Служба преподобнаго Алексия, человека Божия

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

И́же Христо́вы ра́ди любве́,/ Боже́ственный Алекси́е,/ дом отца́ и ма́тере, и обру́ченицу оста́вль,/ изво́лил еси́ нищету́ па́че бога́тства/ и, я́коже Моисе́й, с людьми́ Бо́жиими рабо́тати,/ не́жели име́ти жития́ тле́ннаго наслажде́ние,/ отню́дуже и Небе́снаго сподо́бися со святы́ми блаже́нства,/ блаже́нне Алекси́е,/ моли́ спасти́ся душа́м на́шим.

От ю́ности твоея́, блаже́нне,/ жела́нием Боже́ственным разжига́емь,/ отсю́дуже и А́нгелом бы́сть единожи́тель, преподо́бне,/ ни́зу влеку́щих отступле́й,/ ко Го́рним простира́яся,/ и ве́сь ум та́мо имы́й,/ и при́сно восхожде́ньми день от дне к Бо́гу приближа́яся,/ Его́же моли́ низпосла́ти мир ми́рови/ и душа́м на́шим ве́лию ми́лость.

Па́мять твоя́, преподо́бне Алекси́е,/ я́ко со́лнце, возсия́,/ ве́рных просвеща́ющи Боже́ственными чудесы́,/ Богомы́слием, виде́ньми и дея́ньми, пребога́те,/ чи́сту ду́шу свою́ соде́лал еси́,/ и плотска́я взыгра́ния умертви́в,/ в живоно́сную ме́ртвость оде́явся,/ земны́х же отсту́пль,/ к Небе́сным же пресла́вно возвыша́емь,/ вся земны́я концы́ просвеща́я благода́тию, преподо́бне.

Сла́ва, глас 6:

Пребы́л еси́ на мно́гое вре́мя, преподо́бне,/ пред враты́ честны́х твои́х роди́телей неве́дом,/ руга́ющимся тебе́ твои́м отроко́м,/ ты же Христа́ ра́ди вся с ра́достию до кончи́ны твоея́ претерпе́л еси́./ Те́мже и Боже́ственный глас свы́ше в це́ркви тебе́ огласи́/ и сла́вна тя всем показа́,/ Боже́ственная чудеса́ точа́ща./ Мы же мо́лим тя, преподо́бне Алекси́е,/ моли́ спасти́ся всем,/ любо́вию па́мять твою́ почита́ющим.

И ны́не, Богоро́дичен:

Никто́же, притека́яй к Тебе́,/ посрамле́н от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще/ Ду́ха Пресвята́го,/ прему́дре Алекси́е, был еси́./ Те́мже и нас до́мы Того́ соде́лай,/ святу́ю твою́ па́мять почита́ющих.

Стих: Честна́ пред Го́сподем/ смерть преподо́бных Его́.

Житие́ твое́, я́ко со́лнце,/ сердца́ ве́рных облистава́ет,/ зари́ благода́ти испуща́юще,/ и́миже и нас, гре́шных, озари́,/ всечестну́ю твою́ па́мять почита́ющих.

Стих: Блаже́н муж, боя́йся Го́спода/ в за́поведех Его́ восхо́щет зело́.

Не преста́й, моля́ся, Алекси́е,/ о правове́рных,/ я́же духо́вным свои́м житие́м просвеща́еши,/ да вси честно́е успе́ние твое́,/ веселя́щеся, почита́ем.

Сла́ва, и ны́не, глас и подо́бен то́йже:

Ра́дуйся,/ Я́же ра́дость ми́ру прии́мшая/ и утоли́вшая печа́ль,/ Де́во, прама́тернюю,/ Христа́ Жизнода́вца ро́ждши.

Тропа́рь, глас 4 (зри на вели́цей вече́рни).

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

Челове́ка тя позна́хом Бо́жия/ зва́нием же и ве́щию,/ доброде́тельми бо просия́л еси́,/ нищету́ безме́рную и тесноту́ на земли́ стяжа́в/ и чудесы́ ве́рныя уве́рив./ Те́мже моли́ся дарова́ти душа́м на́шим/ мир и ве́лию ми́лость.

Жела́нием, ороша́ющим пло́ть,/ по́хоти паля́щия угаси́л еси́, Алекси́е,/ черто́гом черто́г благоче́стно измени́л еси́,/ сла́дость же теле́сную Боже́ственным А́нгельским подо́бием./ С ни́миже моли́ся дарова́ти душа́м на́шим/ мир и ве́лию ми́лость.

