Служба преподобнаго Дионисия, архимандрита Троице-Сергиева монастыря, Радонежскаго чудотворца

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1:

От са́мых пеле́н Бо́га возлюби́в,/ Тому́ Еди́ному прилепи́лся еси́,/ кро́тость стяжа́в и во умиле́нии се́рдца всегда́ моля́ся,/ те́мже проси́ дарова́ти душа́м на́шим/ мир и ве́лию ми́лость.

Стра́хом Бо́жиим огражда́емь,/ мирска́я вся возненави́дел еси́, Богоно́сне Диони́сие,/ Вы́шних всегда́ ища́,/ и́хже получи́ти и нам моли́ся,/ прося́ нам ми́ра и ве́лия ми́лости.

Крест Христо́в от ю́ности на ра́мо взем,/ усе́рдно Тому́ после́довал еси́, о́тче Диони́сие,/ те́мже бога́тно прия́л еси́ мзду трудо́в твои́х/ от Подвигополо́жника Хри́ста,/ Его́же мо́ли дарова́ти нам мир и ве́лию ми́лость.

Сла́ва, и ны́не, Богоро́дичен, глас то́йже:

Блажи́м Тя, Пренепоро́чную и Честне́йшую Херуви́м,/ я́ко Тобо́ю соде́яся спасе́ние ми́ру/ и седя́щим во тьме и се́ни сме́ртней/ свет благода́ти возсия́.

На стихо́вне стихи́ры глас 2:

Дом Ду́ха Свята́го/ исполне́нием за́поведей Христо́вых преподо́бне Диони́сие, быв,/ помози́ и нам ше́ствовати путе́м,/ веду́щим к Ве́чным оби́телем,/ иде́же есть всех веселя́щихся жили́ще.

Стих: Честна́ пред Го́сподем/ смерть преподо́бных Его́.

Оби́тель Святы́я Тро́ицы,/ вруче́нную тебе́ от Боже́ственнаго Про́мысла,/ до́бре управля́я о́бразом жития́ твоего́ и кра́йним незло́бием,/ мно́жество и́ночествующих на путь спасе́ния/ наста́вил еси́, преподо́бне Диони́сие;/ и ны́не моли́ся упра́вленным бы́ти и нам на путь покая́ния/ и в день Стра́шнаго суда́ изба́витися муче́ния.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Церко́вная установле́ния тща́тельне исправля́я/ и о нестрое́нии оте́чества душе́ю боле́знуя,/ потща́лся еси́ созва́ти до́блестныя сы́ны Росси́и/ на защище́ние Правосла́вныя ве́ры,/ и́хже благослови́в, побе́ду им от Бо́га испроси́л еси́;/ те́мже ны́не по до́лгу тя ублажа́ем, Диони́сие преподо́бне.

Сла́ва, глас 8:

Вельми́ боле́знуя о стра́ждущих лю́дех/ во вре́мя вели́кия напа́сти,/ обыше́дшия страну́ Росси́йскую,/ с пла́чем ве́лиим и со слеза́ми/ призыва́л еси́ всех к помоществова́нию им,/ собо́ю о́браз всем подая́ и́стинныя любве́;/ и ны́не стра́ждущим лю́те от неви́димых враго́в помози́,/ преподо́бне Диони́сие,/ и изба́ви злоде́йствия их,/ я́ко да по до́лгу тя ублажа́ем.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни. Сла́ва, и ны́не, пра́здника.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, пра́зднику 3 и свято́му 5, глас 8:

Весь от ю́ности себе́ Го́сподеви возложи́в/ и мона́шеское житие́ возлюби́в,/ потща́лся еси́ ше́ствовати те́сным путе́м,/ преподо́бне о́тче Диони́сие,/ смире́нною же му́дростию себе́ уничижа́я,/ от Бо́га возвели́чен был еси́,/ Его́же моли́ спасти́ся душа́м на́шим.

Труды́, поще́нием и бде́нием умерщвля́я те́ло свое́/ и непреста́нными моли́твами к Бо́гу всегда́ приближа́яся,/ дом че́стен Ду́ху Свято́му был еси́,/ И́же, ви́дя твое́ благо́е произволе́ние,/ прави́теля поста́ви тя до́му Живонача́льныя Тро́ицы,/ иде́же ве́рен яви́лся еси́/ о́бразом доброде́тельнаго твоего́ жития́/ мно́гия ча́да приве́д ко спасе́нию.

Да́нный тебе́ от Бо́га тала́нт/ земны́ми попече́нии не закрыва́я,/ во исправле́нии церко́вных после́дований и моли́тв,/ повеле́ние от царя́ и Патриа́рха прии́м,/ трудолю́бне подвиза́лся еси́, Диони́сие,/ а́ще и по́слежде мно́гия беды́ и напа́сти за сие́/ от зави́стных непови́нно прия́л еси́,/ те́мже по достоя́нию венча́лся еси́ от Бо́га,/ Его́же моли́ спасти́ся душа́м на́шим.

Житоме́ритель изря́ден во вре́мя ну́жды,/ я́коже дре́вле Ио́сиф,/ и непоколеби́мый столп терпе́ния в разли́чных напа́стех,/ я́коже И́ов, был еси́, Диони́сие,/ всем дре́вним страда́льцем за и́стину подо́бник,/ с ни́миже и прия́л еси́ на Небесе́х мзду трудо́в твои́х;/ те́мже ны́не по до́лгу тя любо́вию ублажа́ем.

С поруга́нием по то́ржищу води́м,/ во око́вах держи́м, бие́мь, и попира́емь,/ и вся́чески безче́стим,/ к бию́щим тя весе́лым лице́м бесе́довал еси́./ Вопроша́ющим же тя о беде́ сей друго́м твои́м отвеща́л еси́:/ несть се беда́, но то́кмо подо́бие беды́,/ и́стинная же беда́ есть в гее́нне с диа́волом му́чиму бы́ти;/ ея́же изба́витися нам Го́спода умоли́, Диони́сие преподо́бне.

