Служба преподобнаго Алипия, иконописца Печерскаго, в Ближних пещерах почивающаго
НА ВЕЧЕ́РНИ
На Го́споди, воззва́х: стихи́ры, глас 4.
Подо́бен: Зва́нный свы́ше:
О́браз сла́вы Бо́жия во уме́ свое́м име́я вы́ну,/ преблаже́нне о́тче Али́пие,/ ду́шу свою́ образова́л еси́ доброде́тельными испещре́нии,/ жела́я сию́ кра́сну Тро́ичней сла́ве яви́ти,/ отню́дуже ша́ры32 прие́мь духо́вныя благода́ти,/ был еси́ чудотво́рец преизря́ден,/ и Его́же лице́ в се́рдце твое́м начерта́л еси́,/ с Ним и ца́рствуеши ны́не;/ Того́ о нас моли́, преподо́бне,/ дарова́ти нам мир и сла́вы Своея́ наслажде́ние.
Зри́тель лица́ Бо́жия хотя́ бы́ти,/ поста́вил еси́ во уме́ свое́м, о́тче,/ вы́ну зре́ти Сладча́йший о́браз Иису́сов;/ тем положи́в ка́мень после́дняго смире́ния,/ поте́р ва́пы33 безпреста́нных моли́тв,/ раствори́в ты́я сле́зными пото́ки,/ написа́л еси́ на се́рдце пло́тянем ви́дение неви́димыя сла́вы Пресвяты́я Тро́ицы./ Е́йже ны́не предстоя́, моли́ о нас, свя́те,/ улучи́ти ми́лость и лица́ Бо́жия сла́дкое ви́дение.
Напису́я зра́ки святы́х,/ неопи́санныя сла́вы Бо́жия жела́нием распали́вся,/ написова́л еси́ ша́рами благи́х дея́ний/ на скрижа́лех се́рдца своего́/ зрак непреста́нныя любве́ к Пречи́стей Богома́тери,/ Е́йже худо́жеством твои́м послужи́в,/ чудотвори́выя благода́ти сподо́блься,/ прия́л еси́ мзду безконе́чнаго воздая́ния;/ и ны́не, со А́нгелы водворя́яся,/ моли́ о нас, преподо́бне,/ умири́ти мир и спасти́ ду́ши на́ша.
Сла́ва, глас 8:
О́браз челове́ческий иногда́ ле́стию вкуше́ния/ змий вселука́вый обезсла́вивый,/ ны́не, тебе́, о́тче, благода́ть от Бо́га прие́мшу,/ испо́лнися студа́,/ не стерпе́ бо на ико́ны твоего́ худо́жества взира́ти,/ я́же чудотво́рными лучи́ тьму разгоня́ют/ и подаю́т всем притека́ющим с ве́рою исцеле́ния да́ры;/ сих и нас прича́стники сотвори́,/ в дне́шний день па́мять твою́ соверша́ющих, Али́пие му́дре.
И ны́не, пра́здника.
На стихо́вне стихи́ры пра́здника.
Сла́ва, глас 4:
Мы́сленное начерта́ние души́ своея́ имы́й све́тло,/ преподо́бне о́тче наш Али́пие,/ све́тлыя благода́ти и чу́вственне сподо́бился еси́,/ ю́же изъявля́ше ико́н твои́х написа́ние/ и тре́бующим в неду́зех исцеле́ния подая́ние./ Тем мо́лим тя, всеблаже́нне,/ безобра́зие душ на́ших доброде́тельми испра́ви/ и стра́стныя стру́пы на́ша ша́рами моли́тв твои́х исцели́,/ я́коже прокаже́ннаго иногда́,/ да сла́вим тя хвала́ми, преподо́бным украше́ние.
И ны́не, пра́здника.
Тропа́рь, глас 8:
Зра́ки изобразу́я святы́х на дщи́цах,/ сих благодея́ния спе́шно,/ я́ко иску́сен худо́жник, всехва́льне Али́пие,/ написова́л еси́ на скрижа́лех твоего́ се́рдца/ и сего́ ра́ди, а́ки о́браз, благоле́пне укра́шен,/ свяще́нства благода́тию, а́ки зла́том, обложи́лся еси́/ от Христа́ Бо́га и Спа́са душ на́ших.
