Служба преподобнаго Александра Свирскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 4.
Подо́бен: Я́ко до́бля:
Воздержа́нием стра́сть плотску́ю умертви́л еси́/ и ду́шу оживи́л еси́ посто́м/ и доброде́телей свяще́нием./ Отсю́ду же яви́лся еси́, я́ко жив,/ и по кончи́не вои́стинну:/ я́коже бо сон, вмени́ся тебе́ сме́рть,/ к Бо́гу преста́вльшуся/ и в ру́це ду́шу прело́жшу Ему́,/ Алекса́ндре всесла́вне.
Страсте́й успи́л еси́ жела́ния, Алекса́ндре,/ бде́ние всено́щное стяжа́в,/ вели́кое послуша́ние, смире́ние,/ поуче́ние же Боже́ственных писа́ний,/ и се́рдце чи́сто, и ум несмуще́н./ Те́мже был еси́ прия́телище Ду́ха Свята́го,/ заря́ми чуде́с облиста́ющаго тя всегда́.
Мирско́е пристра́стие до конца́ возненави́дел еси́/ и безстра́стия сосу́д был еси́,/ любому́дрия же, сла́вне, де́тельным восхожде́нием/ возвы́сился еси́ к са́мому жела́нию коне́чному,/ узре́л еси́ та́йны ви́дением неви́димых,/ недомы́сленныя Боже́ственныя добро́ты,/ Алекса́ндре всему́дре.
Сла́ва, глас то́йже:
Духо́вною благода́тию отъе́млеши неду́ги страсте́й/ и отго́ниши ду́хи лука́выя,/ исцеля́еши стра́сти неисце́льныя,/ Алекса́ндре всесла́вне,/ и просвеща́еши ве́рныя блиста́нии чуде́с твои́х./ Те́мже дне́сь гла́сы немо́лчными воспева́ем/ пресве́тлую и светоно́сную па́мять твою́.
И ны́не, Богоро́дичен: Изба́ви нас от нужд на́ших:
На стихо́вне стихи́ры, глас 4.
Подо́бен: Дал еси́ зна́мение:
Све́тло возсия́, я́ко со́лнце, преподо́бне,/ всепра́зднственная па́мять твоя́,/ заря́ми облиста́ющи/ твои́х доброде́тельных дея́ний, всеблаже́нне,/ и озаря́ющи ве́рных мы́сли/ сия́нием чуде́с твои́х./ Сию́ у́бо пра́зднующе, ра́достно тя почита́ем,/ мона́шествующих похвало́ и ве́рных утвержде́ние.
Стих: Честна́ пред Го́сподем/ сме́рть преподо́бных Его́.
До́лу лега́нием и воста́нием,/ и слез тече́нии оскорбля́емь,/ и всено́щными стоя́нии изнуря́емь,/ мона́хов был еси́ о́браз ве́лий,/ и о́бщее пра́вило, и похвалы́ вене́ц:/ всяк бо вид доброде́телей испра́вив,/ Вы́шняго Ца́рствия насле́дник яви́лся еси́,/ прему́дре, воздержа́нием.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Чу́до па́че ума́/ во успе́нии твое́м бы́сть,/ богоукраше́нно чуде́сне,/ внегда́ ти собо́р мона́шествующих, о́тче, предста́/ и внеза́пу, я́ко со́лнце, му́дре, лице́ твое́ облиста́,/ па́че со́лнечных луч возсия́вши,/ явля́я блиста́ющую твоея́ души́ чистоту́/ и уверя́я всех, какову́ кончи́ну,/ блаже́нне, получи́л еси́.
Сла́ва, глас 6:
Я́ко Боже́ственнаго па́стыря и учи́теля/ тя вси восхва́лим дне́сь:/ но́во бо нам, я́ко многосве́тлая звезда́,/ в Росси́йстей стране́ просия́в,/ чудесы́ твои́ми весь мир удиви́л еси́,/ в пусты́нях же непроходи́мых му́жески подвиза́вся,/ и, кре́пко терпя́, врага́ победи́л еси́ до конца́./ Те́мже христоимени́тое твое́ ста́до упа́сл еси́/ и храм Го́сподеви воздви́гл еси́ любо́вию,/ Алекса́ндре прему́дре,/ и я́ко вои́стинну Боже́ственныя благода́ти сподо́бився/ и в Небеса́ всели́вся, зри́ши Святу́ю Тро́ицу,/ Ю́же моли́ спасти́ся душа́м на́шим.
И ны́не, Богоро́дичен: Богоро́дице, Ты еси́ лоза́ и́стинная:
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 6.
Подо́бен: Всю отложи́вше:
Вседержи́тельно́ю десни́цею укрепля́емь,/ вся отве́рг страсте́й безслове́сия,/ плоть ду́ху покори́л еси́/ и был еси́ доброде́телей пра́вило,/ мона́хов утвержде́ние,/ по́стников о́браз, преподо́бных удобре́ние./ И ны́не неизрече́нныя добро́ты зри́ши Нераздели́мыя Тро́ицы,/ Алекса́ндре прему́дре,/ пита́лся при́сно Боже́ственными добро́тами на Небесе́х ду́хом./ Тем, соше́дшеся,/ пе́нии духо́вными,/ в пе́снех твою́ честну́ю и всепра́зднственную па́мять пра́зднуем.
Стра́стная взыгра́ния/ воздержа́нием вся отве́ргл еси́/ и, многомяте́жное пло́ти волне́ние укроти́в,/ дыха́ния стра́стнаго пребы́л еси́ непрекло́нен,/ я́ко столп, укрепля́емь/ духо́вными броня́ми, умо́м до́блественным,/ Алекса́ндре прему́дре./ И ны́не, Боже́ственнаго получи́л еси́ вои́стинну/ виде́ния све́тлости Святы́я Тро́ицы,/ к Не́йже жела́я, блаже́нне, преста́вился еси́,/ наслажда́яся несконча́емыя добро́ты,/ дарова́нием обожа́емь.
Подо́бяся Илии́ и Иоа́нну, свети́льнику Све́та,/ возлюби́в молча́ти в ме́стех те́мных/ и в пусты́нях непрохо́дных,/ восхожде́нию всегда́ поуча́яся Боже́ственному/ и преспева́я доброде́телей путе́м./ Те́мже дости́гл еси́ жела́ние кра́йнее,/ Алекса́ндре прему́дре,/ и, ра́дуяся, предстои́ши Трисия́нному Святы́я Тро́ицы Све́ту,/ от него́же нехода́тайственне Боже́ственныя прие́мля зари́./ Те́мже со дерзнове́нием моли́ся о душа́х на́ших.
Преподо́бне и Богоно́се о́тче наш Алекса́ндре,/ любве́ ра́ди Христо́вы вся оста́вил еси́/ и, в пусты́ню всели́вся,/ ника́коже устраши́лся еси́ неви́димых враг боре́ния,/ а́ще бо и мно́гажды прише́дше на тя,/ мечта́нии привиде́ния ти показу́юще,/ ты же моли́твами твои́ми,/ я́ко прах, тех без ве́сти твори́л еси́./ О, непоро́чныя твоея́ души́/ и кре́пкаго терпе́ния твоего́!/ Христа́ непреста́нно моли́/ спасти́ся душа́м на́шим.