Сла́ва, глас 6:

Прииди́те, мона́шествующих собра́ния,/ свяще́нницы и вси лю́дие,/ любо́вию восхва́лим отца́ на́шего Диони́сия/ в день све́тлой па́мяти его́,/ той бо яви́ся и́стинный ревни́тель по́стническаго жития́,/ после́дуя стопа́м вели́каго Се́ргия, свяще́нства бысть честны́й сосу́д,/ о лю́дех попечи́тель изря́ден,/ я́звенныя врачу́я, наги́я одева́я/ и гла́дныя до́бре пита́я,/ отходя́щих же от сего́ вре́меннаго жития́/ по достоя́нию напу́тствия к ве́чному животу́,/ те́мже возопии́м ему́:/ о́тче Диони́сие, не преста́й и ны́не,/ вку́пе с преподо́бным Се́ргием,/ проси́ти у Христа́ Бо́га благо́е устрое́ние оте́честву на́шему,/ всем лю́дем мир/ и душа́м на́шим ве́лию ми́лость.

И ны́не, Богоро́дичен по гла́су или́ пра́здничен.

Вход, проки́мен дне и чте́ния 3 преподо́бническая.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры глас 5:

Ра́дуйся, о́тче Диони́сие,/ мона́шествующих пра́вило изве́стнейшее,/ согреша́ющих немедли́тельный обличи́телю,/ ка́ющимся же ско́ро подава́яй проще́ние,/ вражду́ющих ту́не на тя/ врачу́яй свои́м христоподража́тельным смире́нием/ и всем поле́зная промышля́яй:/ те́мже и нам, почита́ющим святу́ю па́мять твою́,/ испроси́ у Христа́ Бо́га мир и ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, Богому́дре Диони́сие,/ погреше́ния неразу́мных обличи́вый/ и церко́вныя кни́ги до́бре испра́вивый,/ а́ще и мно́гия беды́ и напа́сти от зави́стных за сие́ претерпе́л еси́,/ но последи́ сла́вный страстоте́рпец за и́стину яви́лся еси́,/ от царя́ и Патриа́рха почте́н,/ наипа́че же от Всеще́драго Бо́га на Небеси́ ве́лию благода́ть прии́м,/ Его́же моли́ низпосла́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, до́брый па́стырю слове́снаго ста́да,/ о́тче наш Диони́сие,/ ты бо су́етное дме́ние38 заблужда́ющих и проти́вящихся тебе́/ о́стрым обличе́ния сло́вом му́дре низложи́л еси́/ и су́етно бы́ти мудрова́ние сих показа́л еси́,/ а́ще и неиспра́влени пребыва́ху/ и мно́гия напа́сти тебе́ последи́ творя́ху,/ но ты прия́л еси́ от Бо́га оби́льную мзду трудо́в твои́х/ и незло́биваго терпе́ния твоего́,/ те́мже моли́ дарова́ти и нам, чту́щим святу́ю па́мять твою́,/ мир и ве́лию ми́лость.

Сла́ва, глас 8:

Мона́хов мно́жества,/ наста́вника тя почита́ем, о́тче наш Диони́сие:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных,/ с ни́миже моли́ся Го́сподеви,/ поми́ловатися душа́м на́шим.

И ны́не, пра́зднику или́ Богоро́дичен: Безневе́стная Де́во:

Тропа́рь, глас 3:

Земна́я, прельща́ющая очеса́ миролю́бцев,/ возненави́дел еси́, о́тче Богоно́сне Диони́сие,/ за уме́ты та вмени́в,/ ше́ствуя путе́м ско́рбным,/ и в терпе́нии добр во́ин Христо́в яви́лся еси́,/ победи́в стра́сти ми́ра,/ был еси́ до кончи́ны непоколеби́мый благоче́стия побо́рник./ Те́мже мы днесь, соверша́я свяще́нную па́мять твою́,/ духо́вными тя пе́сньми ублажа́ем и смире́нно мо́лим,/ да, предстоя́ Престо́лу Го́спода Бо́га,/ хода́тайствуеши о спасе́нии душ на́ших.

Ин тропа́рь, глас 4:

Бла́гости научи́вся от Вы́шняго благода́ти,/ измла́да подвиза́вся благо́ю со́вестию,/ Диони́сие преподо́бне,/ терпе́ния столп был еси́/ и сло́ва Бо́жия пропове́дник,/ благоче́стия догма́ты утверди́в и суеу́мных мудрова́ние упраздни́в,/ те́мже и пострада́л еси́ за и́стину, ра́дуяся,/ о́браз страда́льцем собо́ю показа́в,/ но, я́ко име́я дерзнове́ние ко Христу́ Бо́гу,/ не преста́й моля́ся о нас,/ любо́вию чту́щих святу́ю па́мять твою́.

Сла́ва, и ны́не, пра́здника

НА У́ТРЕНИ

По 1-м стихосло́вии седа́лен, глас 4:

Благи́й яре́м Христо́в, ра́дуяся, всегда́ нося́,/ кро́ток и смире́н се́рдцем, по словеси́ Госпо́дню, был еси́, о́тче Диони́сие,/ те́мже и обре́л еси́ ве́чный поко́й,/ е́же и нам улучи́ти моли́твами твои́ми, мо́лимся.

Сла́ва, и ны́не, пра́здника.

По 2-м стихосло́вии седа́лен, глас 4:

Блаже́нства о́наго жела́я, е́же Христо́с ни́щим ду́хом обеща́,/ вся́кое до́лу влеку́щее мудрова́ние от себе́, му́дре, отри́нул еси́,/ ничесо́же от вре́менных возжела́в;/ те́мже и обогати́лся еси́ от Бо́га Небе́сными дарова́нии,/ прославля́я с Го́рними си́лами Соде́теля вся́ческих.

Сла́ва, и ны́не, пра́здника.

По полиеле́и седа́лен, глас 8:

Егда́ с поруга́нием, зно́ю вельми́ належа́щу,/ чрез весь день, во дворе́ держи́м, был еси́ во око́вах, жа́ждею ве́лиею томи́м,/ тогда наде́ждею прохлажде́ния о́ною живо́ю водо́ю,/ ю́же Христо́с ве́рующим в Него́ обеща́, укрепля́л еси́ себе́,/ и, наде́жди не погреши́в, стяжа́л еси́ внутрь исто́чник воды́, теку́щ в живо́т ве́чный,/ да не вжа́ждешися во ве́ки.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́, из Нея́же Бог воплоти́ся и Младе́нец бысть, пре́жде век Сый Бог наш:/ ложесна́ бо Твоя́ престо́л сотвори́/ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Диони́сия преподо́бнаго досто́йно вси ублажи́м,/ оте́чества похвалу́ и Це́ркве Росси́йския утвержде́ние,/ предстоя́ща ны́не Святе́й Тро́ице/ и те́пле моля́щася о душа́х на́ших.

