ланное о Тебе́ стра́шное та́инство./ Необыме́ннаго бо заче́нши, родила́ еси́,/ пло́тию обложе́нна от пречи́стых крове́й Твои́х,/ Его́же при́сно я́ко Сы́на Твоего́ моли́/ спасти́ся душа́м на́шим.

По полиеле́и седа́лен, глас 8.

Подо́бен: Прему́дрость и Сло́во:

Нищету́ Рожде́ннаго от Де́вы восприи́м,/ вмени́л еси́ траву́ привре́менная, блаже́нне;/ разу́мнаго же дре́ва вкуси́в,/ мона́шествующих мно́жества яви́лся еси́ наста́вник,/ и́хже к ре́вности А́нгельскаго жи́тельства воздвиза́я/ и к ра́зуму ве́ры, знамено́сне236 Феодо́сие,/ моли́ Христа́ Бо́га прегреше́ний оставле́ние дарова́ти/ пра́зднующим любо́вию честну́ю па́мять твою́.

Сла́ва, и ны́не, Богоро́дичен, глас и подо́бен то́йже:

Я́ко Де́ву Тя и Еди́ну в жена́х,/ безсе́менно ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́лся в Тя Божества́/ и я́ко Младе́нца мле́ком пита́ла еси́ Зижди́теля всех и Го́спода./ Те́мже досто́йно Тя прославля́юще, согла́сно Тебе́ вопие́м:/ моли́ Христа́ Бо́га прегреше́ний оставле́ние дарова́ти/ покланя́ющимся ве́рою всесвято́му Рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду́ трудо́в твои́х./ Де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н преподо́бнаго, глас 8, его́же краегране́сие: Богода́нному (Феодо́сию) воспева́ет Де́вий (Парфе́ний) похвалу́.

Песнь 1

Ирмо́с: Посе́ченный несеко́маго пресече́,/ и ви́де со́лнце зе́млю, ю́же пре́жде не ви́де./ Лю́таго врага́ вода́ потопи́,/ и непроходи́мое про́йде Изра́иль,/ песнь же воспева́ше:/ Го́сподеви пои́м, сла́вно бо просла́вися.

Припе́в: Преподо́бне о́тче Феодо́сие,/ моли́ Бо́га о нас.

Бо́жий А́гнче и Сло́ве,/ светозаре́нием Свята́го Твоего́ Ду́ха/ помраче́нному уму́ моему́ светоно́сную лучу́ ниспосли́/ и сло́во ми вдохни́ восхвали́ти, его́же избра́л и прия́л еси́,/ верх преподо́бных – Феодо́сия.

Озари́ благода́тию Боже́ственною раба́ твоего́/ и разуме́ния ду́шу мою́ испо́лни, Феодо́сие о́тче,/ во е́же восхвали́ти житие́ твое́,/ и́мже вся удиви́л еси́, подвиза́яся и Го́сподеви поя́:/ сла́вно бо просла́вися.

Гра́ду вели́ких доброде́телей твои́х,/ верху́ горы́ стоя́щему, преподо́бне, удиви́шася лю́дие,/ его́же светозаре́нием наказу́я,/ всех ко спасе́нию путеводи́л еси́, Го́сподеви поя́:/ сла́вно бо просла́вися.

Богоро́дичен: Отроча́ Мла́до роди́вши ми́ра всего́ на спасе́ние,/ Ада́ма дре́вняго старе́йшее и Роди́телю Предве́чному Сопресто́льное,/ глаго́лы Богогла́сных проро́ков о Тебе́ испо́лнила еси́, Богоро́дице,/ и нас истле́ния измени́ла еси́.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных/ и пое́т Тя дух мой.

Доброде́телей на го́ру восте́к и во мрак виде́ния вшед,/ позна́л еси́, ели́ко вмести́тельно Непостижи́маго естество́;/ просвеще́ния же испо́лнен быв,/ восприя́л еси́ бога́тно благода́ть Боже́ственную.