Пребыва́л еси́ неве́домь, му́дре,/ пред враты́ оскорбля́емь свяще́нных роди́телей твои́х,/ руга́ющимся тебе́ твои́м отроко́м,/ на вре́мени до́лзе,/ у́мер же, яви́лся еси́ чудесы́,/ я́же соверши́л еси́,/ исцеля́я неду́ги и отгоня́я лука́вствия ду́хи.

Дом отца́ и ма́тере,/ к сим же обру́ченицу, бога́тство и сла́ву,/ и вку́пе вся оста́вил еси́,/ и на нетле́нная о́ная простира́яся,/ сего́ ра́ди Христо́с твой, Человеколю́бец,/ бо́льшими тебе́ дарова́нии обогати́ и чудесы́ почте́,/ Его́же моли́ дарова́ти душа́м на́шим/ мир и ве́лию ми́лость.

И́ны стихи́ры, глас 6.

Подо́бен: Всю отложи́вше:

На Творца́ твоего́ упова́ние возложи́в,/ преподо́бне о́тче Алекси́е,/ самово́льную нищету́ па́че бога́тства тле́ннаго возлюби́л еси́/ и, Влады́чнему стра́нствию подо́бяся,/ гра́да Еде́са дости́гл еси́,/ иде́же ико́ною Богома́тере явле́н был еси́,/ не утаи́ся, я́ко град, верху́ горы́ стоя́, доброде́тель твоя́,/ но пресла́вно возсия́ си́лою Бо́жиею,/ Его́же моли́ спасти́ся душа́м на́шим.

Христо́во стра́нствие возлюби́в,/ сла́вы челове́ческия бе́гая,/ Еде́с оста́вил еси́,/ хоте́вшу же тебе́ идти́ в Та́рсы Килики́йския,/ судо́м Бо́жиим кора́бль ве́тром бу́рным/ ко оте́честву твоему́ возврати́ся./ Те́мже и рекл еси́:/ да не бу́ду тя́жек ино́му никому́же,/ но в дом отца́ моего́ иду́ и ту бу́ду незна́емь,/ и та́мо мно́га ле́та пребыва́л еси́,/ нищету́ терпя́ и доса́ды Христа́ ра́ди,/ Его́же моли́ спасти́ся душа́м на́шим.

Всего́ себе́ преоби́дев,/ от ю́ности Бо́гови возложи́лся еси́/ и, вся пло́ти жела́ния и ми́ра кра́сная оста́вль, преподо́бне,/ изво́лил еси́ нищету́, па́че бога́тств тле́нных,/ и а́лчен бы́ти, па́че не́же име́ти/ маловре́менную греха́ сла́дость,/ сия́ же претерпе́л еси́,/ о́тче Алекси́е досточу́дне,/ укрепля́ющу тя Го́споду,/ Его́же моли́ спасти́ся душа́м на́шим.

Сла́ва, глас 2:

Ти́хое твое́, о́тче, и молчали́вое,/ беззло́бивое и кро́ткое житие́/ возлюби́в, Христо́с Бог,/ преблаже́нне Алекси́е,/ яви́л тя есть свети́льника всему́ ми́ру,/ сия́юща па́че со́лнца,/ и́бо сожи́тельницу и бога́тство вре́менное,/ я́ко прах, вмени́л еси́,/ в дому́ о́тчи незна́емь,/ Еди́наго жела́я, люби́маго тобо́ю Христа́./ Но помяни́ твоя́ рабы́/ у Престо́ла Всецаря́, Христа́ Бо́га на́шего,/ преподо́бне о́тче,/ не преста́й моля́ся за рабы́ своя́.

И ны́не, Богоро́дичен: Пре́йде се́нь:

А́ще не пое́ши бде́ния: И ны́не, Богоро́дичен, глас 1.

Подо́бен: Всехва́льнии:

Неду́говавшую, Пресвята́я,/ лю́те ду́шу мою́ страстьми́ лука́выми исцели́,/ я́же Цели́теля и Спа́са всех/ – Христа́ ро́ждшая,/ вся́ку я́зю исцели́вшаго/ уя́звленнаго диа́вольским зломы́слием/ и сме́рти нас изме́ншаго.

Крестобогоро́дичен:

Своего́ А́гнца/ А́гница и Непоро́чная Влады́чица/ на Кресте́ я́ко ви́девши,/ зра́ка не иму́ща, ниже́ добро́ты,/ – увы́ Мне,– рыда́ющи, глаго́лаше:/ где добро́та Твоя́ за́йде, Сладча́йший?/ Где благоле́пие?/ Где благода́ть блиста́ющая о́браза Твоего́,/ Сы́не Мой Любе́знейший?

Вход. Проки́мен дне. Чте́ния 3.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры, глас 6. Самогла́сны:

А́нгела земна́го и Небе́снаго челове́ка,/ блаже́ннаго Алекси́я,/ ми́ра благо́е украше́ние,/ по́стников похвалу́ и убо́гих о́браз,/ да почти́м любе́зно,/ и́же насажде́н быв в до́ме Бо́жии/ и процвете́, я́ко кедр в Лива́не,/ и, плотско́е мудрова́ние посто́м и труды́ мно́гими умертви́в,/ поживе́ Христо́ви благоче́стно./ Ему́же ны́не предстоя́ во сла́ве,/ моли́ спасти́ся душа́м на́шим.

Ца́рская селе́ния и сла́ву ми́ра оста́вль,/ в преми́рных ра́йское наслажде́ние со святы́ми обре́л еси́,/ о́тче Алекси́е,/ вои́стинну до́брое измене́ние:/ тле́нная бо оста́вль на земли́,/ нетле́нная восприя́л еси́ на Небесе́х/ и, премени́в настоя́щая бу́дущими,/ А́нгелом был еси́ равностоя́тель./ С ни́миже моли́ Христа́ Бо́га/ спасти́ся всем нам,/ любо́вию па́мять твою́ почита́ющим.

Красоты́ мирски́я, преподо́бне, оста́вль/ и стра́нствовати о Христе́ изво́лив,/ вели́каго гра́да Еде́са дости́гл еси́,/ иде́же я́ко еди́н от ни́щих пребыва́я,/ и́щущим тебе́ отроко́м отца́ твоего́/ непозна́н был еси́,/ ты же, позна́в я и ми́лостыню от них прие́мь,/ – благодарю́ Тя, Го́споди,– рекл еси́,/ я́ко сподо́бил мя еси́ прия́ти ми́лостыню от мои́х рабо́в/ и руко́ю Твое́ю покры́л еси́,/ е́же не позна́ти им мене́./ Его́же, преблаже́нне о́тче, моли́/ спасти́ся всем, пою́щим тя.

Сла́ва, глас 4:

Те́ло твое́ пречестно́е, прему́дре Алекси́е,/ мно́га исцеле́ния ве́рным источи́,/ слепы́м прозре́ние, боля́щим здра́вие,/ и вся, с ве́рою притека́ющия,/ чудесы́ озари́, Богоно́се, Бо́жиею благода́тию./ К Нему́ же име́я дерзнове́ние,/ моли́ дарова́ти нам мир и ве́лию ми́лость.

И ны́не, Богоро́дичен: При́зри на моле́ния:

На стихо́вне стихи́ры, глас 1.

Подо́бен: Небе́сных чино́в:

Небе́сный жи́тель вои́стинну, о́тче, был еси́,/ я́ко вся́кое пристра́стие от себе́ отве́ргл еси́/ и, Христа́ возжеле́в,/ насле́дник Тому́ по достоя́нию был еси́,/ Его́же моли́, Алекси́е преподо́бне,/ дарова́ти нам мир и ве́лию ми́лость.

Стих: Честна́ пред Го́сподем/ смерть преподо́бных Его́.

И́же богоуго́дно плотско́е мудрова́ние/ воздержа́нием умертви́в/ и насле́дие тле́нное, е́же на земли́, пренебре́гл, преподо́бне,/ от всея́ души́ Бо́гови прилепи́лся еси́,/ Алекси́е блаже́нне,/ моли́ спасти́ся всем, ве́рою пою́щим тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

По́двиги твои́х страда́ний/ во оби́тели Боже́ственныя вшел еси́,/ Алекси́е пресла́вне,/ и, та́мо со избра́нными Тро́ице Пресу́щественней предстоя́,/ наслажда́ешися дарова́нии неизглаго́ланными,/ Ю́же и о нас моли́,/ да тех же удосто́ит ны.

Сла́ва, глас 8:

И́же ве́рою и любо́вию/ Бо́га от всея́ души́ взыска́л еси́,/ Алекси́е всеблаже́нне,/ вся земна́я я́ко преле́стная попра́в/ и в чужди́х страна́х нищету́ и озлобле́ние претерпе́в,/ по досто́инству трудо́в воздая́ние от Христа́ восприя́л еси́,/ моли́ и о нас Его́,/ да спасе́т ду́ши на́ша.

И ны́не, Богоро́дичен: Безневе́стная Де́во:

Тропа́рь, глас 4:

Возвы́сився на доброде́тель и ум очи́стив,/ к жела́нному и кра́йнему дости́гл еси́,/ безстра́стием же украси́в житие́ твое́/ и поще́ние изря́дное восприи́м со́вестию чи́стою,/ в моли́твах, я́ко безпло́тен, пребыва́я,/ возсия́л еси́, я́ко со́лнце, в ми́ре,/ преблаже́нне Алекси́е.

Ин тропа́рь, глас 4:

Я́ко чистоты́ свети́льник пресве́тел показа́ся,/ ди́вный Алекси́е,/ и́бо тле́нный черто́г/ на нетле́нное Бо́жие Ца́рствие премени́в,/ я́ко целому́дрия де́латель преизря́ден./ Сего́ ра́ди предстои́ши Го́сподеви, всех Царю́./ Его́же моли́, дарова́ти нам мир и ве́лию ми́лость.

Сла́ва, и ны́не, Богоро́дичен: Е́же от ве́ка утае́нное:

НА У́ТРЕНИ

По 1-м стихосло́вии седа́лен, глас 4.

Подо́бен: Вознесы́йся:

Ны́не не в гада́нии, лице́м же к лицу́ Святу́ю Тро́ицу узре́ти сподо́бися –/ смире́ния реку́ и безсме́ртия исто́чник,/ и́мже ны́не напая́емь,/ обоже́ния в Вы́шних наслажда́ешися, преподо́бне,/ моли́ о всех, и́же ве́рою чту́щих тя.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га на́шего,/ и сла́вим рождество́ Твое́ непостижи́мое,/ и́мже и изба́вихомся от ле́сти диа́вола и вся́кия беды́, Влады́чице Богоро́дице,/ и ве́рно вопие́м:/ поми́луй ста́до Твое́, Еди́на Препе́тая.

По 2-м стихосло́вии седа́лен, глас 2:

Пристра́стия мирска́го и обру́ченицы, я́ко от скве́рны, уклони́лся еси́,/ посто́м зе́льным пло́ть увяди́в,/ души́ кре́пость обнови́в, преподо́бне,/ обогати́лся еси́ сла́вою Небе́сною, Алекси́е,/ те́мже моли́ся о всех нас Го́сподеви.

Сла́ва, и ны́не, Богоро́дичен:

Милосе́рдия су́щи исто́чник,/ ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу Твою́,/ на Тя бо упова́юще, ра́дуйся, вопие́м Ти,/ я́коже иногда́ Гаврии́л, безпло́тных Архистрати́г.

По полиеле́и седа́лен, глас 8.

Подо́бен: Прему́дрости:

Глас Госпо́день я́ко услы́ша, преподо́бне Алекси́е,/ и тогда́ ми́ра вся и я́же в ми́ре всего́ вку́пе отрече́ся,/ бога́тство же и сла́ву я́ко мимотеку́щее презре́в,/ и стра́нен оте́чества и всех был еси́./ Те́мже и яви́ся, я́ко А́нгел в телеси́,/ моли́тву име́я непоро́чну и всено́щное стоя́ние./ Отсю́ду бы́сть це́рковь Тро́ицы, Богоблаже́нне Алекси́е,/ моли́ Христа́ Бо́га грехо́в оставле́ние дарова́ти/ чту́щим любо́вию па́мять твою́ всечестну́ю.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без семе́не ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем: Стих: Что возда́м Го́сподеви: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прииди́те дне́сь вси, по́стническое сосло́вие/ и празднолю́бных собо́ри,/ цветы́ доброде́телей взе́мше,/ пе́сньми свяще́нными воспои́м Боже́ственнаго Алекси́я,/ и́же от дел именова́ние прии́мшаго,/ и на земли́, я́ко А́нгела с пло́тию, пожи́вшаго,/ и вся красоты́ ми́ра сего́ я́ко преходя́щая оста́вльшаго,/ и Христу́ после́довавшаго воздержа́нием мно́гим,/ злострада́нием и посто́м те́ло свое́ изнури́вшаго,/ до́ндеже Боже́ственный глас свы́ше яви́ тя всем/ и челове́ка Бо́жия нарече́/ и пресла́вными чудесы́ удиви́,/ те́мже, я́ко име́я дерзнове́ние ко Го́споду,/ Того́ моли́ очище́ние грехо́в низпосла́ти,/ и́же всем ве́рою пра́зднующим/ всечестну́ю и многора́достную па́мять твою́.

Кано́н, его́же краегране́сие: Тя, Бо́жия челове́ка, восхваля́ю, блаже́нне. Кир Ио́сифа. Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися.

Тесне́йший ше́ствовал еси́ пу́ть,/ непоро́чное и преподо́бное житие́, му́дре, проходя́ от ю́ности,/ те́мже мою́ тесноту́ разшири́ ума́ восхвали́ти тя,/ в ра́йстей широте́ водворя́яся, Алекси́е.

Тебе́ сама́го весьма́ Бо́гу возложи́в, блаже́нне,/ вне пло́ти и ми́ра был еси́,/ бога́тству теку́щу Небе́сное предпоче́л еси́ и пребыва́ющее/ и обеща́нный град Сио́н ве́чнующий.

Ложе́сн ты ма́терних непло́дие разреши́л еси́,/ ро́ждся, я́коже Самуи́л, пребога́те,/ во чре́ве же се́рдца чи́стый заче́н страх,/ роди́л еси́ дух спасе́ния Боже́ственных доброде́телей ве́рою.

Богоро́дичен: Бо́жий Собезнача́льный Сын име́ я́ко вино́вну Тя к нам, Де́во, подо́бия,/ еди́ну, па́че всея́ тва́ри, Чи́стая, чи́сту Тя обре́т./ Тем Тя пое́м, вси ро́ди, и ублажа́ем.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Пронза́емь жела́нием чистоты́,/ черто́гом, и́же на земли́, Небе́сный премени́л еси́/ и жены́ любо́вию сладча́йшее А́нгельское подо́бие.

Молвы́ жите́йския и тя́жесть бога́тства оста́вил еси́/ и пресе́льник был оте́чества, блаже́нне Алекси́е,/ Христо́ве нищете́ подо́бяся.

Слеза́ми, и боле́зньми, и воздержа́нием, всему́дре, благо́е взыска́л еси́,/ когда́ прии́дет свет ра́зума,/ безстра́стие дая́ се́рдцу твоему́.

Богоро́дичен: Горе́ неви́димый А́нгелом, Чи́стая,/ до́ле из Тебе́ ражда́емь, зри́тся соверше́н Челове́к,/ погиба́ющий мир обновля́я.

Седа́лен, глас 3.

Подо́бен: Красоте́:

Ми́ра красоту́, преподо́бне, оста́вил еси́,/ премени́в бога́тством теку́щим непроходи́мое я́ве и пребыва́ющее, Алекси́е./ Те́мже со все́ми тя святы́ми сла́вим/ и торжеству́ем све́тло в па́мяти твое́й,/ прося́ще обрести́ моли́твами твои́ми, блаже́нне, ве́лию ми́лость.

Сла́ва, и ны́не, Богоро́дичен:

Недомы́сленно и непости́жно есть, Влады́чице Богора́дованная,/ е́же соде́ланное о Тебе́ стра́шное Бо́жие та́инство,/ и́бо Необыме́ннаго, заче́нши, родила́ еси́,/ пло́тию обложе́на от пречи́стых крове́й Твои́х./ Его́же всегда́, Чи́стая, я́ко Сы́на Твоего́ моли́ спасти́ся душа́м на́шим.

Крестобогоро́дичен:

Неискусобра́чная Чи́стая и Ма́ти Твоя́, Христе́,/ ви́дящи Тя, ме́ртва ви́сяща на Кресте́, ма́терски пла́чущи, глаго́лаше:/ что Тебе́ воздаде́ евре́йский беззако́нный собо́р и неблагода́рный,/ и́же мно́гих и вели́ких Твои́х, Сы́не Мой, даро́в наслади́выйся?/ Пою́ Твое́ Боже́ственное снизхожде́ние.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Претерпе́л еси́ нищету́, проси́тель быв, нищ, я́коже Ла́зарь,/ жела́ние бо Боже́ственное утеша́ше, блаже́нне, се́рдце твое́,/ пожела́вшее бога́тства Небе́снаго.

Безпеча́льнаго и ти́хаго жития́ возжела́л еси́,/ еди́нощи яды́й в седми́це, Алекси́е,/ жела́нием ожида́ющаго тя не мимотеку́щаго, всеблаже́нне, наслажде́ния.

Храм Бо́гу се́рдце ища́й соде́лати,/ в до́му возлюби́л еси́ Богома́тере, сла́вне, всегда́ седе́ти/ и Небе́сныя добро́ты созира́ти.

Богоро́дичен: Воздои́вши Да́теля, Де́во, млека́,/ а́лчущее и утесня́емое ны́не се́рдце мое́ насы́ти вся́каго ра́зума/ и умиле́ния Боже́ственнаго, молю́ Тя.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения/ приведе́ние и́мамы.

То́ки свяще́нными напая́я всегда́ слез твою́ ду́шу,/ соде́лал еси́ клас, вои́стинну стори́чествующ,/ Де́лателю Безсме́ртному до́бре соблюда́емь.

Ви́ден был еси́ на земли́, житие́ Безпло́тных подража́я,/ премно́гим твои́м, о́тче, воздержа́нием, досточу́дне, и в моли́твах прилежа́нием,/ и́мже, я́ко све́том, просвети́лся еси́.

Огне́м моли́тв греха́ попали́л еси́ ве́щь, му́дре,/ бде́нными же стоя́ньми вся́кое сладостра́стие успи́л еси́,/ усну́в же, к сия́нию преста́вился еси́ невече́рнему.

Богоро́дичен: И́же, во Све́те живы́й,/ во свято́е чре́во Твое́ всели́ся, Чи́стая,/ мир, поги́бший тьмо́ю неразу́мия, па́ки назида́я,/ Его́же моли́ вся просвети́ти, пою́щия Тя.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Я́ко храм жив Бо́жий, тя, бы́вша Христо́во селе́ние,/ Неискусобра́чная проявля́ет кры́ющася/ и прославля́ет утаи́тися тща́щагося.

Моли́твы твоя́ Бо́гу, я́ко кади́ло, блаже́нне, прия́тны бы́та,/ отсю́ду житие́м твои́м ве́рных ра́зумы облагово́нил еси́/ Ду́ха благода́тию.

Свяще́нным житие́м украша́ема,/ па́ки Христо́с не хотя́ща, сла́вне, тя оте́честву дае́т,/ отбега́юща сла́вы привре́менныя.

Богоро́дичен: Зако́ны естества́, Чи́стая Влады́чице,/ Зижди́тель, новосоде́лавый созда́ния,/ из Тебе́ неизрече́нно ражда́ется/ и обожа́ет мя безме́рною ми́лостию.

Конда́к, глас 2:

Дом роди́телей твои́х, я́ко чужд, име́в,/ водвори́лся еси́ в нем нищеобра́зно/ и, по преставле́нии вене́ц прие́м сла́вы,/ ди́вен на земли́ яви́лся еси́, Алекси́е, челове́че Бо́жий,/ А́нгелом и челове́ком ра́дование.

И́кос:

Житие́м и словесы́ украси́лся еси́/ и Христо́ву Це́рковь возвели́чил еси́ твои́м житие́м,/ отца́ и ма́терь, царя́ и лю́ди торжествова́ти устро́ив,/ де́лы же соблю́д, е́же по о́бразу Бо́жию, Алекси́е преподо́бне,/ возсия́л еси́ в ми́ре твои́м целому́дрием./ Те́мже благода́ть доброде́телей твои́х облистава́ет вся, ве́рою пра́зднующия, о́тче, па́мять твою́,/ яви́л бо ся еси́ А́нгелом и челове́ком ра́дование.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Претерпе́л еси́, преподо́бне, пред роди́тельными враты́ седя́,/ и весьма́ непознава́емь, и от о́трок руга́ния подъе́мля,/ и наруга́емь лю́те, и нището́ю мно́гою оскорбля́емь.

Пло́ти твоея́ мудрова́ние умертви́в,/ зря роди́тели, и си́ми непознава́емь, естества́ покрыва́л еси́ ну́жду, преподо́бне,/ и презре́ние твои́х неиску́сных о́трок, оскорбля́ющих тя.

О, чудесе́! Ка́ко пребы́л еси́, при́сно нище́тствуя,/ в бога́тстве, Алекси́е, безме́рнаго смире́ния?/ Ка́ко претерпе́л еси́ руга́ния и укори́зны от о́трок, прему́дре, твои́х,/ не ве́девших жития́ твоего́?

Богоро́дичен: Вели́каго служи́тельница Ты та́инства была́ еси́, Всенепоро́чная:/ Бо́га бо воплоти́ла еси́, вели́ких зол нас изба́вльшаго,/ Тя велича́ющия, Чи́стая Благослове́нная, Богора́дованная.

Песнь 8

Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Неве́дом пре́жде роди́телем сый,/ во вре́мя отше́ствия твоего́ сим та́йну открыва́еши,/ явля́емь в сла́ву Бо́га на́шего, сла́вне,/ вельми́ тя и досто́йне просла́вльшаго.

Госпо́дь гла́сом ве́лиим явля́ет тя всему́ Ри́му,/ сокрове́нное сокро́вище, пребога́те, в нище́тне о́бразе лежа́ща/ и да́ры врачева́ний вся, ве́рою к тебе́ приходя́щия, обогаща́юща.

Кня́зи лю́дстии, и ца́рие снидо́шася, и свяще́нницы, блаже́нне,/ погребсти́ тя Бо́жиим манове́нием/ и, ви́дяще ве́лие виде́ние, диви́шася чудесе́м, преподо́бне,/ я́же твори́л еси́ Боже́ственною си́лою Ду́ха.