Сла́ва, глас то́йже:
Я́ко боже́ственна жи́знь твоя́,/ та́кожде и всеосвяще́нный твой исхо́д,/ преблаже́нне о́тче наш Алекса́ндре./ Дне́сь бо лику́юще/ в па́мять преставле́ния твоего́,/ всея́ страны́ мно́жества наро́да сте́кшеся,/ я́ко ви́деша тя, без дыха́ния на одре́ лежа́ща,/ гла́сы велегла́сными вопия́ху:/ да́ждь нам коне́чное сло́во утеше́ния,/ рабо́м твои́м, свя́те,/ и научи́ ны, ча́да твоя́, о́тче,/ я́же уще́дрил еси́, я́ко оте́ц,/ ка́ко тя по достоя́нию похвали́ти возмо́жем?/ Пои́стинне я́ко ми́лостив и щедр быв, преподо́бне./ Оба́че а́ще и зде тя гроб покрыва́ет,/ но страна́ тя Росси́йская вся бога́тна и́мать предста́теля/ и моли́твенника к Святе́й Тро́ице,/ Ю́же непреста́нно моли́ о душа́х на́ших.
И ны́не, Богоро́дичен: Кто Тебе́ не ублажи́т:
Вход. Проки́мен дне. И чте́ния три преподо́бническая.
Прему́дрости Соломо́новы чте́ние (главы́́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́в тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 1. Самогла́сны:
Прииди́те, вси концы́ земли́,/ псалмы́ и пе́сньми незаходи́маго све́та,/ вели́каго свети́льника вселе́нней,/ воспое́м вси Алекса́ндра,/ па́че бо со́лнца возсия́ в тверды́ни ве́ры/ и ве́рных собра́ние к доброде́тели наста́ви:/ о́во у́бо Богодохнове́нными уче́нии/ и спаси́тельными глаго́лы в вожделе́нии,/ я́же незави́стно и оби́льно устны́ источа́ше,/ о́во же де́телию чу́дною, равноа́нгельным житие́м/ к ре́вности привлача́я,/ и обоя́ – житие́ и сло́во пресла́вно,/ я́коже во́ждь изря́ден, богоподо́бно показу́я./ Того́ моли́твами, Христе́ Бо́же наш,/ Твое́ ста́до соблюди́/ и правосла́вных ве́ру утверди́, я́ко Человеколю́бец.
Прииди́те, мона́хов мно́жества, дне́сь,/ Христо́ва рачи́теля благоче́стно восхва́лим,/ и́стиннаго ученика́ Спа́сова/ и красоту́ и хвалу́ единообра́зных всех и наста́вников,/ освяще́ннаго от младе́нства Го́сподеви,/ ли́цы оте́ц, соше́дшеся, ублажи́м./ Сей бо жела́ние Боже́ственное в себе́ прии́м,/ мирску́ю у́бо оста́ви пре́лесть,/ взят же яре́м Христо́в на ра́мо/ и полки́ бесо́в победи́ му́жески,/ показа́в нам де́тельно Боже́ственныя любве́ изря́дный пу́ть,/ и́бо и сия́ прете́к во тща́нии,/ пости́же свет и́стинный Тро́ицы Вседе́тельныя./ О, чудесе́ ужа́снаго и ве́щи богоподо́бныя!/ Я́ко земны́й естество́м ра́вен бы́сть мы́сленным существо́м,/ сла́ву и че́сть Бо́жию восприе́мля,/ и моли́твенник нам быва́ет,/ я́ко да улучи́м ве́чных благ в день Су́дный.
Я́ко Боже́ственная и светоно́сная/ наста́ па́мять преставле́ния твоего́, о́тче,/ я́ко удиви́ мы́сленных/ и ужаси́ челове́ки, пречу́дне,/ труды́ воздержа́ния твоего́ жития́,/ я́ко безпло́тен отню́д,/ во пло́ти стра́стне враги́ неви́димыя посрами́л еси́./ Вся у́бо страна́ оте́чества твоего́ пое́т тебе́ благоче́стно,/ изря́днее же – твое́ честно́е ста́до,/ све́тлость твои́х боле́зней и трудо́в, е́же показа́л еси́,/ я́ко град в пусты́ни прекра́сен,/ и́же приста́нище собо́ром мона́шеским богоподо́бно,/ и́же, я́ко оде́ждами многочестны́ми твои́ми, красу́ется чудесы́,/ и до́блественными страда́нии по́двиг твои́х, Алекса́ндре,/ и моли́твами твои́ми, притека́юще ко Христу́,/ иму́щему ве́лию и бога́тую ми́лость.
Сла́ва, глас 5:
Ра́дуется дне́сь вся Росси́йская страна́,/ Вели́кий же Но́вград да весели́тся, торжеству́я,/ я́ко име́я в преде́лех о́бласти своея́ неистощи́мое сокро́вище./ Ве́рных же мно́жества Росси́йския земли́, сте́кшеся дне́сь,/ востру́бим трубо́ю пе́сней:/ благода́ть бо Ду́ха, вся́кия трубы́ боголе́пнейши,/ всех созыва́ет к пе́нию Богоно́снаго отца́./ Мона́си и прости́и да чудя́тся/ всех Царя́ и́скреннему рабу́,/ и́же мироде́ржца нача́ла и вла́сти тьмы́/ Ду́ха Боже́ственнаго все́ми ору́жии победи́./ Па́стыри и учи́тели/ изря́днаго вои́стинну пра́вила же и о́браза па́стве да восхва́лят,/ и́же в доброде́телей повеле́нии све́тлаго,/ и в ве́ре благоразу́мнаго,/ и в виде́нии высо́каго, в дея́ниих Богому́драго,/ во уче́ниих же пи́щи пото́ка,/ наста́вника заблу́ждшим,/ изба́вителя плене́нным/ и всех боля́щих исцеле́ние,/ оте́честву своему́ вели́кое украше́ние,/ похваля́юще, вси рцем:/ о́тче преподо́бне Алекса́ндре,/ предста́ни твои́м рабо́м всегда́/ и спаси́ ста́до твое́ моли́твами твои́ми.
И ны́не, Богоро́дичен, глас то́йже:
Ду́ха Боже́ственнаго благода́тию, ве́рнии,/ дне́сь востру́бим трубо́ю пе́сней:/ прини́кнувши бо свы́ше, Всецари́ца Ма́ти Де́ва/ благослове́нием венчава́ет воспева́ющих Ю./ Мона́си и прости́и да стеку́тся/ и Цари́це воспле́щут в пе́снех,/ Царя́ ро́ждшей,/ И́же сме́ртию одержи́мы пре́жде отпусти́ти благоизво́ливша./ Па́стырие и учи́телие,/ до́браго Па́стыря Пречи́стую Ма́терь, соше́дшеся, восхва́лим,/ свети́льника светоза́рнаго,/ светоно́снаго о́блака,/ небе́с ши́ршую, одушевле́нный ковче́г/ и огнеобра́зный Влады́чень престо́л,/ манноприе́мную злату́ю ста́мну,/ затворе́нную Сло́ва две́рь,/ всем христиа́ном прибе́жище,/ пе́сньми богогла́сными похваля́юще, си́це рцем:/ Пала́то Сло́ва,/ сподо́би смире́нных нас Небе́снаго Ца́рствия,/ вся бо возмо́жна су́ть хода́тайству Твоему́.