Алка́я добро́ты Еди́наго Бо́га/ и жа́ждая сла́вы Его́, блаже́нне,/ сла́ву земна́го пребыва́ния преходя́щую оста́вил еси́/ и я́ко уго́дник Влады́ки всех Христа́ просия́л еси́.

Непреста́нным жела́нием ду́ха пло́ти жела́ние увяди́л еси́/ и себе́, блаже́нне, обручи́л еси́ сожи́тельницу чистоту́,/ от нея́же ча́да тебе́ роди́шася – доброде́тели,/ ча́до тя соде́лавшия Невеще́ственнаго Све́та.

Богоро́дичен: Неизрече́нно Бо́гу из Твои́х ложе́сн проше́дшу,/ нас от тле́ния свободи́, Де́во Чи́стая,/ и зми́я мы́сленнаго умертви́, умертви́вшаго Ада́ма в рай иногда́/ и Е́ве прама́тери печа́ль соде́лавшаго.

Седа́лен, глас 4.

Подо́бен: Ско́ро предвари́:

Пре́лесть попали́л еси́ злосла́вных/ и ве́ру до́бре уясни́л еси́ правосла́вных, му́дре Феодо́сие,/ и оте́чество твое́ просвети́л еси́,/ отону́дуже победоно́сный победи́тель показа́лся еси́,/ столп Це́ркве и па́стырь и́стинный./ Не преста́й у́бо моля́ся Христу́ спасти́ся нам.

Сла́ва, и ны́не, Богоро́дичен:

Ско́ро приими́, Влады́чице, моле́ния на́ша/ и сия́ принеси́ Сы́ну Твоему́ и Бо́гу, Госпоже́ Всенепоро́чная./ Побори́ обстоя́ния злосла́вных,/ разори́ ко́зни языковре́дных/ и низложи́ де́рзость нечести́вых,/ вооружа́ющихся на рабы́ Твоя́, Пречи́стая.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

О́браз се́ни237 зако́на, Моисе́ом да́ннаго,/ зако́н благода́ти показа́л еси́ бы́ти, му́дре Феодо́сие,/ и Ева́нгелие – та́инство и́стиннаго Богоявле́ния, Христу́ взыва́я:/ сла́ва си́ле Твое́й, Го́споди.

Многотру́дныя по́двиги испо́лнив, блаже́нне,/ досто́йно сподо́бился еси́ безсме́ртия,/ иде́же, ра́дуяся, вене́ц побе́ды прия́л еси́, вопия́:/ сла́ва си́ле Твое́й, Го́споди.

Удали́вся в пусты́ню, Крести́теля житию́ поревнова́л еси́/ и, чи́сте та́мо пожи́в,/ благода́ти Христо́вы причаща́лся еси́,/ непреста́нно взыва́я:/ сла́ва си́ле Твое́й, Го́споди.

Богоро́дичен: Враго́в кре́пость низложи́, Ма́ти Бо́жия,/ оскорбля́ющих воспева́ющия Тя,/ я́ко ро́ждшая Го́спода сла́вы,/ и невреди́мо ста́до Твое́ соблюда́й от злых прираже́ний238,/ я́ко да по до́лгу Тя ублажа́ем.

Песнь 5

Ирмо́с: У́тренююще, вопие́м Ти,/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Отпадо́х ле́ностию, окая́нный, и к сме́рти усну́х,/ но, я́ко па́стырь до́брый, воздви́гни мя, о́тче,/ и стра́сти моя́ мучи́тельныя успи́,/ я́ко да чи́сте воспою́ твое́ светоно́сное преставле́ние.

Сохраня́й оте́чества твоего́ христолюби́вых люде́й/ моли́твами твои́ми, Богоно́се о́тче,/ избавля́я враго́в наше́ствия и па́губы вся́кия,/ я́ко да вси усе́рдно засту́пника тя ко Христу́ Бо́гу на́шему почита́ем.

Подража́тель яви́лся еси́ Илии́ ре́вностию,/ не зна́меньми стра́шными ужаса́я,/ но Боже́ственных слове́с уче́ньми наставля́я/ и к Правосла́вию христоимени́таго Изра́иля от пре́лести врага́ мно́гажды изводя́.