Сла́ва, и ны́не, пра́здника.
НА У́ТРЕНИ
Кано́н пра́здника и преподо́бнаго, глас 8.
Песнь 1
Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопи́юще,/ пои́м Тебе́, Еди́ному Влады́це.
Песнь возсла́ти пода́ждь, Христе́, по́мощь свы́ше рабо́м Твои́м,/ да принесе́м от те́плыя любве́ хвале́ние в па́мяти уго́дника Твоего́/ Тебе́, Еди́ному Влады́це.
Благода́ти умно́жившейся, процвета́ше ве́ра,/ и умножа́шеся полк преподо́бных на горе́ Пече́рстей,/ и́мже соо́бщник в житии́ хотя́ бы́ти преподо́бный,/ прии́де послужи́ти Еди́ному Христу́ и Влады́це.
От ю́ности твоея́ вда́лся еси́ роди́тели свои́ми, преподо́бне,/ в науче́ние ико́ннаго писа́ния,/ ему́же усе́рдно прилежа́,/ написова́л еси́ в се́рдце свое́м целому́дрие и чистоту́,/ я́ко от обои́х был еси́ раб своему́ Влады́це.
Чу́дное твое́ послуша́ние ди́внаго тя чудесе́ зри́теля показа́, о́тче,/ ви́дел бо еси́ о́браз Влады́чицы, изображе́н нерукотворе́нне,/ и, от сего́ виде́ния бо́льшею любо́вию к бо́гомыслию разгоре́вся,/ се́рдце свое́ уготовля́л еси́, а́ки скрижа́ль,/ к написа́нию па́мяти о Христе́ Влады́це.
Богоро́дичен: Скрижа́ле, иму́щая Ду́хом Святы́м напи́санный несказа́нно О́браз Ипоста́си О́тчия,/ мое́ злообра́зие, Ма́ти Де́во, во благообра́зие благи́х дея́ний претвори́,/ да отны́не угото́влюся послужи́ти Христу́, Бо́гу моему и Влады́це.
Песнь 3
Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.
Несть Тебе́ подо́бен в бозе́х, Христе́,/ де́йством бо Твоего́ Пресвята́го Ду́ха изобрази́л еси́ ико́ну Ма́тере Твоея́ нерукотворе́нне,/ и бысть чу́до ве́лие,/ ему́же самови́дец бе преподо́бный Твой, Го́споди.
И́же чудеса́ де́йствоваше,/ То́йже излете́ от уст ико́ны нерукотворе́нныя во о́бразе голуби́нем,/ Его́же ви́дев облета́юща внутрь це́ркве, преподо́бный Твой, Христе́,/ вся презре́ и ничто́же в ми́ре сем возлюби́, па́че Тебе́, Го́споди.
О́браз сла́вы Бо́жия ви́дев, преподо́бне,/ а́бие измени́л еси́ мирски́й о́браз, быв чернори́зец,/ до́бре напису́я доброде́тели изображе́ние,/ е́же и нам вообрази́ те́плыми моли́твами твои́ми.
От ико́ннаго худо́жества своего́, о́тче,/ навы́кл еси́ духо́вныя де́тели вообража́ти,/ до́бре бо убели́в сви́ток се́рдца своего́ сле́зными пото́ки,/ написа́л еси́ па́мяти о Бо́зе помышле́ние.
Богоро́дичен: Ра́дуйся, сви́тче, Богоневе́стная Де́во,/ на Не́мже пе́рстом Бо́жиим написа́ся О́тчее Сло́во,/ напиши́ на сви́тце се́рдца моего́ па́мять Стра́шнаго Суда́/ и гряду́щими муче́нии удержи́ е́ от злых, молю́ся.