На стихо́вне стихи́ры, глас 5.
Подо́бен: Ра́дуйся:
Ра́дуйся, а́нгельским бесе́дуя ликостоя́нием,/ Алекса́ндре преподо́бне:/ житие́ бо твое́, о́тче,/ на земли́ доброде́тельно стяжа́в, пожи́л еси́./ Показа́лся еси́ чистоты́ нескве́рное зерца́ло вои́стинну,/ лучеза́рный восприе́мля мо́лнии Ду́ха Свята́го всесла́вно./ Отону́дуже озаря́емь,/ зрел еси́ бу́дущая, вся предглаго́ля,/ от Боже́ственнаго светоявле́ния науча́емь Христа́,/ Его́же моли́ душа́м на́шим пода́ти ве́лию ми́лость.
Стих: Честна́ пред Го́сподем/ сме́рть преподо́бных Его́.
Ра́дуйся, по́стником споспе́шник быв/ и непобеди́м побо́рник:/ страсте́й бо отсека́я ко́рень и бесо́в стремле́ния,/ предста́в му́жески, Алекса́ндре,/ тех посрами́л еси́ душепа́губную пре́лесть,/ Креста́ же Спа́сова де́йство и непобеди́мую яви́л еси́ си́лу,/ е́юже и препоя́сався,/ победи́л еси́ вся, отметающия плотско́е явле́ние Христо́во./ Его́же моли́ душа́м на́шим пода́ти ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Столп светови́ден, доброде́телию утвержде́н,/ о́блак све́тел, и́же во оте́честве твое́м яви́лся еси́, о́тче,/ к Небеси́ от земли́ Бо́га зря́щих предводя́;/ кре́стною па́лицею страсте́й пресе́к мо́ре/ и, мы́сленнаго Амали́ка отри́нув,/ непреткнове́нный Небе́сный восхо́д обре́л еси́,/ Богоблаже́нне Алекса́ндре,/ и жре́бий непремину́ющ,/ со Безпло́тными предстоя́ Престо́лу Христо́ву, ра́дуяся,/ Его́же моли́ душа́м на́шим пода́ти ве́лию ми́лость.
Сла́ва, глас 6:
Прииди́те, вси концы́ земли́,/ псалмы́ и пе́сньми свяще́нное и честно́е преподо́бнаго торжество́ Алекса́ндра/ дне́сь благоче́стно восхва́лим,/ преподо́бных оте́ц единожи́теля/ и пустынолю́бную добро́ту воспое́м,/ по́стников украше́ние, исто́чника чуде́с,/ к Бо́гу моли́твенника непосты́дна,/ сте́кшеся, о празднолю́бцы,/ пе́сньми похва́льными воспое́м, глаго́люще:/ ра́дуйся, мона́шескаго жития́ пра́вило,/ о́браз и печа́ть изве́стная./ Ра́дуйся, свети́льниче пресве́тлый,/ озаря́я вся́ку доброде́тель светлостьми́ твоего́ жития́./ Ра́дуйся, в беда́х вели́кое утеше́ние/ и те́плый предста́телю предстоя́щим./ Не преста́й моля́ Христа́ Бо́га о ста́де твое́м и всех ве́рных,/ почита́ющих всечестно́е твое́ успе́ние.
И ны́не, Богоро́дичен: Творе́ц и Изба́витель мой, Пречи́стая:
Тропа́рь, глас 4:
От ю́ности, Богому́дре, жела́нием духо́вным в пусты́ню всели́вся,/ еди́наго Христа́ возжела́л еси́ усе́рдно стопа́м в след ходи́ти./ Те́мже и а́нгельстии чи́ни, зря́ще тя, удиви́шася:/ ка́ко, с пло́тию к неви́димым ко́знем подвиза́вся, прему́дре,/ победи́л еси́ полки́ страсте́й воздержа́нием/ и яви́лся еси́ равноа́нгелен на земли́./ Алекса́ндре преподо́бне,/ моли́ Христа́ Бо́га,/ да спасе́т ду́ши на́ша.
Сла́ва, и ны́не, Богоро́дичен: Е́же от ве́ка утае́нное:
НА У́ТРЕНИ
По 1-й стихоло́гии седа́лен, глас 1.
Подо́бен: Гроб Твой:
Многосве́тлая звезда́ мона́шествующим показа́лся еси́/ и степе́нь изве́стен, воздержа́ния же преде́л,/ пресве́тлое зерца́ло разсужде́ния, преподо́бне, па́мять твою́ ра́достно соверша́ющим./ Разреше́ния проси́ согреше́ний, преблаже́нне, Бо́гу предстоя́.
Сла́ва, и ны́не, Богоро́дичен:
Наста́ви ны на пу́ть покая́ния,/ укло́ншияся при́сно к безпу́тием зол и Преблага́го прогне́вавшия Го́спода,/ Неискусобра́чная Благослове́нная Мари́е, прибе́жище отча́янных челове́ков,/ Бо́жие жили́ще.
По 2-й стихоло́гии седа́лен, глас 3.
Подо́бен: Боже́ственныя ве́ры:
Боже́ственным жела́нием безсме́ртия, Алекса́ндре, одержи́м/ и крест на ра́мо взем, в пусты́ню жела́нием всели́лся еси́,/ иде́же, преподо́бне, Го́сподеви собра́л еси́ ста́до./ Те́мже и моли́твенника тя те́пла стяжа́хом ко Го́споду.
Сла́ва, и ны́не, Богоро́дичен:
Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, пе́рсть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
По полиеле́и седа́лен, глас 8.
Подо́бен: Прему́дрости:
Виде́ние и дея́ние восприи́м, чу́вствия, преподо́бне, украша́я,/ житие́ упра́вил еси́ к Боже́ственным повеле́нием,/ мона́хом бо яви́лся еси́ свети́льник пресве́тел, наставля́я нас к позна́нию./ Те́мже, восхваля́юще тя, велича́ем любо́вию исхо́дную па́мять твою́, Богоно́се Алекса́ндре./ Сего́ ра́ди вопие́м ти:/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Небе́сную две́рь и киво́т, пресвяту́ю го́ру,/ све́тлый о́блак воспои́м, неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.
Та́же степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Возсия́ дне́сь пресве́тлая и всепра́зднственная па́мять твоя́, Богоблаже́нне,/ созыва́ющи многочи́сленное по́стник сосло́вие/ и преподо́бных всех ликостоя́ния, глаго́лющи:/ а́ще бо и теле́сне язы́к умолче́,/ но са́ми чудеса́ свиде́тельствуют от гро́ба твоего́,/ и вся же страна́ оте́чества твоего́, пропове́дуя, хва́лится:/ име́ю бо в себе́, рече́, неистощи́мое сокро́вище,/ пречестну́ю и всебога́тую ра́ку моще́й твои́х,/ облагоуха́ющу душе́вная на́ша чу́вствия,/ Алекса́ндре, о́тче наш,/ моли́ Христа́ Бо́га спасти́ся душа́м на́шим.