Богоро́дичен: Еди́ну Тя о́блак разу́мный имену́ем,/ из Тебе́ бо Христо́с возсия́,/ неискусому́жно вопло́щся, Всенепоро́чная,/ и простра́ннейшую Тя Небе́с показа́ за милосе́рдие неисповеди́мое.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

К вере́ Правосла́вней еди́но бы́ти,/ при́сным твои́м о́бщее промышле́ние творя́ се́рдцем и душе́ю, сла́вне Феодо́сие,/ ерети́ческих отрева́л еси́ заблужде́ний/ и разделе́ний бежа́ти всех учи́л еси́.

А́нгелов оби́телище и рай и́стинный соде́лав пусты́ню,/ в не́йже преизя́ществовал еси́ во вся́кой доброде́тели,/ по преставле́нии же рая́ сла́дости сподо́бился еси́.

Единоро́днаго Сы́на Бо́жия, сла́дость весе́лия,–/ Христа́ Бо́га на́шего,/ мироно́сиц сле́зы в ра́дость обрати́вшаго,/ непреста́нными то́ки слез твои́х иска́пал еси́.

Богоро́дичен: Тя иногда́ написа́ скрижа́ль Богообра́зне во проро́цех вели́кий Моисе́й,/ све́щник же све́та и жезл процве́тший, Всенепоро́чная,/ и ле́ствицу, е́юже вознесо́хомся от земли́ на Не́бо.

Конда́к, глас 8.

Подо́бен: Взбра́нной воево́де:

Пропове́дник велегла́сный Боже́ственных догма́т/ на собо́рех святы́х был еси́, о́тче му́дре,/ цари́ умудря́я и в ве́ре утвержда́я;/ благода́тию же Боже́ственною осиява́ем,/ загради́л еси́ уста́ злосла́вных, Феодо́сие./ Сего́ ра́ди вопие́м ти:/ ра́дуйся, Бо́лгарская похвало́/ и Правосла́вия све́тлое ра́дование.

И́кос:

По́стническое обуче́ние усе́рдно проше́д, преподо́бне Феодо́сие,/ и страсте́й прило́ги тече́нием слез твои́х вся притупи́в/ и благоче́стие на земли́ Бо́лгарстей но́во утверди́в,/ ле́ствица Боже́ственная, на Не́бо возводя́щая,/ всем показа́ся Богоприя́тное житие́ твое́,/ е́юже сам, возше́д в Го́рния оби́тели,/ и нам, уны́лым, путесотвори́л еси́ вход,/ моли́твами твои́ми выспрь239 всегда́ нас вперя́я./ Сего́ ра́ди вопие́м ти:/ ра́дуйся, Бо́лгарская похвало́/ и Правосла́вия све́тлое ра́дование.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ оте́ц на́ших Бо́же, благослове́н еси́.

Ди́вным воздержа́нием умертви́в плотски́я стра́сти,/ сосу́д чист и Боговсе́льный был еси́;/ те́мже соверша́ющия светоно́сную твою́ па́мять при́сно помина́й, пою́щия:/ оте́ц на́ших Бо́же, благослове́н еси́.

Е́же на нас вра́жияго ополче́ния избе́г,/ легко́ преше́л еси́ к Го́рним оби́телем,/ иде́же ны́не водворя́яся и по́честь сла́вы восприе́мля,/ со все́ми святы́ми воспева́еши:/ оте́ц на́ших Бо́же, благослове́н еси́.

Возлюби́л еси́ ху́дость ри́зную, преподо́бне,/ и отве́рглся еси́ мя́гких, сла́вящих те́ло,/ весть бо душа́ сообразова́ти вну́тренняя вне́шнему устрое́нию,/ смиря́ющися и зову́щи:/ оте́ц на́ших Бо́же, благослове́н еси́.

Богоро́дичен: И́мя превожделе́нное, Влады́чице,/ пресве́тлаго со́лнца о́блаче и две́ре небе́сная,/ всех христиа́н мольбу́ приими́,/ Тя ублажа́ющих и Сы́ну Твоему́ зову́щих:/ оте́ц на́ших Бо́же, благослове́н еси́.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,–/ Тя пое́т со́лнце, Тя сла́вит луна́,/ Тебе́ прино́сит песнь вся тварь/ я́ко Соде́телю всех во ве́ки.