Кано́н праздника со ирмосом на 6 и святаго канон на 8, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

От млады́х ногте́й, Богоно́сне Диони́сие, кро́тость ве́лию возъиме́л еси́:/ де́тская глумле́ния презре́в, смиренному́дрие серде́чно яви́л еси́,/ усе́рдно стра́ху Бо́жию внима́я.

Я́коже Симео́н, Ду́хом прови́дя,/ прия́в на ру́ки Предве́чнаго Младе́нца, предрече́ спасе́ние челове́ков,/ та́кожде вну́треннима очи́ма прозре́в оте́ц твой духо́вный/ бы́ти име́ющее твое́ житие́, глаго́лаше:/ сей сын наш бу́дет нам оте́ц.

Не козлогласова́нием39 и ины́м язы́ком поуча́шеся,/ я́коже обы́чай есть де́тем имени́тых, мирска́я внима́ющих,/ но страх Бо́жий всади́л еси́ в се́рдце твое́м, ве́дяй,/ я́ко теле́сное обуче́ние вма́ле поле́зно,/ а благоче́стие на все поле́зно есть.

Я́ко от чре́ва ма́тери твоея́ утверди́ся се́рдце твое́ во Го́споде,/ и измла́да приме́р доброде́тели показа́л еси́./ Тем тя благоче́стно восхваля́юще,/ велича́ем дарова́вшаго ти душе́вный ра́зум/ и просвети́вшаго тя све́том И́стины Христа́ Жизнода́вца.

Богоро́дичен: Досто́йно есть блажи́ти Тя, Пренепоро́чную и Честне́йшую Херуви́м,/ я́ко чрез Тя соде́лася спасе́ние ми́ру/ и свет благода́ти облиста́ седя́щих во тьме сме́ртней.

Ин кано́н моле́бный на 8, глас 4. Его́же краегране́сие: Мольбу́ ти приношу́, Диони́сие преподо́бне. Творе́ние гре́шнаго и́нока Си́мона.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстрастия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Мо́ря жите́йскаго волна́ми потопля́емь/ и напа́стьми лю́тыми помраче́нный умо́м, молю́ся:/ при́зри, Го́споди Бо́же мой, на смире́ние души́ моея́/ и просвети́ смысл помраче́нный,/ да восхвалю́ до́блестнаго страда́льца, преподо́бнаго Диони́сия.

О́чи души́ и се́рдца к тебе́, преподо́бне Диони́сие, возложи́х, суеты́ мирски́я бе́гая,/ и ны́не припа́даю ти и вопию́:/ спаси́ мя, па́дшаго мно́гими гре́хи,/ и испра́ви путь мой ко спасе́нию.

Ле́ностию содержи́м есмь лю́те/ и во глубину́ прегреше́ния впадо́х,/ простри́ ми ру́ку по́мощи, преподо́бне Диони́сие,/ и исхити́ мя от сих зол хода́тайством твои́м,/ я́ко да спасе́н быв тобо́ю, ублажа́ю тя при́сно.

Богоро́дичен: Благоутро́бным и ти́хим Свои́м о́ком воззри́ на мя, раба́ Твоего́,/ и услы́шати потщи́ся, Блага́я Помо́щнице,/ исполня́ющи мольбу́ Своего́ раба́, Пречи́стая Богоро́дице,/ разоря́ющи сове́ты лука́выя.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Прича́стен соде́лавшися бра́ку,/ искуше́ние прия́л еси́ от Бо́га/ лише́нием други́ни твоея́, я́коже И́ов,/ но сласте́м ми́ра сего́ не поработи́л еси́ себе́/ и, плотска́я жела́ния победи́в, яви́лся еси́ дово́лен бы́ти к несе́нию бре́мени Ева́нгельскаго,/ е́же тебе́ бысть легко́ и бла́го.

Вои́стинну ти бла́го бысть,/ я́ко да не преткне́ши но́гу твою́ о ка́мень собла́знов ми́ра сего́:/ прия́в щит ве́ры, обле́клся еси́ в шлем спасе́ния/ и, возложи́в на ся броню́ пра́вды,/ соприче́л еси́ себе́ ли́ку подви́жников духо́вных.

Да красу́ется град Ста́рица/ не ди́вными и восхища́ющими зре́ние оче́с вещми́,/ но зрев ю́наго ста́рца Диони́сия.

Не быва́ет свети́льник под спу́дом,/ но на све́щнице поставля́ют его́, да все́ми ви́дим бу́дет;/ та́кожде и ты, о́тче Диони́сие, благоуго́ден быв Бо́гови,/ получи́л еси́ посеще́ние во избра́нных Его́,/ соде́лавшися наста́вником и назида́телем ста́да духо́внаго.

Неистощи́ма есть си́ла Бо́жия чудоде́йствующая:/ прославля́ет Бог святы́х Свои́х,/ да по́зднии пото́мцы, не прилепля́яся к тле́нным и скороги́бнущим веще́м,/ па́че всего́ пеку́тся о свое́м преселе́нии на Не́бо./ Те́мже и дарова́ на сем пути́ свети́льники, уже́ возне́сшияся,/ в ни́хже све́тит нам и Диони́сий святы́й.

Ин

Ирмо́с: Утвержда́яй гром и созида́яй дух,/ утверди́ мене́, Го́споди,/ да тя пою́ и́стинно/ и творю́ во́лю Твою́:/ я́ко несть свят, я́ко Ты, Бо́же наш.

Утесня́емь есмь грехи мно́гими, преподо́бне Диони́сие,/ и напастьми лю́тыми содержи́м, к тебе́ прибега́ю:/ спаси́ мя, тре́бующаго твоея́ по́мощи.

Ты иногда́ в разли́чных ско́рбех и напа́стех су́щим помо́щник обре́лся еси́./ И ны́не вопи́ю, я́ко к те́плому своему́ хода́таю:/ спаси́ мя от находя́щих ми зол, преподо́бне Диони́сие.

Изба́ви мя от язы́ка льстивоглаго́ливаго, я́ко благи́й предста́тель,/ и спасе́на мя покажи́ ны́не и в день Суда́,/ моли́твами твои́ми, преподо́бне Диони́сие.