Кано́н Богоро́дицы со ирмосо́м на 6 и преподо́бнаго Алекса́ндра на 4, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Боже́ственнаго и Пресвята́го Ду́ха блиста́яся благода́тию,/ светоно́сное, Алекса́ндре, и честно́е соверша́ющих твое́ успе́ние,/ све́тлою моли́твою твое́ю страсте́й мглу очи́сти.
От ю́ности, преподо́бне, яре́м Госпо́день восприе́м,/ в бразда́х твоего́ се́рдца пшени́цу се́ял еси́ духо́вну/ и клас пожа́л еси́, утвержда́ющ ду́ши, Богоблаже́нне.
Светоно́сная па́мять твоя́ нам дне́сь возсия́,/ я́ко со́лнечная луча́, Алекса́ндре, исправле́ний твои́х, страсте́й на́ших отъе́млющи о́блак,/ ю́же сотворя́юще, ве́рою тя и любо́вию ублажа́ем.
Богоро́дичен: Зачала́ еси́, Пречи́стая,/ неизрече́нным сло́вом содержа́щаго земны́я концы́ и Сего́ родила́ еси́,/ Его́же моли́ приле́жно поми́ловати нас.
Ин кано́н на 4, глас 2.
Песнь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла;/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися.
Боже́ственную па́мять твою́, Богому́дре о́тче, ве́рно пра́зднующе,/ вся́ческих Го́спода при́сно сла́вим,/ тя просла́вльшаго мно́гими чудесы́.
Безстра́стия жела́нием те́плым, о́тче, одержи́м,/ ве́щныя увяди́л еси́ страсте́й во́лны, Алекса́ндре,/ и дости́гл еси́, любо́вию вперя́емь, присносу́щнаго сия́ния, преблаже́нне, Божества́.
Доброде́тельно изнача́ла прие́м житие́, пребога́те,/ ба́нею, о́тче, пакибытия́, дар духо́вный от младе́нства боже́ственне,/ твоея́ души́ благоле́пие, Алекса́ндре, показа́л еси́, со́лнца светле́йше.
Богоро́дичен: Мла́до Отроча́ па́че сло́ва родила́ еси́, Ве́тхаго Де́ньми,/ но́ву на земли́ стезю́ доброде́телей показа́вша./ Тем уго́дник Твой при́сный Алекса́ндр, Отрокови́це, любо́вию снеда́емь,/ сий храм Тебе́ созда́.
Катава́сия: Крест начерта́в:
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Жезло́м воздержа́ния страстно́е мо́ре, о́тче, раздели́в, преше́л еси́ неистопле́н,/ и преде́л дости́гл еси́ и́стиннаго безстра́стия,/ и, Бо́гу предстоя́, бесе́довал еси́ ума́ чистото́ю.
Кто твоя́ по́двиги, Алекса́ндре, по достоя́нию изрещи́ возмо́жет?/ Ты бо, пути́ жесто́кия в пусты́ни ше́ствуя, су́рово бы́лие ял еси́,/ вкуше́ние же отлага́л еси́ пи́щи боле́зньми воздержа́ния.
Я́ко ма́слина плодови́та в дому́ Госпо́дни, прозя́бл еси́,/ ма́слом трудо́в твои́х, Алекса́ндре, умаща́я на́ша ли́ца;/ пою́щия тя, преподо́бне и Богоблаже́нне, вся ны посети́, моля́ся Человеколю́бцу.
Богоро́дичен: Из Тебе́, Чи́стая, Цвет неувяда́емый,/ благоуха́я все челове́чество Боже́ственным ми́ром естества́ Своего́,/ И́же Отцу́ Собезнача́льный, из Тебе́ быв под ле́том, Де́во Всенепоро́чная.
Ин
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.
По́том воздержа́ния твоего́ пла́мень страсте́й погаси́л еси́/ и одожде́нием моли́тв струи́ чуде́с источи́л еси́,/ боле́зньми разжже́ния погаша́я я́ве, преблаже́нне Алекса́ндре.
И́же к честне́й ра́це твое́й притека́юще, прему́дре,/ от сея́ почерпа́ем исцеле́ния сокро́вище, и чуде́с пучи́ну, и дар незави́стный, Алекса́ндре./ Те́мже, пою́ще, тя восхваля́ем.
Душе́вная чу́вства от ужа́снаго, преподо́бне о́тче, просве́щ виде́ния,/ я́ко чу́ден ра́зум благи́х стяжа́л еси́,/ и́ночества житие́ иму́щим, Алекса́ндре, небла́знено житие́ показа́л еси́.
Богоро́дичен: И́же пре́жде век ро́ждься от Отца́ неизрече́нно,/ напосле́док из утро́бы Твоея́ про́йде и обожи́ на́ше естество́, Ма́ти Де́во,/ И́же преподо́бных ли́ки я́ве изводя́й.
Седа́лен, глас 8.
Подо́бен: Прему́дрости:
От ю́ности вся оста́вль жите́йская, кра́сная же и ле́потная,/ и в пусты́ню всели́вся, усе́рдно после́довал еси́ Зва́вшему тебе́, преподо́бне,/ в труде́х же и посте́х, о́тче, те́ло твое́ изнури́л еси́./ Отону́дуже тя па́стыря свои́м овца́м до́бре устроя́ет всебога́тый Госпо́дь, Алекса́ндре блаже́нне./ Моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ о́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Ве́трилом, о́тче, Креста́, душе́вный твой кора́бль окорми́в,/ благоути́шно же и легко́ жите́йскаго лю́таго потопле́ния избе́гл еси́/ и к тишине́ Боже́ственных извле́кл еси́ приста́нищ, ра́дуяся.
Обрета́я, о́тче, сам себе́, всеблаже́нне,/ всю но́щь стоя́л еси́, я́ко безпло́тен,/ недрема́нно о́ко име́л еси́ и чи́сто, я́коже зерца́ло, духо́вною заре́ю/ и Боже́ственная явле́ния чи́стым по́мыслом прие́мля.
Я́ко Боже́ственный зри́тся рай, прему́дре, храм, име́я в себе́ твои́х моще́й ра́ку,/ цве́ты принося́ чуде́сныя, и́миже сердца́ наслажда́ются/ ве́рою, Алекса́ндре, при́сно хва́лящих тя.
Богоро́дичен: Свята́я Богоро́дице, освяти́ нас,/ Я́же Пресвята́го Бо́га ро́ждши пло́тию,/ уподо́битися восхоте́вша челове́ком,/ и Небе́снаго жития́ вся покажи́, Пречи́стая, прича́стники моли́твами Твои́ми.