Седа́лен, глас 4:
Бо́жия сла́вы зри́теля и ико́ннаго де́лателя прему́дра,/ кто с на́ми пе́сньми тя не восхва́лит, преподо́бне,/ ви́дел бо еси́ от ча́сти чу́вственне Свята́го Ду́ха,– ны́не же, предстоя́ Вы́шняго Престо́лу,/ не зерца́лом, но лице́м к лицу́ присносу́щную зри́ши сла́ву Бо́жию,/ ея́же и мы да причасти́мся, о́тче Али́пие, моли́твами твои́ми.
Сла́ва, и ны́не, Богоро́дичен:
Предста́тельнице Святе́й Тро́ице,/ предста́ни нам ско́ро, в дне́шний день собра́вшимся в хра́ме Твое́м пречестне́м,/ и даждь сла́ву преподо́бных Твои́х зре́ти сла́вящим Тя, Де́во,/ моли́твами Твои́ми.
Песнь 4
Ирмо́с: Из горы приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.
Из горы́ призва́л еси́ вслед тебе́ тещи́ преподо́бнаго Твоего́, Христе́,/ то́йже, мирски́я молвы́ отве́ргся, все́ю душе́ю приложи́ся Тебе́/ и во уме́ изобража́ше при́сно си́лу Твою́.
Я́ко све́тлая звезда́, возсия́л еси́, о́тче, на горе́ Пече́рстей,/ доброде́тели бо от Тебе́, я́ко лучи́, простро́шася, блаже́нне,/ и освеща́ют днесь тя велича́ющих,/ те́мже и мы прославля́ем благода́ть твою́.
Не мзды ра́ди, но ре́вностию дви́жим, прилежа́л еси́ де́лу своему́/ и от сего́ во благоле́пие неща́дно разда́вал еси́ це́рквам Бо́жиим,/ я́ко да вси, зря́ще на ико́ны твоя́, в любо́вь Бо́жию сердца́ своя́ обраща́ют.
Добр де́латель яви́лся еси́, блаже́нне, виногра́да Христо́ва,/ я́ко сво́йственно тебе́ со апо́столом глаго́лати:/ не ту́не хлеб ядо́х,/ и́бо ру́це мои́ мне и ине́м послужи́сте,/ те́мже прия́л еси́ от Бо́га дина́р/ и с благи́ми рабы́ сла́ву присносу́щную зри́ши.
Богоро́дичен: От чи́стаго сокро́вища чре́ва Твоего́ Дина́р яви́вшая ми́ру,/ искупи́ла еси́ тем всех от перворо́днаго до́лга,/ Ма́ти Бо́жия, к Тебе́ прибега́ю, искупи́ мя от мы́сленных заимода́вец,/ да при́сно сла́влю бла́гость Твою́.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
У́тренюющих славосло́вием к Тебе́ от уны́ния возста́ви, о́тче,/ и от мра́чных дел к све́ту Богоразу́мия моли́твами твои́ми возведи́ умы́ на́ша,/ ско́раго бо тебе́ на по́мощь поспе́шника зна́ем.
От де́ла руку́ твое́ю, о́тче,/ в честь Еди́наго Бо́га в трича́стное отлуча́л еси́ разделе́ние:/ ико́нному тре́бованию, в монасты́рское дела́ние и в ми́лостыню ни́щим,/ и сим стяжа́л еси́ лу́чшее, присножела́емое рая́ селе́ние.
День ручны́м де́ланием,/ нощь же бде́нием, моли́твою и поклоне́нием провожда́л еси́ всегда́, блаже́нне,/ и та́ко, возложи́в ру́ку на ра́ло,/ упра́влен был еси́ в Ца́рство Бо́жие./ Та́мо помяни́ и нас хода́тайством твои́м к Бо́гу.
Возсия́ со́лнце и ви́де твоя́ труды́, свя́те,/ и́бо смире́ние, нестяжа́ние, чистоту́, терпе́ние, пост любо́вию ко всем растворя́л еси́,/ и сим восхожде́нием возше́л еси́ на высоту́ богомы́слия/ и Небе́снаго дарова́ния сподо́бился еси́.