Богоро́дичен: Потопля́ет мя волна́ грехо́вная и бу́ря безме́стных помышле́ний./ Умилосе́рдися, Всенепоро́чная, и ру́ку по́мощи, я́ко Ми́лостива, простри́,/ да, спаса́емь, ублажа́ю Тя.

Ин конда́к, глас 4:

Пра́вило ве́ры, столп благоче́стия/ был еси́, Богоно́сне Диони́сие,/ яви́в в себе́ о́браз и приме́р/ преуспе́яния доброде́тели и по́двигов:/ се́ю Ева́нгельскою мре́жею/ мно́гих улови́л еси́ подража́телей,/ подая́ блестя́щею на Небеси́ сла́вою свое́ю/ ре́вность к соде́йствованию на по́льзу правове́рных./ Те́мже мы, ны́не воспева́юще сия́, мо́лим тя,/ да хода́тайствуеши о стране́ на́шей/ и о всем Це́ркви исполне́нии.

Седа́лен, глас 3:

Все житие́ мое́ в ле́ности мно́зей преидо́х,/ и ны́не прибли́жихся к вре́мени исхо́да моего́,/ и от враг мои́х устраша́юся,/ да не исто́ргнут ду́шу мою́ и во глубину́ поги́бели сведу́т./ Но к тебе́ прибега́ю, па́стырю своему́, преподо́бне Диони́сие:/ уще́дри мя, раба́ твоего́,/ и изба́ви мя от озлобле́ния сих моли́твами твои́ми.

Сла́ва:

Прииди́те к сему́ гро́бу, глаго́лющиися бы́ти мудры́ и объюроде́вши,/ ослепи́вшися помышле́нии ве́ка сего́,/ зри́те чу́до Ева́нгелия,/ я́ко мы с ме́ртвым глаго́лем, и той нам отвещава́ет:/ о́тче Диони́сие, рцы нам сло́во утеше́ния./ Не услы́шите, краснозлоглаго́льствующии мудрецы́ ве́ка сего́, слове́с пра́веднаго,/ но правове́рнии, прини́кнув к его́ гро́бу, к святы́м его́ оста́нкам, я́вственно слы́шат,/ я́ко смерть ве́рных суть Па́сха/ и тле́нное их соде́лывается нетле́нными.

И ны́не, Богоро́дичен:

Мно́гими прегреше́нии аз, блу́дный, ум помрачи́в,/ вопию́ к Твоему́ кре́пкому заступле́нию, Богоро́дице:/ просвети́ души́ моея́ зе́ницы,/ и возсия́й ми покая́ния све́тлую зарю́,/ и облецы́ мя во ору́жие све́та, Богороди́тельнице Чи́стая.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Удиви́л еси́, Го́споди, пути́ Твоя́ в путе́х пра́ведных,/ просвеща́я нас чрез возлю́бленных Твои́х/ и соде́ловая нам в них спасе́ние,/ е́же яви́л еси́ и во уго́днице Твое́м Диони́сии.

Вну́тренними смяте́нии егда́ напа́ствуема бе Росси́я, та́кожде и вне́шними,/ воздви́гл еси́, Го́споди, подвигополо́жников духо́вных,/ и́же без меча́ и стрел и не кова́рством укроти́ша де́рзость враго́в,/ но си́лою смире́ния и свя́тости,/ в ли́ке ко́их воспева́ем и тя, о́тче Диони́сие.

Ни я́рость зве́рская,/ ни муче́ния злоны́рливых враго́в не устраши́ша тебе́,/ но, испове́дник быв Бо́жия сло́ва, увеща́я наро́д,/ и царю́, и Патриа́рху, бди́тельному оте́чества па́стырю,/ мно́гу сотвори́л еси́ по́льзу.

Удивля́яся, ве́рнии росси́яне, всеблаже́нному Патриа́рху Гермоге́ну,/ почти́те днесь па́мять воспева́емаго на́ми Диони́сия,/ и́же, с ним вку́пе побо́рствуя о ве́ре,/ я́ко наде́жде спасе́ния оте́чества, мно́гая подъя́т озлобле́ния.

Богоро́дичен: А́ще зря́ще то́кмо о́браз царя́, на земли́ су́ща благоде́тельна и благочести́ва,/ на пе́рси своя́ восхити́тельне его́ взима́ют,/ я́ко изобразу́юща Христа́ Го́спода;/ возвели́чим у́бо, правосла́внии,/ носи́вшую во утро́бе Свое́й Царя́ царе́й, Благоде́теля всему́ ми́ру,/ Ея́же моли́твами, при и́скреннем взыва́нии на́шем,/ Бог, ми́ра Оте́ц, вознесе́т рог правосла́вных люде́й.

Ин

Ирмо́с: Сей Бог наш, от Де́вы вопло́щся/ и естество́ обожи́в,/ Его́же воспева́юще, вопие́м:/ сла́ва си́ле Твое́й, Го́споди.

Ру́це возде́ти не сме́ю ко Спаси́телю своему́ Бо́гу,/ весь оскверне́н нечи́стыми де́лы:/ испроси́, преподо́бне, отпуще́ние грехо́в мои́х.

Испра́ви, преподо́бне Диони́сие, моли́тву раба́ твоего́,/ я́ко кади́ло благово́нно, ко Го́споду Иису́су Христу́,/ да твои́м заступле́нием получу́ ми́лость.

Нечи́стыми по́мыслы оскверни́х ду́шу мою́/ и в ле́ности все житие́ ижди́х;/ к тебе́ прибега́ю, преподо́бне,/ очище́ние ми пода́ждь моли́твами твои́ми.

Богоро́дичен: Ору́жием уя́звлена мя грехо́вным и лежа́ща,/ исцели́ мя де́йственными Свои́ми мольба́ми, Пренепоро́чная Влады́чице,/ и уны́ния тьму разжени́.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

И́стинным сло́ва Бо́жия разуме́нием одаре́н был еси́ свы́ше, Богому́дре Диони́сие,/ и сего́ ра́ди па́че други́х поручено́ тебе́ испра́вити погре́шности,/ в церко́вныя кни́ги по неве́дению вше́дшия.

Подража́я блаже́нному Макси́му Гре́ку,/ и́же быв истре́бован испра́вити преведе́нныя кни́ги,/ но от неве́жествующих пострада́ за и́стину,/ и ты, святы́й Диони́сие, быв ему́ после́дователь,/ сей же жре́бий име́в, и́стину отщепи́вшимся показу́еши.

А́ще бы́хом име́ли дар такова́го ве́дения,/ я́коже сла́вимый ны́не Диони́сий,/ согла́сие водвори́лося бы в нас;/ но, о Пресвяты́й Бо́же,/ ве́руем, я́ко и сих, неве́дущих Писа́ния,/ приведе́ши во двор Твой моли́твами и приме́ром Богому́драго Диони́сия.

Богоро́дичен: Твоя́ песносло́вцы, Богоро́дице,/ духо́вно утверди́шася и испо́лнишася Ду́ха,/ не усты́, но се́рдцем испове́дающе Тя, Честне́йшую Херуви́м/ и Благослове́ннейшую в челове́цех.

Ин

Ирмо́с: Часть моя́ еси́, Го́споди,/ и сла́ва лица́ моего́,/ Ты бо мя из тьмы неве́дения/ еди́н изба́вил еси́ Богоразу́мием,/ и Тебе́ молю́ся, Христе́:/ да́руй рабу́ Твоему́ мир, я́ко Человеколю́бец.

Шата́ние ю́ности и лицеме́рие ста́рости–/ обоя́ безу́мие стяжа́х и весь студа́ напо́лнен бых./ Но со слеза́ми к тебе́ вопию́:/ помо́щник ми бу́ди ко спасе́нию.

Узре́х скве́рну души́ моея́,/ в зерца́ло дел мои́х прини́кнув,/ и во окри́не40 слез мои́х измы́тися подви́гнухся;/ испроси́ ми, преподо́бне, у Спа́са вре́мя покая́ния,/ да получу́ отпуще́ние грехо́в.

Да́нное ми бога́тство духо́вное пре́жде/ теле́сными сластьми́ зле ижди́х./ Но, я́ко блу́днаго, преподо́бне, уще́дрив, оправда́й,/ ускори́ на по́мощь пре́жде кончи́ны моея́ и спаси́ мя.

Богоро́дичен: Исцели́ душе́вныя моя́ я́звы, Богоро́дице,/ заступи́ мя, Деви́це,/ и изба́ви мя, раба́ Твоего́, от оклевета́ния, и наве́та, и развраще́ния непра́ведна.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Кто испове́сть благонра́вие и ще́дрость твою́, о́тче Диони́сие,/ никто́ бо не исхожда́ше тощ от Тебе́,/ не прия́в ми́лости и слове́с, назида́ющих и́стинное бога́тство.

Я́ко жела́ет еле́нь на исто́чники водны́я,/ си́це но́зе твои́ теча́сте на песносло́вия Бо́жия;/ коле́не твои́ изнемого́сте от бде́ния,/ и плоть твоя́ измени́ся от поще́ния,/ но не́мощь твоя́ пре́йде от си́лы в си́лу.

Искони́ враг челове́ков, узре́в тя, в ми́ре сем не от ми́ра бы́вша,/ поскрежета́ зубы́ свои́ми и рече́: гнав, пости́гну./ Но ты, откры́в путь твой ко Го́споду, глаго́лал еси́:/ а́ще и сонм враго́в обы́дет мя, не убою́ся,/ упова́я на Тя, Бо́же оте́ц на́ших, И́же благослове́н во век.

Я́коже иногда́ три о́троцы сла́вляху среди́ огня́ ве́домаго Бо́га,/ та́кожде и ты, горя́ во огни́ озлобле́ний,/ огне́м Боже́ственныя любве́ попали́л еси́ лука́внующих,/ воспева́я ми́лость в ро́ды родо́в боя́щимся Го́спода.

Богоро́дичен: Змий, уязви́вый пя́ту благослове́ннаго, притупи́л есть свое́ жа́ло,/ те́мже у́бо Тебе́, ро́ждшую Сте́ршаго главу́ его́,/ Уме́ршаго за грехи́ на́ша и Воста́вшаго за оправда́ния на́ша,/ досто́йно велича́ем.

Ин

Ирмо́с: Бу́ря мы помышле́ний, пости́гши,/ во глубину́ низвлачи́т мя безме́рных грехо́в,/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя.

От пеле́н в плен враго́в веде́н бых, беззако́нием кипя́,/ но тебе́ наста́вника стяжа́в и твоея́ по́мощи тре́буя, зову́:/ спаси́ мя, упова́ющаго на тя.

На умоле́ние мое́ умилосе́рдися/ и ра́дость в печа́ли ме́сто да́руй,/ да пою́ при́сно, преподо́бне Диони́сие, и вопи́ю ти приле́жно:/ изба́ви мя от наве́та вра́жия.

Изтяза́ния мя в час стра́шный свободи́ моли́твами твои́ми, преподо́бне Диони́сие,/ и бесо́вския пре́лести от мене́ отжени́/ и му́ки ве́чныя изба́ви мя.

Богоро́дичен: Собо́рище на ны лука́вое собра́ся,/ непра́ведно борю́щее нас, Пречи́стая Богоро́дице:/ сих низложи́, и непра́ведное со́нмище разжени́,/ и душа́м на́шим поле́зная сотвори́.

Конда́к, глас 6:

Свет Трисия́нный, всели́выйся в ду́шу твою́,/ сосу́д избра́н показа́ тя,/ веща́юща Боже́ственная лю́дем,/ испове́дник Бо́жия Сло́ва яви́лся еси́,/ и прилага́ющих Божеству́ веще́ственный огнь/ я́вственно обличи́л еси́,/ и злосла́вных смы́слы, я́ко паучи́нное пряде́ние, растерза́л еси́,/ благоче́стия столп и забра́ло тве́рдое ми́рови показа́лся еси́/ и сего́ ра́ди от Вселе́нскаго Патриа́рха ди́вне похвале́н был еси́./ Мы же благода́рными гла́сы, веселя́щеся, вопие́м ти:/ ра́дуйся, о́тче наш, Диони́сие преподо́бне.