И́стинное целому́дрие стяжа́в попремно́гу/ и чистоту́ теле́сную, я́коже подоба́ет святы́м,/ смире́ние и сокруше́ние се́рдца вельми́ преумно́жил еси́/ и ско́рбных нанесе́ние, ра́дуяся, приима́л еси́, Бо́гу воспева́я:/ благослови́те, вся дела́ Госпо́дня, Го́спода.

Пожи́л еси́ на земли́, я́ко беспло́тен;/ челове́к у́бо быв естество́м,/ яви́лся еси́ сограждани́н А́нгелом, о́тче му́дре,/ с ни́миже ны́не пое́ши, зовы́й:/ благослови́те, вся дела́ Госпо́дня, Го́спода.

Обличи́л еси́ ху́льных евре́й/ и свире́пеющия на ста́до Бо́жие во́лки ерети́ческия,/ па́лицею же моли́тв твои́х и уче́ний дале́че от Це́ркве Бо́лгарския отгна́л еси́,/ и́же доны́не ку́пно с тобо́ю воспева́ет, зову́щи:/ благослови́те, вся дела́ Го́сподня, Го́спода.

Богоро́дичен: Храм Твой святы́й щито́м ве́ры сохрани́, Богоро́дице Де́во,/ и в нем славосло́вящия Тя ку́пно сла́вы Твоея́ сподо́би,/ нахожде́ния ва́рварскаго избавля́ющи/ и ума́ на́шего во́лны свире́пыя укроща́ющи моли́твою Твое́ю, Всепе́тая.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́;/ в ни́хже посети́ нас Восто́к с высоты́/ и напра́вил ны есть на путь ми́ра.

Во Еди́но Естество́ Тро́ицы ве́ровав правосла́вно,/ су́етная поуча́ющих обличи́л еси́ дерзнове́нно/ и Боже́ственными наказа́нии твои́ми ве́рных, му́дре увеща́в, укрепи́л еси́,/ А́нгелов сослужи́телю, преподо́бне о́тче,/ па́мять твою́ пра́зднующих в ми́ре соблюди́.

А́ще у́бо и слеза́ми го́рькими/ ни́ву се́рдца твоего́ напои́ти до́лженствовал еси́, о́тче Богоно́се,/ но ны́не в ра́дости рукоя́тия240 собира́еши, подвиго́в твои́х по́чести;/ те́мже тя вси ублажа́ем.

Лука́вых духо́в кова́рства спасе́ся душа́ твоя́ свята́я, блаже́нне,/ и, де́монов стреля́ния избежа́вши, насле́дия Небе́снаго сподо́бися;/ помина́й у́бо пою́щия тя.

Богоро́дичен: Услы́ши моли́тву убо́гих нас, Богома́ти,/ всех тва́рей Творца́ поро́ждшая/ и всю тварь Боже́ственною сла́вою превозше́дшая,/ и изба́ви нас от вра́жиих всех нападе́ний, Тя велича́ющия.

Свети́лен глас 3.

Подо́бен: Посети́л ны есть:

И́ноков учи́телю и правосла́вных утвержде́ние,/ де́монов победи́телю и злочести́вых обличе́ние,/ Феодо́сие, о́тче наш,/ моли́твами твои́ми сро́дных твои́х при́сно огражда́й.

Сла́ва, и ны́не, Богоро́дичен:

Я́ко иму́щи ве́лие милосе́рдие,/ при́зри, Всепе́тая Богоро́дице, на мое́ немощно́е смире́ние/ и страсте́й молву́ разори́, Отрокови́це,/ и огня́ гее́нскаго изба́ви мя всеси́льными Твои́ми моли́твами.

На хвали́тех стихи́ры, глас 5.