Ин
Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Житие́ твое́, Богоно́се преблаже́нне Алекса́ндре, пра́вило изве́стно мона́шествующих бы́сть,/ ему́же ны́не ревну́юще, спаса́емся,/ и́же твои́м после́дующе, о́тче, Боже́ственным уче́нием.
Ду́ха Свята́го зарю́ прие́м,/ звезда́ пресве́тлая, о́тче Алекса́ндре, сия́я благода́тию, был еси́ всем,/ и́хже наста́вил еси́ к спасе́ния приста́нищу твои́ми уче́нии.
Пребы́ти вну́трь ника́коже ми́ра восхоте́л еси́, прему́дре о́тче Алекса́ндре,/ име́я наставля́ющаго тя Бо́жия Ду́ха си́лу,/ в непроходи́мых пусты́нях живы́й и со зверьми́ ходя́ без боя́зни, ю́ноша сый,/ и боле́зньми пита́лся еси́ теле́сными.
Богоро́дичен: Плещьми́ херуви́мски стра́шными носи́м, Влады́ко, я́ко на престо́ле о́гненне,/ в Твою́, Чи́стая, всели́ся утро́бу и пло́ти прия́тием челове́ческое обожи́ существо́,/ я́ко учи́т изря́дный в преподо́бных Алекса́ндр, еди́на Всепе́тая.
Песнь 5
Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя.
Просвеща́емь заре́ю, о́тче, невече́рнею и Боже́ственным облиста́нием,/ бесо́вский мрак и страстну́ю мглу отгна́л еси́,/ и яви́лся еси́ столп светоза́рен,/ ле́ствица вои́стинну, к Бо́гу ве́рныя возводя́щи.
Бодр ум всегда́ име́я, о́тче Богому́дре Алекса́ндре,/ стра́сти успи́л еси́ душетле́нныя,/ к Боже́ственному светозаре́нию хотя́ дости́гнути, к незаходи́маго Све́та све́тлости,/ иде́же есть веселя́щихся жили́ще.
Я́ко очи́стившу помышле́ния, преподо́бне,/ благода́ть тебе́ даде́ся, я́ко проро́ку:/ я́ко настоя́щая, глаго́леши бу́дущая,/ зри́ши же да́льняя, я́ко бли́жняя, Алекса́ндре, Бо́жие оби́телище.
Богоро́дичен: Ро́ждши, Пренепоро́чная, Бо́га Емману́ила,/ и Челове́ка я́ве за милосе́рдие бы́вша,/ Его́же моли́, я́ко Человеколю́бца, Чи́стая, уще́дрити лю́ди согре́шшия.
Ин
Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.
Возжеле́в ум твой храни́ти соблюде́ньми за́поведей, Алекса́ндре,/ и плотско́е взыгра́ние твои́м воздержа́нием увяди́л еси́,/ и па́стырь показа́лся еси́ боголюбе́зному твоему́ совокупле́нию.
Зако́ном Боже́ственным после́дуя, прему́дре Алекса́ндре,/ и повеле́нием повину́яся Сотво́ршаго,/ законополо́жник яви́лся еси́ мона́хов и пра́вило изве́стнейшее,/ наказа́тель безу́мных, и наста́вник заблу́ждших,/ и свети́льник во тьме́ неве́дения, пресла́вне.
Огнь искуше́ний и страсте́й пе́щь слеза́ми твои́х, о́тче, тече́ний/ и духо́вною росо́ю бога́тно угаси́л еси́, соблю́дся неопали́м:/ опаля́емь бо любо́вию всех Царя́,/ ве́щная увяди́л еси́ жела́ния.
Богоро́дичен: Жите́йская не мо́гут уста́ по достоя́нию Тя пе́ти, Всепе́тая,/ вы́шшу су́шу Херуви́м и вся́кия тва́ри./ Те́мже с Боже́ственным Алекса́ндром Влады́ку о всех нас умоли́.
Песнь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Неболе́зненную жи́знь в боле́знех восприя́л еси́/ и боле́зней лю́тых уставля́еши озлобле́ния/ ве́рою прося́щим прия́ти исцеле́ние, Алекса́ндре всече́стне./ Те́мже разреши́ боле́зни на́ша душе́вныя и теле́сныя.
К ра́це твое́й свяще́нней приступа́юще,/ благоуха́ния Боже́ственнаго ра́зума исполня́емся, преблаже́нне Алекса́ндре,/ смра́да избавля́ющеся страсте́й, любо́вию тя чту́щии, о́тче преподо́бне.
Исправля́еши, о́тче, хромы́х и о́чи просвеща́еши слепы́х,/ ходи́ти же твори́ши разсла́бленных о Христе́/ и отго́ниши ду́хи лука́выя, Алекса́ндре преподо́бне.
Богоро́дичен: На Тя, я́ко до́ждь на руно́, сшед, Богоро́дице, Спас/ изсуши́ я́ве пото́ки безбо́жия,/ ду́ши же на́ша напая́я всегда́, при́сно чту́щия Тя.
Ин
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Смы́сленно ты вре́менная проразсуди́в, Алекса́ндре блаже́нне,/ ве́чнующая боле́зньми воздержа́ния дости́гл еси́, о́тче,/ душа́м строи́тель быв, преподо́бне.
Я́ко терпя́щу ти вельми́ по́ты трудо́в твои́х, преподо́бне Алекса́ндре,/ удо́бь воздержа́нием, чу́дный о́тче,/ я́влься, Влады́ка тебе́ Христо́с вруча́ет си́лу боже́ственну/ и сим ти неду́ги повелева́ет цели́ти.
Мона́шествующих наста́вник быв, прему́дре Алекса́ндре,/ су́щих ти единообра́зных ла́вры,/ и о́браз и начерта́ние доброде́тельных дея́ний сый,/ украси́л еси́ вся, я́же во оби́тели супру́жных пребыва́ния.
Богоро́дичен: Нов, я́коже Моисе́й, я́влься,/ устро́ил еси́, я́ко ски́нию, огра́ду, всече́стне,/ ю́же и превозрасти́л еси́ боле́зньми и по́ты твои́ми,/ весь возложи́вся Пречи́стей Ма́тери Бо́жии.
Конда́к, глас 8:
Я́ко многосве́тлая звезда́,/ дне́сь в страна́х росси́йских возсия́л еси́, о́тче,/ всели́вся в пусты́ню,/ Христо́вым стопа́м после́довати усе́рдно возжеле́л еси́/ и, Того́ свято́е и́го на ра́мо твое́ взем – Честны́й Крест,/ умертви́л еси́ труды́ по́двиг твои́х теле́сная взыгра́ния./ Те́мже вопие́м ти:/ спаси́ ста́до твое́, е́же собра́л еси́, му́дре, да зове́м ти:/ ра́дуйся, преподо́бне Алекса́ндре, о́тче наш.
И́кос:
Ка́ко восхвалю́ твоя́ по́двиги и боре́ния, преподо́бне Алекса́ндре?/ Я́ко невеще́ствен ра́зум стяжа́в смире́нием,/ житие́ твое́ препроводи́л еси́ зе́льным воздержа́нием трудо́в твои́х./ А́ще у́бо и челове́к был еси́ естество́м,/ но Вы́шняго Иерусали́ма яви́лся еси́ граждани́н:/ с пло́тию бо на земли́ пожи́л еси́,/ но а́нгельское пребыва́ние проше́д и был еси́ столп, страстьми́ непотрясо́м./ Тем вся Росси́йская земля́, тобо́ю обога́щшися, хва́лит тя/ и ве́рою велича́ет, взыва́ющи тебе́ такова́я:/ ра́дуйся, оте́честву твоему́ похвала́,/ Вели́кому же Нову́гра́ду и всей стране́ Росси́йстей пресве́тлый свети́льниче./ Ра́дуйся, и́же благочести́ва отца́ пресла́вная о́трасль/ и благогове́йны ма́тере ве́твь многопло́дна./ Ра́дуйся, целому́дрия непрекло́нный сто́лпе и мона́хов пресве́тлая сла́ва./ Ра́дуйся, па́стырю Христо́вы огра́ды слове́сных ове́ц,/ и́хже к Бо́жию приводя́ ра́зуму./ Ра́дуйся, ты бо многоча́дну пусты́ню возде́лал еси́ высото́ю смире́ния твоего́./ Ра́дуйся, мона́шествующих всех о́браз доброде́тели и единообра́зных ла́вры спасе́ние./ Ра́дуйся, кра́сное доброде́телей храни́лище и всем, в печа́ли уныва́ющим, утеше́ние./ Ра́дуйся, я́ко, вся ми́ра сего́ мудрова́ния презре́в, стра́сти плотски́я умертви́л еси́./ Ра́дуйся, я́ко А́нгелом собесе́дник бы́ти сподо́бился еси́/ и вся бесо́вския полки́ посрами́л еси́./ Ра́дуйся, ты бо во всех страна́х просла́влен был еси́,/ о Христе́ бо мно́га чудеса́ сотвори́л еси́./ Ра́дуйся, я́ко вои́стинну обре́л еси́ Бо́жию благода́ть/ и со А́нгелы при́сно зре́ти сподо́бился еси́ лице́м к лицу́ Святу́ю Тро́ицу./ Ра́дуйся, я́ко второ́е со́лнце, сия́я чудесы́, всем да́руеши благода́ть исцеле́ний./ Ра́дуйся, преподо́бне Алекса́ндре, о́тче наш.
Песнь 7
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Освя́щься от младе́нства доброгла́сною трубо́ю моли́твы твоея́,/ и непло́дныя утро́бы многопло́дны сотвори́л еси́,/ слепы́м подае́ши прозре́ние и хромы́м благотече́ние, Алекса́ндре преблаже́нне.
Сле́зными излия́нии погаси́л еси́ страсте́й разжже́ния, Алекса́ндре блаже́нне,/ чуде́с источи́л еси́ струи́ присноживо́тны,/ и́миже омыва́ются душ же и теле́с неду́зи, пресла́вне.
Терпе́ние стяжа́в мно́гое, прему́дре, воздержа́ние, ве́ру и любо́вь и́стинну,/ яви́лся еси́ оте́ц си́рым,/ вдови́цам – засту́пник ми́лостив и смире́н, Алекса́ндре,/ мона́хом – сла́ва и похвала́.
Богоро́дичен: Ка́ко дои́ши млеко́м Сы́на, Чи́стая, без отца́,/ пита́ющаго вся́кое дыха́ние, Ма́ти Пречи́стая?/ Ка́ко на руку́ но́сиши вся содержа́щаго?/ Па́че ума́ чу́до Твое́./ Тем пое́м вели́чия Твоя́.
Ин
Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную,/ Сый благослове́н и препросла́влен.
Кре́постию оде́явся, Алекса́ндре, Влады́чнею/ и, я́ко прах, сладостра́стие жития́ попра́л еси́, любо́вию побежда́емь нетле́нныя жи́зни,/ е́йже ны́не и прича́стился еси́, с ли́ки А́нгел, о́тче, сочета́вся.
Крестообра́зно простира́я дла́ни твоя́, Алекса́ндре прему́дре,/ и моли́твы твоя́ возсыла́я Вы́шнему,/ я́ко Христа́, Царя́ сла́вы, со А́нгелы, очи́ма явле́нно, Богоно́се, узре́л еси́,/ и, в пусты́нях непрохо́дных водворя́яся, ища́й Го́спода,/ Боже́ственною тя благода́тию соблюда́юща.
Я́ко звезду́ тя, Алекса́ндре, всеми́рну,/ мона́хов свети́ло незаходи́мое,/ помо́щника в беда́х и гре́шником вели́кое прибе́жище ве́дый,/ хода́тая и моли́твенника тя предлага́ю Влады́це Христу́, всече́стне.
Богоро́дичен: Ви́дети жела́я Твой уго́дник/ Твоего́ Сы́на и Бо́га неизрече́нную сла́ву, Богороди́тельнице,/ Сего́ Честны́й Крест на ра́мо взем,/ после́дова живоно́сным Его́ стопа́м.
Песнь 8
Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Умо́м безстра́стия очище́н, бесе́довал еси́ Го́сподеви Вседержи́телю,/ от Него́же неизглаго́ланно, преподо́бне, науча́емь, проро́чески предглаго́лал еси́,/ просвеща́я ду́ши, я́ко вели́к, всеблаже́нне, проро́к./ Тем тя согла́сно, Алекса́ндре прему́дре, ве́рнии, похваля́ем, пою́ще:/ благослови́те, вся дела́ Госпо́дня, Го́спода.
Подава́я тебе́, я́же проти́ву любве́, Зижди́тель и от ю́ности соблюда́я тя десни́цею,/ ма́лым бы́лием, самовозра́стшим от земли́, пита́ет тя боголе́пно,/ я́ко от младе́нства вся́ко похоте́ние попра́вша и пою́ща:/ благослови́те, вся дела́ Госпо́дня, Го́спода.
Я́ко струя́ боже́ственна исцеле́ний, происходя́щи от ра́ки твоея́, вся исцеля́ет,/ и омыва́ет скве́рны страсте́й, и гное́ние лю́тых очища́ет,/ и ве́рных напая́ет всех сердца́, Алекса́ндре прему́дре, любо́вию пою́щих:/ благослови́те, вся дела́ Госпо́дня, Го́спода.
Богоро́дичен: Вопло́щся Безпло́тный из Тебе́ боголе́пно,/ Его́же моли́, Пречи́стая, стра́сти пло́ти моея́ умертви́ти/ и оживи́ти мою́ умерщвле́нную ду́шу грехми́.
Ин
Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Я́коже мо́лния вели́кими блиста́нии,/ житие́ сия́ющее всем возсия́ воздержа́ния твоего́, Алекса́ндре прему́дре,/ благоче́стно Зижди́телю зову́щим:/ благослови́те, вся дела́ Госпо́дня, Го́спода.
На земли́ я́ко челове́к ходя́, о́тче Алекса́ндре,/ житие́ себе́ на Небесе́х я́ко вои́стинну стяжа́л еси́,/ А́нгелом собесе́дник я́влься, житие́ же и жи́знь соверша́я о́нех./ С ни́миже воспева́еши ны́не:/ благослови́те, вся дела́ Госпо́дня, Го́спода.