И́кос:

Грехо́в ми разреше́ние пода́ждь/ и е́же пе́ти по достоя́нию по́двиги твоя́, Диони́сие преподо́бне,/ в ров бо глубо́к вве́ржен есмь неразу́мия,/ а́ще не ты ми пода́си, недосто́йному, сло́во и язы́к непосты́ден,/ воспе́ти со дерзнове́нием си́це:/ ра́дуйся, Небе́сный челове́че и земны́й А́нгеле,/ я́ко с пло́тию на земли́ Безпло́тных житие́ показа́л еси́./ Ра́дуйся, па́стырю всеизря́дный,/ я́ко после́довал еси́ стопа́м преподо́бнаго Се́ргия,/ ста́до твое́ упа́сл еси́ и и́нок мно́жество до́бре упра́вил еси́./ Ра́дуйся, терпе́ния сто́лпе и смире́нныя кро́тости высото́./ Ра́дуйся, стра́нным прибе́жище и безнаде́жным неча́емое упова́ние./ Ра́дуйся, скорбя́щих утеше́ние и безпомо́щных помо́щниче./ Ра́дуйся, духодви́жимая уста́ и язы́че богоглаго́ливый,/ я́ко во вре́мя всеми́рных напа́стей наро́ду веща́л еси́/ и царю́ и Патриа́рху мно́гу по́льзу сотвори́л еси́./ Ра́дуйся, врачу́ прему́дрый я́звенным,/ я́ко при́сный оте́ц о них промышля́я,/ о́вых врачу́я, о́вых же с пе́нием подоба́ющим и с напу́тием ве́чнаго живота́ отпуща́я./ Ра́дуйся, пита́телю благи́й си́рым и больны́м промы́шленниче/ и упокое́ние в до́брей пи́щи и пити́и,/ сам же, благодаря́ Бо́га, овся́ным хле́бом и водо́ю дово́льствовавыйся./ Ра́дуйся, свы́ше от Бо́га дар восприи́мый умноже́нием хле́ба,/ я́ко и мал сосу́дец не оскуде́ на пи́щу бра́тии и наро́ду мно́гу./ Ра́дуйся, пропове́дниче Бо́жия Сло́ва,/ Правосла́вия догма́ты утвержда́я,/ злосла́вных же смы́слы из ко́рене исторга́я./ Ра́дуйся, страда́льче предо́брый,/ изгна́ния и ра́ны на телеси́ му́жески претерпе́в, по и́стине побора́я./ Ра́дуйся, церко́вное утвержде́ние и умире́ние ми́ру./ Ра́дуйся, наста́вниче спасе́ния на́шего, Диони́сие преподо́бне.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Боже оте́ц на́ших.

Златолюби́ваго эконо́ма, дерзну́вшаго оболга́ти тя царю́ и Патриа́рху,/ во е́же свято́е оби́тели стяжа́ние непра́ведно отъя́ти,/ претерпе́в темни́цу и ра́ны, де́лы свои́ми низложи́в,/ яви́лся еси́ и́стинный до́лжнаго назида́ния строи́тель.

Хитросплете́нныя ко́зни сокруши́в,/ не убоя́лся еси́ гне́ва царе́ва и Патриа́рхова,/ показа́в озлобле́нии свои́ми обстоя́щую их лесть и кова́рство,/ сказа́л еси́ пути́ пра́вды Ева́нгельския.

Егда́ па́ки бе́здна беззако́ний на́ших призва́ бе́здну гне́ва правосу́дия Бо́жия/ и егда́ не бысть ни гра́да, ни ве́си, ни де́бри, е́же бы укры́тися христиа́ном,/ восхоте́ Бог показа́ти си́лу Свою́ не в си́ле ко́нстей, но в небра́нных во́инех:/ проти́вныя сотре́,/ препоя́сав си́лою Свое́ю подви́жники Ла́вры Се́ргиевы.

Преста́ волне́ний оте́чества на́шего бу́ря,/ егда́ яви́шася ве́рнии по ве́ре ко́рмчии:/ му́дрый Иоаса́ф, ре́вностный Авраа́мий и усе́рдный по Бо́зе Диони́сий,/ его́же ны́не чту́ще па́мять, благословля́ем Тя, Бо́же Росси́и.

Богоро́дичен: Благослове́н Христо́с,/ Плод чре́ва Твоего́, Богоро́дице Де́во,/ я́ко под Его́ зна́менем ополча́ющиися побежда́ют ви́димых враго́в.

Ин

Ирмо́с: Не преда́ждь нас до конца́ И́мене Твоего́ ра́ди,/ и не разори́ Заве́та Твоего́,/ и не отста́ви ми́лости Твоея́ от нас,/ Го́споди Бо́же оте́ц на́ших,/ препе́тый во ве́ки.

Испыта́тель бых чужи́х грехо́в, а своего́ беззако́ния утаи́тель,/ оправда́юся язы́ком, де́лы же в нече́стие схожду́./ Сего́ ра́ди мо́лю тя, преподо́бне,/ да очи́стиши мя от беззако́ния моего́.

Еще́ ми́лости и заступле́ния у тебе́ прошу́, Диони́сие преподо́бне,/ не возгнуша́йся моея́ смра́дности,/ поми́луй мя, милосе́рдовав о мне,/ и изведи́ мя ко исправле́нию моли́твами твои́ми.

Покро́в мой и прибе́жище ты еси́, и заступле́ние,/ и при́сное хвале́ние ми о тебе́, преподо́бне Диони́сие,/ не пре́зри мя, раба́ твоего́, упова́ющаго на тя.

Богоро́дичен: Раболе́пно весь преклоня́юся, окая́нный,/ и от се́рдца моего́ вопию́,/ ру́це распросте́р, коле́на преклоня́ю, и молю́ Тя, Пречи́стую Де́ву,/ изба́витися ско́ро бед, при́сно находя́щих от наве́та чужда́го.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Па́ки ты в озлобле́ниих и му́ках от враго́в и́стины,/ тебе́, я́ко правдолю́бцу соде́янных,/ быв це́лый год,/ подвиза́яся о сохране́нии Бо́жия сло́ва, в спасе́ние на́ше пре́даннаго,/ показа́л еси́ нам приме́р,/ да и мы, в жите́йстем мо́ре бу́рею, проти́ву нас ды́шущею, напа́ствуеми,/ та́кожде ополчи́вшеся, противоста́нем ко́знем/ и дости́гнем ти́хаго ве́чнаго приста́нища.

Преста́ша иногда́ дыша́ти зло́бою бра́тия на Ио́сифа,/ егда́ бе во спасе́ние им,/ и он, преда́в забве́нию оби́ду,/ прообразова́л есть кро́тость Ева́нгелия;/ се но́вый Ио́сиф,/ быв и́стинно усе́рдный житоме́ритель благослове́нному гра́ду Москве́/ и о́крестным ве́сем, ги́бнущим от гла́да,/ но мудре́йшии сы́нове ве́ка сего́ не преста́ша от зло́бы на пра́вду,/ за ню же стоя́л еси́, Диони́сие блаже́нне.

И́стинно рек воспроси́вшим тя,/ ка́ко бысть толи́кое твое́ бе́дствование, глаго́лав:/ беды́ и напа́сти в ве́це сем/ не суть беды́ и напа́сти, но суть иску́с Бо́жий./ Вои́стинну та́ко:/ я́ко бо зла́то, в горни́ле искуша́емое, быва́ет светле́е,/ та́кожде и ты, быв искуше́н,/ избе́гнув и́стинныя беды́ гее́нския,/ яви́лся еси́ светле́е во све́тлостех святы́х./ Те́мже и нас, искуша́емых, убежда́еши ревнова́ти сла́ве твое́й.

Терпя́, потерпе́л еси́, и ти внят Госпо́дь,/ и поста́ви но́зе твои́ на ка́мени Це́ркве Своея́,/ и исчезо́ша врази́ твои́,/ и вложи́ во уста́ твоя́ песнь, во е́же с ве́рными глаго́лати:/ а́ще есть Бог, судя́й на земли́,/ у́бо есть плод пра́веднику, и путие́ его́ пра́ви суть.

Богоро́дичен: Вся на́ша до́брая дела́ была́ бы́ша вменена́ за ничто́,/ а́ще бы не чрез Воплоти́вшагося от Тя/ соде́лася спасе́ние челове́ков.

Ин

Ирмо́с: Земля́, и вся, я́же на ней,/ мо́ре и вси исто́чницы,/ Небеса́ небе́с, свет и тьма, мрак и зной,/ сы́нове челове́честии/ и свяще́нницы, благослови́те Го́спода/ и превозноси́те Его во ве́ки.

Еди́ным спаси́тельным путе́м устро́й мя ше́ствовати, преподо́бне Диони́сие,/ моли́твами твои́ми непреткнове́нно,/ я́ко руководи́тель и наста́вник к ве́чному животу́.

Пла́вая в пучи́не настоя́щаго жития́, помышля́ю бе́здну мно́гих мои́х зол/ и не и́мам окорми́теля помышле́нием, преподо́бне./ Спаси́ мя, обурева́емаго при́сно,/ и пода́ждь ру́ку по́мощи.

Объя́т бых дрема́нием злым, окая́нный,/ и сон отча́яния покры́ мя, беззако́ннаго./ Но ты, наста́вниче мой, при́зри на мя ми́лостивным о́ком,/ виждь смире́ние мое́ и спаси́ мя.

Богоро́дичен: Душе́вных ми слез даждь ка́плю, Пречи́стая Богоро́дице,/ омыва́ющу скве́рну всю мои́х дея́ний и лука́вая помышле́ния,/ всю очища́ющу души́ моея́ нечистоту́ и Це́рковь творя́щу мя Бо́жия Ду́ха.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Не умолчи́м и сего́, чтя па́мять преподо́бнаго,/ коль ве́лие име́ он попече́ние, подража́я пра́ведному Тови́и,/ о погребе́нии ме́ртвых, изби́тых от враго́в оте́чества на́шего,/ и како́в бе его по́двиг в лече́нии от ни́хже изму́ченных ра́нами:/ сам исхожда́ше с бра́тиею но́щию/ и врачева́ше я́звы их, ели́ко мо́щно бе.

Тре́тие яви́ся оби́тель ди́внаго Се́ргия щит и огражде́ние ве́рныя Росси́и,/ же́ртвуя пра́ведными свои́ми стяжа́нии./ Сим приме́ром возжего́шася и́стинная ча́да Росси́и,/ и, умили́вшеся ея́ гра́матами, Пожа́рский и Ми́нин ско́ро потеко́ша на избавле́ние оте́чества./ Те́мже и ны́не, блаже́нне Диони́сие, моли́ Бо́га,/ да оте́чество и кинови́я сия́ бу́дут непреодоли́мы.

Глаго́лют нечести́вии, я́ко во вре́мени вся ги́бнут, пра́во глаго́лют:/ поги́бнут бо с помышле́нии свои́ми,/ но в па́мять ве́чную бу́дет пра́ведник,/ и пра́вда его́ пребу́дет во век./ Те́мже и мы ублажа́ем тя, о́тче Диони́сие, и чтим святу́ю па́мять твою́,/ ты бо свои́м приме́ром и нас руково́дствуеши к Небеси́.

За вся сия́ почте́н быв во вре́мени,/ похвале́н и от Вселе́нских Патриа́рх,/ из ни́хже от Иерусали́мскаго получи́л еси́ клобу́к его патриа́ршеский,/ но блаже́ннее яви́лся еси́, егда́ умира́я о Го́споде, воспева́л еси́ Па́сху твою́, глаго́ля:/ умре́ти ми приобре́тение есть,/ тече́ние соверши́х, ве́ру соблюдо́х./ Те́мже и воспева́ем тя, сподо́бившагося венца́ Небе́снаго.

Богоро́дичен: Упова́ние христиа́н, Пресвята́я Де́во,/ Его́же родила́ еси́, Бо́га,/ непреста́нно моли́ с Вы́шними си́лами исправле́ние жития́ пода́ти и оставле́ние грехо́в/ ве́рою и любо́вию при́сно Тя сла́вящим.

Ин

Ирмо́с: Велича́ем вси/ человеколю́бие Твое́, Христе́ Спа́се наш,/ Сла́во раб Твои́х/ и Ве́нче ве́рных,/ возвели́чивый па́мять Ро́ждшия Тя.

Омраче́нный ум мой просвети́,/ и ду́шу мою́ боле́знующую исцели́, преподо́бне Диони́сие,/ и огня́ неугаси́маго исхити́, и ве́чных мук неизглаго́ланных изба́ви мя.

Безслове́сными страстьми́ прекло́нься,/ во глубину́ поги́бели снидо́х,/ и пла́мени сожже́ние сам ся соде́лах,/ и нико́ея же по́мощи име́ю, ра́зве тебе́, преподо́бне.