Подо́бен: Преподо́бне о́тче:

Преподо́бне о́тче Феодо́сие,/ еще́ в ю́ности уязви́вся жа́лом любве́ Бо́жия,/ уподо́бился еси́ купцу́, и́щущему драга́го би́сера,/ и пчеле́ трудолю́бней,/ обходя́щей па́житей мно́жества/ пресла́дкаго ра́ди ме́да благоче́стия./ И Бо́гу, тя водя́щу,/ обре́л еси́ Григо́рия,/ вели́каго свети́льника и́ноческаго любому́дрия,/ и напо́лнил еси́ сосу́д души́ твоея́/ сла́дости неизглаго́ланныя/ безмо́лвия и Богозре́ния,/ Христа́ прии́м в се́рдце твое́ Единовсе́льника,/ Того́ моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче Феодо́сие,/ повнегда́ согре́лся еси́ огне́м Ду́ха Свята́го,/ я́коже ко́кош птенцы́ своя́ под криле́,/ собра́л еси́ духо́вных чад мно́жество/ на горе́ Кефала́рстей,/ и наказа́ньми Богодухнове́нными/ очи́стил еси́ ду́ши их от неприя́зни лука́ваго,/ и А́нгелом сожи́телей соде́лал еси́ я:/ Рома́на у́бо блаже́ннаго,/ и Евфи́мия многостра́дальнаго,/ и Диони́сия Богопросвеще́ннаго,/ и про́чих всех в рай сла́дости ввел еси́ Христа́ Бо́га на́шего./ Того́ моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче Феодо́сие,/ по гора́м пусты́нным псало́мски превита́я/ и Бо́га всеусе́рдно любя́ па́че всех,/ но и херуви́мски всю́ду проника́я мно́гими очесы́,/ не небре́гл еси́ столпа́ и́стины и утвержде́ния –/ Це́ркве Бо́жия,/ е́реси бо открыва́я/ и на собо́рех дерзнове́нно облича́я,/ Правосла́вие чи́сто соблю́л еси́/ и в нем незы́блемо люде́й твои́х утверди́л еси́/ на основа́нии Еди́наго Христа́ Бо́га на́шего./ Того́ моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче Феодо́сие,/ тече́ние соверши́вшу ти земно́е/ и ве́ру Правосла́вну соблю́дшу,/ и венце́м угото́ванным тебе́, бы́вшим в Ца́рствии Небе́снем,/ попусти́ Госпо́дь до конца́ истле́ти пло́ти твое́й неду́гом,/ во е́же ду́ху твоему́ па́че обнови́тися./ Любо́вию же дру́га подвиза́емь/ и ми́ра свята́го жела́нием,/ отше́л еси́ в чужду́ю,/ я́ко да отту́ду во оте́чество Го́рнее возлети́ши/ и, А́нгелом пою́щим,/ ду́шу твою́ преда́си в ру́це Христа́ Бо́га на́шего./ Того́ моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Сла́ва, глас 6:

Вели́кий дре́вле Анто́ний,/ бе́гая ми́ра суеты́/ и в пусты́ню всели́вся,/ мона́шествующим бысть оте́ц/ и первоо́браз безмо́лвия,/ но изы́де па́ки в мир,/ на враги́ Це́ркве ополча́яся,/ мучи́телей е́ллинов и А́рия злочести́ваго./ Отцу́ сын после́дуя, Феодо́сий блаже́нный,/ а́ще и в пусты́ни безмо́лвствуя,/ но оба́че ре́вностию соблюде́/ Неве́сты Жениха́ Небе́снаго бе́лую чистоту́,/ Це́ркве Христа́ Бо́га на́шего/ свято́е Правосла́вие./ Те́мже и сугу́быя венцы́ при́ят/ от десни́цы Вы́шняго/ преподо́бия же и учи́тельства,/ моля́ся непреста́нно о душа́х на́ших.

И ны́не, Богоро́дичен: Богоро́дице, Ты еси́ лоза́ и́стинная:

Славосло́вие вели́кое и отпу́ст.

НА ЛИТУРГИ́И

Блаже́нны от кано́на преподо́бнаго, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Апо́стол к Гала́том, зача́ло 213. Аллилу́ия, глас 8: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник.