Служба преподобнаго Ефрема Печерскаго, бывшаго евнуха князя Киевскаго Изяслава, последи же епископа Переяславскаго

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 4.

Подо́бен: Зва́нный свы́ше:

Егда́ изволе́нием Вы́шняго/ па́стырей Нача́льника, Иису́са,/ зван был еси́, преподо́бне,/ тогда́, ми́ра тле́нная ни во что́ же вмени́в/ и вся кра́сная предержа́ния оста́вль,/ поше́л еси́ невозвра́тным жесто́ким путе́м, в живо́т веду́щим,/ его́же посо́бием Влады́ки своего́ доше́д,/ ра́дуешися в Небе́сных кро́вех ны́не,/ с чи́ны преподо́бных водворя́яся,/ иде́же потщи́ся мольбу́ приноси́ти Христу́ Бо́гу,/ е́же умири́ти мир и спасти́ ду́ши на́ша.

Егда́ Ду́ха Свята́го пома́занием/ избра́н был еси́, Ефре́ме преподо́бне,/ пасти́ слове́сное ста́до Небе́снаго Царя́,/ тогда́, я́ко до́брый па́стырь и учи́тель,/ вруче́нныя тебе́ о́вцы/ непреста́нно благи́м наказа́нием наставля́я, вразумля́л еси́,/ и, сло́вом утеше́ния пита́я, утвержда́л еси́,/ сама́го себе́ им о́браз сло́вом и де́лом показу́я,/ и, до́бре на па́житех духо́вных упа́с,/ приве́л еси́ це́лы к проше́дшему Небеса́/ па́стырей Нача́льнику, Христу́ Бо́гу,/ Его́же моли́ сохрани́ти и спасти́ и нас от враго́в невреди́мых.

Егда́ благоволе́ние Бо́жие/ разжже́ всех сердца́ в любо́вь к тебе́,/ о́тче преблаже́нне,/ тогда́ по жела́нию диади́му нося́щаго/ о́бщим всех сове́том/ поста́влен был еси́ архиере́й сла́вному гра́ду,/ в не́мже да ве́рне, я́ко ве́рный раб, Влады́це своему́ послужи́ши,/ ве́лие тща́ние о созида́нии в еписко́пии свое́й хра́мов име́л еси́/ и сие́ па́че всех честне́йшее/ и любе́знейшее де́ло себе́ вмени́л еси́,/ е́же умно́жити хвале́ние в сла́ву Христа́ Бо́га на́шего,/ Его́же моли́ спасти́ и просвети́ти ду́ши на́ша.

Сла́ва, глас 6:

Святи́телей удобре́ние,/ преблаже́нне о́тче свяще́ннейший,/ изря́дный учениче́ Христо́в,/ па́стырю до́брый,/ упасы́й ста́до свое́ на па́житех духо́вных,/ Ефре́ме досточу́дне,/ ны́не со святи́тели предстоя́ Престо́лу Христо́ву,/ не преста́й моля́ся о нас,/ пою́щих честно́е твое́ успе́ние.

И ны́не, Богоро́дичен: Кто Тебе́ не ублажи́т:

Вход. Проки́мен дне, и чте́ния святи́тельская.

При́тчей чте́ние (гла́вы 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю у́стны лжи́выя. С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8 и 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел Его́./Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́: Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погре́шительна умышле́ния их.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 6.

Подо́бен: Все отло́жше:

Чистото́ю жития́ твоего́/ и све́тлостию многотру́дных твои́х по́двиг/ озари́в ви́дящих благоле́пие лица́ твоего́,/ всех в любо́вь свою́ привле́кл еси́,/ был бо еси́, я́ко светоза́рное со́лнце,/ сын су́щи невече́рняго Све́та,/ и вшел еси́, иде́же облиста́ет Свет непристу́пный,/ тем, я́ко имы́й дерзнове́ние ко Христу́ Бо́гу,/ моли́ся о почита́ющих твою́ па́мять честну́ю,/ Ефре́ме, о́тче свяще́ннейший.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ти́хостию и ра́зумом смиренному́дрия твоего́/ к Высоча́йшему Уму́ возше́дши,/ вшел еси́ во свята́я святы́х,/ я́ко архиере́й преподо́бен/ и я́ко священнотаи́нник благосла́вен,/ причасти́лся еси́ Святы́х Та́ин,/ отню́дуже све́том Боговиде́ния озари́лся еси́,/ тем со дерзнове́нием моли́ся о нас,/ пою́щих па́мять твою́, Ефре́ме досточу́дне.

Стих: Восхва́лятся преподо́бнии во сла́ве,/ и возра́дуются на ло́жах свои́х.

Весь ра́зум и тща́ние/ ко благоле́пию Це́ркве Христо́вы восприя́л еси́,/ ю́же, я́ко неве́сту,/ всезлато́ю гри́вною уче́ния твоего́ украси́л еси́/ и, Богодухнове́нными твои́ми словесы́ опоя́сав,/ предста́вил еси́ всекра́сну Влады́це своему́,/ Ему́же ны́не приле́жно моли́ся/ от тли и бед изба́витися/ ве́рою соверша́ющим всечестну́ю па́мять твою́,/ святи́телю Ефре́ме блаже́ннейший.

Сла́ва, глас то́йже:

В благонаро́читый день пра́здника твоего́,/ о́тче преподо́бне,/ ра́дуются согла́сно и игра́ют Росси́йстии собо́ри/ и та́йно лику́ет Христо́ва Це́рковь,/ похва́льная тебе́ принося́щи/ и Христа́ Бо́га в па́мяти твое́й прославля́ющи.

И ны́не, Богоро́дичен: Богоро́дице, Ты еси́ лоза́ и́стинная:

Тропа́рь, глас 8:

Ду́хом горя́ путеше́ствия к святы́м место́м,/ стра́нствовал еси́ в Гре́ческую зе́млю,/ святи́телю Ефре́ме,/ отню́дуже со мно́гою по́льзою возвраща́яся,/ уста́в свята́го Студи́йскаго монастыря́ списа́в,/ а́ки не́кий многоче́стен дар, се́мо прине́сл еси́,/ и́мже и днесь Це́рковь Росси́йская управля́ема/ сла́вит тебе́, и́стиннаго о ней промы́сленника.

Сла́ва, и ны́не, Богоро́дичен: И́же нас ра́ди:

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1:

Подо́бен: Гроб Твой:

В Вы́шних предстоя́ ны́не Непристу́пному Све́ту,/ нам, па́мять твою́ восхваля́ющим, Ефре́ме, о́тче свяще́ннейший,/ моли́ улучи́ти благода́ть и очище́ние прегреше́ний,/ в день же стра́шнаго испыта́ния ве́лию ми́лость,/ да сподо́бимся с тобо́ю сла́вити вси Еди́наго Человеколю́бца.

Сла́ва, и ны́не, Богоро́дичен:

Всех Созда́тель и Спаси́тель ми́ра,/ пре́жде век от Оте́ческих недр рожде́йся,/ То́йже в ле́то от Тебе́ произше́д, Богоневе́стная Де́во,/ обнови́ истле́вшее челове́ческое естество́/ и Тебе́ показа́ всем спасе́ния на́шего Хода́таицу.

По 2-м стихосло́вии седа́лен, глас 4.

Подо́бен: Яви́лся еси́:

Жесто́кий путь в жи́зни сей ше́ствовал еси́, о́тче,/ и вожделе́ннаго приста́нища мно́гими труды́ свои́ми дости́гл еси́,/ и, вшед в Вы́шнее простра́нство Небе́сное,/ нам оста́вил еси́ ле́ствицу доброде́тельнаго восхожде́ния твоего́,/ Ефре́ме, па́стырю блаже́ннейший.

Сла́ва, и ны́не, Богоро́дичен:

Простра́нным путе́м разли́чных собла́зн ходя́щу/ и к спасе́нному приста́нищу улучи́ти не могу́щу,/ предста́ни ми ско́ро, Пречи́стая Де́во:/ Ты бо еси́ Руководи́тельница Блага́я всем, Тебе́ призыва́ющим.

По полиеле́и седа́лен, глас 5.

Подо́бен: Собезнача́льное Сло́во:

Душе́вных и теле́сных страсте́й отсече́нием/ в пра́вду евну́х проименова́н был еси́, преподо́бне./ Тем, я́ко потопле́ния стра́стнаго мо́ря избежа́вый,/ потщи́ся о нас, любо́вию почита́ющих па́мять твою́, мольбу́ сотвори́ти ко Христу́ Бо́гу,/ да прии́мем благода́ть, и ми́лость, и страсте́й всех свобожде́ние.

Сла́ва, и ны́не, Богоро́дичен:

Мо́лим Тя приле́жно, Богоневе́стная Де́во,/ я́ко иму́щая дерзнове́ние к Сы́ну Своему́ и Бо́гу,/ при́сно моли́ за ны, непотре́бныя рабы́ Твоя́,/ да обря́щем благода́ть и ми́лость в День су́дный.

Та́же степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Услы́шите сия́, вси́ язы́цы,/ внуши́те, вси, живу́щии по вселе́нней. Вся́кое дыха́ние да хва́лит Го́спода. Ева́нгелие о́бщее святи́телю.

По 50-м псалме́ стихи́ра, глас 6: Святи́телей удобре́ние: зри сла́вник на Го́споди, воззва́х:

Кано́н Богоро́дицы со ирмосо́м на 6 и свята́го на 6, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Гряди́, Бо́гом со́бранная Це́рковь Христо́ва,/ и пе́сненными венцы́ венча́й венча́ннаго свы́ше благода́тию святи́телем удобре́ние, Ефре́ма чу́днаго,/ побе́дное принося́щи хвале́ние Бо́гу, я́ко просла́вися.

Ты, свяще́ннейший о́тче, нося́ Учи́телев о́браз кро́тости и смире́ния,/ оте́ц ни́щим, сирота́м и вдови́цам был еси́/ и оби́димым ско́рый засту́пник.

По достоя́нию зван был еси́ от Вели́каго Архиере́я,/ И́же се́де одесну́ю Отца́ на высо́ких, пасти́ избра́нное Его́ ста́до, е́же снабде́ Кро́вию Свое́ю,/ и сие́ упа́с до́бре, вшел еси́ в Небе́сная/ предстоя́ти со святи́тели па́стырей Нача́льнику – Христу́.

Па́стырским венце́м твой верх обложе́н ви́дя, свя́те,/ Херуви́м отве́рзе тебе́ Еде́мская врата́./ И вшел еси́, иде́же дре́во жи́зни и пото́к сла́дости безконе́чныя избра́нных насыща́ет.

Богоро́дичен: Отве́рзшая всем врата́ Небе́сная Рождество́м Твои́м, Ма́ти Де́во,/ отве́рзи нам две́ри ми́лости Твоея́/ и введи́ нас в Оте́чество Небе́сное.

Песнь 3

Ирмо́с: Лук сокруши́ся си́льных/ держа́вою Твое́ю, Христе́,/ и си́лою немощству́ющии/ препоя́сашася.

Лук напряже́н, ум свой име́л еси́ от ю́ности, о́тче, подража́ти А́нгельскому житию́,/ тем, оста́вив служи́ти кня́зю Изясла́ву,/ прише́л еси́ ко Анто́нию в пеще́ру/ и от него́ научи́лся, ка́ко на врага́ препоя́сатися си́лою.

Любо́вию ко Христу́ распали́вся и обнажи́вся ми́ра,/ обле́клся еси́ в ри́зу спасе́ния/ и, шлем на главу́ твою́ рука́ма блаже́ннаго Ни́кона возложи́в,/ пожи́л еси́, аки А́нгел, на земли́,/ быв вне ми́ра и пло́ти.

Ви́дя тя, преподо́бне, лю́тый велиа́р,/ я́ко, презре́в мир, причти́лся еси́ ко ста́ду свято́му Богоно́сных оте́ц,/ умы́сли о́но распу́дити,/ но ты, прие́мь ору́жие – моли́тву, пост и бде́ние, препоя́сался еси́ на него́ духо́вною си́лою.

Был еси́, повину́яся во всем наказа́нию отца́ твоего́, преподо́бнаго Анто́ния,/ я́ко и́стинен подража́тель Иису́су, да́же до сме́рти послушли́ву,/ те́мже превозне́слся еси́ от Него́ на доброде́тели, препоя́сан си́лою.

Богоро́дичен: Немощству́я душе́ю и те́лом,/ к Тебе́, я́ко к си́льной и многомо́щной Цари́це, Богоро́дице,/ всеусе́рдно притека́ю и молю́ся Ти:/ си́лою свы́ше на доброде́тели препоя́сати мя благоволи́,/ да благода́рно воспою́ Твою́ бла́гость, Препе́тая.

Седа́лен, глас 2:

Моли́твенника те́пла, и церко́внаго благоле́пия люби́теля,/ святи́телем удобре́ние, иера́рха Бо́жия Ефре́ма во дне́шний день хвала́ми почти́м:/ той бо, на земли́ во пло́ти Безпло́тным уподо́бився,/ глаго́лом те́плыя моли́твы посе́кл вся плотски́я стра́сти/ и прия́ дерзнове́ние всем в ну́ждах посо́бствовати.

Сла́ва, и ны́не, Богоро́дичен:

К Тебе́, Моли́твеннице те́плой и неруши́мой Стене́,/ всеусе́рдно прибега́ем, Благослове́нная Богоро́дице Де́во, по́мощи прося́ще,/ изба́ви нас от бед и скорбе́й безме́рных:/ и́маши бо благода́ть и си́лу всем в ну́ждах посо́бствовати.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непости́жимую Твою́ си́лу.

Услы́шав, о́тче, а́нгельское житие́ оте́ц Богоно́сных,/ возгоре́лся еси́ ду́хом к святы́м место́м,/ жела́я бы́ти жития́ сих самови́дец и доброде́телем их подража́тель.

В ца́рствующий град Гре́ческия страны́ хотя́ путь ше́ствовати,/ жела́л еси́, преподо́бне, наста́вника своего́ благослове́ния и моли́твы,/ ве́дый, я́ко с благослове́нием се́яй благослове́нныя пожина́ет кла́сы.

Прие́м, свя́те, две криле́ – благослове́ние и моли́тву отца́ своего́,/ а́ки го́лубь из ковче́га, излете́л еси́ в гре́ки,/ ища́ мы́сленныя ве́тви доброде́телей и по́льзы оте́ц Богоно́сных.

Обре́т, е́же жела́л еси́, прему́дре,/ ви́дев святоле́пных оте́ц, а́ки ке́дры в Лива́не или́ фи́ники, посреде́ рая́ Бо́жия процве́тшии,/ от их же цвето́в прине́сл еси́ нам плоды́ – Студи́йскаго монастыря́ уста́вы.

Богоро́дичен: Дре́во души́ моея́, ле́ностию непло́дное, враг всезло́бный сотвори́,/ но да не посече́тся, я́ко о́ная смоко́вница,/ напо́й от исто́чника бла́гости Твоея́, Ма́ти Де́во,/ да принесу́ плод во вре́мя свое́ – житие́ испра́вленно.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Све́та Пода́тель – Иису́с, ви́дя ду́шу твою́, чистото́ю блеща́щуюся,/ не даде́ тебе́ бы́ти под спу́дом,/ но поста́ви тя на све́щнице архиере́йства,/ да све́тиши в Це́ркви Его́, ю́же снабде́ че́стною Свое́ю Кро́вию.

Возра́довася град Перея́славль, прие́м тя свети́льника свои́м гра́жданом,/ и исплете́ тебе́ вене́ц похвалы́, я́ко просвети́л еси́ Богодухнове́нными словесы́,/ па́че же о́бразом чи́стаго жития́ твоего́.

Жезло́м па́стырским мы́сленнаго во́лка прогна́л еси́ дале́че от ста́да своего́, о́тче,/ е́же на духо́вную па́жить уче́ния безмяте́жно изве́д,/ подтвержда́л еси́ де́тельными свои́ми и Богодухнове́нными труды́.

Обте́кл еси́, а́ки оре́л, круг еписко́пии твоея́,/ разгоня́я мы́сленныя вра́ны, ду́хи зло́бы поднебе́сныя,/ птенцы́ же своя́ во единомы́слии защища́я от всех вра́жиих наве́тов.

Богоро́дичен: Враг мы́сленный мно́жицею зло́бными кова́рствы на ны напа́дает,/ тща́щися в снедь себе́ похи́тити,/ но Ты, Чадолюби́вая Ма́ти, не преда́ждь нас ловле́нию того́,/ и́бо, а́ки пти́ца, зде создала́ еси́ Себе́ хра́мину/ и го́рлица гнездо́ – оби́тель сию́,/ иде́же положи́ла еси́ ны, а́ки птенцы́, Твоя́ певцы́.

Песнь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния,/ и́стины же ду́хом пожру́ Тебе́.

Ко Го́споду любо́вию и моле́нием распаля́емь,/ мно́гия воздви́гл еси́ це́ркви,/ в ни́хже о всех слове́сных твои́х овца́х приноси́л еси́ безкро́вныя же́ртвы,/ помоли́ся ны́не и о нас, мо́лимтися,/ да в ду́се сокруше́нном зде принесе́м хвале́ние на́шему Влады́це.

Укра́сив, а́ки неве́сту кра́сну, благоле́пием и разли́чными ша́рами Це́рковь Христо́ву,/ был еси́ в ней, а́ки златоза́рный свети́льник, доброде́тельми сия́я, Богому́дре Ефре́ме./ Светоно́сными твои́х моли́тв луча́ми,/ в достоле́пную ти похвалу́ просвети́ ум тя хва́лящих.

Седя́ на престо́ле твое́м, о́тче свяще́ннейший,/ мно́гих, во тьме грехолю́бия седя́щих, уче́нием к покая́нию возста́вил еси́:/ нас, прегреше́ньми па́дших, возста́ви,/ да во гла́се хвале́ния и́стинным ду́хом принесе́м жития́ исправле́ние на́шему Влады́це.

Мно́гия труды́ и по́двиги о ста́де твое́м, блаже́нне, подъя́л еси́,/ доне́леже е́ от собла́зн мы́сленнаго врага́ очи́стил,/ нас, тьмо́ю грехолю́бия омраче́нных, наста́ви к све́ту покая́ния моли́твами твои́ми, Ефре́ме досточу́дне.

Богоро́дичен: Лю́тыми и безчи́сленными страстьми́ одержи́ми, вопие́м к Тебе́,/ в ро́дех всех Преблаже́нная Ма́ти Бо́га на́шего, возведи́ нас к све́ту безстра́стия,/ да во гла́се хвале́ния принесе́м Ти смире́нныя на́ша моли́твы.

Конда́к, глас 8:

Це́ркви Правосла́вной Росси́йской по жела́нию Богоно́снаго Феодо́сия уста́в Студи́йский прине́сшаго,/ во святи́телех же све́тло просия́вшаго/ и ста́до свое́ до́бре упа́сшаго,/ восхваля́ем тя, Ефре́ме,/ я́ко моля́щася Го́сподеви о всех нас.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Ду́шу твою́ благово́нными цве́ты, посто́м, моли́твою и смиренному́дрием украси́в,/ предста́вил еси́ ю, а́ки неве́сту чи́сту, Влады́це своему́,/ Ему́же предстоя́, пое́ши:/ благослове́н Бог оте́ц на́ших.

Я́коже в жи́зни сей любо́вию к наста́внику своему́, блаже́нному Феодо́сию, привяза́лся еси́,/ та́ко и по кончи́не неотсту́пен пребыва́я,/ на пренесе́ние моще́й того́ с про́чиими епи́скопы приспе́л еси́,/ и́хже нетле́ние ви́дев, воспе́л еси́:/ благослове́н Бог оте́ц на́ших.

От ю́ности зва́нию Влады́ки своего́ после́довав,/ по мно́гих твои́х труде́х, я́же на престо́ле еписко́пии Перея́славския подъя́л еси́,/ позва́н еси́ на Престо́л Небе́сный в ра́йское селе́ние,/ иде́же со святи́тели и преподо́бных чи́ны пое́ши:/ благослове́н Бог оте́ц на́ших.

Зубы́ скрежета́ху возду́шнии бе́сове,/ ви́дяще тя, от земны́х к ве́чной жи́зни А́нгелами проводи́ма,/ но от дале́че стоя́ху:/ непристу́пен бо им был еси́, огражде́н Небе́сным све́том,/ иде́же и о нас моли́ся, о́тче свяще́ннейший Ефре́ме.

Богоро́дичен: Яря́щияся на мя враги́ посрами́, Богоневе́стная Де́во,/ зу́бы их сотри́ и члено́вныя львов мы́сленных сокруши́, молю́ся Ти,/ да без стра́ха и наве́та сих воспою́, Госпоже́:/ Благослове́нна еси́.

Песнь 8

Ирмо́с: О подо́бии зла́те небре́гше треблаже́ннии ю́ноши,/ неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная, да пое́т Го́спода вся тварь/ и превозно́сит во вся ве́ки.

Я́ко благоле́пием Це́рковь Христо́ву, свя́те, украси́л еси́,/ сего́ ра́ди и Христо́с по кончи́не твое́й украси́ храм души́ твоея́,/ те́ло твое́ нетле́нием поче́тше,/ его́же ра́це кла́няющеся, пое́м с пою́щими Го́сподеви во вся ве́ки.

От си́льнаго Воево́ды чино́в Небе́сных,/ в его́же и́мя храм красе́н созда́л еси́,/ введе́н еси́, Ефре́ме, в храм торжеству́ющих/ пе́ти Го́спода во ве́ки.

Апо́столов Первозва́нный, ему́же дом моли́твенный при врате́х созда́л еси́,/ с великому́чеником Фео́дором предусрето́ша тя, о́тче,/ и любе́зно прия́ша в дом Бо́жий Небе́сный, с собо́ю пе́ти Го́спода во ве́ки.

О нас, святи́телю Ефре́ме,/ я́ко имы́й дерзнове́ние к Живонача́льней Тро́ице, не преста́й моля́щи,/ да сподо́бимся дости́гнути в ме́сто кро́ва ди́вна, да́же до до́му Бо́жия,/ иде́же глас ра́дования и пресла́дким шу́мом пою́т Го́спода во ве́ки.

Богоро́дичен: Еди́но Божество́, Тро́ице Свята́я,/ моле́нием Пречи́стыя Богоро́дицы и уго́дника Твоего́ Ефре́ма/ в ра́йских селе́ниих нам да́руй Тя пе́ти во ве́ки вся.

Песнь 9

Ирмо́с: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Оста́вив земны́я преде́лы, вшел еси́ в Небе́сная селе́ния,/ иде́же живо́тнаго дре́ва наслажда́яся,/ моли́ не лиши́тися и нам прича́стия о́наго, Ефре́ме преблаже́нне.

Ра́дуется град Перея́славль, помина́я тя, па́стыря своего́,/ мы же торжеству́ем, веселя́щеся, и кла́няемся моще́м твои́м,/ нетле́ние тех ви́дяще, о́тче свяще́ннейший.

Не мо́жет пеще́ра моще́й твои́х, преподо́бне, укры́ти,/ не бо утаи́т свети́льника, в ней тебе́ горя́ща,/ я́ко той похвала́ еси́ и украше́ние.

Нетле́ние моще́й твои́х, свя́те, ви́дяще,/ свет доброде́телей твои́х помина́ем и сла́вим Отца́ Небе́снаго,/ я́ко подаде́ тебе́ просия́ти пред А́нгелы и челове́ки.

Богоро́дичен: Нетле́нным Рождество́м Твои́м, Пречи́стая, от тле́ния свобо́ждшеся,/ воспева́ем немо́лчными гла́сы/ и, покланя́ющеся Рождеству́ Твоему́, Тя, Богоро́дице, велича́ем.

Свети́лен:

Чистоты́ твоея́, о́тче, раче́нием,/ отгна́л еси́ тьму плотски́я стра́сти/ и показа́лся еси́, я́ко светоза́рная звезда́, просвеща́ющая на́ша мы́сли и сердца́, Ефре́ме му́дре,/ отце́в сла́во и преподо́бных украше́ние.

Сла́ва, и ны́не, Богоро́дичен:

Вся красна́ и без поро́ка су́щи, А́нгелов Честне́йшая Де́во,/ души́ моея́ безобра́зие благода́тию Твое́ю в благообра́зие претвори́:/ Ты бо всем еси́ украше́ние и похвала́.

На хвали́тех стихи́ры, глас 1.

Подо́бен: Небе́сных чино́в:

Ми́ром, Богому́дре,/ свы́ше прие́м пома́зание свяще́нное,/ был еси́ па́стырь Христо́ву ста́ду,/ е́же упа́с на па́житех Ева́нгельскаго уче́ния,/ и, приве́д всеце́ло к па́стырей Нача́льнику,/ прия́л еси́ возме́здие до́брых де́лателей,/ с ни́миже ны́не ликовству́я,/ помяни́ чту́щих любо́вию па́мять твою́, святи́телю Ефре́ме.

Дом Ду́ха Пресвята́го был еси́,/ его́же пе́рвее водо́ю смире́ния предочи́стив/ и ми́ром благода́ти и чистоты́ душе́вныя пома́зав,/ свеще́ю доброде́телей просвети́л еси́,/ и, прише́д, Оте́ц с Сы́ном оби́тель в тебе́ сотвори́,/ те́мже мо́лим тя, о́тче свяще́ннейший,/ моли́ся Христу́ Бо́гу,/ да прии́мем и мы благода́ть тобо́ю и ве́лию ми́лость.

Я́ко благоче́стия учи́теля,/ и виногра́да Христо́ва ве́рна де́лателя,/ и святи́теля прече́стна,/ в ле́тнюю па́мять соше́дшеся днесь, лю́дие,/ ублажи́м пе́сньми и пе́нии, глаго́люще:/ о́тче преподо́бне Ефре́ме,/ не забу́ди нас, любо́вию чту́щих твое́ успе́ние,/ но моли́ся Христу́ Бо́гу дарова́ти нам ве́лию ми́лость.

Сла́ва, глас 2:

Святи́теля Христо́ва,/ Богоно́снаго отца́ на́шего Ефре́ма,/ прииди́те днесь, празднолю́бных собо́ри,/ пе́сненными похвала́ми воспое́м, глаго́люще:/ ра́дуйся, па́стырю и наста́вниче слове́сных ове́ц Христо́вых избра́ннейший;/ ра́дуйся, святи́телей че́стное удобре́ние./ Ра́дуйся, пресве́тлый свети́льниче и краси́телю церко́вный;/ ра́дуйся, моле́бниче те́плый всем, ве́рно к тебе́ прибега́ющим./ Нас ны́не, любо́вию па́мять твою́ пра́зднующих/ и ра́достною душе́ю к ра́це моще́й твои́х припа́дающих,/ моли́твами твои́ми от бед изба́ви/ и моли́ся Христу́ Бо́гу/ умири́ти мир и спасти́ ду́ши на́ша.

И ны́не, Богоро́дичен: Спаси́ от бед рабы́ Твоя́, Богоро́дице:

Славосло́вие вели́кое и отпу́ст.