Тя, па́че ума́ из Нерожде́нна Отца́, пре́жде век рожде́нна Сы́на,/ сла́вный пропове́да Алекса́ндр,/ и Ду́ха Пресвята́го, Еди́ну Тро́ицу естество́м ве́дый Божества́.
Богоро́дичен: Я́коже Илия́ пе́рвее в Карми́ле всели́ся,/ та́ко и ты, в пусты́нях непрохо́дных упражня́яся,/ возжела́л еси́ осо́бь с Бо́гом жи́ти/ и, богонача́льными озари́вся виде́нии,/ уго́дник яви́лся еси́ Богоро́дице, вопия́ Ей:/ ра́дуйся, Обра́дованная.
Песнь 9
Ирмо́с: Ка́мень нерукосе́чный/ от несеко́мыя горы́́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Твоя́ свяще́нныя и святы́я мо́щи, во гро́бе лежа́ща,/ многоразли́чныя неду́ги исцеля́ют и попаля́ют полки́ бесо́вския всегда́, му́дре Алекса́ндре:/ Бо́жиею бо благода́тию то́чиши всем исцеле́ния, ве́рно тя при́сно блажа́щим.
Струи́ нам исцеле́ний всегда́ честна́я твоя́ ра́ка яви́ся, о́тче,/ страсте́й излия́ние вся́ческих изсуша́ющи/ и вся напоя́ющи ду́ши ко благопло́дию Боже́ственному, прему́дре Алекса́ндре, Христо́в уго́дниче.
Па́мять твоя́ дне́сь, я́ко со́лнце, возсия́, Алекса́ндре преблаже́нне,/ благочести́вых сердца́ озаря́ющи боле́зней твои́х и чуде́с сия́нием,/ я́ко вои́стинну просвеща́ющи, о́тче,/ в то́же вся ны помяни́, ве́рно чту́щия тя.
Богоро́дичен: Глас прино́сим Ти Гаврии́лов, ра́дующеся:/ ра́дуйся, глаго́люще, ме́сто свяще́ния,/ ра́дуйся, преподо́бных сла́во и всех ве́рных спасе́ние,/ ея́же ра́ди обожи́хомся, Богоро́дице Присноде́во.
Ин
Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Стопа́м после́дуя, преподо́бне и Богоно́се, Влады́ки Христа́,/ благоче́стно пожи́в на земли́, кро́ток, незло́бив яви́лся еси́,/ ми́лостив и смире́н, Алекса́ндре, и любве́ испо́лнен Боже́ственныя,/ сего́ ра́ди тя ве́рно восхваля́ем.
Исплете́ся тебе́ вене́ц, я́ко победи́телю, Алекса́ндре,/ живоно́сною и вседержи́тельною десни́цею, о́тче,/ и ны́не пою́щия па́мять твою́ сподо́би, блаже́нне,/ улучи́ти оставле́ние согреше́ний, пресла́вне.
Совокупи́лся еси́ со Безпло́тными во́инствы,/ и преподо́бным лико́м сочта́лся еси́,/ и со избра́нными все́ми лику́еши,/ претво́рся и́стинным обоже́нием и безсме́ртною, о́тче, жи́знию,/ с ни́миже непреста́нно о нас твоего́ Влады́ку умоли́.
Богоро́дичен: Хра́ме освяще́нный, вме́стен Еди́ному от Тро́ицы сый,/ храм Твой, Влады́чице, уго́дник Твой Алекса́ндр че́стен воздви́же в сла́ву Твою́ и че́сть,/ в не́мже не преста́й моля́ся, да́тися нам по́мощи моли́твами Твои́ми.
Свети́лен.
Подо́бен: Ду́хом во святи́лищи:
Благода́ть преизбы́сть Бо́жия в души́ твоея́, прему́дре Алекса́ндре,/ и, я́ко безпло́тен, на земли́ пожи́л еси́./ Тем почита́ющих тя страсте́й изба́ви те́мных о́блак, к ти́хому приста́нищу приводя́/ и отгоня́я ополче́ния бесо́вская Боже́ственною си́лою.
Сла́ва, и ны́не, Богоро́дичен:
Сотвори́ вои́стинну с Тобо́ю вели́чия Сын Преве́чный О́тчим сове́том:/ Жи́знь бо нетле́нную без стра́сти родила́ еси́/ и пребыла́ еси́, я́коже пре́жде рождества́, Де́ва, ма́терских избе́гши боле́зней/ и по рождестве́ Де́вою пребы́вши.
На хвали́тех стихи́ры на 4, глас 4.
Подо́бен: Дал еси́ зна́мение:
Преподо́бне и Богоно́се,/ житие́ твое́ проше́д нескве́рно,/ терпе́ние же, и кро́тость, и любо́вь нелицеме́рну,/ воздержа́ние безме́рно,/ всено́щное стоя́ние,/ умиле́ние боже́ственно,/ ве́ру и наде́жду и́стинну с ми́лованием, о́тче, стяжа́в,/ я́ко А́нгел, пожи́л еси́ на земли́ с те́лом,/ Алекса́ндре блаже́нне,/ моли́твенниче о душа́х на́ших.
Я́ко земны́й А́нгел и Небе́сный челове́к,/ был еси́, прему́дре,/ исто́чник умиле́ния/ и щедро́т струя́ незави́стна яви́лся еси́,/ пучи́на чуде́с, гре́шником испору́чник,/ ма́слина вои́стинну Бо́жия плодови́та,/ ма́слом трудо́в твои́х,/ Алекса́ндре чу́дне, умаща́я сердца́/ ве́рно восхваля́ющих тя.
Преподо́бне и Богоблаже́нне,/ умертви́л еси́ пло́ти мудрова́ние Боже́ственными разуме́нии,/ теле́сных превы́ше страсте́й был еси́,/ и смеше́н до́льними нося́ начерта́ние,/ изобража́я в себе́ Боже́ственную добро́ту,/ и показа́лся еси́ весь светови́ден/ де́йством Свята́го Ду́ха,/ Алекса́ндре, о́тче наш,/ и́нокующим украше́ние.
Исто́чник чуде́с показа́ и реку́ дарова́ний/ ра́ку моще́й твои́х челове́ком Госпо́дь,/ Алекса́ндре прему́дре:/ слепы́м е́же ви́дети сия́ дарова́ся,/ прокаже́нным – очище́ние,/ одержи́мыя нечи́стыми ду́хи/ от тех вла́сти избавля́еши/ и целому́дрие тем твори́ши,/ исцеле́ние неоску́дно.
Сла́ва, глас 6:
Ра́дуйся, по́стником свети́ло многосве́тлое,/ и́ноком звезда́ незаходи́мая,/ па́стырем похвала́, о́тче Алекса́ндре,/ преподо́бным совсе́льниче./ Ра́дуйся, Тро́ицы пресве́тлое жили́ще./ Ра́дуйся, любве́ и ми́лования исто́чниче./ Ра́дуйся, пресве́тлый свети́льниче разсужде́ния./ Ра́дуйся, пра́вило доброде́телей и́стинное./ Ра́дуйся, сто́лпе одушевле́нный./ Ра́дуйся, Вели́кому Нову́гра́ду похвала́ и утвержде́ние.