На тя наде́жду спасе́ния моего́ возлага́ю, преподо́бне,/ и к тебе́ прибега́ю:/ не пре́зри мя, во гресе́х погиба́ющаго,/ спаси́ мя благоутро́бным твои́м заступле́нием.

Богоро́дичен: Еди́на боля́щих посеще́ние,/ Еди́на па́дших исправле́ние, Влады́чице,/ Еди́на к Бо́гу Руководи́тельнице и вход,/ Еди́на Хода́таице ве́чных благ,/ поми́луй мя, еди́наго, и́же па́че всех согреши́вшаго.

Свети́лен:

Све́тлым житие́м твои́м свет ста́ду твоему́ был еси́, преподо́бне Диони́сие,/ те́мже и на́ша омраче́нная грехо́м сердца́ све́том покая́ния просвети́/ и на путь за́поведей Госпо́дних напра́ви.

Сла́ва, и ны́не, Богоро́дичен:

Свет ро́ждшая ми́ру, Пречи́стая Влады́чице,/ просвети́ у́мныя о́чи души́ моея́/ и спаси́тельных слез исто́чники да́руй ми, рабу́ Твоему́,/ я́ко да по до́лгу Тя ублажа́ю.

На хвали́тех стихи́ры на 6, пра́здника 3 и свята́го 3, глас 4:

Егда́ не бысть гра́да, ни ве́си, ни де́бри,/ е́же укры́тися лю́дем росси́йским от мучи́тельства враго́в,/ и́мже грех ра́ди свои́х пре́дани бы́ша,/ тогда́ ты, преподо́бне Диони́сие,/ кре́пкое прибе́жище и наде́жное приста́нище всем стра́ждущим яви́лся еси́./ Те́мже и нас мучи́тельства де́монскаго изба́ви/ и от страсте́й свободи́ моли́твами твои́ми.

Нощь вся́ка день тебе́ бысть,/ преподо́бне Диони́сие,/ егда́ о избавле́нии оте́чества твоего́/ те́пле со слеза́ми и во́плем кре́пким моли́лся еси́;/ те́мже и возра́довался еси́, спасе́ние зря/ и ми́рное люде́й пребыва́ние,/ е́же и нам от Бо́га испроси́ моли́твами твои́ми.

Нападо́ша иногда́ на преподо́бнаго Се́ргия,/ моля́щася в со́зданней им це́ркви,/ бесо́вския по́лчища во о́бразе лито́вских во́инских люде́й,/ хваля́щеся ме́сто сие́ разори́ти,/ но моли́твою его́ прогна́ни бы́ша:/ се промысли́тельное проявле́ние бысть,/ е́же последи́, во твое́ вре́мя, де́лом соверши́ся,/ егда́ оби́тель сия́ до́лгое вре́мя лито́вскими людьми́ вою́ема бе,/ и́же тща́хуся о́ную вконе́ц разори́ти,/ но саме́х богопораже́нною я́звою тру́пия/ досто́йно падо́ша, псало́мски, при а́де./ Те́мже и ны́не не преста́й, преподо́бне Диони́сие,/ спаса́ти оби́тель сию́ и вся гра́ды и страны́ христиа́нския/ от всех наве́т вра́жиих моли́твами твои́ми.

Сла́ва, глас то́йже:

По мно́гих труде́х и страда́ниих,/ и́же подъя́л еси́ о спасе́нии оте́чества/ и исправле́нии церко́внем,/ честь старе́йшинства и пе́рвенства в бра́тиях твои́х/ тебе́ от Вселе́нскаго Патриа́рха даде́ся, преподо́бне Диони́сие,/ от Бо́га же Небе́сное Ца́рство и несконча́емую ра́дость насле́довал еси́,/ е́же и нам испроси́ моли́твами твои́ми.

И ны́не, пра́здника.

Славосло́вие вели́кое. Та́же ектении́ и отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

От млады́х ногте́й возлюби́вый Христа́, преподо́бне Диони́сие, – сотвори́ моли́твами свои́ми, да и на́ши сердца́ свяще́нным любве́ Бо́жия огне́м пламене́ют, не то́кмо в ю́ности, но и в ста́рости да не погаса́ют, возжига́ема теплото́ю ве́ры. Возложи́вый на ся, подви́жниче, яре́м Ева́нгельский, и о́ный обре́тший благи́м и ле́гким, до конца́ о́ный му́жественно соверши́л еси́, сподо́бившися венца́ торже́ственнаго, я́ко победи́тель, – и нам помози́ тя́гостное бре́мя жития́ сего́ му́жественно понести́ и, соблю́дше ве́ру до конца́, сподо́битися милосе́рдаго от Бо́га воздая́ния. Быв тща́тельный и ре́вностный зва́ния, от Бо́га тебе́ возложе́ннаго, испо́лнитель, – помози́ и нам проходи́ти зва́ния на́ши неосла́бно, подкрепля́я нас упова́нием по́мощи на Всеси́льнаго. Мно́гая ко́зни и страда́ния от злоко́зненных враго́в великоду́шно претерпе́вый, свя́те Диони́сие, – и нам, окруже́нным сетя́ми вра́жиими и разли́чным искуше́нием подлежа́щим, моли́твами твои́ми испроси́ свы́ше по́мощь на побежде́ние и попра́ние о́ных. Всегда́ умерщвля́я посто́м, моли́твами и бде́нием плоть свою́ и о́ную соде́лал еси́ хра́мом Животворя́щего Ду́ха, – и нас святы́й приме́р твой да возбужда́ет подража́ти следа́м твои́м и улучи́ти вре́мя к покая́нию и оставле́нию грехо́в на́ших. Быв горя́щий о сла́ве Це́ркве и оте́чества ревни́тель, – исхода́тайствуй моли́твами твои́ми мир Це́ркви Правосла́вно-Росси́йской, оте́честву на́шему благоде́нствие, оби́тели Се́ргиевой твои́м правле́нием благоустро́енной и защище́нной, всемогу́щее покрови́тельство, нам же всем, к тебе́ с любо́вию притека́ющим, здра́вие и спасе́ние, да прославля́ем просла́вльшаго тя Го́спода ны́не, и при́сно, и во ве́ки веко́в. Ами́нь.