Богоро́дичен: Истле́вшия ны дре́вле преступле́нием обновля́я,/ Человеколю́бец нетле́нно воплоти́ся от нетле́нныя Твоея́, Всенепоро́чная, утро́бы/ и изба́ви всех грехо́вныя тли, Богоневе́стная.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная,/ тем Всепе́тую Богоро́дицу велича́ем.

Исцеле́ния источи́л еси́, ко гро́бу несо́м,/ Бо́гу тя, блаже́нне, вельми́ сла́вящу:/ свет бо неви́дящии ви́деша/ и глаго́лание прия́ша пре́жде су́ще не́мии, всесла́вне Алекси́е.

Ви́ден был еси́, предлежа́щ и к погребе́нию несо́м,/ я́ко со́лнце, о́тче, испуща́я исцеле́ний зари́ пресла́вно,/ и те́мныя стра́сти отгоня́я, и опаля́я де́моны,/ и просвеща́я Богому́дрыя.

Прии́де погребсти́ тя Патриа́рхов пе́рвейший,/ ца́рь же, вельми́ христолюби́вейший,/ кня́зи, ста́рцы и ю́нии и мона́шествующих ли́цы, Боже́ственным манове́нием/ освяща́ющеся прикоснове́нием твои́м, блаже́нне.

Восхище́н был еси́, на колесни́це доброде́телей несо́м,/ и почива́еши, иде́же преподо́бных чи́ни,/ собо́р апо́стол и му́чеников, патриа́рхов и всех пра́ведник,/ с ни́миже нас помяни́, почита́ющия тя, Алекси́е.

Богоро́дичен: Глас Тебе́ прино́сим Гаврии́лов, Всенепоро́чная,/ ра́дуйся, глаго́люще, ни́во неде́ланная;/ ра́дуйся, кля́твы разреше́ние;/ ра́дуйся, исто́чниче воды́ живо́тныя,/ преподо́бных похвало́, Богоро́дице Присноде́во.

Свети́лен.

Подо́бен: Не́бо звезда́ми:

О, чу́до:/ ка́ко во врате́х роди́телей твои́х, многоле́тне,/ я́коже не́кий адама́нт, терпе́л еси́,/ естества́ ну́ждею не преклони́лся,/ ни роди́телей же и супру́жницы, Алекси́е, го́рькими рыда́ньми.

Сла́ва:

Я́ко фи́никс, процвете́ цветоно́сен, всече́стне, благоле́пно,/ возсия́, я́коже звезда́ми, чудесы́ озари́ вся, день твой, блаже́нне,/ в о́ньже пра́зднующе, всех нас изба́ви моли́твами твои́ми, о блаже́нне челове́че Бо́жий Алекси́е.

И ны́не, Богоро́дичен:

Просвети́, Чи́стая, ду́шу мою́, грехи́ потемне́вшую,/ и ве́чнующаго мя пла́мене и мра́ка изба́ви хода́тайством Твои́м,/ я́ко да с весе́лием хвалю́ Твое́ вели́чие.

На хвали́тех стихи́ры, глас 4.

Подо́бен: Я́ко до́бля:

И́же мимотеку́щая и преле́стная/ нога́ма твои́ма попра́л еси́/ и Христо́во я́ко непреходя́щее Ца́рствие/ ди́вными по́двиги стяжа́л еси́, Алекси́е Богоно́се,/ наста́ви ны на по́двиги Боже́ственныя/ и моли́ от тли и бед изба́витися всем,/ ве́рою творя́щим всечестну́ю па́мять твою́.

Егда́ на безстра́стия го́ру возше́л еси́, сла́вне,/ ве́три искуше́ний и духо́в лука́вствия/ не возмого́ша поколеба́ти тебе́,/ ты бо моли́твами твои́ми/ де́монов шата́ния низложи́л еси́, Алекси́е всече́стне,/ тем и вене́ц свы́ше от Христа́ Бо́га прия́л еси́,/ Его́же моли́ низпосла́ти нам/ мир и ве́лию и бога́тую ми́лость.

Воздержа́нием тве́рдым/ теле́сная и безсту́дная стремле́ния умертви́л еси́/ и, в живоно́сную ме́ртвость оде́явся, блаже́нне,/ до́брым по́двигом тече́ние соверши́л еси́,/ челове́че Бо́жий Алекси́е./ Те́мже Христа́ Бо́га моли́/ от тли и бед изба́витися/ любо́вию почита́ющим свяще́нную па́мять твою́.

И́ны стихи́ры, глас 1.

Подо́бен: Небе́сных чино́в:

Стра́нствием цветы́й, я́коже дре́вле Авраа́м,/ Вы́шняго доше́л еси́ све́тлаго жития́,/ в не́мже, блаже́нне, предстоя́ Христу́ – Све́ту,/ сия́еши, я́ко со́лнце,/ те́мже и нас просвети́,/ ны́не чту́щих пресве́тлое твое́ торжество́.

Во оте́чествии твое́м стра́нно водворя́яся,/ нищету́ во́льную, наготу́, жа́жду и поноше́ния/ Христа́ ра́ди прия́л еси́,/ к Нему́ же вопия́ше:/ приими́ ны́не, Влады́ко,/ в ру́це Боже́ственне ду́шу раба́ Твоего́/ по вели́цей ми́лости Твое́й.

На тве́рдем ка́мени ве́ры/ ду́шу твою́ основа́в,/ па́че со́лнца просия́л еси́ ми́ру чудесы́,/ блаже́нне Алекси́е./ Те́мже ны́не мо́лим тя:/ грехо́вный наш мрак отгоня́й/ твои́ми моли́твами, Христо́в доброподви́жниче.

Сла́ва, глас 6. Самогла́сен:

Свет незаходи́мый Христа́ Бо́га в себе́ стяжа́л еси́,/ светоно́се Алекси́е,/ и Того́ стопа́м усе́рдно после́довал еси́,/ вся плотска́я стремле́ния ду́хови повину́л еси́,/ я́ко в чужде́м телеси́ стражда́,/ на де́моны подвиза́лся еси́,/ я́ко непобеди́мый за целому́дрие во́ин,/ и ны́не моли́ Влады́ку всех Го́спода/ изба́витися ви́димых и неви́димых враг/ всем, любо́вию па́мять твою́ соверша́ющим,/ и спасти́ся душа́м на́шим.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся, моли́ся, Влады́чице,/ со святы́ми апо́столы,/ поми́ловати ду́ши на́ша.

А́ще несть пост, славосло́вие вели́кое.

А́ще же по́стен день, на стихо́вне стихи́ра самогла́сна дне́ви в Трио́ди, два́жды, и му́ченичен.

Сла́ва, глас 4:

Земны́й А́нгел и Небе́сный челове́к/ яви́лся еси́, преблаже́нне,/ исто́чник умиле́ния, ми́лости пото́к,/ струя́ исцеле́ний, Алекси́е досточу́дне,/ ма́слина Бо́жия, вои́стинну плодови́тая,/ еле́ом милосе́рдия исцеля́ющая я́звы/ ве́рно хва́лящих тя,/ моли́ Человеколю́бца от бед изба́витися/ ве́рою чту́щим всечестну́ю па́мять твою́.

И ны́не, Богоро́дичен:

Изба́ви ны от нужд на́ших,/ Ма́ти, Христа́ Бо́га ро́ждшая, всех Творца́,/ да вси зове́м Ти:/ ра́дуйся, еди́но предста́тельство душ на́ших.

НА ЛИТУРГИ́И

А́ще не́сть пост: Блаже́нны от кано́на, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апо́стол к Гала́том, зача́ло 113. Аллилу́ия, глас 4: Пра́ведник, я́ко фи́никс процвете́т,/ я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О, вели́кий Христо́в уго́дниче, святы́й челове́че Бо́жий Алекси́е, душе́ю на Небеси́ Престо́лу Госпо́дню предстоя́й, на земли́ же да́нною ти свы́ше благода́тию разли́чная соверша́яй чудеса́! При́зри ми́лостиво на предстоя́щия святе́й ико́не твое́й лю́ди, умиле́нно моля́щияся и прося́щия от Тебе́ по́мощи и заступле́ния. Простри́ моли́твенно ко Го́споду Бо́гу честни́и ру́це твои́ и испроси́ нам от Него́ оставле́ние согреше́ний на́ших во́льных и нево́льных, в неду́зех стра́ждущим исцеле́ние, напа́ствуемым заступле́ние, скорбя́щим утеше́ние, бе́дствующим ско́рую по́мощь, всем же, чту́щим тя, ми́рную и христиа́нскую живота́ кончи́ну и до́брый отве́т на стра́шнем Суде́ Христо́ве. Ей, уго́дниче Бо́жий, не посрами́ упова́ния на́шего, е́же на тя по Бо́зе и Богоро́дице возлага́ем, но бу́ди нам помо́щник и покрови́тель во спасе́ние, да, твои́ми моли́твами получи́вше благода́ть и ми́лость от Го́спода, просла́вим Человеколю́бие Отца́ и Сы́на и Свята́го Ду́ха, в Тро́ице сла́вимаго и покланя́емаго Бо́га, и твое́ свято́е заступле́ние, ны́не, и при́сно, и во ве́ки веко́в. Ами́нь.