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся, моли́ся, Влады́чице, со святы́ми апо́столы/ поми́ловати ду́ши на́ша.
Славосло́вие вели́кое. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:
Моли́тва
О свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Алекса́ндре, изря́дный уго́дниче Пресвяты́я и Единосу́щныя Тро́ицы, явля́яй мно́гия ми́лости живу́щим во святе́й оби́тели твое́й и всем с ве́рою и любо́вию притека́ющим к тебе́! Испроси́ нам вся благопотре́бная к житию́ сему́ вре́менному и ну́жная к ве́чному спасе́нию на́шему. Посо́бствуй и предста́тельством твои́м, уго́дниче Бо́жий, на враги́ ви́димыя и неви́димыя, да в ми́ре глубо́це пребу́дет Свята́я Правосла́вная Це́рковь Христо́ва и благострое́нии зи́ждется, во вся́ком благоче́стии неруши́мо. Бу́ди всем нам, чудотво́рче святы́й, помо́щник ско́рый во вся́кой ско́рби и обстоя́нии. Наипа́че же в час кончи́ны на́шея яви́ся нам засту́пник благосе́рдый, да не пре́дани бу́дем на мыта́рствех возду́шных вла́сти зло́бнаго мироде́ржца, но да сподо́бимся непреткнове́ннаго восхо́да в Ца́рствие Небе́сное. Ей, о́тче, моли́твенниче наш при́сный! Не посрами́ упова́ния на́шего, не пре́зри смире́нная моле́ния на́ша и предста́тельствуй за нас пред Престо́лом Живонача́льныя Тро́ицы, да сподо́бимся вку́пе с тобо́ю и со все́ми святы́ми мы, недосто́йнии, в селе́ниих ра́йских сла́вити вели́чие, благода́ть и ми́лость Еди́наго в Тро́ице Бо́га, Отца́, и Сы́на, и Свята́го Ду́ха, во ве́ки веко́в. Ами́нь.
Моли́тва преподо́бнаго Алекса́ндра Сви́рскаго Го́споду Бо́гу и Пресвяте́й Богоро́дице
Бо́же, очи́сти мя, гре́шнаго, и поми́луй мя, и прости́ ми, Го́споди Бо́же, Спа́се Ми́лостивый! Да́ждь ми, Го́споди, христиа́нский коне́ц с Пречи́стым Те́лом и с Честно́ю Кро́вию, со слеза́ми и покая́нием. Изба́ви, Го́споди, му́ки ве́чныя, огня́ негаси́маго, и че́рвия неусыпа́ющаго, и смолы́ кипя́щия. Го́споди, Ты созда́л мя еси́, Го́споди, Ты поми́луй. Го́споди, Твое́ е́смь созда́ние.
Пречи́стая Госпоже́ Ми́лостивая, Цари́це Небе́сная, помоли́ся Го́споду Бо́гу и Спа́су на́шему Иису́су Христу́, Сы́ну Твоему́, за мене́, гре́шнаго раба́ Твоего́ (имя́ рек). Да́ждь ми, Госпоже́, христиа́нский коне́ц с Пречи́стым Те́лом и с Честно́ю Кро́вию и со слеза́ми и покая́нием. Изба́ви, Госпоже́, му́ки ве́чныя, огня́ неугаси́маго, и че́рвия неусыпа́ющаго, и смолы́ кипя́щия. Пречи́стая Госпоже́, Ми́лостивая Цари́це Небе́сная, Ты еси́ Моле́бница ко Го́споду Бо́гу и Спа́су на́шему Иису́су Христу́ за мене́, гре́шнаго и окая́ннаго раба́ Твоего́ (и́мя рек), Ты еси́ Помо́щница, Ты Засту́пница от вся́каго зла и сопоста́та, не забу́ди, Пречи́стая Госпоже́, ни́щаго Твоего́ до конца́.
Посе́м: Засту́пнице Усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к грешне́йший. Вонми́ гла́су моле́ния моего́ и во́пль мой и стена́ние услы́ши. Я́ко беззако́ния моя́ превзыдо́ша главу́ мою́ и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдая Влады́чице, не пре́зри мене́, отча́яннаго и во гресе́х погиба́ющаго. Поми́луй мя, ка́ющагося в злых де́лех мои́х, и обрати́ на пу́ть пра́вый заблу́ждшую окая́нную ду́шу мою́. На Тебе́, Влады́чице моя́ Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м ны́не, и при́сно, и во ве́ки веко́в. Ами́нь.
Та́же моли́тва по вся дни:
Душе́, душе́ моя́, почто́ жа́луешися на Го́спода? Я́ко ле́ность твоя́ ве́чней му́це хода́тай есть. А́ще бы ве́дала дар Бо́жий, пла́кала бы ся горя́щими слеза́ми, стена́ющи со воздыха́нием, скорбя́щи о вся́ком гресе́, о ма́лем и о вели́цем. Возопи́й ко Своему́ Влады́це, да не предвари́т тебе́ я́рость одержа́щаго всеси́льною руко́ю пра́ведною. Аз же, гре́шный и лени́вый и льсти́вый язы́к име́яй, ка́ко помолю́ся Влады́це моему́, да изба́вит мя Госпо́дь от Стра́шнаго Суда́? Всегда́ бо трепе́щу по́мыслом в се́рдцы мое́м о Стра́шнем Суде́, да изба́вит мя от му́ки ве́чныя, и че́рвия неусыпа́ющаго, и тьмы́ кроме́шныя, и от грозы́ несогре́емыя. Поми́луй мя, гре́шнаго раба́ Твоего́ (и́мя рек), я́ко Па́вла апо́стола, его́же любля́ше па́че всех, и от нас, убо́гих, не отврати́ лица́ Твоего́ во он день Стра́шный, его́же трепе́щет душа́ моя́ и соста́вы те́ла моего́ ужаса́ются. Го́споди, изба́ви мя стра́шнаго часа́, да не отпаду́ от ми́лости Твоея́. Но молю́ святы́я А́нгелы и Арха́нгелы, и проро́ки, и му́ченики, и вся святы́я, да мо́лят Бо́га за мою́ ду́шу. Ва́шего ра́ди моле́ния да возврати́т Влады́ка тре́бы Своя́ от мене́, гре́шнаго. И ты, Пречи́стая Госпоже́ Де́во, иму́щи дерзнове́ние к Сы́ну о рабе́х Твои́х, не забу́ди трудо́в раба́ Твоего́ (и́мя рек). Влады́ко Спа́се, от убо́гия души́ Тебе́ молю́ся, изба́ви мя от печа́ли грехо́в мои́х и введи́ в ра́дость безконе́чнаго жития́, иде́же прославля́ется всесвято́е И́мя Твое́, Отца́ и Сы́на и Свята́го Ду́ха, всегда́, ны́не, и при́сно, и во ве́ки веко́в. Ами́нь.