Богоро́дичен: У́тро мы́сленное, произве́дшая в мир вели́кое Со́лнце,/ озари́ наш ум и се́рдце/ и сы́ны Све́ту покажи́ ны, мо́лимтися, Безневе́стная Де́во,/ Ты бо еси́ просвеще́ние и упова́ние на́ше.
Песнь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Ри́зу а́нгельскаго о́браза украси́в ша́рами и́ноческих трудо́в,/ возше́л еси́ на высо́кий степе́нь свяще́нства сове́том наста́вника своего́/ и, на том стоя́, а́ки свети́ло, све́том твои́х дел мно́гих просвети́л еси́.
Ри́зу Креще́ния окаля́вшему мне греха́ ка́лом,/ даждь умиле́ние, свя́те, моли́твами твои́ми,/ да в нем испиру́34 и чист явлю́ся лицу́ Бо́жию:/ се бо предстою́, песносло́вя хвалу́ Твою́ бре́нными устна́ми.
Оде́жду свяще́нства прие́мь,/ по подо́бию Вели́каго Архиере́я, Сы́на Бо́жия, вшел еси́, о́тче, во вну́тренняя заве́сы,/ приноси́ти же́ртву Поже́ршемуся за грех всего́ ми́ра,/ твои́ми моли́твами ны́не, а́ки же́ртвою, и о нас, свя́те, Творца́ уми́лостиви.
Оде́ян сый оде́ждею свяще́нства,/ бо́льших дарова́ний сподо́бился еси́,/ я́ко и оде́янных прокаже́нием моли́твами твои́ми исцеля́л еси́,/ и нас, мы́сленне неду́гующих, си́ми исцели́, мо́лимтися, преблаже́нне.
Богоро́дичен: Уязви́вших нас грехолю́бия стрело́ю, уязви́, Пречи́стая Де́во,/ и побе́гнут, студо́м пораже́ни, де́монския полки́,/ Ты бо еси́ бесо́м струп неисце́льный.
Конда́к, глас 2:
От ю́ности Боже́ственное в себе́ име́я начерта́ние,/ вдан был еси́ в науче́ние ико́ннаго писа́ния;/ и внегда́ небеси́ подо́бная Богоро́дицы писа́шеся це́рковь,/ ты та́можде посо́бствовал/ и ви́дел еси́ Ду́ха Свята́го осия́ние,/ от Него́же прия́л еси́ чуде́с де́йство,/ я́ко ико́ны твоя́ чудотворя́ху,/ тем тя чтим и ублажа́ем, чу́дне Али́пие.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопи́юще:/ благослове́н еси́, Го́споди Бо́же, во ве́ки.
Де́тски игра́юща сумне́нием в ве́ре пра́ведно казнь Бо́жия пости́же,/ покры́ бо прока́за лице́ его́,/ сего́ ты, о́тче, исцели́л еси́ и оты́де, поя́:/ благослове́н Бог оте́ц на́ших.
Испове́давшему грех неве́рствия своего́/ пе́рвее приложи́л еси́, блаже́нне, покая́ния пла́стырь,/ и, души́ исцеле́вшей, исцеле́ и лице́ пома́занием вап твои́х,/ и той о тебе́ воспе́т:/ благослове́н Бог оте́ц на́ших.
И́же пе́рвее обоня́ния грехо́м острупи́вся,/ по сове́ту диа́волю отча́яся спасе́ния наде́жды./ Се той па́ки, твои́м, свя́те, уче́нием к Бо́гу обрати́вся, исцеле́н бысть/ и, избы́в обои́х струпо́в, воззва́:/ благослове́н Бог оте́ц на́ших.
Твои́м, преподо́бне, дивя́щеся чудесе́м мно́гим, взыва́ем согла́сно:/ ра́дуйся, Елиссе́е но́вый, неве́рующаго исцели́вый от прока́зы, я́ко Неема́на,/ и о тебе́ песнь о́троческую воспе́т:/ благослове́н Бог оте́ц на́ших.
Богоро́дичен: Безобра́зие души́ моея́ кто испра́вит, а́ще не Ты, Ма́ти Бо́жия,/ ша́рами бла́гости Твоея́ тоя́ лице́ в благообра́зие претвори́ши?/ И, благоле́пие прие́м, воспою́:/ ра́дуйся, Образу́ющая живописа́тельне челове́ческий о́браз.
Песнь 8
Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.
Яви́ тя, о́тче, всех Созда́тель на горе́ Пече́рстей доброцвету́щее ко исцеле́нию дре́во,/ плоды́ бо твои́х моли́тв всем к тебе́ приходя́щим подава́л еси́ исцеле́ние неоску́дно,/ и отхожда́ху здра́вы, превознося́ще Го́спода во ве́ки.
Незло́бие се́рдца твоего́ не лиши́ тя, преподо́бне, вели́ких дарова́ний,/ никогда́же бо огорчи́лся еси́ на оскорбля́ющих тя,/ ниже́ возда́л еси́ зло за зло,/ тем и просла́ви тя Христо́с зде и та́мо во ве́ки.
Сребролю́бия омраче́ннии тьмо́ю облича́ху тя пред челове́ки,/ но Бог изведе́, я́ко свет, пра́вду твою́/ и незло́бие твое́, я́ко полу́дне,/ ископа́вшии же тебе́ я́му впадо́ша в ню,/ и студ их помина́ют вси во ве́ки.
Седми́ дарова́нии де́йствуяй в Тро́ице Еди́ный Бо́же,/ изобрази́тися седми́м ико́нам повеле́л еси́ нерукотворе́нне/ и яви́л еси́ преподо́бнаго, иму́щаго седмь Паракли́та Твоего́ даро́в,/ сия́ и нам пода́ждь, Всеще́дрый Царю́,/ да превозно́сим Тя во ве́ки.
Богоро́дичен: От всех дарова́ний прие́мшая истка́нную ри́зу,/ ря́сны златы́ми оде́яна предста́ла еси́ Тро́ице Живонача́льней./ Ста́ни у́бо, возде́вши пречи́стеи ру́це Твои́,/ и о нас, благотворе́ния обнаже́нных, помоли́ся,/ Ты бо еси́, Пренепоро́чная, покрыва́ющая грехи́ на́ша.
Песнь 9
Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую пречи́стых Сил,/ немо́лчными славословле́нии велича́ем.
Тя, о́тче, прославля́ющаго, просла́ви Бог,/ я́ко твоего́ писа́ния ико́нам никогда́же огнь одолева́ше,/ но пребыва́ху це́лы от пожа́ра невреди́мы,/ я́же чудоде́ющия ви́дяще, о тебе́ немо́лчно славословле́нии Христа́ велича́ем.
Отвсю́ду стека́хуся лю́дие ви́дети пресла́вное чу́до,/ я́ко вся ина́я пояде́ пла́мень о́гненный,/ твоего́же писа́ния ико́н ника́коже вреди́./ Е́же и мы, слы́шаще чудоде́йствующаго в тебе́ Бо́га, славословле́нии велича́ем.
Храни́л еси́ незло́бие и ви́дел еси́ правоту́,/ житие́ свое́ провожда́я во вся́цей святы́ни,/ те́мже отвсю́ду Бог тя прославля́ше и изыма́ше от вся́кия напа́сти;/ сея́ и нас изба́ви твои́ми моли́твами, свя́те,/ да вы́ну тя пе́сньми велича́ем.
Ра́дуется град Росто́в, содержа́й ико́ну, ма́нием Бо́жиим напи́сану,/ и я́ко многоце́нным сокро́вищем искупу́ется от всех страсте́й,/ ю́же лобыза́юще, помина́ет, коли́ко Бог де́йствоваше тобо́ю, блаже́нне./ Сие́ чудоде́йствие и мы днесь чту́ще,/ удивля́емся и славословле́нии велича́ем.
Богоро́дичен: Столп кре́пости иму́ще Тя, раби́ Твои́, Богоро́дице Де́во,/ от лица́ враг на́ших гони́ми, к Тебе́ прибега́ем и, припа́дающе, мо́лимся:/ сохраня́й нас, в беда́х су́щих,/ Ты бо еси́ столп нам кре́пок от лица́ вра́жия и стена́ необори́ма.
Свети́лен:
При́сно храня́й тя, преподо́бне, в ско́рбех,/ прии́де за тя пред лице́м твои́м Богома́тере ико́ну написа́ти,/ ю́же в три часа́ изобрази́в све́тло,/ даде́ во благоле́пие пречи́стому хра́му на пра́здник,/ тебе́ же поя́т во храм Го́рний с су́щими от ве́ка святы́ми пра́здновати./ Иде́же ны́не гла́сом ра́дости пра́зднуяй,/ помяни́ и нас, Али́пие, о́тче блаже́ннейший.
Сла́ва, и ны́не, Богоро́дичен:
Храм су́щи, Вы́шняго десни́цею созда́нный,/ храм души́ моея́, грехо́м па́дший, возста́ви, Ма́ти Бо́жия,/ обнови́ Твои́м посеще́нием/ и даждь без ле́ности сла́ву Тебе́ принося́щим непреста́нно Тебе́ воспе́ти:/ ра́дуйся, Хра́ме Госпо́день, в прибе́жшце христиа́ном созда́нный.
На хвали́тех стихи́ры, глас 4.
Подо́бен: Я́ко до́бля:
Дави́дски днесь, лю́дие, воспое́м/ в па́мяти твое́й, о́тче всеблаже́нне:/ насажде́н был еси́ в дому́ Госпо́дни/ и процве́л еси́ во дворе́ Богома́тере,/ я́ко благово́нное дре́во,/ от него́же плоды́ прие́млюще исцеле́ний,/ прославля́ем просла́вльшаго тя Бо́га на́шего/ и мо́лимся приле́жно улучи́ти ми́лость твои́м хода́тайством/ и душе́вным страсте́м исцеле́ние.
Пра́ведник, я́ко фи́никс, процвете́т;/ на тебе́, о́тче наш Али́пие, сие́ испо́лнися,/ при исхо́дищи бо воды́ живы́я,/ богоно́сных оте́ц уче́ния,/ израсто́ша ве́тви твои́х исправле́ний,/ на и́хже сень взира́юще,/ к ра́це моще́й твои́х притека́ем/ и, любо́вию объе́млюще, мо́лимся:/ пода́ждь, свя́те, твои́ми моли́твами/ мир от Христа́ улучи́ти и житию́ исправле́ние.
Кто по достоя́нию похвали́ти возмо́жет/ труды́ и по́двиги твоя́, преподо́бне?/ Не дал бо еси́ сна свои́ма очи́ма,/ ни ве́ждома дрема́ния,/ до́ндеже ду́шу свою́ ва́пами украси́л еси́ доброде́телей,/ сообра́зну напису́я отце́м первонача́льным,/ и́хже жити́я ре́вность/ и в па́мяти на́шей напиши́, мо́лимся прилежно,/ да не лиши́мся и мы Небе́сных с те́ми пребыва́ний.
Сла́ва, глас 8:
О́браз сла́вы Бо́жия во уме свое́м име́я вы́ну,/ написова́л еси́ в души́ свое́й ре́вность/ непреста́нно о́бразом ше́ствовати оте́ц на́ших первонача́льных,/ и́хже житию́ после́дуя,/ в ме́ртвеннем те́ле безпло́тным во святы́ни уподо́бился еси́;/ с ни́миже ны́не Вы́шняго Престо́лу предстоя́,/ моли́ся, о́тче преподо́бне,/ пода́тися оби́тели на́шей еди́номыслию,/ я́ко чту́щей любо́вию святу́ю па́мять твою́.
И ны́не, пра́здника.
Славосло́вие вели́кое, ектении́, и отпу́ст.
На Литурги́и слу́жба пра́здника и преподо́бнаго Али́пия.
